هنود وكده

ما ان تظهر على السطح قضية فساد (صدفة أو إفتتاح) وتصبح قضية رأى عام يتابع فصولها المواطنون جاذبة إنتباههم وهم يتطلعون لمعرفة (الحاصل بالضبط) حتى يصدر قرار وتوجيه إلي رؤساء تحرير الصحف والتلفزيونات والإذاعات (الخاصة طبعن) يخبرهم بأنه تقرر حظر النشر في القضية الخاصة (بالحاجة الفلانية) وبعدها تسكت الالسن عن الكلام وتكف الاعين عن القراءة ويصبح الجو ملائماً لإنتشار الشائعات وتداول (الشمارات) في ظل عدم وجود المعلومات .
السؤال الذى (يطرح نفسو) هو ما هي الاسباب التي تدفع بالجهات المسئولة الي حظر النشر في قضايا (فساد عادية) لا تتعلق بالأمن العام؟ أو سيادة الدولة أو ما شابه؟ يعنى (تقاوى فاسدة) مثلاً يحظرو النشر فيها ليه؟ أصلوا (تقاوى نوويةًً)؟ أو (مستشار) في وزارة العدل بيشترى للوزارة حاجاتا من (السوبرماركت بتاعو) أها زى دي يحظروا فيها النشر ليه؟
آخر القضايا التي شملها قرار حظر النشر هي قضية (مصنع سكر النيل الأبيض) والتي تصاعدت أعمدة دخانها قبل أيام لتدخل هي الأخرى مقبرة لجان التقصي والتي تحتوي على (رفات) عدد من القضايا اشهرها (الكسرة الثابتة) !
العبدلله يفهم أن يتم حظر النشرفي قضية ما إذا كان هنالك تحقيق جنائي (شغال) وذلك مراعاة لظهور الحقيقة كما هي دون تأثير على مجريات الأمور أو حرصاً علي مقتضيات الأمن القومي أو حفاظاً علي الآداب العامة أما في مثل حالات الفساد الإداري التى نشهدها مؤخراً فالعبدلله يعتقد أن تناول (الصحافة) والإعلام لها قد يفيد في كشف ملابساتها لما للصحافة والإعلام من أذرع وخبرة في تقصي الخبر (لكن كيف مع الحظر ده؟) !
لقد بدا لي ان مثل هذا القرار لا يتفق مع المفاهيم التي كفلها القانون والتي تقضي بحرية تداول المعلومات؟ مما جعلنى أسأل نفسي سؤالاً بايخاً (هل الخواجات عندهم قرار زى ده؟) .. وحتي أجد إجابه لهذا السؤال قمت بإستخدام السيد قوقل وكانت النتيجة التى جعلتني أعود مجيباً نفسي (هو لو عندهم جنس الغتغيت ده كان حالهم؟) .. مما يعني ان هذا القانون قد تم تفصيله وخياطته على يد (ترزيتنا) الأماجد !
ولعل ما يدهش تماماً هو قول البعض بأن (حظر النشر) يقع في مصلحة العدالة وعدم التأثير على مجريات التحقيق بينما لا تظهر للتحقيق اى نتائج (ويموت الموضوع) ويصبح (حمدو في بطنو) وكسرة ثابتة أزين بها مقالي !
في رأئي المتواضع إنو طالما النتيجة معروفة وهى (حظر النشر) في أي قضية تفوح رائحتها فـ مافيش داعي (كلما تظهر حاجة) تقوم الجهات المسئولة بتعميم توجيهاتها بعدم النشر (خلونا موضوعيين وواقعين) مفروض المسئولين يشتروا دماغهم ونحنا نشتري (دماغنا برضو) ويصدر قرار لكل الصحف والوسائل الإعلامية بعدم النشر او الخوض مستقبلاً في أي قضية فساد ويخلونا ساكتين سااااكت وخاتين (الخمسة في الإتنين) !

كسرة :
بعد إمتلاء مقبرة لجان التقصي برفات القضايا أقترح الإتجاه للحرق بدلاً عن الدفن (عشان نحنا بقينا هنود وكده) !

كسرة ثابتة :
أخبار خط هيثرو شنووووووووو؟

Advertisements

40 تعليق

  1. السلام عليكم ، تانى برنجيه …………. عجبى

  2. و الله عجبتني عبارة خاتين (الخمسة في الإتنين), اول مرة اسمعها
    كسرة:
    انت داير عشرة عشان يقفلوا الاتنين هههههه

  3. والله يا بروف بدل ما تمسك فى كسرة واحدة …..خط هيثرو …. خط هيثرو , أحسن تكون الكسرة أخبار لجان التقصى شنو قبل ما نكسر الحظر حيث ان خط هيثرو لا يقارن بالمدينة الرياضية و لا الحكومة الالكترونية ولا ولا ولا ولا ولا ولا ولا ول اولا ولا ولا خلوها مستورة

  4. والله يا بروف دي قصة غريبة عشان كداممكن تريح بالك من التفكير.في صياغة مقال كل يوم وتعملو كل كسرات ثابتة..نحن المغصة كاتلانا وحرق البرنجي كسرنا وهدانا واعصابنا بقت تلفانة..عشان كدا صدق القائل لقد اسمعت لو ناديت حيا ولكن لا حياة لمن تنادي..

  5. نهى قانون نهى تم همارى

    1. هو القانون في لكن الشغال بيو منو ؟؟!!!

      1. ما اهو قال ليك : تم همارى

  6. السلام عليكم ، البرف و الاخوان ، اولاً بالتبادى الرئيس مافى داعى يدخل فى قضيه زى دى !!! عادى مصنع فى التجارب و تشغيله تاخر ولا تعطل ، شنو يعنى ؟؟؟ الحاجه البنعرفها انو المصنع ده مفروض يشتغل اول مانيوال ( اقصد يدوى ) حتى بعدين اتو ( آلى ) لأنو فى دوائر ما محتاجين ليها ، فى غيرها بتعمل انذارات ماضروريه و هلمجرا … لكن اول ما يعملو منها قصه تبقى الاشكاليه ماهى تشغيل ولا سوفت وير ، لانو معروف عن الهنود انهم هم الذين يغشون ، وهم اللى عايزين يطلعوا باكبر ارباح ، فلماذا يدفعون الاف الدولارات للسوفت وير و ممكن يشغلوا لمدة شهر بالتجريبى ، و دى حاصله فى الوقت الحالى ، و عشناها ، و قربنا نتضارب فيها ، لكن ما دام المسؤلين ماخدين المعلوم فنحنو ننكتم ، سعال : هل فتشوا المؤسسات التانيه على السوفت الاصلى ؟؟؟ …………….عجبى

  7. البروف والاحباب..سلام…
    اريتنا كان كنا هنود كان حكومتنا احترمت نفسها وعزلت بدريييييييي..
    بعدين منعغ النشر دا اى زول عندو واسطة ممكن يمنع النشر ! وما عايز اذكر قضايا باسماء لكن يشهد الله كان راجعتوا نفسكم شويييية بتعرفوهم !
    اللبان الاسرائيلى-سوق المواسير-واحة الخرطوم-المدينة الرياضية-ابراج وزارة الدفاع……الخ الخ الخ الخ الخ الخ

  8. كوكو…
    لكن ما بقيت تعملها ظااااااااااااااااااااااااهرة ! البرنجى دا تقيل خفف منو شوية !

    1. د / شمباتى اخير ليك كلام السلاوى ، حسه قاعدين نفتش فى البرنجيه التالته ، كان الخفيف بينفع خصوصا خصوصا كان عامل ريجيم ………….عجبى

  9. البرووف والسمار .
    كيف حالكم .
    والله ياجماعه قصة حظر النشر لفضيحة مصنع النيل الابيض غيرمهضومة لكن الشى الهارد كبدتى ومورم فشفاشى الناس ديل عارفين إنو حكومة الجنوب عاملة حشود على منطقة هجليج بيخلوهم نامن يضربوها ويعدموها نفاخ النار لى درجة خروج كل الجيش السودانى منها .
    أحيييييييييييي عليك يابلد…..

    1. لا ياخ … ما هم كانوا عاااااااااارفين …. لكين كانوا عاوزينهم يغلطوا غلطة زي دي عشان يمسكوهم بالثابتة وكده , زي ما ناس العدل والمساواة دخلوا أم درمان قبل كده وقالوا لينا نحنا كنا راصدنهم بالأقمار الصناعية السودانية ههههههههههههههههه

      واحد ود حلال يلمني في ( عبدالرحيم حسين )

  10. اخى جبرا والاخوه الاعزاء
    سلاماااااات
    (للحرق بدلاً عن الدفن )اهن الرماد ح نوديهو وين ح نطره نكبه فى النيل والنيل بيسقى المزارع والمزارع زارعه قصب السكر ومصنع السكربتاع النيل وقفوهو نعمل شنو نعمل شنو نعمل شنو
    ايوه نكب الرماد فوق راسنا ونقول وب على وبعلى ويييبيو واحى احى يالقصب الني

  11. بعد إمتلاء مقبرة لجان التقصي برفات القضايا أقترح الإتجاه للحرق بدلاً عن الدفن (عشان نحنا بقينا هنود وكده) !
    يا بروف دي ركازة الحديث كلو
    كسرة : عندنا عمنا الكبير جنو نضمي وكلامو كتير … يبدا معاك الموضوع ويدخل بي حمد ويمرق بي خوجلي وفي النهاية يقول ليك : الغرض ويديك الخلاصة.

  12. الحكومة بتمنع النشر وتقتل التحقيق لأنها
    عارفة انو مهما تفتقت عقليتنا وخيالاتنا
    في الاشاعات والشمارات حيكون أخف مما سيظهره
    التحقيق وبتشوف انو الاشاعات اخف ضرراً…
    نحنا هسع من كتر لوليح راسنا من محن الحكومة
    ما بقينا زي الهنود …
    انا خايف يجي يوم والصحف تتنافس في كشف صلاح
    الحكومة …
    الحكومة عبارة عن مجموعة أُسُود والمجموعة لما
    تصطاد فريسة بتخلي الاسد قائد المجموعة هو
    البيبدأ الاكل وغالبا ما يشيل الكبده وبعده
    تجي بقية المجموعة تاكل حسب ترتيب المكانة ولو
    مسكنا اصغر شبل لحس عضم الفريسة بنقدر نعرف
    الاسد الكبير منو !! عشان كده الاشبال محاطة
    برعاية كبار القطيع …
    كوكو … ماشه معاك عسل .. مع اني كنت ناوي
    ليها وصحيت بدري لكن ( كفيل هادا مافي كويس
    في سوي تلفون كتير وزيادة قر قر بعدين مزاج
    في خربان مره .. انا كفيل سمسم مؤتمر وطني )

    1. سلام جنوبى ، كفيل هادا مافى زين بابا ، انا يمشى سيدا مافى منى منى ، ليكن كفيل يريد فنش بابا ايش سوى؟؟؟؟؟؟؟؟

  13. كوكو وجنوبى….
    امممممممممممممممممممم,طيب ما تبانوا وخلونا نتلاقى ! الكترااابة..

    بت وراق…
    ايوة,,وبعلى وحيعلى حتى تجدى مغيثا او مجيب..

    1. د. شمباتي .. لاكين من عربي جوبا بتاع كوكو
      يظهر انا وكوكو ما في مكان واحد ..
      معلوم رياظ ؟ انا في موجود ..

  14. ياسين شمباتى
    صوتنا هناك وهنا مكتوم
    ومافى فرق فى الوقت الراهن بين واشنطن والخرطوم
    ………
    قلنا المصنع حق الدوله…والعمال اصحاب الحق
    هى البتحدد سير المصنع…ايد العامل هى العاد تنتج
    ما المكنات الامريكيه
    زيت العامل ياهو البطلع…..
    مو المكنات الامريكيه
    ……
    سابني اشوف الدنيا كويس
    واعرف غلط الصاح مظبوط
    كلمات الشاعر حميد جات فى خاطرى وانا ما لاقيه مقيث او مجيب

  15. سلام للجميع
    يا جماعة خلونا نعاين للجانب المشرق فى الموضوع ، الحكومة ما عاوزة الناس يصدعوا راسهم بمجريات التحقيق وكده ، عاوزة تديكم الخلاصة ، ما قل ودلّ .. بس متين الخلاصة حا تظهر لانو فشفاشكم انهرد وانفرم فاضل طلوع الروح والحكومة منتظرة ده .. تاني الجانب الأكثر إشراقاً أن تكون هذه الملفات مغتغتة لحدى ما يطلع الفجر الغاضب والحساب حا يكون عسير لحظتها ولو حرقوها حا نضيع علينا الفرصة فى محاسبتهم على كل ملين نهب من الشعب .. وحسبنا الله ونعم الوكيل

  16. حاج أحمد السلاوى | رد

    يا جماعة الخير .. شايفكم قايمين على الهنود قومة شديدة ..بس ما تنسوا إنو الهنود ديل قارة كاملة ,اكبر دولة ديمقراطية .. ( سمعتوا يوم إنو حصل إنقلاب عسكرى فى الهند ؟ وأسالوا عنها أخوكم اب احمد ,وأخوه منير درسوا فيها وعاشوا فيها حيناً من الدهر.. وبلد صناعى متطور بيصنعوا عربات ومعدات أما الكمبيوتر دا فهم أسياده وأمريكا بجلالة قدرها فتحت ليهم الكرت الأخضر عدييييييل كدا فى مجال الكمبيوتر ….وعندهم قنبلة نووية ( نحنا عندنا شنو ؟) واكيد عندهم فساد زيهم وزى الناس التانيين ..وجو لقوا عندنا مناخ الفساد ملائم وعاوزين يطلعوا ليهم بقرشين حلوين ينفعوهم لليوم الأسود..أها قاموا إتعكلتوا مع الجماعة إياهم وأدوهم الفيها النصيب وقالوةا اصلها خربانة خربانة وما فى زول حيعرف حاجة وعارفين إنو الحكومة حكمنع الناس يتكلموا أو يكتبوا عن موضوع المصنع فكانوا مطمئنين خالس ..لإلى أن وقعت الطامة الكبرى ..
    لجان التحقيق بتكتب نتائج تحقيقاتها قبل ما تعقد أول جلسة ويتموا الباقى ونسة وشراب مرطبات وطق حنك ويطلعوا بالفيها النصيب (اللهم لا حسد .. وكلو أرزاق من عند الله .. ).
    اين نتيجة التحقيق فى غزوة خليل ابراهيم لأمدرمان؟
    أين وصلت التحقيقات فى الهجمات الصاروخية على مدينة بورتسودان ؟
    أليس من حق الشعب أن يعرف الحقائق ؟ولا بس المسألة دفع جبايات وضرائب ولامن تقع حاجات زى دا زول يفتح خشمو ما فى ؟فى الدول اللى بتحترم مواطنيها ودافعى الضرائب أى مواطن عادى ممكن يرفع قضية على اكبر راس فى الدولة إذا وجد تقصير .
    وخلونا النشوف آخرتا شنو ..

    1. السلاوي .. باقي ليك لجان التحقيق دي مش
      بتكلف الشعب اكتر من الشئ المنهوب ؟
      وعلي قولك اهو كلو ارزاق ومصائب قوم عند
      قوم فوائد .. انت صحي اعضاء لجان التحقيق
      ديل متطوعين ولا بيقبضوا ؟

    2. سلاونجي … باقي لك هي فيها آخر تاني غير الشايفنو ده … ما هي الآخرة ديك ذااااتا أظنها قررررربت هههههههههههههه

  17. والله صدقت يا حاج أحمد السلاوي .. يعدوها شراب عصير ومرطبات وشاي .. والشاهد على ذلك المفاوضات الكانت زمان مع جون قرنق .. الوفد بتاعنا بيلعب فى الكشاتين وفى المساء الراجل الكبير يقول ليهم والله اتفقنا مع الدكتور على كدة وكدة والجماعة قبل ما تحرق العشرة يباركوا الخطوة وسير سير .. لحدى ما فصلوا الجنوب من السودان .. والجاى أكتر الله يستر

  18. إذن الخطوه الجايه منع نشر هزائم الجيش السوداني (بل مليشيات الجبهه)فى هجليج

  19. الحكومه دي البشيل ليها سلاح منو و نحارب عشان شنو.دي بلدهم هم احاربو هم عشانا اما نحنا نازلين في فندق درجه عاشره اسمو بلدنا ندفع مقابل وجودنا ذي السياح واحد و مقابل خدمات رديئه و غالبا معدومه اصلا ان شاء الله الحركه تعدمنا طفاي النار

  20. حظر النشر = فقه السترة

  21. حاج أحمد السلاوى | رد

    من المضحكات المبكيات .. حدثنى أحد الإخوة أن كثياًر من الدلائل تشير إلى تورط شركة مصنع كنانة فى تأخير إفتتاح مصنع النيل الأبيض لأن شركة كنانة شريك فى مصنع النيل الأبيض ومساهم بما قيمته 30% وبالتالى مصنع النيل الأبيض حيكون منافس رئيس لكنانة ..
    أنا غايتو أتفق مع الأخ فيما أفادإلأى حد ما … لكن فى حيرة من أمرى هل بلغ بنا السؤ والسفه والحسد أن يعارض مصنع قيام مصنع آخر لنفس المنتج بحجة المنافسة ؟ أليس من الممكن أن نصدر ما يفيض عن حاجتنا ( دا لو فعلن الإنتاج كفى أهل البيت ..) إلى الدول المجاورة ( بالعملة الصعبة …وكدا ..ودى فيها نكتة أحكيها ليكم فى نهاية المداخلة ) غايتو لو بقا الكلام دا صحيح لابد أن تطير رؤوس للصالح العام ..كما طارت كفاءات نادرة فى بداية حقبة الإنقاذ وبرضو للصالح العام .. وإلا على السودان الحبيب السلام ..

    نكتة العملة الصعبة ..فى الزمان الغابر كانت العملة الصعبة ( دولار … ريال ( مش ريال مدريد) إسترلينى ..فرنك ( من أى نوع ) ممنوعة دخولاً وخروجاً لجميع المسافرين سودانيين كانوا أم اجانب ولابد من عمل إقرار بما لديك من العملة الأجنبية .. ففى إحدى الرحلات جاء أحد إخواننا الخليجيين زيارة للسودان وكان يحمل معه عملة صعبة ( عادى بالنسبة ليهو وما عارف معنى إصطلاح عملة صعبة من اساسولأنو مسموح بيها فى بلده وما فى عليها اى قيود ) فساله ضابط الجمارك : معاك عملة صعبة فرد عليه الحليجى بالنفى ..وفى إثناء التفتيش فى عفش المسافر وجد ضابط الجمارك كمية كبيرة من الدولارات والريالات فى حقيبة المسافر .. قال ليهوأنا مش سألتك إذا كان معاك عملة صعبة وقلت مش معاك طيب دى إيه دى ؟ فرد عليهو الخليجى بإستغراب شديد أيوة دى عملة وإيش الصعب فيها؟؟؟؟

  22. حاج احمد سلامات
    والله العمله دي صعبه صعوبيييييييييييه طارت فيها رقاب

  23. دا كلو كوم وهجليج كوم تاني !!! ويا ربي للجهاد هيا يا عباد الله الكانو بيرددوها في التسعينات حترجع تاني وأنا شخصيا ما عندي أي تررد أو مانع للجهاد بس عندي شرط واحد وهو : أسمع باستشهاد عم عبد الرحيم وبكوري ونافع – والأهم والمهم يكون معاهم الطيب مصطفى سبب بلاوينا ومصايبنا مع الجنوبيين وحفيرو ونخيسو حتى بعدما انفصلو ما داير يخليهم في حالهم – أو ما استشهاد أسمع بأنو مشو عمليات وجابوهم في السلاح الطبي بس ما يكون بملاريات وحميات وكدا رصاص عديل أو رايش من الأسلحة التقيلة المهم مايقدرو يتخاطبو لاباليد لا باللسان مع زول – وبعد كدا معاي الف دباب ومجاهد حنمشي نرجع هجليج ولو دايرنها لنمولي نرجعا للطيب اقصد للشعب المسكين

    1. حاج أحمد السلاوى | رد

      إيهاب .. وكمان أولادهم القاعدين برة البلد يرجعوهم عشان يمشوا يحاربو ..البلد مش برضو بلدهم وليهو حق قى رقبتهم ..؟

      1. ديل ما بندقوا سوط ديل بدقوا الدلوكة
        ويزغرتوا للبقلعوا السوط ..
        الحاج ادم وينو اول مره اعرف انو هجليج
        ابعد من جوبا مش قال جوبا قريبة !!

  24. نحنا عاوزين اولاد المسئولين الفي ماليزيا عاملين حي فاخر هناك ديل ارجعو للبلد عشان نحارب معاهم!!!

  25. جبرا — قلبك ماحمل السكات وخت الخمسة فوق الاتنين عشان كدة فضفض ولاعليك خليهم يحظروا زى مايحبو — من الكسرات المضافة (هجليج كيف ) حقو بعد كدة تخلى البوستات وتدور كسرات بس
    الكسرات كترت يا ابوعلى

  26. جنوبى..
    فى معلوم رياظ,,انا فى مكة,,انت ما يجى سوى أُمرة !!؟

    بت وراق..
    ودرن العامل هو العام يطلع مو المكنات الامريكية…
    ومافى فرق فى الوقت الراهن بين واشنطن والخرطوم..
    وانا مأزوم مأزوم مأزوم..
    طوووم طوووووم طوووووووم…

  27. البشاوى…
    هههههههههههههههههههه,,ذكرتنى نكتة الادروباوى مع الفلسطينى (الاسرائيل كيف) ؟؟مع اشارة خبيثة باليد ! هههههههههههههههه

  28. الحبيب
    مقصه ساااااااااااااااي ما داير اكتب شى بث

  29. عجيب البيجيب قضايا الفساد ( ديل الصغار ما لقوا حاجه مع التماسيح قالوا نهدها على الكل ) تعليقاتكم عجيبه وكدا
    كسره :
    قضية الاقطان وصلت وين

  30. وطيب سؤال…….الجماعة اياهم بقروا الكلام والتقد فى الصحف والاعلام؟؟ وهل بتاثروا وبغيروا من احوالهم؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: