تعليم إنما أيه

كنت أظن وليس كل الظن إثم بأن التعليم في بلادنا قد إنهار وأن أركان العملية التعليمية قد (لحقت الصح) لولا أنني بين شوطى مباراة القمة أول أمس عدداً من الإعلانات (التجارية) لأكثر من عشر مدارس كل مدرسة تقول للتانية (إنتي وين) .. أكاديمية ايه كده مش عارف ا(الحديثة) ومدارس مين كده مش عارف (النموذجية) ومؤسسة مين كده (التعليمية) !
مدارس خمس نجوم .. الكاميرا تتجول وسط الفصول .. المكيفات و(الأسبليتات) والأرضيات (السيراميكية) .. كل طالب (ما شاء الله) يجلس على كرسي مريح وأمام درج (إنما أيه) .. تدلف الكامير إلى قاعة فخمة تتناثر عليها أجهزة (الحاسوب) والطلاب منهمكون فى تشغيل (الويندوز) ومواقع التواصل الإجتماعي والصفخات العلمية .. ثم تدخل الكاميرا إلى أحد مكاتب المعلمين حيث تقوم بالتركيز على الأثاث الفاخر من دواليب زجاجية حديثة تحتوى على أحدث الوسائل التعليمية بينما المعلمون منهمكون في تحضير الحصص وأمام كل واحد (لابتوب) آخر موديل ..
الكامير تركز على لافته مكتوب عليها (العقل السليم في الجسم السليم) ثم تنتقل إلى ميدان (الباسكت) و(الطائرة) والطلاب يمارسون هوايتهم .. تنتقل بعد ذلك الكاميرا إلى قاعة إجتماعات فيها يجتمع مجلس الأساتذة يتوسطهم (المدير) والإبتسامة تعلو شفتيه (ما مرتاح وكده) والجميع طلاب ومعلمين (نايرين ونضيفين) .. ولا تنسي الشركة (أقصد المدرسة) أن تبث في نهاية الإعلان الجائزة التى تنتظر الطالب إن إستفاد من هذا الجو التعليمي الصحى وهي عبارة عن عربات (موديل السنة) تمنح للخمس الأوائل ! فتقوم الكاميرا بالتركيز على الطلاب الفائزين وهم يستلمون مفاتيح العربة ويجلس كل واحد منهم أمام (الدركسون) متهيئاً للإنطلاق ! يتبع ذلك ظهور أرقام الهواتف التي يجب الإتصال عليها إذا أراد المواطن أن يضمن مستقبل إبنه ونعم المصير !
على قناة أخرى هى قناة (الواقع المر) .. كانت تبث ذات الإعلانات التى تعلن فتح باب القبول للعام الدراسي الجديد فها هي مدارس (الشعب الفضل) تعلن كافة الطلاب الكحيانيين من ابناء (مهدودي) الدخل والمعدمين أن يقوموا بالتسجيل .. نحن نتميز بفصول (آيلة للسقوط) من غير شبابيك ولا حتى أبواب وإنتا وبختك مرات سقف (في) ومرات (مافي) ..
لدينا مراحيض غير ادمية تبعث على التقيؤ وتزكم رائحتها الانوف .. وتتسبب في إثارة (الربو) وخمة النفس والذبحة الصدرية وكافة أنواع الجلطات .
مدارسنا تهتم بالرياضة كرياضة (النط من فوق السور) .. كما أن لدينا مقررات دراسية لا يستطيع حملها (خليك من قرايتا) إلا عتاة الجبابرة وأبطال المصارعة الحرة .
لدينا معلمون لكافة المواد والتخصصات لم يقبضوا رواتبهم لأكثر من عامين لذا فهم أكثر حماساً لتعليمكم في هذه الجو الدراسى المثالي على الرغم من أنو (أخلاقهم في راس نخرتم) من الفلس .
نحن نؤهلكم للالتحاق بصفوة كليات (الضلله) بنين و(الشرشحة) بنات .. وجميع كليات (الصياعة والضياع) قسم الوقوف في الإشارات وبيع (الكلينكس) !
.. لا تحلم عزيزي الطالب بشئ إسمه كرسي لتجلس عليه لأنو (المعلمين ذاااتم ما عندهم) شوف ليك كم طوبه وأقعد عليهم .. ثم إنتا ذاااتك القاعد ليها شنو أساتذه يدرسوك ذاااتو مافي والكتب ما جات من الوزارة .. لن تشعر عزيزي الطالب بالوحدة مطلقا ففصولنا ذات كثافة قياسية (3 طلاب كل سنتيمتر مربع) لذا نحن ننصحك لو بدت عليك علامات الإختناق من عدم توفر الأوكسجين أن تطلع بره الفصل (تجر ليك نفس) وترجع وللا أحسن ذاتو ما ترجع وتمشي بيتكم على طول.

كسرة :
ميزة التعليم الحكومى انه يضع الخريج على أولي عتبات التعليم !

كسرة ثابتة :
أخبار خط هيثرو شنوووووووو؟

Advertisements

48 تعليق

  1. برنجييييييييييييييييييييييييييية

    1. د / شمباتى مبروووووك ، ان شاء الله عقبال امنيات حاج السلاوى ، آمين آمين آ ميييييييييييين

    2. شمباتي .. سلام … سعيد وبخيت عليك .. عقبال نبارك ليك وانت متصور معاها جمب دبابة في ميدان المولد او الخليفة او عقرب المهم أي ميدان نكون فيهو والجيش حامينا ..

  2. والله يا بروف انا ما واجعنى شئ غير (مشروع اجلاس الطالب ) و (وجبة افطار طالب ) !
    قمة الحقارة والسفه , يعنى الطالب جلوسو دا ما من حقو ؟لمن يعملوا ليهو شمروع وعربات وقومة وقعدة؟ولا الفطور كمان !! يعنى عارفين الطلاب جيعانين واهلهم فقرانين وبرضو يحشروا نفسهم فى حرب وكدة ! اححححححححححححححححح

  3. سلامات،، ياحليل ايامي في مدارس زمان :: الخرطوم شرق الابتدائيه(بنك البركة حاليا)،الخرطومالاميريه،بحري العليا الحكوميه،،كان نسيج اجتماعي جميل غني وفقير ،والله العظيم ما كنت بعرف شنو معني شايقي ولا دنقلاوي ولا جعلي ولا كردفاني ولا دارفوري ولا جنوبي وكان نسيجا اجتماعيا فريدا وكنا ناكل نفس الوجبات المدرسيه معا وكنا نتشارك في فول الفطور يوميا،، كانت ايام جميله اعتز بها ويعتز بها بنو جيلي،،لا زلت اذكرهم جميعا بكل فخر واعتزاز،، هل يعود التعليم الي سيرته الأولي

      1. حاج أحمد السلاوى

        الأخ طارق بابكر عبيد ..تعرف أنا اسمع زول يتكلم عن الزمن الجميل داك ,يقول المدرسة الإبتدائية الفلانية والمتوسطة الفلانية برتاح جنس راحة ..أخوك الفقير إليه تعالى من خريجى الخرطوم غرب الأولية (1 ) والخرطوم الأميرية ..
        غايتو حقك محفوظ وحنكتب إسمك بقلم الحبر فى القروب ( A) ..
        وما تقطع الجوابات ..

      2. الاخ احمد السلاوي نحن في الخرطوم شرق الابتدائيه كان ناظرنا عمر أرباب وكان اساتذه الحساب مش الرياضيات زي ما بقولوا الايامات دي استاذ عبداللطيف والذي اصبح فيما بعد مدير البنك الفرنسي وكذلك من المدرسين أتذكر استاذ حسن وكان عندو موتر فيزبا وبتذكر استاذ الجمري و الأمين أرباب وياسلام يا فرده

  4. أيامنا الزمان يا حليلن بروف جبرا

    يا حليلا ويا حليلااااااااااااااااااااااااااااااااا

    انت شفت مدارس الخرتوم بكان الريس ينوم والطيارة تقوم

    والله يمسكك اسهال تلات يوم وكلى ووجع قلب دائمين لو شفت مدارس في الشمالية وشمال كردفان وجنوب كردفان ونهر النيل والنيل الازرق وسنار ديل الانا شفتهم

    ياخي والله بروش السعف قاعدين فيها تلاميذ والجزء الاكبر واطة ساكت

    والقاعدين في مقاعد مقد متر ونص فيهو 7 شفع – والثانويات تجيب كرسي من بيتك او تشتري والكتب والكراسات عليك وان عندك تقرا ولوما عندك مع السلامة ووزارات التربية في الولايات دي اكتر ناس مرتاحين وان مشيت طالبتهم بشي يا حليلك وسواد ليلك

    وفي الشمالية شعار أحلى من أثاثات بيت وزير التربية بالولاية ( النهوض بالمستوى والعودة للصدارة )

    وشر الدروس الخصوصية اتنقل لولاياتنا يعني بعد كدا ناس نورين ومسكة وست الدار ما بياكلن عيش مع ناس سهى وتماضر ونور ونون ومآب
    وكسرة أخيرة : إذا أردت أن تفتح لك أبواب الدنيا بمصراعيها فكر في مدرسة خاصة أو حتى روضة خاصة بس أولا حق التسهيلات ناس الوزارة يعني برا – لو ماعندك قروش بتسهل معاك

  5. السلام عليكم ، البرف و الاخوان ، انا من الخرتوم شرق جنب اجزخانة العاصمه المثلثه ، والفطور عند ماهر و الاميريه بالجنب التانى لحد ما حولوها ، وعمك بتاع الراى العام قاعد فى الضل بيقرا ولا بيراجع فى الجريده ، ثم لاحقنا الاميريه جنب مدرسة الصحه ، الناظر رحمه الله ( احمد سليمان ) كان المدرسين همهم التلاميذ ، وصار الان همهم القروش عشان يعيشوا زى باقى الخلق ، المعلم و العسكرى اذا لم يكتفوا ماديا تبقى اكبر مشكله ، مهندس خريخ مسجل فى المجلس الهندسى تقول ليهو 20X12 يطل

    1. يطلع ليك الموبايل ، سعال : الحركه الشعبيه جناح الشمال عايزين يحرمونا من البترول الشويه ده ؟؟؟ المفروض نقوم باحتلال ولاية الوحده عشان يعرفوا …………….. عجبى

    2. حاج أحمد السلاوى | رد

      كوكو .. شكيتك على الله ..إنت كنت موجود فى عهد الناظر أحمد سليمان وعم ماهر والمراسلة عم سلطان ..ابو نضارة زى قعر الكباية ؟ كنت فى شرق ..ولا غرب ؟ هل حضرت زمن الأساتذة الأجلاء عبدالوهاب رستم .. محمد طه عبدالعزيز ؟
      الله يجازيك ويجازى محنك ..يا عجوز ..

  6. م / ايهاب دنقلا ، سلام ، اكان كدى انت ما شفت مدارس دار السلام و النيل و التكامل بشرق النيل ، الابواب و المبانى طول الشفع بس ، يعنى اعلى فصل متر و نص ، ومره فى برش و مره مافى ، اسمها المدارس ذات الخصوصيه ……………… عجبى

  7. سلام ياقبيلة،،،،،
    السمار الأكارم بنو الكرام، كلامكم كلو في محلو، وعداهو العيب، بس مش أنتو ملاحظين أنكم كلكم متفقون علي تدني وتدهور البيئة التعليمية والصحية في البلاد!!!!
    فهذه الأشياء لا يمكن للمواطن توفيرها فهي مسئولية الدولة (التعليم والصحة والأمن)، ولكن ان يصبح هذا جزء من الأستثمارات فهذا مالا يقبله عقل ولا دين.
    طيب المطلوب شنو علشان الحكاية دي تتصلح وتنعدل في ظل ظروف محيطة وتكالب قوي معادية لا تفرق بين ماهو صالح أو طالح!!
    كونوا ناس عقلانيين وفكروا بعقل راجح وفكرٍٍ ثاقب ونظر بعيد، فالأمر أصبح لا يحتمل، ولكن كيف المخرج؟؟؟؟
    الذي نراه ونشاهده بل في حقيقة الأمر نعيشه واقعا” معاشا” ما هو ألا بسبب ما كسبت أيدي الناس، فالمصيبة التي وقعت علي البلاد في بعض نواحيها انما ذلك لأن الدولة فرطت في كثير من الثوابت والمبادئ وتجاوزت الخطوط لترضي الشيطان، وما هو واقع وكائن علي الناس أنما هو أيضا” بسبب أنهم أنجرفوا وراء الدنيا ليصيبوها من حلال أو حرام فالكل لا هث خلف السراب، فلا هو أرضا” قطع ولا ظهرا” أبقي بل جنت علي نفسها بُراقش!!
    لتعود نعمة الأمن للبلاد، ولكي يعود التعليم كما كان في الماضي أو أفضل، ولتكن الصحة والجمال والعافية تاج علي رؤوسكم جميعا”، ما عليكم الا اللجوء الي ربكم، فما من ملجأ منه الا إليه،،،،
    توبوا إلي بارئكم يرحمني ويرحمكم الله….

  8. حاج أحمد السلاوى | رد

    ود الخلا ..برضو… تااااااااااااااانى بما كسبت أيدى الناس ..؟ هو ياخ الناس ديل فضل حاجة فى إيديهم عشان يكسبوها ؟مداخلتك كانت ماشة كويس لحد السطر رقم 12 ..
    ارحم الناس المساكين ديل شوية .. وانت براك شايف الحصل وبيحصل كل يوم .. الجماعة .. ولاة الأمور إنشغلوا بجمع حطام الدنيا عن الحفاظ على امن البلد ..والنتيجة البلد بقا ينقص كل يوم حتة لحد ما نصحا يوم الصباح نلاقى السودان كوووولو بقا الخرطوم بس .خليل ابراهيم توغل أل كيلومتر ووصل حتى كبرى الإنقاذ بأمدرمان .. الطائرات الأجنبية استباحات مجالاتنا الجوية صباح مساء فى شرق السودان وما تنسى مصنع الشفاء بالخرطوم بحرى ( لا يبعد سوى كيلومترات قليلة عن مسكنكم ..يا باش مهندس ) وأخيراً سقوط مدينة هجليج المريع ..وبرضو تجى تقول لينا بما كسبت أيدى الناس ؟؟

  9. نعم يا سلولو يا صديقي العزيز، برضو تاني وتالت ورابع حتي يقضي الله أمرا” كان مفعولا، ومالم يعد الناس لربهم ويُغيروا ما بأنفسهم من التيه والكذب والنفاق فلن ينصلح حالهم أبدا”، ولن يُغير الله ما بهم.
    الناس يا حاج أحمد وحكومتهم أدمنوا الكذب والغش والخداع وأصبحوا يكذبون كما يتنفسون، ويخادعون كما يشربون، ويغشون كأن لم يكن هنالك شيئ، لا وازع من ضمير ولا حجاب من أخلاق، ولا مخافة من رب العالمين ولا إستحياء من الناس،،،
    الشيطان نفسه يحتار في مثل هذا السلوك!!!
    وبعد ده كلو عاوز حال الناس ينصلح ، كيف ذلك أخبرني بربك؟؟؟
    فساد ما بعده فساد، الكل غارق فيه حتي الثمالة إلا ما رحم ربي، وقليل ما هم….
    وأهو أنت براك شايف وعارف ولكنني أحتار في دفاعك المستميت عن حال الناس هذا!!!
    اللهم أهدي قومي فإنهم لا يعلمون..

    1. حاج أحمد السلاوى | رد

      ياااااااااااااا بن الفلاة .. الناس فاض بيها الكيل وعاوزة تعيش ..عاوزة تعلم أولادها .. عاوزة تعالجهم من الملاريا والسحائى .. يسووا شنو ..ناس مسلمين وموحدين وشهادة لا إله ألا الله كان على الصيام هم صايمين طبيعى ..والصلاة بيصلوها .. فلوس ما عندهم عشان يدفعوا زكاة لأنهم هم زااااتهم من الفئات اللى تجوز تصرف ليها الزكاة ..باقى ليهم الحج ودا بقا بالنسبة ليهم ابعد من المستحيلات ..وخلوهو لناس الجلاليب البيضاء ومكوية ورافعين العصايات لفوق القاعدين يحجو الحج الفاخر والحج السياحى كلو سنة ..وبعد دا كووووولو أنت ما مريحهم يا ودالخلا .. ياخ خف عليهم شوية ..

  10. تصدقوا يا جماعة واحد بليد جدا من اولاد حلتنا
    ده كان لمن يتقطع بجي تاني الطيش وساقط سنة
    سادسة وقاري المتوسطة خاص والثانوي خاص وده
    حدو مع العلم رجعت في واحدة من الاجازات قبل
    10 سنة سألت عنه قالوا بقي معلم في المدارس
    الابتدائية ( حكومي ما خاص )يعني تعيين من
    وزارة التربية والتعليم ..
    هسع زي ده يا ود الخلا الشفع البيدرسم ديل
    كان كلهم مشوا عملوا حج وعمره وصاموا الاتنين
    والخميس من كلو اسبوع بينجحوا !!!
    انتو مسعولين من الخير وين معهد المعلمين ؟؟؟
    سؤال تاني : هي مؤسسات الدولة خدمية ولا
    تجارية ؟؟

  11. السلام عليكم اهل البيت شفنا الدار عامرة ( ماشاءالله ) قلنا ندخل نتاوق ونسلم
    كدي دخلونا معاكم

  12. جنوبي ياحبة، كلامك في محلو وزي ما قلت الشفع ديل بقو فاقد تربوي ، وأنا من زمان أسأل نفسي في إصرار وأقول ياربي ده من شنو، أتاري من جنس ديل وناس زي ديل ووا أسفاي!!!
    لكن ده ما ياهو كلامي زاتو، لأن الناس فكت الدرب ربنا بيسلط عليهم من هذه العينة التي لا تخاف الله ولا ترحم عباده وطبعا” ده كلو بذنوبهم، ألم تسمعهم في الدعاء وهم يدعون عقب صلاتهم (ربنا لا تسلط علينا بذنوبنا من لا يخافك ولا يرحمنا)
    شوف يا صديقي ربنا بيقول في محكم التنزيل الذي لا يأتيه الباطل من بين يديه ولا من خلفه أبدا” في سورة النساء الآية(141)( الَّذِينَ يَتَرَبَّصُونَ بِكُمْ فَإِن كَانَ لَكُمْ فَتْحٌ مِّنَ اللَّهِ قَالُواْ أَلَمْ نَكُن مَّعَكُمْ وَإِن كَانَ لِلْكَافِرِينَ نَصِيبٌ قَالُواْ أَلَمْ نَسْتَحْوِذْ عَلَيْكُمْ وَنَمْنَعْكُم مِّنَ الْمُؤْمِنِينَ فَاللَّهُ يَحْكُمُ بَيْنَكُمْ يَوْمَ الْقِيَامَةِ وَلَن يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلاً).
    كلام واضح زي الشمس لا أمريكا ولا غيرها يمكنها أن تجد علي المؤمنين حق الأيمان طريق او غيره….
    كن مع الله ولا تبالي..

  13. كوكو…
    نبارك ليك السمح وسلخة فلانة !

    1. ما قصرت يا العريس شمباتى الاتنين والتلاته ما ببقوا الا تسمع كلام حاج سلاوى ، وانا كنت فى غرب ،

  14. السلام عليكم كلكم.
    اذا سمحتو لى انا معاكم الاتنين, يعنى صحى ولاة الامر مطلعين زيتنا, لكن كمان احنا اديناهم فرصه, على قول المصريين قال يا فرعون مين فرعنك….
    المشكله كمان انو دى حاجات انتظرنا كتييير عشان يسوها لينا , وبما انهم ما حيسوها هم, وفى نفس الوقت نحنا محتاجين ليها شديييد, اخير نبتدى برااانا, صحى البنى ادم كان ما لقى مقومات الحياه الاساسيه ما منطقى نقول ليهو اعمل شىء, لكن ما هو مافى حل تانى. طيب انا بقترح نسوى شنو؟؟؟ فى حاجات بسيطه ممكن تتعمل, يعنى التعليم منتهى, لكن انت بتعرف فى الحساب مثلآ, قعد اولاد الحله واديهم لمات (ما دروس عشان تكون من غير قروش) تقويه, زول تانى بيعرف فى الدين- العربى…- خصوصآالانجليزى والكمبيوتر اللى التعليم ما مهتمى بيهم وفى نفس الوقت ما حتقدر تشتغل من غيرهم .وما شاء الله بقى عندنا شباب حسى بمشاريع لتحسين التعليم شكلآ( بيضربوا بوهيه فى المدارس ويصلحوا وكده) وموضوعآ (بيلموا كتب وبيساعدوا الطلبه فى القرايه وكده) اسمهم تعليم بلا حدود و فى الفيسبوك اسمهم معلمون بلا حدود, تابعوهم وتابعوا شغلهم على الفيسبوك وان شاء الله بيرجع ليكم الامل شويه

  15. اخي جبرا والاخوه الاعزاء
    سلاماااات
    موضوع العلم والتعليم فى البلد دي موضوع بفقع المراره وبيعمل طشاش في السمع وطرش فى العيون وشلل نصفي
    اخى حاج سلاوى
    ود الخلا شكله كده قرب يخش معانا فى السكه لكنه متردد شويه طالما بقى يمرق النصيحه فى الحكومه
    دا اول الدرب
    هسع ياود الخلاء المناهج التعليميه البختها منو الشعب ولا الحكومه…. ورينى يستفيد شنو الطالب من
    المشلعيب -والصريف-والمدماك والشنو مابعرفه داك
    وانا براجع لى بتي بجيني احساس بالطمام والقرف والاحباط اه فى اللحظه دى اقوم اصلى واصوم واذكى واجى راجعه القه المنهج اتقير

  16. اتاري القمردينة دي لامة كترت عجايز …!! مدرسة العباسية غرب الابتدائية الناظر ( شيخ حسن ابو سبيبه) وبعده الناظر ( أ. حسين حاكم ) وغفير المدرسة جون الجنوبي كنا بنمشي نفتشو في الانداية الفوق خور ابو عنجة جمب زريبة العباسية ونلقاه نايم وعبار المريسة جمبو نجغم جغمة ونسيل من جيبه مفاتيح مكتب الناظر والاساتذة .. ما بقول سنة كم لكن كان بدونا حق الفطور ( فريني ) …
    كسرة عجبتني :
    تنبش حي وميت
    سكاكينك تسنها بالكراهية
    معلم تنتج الكربة
    وتدي الفتنة ماهية .. تدس في ايدا كبريته
    بخيت وسعيد عليك إنك مكانك من ذوي القربي
    وعندك من كراسي السلطة ….. مسند للرفاهيه
    …….
    استاذنا محجوب شريف دايما مبرد حشانا الله يبرد حشاك

  17. يمكن نكون محتاجين سلالام تعليمية عشان نطلع لفوق ..

  18. اخي ابو غسان
    سلالم اكتر من العاملنها دي الواحد يدخل المدرسه وهو (بيعمله فى روحه )ويطلع من نفس السلم وشنبه مالى وشه

  19. وفى حوش واااااااااااااااااااااااااااااااااااحد

  20. الاخ شمباتي مبروك و عقبال نبارك ليك الهاترك
    الجماعة ديل كل الشعارات الرفعوها نفزوها من شعار : امريكا روسيا قد دنا عزابها ..ناكل من ما نزرع لحدي ما وصلوا لاجلاس الطالب…اول ما جلس الطالب, رفعوا شعار افطار الطالب و من يومها لا شاف اجلاس لا افطار….المصيبة زادوا المعاناة سنة كمان عشان يكون فاقد تربوي مؤهل…دوله من شعاراتها :اجلاس الطالب!!!!بعد دة كلة لما يطلععوا من افشل عشرة دول يزعلوا..حاجة تجنن

  21. منكم ( نتعلم) أستاذنا جبرا.. والتعليم ذاتو خشم بيوت.. والقلم مابزيل بلم…. وآخر ما تعلمناه منكم ( الكسرات ) الظريفة البتخلي المدافع يرقد سلطة.. . وإليك هذه الكسرة الخطيرة مثل كسرة ( القاش): أخبار الشكوي إياها ضد قناة الجزيرة شنو؟!! جيبو حي … ماتجيبو حي …

  22. ود المبشر…سلام ..
    الله يبارك فيك ونبارك ليك السمح وشردتهم من البلد ! يااااارب…
    انا بس نفسى ارعف هى امريكا دى شافوا منها شنو ؟بس من يوم ما مسكوا البلد قامو عليها وعلى روسيا ! جنس قلة ادب لكن !

  23. فعلا” الواحد بيزعل ياودالمبشر لمن يكون محسوب من الفاشلين، ودايما” نحن في السودان نخلط بين الخاص والعام، ودايما” نحن لا نفرق بين ماهو (وطني) وبين ماهو (شعبي)، وكلو عند العرب صابون!!!!!
    يا جماعة حقو الناس تفرق بين (الحُكام) وبين (الوطن)، يعني لمن العدو أيا” كان هذا العدو يهجم علي البلد حقو الناس تعرف تقيف في ياتو (ميس) وتدافع عن أي حقوق وثوابت أو مسلمات، مش الناس يشمتو في أنفسهم،،،،
    كسرة/
    عندما حدثت هجمات 11سبتمبر علي أمريكا سئل أحد الصحفيين وزيرة الخارجية الأمريكية السابقة تلك العجوز الهالكة مادلين أولبرايت وهي من الديقراطيين عن تعليقاتها علي ما حدث، وكان يتوقع منها الشماتة علي حكومة بوش الجمهوري، فما كان ردها ألا أن أمسكت بكلتا يديها وهي تشبكهما في حركة تعاضد وقوة وهي تشير بذلك بأننا الآن نواجه محنة ويجب علينا أن نكون متحدين!!!
    مش شامتين، هؤلاء هم الكفرة الفجرة الذين لا دين لهم ولا أخلاق، يتعاملون هكذا فما بال أهل الدين والأخلاق والسيادة والريادة يأكلون لحومهم ويحسدون أنفسهم ويسيئون لبعضهم، فكلهم يتناوشون ولا أري بينهم رجل رشيد يهدي الناس لجادة الطريق ألا من بعض أصوات خافتة هنا أو هناك تنادي الناس علي أستحياء أن عودوا ولكن لا حياة لمن تنادي!!

    1. الحمد لله اللقينا واحد فينا يقول الكلام ده تحنو هجليج خليناها ليهم لكن الله قال بى قول الوحده كلها و يمكن نمشى لى جوبا نرجع البلد فى بكانه ، ونشوف اولاد القرده و الخنازير حيعملو شنو ؟ و عبيد ابيي جيمشوا وين ؟؟؟؟؟

      1. كوكو … شينة منك … مالك بقيت تشبه لي
        الطيب مصطفي وطبعا بعد الشر عليك !!
        اتوقعت ود الخلا يقول ليك متي اسعبدتم الناس
        وقد ولدتهم …. لكن زي الحكومة لعب صالح ورقو

    2. حاج أحمد السلاوى | رد

      أخونا ود الخلا .. نحن نقف مع قواتنا المسلحة ( الغير مسيسة ) دفاعاً عن الوطن فى ظل هجمة أصدقاء الأمس أعداء اليوم ..لدحرهم وتلقينهم درساً أن قوات شعب السودان المسلحة لهم بالمرصاد ..فنحن نقف مع القوات المسلحة قلباً .. وليس دفاعاً عن النظام الذى أفرغ القوات المسلحة من كافة الكفاءاءت وأحالتها إلى الصالح العام بحجة عدم الولاء..وتأكد أن الشعب السودانى لا يرضى الحقارة ولعلك رايت ما فعله أهلنا عشية الإثنين الدامى لمصرع جون قرنق .. الم يخرجو عن بكرة أبيهم فى غياب السلطة المركزية من قوات مسلحة وشرطة ؟ وفى نفس الوقت ننادى بمحاسبة كل القيادات الموجودة الآن وعلى رأسها السيد وزير الدفاع التى حدثت فى عهده الميمون كل الإخفاقات المعروفة( غزوة خليل لأمدرمان .. إستباحة أجواءنا من الطكائرات الأجنبية فى شرق السودان..واخيرا وليس آخراً سقوط مدينة هجليج) حيث أنه لا مجال أن تكون البلد رهينة رجل فرد أوردنا موارد التهلكة ولا يزال على كرسى وزارة الدفاع ..وهل ننتظر حتى تسقط العاصمة المثلثة حتى تتم إقالته غير مأسوفاً عليه ؟؟؟ ومساءلة السيد رئيس الجمهورية بصفته القائد العام للقثوات المسلحة ..

      1. كلنا فداك يا وطن وانا مع وحده التراب ولأننا من الجيل الذي يعتز بوحده ترابه وكما ذكرت مسبقا تربينا علي حب بعضنا البعض ،،

  24. ينصر دينك ياكوكو، وحليلك يا وطني يابلد أحبابي، وحليلك وحليل أيامك،،،
    وتاني ينصرك وينصر دينك يارجل!!

  25. البشير لمن طالبوا بيهو في المحكمة الجنائية كلنا
    نحنا السودانيين وقفنا معاهو ورفضنا انو
    زول سوداني يتحاكم بره وقام هز فوقنا
    وعرض تمااااام .. اها بعدها لقينا منو شنو
    غير الجحود ونكران الجميل !!
    المؤتمر الوطني وكت الزنقة يقول البلد حقتنا
    كلنا .. واول ما يشم العافية يقول لينا كان
    رجال وكان بتقدروا والحسوا كوعكم .!!
    حكومة المؤتمر الوطني لمن يكون عندها ثوابت
    ومسلمات من حقها تتطالبنا .. لكن نقيف معاها
    علي شنو لا عرفناها ديمقراطية ولا ديكتاتورية
    ولا عرفناها اسلامية ولا علمانية …
    كان من السهل جدا بناء علاقات جيدة مع
    دولة جنوب السودان وجعل الانفصال سياسيا
    لكن للاسف بعض اصحاب النفوس المريضة ساقونا
    معهم كالخراف وتبعناهم باسم الوطنية
    نفس الوطنية التي ابوها لنا عند تقرير مصير
    الوطن واسموهو تقرير مصير الجنوب !!!

  26. هههههههههههههههههههههههههههههاااى,,,,اليوم تتمايز الصفوف !
    اسمع هنا (الكلام دا لى اى واحد واقف مع الحكومة المهجومة) انا ضد النظام وبقيف مع اى حد ضدو,واوعك تتكلم عن الدين لانهم ما بعرفوهو,,ولو كتلوا ليك ولدك فى رمضان كان عرفت ان الله حق ,وكان اعدمو اخوك فى عملة تاجروا بيها هم كان عرفت ان الله حق,وكان اتيتمت واكلوا معاش ابوك كان عرفت ان الله حق ,,و كان اكلوا قروشك فى مشورع سندس كان عرفت ان الله حق,,وكان اتخرجت بعد اهلك صرفوا دم قلبهم عليك وقعدت عاطل عن العمل ومعاك شهادات تخصص وغيرك ابلد واحد فى الدفعة وعينوهو مدير كان عرفت ان الله حق..
    بالله عليك استحى على وبطل النعرة اللى انت فيها دى…

  27. ود الخلا..
    ما اشبه اليوم بالبارحة !!
    يوم ان اصدروا مذكرة اعتقال المشير وابتهجت انا وكل حر ذى عقل,,يومها كلت لى الشتائم ونعتنى بالعلمانية والزندقة وكل ما هو قبيح,,فبالله عليك ما تتخندق وتمرق لى راية الدين دى !
    احمد الله بى ديننا وايماننا واسلامنا…

  28. البروف والسمار الكرام …. ألف تحية وسلام
    تناول موضوع التعليم يحتاج إلى مداخلات ومداخلات…. والواقع أن هؤلاء حطموا التغليم العام أول ما حطموا وعن قصد وإلا لما تدنا مستوى طالب الثانوي والجامعة إلى الحد الذي نراه… لو كان تدهورا عرضيا لما صار بنفس الوتيرة … جطموه أولا لأنهم غير متعلمين ويريدون أن يكون كل الشعب حمارا وثانيا للمتاجرة به كما تلاحظون في انتشار المدارس الخاصة التي تنافس اغلاناتها إعلانات الشامبيون وسوداني وزين…. الدولة لا نوفر العلاج ولا التعليم ولا الأمن فأيت هي دولتنا هذه؟ إنها الأولى في failed state index وأين هي من أيام كان حسن نجبلة يطارد طلابه بسبورة على جمل في بادية الكبابيش؟

  29. كوريا عقب الحرب العالمية الثانية كانت مجرد دولة فقيرة يعمل معظم سكانها بالزراعة، ولكن القرار والارادة شكلا الدافع للتحول إلى الصناعة، ليرتفع الدخل القومي من 2,3 مليار دولار مع بداية الستينات، إلى 931 مليار دولار عام 2005، كما ارتفع نصيب الفرد من الدخل القومي من 87 دولارا، إلى أكثر 19,4 ألف دولار أمريكي حاليا.
    الواقع أن تعليم كان أساس الطفرة الكورية خلال الفترة التي أعقبت الحرب العالمية الثانية وحتى الآن، فقد كانت نسبة الأمية فى الدولة الجنوب أسيوية قبيل الحرب تقترب من الــ 30%، ولكن مع إعلان الحكومات المتعاقبة – أثناء وعقب – الاحتلال والسيطرة الأمريكية والصراع السياسي، الحرب على الأمية فى كافة أنحاء الدولة، وصلت نسبة الأمية في عام 1990 إلى أقل من 1% من إجمالي السكان.
    لم تقتصر الجهود الكورية على التعليم الطبيعي فحسب، وإنما لجأت إلى شعار محو الأمية الالكترونية، فركزت جهودها على إنهاء أمية مواطنيها تكنولوجيا، لتتمكن بعد ذلك من فرض سطوتها العالمية على المجال التكنولوجيا ويصبح من أهم صادراتها.
    كوريا تنفق نحو 7,1%من الناتج من الناتج الداخلي الخام على التعليم، لتكون أكبر دولة فى العالم إنفاقا على التعليم، وبفضل هذا الدعم المالي للبحث العلمي،تقدمت كوريا الجنوبية بأكثر من 5935 طلبا لبراءات الاختراع للمنظمة العالمية للملكية الفكرية، محتلة المرتبة الرابعة، بعد الولايات المتحدة ثم اليابان وألمانيا.

  30. كم من الناتج القومي (إن كان لدينا شيء هكذا ) ننفقه على التعليم؟

    1. الاحباب سلام
      سمعت كلام كده الايام دى فى الرياض ما ركب لى فى راسى
      بقولو جزيرة ( مقرسم ) الادوها للسعودييين ديييييييييك ما بخشوها الناس الا بتاشيرة سعودية !!!!!
      مسعولين من الخير الكلام ده طقش لى عضان زول
      لو كده الرماد يكون كال حماد
      تحياتى

      1. حاج أحمد السلاوى

        العم صابر .. الله يصبرك أكتر وأكتر .. إن شاء الله ..
        والله لسه ما سمعنا الخبر دا لاكين كلو شى وارد فى دولة أمازونيا العظمى ..ويا خبر اليوم بفلوس …وبكرة ببلاش .. الجماعة باعو نص الخرطوم ( العاصمة ) بيغلبهم يبيعوا المحلات البعيدة ديك ..ولو إستمر الحال على كدا حتصبح يوم ترجع وتدخل بيتك بتأشيرة دخول ..
        وكلو بإسم الدين ..وعصاية فوق وجلابية بيضاء مكوية ودقن واصلة الكرش الكبيرة ..
        وخلونا النشوف آخرتا شنو… !!!

  31. الاخ ود الخلا …سلام
    لا يستطيع احد ان يزايدعلي حبنا للوطن ولكن يجب ان نعترف بوجود الخلل و من وراءة ثم نبحث عن الحلول قبل فوات الوان .المشكلة هي اننا كنا شهود علي علو شان البلد في كل مناحي الحياة والان نحن علي قناعة باننا سنعيد سيرتها الاولي….

  32. وطيب الحكومة قاعدة بتعمل فى ايه ماتلم كراسيها وتتوكل —
    بت وراق سلام — سبقتينى بملاحظتك الدقيقة عن الزعيم ود الخلا == حقيقى شكلو بقى يضرب يمين وشمال وزمان كان بيضرب شمال بس – ( يبدوانو المدرب جبرا ركز على ود الخلا واداهو جرعات زاىدة عن سجم الحكومة ) نتمنى ان يتدرب اكثر حتى يكون راس حربة يعرف طريقه الى الشباك

  33. والله راجع من السودان قبل ساعات فقط… ولكن الجياة صعبة صعبة صعبة للغاية.. والله يعين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: