أطفي اللمبة

يقر العبدلله ويعترف بأنه شخص (مازوخي) والمازوخية أو الماسوشية عند علماء النفس هي الحصول على المتعة عند تلقي التعذيب فالماسوشي هو شخص يعشق تعذيب نفسه وهو خلاف ” السادي ” الذي يعشق تعذيب الاخرين ويستمتع بذلك .
وحب تعذيب النفس كما يقول العلماء يتخذ أشكالا وصورً مختلفة وكما بقية الأمراض الأخرى فهو يمر بمراحل متنوعة فيبدأ (علي خفيف) حتى (يتمكن) من الزول .
لم أكن أعلم بإصابتي بهذا المرض إلا بعد أن لاحظت لبعض التصرفات التي أقوم بها من حين لآخر .. فمثلاً أكون (سايق العربية) ومعي الأولاد فجأة ينبعث من إحدى إذاعات الأف أم صوت فنان (يهنق) بأغنية من النوع (العاوز ليهوأعصاب) فتمتد يد (المدام) لتغيير المحطة إلا أنني أطلب منها أن تبقي على هذا (الفتاك) ليكمل الأغنية عشان يطلع عين (أبو اهلنا) وكده !
ولعل من أكثر الأمثلة التي تدل على إصابتي بهذا المرض هو بقائي متسمراً أمام التلفاز حوالى الساعة ونصف أشاهد ما يعرف (بمباراة الغمة) حيث لا مهارات فردية ولا زوجية ولا جماعية ولا تاكتيك ولا خطط ولا يحزنون (دافوري ساااكت) أما اللياقة فمعدومة من أساسو بفضل السجائر وبقية السينات ! (عشان ما تمشوا بعيد .. سهر – سعوط – وكده) وهل هنالك (شعور أجمل) من مشاهدتك للمهاجم (عوض كورنر) وهو يجد نفسه منفرداً بالمرمي فيرسل الكرة لتصطدم بإحدى عارضات (كشافة الملعب)؟

إزداد يقيني بأن إصابتي بهذا المرض في أطوارها الأخيرة إذ وجدت نفسي هذه الأيام أعكف على قراءة سيرة السلف الصالح مقارناً بها سيرة (الخلف الحالي) من حكامنا ومسؤولينا وإليكم آخر ما قمت بقراءته عشان تتأكدوا من (مازوخيتي) بنفسكم ..
الحكاية عن الخليفة عمر بن عبد العزيز ذلك الخليفة ذو المكانة السامقة في تاريخنا الإسلامي على الرغم من أنه لم يحكم سوى سنتين و(كم شهر كده) قضاها خليفة للمسلمين مما يؤكد بأن القادة والزعماء يدخلون التاريخ بأعمالهم التي تغير تاريخ أمتهم لا بالسنوات التي عاشوها يحكمون وقد دخل عمر بن عبد العزيز التاريخ بأعماله العظيمة وإدارته العادلة للدولة حتي أصبحت بلاد المسلمين في عهده رقم قصره (حاجة تانية) !
يلا عزيزي القارئ (خلوني أتعذب) ونتعذب كوووولنا لنقرأ معاً تعامل هذا (الخليفة الورع) مع المال العام إذ يقول الكتاب الذي بين يدي ( جاء البريد ذات ليلة إلى هذا الخليفة فأشعل السراج ليقرأ الرسائل، ويسأل رجل البريد عن أحوال المسلمين في بلده، ولمّا انتهى من كلّ هذا أطفأ السراج، وسئل في ذلك فقال إنّ زيت السراج من بيت مال المسلمين، وقد أضاءه ليبحث في أحوال عامّة المسلمين ويسأل عن أمرهم ليعرف ما هم وأمراؤهم عليه، وأطفأه لأنّه الآن يبحث في أموره الخاصّة) !!
لم يشأ هذا الخليفة (المسؤول) أن يعتدي على أموال المسلمين ولو بأخذ (شوية) زيت يستضيء بها وينير بها (منزله) الخاصّ، لم يقل إنّ بيته هو بيت (الحاكم) فيجب أن يكون مضاءاً (24 ساعة) ولم يقل إن (لمبتو) هي (لمبة الحكومة) التي تعمل من أجل راحة المواطنين . من من حكّام ومسئولي هذا الزمان الأغبر يا ترى يطفئ (اللمبة) إذا كان الأمر خاصًّا به وبعائلته الكريمة؟
نعم يا عزيزي القارئ .. قراءة التاريخ الإسلامي (الآن) تعد نوعاً من الإستمتاع (بتعذيب النفس) وإستمراري في قراء سيرة السلف الصالح من أمثال هذا الخليفة تعني بإنو العبدلله (المازوخية) إتمكنت منو شديد .

كسرة :
أطفئ اللمبة .. عبارة يجب أن نقولها في وجه أى مسئول يستخدم (حاجات الدولة) في غير موضعها !

كسرة ثابتة :
أخبار خط هيثرو شنوووووووو؟

Advertisements

26 تعليق

  1. برنجييييييييييييييييييييييييه

  2. السلام عليكم ، البرف و الاخوان ، يابرف انتو الرياضه دى الا الكوره ، طيب نحنو فاشلين فيها بجداره مانشيف لينا العاب تانيه ، القروش البصرفوها على الكوره ( مليون دولار للحلبى الحضرى ) و ما عمل ابو النوم ، ستمائة الف جنيه كانت عملت كم واحد زى الكشيف و اسماعيل و لا كاكى ، و الدافورى لعبوه اباطرة الكوره فى السودان اذكرك و لا مافى داعى ، كان عندنا 2 فريق قومى ، بعدين نطيت التالته ليه ؟ ماظاهره ، اخير ليك تعتزلها ، الحمد لله الضربنا حقول الوحده ، سعال : القبر قبال الآخره و لا شنو ؟؟؟……………………. عجبى

  3. البروف والاخوان متعكم الله بالصحة والعافية
    قبل كم سنة كده جيت اجازة السودان قلنا نمشي الشماليه نشوف الاهل
    القي ليك واحد من شفع الايام دي راكبلو (( حديدة شرط ذي مابقولو ))
    اتعجبت ياناس الشافع ده جاب المصيبة دي م ووووويين
    قالو لي ( ده عمو الفلاني مدير شنو كده ما عارف واداهو العربية ده عشان يجي يعيد بيها ويحضر عرس بت خالة ابوهووووو ))
    والمشكلة كمان مديهو كرت مرور للشارع وكمان كرت محروقات يكب بيهو محل ما عايز
    اها يابروف دي ما سيرة تتقري برااااااااها

  4. هو أساساً بالنهار وبنور الله الشمس دي قاعدين يشوفوا حال الدولة والناس .. ولو هم بيعملوا الحاجة دي بالنهار خليهم يولعوا اللمبة على كيفيهم حا نجيب ليهم لمبات اقتصادية وكده .. بس يعملوا حاجة تستاهل .. وما تنسى يا أبو الفتوح استعمال الموبايل والعربات المكندشة وصيانة بيوت الحكومة .. وبالمناسبة لو تذكر فى عهد توني بلير رئيس وزراء بريطانيا لمن طلب من الحكومة وقال ليهم عاوز بيت أكبر من 10 داون ستريت علشان ولدو وبنتو قال لو ليهم دبر حالك انحنا من زمان عندنا رئيس الوزراء حسب التقليد بيسكن فى البيت ده كان ما عجبك امشي اجر ليك شقة لأولادك من جيبك خليهم يسكنوا فيها وانت اسكن فى البيت المخصص لرئيس الوزراء .. يا جماعة الناس ديل اظنهم مسلمين وبضحكوا علينا وكده .. وانحنا وين منهم دي حاجات ما عندها علاقة بتطور وتقدم حضاري دي حاجة فى النفس والبخاف الله كان غني ولا فقير ما فى اختلاف بيناتهم ولا شنو .. حاجات تجنن عديييييييييل ده لو فضل فينا عقل !!!!!!

  5. اخي الفاتح والاخوه الاعزاء
    والله اظني انا زيك كده (مازوخي)مرفوعه للاس مائه
    اقول ليك كيف اليوم كان عندى حضور للمحكمه بخصوص حقوق ناس بنك الخرطوم (ناس الحكومه اكله حقهم وكده) طلعته متاخره شويه فاجرته امجاد لكى احضر الجلسه فقام السواق شقل الاسمه شنو دا البدل المسجل وبقى يقنى فنان اول ماسمعته الغنيه والله شعرت جلدي كلبت قام السواق حسه بي حاول يقير الاغنيه قلت ليهو لا لا لا كدى النسمع الزول دا للنهايه
    (والله كان قلبي اتقطع ليك تانى مابرجع)دي القنيه البقني فيها الفنان وفى اللحظه دى انا بالجد كان قلبي بتقطع على الحال الوصل ليها الغنى في البلد دي ومصره انى اسمعه للنهايه
    والحاله التانيه عندما احضر برنامج نجوم الغد اقعد اكورك عليك الله عاينوا العواره دى البلد التقول ناقصه حمير كل يوم فاتحين ومنزلين لينا جيش من الحمير بالهى مايشوفو ليهم برامج هادفه يقدموها للناس وتستفيد منها وفى عز انفعالى افيق على كلام بتي ياامي ماتمشي تنومى نحن ما سامعين حاجه
    اقول ليها اريدكم ما سمعته هم ديل عندهم غنا ديل بشوهو فى الغنا
    واتارينى انا عيانه مازوخيه كبيييره وانا ما عارفه

  6. الحبيب

    والله انا ذعلاااااااااااامنك جنس ذعوليه كيف يكون زول مبشر بالجنه ورفض الخلافه بزول جا غصبا للظروف والحال الحرن الله لينا وبس لا كفر ولا وتر ولا ولا لا ولا كمونيه زاتو

    شكرأبرف الدمعه اصبحت اقرب من البسمه

  7. حاج أحمد السلاوى | رد

    الأخ ابراهيم عوض ..يا خ ما تزعل والزعل هنا فى المنتدى مرفوع المسالة كانت مجرد مقارنة أحوال بأحوال وليس أشخاص باشخاص لأنو الأشخاص القُدام لايمكن مقارنتهم بناس اليوم ..وزعوليتك دى خليها للحارة الجاية يمكن يكون ليها عوزة ..
    كسرة سغيرووووونة .. ذعولية دى يطرشنى ما سمعتا بيها جبتها من ياتو قاموس ؟قدر ما فتشت ليها ما لقيته .. يمكن تكون مصدر للمذكر السالم المؤنث الغائب المرفوع بالياء ومجرور بالواو؟؟
    غايتو لو كانت زعلان زعل شديد كان يكون وقعها أجمل ..ولا رايك شنوانت ؟
    وخلونا النشوف آخرتا شنو ؟

  8. هههههههههههههههههههههههه,,صعب صعب يا بروف….
    عمر وعمر ! اممممممممم…
    معكوسة فى التمنيات!

  9. الحبيب كوكو…
    مبروك البرنجية وعقبال المازوخية ! هههههههههههههههه

    الحبيب السلاوى…
    انت ياهناى مالك حكاك كدة؟؟انا كدة بزعل منك زعولية شديدة ! وى وى وى

    1. د / شمباتى يباركوا ليك الما ضاقه ان شاءالله يضوقوا ، انا و حاج السلاوى حضرنا زمن القرش و التعريفه و ترماى الدوران و معدية ابروف ، حد سمع بى انقياى ؟؟؟؟؟؟؟؟؟؟؟

    2. حاج أحمد السلاوى | رد

      شمباتى .. عاوزين نصلح ما يمكن إصلاحه بعد الخراب الحصل فى كل مرفق من مرافق الدولة ..وأهم مرفق هو التعليم ..وهذا اضعف الإيمان ..
      المواقع والمنتديات دى بيدخلوها ناس من كافة الأقطار والجنسيات .. عاوزين نقدم صورة كويسة للسودانى ..كلامى صاح ..,لا فى محلو ..؟؟؟؟؟؟

  10. عمر يقلع من اهله ويدي الناس وعمر يقلع من
    الناس ويدي اهله…
    عمر مكّن اهل الصلاح وعمر شالم الصالح العام ..
    عمر علي زيت اللمبه من الله خايف وعمر سواها
    بيوت في الطائف ….
    بمناسبة الطائف دي , انت البوديك تقرأ سيرة
    عمر بن عبد العزيز شنو ؟ ما تقرأ سيرة الحجاج
    غايتو شليق خلاص !!
    ابراهيم عوض .. ( اسمك تزكار عزيز ) بس اوع
    من اختلاط الدمعة بالبسمة !تصدق عبد العظيم
    حركة كان بيعمل حفلة مجانا كل اسبوع في
    التجاني الماحي !؟ ياخي السودان كان حلو
    خلاص !!!!!!! ياخي عمر ده جانا من وين ؟؟

  11. والله يا بروف انت مازوخي والبقروا ليك كلهم مازوخيين
    والشعب السوداني كلوا مازوخي لأنو بنضرب الزمن دا كلو وساكت و مبسوط

    تقول لي ما مبسوط اقول ليك دي ما حال ما مبسوط

    *اخبار المطار الجديد شنو ؟؟؟؟؟

  12. طارق بابكر عبيد | رد

    سلامات يا جماعه وطيب اذا كان اصلا الفيوز ضارب، وكيف الأمين ح تتطفي

    1. طارق بابكر عبيد | رد

      اقصد اللمبه

  13. جنوبى..
    هههههههههههههههههههههه,ماك واعى والله,,لاقدام

    1. شمباتي ..
      عاد جنس البزار ده بيوعولو !!؟ لكن مع هناي ده قدامنا مااااهو عمار …
      هسع نحنا ندخل ضمن ( اذا احب الله عبدا ابتلاه ) ولآ ضمن ( نولي بعض الظالمين بعضا ) …
      ياربي تدينا شيخا لا يخاف فيك لومة لائم , ينورلنا طريقنا ..

  14. عندما قطع الملك فيصل مد البترول عن الغرب في حرب أكتوبر، وقال قولته الشهيرة : “عشنا، وعاش اجدادنا، على التمر واللبن، وسنعود لهما”،
    زاره يومها ,.ير الخارجية الأمريكي وقتها هنري كسينجر، في محاولة لإثنائه عن قراره،
    ويقول كيسينجر في مذكراته، إنه عندما التقى الملك فيصل في جدّه، سنة 1973م،
    رآه متجهماً، فأراد أن يستفتح الحديث معه بمداعبة، فقال: ”إن طائرتي تقف
    هامدة في المطار، بسبب نفاذ الوقود. فهل تأمرون جلالتكم بتموينها، وأنا
    مستعد للدفع بالأسعار الحرة؟
    يقول كيسنجر: ”فلم يبتسم الملك، بل رفع رأسه نحوي، وقال:
    وأنا رجل طاعن في السن، وامنيتي أن اصلي ركعتين في المسجد
    الاقصى قبل أن أموت، فهل تساعدني على تحقيق هذه الأمنية؟

    هؤلاء هم من يستحقون لقب قـــــادة

    يـــــــــــــــــارب اعد لنا مجد هذه الامة
    بقادة يحبونك أكثر مما أحبوا مناصبهم

  15. أولا يا بروف إذا كنت مصابا بالمرض الذي قلت فإنك هذه الأيام في احمل ايامك …إذ أن مجرد السير في الشارع سيعذبك بسبب ما تراه من مناظر زما تقرأه من لافتات وشعارات الكذب والنفاق ثانيا عحبت لكم………………. تقارنون الزبل بالذهب؟ قارنوا حكامنا بحكام هذه الأيام في البلاد التي تحكم بالقوانين (الوضعية) وستجدون أننا طفرة وحالة نادرة … لا توجد عند كفار ولا مسلمين ناهيك عن أمراء المؤمنين و ………….. نستاهل

  16. البروف والرفاقة الحلوين
    مازوخيتنا لكن لمن بقت مسيخة … لبتين نحنا نتمازخ وهم يسيدنو (من سادية) الله يجيب يوم مازوخيتهم قريب .. ويسيدنا عليهم الـ لا نام ولا أكل الطعام ….. وهسة أنا برد عليك أثناء ساعات العمل فكرت أطفي لمبة الشركة … لكن عرفت الحكاية ما بتظبط … فإحتسبتها – كما قالوا … !!!

  17. اذا صلح حال الراعي صلحت الرعية وقد قال علي بن ابي طالب لعمر ابن الخطاب
    لقد عففت فعفوا ولو رتعت لرتعوا
    وقارونوا بين عفاف ايديهم ونتن ايدينا (اقصد الجماعة)

  18. جنوبى..
    هههههههههههههههههههههههههههههه,,طبعا منكم انتو يا ظلمة يا فجرة عشان بعدتو عن الدين وباريتوا العلمانية ! سُب عليكم…هههههههههههههههه

    1. هههههههههههاي … امشي يا شيوعي ..
      تعرف يا شمباتي مره سألت عنها إمام في
      السعودية قام خصص لي الاولي والتانية عملا
      لي حاكم ومحكوم قلت ليه طيب ما ممكن تكون
      بين موظف ورئيسه او بين شخصين في تعامل ؟ قال
      لي لا تكتر هرج !!

  19. وريتنا منو الطفا اللمبة
    بي لغة زمنا وريتنا منو الطفا النور
    لمبتو مولعة بي لغة الجماعة تعني انو جعان وماشي يطفي اللمبة بتاعتو يعني ماشي ياكل وكده .. وقيس علي هذا المنوال الممكن تنطفي بيهو اللمبة جيبو فاضي داير يطفي لمبتو ماعندو عربية داير يطفي لمبتو وعمارة مافي داير ؟؟؟ وهلم جرا يا اخوى الفاتح جبرا ,,,,,,,,,,,,,,,,,,,,,,,,,

  20. رجعت من السودان اليوم وقابلت احد اصدقاء وزملاء الدراسة فى السودان وقال لى فى ولد وزير وطالب فى الصف الثانى (ثانوى) اشتروا ليهو سيارة هايونداى ذات الدفع الرباعى بمبلغ 180 مليون جنيه ولكن رجع السيارة مرتين للوكالة مرة بحجة اللون ومرة عشان الفتحة فى السطح.. طيب دا ولد الوزير .. امال الوزير وحرمه بسوقوا شنو؟؟

  21. سلام ياقبيلة،،،،
    أبو عفراء رجعت من السودان وتتشكي بأن الحياة صعبة!!!! قاعدين نقول للناس بأن هذه الصعوبات والضنك وشظف العيش والفقر هي بسبب فعائل الناس في البلد، واهو أنت جيت من برةالبلد بعد غياب، وشفت الحاصل ورجعت تاني، وبتكون لاحظت الفروقات في تغيّير أخلاق الناس وسلوكياتهم مقارنة بآخر مرة رأيتهم فيها فالإنسان الذي يغيب عن المكان ثم يعود إليه يلاحظ ثمة تغيير وفروقات غالبا” لا يلاحظها الإنسان المتواجد وسط هذه البيئة المتغييرة، أرجوك أيها الأخ الكريم أن تشرح لأخوتنا وأخواتنا بالقمردينة (أستاذنا البروف جبرا وصديقي سلولو وأختنا بت وراق)والآخرين دوت كوم، بأن سلوك الناس قد تغيير وأخلاقياتهم قد ذهبت ولم يعد هنالك شيئ من السلوك القويم الذي أعتاد عليه الناس في قديم الزمان وسارت به الركبان طيلة الأزمان، وعندما نحكي بأن هذاالتدني والأنحدار المريع في كل شيئ هو من ضرب أيدينا ونطالب الناس بالتوبة والإنابة لربهم تقوم الدنيا ولا تقعد،كأنهم أنبياء أو مرسلين لا يُخطئون ولا يعرفون الذنوب والآثام، والأخطاْ والآثام راكباهم من أكبر دقن مُتنعّمة فيهم لأصغر زوول ماشي حفيان عريان جيعان، إلا مارحم ربي…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: