القصة ما هجليج

قد لا يعلم الكثيرون أن العبدلله وقد وصل إلى أرذل العمر لم ينتم في حياته لأي حزب كان ولم يستطع (ود مقنعة) أن يستقطبه لأن يكون عضواً في أي حزب أو جماعة ، والعبد لله يحمد الله على ذلك كثيراً فكل الأحزاب السودانية حتى ذات الصبغة الدينية تضع مصالحها أولاً قبل الوطن (والدين ذاتو) !
عدم التحزب إلا لحزب (السودان) جعلنا نقول للأعور أعور في عينو .. إذ أن وجودنا دون غطاء حزبي يجعل مسألة إتهامنا بالعمالة أو الإرتزاق أو محاولة تقويض النظام أو الإتصال بسفارات أجنبية أو (قبض مظاريف) غير واردة بالمرة ! ويبدو إنو (الناس) فاهمة كده كويس إذ لم يتعرض قلمنا (للتحقيق) أو المصادرة إلا مرات لم تتعد أصابع اليد الواحدة ومن جهات وجدت أن الطاقية طلعت على مقاسها وراس (السوط) وصلها ! والحمدلله لم ندان في اى قضية بل تم شطب كل البلاغات في مراحلها الأولية إذ لم تكن منطلقاتنا أبداً (شخصية) أو ذات (غرض) سوى مصلحة هذا الوطن العزيز !
طيب أيه لزوم الرمية الطويلة دى؟
لزوم هذه الرمية هو عدد من الرسائل الأليكترونية والتعليقات عل صفحتى بالفيسبوك والتي تسالني لماذا لم تكتب عن هجليج ؟ وقبل أن أواصل الكتابه حول هذه الأمر أود أن أوضح موقفي بإدانة حكومة الجنوب لما إقترفته من تعدى على أرضنا وأناشد كل مواطن سوداني الوقوف خلف قواتنا المسلحة وجنودها البواسل لإستعادة هذا الجزء العزيز من الوطن إلى حضن البلاد فليس هنالك من مواطن شريف يرضي الإحتلال لأرضه أو الإنتهاك لعرضه .
أها وبعد أن نستعيد هجليج ؟
هذا هو السؤال الذي جعلنى (أتأخر شوية ) في تناول هذا الأمر .. فالقصة (ما هجليج) .. القصة ليست تحرير أرض أغتصبها عدو .. (كان على دي ساااهلة) لأنو نحنا في الحارة (معروفين) والحرب ما بيخوفونا بيها .. ولكن العبدلله يعتقد أنه آن الأوان بعد تحرير هجليج ( بإذن الله) أنو الناس تقعد في الواطة عشان تشوف ليها حل للورطة الأنحنا فيها دي .. فالأمور ابداً لا تبشر بخير إن سارت كما عليه ، إن المشكلات التي تواجه البلاد تتكاثر والحالة العامة (معروفة) وما عايزه ليها دليل ويكفي أن (الدولار) يقترب بخطي حثيثة نحو (السبعة جنيهات) !
إذن الحكمة تقول أنه لابد من وجود خطه إسعافية عاجلة يتبناها الجميع للخروج من هذا المأزق .. إن مواصلة (الكنكشة) وسياسة (لحس الكوع) والشنو ما عارف لن تفضي إلا إلى مزيد من الإخفاقات والتدهور كما أن وجود معارضة ليس لديها بديل أو برنامج جاهز لإدارة البلاد يجعل أى محاولة للتغيير بإستخدام ورقة (شظف الوضع الراهن) الذي يعانيه المواطن هي مغامرة معروفة النتائج أقلها الفوضى وإنعدام الأمن (ونحنا ما ناقصين) !
يعني يا جماعة الخير القصة (بالعربي كده) بقت ما قصة (معارضة وحكومة) القصة أضبحت (قصة وطن) .. السودان ده بتاعنا كوووولنا .. ما بتاع زول عشان لمن تغتصب أراضيه نقول ليهو أمشي حارب ورجعا براك .. مفروض نحارب كوووولنا عشان دي بلدنا كووولنا .. برضو السودان ده ما بتاع جماعة تعمل فيهو العاوزوهو (بي مزاجا) ويكون الحكم وإدارة البلاد (حصرياً عليها) لأنو برضو دي بلدنا كووولنا .. لازم من وجود دولة تبني على المواطنة .. كل مواطن في البلد دى يكون ليهو شرف البناء والتعمير وتولي المسئولية وإتخاذ القرار لا فضل على آخر بالعرق أو اللون أو (اللحية) .
مسئولية الكلمة تجعلنا نقولها بكل الصدق والوضوح أن مستقبل البلاد في خطر وعلى الجميع القعاد في الواطة دى بأعجل ما تيسر لإنقاذ السودان …. (تااااااني) !

كسرة :
كما أن الخيار مفيد جداًً للجبنة فإن (الشعب) مهم جداً للحكومة

كسرة ثابتة :
أخبار خط هيثرو شنووووووووووووووو؟

Advertisements

61 تعليق

  1. برنجيييييييييييييييه!! ونقرأ بعدين

  2. الاخ جيرة
    بعد التحية والاحترام احسست كثيرا بروح الوطنية التى انسابت من قلمك وهو دوما دفاق بكل خير
    وبصراحة هو احساس احسستة لدى كل الشعب الا قلة قليله وقد يكون الوضع هو الذى قادهم الى ذلك وغطى عليهم عن الواجب
    ان شاء الله تنكشف الغمة وتسترد هجليج الى اراضينا وكما قلت لعلة يكون درسا لاهل الانقاذ بان الشعب موجود فى الحارة ولذلك لابد للحكومه ان تعطى الناس فرصة بالمشاركة والاهم ان تفهم الانقاذ انة ذلك من اخطائها وان يتم تنقية الحكومة من كل التجار والسماسرة والمرتشين وان يتم حساب المقصرين فى كل المجالات وخاصة الامنى فهذة ليست اول مرة تلدغ البلاد فيها وخليل ليس ببعيد واحداث موت قرنق كذلك والذى يلدغ هو الشعب المسكين بانعكاس ذلك على كل مجريات الحياة
    اعاننا الله واياكم لما فية الخير وصلاح البلاد والعباد
    كسرة :
    يا ود الخلاء مفروض نحن الشعب برضو نستعدل ونتوب لعل الله ان يفرجها
    مع التحية لكل السمار

  3. البرف الاخوان ، السلام عليكم ، عهد جديد بعد البرفما نال برنجية الفيس ، ونخمس مع جنوبى ………………. عجبى

    1. كوكو .. نخمس دي جاية مع الخامس في السلك ..
      هاك بس ما تسخنا ..

  4. السودان حقنا كلنا لكن تصرفات الحزب الحاكم
    ما بتدينا الاحساس ده !! والمشكلة انو بقي
    ينعكس سلبا علي الوطنية !!
    هجليج هي شريان حياتنا بعد الانفصال .. كيف
    يتم احتلالها خلال بضعة ايام مرتين ويظل وزير
    الدفاع في مكانه وبتاع الاستخبارات في مكانه
    وحتي بتاع الداخلية لانها داخل الحدود المحسومة !!
    لمن يُصنف اموات الدفاع عن الوطن مره بالشهيد
    ومره بالفطيس ومن نفس المحرّض ده بسبب تخازل !!
    لمن اتفاقية سلام شامل يتضح انها دمار شامل
    معناها الشغل ما كان كامل وبنوه علي روح
    بتروح وتزيد جروحنا علي الجروح ودي المشكلة !!
    اهلنا من نترخص ونطلع الشارع بقولو لينا ما
    تشاكل الاكبر منك عشان نحنا ما اقوي من الاتحاد
    السوفيتي !!!
    السياسة انو نسايس يعني نحنّك مش نكورك ونجعّر
    ولحس كوع وجزم كدايس والراجل يقابلنا لانو
    السياسة هي نقيض الحماقه !!!
    لمن زول يجرك من حفرة بربط الحبل حول رقبتك
    معناها شنقك ما انقذك !!
    ناس دارفور عندهم مثل بقول ( أبلاي بي رقبته
    بربطو من صلبو مالو ) انا يادوووب عرفت
    بربطو من صلبو لييييه !!!
    كسرة :
    أرضا سلاح …….

  5. لا فض فوك ود جبر كلام موزون وطالع من القلب ويدخل لى القلب من دون استئذان

    الوطن ثم الوطن ثم الوطن لا يقبل القسمة

    وعقبال ماتسترد القوات المسلحة الجنوب كمان مش هجليج

    والضرس لما يبدا ينتح المسكنات مابتعالج الا بالقلع

    قلب وقالب مع السودان ومع كل سودانى اصيل ومع مصلحة الوطن للنهاية

    والسودان الوطن الواحد ماقد كان وما سيكون الالف الام السين الواو الدال الالف النون

  6. سوال
    لم يمر العام لكي يحتفل الجنوب او يحزن الشمال بضياع جزء من ارض اجداده فمن المسؤال الذي اوصلنا الى تلك الحاله ومن الذى اوقد نار الحرب ؟
    (بعد وصلنا الجامعه نرجع تااااااااااني لى سنه اولى )

  7. بمناسبة خط هيثروووووووووووووو
    ارجو ان تضيف كل يوم واوا لحدة مانشوف واواتك حتصل وين
    وأكيد حتتعدى المسافة خط هيثرو ذاته

  8. لا فض فوك يا أستاذ جبرا، حقيقى كلامك طالع من القلب ودخل القلب مباشرة، لأنه مليان صدق وجدية ونسأل الله أن يعينا وإياكم على عمل أى شىء للمساعدة فى عودة هجليج إلى حضن الوطن، وأكيد ده ح يحصل قريب بإذنه تعالى .

  9. سلام لكل سوداني أنتو الناس دى لمن كانو بمشو ماليزيه وبلمو في المليارات الدولارات وسكنو الفلال ما عرفو انو في شعب وناس تعبانه وزيتا طالع . أسا دبرننا نمش معاهم والله فكره . وليه لا نمش نحارب ونحرر ونحن التعبانين وهم الغنيانين ونوس العملو في التعابه ديل وكتير…………………
    أمشو أنتو تعالو بنحرس ليكم العقاب

  10. وطنى ولاملى بطنى
    سكاتى ولا الكلام النى
    نسأل الله ان يسبغ علينا نعمة الامن وان يبدل حالنا للاحسن

  11. أستاذى المحترم الفاتح جبرا بعد التحية و الإحترام لك تحية بقدر ما أحييت فى قلبى و أرجعت لى إنسانيتى بإرجاع حب وتقدير الوطن إلى قلبى الذى قد فقدته من جراء إحتلال و إغتصابتلك الأرض الغنية بالنفط الذى لا ينضب فى شخصيتى من قبل الذين يحكموننا و هى أحلامى و طموحاتى التى تبددت فى بلدى فعمدت على البحث عنهما فى بلد أخرى نحن من جيل لم يعش مثلكم أى عصر ذهبى ليتررد صداه و يجعلنا نقول كانت أيام جميلة بل كانت دائما تلك العبارة التى تثقل على صدرى كلما فكرت أنها أصلا موجودة فيه قبل أن أقولها و هى أيام الله لا عادا أرجو منك أيها الفاضل الفلوتر أن تستمر فى إيقاظ تلك الهمم التى أُثقلت بضم الألف فى النوم مغصوبة لأنها مسكينة ما ختوها فى الشاحن و أستمرو فى تجاهلها و إقصاءها الجدير بالذكر أنها هى جيل العشرينات صاحب الطاقات الجبارة و الدماء الحارة المفرزنة داخل البلد شكرا جزيلا بعظمة الوطن فى داخلك .

  12. تحياتي لكل سوداني غيور على تراب وطنو الغالي .. بس يا جماعة الحساب ثم الحساب ومفروض الناس ما تتحرك الا بعد إقالة وزير الدفاع ورئيس الأركان ورئيس المخابرات وأي مسئول امني لأنو دي يا جماعة مواقع نفطية يعني مفروض الحماية فيها تكون ١٠٠ فى ال ١٠٠ ولو دولة الجنوب قدرت تحتل المواقع دي تبقي اي حتى تانية احتلالها ساهل ولا شينو ودي المفروض يحاسب عليها المسئولين عن الأمن …لأنو لو الناس حررت هجليج الملف بتابع التقصير حا يموت زي الملفات السابقة …حصل شنو فى ضربة العربية فى بورسودان والتحقيقات وصلت لوين والنتائج شنو ما عارفين حاجة لحدي هسع .. ما تأخذنا العواطف ونقوم نجري طوالي لازم ناخد نفسنا قبل ما نخطي خطوة واحدة وهجليج حا ترجع وبأذن الله وان ما ضد النفرة لكن لمتين نجرى وراء اي نداء والناس ديل ما بتعظوا من السوابق أظنهم عمرهم ما عرفوا فائدة قراءة التاريخ ، وربنا يسلم الوطن من كل سوء ودمتم سالمين

  13. حاج أحمد السلاوى | رد

    ياها المحرية فيك يابروف ..ومن كل سودانى أصيل ..وكووولنا قلنا نحنا مع قواتنا المسلحة الباسلة ووقت الحارة ما فى زول بيتخلف وبرااااكم شفتوها قبال دا وما عاوزة ليه دليل ..
    ونضم صوتنا إلى صوتك فى أعادة هيكلة الأمور وإعادتها إلى نصابها ونشدد على محاسبة كل المقصرين من أكبر كبير إلى اصغر صغير دون دغمسة ولا محاباة وإلا على الوطن السلام ..

  14. جزيت خيرا يا حبيب..
    لكن انا اضم صوتى للقائلين بان (اذهبوا انتم وابناءكم ومحسوبيكم فقاتلوا ودافعوا عن مال اغتصبتموه وثروة اقتسمتوها )…

  15. جنوبى..
    مبروووك البرنجية وخمس لى مع كوكو دا ! احححح

  16. الوطن وخارطته وناسه ومفهوم الوطنية لم يعودوا كما كانوا … لذا على كل واحد النظر إلى الزاوية التي تربى عليها حديثاً خلال العقدين الماضيين أو الثلاثة .. يعني بمقتضيات الراهن ويحدد موقفو من الحاصل … فيا بروف وصل الزهد بالناس في ما تفعله هذه الحكومة بأن تركوا لها كل (يعني .. كل) شيء لتفعل فيهم ما تراه مناسباً … وقد فعلت ما لم يفعله النجار في الشجر … وغبنتهم وحرقت حشاهم .. وأذلتهم بإفترائها (ومن شايعها) على الخلق .. فأوغرت الصدور .. ولم تحسب لنا حساباً .. فإنعكس هذا الأمر بروداً في ردود أفعالنا تجاه ما يحصل … وصارت الوطنيةهذه الأيام فرض كفاية .. هم من خلق هذه الدولة الجارة من أضلعنا … وهم من خلق منها عدواً … وهم حينما ذهبوا إلى ماليزيا لم يأخذونا معهم .. ويريدوننا أن نذهب معهم إلى هجليج !! هل يستقيم ذلك بالله عليك ؟؟
    يشهد الله إننا نحب بلدنا أكثر منهم .. لكنهم يكرهون لنا ولها الخير .. فأوصلوها إلى حال يفرح اأعداء ولا يرضي الأصدقاء .. تبت يداهم …

  17. البروف جبرا … جزاك الله خير … ويا مثبت العقل والدين ثبت قلوبنا على ما تحب وترضى .

  18. Dear Mr. Alfatih Gabra

    Salamat!

    We all should have patriotism in us. Despite how the conflict has been portrayed by “Kizan” glorious media, the notion of “you either with us or with the enemy” is a type of dictatorship.

    I love your writings and I’ve no doubt you mean well, but on this one I disagree. These are their wars, their own creations. We should not be dragged to wars that the only winner and beneficially is these clowns.
    This is not the first or last part which has been taken from us. When you’re driving by, if you see an Egyptians around you, please remember this is another type of invasion. We’ve lost so much by us not been serious and distracted; any help now means keeping these crooks for years to come.
    Let them send their sissy boys not our innocent ones
    Let help any one who is fighting those crooks for now. Let’s capitalize on this golden opportunity to crack them open wide. Let’s educate our people the only way to STOP all of this is fighting those morons

    All respect and love!
    Cheers

  19. الحبيب

    والله البلد حقتنا دى ما فيها اختلاف لكن عاوزين الناس الراكبه الفارهه وماكله المستورد وشاربه البيره الباااااااااااارده نحن ناس فول سااااااى لكن البلد وجعانا وجع عرس الزول داك

  20. بلدا حيرتنا في اي سايد نقيف نلاقيو قيف
    ربنا يحرر هجليج ويحرر باقي الوطن من طغمة الفساد

  21. …….رائع مازال السودان بخير اتمنى ان تجد كلمتك أذن واعيه ……….

  22. هو جبرا كما عهدته دوما وطنى ( ما مؤتمر وطنى ) لمن تظنه حين الجد جد مؤتمر وطنى بس فى مشكلة ؟؟
    ناس المؤتمر الوطنى ديل عند الجد جد ما بيكونو وطنيين ليه ؟؟؟

  23. للأسف يا بروف كنا نقرا لك ونشعر بأنك تكتب بحرقة مثل التي نشعر بها أو أكثر … ولكن شيئا فشيئا إبتدأت شخصيا أشعر بأنك من الجماعة وإنك شايف الفيلوتطعن في ضلو ، وذلك بعد أن جعلت أهم الموضوعات عندك مثل خط هيثرو واسئلة الدين في لجنة الاختيار… فإذا كنت منهم فالسودان (حقكم انتو بس) فأذهبوا فقاتلوا إنا هاهنا قاعدون … وإذا كان حقنا مثلكم فلم لم تستشيروننا في الاستفتاء والاستقلال الخاص بالجنوب؟ ولم جعلتم دماء كل من كنتم تطبلون لهم في ساحات الفداء وكأنها دماء أرانب غير مذكاة؟ قلتم وطنية وبعتم ثلث الوطن مقابل رضا امريكا ولم تستلموا الثمن بعد… وقلتم شريعة ودين وقرضتم خيرة ابناءالوطنفي غابات استوائية كنتم ستتنازلونعنها بلا مقابل… فهل تريدنا الآن أن نحارب من أجل هجليج أو حتى أم درمان؟ وماذا لو مت ومات ابني واخي وابن عمي من أجل هجليج ثم تنازل عنها البشير دون أن يخطرني ختى؟ هل اكون شهيد الوطن أم شهيد البشير أم شهيد البترول؟ لو تعرفون قتالا فإن عدوكم هو من جعل كل من سقط من أجل الجنوب وكأنه فطيسة …عدوكم هو من أغراكم بتطيسق الشريعة ثم انسلخ منها

  24. ماليزيا تمشوا براكم ، هجليج نمشي معاكم ???
    why ?

  25. هاشم…
    يا (عارض) برة الدارة !!

  26. كيف برة الدارة يا شمباتي؟ انت ما متذكر ساحات الفداء والاستنفارات والحاجات والحاجات وكل الناس الماتو من 1989؟ ( ناهيك عن الذين ماتوا قبل الانقاذ دفاعا عن الوطن) ثم نمنا وصحينا لنعرف أنهم ماتوا فطيسة وليس من أجل الوطن ولا من أجل الإسلام وإنما من أجل حكم وسلطة؟ بأي حق أدعو الآن الشباب للجهاد… باسم الإسلام أم باسم الوطن؟ والآن يقول البشير أنه سيحرر الجنوب من الحركة الشعبية… هل استطاع تحريره منها عندما كانت مجرد حركة حتى يعدنا بتحريره منها عندما اصبحت دولة محمية بمواثيق الأمم المتحدة؟ لقد كان ذلك اليوم من عام 89 يوما أسود سنظل نعاني من تبعاته نحن وأبنؤنا وأحفاد أحفادنا…. من كان يظن أنه سيأتي يوم نبكي فيه على النميري ونشعر فيه بأن وطن قد انتهى أمره؟ والله لو كان الأمر بيد شيوخ قبائل أميين لساسونا خير من هذه السياسة ولألقوا خطبا تختلف عن هذه الشطحات التي لا تتفق ومقام الرئاسة والسياسة… وا حر قلباه… وا سوداناه…. يا ناس نحنا ناس كعبين ما نقعد نتبوبر ساي… لو كان فينا خير لما وليّ علينا هؤلاء ولما رضينا بهم كل هذا العمر…. لقد كان السودان مستهدفا ولكن من استهدفوه لم يكونوا يحلمون بأن يصل حاله إلى ما هو فيه وبأيدي من يزعمون أنهم يحاربون الاستهداف وهم يساعدونه ويمكنون له

  27. الحكايه ما هجليج تاااااااااااني
    عندما كنت اطالع بعض الصحف اليوم وجدته كلام لنافع ان حالهم الان مثل مريم وزكريا فى المحراب
    اها ياجماعة الخير الناس دي فى درجة الرسل والانبياء وياتيهم المدد من السماءعلشان الكلام دا مافي داعي للنفره ولا رايك شنو ياابوناجى
    كسره
    هى الحكايه ما هجليج ولا تااااااااني

  28. حاج أحمد السلاوى | رد

    يا جماعة الخير السودان دخل منعطف تاريخى صعب جدن ..لينا كام سنة نسمع عن تحديث وتلسليح القوات المسلحة وتجى وتسقط فى أول إختبار ؟ دا معناهو فى حاجة غلط وفى كذب وفى كلام كتير كان للإستهلاك المحلى فقط وفى ناس ما شايفة شغلها صاح وفاكرين الموضوع كووووولو عرضة ورفع عصى ( جمع عصاية ) فى الهواء وتهليل وتكبير وشوفونى ..نحنا لازم نقيف مع القوات المسلحة بالدعم المادى والمعنوى وأتمنى عدم إرسال شباب لا خبرة قتالية لديهم ليموتوا فطايس كما حدث قبل ذلك لأن الخسارة حتكون مضاعفة ..هل القوات المسلحة ينقصها الرجال والعتاد ؟ لا أظن ذلك ولكنى اعتقد تنقصها القيادة الحكيمة التى ذهبت للصالح العام خلال السنوات الماضية ..وأتساءل هل قامت الحركة الشعبية بإحتلال هجليج بواسطة دفاعها الشعبة ودبابيها ام بواسطة جنودها ؟
    الخلاصة هى أنه لابد من غربلة القوات المسلحة من جديد وتقديم كل من تقاعس عن واجبه للمحاكمة الفورية وتعيين وزير دفاع من داخل القوات النظامية بعيداً عن التسيس فقوات الشعب المسلحة هى للدفاع عن الوطن وليس حماية النظام ..كفانا ذلاً وهوانا وشعارات لا تسمن ولا تغنى من جوع .. لماذا يظل عبدالرحيم محمد حسين فى موقعه حتى اللحظة ؟ لماذا يظل السودان رهينة وتحت رحمة هذا الرجل ..؟ أما آن له أن يرحل بكرامته ويخلى موقعه لمن هو أقدر منه ؟لماذا ينتظر حتى تتم إقالته (الإقالة التى لن تحدث حتى لو سقطت الخرطوم فى ايدى الحركة الشعبية ) ..؟ اين برلماننا وأين نوابنا ( ىالذين أصبحوا نوامنا ).. ما ذا ينتظرون وقد مرت عشرة ايام منذ الفضيحة المدوية ؟
    ولا حول ولا قوة إلا ابلله ..وحسبنا الله ونعم الوكيل ..

  29. وزير الدفاع ( عارض ) بره الداره .. مع الاحتفاظ بالقوسين حقات شمباتي !!!
    امس راينا البشير يرقص مع انغام محمود عبد العزيز …..( فاااايق ورااايق )
    مصداقا لكلام اخونا السلاوي : زمان كنا بنشوف رتب الجيش فوق المقدم وقد بانت عليهم اثر السنون التي عركوها في الخدمة ولا يحلمون برتبة عميد الا بعد خدمة سنين ودنين ( زي ما بنقول ) لكن الان رتب الجيش السياسية تجدهم في ريعان الشباب ويحملون عالي الرتب العسكرية ويمكن فيهم ناس ما ضربوا طلقة الا في معسكر التدريب في الكلية واصبحنا نري اصحاب الكروش و المؤخرات الكبيرة والنعومة تشع منهم ..
    عندما يتم تسيس الجيش معناه ما جيش دولة وفي الحالة ببقي جيش النظام الحاكم وده ما في صالح الجيش لأنو بيفقد التعاطف الوطني … ( عايزين قانون يحمي الجيش من تفاهات السياسيين ) عشات يرجع جيشنا فرسان الكمين في القتال بينين سودانية سود …
    حملة تبرعات الدم : وزير الدفاع اول واحد يستحق قزازة ادوهو واحدة يمكن يحس ويستقيل !!!
    اكتر من اسبوع هجليج بايته بره البيت ويجيكم نفس ترقصوا وتاكلوا وتقيفوا قدام الاعلام وتتكلموا !!!

  30. الشي الذي اتضح بما لا يدع للشك مجال ان الامر فيه وفيه كيف تسقط ولماذا سقطت سقطت هجليج بهذه السهولة لانه هناك اهمال متعمد للجيش واهتمام بالمليشيات ام الدفاع الشعبي ياخي العسكرية تخصص لم تعد حماس فقط فيجب محاسبة وزير الدفاع الذي لم نجني في عهده غير الهزائم ومن قبلها غزو امدرمان ويبرروا هزيمتهم بكيت وكيت يجب السؤال هل هم قادرون على حماية ماتبقى من الوطن ام لا اذا كانت الاجابة لا فحواء السودان لم يصبها العقم فاليذهبوا الى مذبلة التاريخ

  31. تشخيص الحالة واضح جدا و الداء معروف للقاصي و الداني..اولا نزيل المرض و يتعافي الجسد بعدها نحرر : نحرر المواطن ثم هجليج -حلايب و الفشقة…….

  32. حاج أحمد السلاوى | رد

    سؤال .. لماذا نهتم بالدفاع الشعبى ..والمليشيات اكثر من القوات المسلحة ..؟ مهمة الدفاع عن الأرض والعرض تقع على القوات المسلحة فى المقام الأول وإلا لماذا كل هذا الصرف على منتسبى القوات المسلحة ..؟هل لكى يمثلونا فى التشريفات والإستعراضات العسكرية ..

  33. هاشم…
    ولسه بتعرض !

    جنوبى..
    ههههههههههههههههههههههه,,عليك الله دخلوا هو ذاااتو جوة القوسين ديل ! طاااااخ

  34. طارق بابكر عبيد | رد

    الله اكبر استرداد هجليج فرحه كل حر،الحمدلله

  35. سلام ياقبيلة،،،
    الله أكبر الله أكبر الله أكبر،،،
    مبروووووك لكل الأحرار الصادقين بالنصر العظيم المؤزر، وعودة هجليج لحظيرة الوطن، وإن شاء الله تكون درس بليغ لكل المرجفين بالمدينة الذين يقفون في صف الخونة والمتخاذلين والمتآمرين ضد سمو الوطن ورفعته، والرسالة وصلت لكل أولئك الذين يظنون ان كل من ينادي بالوقوف صفا” واحد ضد المحن لأجتياز عقبات التآمر هو (وتني)، وهو فعلا” وطني بالمعني البعيد والعميق للوطنية، وليس المعني القريب الذي يتبادر لأذهان الموتورين من أهل الضلال الذين يحسبون كُل صيحة عليهم….
    خروج هذاالشعب الحُر الأبي بالأمس القريب بعفوية فرحة بعودة هجليج تؤكد عظمة هذه الأمة وأنها لن يضرها من كيد الأعداء شيئ بعون الله إن أحسنوا الظن بربهم وصدقت نواياهم وتوجهوا لله بخشوع وتوبة وأناة!!!!
    مبروووووووووووووك تاني مرة وألف مرة، والله أكبر ولا نامت أعين الجبناء…..

    لماذا تقف مع الشيطان ضد الشيطان أما كان الأولي لك أن تقف مع الحق أين ما كان لتزهق به الباطل

    1. لم افهم يا ود الخلا ما ومن المقصود بالسطرين الاخيرين من تعليقك .

  36. سلام ود الخلا والف مبروك عودة هجايج لحضن الوطن … ولكن هل من محاسبة لمن فرط في درة غالية كهجليج لتحتلها دولة اجنبية وعدوة … لا يحق لنا ان نفرح ولا ان نضع السلاح حتي نعتدي عليهم مثلما اعتدوا علينا والله اكبر الله اكبر .

  37. قبل ان نفرح بعودة هجليج لا بد من المحاسبة
    السريعة لكل من تسبب في ضياعها لمرتين , حتي
    لا تفاجئنا هجليج أخري ..
    هجليج يجب ان تكون درس بليغ للحكومة قبل
    المرجفين في المدينة ويجب علي الحكومة ان تضع
    الرجل المناسب في المكان المناسب ..
    ان يفرح عامة الشعب مثل هذا الفرح دلالة
    علي حبه وعشقه لتراب الوطن الغالي ..
    لكن ان يفرح الرئيس ووزير الدفاع بمثل هذا
    الرقص دلالة علي عدم تصديقهم بأن مستحيلا قد
    حدث …..
    الفرق بين السياسي والمواطن العادي هو
    معرفة حدود العفوية في التعبير ..
    لو ان سلفاكير وصف رئيسنا بالحشرة رئيس
    الحشرات لأصبح كل الشماليين مؤتمر وطني !!!

  38. الخروج العفوى للمواطنين امس يدل بان الوطنية قوية فى نفوس اهل السودان — ولكنها لاتجد امينا عليها من حكامنا ليوجهها لمصلحة الوطن ==

  39. اخي جبرا والاخوه الاعزاء
    مبروك لكل الشعب ماعدا وزير دفاعه المتسبب الرئيسى فى هذه العشر العجاف التى مرت علينا
    اخى ود الخلاء
    رايت بام عينيك هذا الشعب ودواخله النظيفه لم يخاط الاوراق
    فرحت ولكن فرح حزين عندما رايت صور شهداء الماضى وكل غابات الجنوب التى رويت من دماهم
    ربما لم تعش معهم ولم تعاشرهم اعرف معظمهم حق المعرفه كانوا خيرة شباب الارض من الذى خان
    دماهم وفرط فى الارض ومن الذى تخلى عن الشعارات وعمل عكسها صار همهم النهب والسرقه والضلال والتضليل ومن الذى انقسم الى موتمرين كل يكيل للاخر ما لذى وطاب من الشتائم ومن الذى ادخلنا هذا النفق الضيق والمظلم
    كنا نمني النفس بان يكون السودان نعم النموزج الاسلامى بعد ان اصبح بيدهم التعليم والاعلام والصحه والامن وكل منشات الدوله ولكن خاااااااااب الظن واصبح الفساد والانفلات الاخلاقى هم من اسسوا له ولا تقول لى الشعب لان الشعب السودانى اصله طيب ومتدين بالفطره
    سالت دماء اخرى فى هجليج اتمنى ان لا يخونوها كما خانوا الاخرين ويعودون للنهب ولسرقة هذا الوطن من جديد

  40. اخي جنوبى
    سلامات
    الداير يحاسب منو السيد الرئيس قال لوزير الدفاع دايرك ترفع لى التمام قبل الخريف بان البلد نضفت
    من الاعداء يعنى بالواااااااااضح كده الوزير قااااااااعد ومافيش محاسبه
    (بجي الخريف والوارى يتقيف )

    1. بت وراق … صحي قالا والله ورفع ضغطي
      الله يرفع ضغطو ..
      عليكي النبي شفتي وزير الدفاع وهو بيعرض ؟
      عرااااض خلاص !!!

  41. صحي عرااااااااض لكن ما عنده عرض والله العظيم انا لو في محله بعد البيان الرجع هجليج اختمه بالاستقاله واقول ياجماعه زي ما ضيعتها وراحة فيها ارواح طاهره هسع رجعناه وانا بتحمل المسوليه واهندي استقالتى

  42. اصعب احساس هو احساس الغربه والزول في بلدو وده احساس الكثيييييييييييييييير من السودانيين واحنا والله خلاص تعبنا عديل وقلنا الررررررررررررررررروب وجد بقيت اتمنا القيامه تقوم عشان نرتاح ده لو فيها راحه

  43. قال (خبيث) المدينة : وطنى !!
    وقال (ظرءف)المدينة : بطنى !!
    وسمعنا تحت تحت انو فى رتبة (مشير) جاية !!!
    هاكم الريالة دى !!

  44. حاج أحمد السلاوى | رد

    السي
    الرئيس عمر البشير يتحمل كل إخفاقات وزير دفاعه الذى يحرص على بقائه أكثر من حرصه على سلامة الوطن ..من المسئول عن أرواح الشباب التى راحت فى هجليج ؟ يتحملها السيد الرئيس ووزير الدفاع ورئيس هئية الأركان ..
    أحداث كهذه تُقيل حكومات بأكملها لا وزير الدفاع فقط ..ولكننا لا زلنا نعرض ونعرض ونعرض وأهالى الشهداء يذرفون الدمع على ابنائهم ..

  45. بت وراق .. عندنا في حلتنا واحد اسمو ( سعد العوير ) مره في عرس دقاهو واحد جاي من بره الحلة ما بيعرفو وطبعا سعد بقي يكورك وشي بكاء وشي فليق حجار والناس كلها قامت في الزول التاني حريم ورجال وهاك يا نبيذه والفنان ذاتو من اولاد الحلة قام داير يحتوي الموقف ودخل بي غنية سيرة والشكلة شغالة لسع … تعرفي اول واحد دخل الدارة ورافع يده اليمين وخاطي كفه الشمال تحت عباطو ومدنقر راسو لا تحت ومره مره يلولح راسو كان منو ؟ سعد العوير !!!!
    hala … انت ما سمعت كلام ود الخلا فوقنا ؟ مقوما القيامة مالك دايرة تودرينا دنيا و آخرة !!!
    شمباتي .. انت قلت مشير ولا ( أُمشيييييييير ) !! هبوبك يا الله ….
    حاج السلاوي … البشيل فوق الدبر ما بنذ .. عبد الرحيم لحماية الكرسي من الانقلابات العسكرية اما احتلال المدن فهو ما دون ذلك والبشير لا يرضي ان يزاح به ويرضي ما دون ذلك …

  46. امبارح كنته بشاهد فى تلفزيون السودان (حاله مازوخيه وكده) وكان فى لقاء مع احد قادة الميدان فى هجليج وبقى يتكلم عن الخسائر فى جيش العدو من ارواح ومعدات وعن المعاك العنيفه وعندما اراد ان يترحم على شهداءنا ويتمنى الشفاء للجرحه تم خطف الخطف العدييييييييل دا منه ما دايرين يجيبو سيرة شهداء
    بالله ديل بشر قايلننا هنود

  47. المعارك
    ماقلنا ليك ياجبرا صلح الخط
    والا انت حالف ما يتصلح الخط الا لمن يتلقى خطك الرايح

  48. والله يا جنوبي لو كان سعد واحد ما مشكله لكن عندنا كميه مهوله من سعد العوير

  49. تم خطف المايك
    بقينا زي ناس التصحيح والمراجعه قبل الطبع مشكلتنا بقت (بعد الطبع )
    اقروا فوق والتصحيح تحت

    1. هههههههههههههههه هسع خطف الخطف دي جبرا
      ذنبو فوقا شنو ؟
      تااااااني امشي احضري تلفزيون السودان !
      انتي قايلا بكتُل ؟ ما بسوي متل سواتك دي !!

  50. انا مااااااا زي جبرا مازوخيه كبييييره
    وزنب جبرا الخط بعد نكتب نلقى الكلام ناقص والحروف ما فيشه

  51. هجليج تحررت عقبال ما نحرر المواطن و بعدة نحرر حلايب و الفشقة……

  52. اييييييييييييييييييييييييييه يا بلد ، …………. عجبى

  53. بلدنا إتعولقت يا رجالة … إتبوجنت .. وساقونا الجماعة ديل عشان ينقذونا لمحل … إني آمنت بالله … أكثر الناس تشاؤما ما ممكن يتصورو !!!!! نحتفل بهجليج وتتعطل كل الدوائر الحكومية لمشاركتها حتى صباح هذا اليوم في إحتفالات البلاد بتحرير هجليج … مافي موظف دولة ممكن يمشي ليك أمورك بحجة إنت في شنو والناس في شنو …. واليومين ديل كل واحد بقى يوزع أنواط الوطنية على كيفو … دا ما عندو وطنية … ودا متخاذل .. ودا عميل عديل ..! ما عارف المقياس بقى شنو … هيئة المواصفات والمقاييس مفروض تتدخل عشان تحسم الجدل الدائر دا … ما قلت ليكم البلد إتبوجنت ؟؟؟ لكن الله في ….!!

  54. الحبيب اب احمد…سلام…
    البوجين الهين دا !!؟
    طبعا الانواط الفوق دى كووولها انا حزتها ! عدا حق الوطنية طبعا ! اسه احزن ولا افرح؟؟
    اححححححححححححححح

  55. اها اتحررت (لكن الوجع راقد )

  56. انا لست سودانيه لكنني متاعطفه جدا مع شعب سوداني بعد اطلاعي موخرا علي تاريخ سودان وقضاياه اكتشفت اشياء لم اكن اتوقعها ابدا وهذا ان زاد فانه زادني كل احترام وتقدير الي هذا الشعب العضيم الذي عاني من الحروب والويلات في سبيل قيام وطن ديمقرطي عزيز اخواني اقول لكم لا تياسو فلا بد من ضهور شمس الحق واروفعو رؤسكم انتم سودانيون احرار ………….(هل من احد يساعدني اريد اطلاع اكثر علي ماحصل في هجليج وشكرااااا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: