وبعد ما تكملوها؟

لو أنك كنت تسير في داخل غابة ورأيت من على البعد أسداً يقترب من غزالة فهتفت (الأسد ح ياكل الغزالة) لما جئت بجديد ولما كان تصرفك هذا يقع في خانة التنبؤ لأنك عارف الأسد حيوان مفترس وآكل للحوم وما عندو (قشة مرة) يعني بيفترس أي (لحمة قدامو) وكده !
العبدلله قد كتب سيناريو عام 2006م أي قبل ستة أعوام عن منح (المحاسيب وذوي القربى) شهادات بحث للميادين التى في الأحياء للإستفادة منها .. فلل .. عمارات .. مستشفيات خاصة .. مدارس خاصة إلخ .. السيناريو الذي كتبته كان إسمه (المارد والأسطوانة) أرجو قراءته على هذا اللنك والعودة مرة أخري لمتابعة المقال عشان أوريك ليه أنا جبت قصة الأسد !
http://wadmadani.com/vb/showthread.php?t=19328
عزيزي القارئ :
لم أكن أتنبأ حينما قمت بكتابة ذلك السيناريو فكما الأسد (ما عندو قشة مرة) كذلك أخواننا (المسئولين) في هذا العهد الكئيب الغريب برضو (ما عندهم قشه مرة) .. ولا يتمتعون بذرة من الحياء وهم يفترسون الميادين أفتراساً ويحولونها لمصلحتهم أو مصلحة (محاسيبهم) فكان ما كتبناه قبل حوالى ستة أعوام عن قصة التغول على ميدان الحي الذي يمثل الرئة التى يتنفس من خلالها سكانه وتمليكها لأحد المحاسيب لإقامة مشروع إستثماري عليها .. عندما كتبنا ذلك السيناريو (ما كنا بنعلم الغيب) لأننا نعلم بأن (الأسد ما عندو قشة مرة) !
الآن تحدث (القصة ذااااتا بي ضبانتا) في محلية شرق النيل وتحديداً بالحاج يوسف دار السلام مربع 6 أو إسم الدلع ( شرق النيل الفيحاء مربع 6 ) حيث تفاجأ السكان قبل 4 أشهر بآليات ومهندسين بالميدان الرئيسئ للحى والذي يقع أمام المسجد والذي تقام عليه صلاة العيد والمناسبات إضافة للمناشط الرياضية ، قام المواطنون بسؤال الزوار عن سبب الزيارة فأجابوهم بأنهم شركة مقاولات اتت للشروع فى انشاء مدرسة خاصة (لاحظ خاصة) .
طلب السكان من الزوار ان يبرزوا اى اوراق تجعلهم يستوعبون الأمر فقام الزوار بإبراز شهادة بحث بملكية الميدان وتصريح مبانى (يعنى القصة متكتكة) وبى أوراقا وكده .
إزاء هذه (التكتكة) توجه وفد من سكان الحي (كما يقولون) الى السيد رئيس اللجنة الشعبية للاستقصاء ولدهشتهم أنكر الرجل معرفتة بالامر بل أكد بان هذا ميدان خدمات ولايجوز لاى جهة نزعة وأبدى استعدادة للتحرك الفورى ومعالجة الامر .
إزاء هذه التحركات الدؤوبة من سكان الحي أمر السيد معتمد شرق النيل بايقاف العمل حتى انجلاء الموقف إلا أن المواطنين قد تفاجأوا الاسبوع الماضى ببداية العمل وعندما توجهوا بالسؤال إلى رئيس اللجنة الشعبية بالحي عما يجري أفادهم بان المعتمد قال له (خليهم يبنوا وبعد ما المحكمة تحكم ليكم ح نكسر المدرسة) !
شفتو (المنطق ده كيف؟) المهم .. بعد صلاة الجمعة قبل الفائتة تجمع السكان (في الميدان ذاتو) للتشاور في امر هذا الإعتداء حيث إتفقوا على تصعيد الأمر والعمل على توصيل شكواهم وتضررهم لأعلى المستويات وما أن هموا بمغادرة الميدان حتى تفاجأوا بعدد 2 دفار شرطة كامل العدة والعتاد (خراطيش +عصى +بمبان +سلاح عديل) وبوكس شرطة (دة بتاع الضابط طبعا) و2 بوكس امن (جديد كرت) وعربة (اكسنت) ترجل منها اربعة شباب كل يحمل فى يدة سلاح كلاش (وبعد شويه يقولوا ليك فك مجموعة في الهواء وما عارف شنو داك) ، قام المواطنون بسؤال الضابط عن سبب حضورهم (المكثف هذا) فأفادهم بان لديهم بلاغ بالتجمهر واثارة الشغب بالحى ! ولما لم تجد (هذه الكتيبه المدججة بالسلاح) أعمال شغب ولا يحزنون قامت بأخذ 2 من سكان الحي (للتحري وكده) ! والآن البناء يجري على قدم وساق !
عموماً العبدلله وسكان الحي لا يطمعون أن يقوم أي مسئول كان بإيقاف هذه (الإستباحة الظااااهرة) لأنو القصة أصبحت (على المفتشر) والماعاجبو (الفساد ده) يلحس كوعو لأنو الظاهر مافيش زول خايف من حساب الدنيا ولا من حساب الآخرة ذااااتو !

كسرة : أها وبعد ما الميادين دي تكملوها ؟ الفهم ح يكون شنو يا رب؟

كسرة ثابته :
أخبار خط هيثرو شنوووو؟ (4 واوات لأنو الكسره ليها 4 شهور وتاني كل شهر واو والفورة مليون) !

Advertisements

35 تعليق

  1. سلامات للجميع انا لا اعرف معنى برنجية لكن اعرف ضيعتها للبعرف
    خاصة ياسين

  2. استاذ الفاتح كفارة اولا وان شاء الله اجر وعافية ان صحت معلومتنا تانيا اقترح عليك حفاظا على صحتك وصحتنا لانه فى المحتاج ليك والمحتاج لينا وما نروح شمار فى مرقة ونحن بناذن في ماالطة ساي الله يكون في العون
    للصراحة اكتر حاجة عجبتني في مقالك دة المنطق الاتعامل بيه المعتمد انه خليهم يبنو والمحكمة لمن تحكم نكسر ليهم والمحكمة ممكن عادي تحكم بانه البيوت الحول المدرسة هي التتكسر لانه المدرسة محتاجة متنفس ومساحااات مناشط سباحة وطايرة ( تطير عيشتنا ) وقفز بالذانة

  3. حاج أحمد السلاوى | رد

    سؤال سغيروووونى .. زى كل مرة .ز البناء وصل ياتو مرحلة لحد اليوم … السقف ؟

  4. حسبنا الله ونعم الوكيل حسبنا الله ونعم الوكيل … اللهم اجرنا في مصيبتنا وابدلنا خير منهم يا عالم يا كريم … اللهم انا فوضنا امرنا اليك فارنا فيهم عجائب قدرتك يا كريم .

  5. البروووف والسمار .
    سلامات .
    المدرسة الخاصة دى ياجماعه مادايرنها للجماعه ديل زاتم . معترضين لى شنو ؟
    كدى ياجماعه ختو الكورة واطة وقولو بسم الله وأصبروا شوية وضرورى ربنا حايفرجا ويفتح على الخلق دى .
    الله فى …

  6. مشكلتنا دي ما بحلها لينا الا مارد ..
    من بكره كلنا نشيل سناراتنا ونمشي نصطاد
    يمكن نلقي لينا مارد ..
    مارد ماسك كتف أبريل ……
    علاء الدين .. جيب برنجيتك معاك عشان في القيفة
    عندها طعم خااااااص …

  7. الغريبه يا دكتور مش قالوا وقفوا التراخيص لي لمدارس جديده و ورياض الاطفال؟!!!
    المعتمد داير يخدر الناس ، عشان بعدين الناس تكون نست لكن جنس تخدير هو…
    حسي عليك الله يا دكتور الصعاليك البيجو شايلين الخراطيش و هلم جرا ديل ما بمشوا هجليج ليه ؟!! عاملين فيها يا دنيا مافيكي الا انا
    الله يصبركم بس ، الجاتكم في ميدانكم سامحتكم….

  8. انت حقو تعمل كسرة جديدة تقول فيها البنيان في قطعة الحاج يوسف وصل وين!!!.. عشان لمن المحكمة تحكم نشيل الطورية ونمشي نساعد ناس الحي ديل لانو الظروف ما معروفة احتمال يوم تحصل لينا نفس الحاجة دي في حيَّنا عشان كمان هم اجو اساعدونا في التكسير!!!

  9. مساكم خير ،، والف سلامات يابروف ، غايتو انا عاوز احجز لي ميدان بوضع اليد وابنى فوقوا لكن وين فى الخلاء ده لو الخلاء ذاتو باقي .. انا غايتو حا اسميهم البلدوزرات ان صح التعبير ، ياخي ده كنس بصورة غريبة ميدان كامل لشخص واحد وبدون خطة اسكانية والله عفارم على المسئول ده يظهر امو مرضعاهو ستة وتلاتين شهر ولا يمكن يكون عندو راسين وكده.. المهم فى حاجة مميزاه عن الناس بس الشئ الأكيد انو كرشوا كرش فيل وما فى زول عندو زي كرشو. عاوز تعمل بالميدان شنو ما كانو يدوك بس 400 متر ما كفاية ولا شنو .. خليك قاعد فى الميدان البنيتو ده وبعدين حا تقوم جاري وتخليه للناس لمن يحصل ويجي الحساب الدنيوي .. ولكل آنٍ أوان .. وتسلم يا وطن

  10. المر الما بتبلع | رد

    أبوناجى يديك الف الف الف عافيه .. لكن انت ما حاسى انك بتنفخ فى قربه مقدووووده

  11. السلام عليكم ، البرف و الاخوان ، معتمد شرق النيل جاء الشوارع حول المحليه وقال كل واحد يعمل برنده مرسيليا حديديه لونها اخضر غامق و الا ، ناس لم تستجيب ، لانو الموضوع تكلفه و كده ، رجع المعتمد بعد كم يوم و قال للناس بصريح العباره الماحيعمل برنده خضراء غامقه حنقفل ليه دكانه ، طيب و الرخصه الاصدرتها المحليه ، دى بلها و اشرب مويتها ، طيب نحنو ماعندنا قروش نعمل برنده من فضلك اغمل لينا البرندات و نحنو ندفع بى الاقساط ، ده منو ده البيتكلم كده ؟؟؟ اعتقله يا عسكرى ، الزول ده عندو حق اعتقال الناس !!! وتدخل اولاد الحلال وغايتو خلى ليك الزول وشو زى الواطه ، المعتمد اهو جاته خاويه ونسى اظنه موضوع تسويق المرسيليا الحديد اللونها اخضر عامق ،
    سعال ديكى : قبل كده رامبو قال كل واحد يضرب بيته جير ابيض والباب اخضر غامق …………………….عجبى

  12. البروف الحبيب…سلامات…
    عارف خبر الاسد والغزالة والبتعمل فوقو دا اسمو فى النحو والبلاغة ان ما خانتنى الذاكرة (لازم الفائدة) !!
    اها وراى التاس المشوا حرقوا الكنيسة شنو فى الحنة دى !؟ باقى رايهم مهم خالص خالص…

  13. علاء الدين..سلام..
    ربنا يعليك بى برنجيتك دى ! انت كنت بايت هنا ولا شنو !؟ كع

  14. البروف والسمار الكرام . .
    تحيه و سلام . .
    أقترح على سكان الحي المعني بالموضوع ، التنسيق مع القساوسه والمسيحين الذين أحرقت كنيستهم والذهاب فوراً لمقابلة والي الخرطوم ( الذي لا يظلم عنده أحد) ، الرجع للراجل الكشك بتاعو.
    و إذا لقوهو ( مشغول) أو ( في إجتماع ) ، يبقى الشكيه لي أب إيداً قويه.

    1. حاج أحمد السلاوى | رد

      يااااااااااااااا على سنكل .. يا عمنا .. مش برضو ممكن المدرسة الخاصة دى بتاعة الوالى زااااااااتو ؟ ويبقا هو الخصم والحكم ..

      1. سلولو إزيك . .
        قلت ليك الوالي دا ما بنظلم عندو حد ! يعني خايف ربنا. الميدان قال ليك باعوه لمستثمره متوضئه.
        لكن في النهايه طبعاً الحاج يوسف ما في العراق ، الوالي برضو مسؤول عن ميادنها.

  15. سلام ياقبيلة،،،
    ياسادة ياكرام مالكم تتهجمون علي الناس هكذا!! ومالكم تتسارعون في الكيد والكيل للآخرين بمثل هذا؟؟ وأي واحد فيكم ما يصدق يسمع ليهو كلام مطرطش جاي ولا جاي وبس يشيل لسانو ولا قلمو وفي أقوال أخري لود الزبير ( أين أنت يارجل) كي بوردو ويقع سلق في الحكومة ، ومن (شايعها) كما يقول آخرون،،،،
    القصة يا سادة ياكرام ماقصة ميدان مغتصب أو أرض مملوكة لآخرين أُستبيحت أو غير ذلك، القصة وما فيها ان هذا الميدان وهو في الأصل (حجز حكومي)، لخدمات المنطقة، وتم منح المواطنين القاطنين حوله مساحة مقدرة كميدان للمسجد المشيّد به كجزء من الخدمة المخصصة ، والنصف الآخر تم منحه كمركز للشرطة وروضة للاطفال، وتبقي جزء من الميدان المخصص أصلا” للخدمات وهو الجزء المخصص كمدرسة خاصة لمن يقوم بدفع قيمة الأرض وتشييدها، وقام هذا الشخص بذلك حسب اللوائح والقوانين والنظم التي تنظم منح التصديقات للمواطنين….
    من يسمع مثل هذه الحكايات يظن ان الدولة تدار بدون نظام أو قوانين وهذا لعمري لا يحق في حقنا كمواطنين راشدين نعيش في دولة تحكمها المؤسسات والقوانين والنظم واللوائح المنظمة لذلك،،،،
    الخلط بين الأشياء والكيمان لا يجوز، قد نتفق مع بعضنا أن هنالك فساد وسوء في ادارة امور المحليات، ولكن لا يعني ذلك أن نقدح في كل شيئ طالماكان صادرا” من هذه الحكومة، ولا يمنعنا ذلك من القول بان الحكومة معصومة من الوقوع في الخطأ، ولكن علي الناس أن يتوخوا الحذر في ألقاء التهم علي الآخرين حتي لا يصيبوا قوما بجهالة ويصبحوا علي فعلهم ذلك من النادمين،،،
    وكما أن الناس تنادي بالعدل وأحقاق الحق فعليهم ان يحكموا بين الناس بالعدل والأنصاف ولا ينكرون فعل شيئ علي الاخرين وهم به عاملون فلاتنهي عن خُلق وتأتي مثله عار عليك أذا فعلت عظيم…
    فالشهادة لله بالقسط والعدل وفي قول كلمة الحق حتي ولو علي النفس هي من المُسلّمات المطلوبة علي المؤمنين وفي ذلك يقول الحق جلا وعلا في محكم التنزيل في سورةالمائدةالآية رقم (8) (يَا أَيُّهَا الَّذِينَ آمَنُواْ كُونُواْ قَوَّامِينَ لِلَّهِ شُهَدَاء بِالْقِسْطِ وَلاَ يَجْرِمَنَّكُمْ شَنَآنُ قَوْمٍ عَلَى أَلاَّ تَعْدِلُواْ اعْدِلُواْ هُوَ أَقْرَبُ لِلتَّقْوَى وَاتَّقُواْ اللَّهَ إِنَّ اللَّهَ خَبِيرٌ بِمَا تَعْمَلُونَ)
    ربنا لا تؤاخذنا ان نسينا أو أخطأنا، ربنا ولا تعاملنا بما فعل السفهاء منا، أن هي الا فتنتك تُضل بها من تشاء وتهدي من تشاء فاهدنا وأهدي بنا،وأرحمنا وأغفر لنا ذنوبنا وما أغترفته أيدينا وأنصرنا علي من عادانا، وأجعل ثأرنا علي من ظلمنا، ولا تجعل الدنيا أكبر همنا ولا مبلغ علمنا يارب العالمين…

    1. القطع الموزعه قطع ارضى استثماريه (بعنى فى الواقع ) وفى الورق بقولوا روضه ومركز شرطه ودار مؤمنات يعنى حجز حكومى يستعمل روضه مركز شرطه ما قطع ارضى استثمايه يعنى حراميه. ومن تحت الطربيظه

    2. حاج أحمد السلاوى | رد

      سؤال سغيرووووونى كدا يا بن الفلاة .. الميدان دا اصلو مساحته قدر شنو عشان يشيل الحاجات دى كووووولها ..؟ مدرسة خاصة ( ولمن يقوم بدفع قيمة الأرض وتشييدها … ما هى دى زااااتها المشكلة يا سديقى ) ومسجد وروضة أطفال ومركز شرطة ..
      وخلونا النشوف آخرتا شنو مع الميدان دا .. التقول ميدان ابو جنزير ..

    3. قومو الى صلاتكم يرحمكم الله

    4. قومو الى صلاتكم يرحمكم الله !!!!!!!!!!!

      1. يعني يا ود الخلا نحنا حارقين رزنا سااااااي … طالما اي زول بيقدر يدفع قيمة اي حاجه الحكومة تقوم تبيعها ليهو دون النظر لمصلحة المدينة والحي وسكانه يبقي الحجه في شنو … نبيع الميادين ومستشفيات العيون والقصور الجمهورية … والزووووووول ذاتو لو جاب سعر كويس الحكومة تبيعو اخير يبقى بي سيدو من الجهجهة .

      2. يا مدنى القال ليك منو مابنبيع اى ارض ، السكه حديد ( سافرت بيها ) بعناها بى واطاته ، جنينة النزهه ( كان اسمها كده ) شفتها بى ، قرش بس ، النادى المابعرفو ، مزرعة كافورى ، و الذى منه …………… عجبى

  16. اخي جبرا والاخوه الاعزاء
    عشان كده اولادنا بقوا عنيفين فى الاقوال والافعال لديهم طاقات كامنه ولا يجدون مكان لتفريقها
    والفساد للاسف فى هذه القصه الحقيقيه هو رئيس اللجنه الشعبيه وهو كان يعلم بالموضوع ولم يتحرك الا بعد ان اختلف مع اصحاب الشان في عدم قبول اولاده بالمجان فى تلك المدرسه
    يعنى للاسف الدافع ما كان للمصلحه العامه كما حسنين فى (المارد والاسطوانه )
    يعني القطع ح يكون من خلاف لرئيس اللجنه الشعبيه اولا

  17. التحية للجميع بروفاً وسمارا
    لأسباب جغرافية (أمازونيا .. وكدا) .. لا يوجد في القصة ما يدهش !! عااادي بتحصل كل يوم … والمبررات جاهزة …. وفتوى المحلية أيضاً لا غرابة فيها … والمدافعين موجودين (أيوة خلوهم يبنوا … ونجي نكسر ليهم لو ظهر إنو الحق معاكم .. خلوهم يقبلوا طلاب في المدارس وبعدين نجي نرفدهم ليكم … خلوهم يغنوا برسوم المدارس وحنجي نقلعها منهم … لحدي ما القيامة تقوم نكون ساكين القصة بالطريقة دي !!

    إتفق مسئول مع شركة لصيانة شارع حيوي في (أمدرمانزونيا) لأنو الحفر الفيهو كانت أكتر من الما فيهو .. وطبعاً تحصلت الشركة على العطاء بعد دفع “تسهيلات عطاء” لذلك المسئول يسيل لها اللعاب (مما يرزق الله به من مال حلال) .. وحينما بدأت الشركة في كب التراب بالجانب الأيمن من الشارع .. تفاجأت بشاحنات أخرى تكب ترابها في الجانب الأيسر … وحين تم الإستفسار علم بأنها شركة تانية تعاقدت مع مسئول آخر في الشئون الهندسية لعمل الشارع من أول جديد … وطبعاً المسئول الآخر قد وصلته عمولة تسهيلاته مقدماً (مما يرزق الله به من مال حلال) !! فتضاربت المسئوليات ومراكز القوى .. ورفع الأمر للوالي بسمتيار (وقتها) .. وقد علم بأمر (الرزق الحلال) الذي إستلمه الطرفان مقدماً … كانت فتواه كما يلي: تقوم الشركة الأولى بصيانة الطريق .. وبعد تسليمه الكامل تأتي الشركة التانية وتكسر الشارع وتعملو من أول جديد – كما تم الإتفاق .. ويا دار ما دخلك شر …. !!

    غايتو أمازونيا دي تحفة عديييييل كدا !!

    يا رب أنت عالم بحالنا .. فأنصرنا على من ظلمنا .. آمين

  18. صدق أو لا تصدق ياسلولو ياسديقي ده الحقيقة عارية من كل رتوش وتزويغات ، لكننا نحن لا نحتمل ما يأتي من طرف هذه الحكومة التي جعلت الناس يشكون في أصابع ايديهم عند مصافحتها!!!
    وهو بالمناسبة ياسلولو ياصديقي لا يقل عن ميدان أبو جنجير في المساحة وأنا زاتي شوفته ووقفت فيهو، لكن ماعندي ناقة ولا جمل في الموضوع علشان ما تقول أنا صاحب الروضة كمان!!

  19. خلااااس ياودالخلا صدقناك ماعندك ناقة ولا جمل في الموضوع دا، لكن (الشمارات) كتلت ناس جنوبي ممكن توريهم الوقفك هناك شنو؟؟؟
    بس اوع تقول لي كنت في الآكسنت!!!!
    ههههههههههههههههه..

  20. التحية ليك يا بروف جبرا ……… و انت الوحيد العارف تشخص سبب هزايم جيشنا شنو !!!!!! لأنو ربنا بينصر الدولة الكافرة العادلة علي الدولة المسلمة الظالمة

  21. هووووووووى ياهدهد,,ود الخلا دا مهندس وكدة ! آييييييييي

  22. الحكومه بعد شويه ح تبيع الناس بحجز حكومي!

  23. الجديد شنو الناس زاتا بقت ماعندها قيمه بث الله يستر

  24. شووووووف حكمة الله !! سبحان الله !! يعني الحجز الحكومي المن زمن عبود وزمن نميري مافي واحد فكر يشتريهو الا هسع !!؟ صحي والله رزق زول ما بياكلو زول !!!
    هي الميادين الكبيرة لقينا منها شنو غير لعيبة تبرطِع ؟ احسن الناس ترجع لميادين الدافوري يمكن يطلع لينا جكسا تاني ولآ برعي ….
    مشيت الاجازة الفاتت لقيت اولاد الحلة بيلموا في قروش عشان يمشوا يأجروا حتة في ميدان المريخ او في ابوكدوك جمب الجوازات عشان يتمرنوا ومرات بيكون زمن ايجارم بعد الساعة 10 بالليل !!!!
    معظم المخططات الجديدة بالذات درجة اولي الشوارع الداخلية بتكون زي 5 متر ولمن كل واحد يعمل اشجار قدام بيتو في حدود المترين حقتو بيفضل في الشارع اقل من مترين ده كلو عشان الحكومة تتطلع بي اكبر عدد من قطع الاراضي وتحل لينا مشكلة ازمة سكنا وازمة ضميرم ….
    هدهد سليمان : يقولوا دفارات بكامل عدتم وعتادم وبكاسي وآكسنات ورشاشات وصاحبنا زاتو كان واقف معاهم وتقول ليهو الشمارات كاتلة ناس جنوبي ؟ الشمار فايتك وين انت اللحقتو في سبأ !! كدي امشي الحاج يوسف وتعال بالنبأ المؤسف ….
    كسرة
    بعد ما يكملوها دي خالنها علي الله هم ما زي ( مريم ) وكده . !!!

  25. حيرنا ساكت ! ! يوم علي و يوم معاويه !

  26. السودان كبيييييييييير اللبيعو قدر قدرتم ، بس ان شاء الله يكفيهم ، قال لك ادو السعوديه 2 مليون فدان و مصر 2 مليون فدان ، و نحنو نسكن دور تانى …………… عجبى

  27. حسب ما جاء في مداخلة ود الخلا الجماعة ديل وزعوا الميدان لمنشئات خدمية …كلام زي العسل ,بس عايزين نعرف المدرسة الخاصة دي دقوا فيها جرس ام بيعت من تحت الطاولة؟؟؟؟؟تجيهم الطاوية حبالها…….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: