دخلت الجينات وكده

عزيزي المواطن قم بفتح مطعم .. كافتيريا .. جزارة .. أي محل لبيع الأطعمة .. من (قولة تيت) ستجد أمامك جيش من المتحصلين الذين لن تنقطع زياراتهم عنك ..شي متحصلين بتاعين ضرائب وشي بتاعين الزكاة وشي بتاعين نفايات وشي بتاعين رخص ومحلية وشي شنو ما بعرف .. الشخص الوحيد الذي سوف تفتقده ولن يأتي لزيارتك هو الشخص المسؤول عن تفتيش المحل وفحص ما يقدمه من أغذية ومدي صلاحيتها للإستهلاك الآدمي .
وإن أردت عزيزى القارئ التأكد من هذه الحقيقة (المرة) فما عليك إلا الدخول إلى أحد المطاعم الشعبية بأسواق (العاصمة الحضارية) حيث رداءة العرض للمأكولات وقذارة الاواني وإستخدام الزيوت (غير المعروفة) ذات اللون الداكن من كثرة الإستخدام مع التواجد الكثيف للذباب هذا غير ملابس العمال المتسخة حد الغثيان وأياديهم التى تقطر عرقاً من سخونة المكان وإنعدام التهوئة .
للاسف الشديد عزيزي المواطن لا توجد جهة (على أرض الواقع) تقوم بالرقابة على الأغذية وعمل زيارات دورية ومفاجئة للمطاعم والكافتيريات والأسواق ومحلات بيع اللحوم والعاملين بها (ده في العاصمة) ناهيك عن الأقاليم؟ السبب كما إعتقد بسيط وما عاوز ليهو (درس عصر) وهو إنو حتى تقوم السلطات بمثل هذه المهمة فهي تحتاج إلى عربات وبنزين وسواقين وموظفين واجهزة فحص وخلافه وطالما القصة فيها (صرف) على المواطن (ودوشة دماغ) وميزانيات (يجيبو ليكم قروش من وين؟) إن شاء الله تاكلوا لحم (كلاب)، (لحم حمير) أو حتي (كدايس) !
العبد لله لم ولن يتعجب أو يندهش على الإطلاق لمثل الخبر الذي اوردته الصحف مؤخراً والذي يفيد بإلقاء الشرطة القبض على جزار بمنطقة انقولا بمايو أثناء محاولته عرض لحم (كلب) للبيع بعد أن قام بذبحه وتقطيعه و(توضيبو) وتجميع لحمه في شكل أكوام بغرض بيعه للمواطنين !
بل العبدلله يعتقد جازماً أنه في ظل ما نشهده من غياب أي نوع من أنواع الرقابة (الحكومية) على الأسواق والمطاعم والمأكولات فإن لحوم الكثير من الحيوانات الاليفة وغير الاليفة ، (النافقة) والمذبوحة ، الراجلة والزاحفة قد تسريت إلى بطون المواطنين منذ عدة سنوات في شكل (لحمة مفرومة) وسجق وشاورما و(أقاشى) وشيش كباب وكفتة وخلافه !
بالطبع لم يكن جزمي هذا من فراغ إذ ان استمراراالحالة غير المسبوقة التي يمر بها (الشعب السوداني الفضل) من غلاء لكافة متطلبات الحياة (بما في ذلك اللحوم التي وصل سعر العجالي منها 32 ألف جنيه) تجعل الكثيرين من ضعاف الأنفس يتجهون للغش بكافة انواعه ولك عزيزي القارئ أن تعلم أن مسالة القبض على هذا الجزار (بتاع الكلاب) ليست هي الأولى من هذا النوع لأنو في واحد قبلو (بتاع حمير) وده كان قبل سنوات حيث كتبت حينها مقالًا أنبه فيه لخطورة هذا الأمر (الذي أوردته حينها صحيفة حكايات) وذلك بعد أن عثر سكان مربع (12) بالمايقوما (حي المزدلفة بالحاج يوسف) بالخرطوم بحري على مخلقات ذبيحة ضحيتها (حمار) عُثر على (رأسه) وجلده المسلوخ (بحرفية عالية) إضافة إلى (الضلافين) ، فيما هرب الذابح بلحمه إلى جهة غير معلومة (لي وين ؟ ده السؤال) !
إن هذا الوضع الذى نعيشه والذى تنعدم فيه الرقابة على الأطعمة و(اللحوم خاصة) يغرى ضعاف النفوس بذبح (أى حاجه) وبيعها (للمواطن) المغلوب على أمره (شوفوا حمار واااحد بيعمل كم ساندوتش شاورما)!
وما حالات (الرفس) – عزيزي القارئ- التى نشاهدها من لاعبينا فى ما يسمى (مجازاً) بمباريات كرة القدم و(النهيق) الذى يشنف به أذاننا فنانو هذه الأيام و(الفنجطة) التي تشهدها الساحة السياسية إلا مؤشر بإن القصة دخلت (الجينات) وكده !

كسرة : لن يستقيم الأمر إلا بعد أن تكون عين المسؤولين على (صحة) المواطن بدلاً عن (جيبه) !

كسرة ثابتة : أخبار خط هيثرو شنوووو؟

49 تعليق

  1. اهلا بكل محبي القمردينة
    والله ياعمك لو بقت ع الحمير والكلاب دي تكون هينة وانا خايف ليكم من …………….

  2. برنجييييييييه أهديها للأخ كوكو عاشق البرنجيات. مع التحية.

    1. Danke Schoen Umm Aymn , Ich kann das auch von Zeit zu Zeit erreichen .

      1. مشكوره ام ايمن ، ان شاء الله نهدى ليك السمح فى جديد ايمن

  3. .البرووف والسمار .
    سلامات .
    صار هم المعتمدين ورؤساء المحليات يتفننون فى حلب المواطنين المساكين بشتى الطرق حتى يظهروا بثوب النجاح وتوفير الاموال أمام رؤسائهم الولاة والوزراء . وعلية يكون العيب فى الوالى أو الوزير الذى يعتبر هذا الحليب نجاحا وتوفيرا للدولة بغض النظر عن نوع الخدمة التى تقدمها لة المحلية أو الحكومة .
    يعنى المواطن لمن يكون شبعان دايرو يدفع ولمن يكون عيان تخليهو يواجه مصيره .
    الله فى …

  4. و أنا الما عندى زى فهمك دا أعاين لى الناس و أقول الناس دى ما له مدحشا كدا

  5. و أنا الما عندى زى فهمك دا أعاين لى الناس و أقول الناس دى ما له مدحشه كدا

  6. و مرات مرات الزول وكت يشوف البرسيم ريلاتو تسيل ،، أتقول وزير الدفاع شاف ليهو مشروع مبنى ،، ،منتهى الحمرنه

  7. لحم كلاب عديييييل !!!
    أتفق مع ود الخلا في انو الناس بقت فاسدة
    ونفوسا وسخة وما بتخاف من الله !!
    أختلف مع ود الخلا في انو لو الحكومة صاحية
    ومصحصحة ما كان ده حصل !!!
    الكلاب بنعرف انها بتحوم جمب الجزر وتاكل العضم
    والجلافيط … لكن التسوي كريت في القرض تلقا
    في جلدا !!والبسوي بوبي في العضم يلقي في لحمو !
    وانا اقول الناس دي تعضي في بعض كدي مالا !!
    كلو من البترول الجاب لينا الصينيين ديل ….

  8. ياساده يا كرام الفساد انتشر لدرجة ان مفتشى الصحه والبيئه موجودين وانت يا بروف بس ما ذكرتهم مع الناس الضرائب هم موجودين بس بيجو كل يوم ياخدو المعلوم ويتوكلوا يمشو بعدين لاحظ المعلوم ده من كم محل فى منطقته الموضوع بقى فساد حتى النخاع ما فى اى علاج غير البتر البتر ولللاسف بما ان الموضوع مستشرى لابعد حد فالبتر سيكون لاجزاء كثيره جدا قد نتعطل شويه ولكن العافيه فى النهايه حتجى باذن الله الله يرحم هذا الوطن والمواطنين

  9. ياااااااااااااادوب فهمته المثل البقول (الكلب يهوهو والجمل ماشى )اتارييييها الحكزمه عارفانا شبعانين كلاب ساكت

  10. الحكومه وليس الحكزمه
    دا سببه شاورمة الحمير ثم ثانيا الشعب دا الفلسفه والبوبار العليهو شنو العدس مالو
    حتى بت لندن بتعني ليهو

  11. اخي جبرا
    سلاماااات
    بعد ما قريت الموضوع وعلقته انتبهته انو انا ما قريت العنوان (دخلت الجينات وكده)دخلته فى الموضوع تووووش المهم بما انها دخلت الجينات يعنى ح نورثه الاجيال القادمه وهى حالة الهنيق والهيوهيو والمواء فى وجه الحكومه وهى لا تحرك ساكن

  12. المدخن السالب هو اكثر فتكا من المدخن الاصلى وبما ان ام ايمن اهدت البرنجيييييه الى اخونا كوكو يعنى ذلك باننا سوف نحجز الصف الاول فى البرنجيييييه حتى وان هديناها
    هههههههههههههههههه ولا ما كده ياجبرا

  13. سلام ياقبيلة،،،
    يعني يابروف جبراكلامي كلو طلع صاح لكنكم لا تصدقون، هسي عليكم الله أيهما أشد فسادا” : من يُطعم الناس لحم الحمير والكلاب في غيبة من الضمير ليغتني،أم الحكومة النايمة عن القيام بواجبها، ولو كانت صاحية كما قال أخونا جنوبي ده كلو ماكان حصل!!!
    ويا جنوبي ياصديقي العزيز الظاهر عليك لم تقرأ تلك القصة الشهيرة عن (الفساد السياسي)، ولو كنت قريتها كنت عرفت عواقب نوم الحكومة شنو؟؟؟؟

    1. طيب مافي زول يصحي الحكومة دي ؟
      الراسمالية حمونا النوم , مش نحنا
      القوي الكادحه برضو !!!!!!؟
      غايتو البقت علينا !! هناي وشرط هناي …

  14. اخي ود الخلاء
    سلام
    لو الشعب كللللللللللللللل تمام المشكله شنو دي مسئولية الحكومه انها تردع اى شخص يحاول يزي الشعب ومال كلكم راعي وكلكم مسئول عن رعيته قالوها لمنو كل شخص عنده جزء من المسؤليه والشعب مسولية الحكومه
    ولا ما كده يااخي العزيز

    1. أختنا بت الشيخ وراق،،
      وعليكم السلام ورحمة الله..
      فعلا” لو كان الشعب كلو تمام لن تكن هنالك مشكلة، ولكن لأن الشعوب اصلا” لم ولن تكن تمام لذلك أرسل الله سبحانه وتعالي الرسل منذرين ومبشرين، ولكن جنس شعبنا اللهبو ثوريتو ده ما شفنا ليهو مثيل لا في الأولين وأظنو برضو لن يكن له شبيه في الآخرين!!!
      أها يا بت الناس جنس ديل يسو ليهم شنو؟؟؟
      وزي ما قال اخونا عباس جده ما في علاج غير البتر أيوة البتر عديييييل كده، وشايفكم ما فييكم واحد أعترض عليهو، وأنا المسكين ده لمن اقول ليكم توبوا وأوبوا وأنيبو لربكم وأستغفروه تهبو فيني وكأني قد قلت لكم يا أيهاالكافرون!!!!
      هسي الرأي شنو في ناس زي ديل يمارسون قتل النفس التي حرمها الله إلا بالحق، وهاهم يقتلونها عيانا” بيانا” والكل ساكت ويقول وأنا مالي….
      يا أيها الذين آمنوا إتقوا فتنة لا تُصيبن الذين ظلموا منكم خاصة….
      يعني الفتنة دي لمن تجي لن تفرز بين الظالمين والمظلومين فالكل فيها سواء بسواء والحساب عند رب العالمين..

  15. سلام
    ما دقق حمار حصان ما فرقت

  16. ياجنوبي
    انت الشعب ولا القوه الكادحه
    لو القوه الكادحه تبقى مصيبتك مصيبتين

    1. مصيبتييييييين يا بت وراق !!!

  17. جنوبى…
    ههههههههههههههههههههههههههههههههاااى,,قبلكم وحدكم,عشان كدة قلنا استرخوا !!

    1. غايتو انت يا شمباتي !!!
      هسع نحنا نسترخي لي منو ؟ الحكومه ولا
      الجزارين ؟
      تافهين تافهين تجار الدين والجزارين …

  18. يادوبك عرفنا الصبر وقوة التحمل دى جاية من ويييييييييييييين

  19. جنوبى..
    ههههههههههههههههههه,,للحكومة طبعا,,بعدين الجزارين ذنبهم شنو !!؟
    ركز لى على تجار الدين دين,وكما سال الضو والده فى جهجهة التساب (يابا التماسيح مسلمين ؟؟
    لا ,,مجرمين) !!

  20. يا راجل
    اما دا شعب غريب خلاص
    طيب الحكومه دايره شنو بي شعب ِرمه زي دا أحسن خليها تغيروا

    1. صاح طبعاً حتغيرو قاعدين ياكلو في البوش و الحمير و الضان مالي السوق ! يا خي ديل ملو ليهم سوق الكرين كروزرات و برادو سايبنها و راكبين الركشات و الأمجادات ، دا شعب دا ! الحكومه عملت ليهم مصانع السكر و السكر مالي البلد و رخييييص ، تصور سايبين السكر و بشربو في الشاي بالتمر ! حسه الحكومه إضطرت تقفل مصنع سكر النيل الأبيض العملتو جديد شهر ما تماهو.
      أفتكر يا جبرا تكتب لصاحبك بتاع الأمازون القاعد يعزمك كل مره داك ، يرسل ليك فيزا للأمازون تمشي تجيب شعب جديد. الحكومه سكتت ليهم كتير.

  21. شمباتي ..
    دحين الجزارين ديل جابولنا الكلاب والدحوش من السلخانة الت الحيكومة ؟

    كُر .. من ضمير ناس هان قدر تجلب بلادا وتترشي
    كُر .. من عوارضك يا بلدنا الناس تشوف ومدعمشي
    تسمع سماع ومطنّشي ..
    حاكمانا في شنو !! وشان شنو !!؟ حاكومة ما خابرالنا شئ !!!!
    .
    .
    .

  22. اخي ود الخلاء
    شعبنا اهو شعبنا ذااااااااااتو القلت عليهو بالامس القريب عندما خرج فرحا بعودة هجليج (خروجه يوكد عظمة هذه الامه )
    هسع شايفاك غيرت رايك فيهو وقلت البتر
    مره هو تمام لو فى شئ بهدد الحكومه ولو اتكلم فى البخصه واكييييد ما بخص الحكومه يكون محتاج للبتر
    اخوي ود الخلاء والله مهما حاولت تدافع عن الحكومه او تجد لها عزر ح تخيب ظنك
    وزى ما بقولوا عريان السنين طاقية العيد ما بتقطيهو

  23. سلام ياقبيلة،،،
    صديقي البروف جبرا، لا زلت عند رأي بأن الشعب هو سبب كل هذه الكوارث والبلاوي، بل هو السبب في وجود هذه الحكومة من أصلو، فلولا مصائبنا وكوارثنا وذنوبنا التي أقترفتها أيدينا لما وجدت هذه الحكومة فالجزاء من جنس العمل، وأراك دائما” تحمل علي جانب الحكومة وتعفي الشعب من فعائله التي يشيب لها الولدان، والغريب في الأمر أنك تكتب عن صنائع وغرائب يمارسها هذاالشعب لم تكن من قبل وأقرب دليل لحوم الحمير والكلاب والأختلاسات والمفاسد التي تعم البر والبحر التي يمارسها بعض أفراد من هذه (الأمةالعظيمة) -كيتن في بت وراق- حكاما” أو محكومين الا مار حم ربي،،، ولكنني أراكم تقفون وتميلون كل الميل لجانب اللصوص وتحملون كل الأوذار لصنع اللصوص!!!
    صديقي اللدود سنكل أوافقك الرأي وبشدة في التغيير، لا بد من التغيير وأن طال السفر..
    الأستاذة الفضلي بت وراق خروج هذا (الشعب العظيم)فرحة بالنصر المؤزر لا ينفي فساد بعضه وضروروة المعالجة لهذا الفساد ول دي ذلك لبتر العضو الفاسد أي كان، فالفساد يا ست الناس لا يقتصر علي أفراد من الشعب الفضيل، فهو قد طم وعم القري والحضر ولا أستثني الحكام من هذه المنظومة فهم أُس الفساد وأساسه، ولكنهم لم يأتو من كوكب آخر فهم جزء أصيل من هذه (الأمة العظيمة)..
    ان الله ليزع بالسلطان ما لا يزع بالقرآن

  24. ود الخلاء .
    أخبارك ؟
    معليش الليلة دايرين نهبشك شوية مع الهاباشين .
    مر أحد الصحابة بشجرة ظليلة كان يرقد تحتها أمير المؤمنين عمر بن الخطاب فقال الصحابى .(عدلت فنمت ).
    الحكومة فى الاول دايرة تنوم وبعد ماتصحى وتلقى خراب مالطة تقوم تعدل .
    الليلة يادوب فهمت قصد البروووف بأنة يجب أن تنصلح الحكومة أولا حتى تنصلح الرعية وبعد ذلك يحق للحكومة النوم …

  25. حنين يا صديقا” بت أشكو حرقة ظلم ذوي القربي أليه، مالك لو عدت الينا؟؟؟
    تعرف يا صديقي كلامك هذا هو لُب القضية، وهنا ياصديقي العزيز بيت القصيد ومربط الفرس وهذا هو السؤال الجوهري او القضية المحورية (مش المدينة) كما يقولون،،
    أيهما الأولي بالأصلاح: الحكومة أم الشعب، وبأيهما نبدأ لتكون التنيجة فاعلة وسريعة ومضمونة ومأمونة العواقب؟؟؟
    علشان ما نبدأ غلط ويطلع لينا عفريت أضل واظرط من الذي كان!!!
    يلا هيلا هيلا ولتكن همتكم الحقيقية هي أنقاذ ما تبقي من شعب..

  26. اخى ود الخلاء
    انا معااااااااااااااااااااااااااااااااااااااااااااااااااااااااااك قلبا وقالبا بس ورينا كيييييف

  27. ود الخلاء .
    فالنبداء بأى مسؤول بإعتبارة حكومة وأقربائة بأعتبارهم شعب .
    الشعب عند ما يأمن جانب الحكومة يعمل ما بدا له من مخالفات بقلب قوى وهو فى مأمن غير المحسوبية التى تتوفر له من وظائف وتسهيلات وعطائات
    ثانيا عندما يرى عامة الشعب أن الوزير الفلانى أو المدير العلانى له من المخصصات مايفيض عن حاجتة وحاجة أهلة غير ممتلكاتة والتى لم تأتية عن ورثة ولا عن ثراء عرف بة قبل مجيئة الى هذا الموقع بحس بالغبن تجاة الحكومة .
    عندما يأخذ المواطن فكرة عن أن من يتوجب علية حفظ الامن ومراقبة مصالح العامة من شرطة أو أمن أو صحة أوتعليم أو تجارة وخلافة يعمل لمصلحتة الشخصية دون الاكتراث لواجباتة الاساسية يعمل على تأسيس شركة أمن أو مدرسه خاصة أو مستشفى خاص أو توكيل سكر الى أن يقتنع المواطن المسكين بأن المؤسسات الحكومية ليست لديها أى كفائات أو ضمانات أو إهتمام بالمواطن .
    ود الخلاء ياخوى …
    الوجع راقد …

  28. أيواااااااااااااا أها أنتو جيتوني براكم لحدت عندي ودايركم من الأول تقولوا لي الكلام ده: نبدأ كيييييييييييييييييييييييييييف!!!!
    يا بت وراق وياحنين ويالباقين يالزينين، ما قلنا ليكم ما دام الحكاية صعبة في أنك تبدأ في التغيير من الآخرين، فما علينا ألا أن نبدأ بأهلونا وأبناؤنا والأقربون الذين هم أولي بالمعروف فلنبدأ بأنفســــــــــــــــــــــــــــــنا ياأمة!!!

  29. ود الخلاء .
    ناس المرور لم يتركو للسواقين مخارجة إلا بالكذب أو الزبالة حتى يتخارج السواق المسكين وبذلك يتعلم الكذب والرشوة .(صفات زميمة )
    السوق وغلاء الاسعار أدخلت الهلع فى نفوس المواطنين فأصبحوا جشعين .(صفات زميمة )
    لا تتحصل على وظيفة بكفائتك وإجتهادك تطر الى الذهاب الى أحد معارفك للتوصية .(صفة زميمة )
    والصفات الزميمة كثيرة تعلمها المواطن من جراء سياسات الحكومة حتى يستطيع أن يعيش …
    الله فى ….

  30. عارف يا استاذنا انا لمن اقرا ليك بتذكر قصة الراجل المشى لل عرض حالجى ( ال بكتب العرايض ) وحكى ليهع قصته فقام العرض حالجى بصياغتها و كتابتها وعندما قرأها على الراجل اتفقع بالبكا فساله العرض حالجى فقال له والله اتنا ما قايل نفسى مظلوم كدة . بالجد انا وصلنا مراتحل متاخرة ….

  31. ياود الخلاء ياخووووووي لسه ما جاوبتنى بانفسنا كييييييييييف

    1. يعني يا بت وراق ننسي الحكومة دي خالص و
      نخليها تعمل الدايراهو ونحنا نلتفت لانفسنا
      نزكيها وننضفا ونقعد نربي اولادنا التربية
      الصحيحة نامرم بالمعروف وننهاهم عن المنكر
      ويقوموا اولادنا يشبو علي كده وطبعا من شب
      علي شي شاب عليه .. ولمن الشفع ديل يكبروا
      ويتوظفوا ويمسكوا زمام البلد تبقي الوكت
      داك حكومة عال العال وشعب تمام في بلد
      فاضلة ( ما فاضلة من الشعب الفضل ) فاضلة
      من الفضيلة ..ووكتها حتي لو جانا واحد من
      ناس تُلّب ومسك البلد ونحنا نايمين برضو ما ح
      يكون منو خوف لأنو ح يكون مربي تربية
      زيو زي باقي الشعب الحا يفضل من الشعب
      الفضل !!

      1. يا جنوبي يا اخوي كلامك ده ذكرني كلام عادل امام لما قال : فيه جماعه راحو يزورو جماعه تانيين لما مالقيهومش خدو تاكسي ورجعو.
        نحنا لو قادرين نربي اولادنا تربيه كويسه نان العوه في شنو ؟؟؟

  32. سلام__ والله شكله الموضوع دا داير ليهو 40 سنة (يعني جيل تاني عدييييل كدا) نحن بوظنا خلاص؛

  33. هههههههههههههههههههههههههههههه,,احيي الحبيب ود الخلا وهو سايق الفيات !! كع كرع رع

  34. سلام يا قبيلة،،،
    عداك العيب يا جنوبي يا صديقي، هي دي زاتها الداير أقولها ليكم يا بت وراق، بس ما قادر بسبب العوة اللات حبيبنا ود المدني دي!!
    سديقي دوك شمباتي شايفك عطشان ولن تصح البلفة، ورغم ذلك سأعرّج بيك بالدرب التحت تجاه ربوع هندَعشان تشرب بي كفوفن لما تتكفي…
    أحييي أنا منك لمتين يلازمك في هواك مُر الشجن؟؟

  35. يعني بدل المظاهرات والمعارضة والكلام الفارغ البتفكرو فيهو (يا شاطرين) .. نقوم نعمل أسبوع الدعاء والتضرع … وصيام جماعي .. وصلاة الحاجة … وبعد 30 سنة لما أولادنا الإتولودوا اليومين ديل يبقو كبار يقومو يشوفو روحهم لو لقوها مزكية ومنضفة .. يقومو يغيروا الحكومة .. لو ما حصل يرجعو تاني يتنضفو 30 سنة وهكذا .. والله نحنا شاطرين جنس شطارة …

    يا جماعة أرحمونا شوية .. يرحمكم الله .. لو بتصدقوا .. نحنا أيضاً لنا عقول تميز .. (كما تظنون بأنفسكم) .. والله هو الفيصل بيننا يوم لا ينفع مال ولا بنون .. وهو العدل المطلق الذي لا يخدع بتزلف أو رياء …

  36. أن تأكل شيئا خيرا من ألا تأكل شوفتو ليكم صيني مات بالتسمم من لحم كلب

  37. اخي الفاضل ود الخلاء
    شكلك كده ما عندك برنامج واضح لكى نغير به انفسنا واعتمده على وصية اخونا جنوبي بان نترك الحكومه ونتفرق الى انفسنا طيييييييييب موافقين وباصمين بالعشره بشرط تكلم لينا ناس الحكومه يسيبونا فى حالنا ويرجعوا لينا حقوقنا الاكلووووووووووها وبعد داك يا دار ما دخلك شر

  38. يا جماعة دقيقه .. انتو فاهمني غلط !!
    كل الحصل اني وصلت ليكم كلام ود الخلا حسب فهمي
    واتمنيت انو يقول لي يا جنوبي انت فاهمني
    غلط !!!
    اجي يا نخليها تعمل الدايرو !!
    يعني يا ود الخلا انا اتعب معاك قدر ده ووكت
    يبقي الشراب من كفوفن تسوق شمباتي وتخليني !!؟
    زعلاااااان منك …

  39. ههههههههههههههههههههه,,تشرب الخنقة انت !
    خليك فى البغو والدامرقة ! طاااااااخ

  40. لا بالجد أخبار خط هيثرو شنو شايف الجماعة فاتحين ليك

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: