ده ذاااتو المحيرنا

جاءنا هذا التوضيح من إدارة مدارس الشهيد علاءالدين القرآنية رداً على مقالنا الذي كان بعنوان (وبعد ما تكملوها؟)
الأخ الكريم / الفاتح جبرا
في عمودك ساخر سبيل بتاريخ 23 ابريل 2012م العدد 5225 تحدثت عن مدرستنا وكان مثار الحديث عن الموقع الجديد للمدرسة بالفيحاء مربع (6) وعملاًبحرية النشر وحق الرد الرجاء نشر هذا التوضيح :
أولا جاء في عمودك وصف نفسك (بالعبدلله) وكلنا عبيدالله ولكن كان عليك وأنت تأخذ بالقلم لتكتب أن تراعي حقوق العباد الآخرين الذين تصفهم بالمحاسيب وذوي القربى فكيف تثبت ذلك بلفظ فضفاض لا إثبات له ؟
ذكرت أن الأحياء لا تستفيد من المدارس الخاصة وغيرها كيف ذلك ومعظم أهل هذا الحي درسوا في هذه المدرسة القرآنية وهي تؤجر والآن هي تسعي لتطوير نفسها حسب توجهات وزارة التربية فهل يريد أهل الحي أن تبنى المدارس الخاصة في الخلاء؟ مع العلم أن المدارس الخاصة موجودة في خارج السودان بل بدول الخليج؟
أشرت إلى أن الميدان الذي نحن بصدد بناء المدرسة عليه هو الميدان الرئيس وأنه موقع لصلاة العيد والمناسبات والمناشط الرياضية ولكنك لم تذكر أن المدرسة أخذت نصف هذا الميدان وما تبقى كاف للصلاة وللعب كرة القدم مع العلم أن نصف الميدان تم إعطاؤه للمدرسة بأوراق رسمية وشهادة بحث ووصفت أن هذا الأمر (متكتك) فما هو إثباتك على ذلك وأصحاب الحق هم الآن بين يدي الله ويشهد لهم الأعداء قبل الأصدقاء بالبر والإحسان وحسن الخلق مع العلم بأن القطعة قد خصصت للمدرسة بتاريخ 11 أبريل 2003م.
أما عن إيقاف المعتمد السابق للبناء وأنت لم تذكر صفة السابق فقد أوقف العمل بحجة حفظ الأمن وليس بصفة خطأ في إجراءآت الملكية ، أما عن المعتمد الحالي فقد سمح بذلك لأنه رأى أنه لا حاجة لإيقاف البناء والمستندات رسمية وسليمة فكيف يوقف ذلك؟ وترك لأهل الحي واللجنة الشعبية حق التقاضي فكيف يتم نزع أرض من مواطنعن طريق جمع الجماهير وحشدها؟ أم أن الأمر أصبح غابة؟
وتواصل وصفك للمؤسسة بأنها تستبيح حقوق الآخرين والفساد وعدم الخوف من حساب الدنيا فهل كلفت نفسك بطلب المعلومات عن هذا الموضوع أو عن هذه المؤسسة القرآنية فكيف لمن درس القرآن أن لا يخشى من حساب الدنيا والآخرة ؟
أخيراً : بطرفك المستندات التى تثبت ما ذهبنا إليه ، أما مسألة حق الحكومة في بيع الميادين فهذا الأمر يتم حسب اللوائح الحكومية وهذا أمر نحن لسنا طرفاً فيه .

خالد عباس عركي
المدير الإداري
الرد :
أولاً : إن تخصيص ومنح الميادين والساحات يجئ مخالفاً لنص القرار الذي أاصدرته رئاسة الجمهورية في هذا الخصوص والقاضي بمنع التصرف في الساحات والميادين العامة .
ثانياً : إذا كان لديكم أوراق سليمة وشهادة بحث فهذا لا يعني بأن الإجراء صحيح لأن اللوائح والقوانين تشترط موافقة سكان الحي ممثلين في لجنتهم الشعبية وهذا ما لم يحدث .
ثالثاُ : تنفيذ عملية البيع دون أخذ موافقة سكان الحي يؤكد تماماً (كما قلنا) بأن المسالة (متكتكة) إذ كيف تم التغاضي عن هذا الشرط الأساسي؟
رابعاً : إفتراضاً بأن سكان الحي موافقون فيجب أن يتم البيع عبر مزاد مفتوح لكل مستثمر يرغب في الشراء (يعني مش بالغمتي) !
خامساً : المحاكم الآن تنظر في العديد من قضايا (التغول) على الميادين والساحات العامة في الأحياء (يعني ما براكم) فملف التلاعب في الأراضي ينضح بالفساد وما بيع أجزاء من المدينة الرياضية إلا شاهداً على ذلك وبعدين هسه لو الحكومة دى باعت ليا (كبري شمبات) وسلمتني شهادة بحث معناتو البيعة دى صحيحة ؟

كسرة :
أما سؤالك يا عزيزي (فكيف لمن درس القرآن أن لا يخشى من حساب الدنيا والآخرة ؟) فده ذااااتو المحيرنا !

كسرة ثابتة :
أخبار خط هيثرو شنو(وووو) ؟

Advertisements

46 تعليق

  1. دي المشكلة ذاتا قرآنية ….. ودا الحيرنا ذاتو … وكنت قايل فهامتي انا براي الما اصلية .. لكن الحمد لله ما براي

  2. يا بروف ما قال ليك خلاص كفاية نص الميدان كلو دايرين بيهو شنو وبعدين زماااان توقف البناء عشان الأمن غير مستتب ودلوقتي الحمدلله كلو تمام وعال العال والمدارس الخاصة في دول الخليج موجودة ما نحن دول خليج وكده وووووووووووووووب علينا

  3. لا فض فوك يا جيرا

  4. يابروف تحيات طيبات

    الزول داااااك الضرب خرتمايه مليون اورار من شريان الشمال و قال الراجل يسعلنى يعنى اكل وشرد اسي السياسه الجديده تاكل وتفسر سبهان الله !!!!!!!

  5. تستحق كلمة ساخر يا بتاع الميادين العامة – كسرة كبري شمبات شديدة – البيع اليومين بقى كتيير زي قروشنا – البشير يقول والمعتمد يقول والله غالب – هو الرئيس منو؟

  6. العزيز جبرة
    صباحك خير ….
    اولاً التهنئة على المكانة الرفيعة فى الكتابة فى الفيس بوك والتى تؤكد أن الخلوق متابعة ومفتحة وبرضو بتقيم يعنى (مامواطنين غبيانيين ساكت) ثم أنك تنفع محامى محجاج دون شك لهذا الشعب الذى فقد من يدافع عن حقوقه المنهوبة…وكمان حكاية الكوبرى دى محيرة والله ياجبرة ولاتستبعد أن تتم اذا استمر الحال على ماهو عليه…ما أهو برضو إستثمار وكده فى ، وح يلقوا ليهو إسم..ديل أحرف ناس فى حكاية الاسامى دى..
    تحياتى يامبدع..

  7. ههههههههههههههههههههههههههههههههههههههاااى,,,بالله عليك مدير المدرسة دا خليهو يجينى بالدرب ياخ ! عايزو ضرووووووورى !
    خيبه الله وخيب مسعاه…
    بالوردقااار بودااباااااا,,كااااا بوداااابااااااااا

  8. بعد ما قريت رد الجماعة ديل على مقالك غلبني الاقولو… بس قلت اكتب كلمتين أفش نفسي عشان المرارة خلااااااااااااااااااااااااااااااااااااااااااااااااص..

  9. يا أخوانا الريس المشير قال ليكم متل ماقال أخونا العبدلله مدير المدرسة أنو الموضوع ما ( متكتك ) وزي ماقال ليكم الريس العندو إثباتات يجيبها وشوفو لو أرسين لوبين أو المفتش كولمبوس يكتشفها …. ده الشغل

  10. اولا التحية لك يا القلب النابط والعين المراغبة لحق الشعب السودانى الفاتح جبرا.اقول للجميع نحن مجموعة ومن زمن ليس بالقريب جمعنا عدد من المخالفات القانونية خاصة فى مجال الاراضى وسوف نرد هذا الحق من بذوق اول الفجر القادم (الثورة الجديدة) ونقول للذين اخذو حقوق الشعب سوف تنزع منكم هذة الاراضى وسوف تقبعون بالسجون لتكونو عظة للاخريين بان لا يستثمروة فى حق الشعوب فى زمن الحكومات الدكتاتورية

  11. برنجيييييييييييييييييييييييييييييه
    بتعلم بس معذره انا جديد

    1. برنجيه عز الضهر وبتتعلم برضو !! عليك
      النبي خمّس لي …

  12. انتو المدارس الخاصة دي بتدخل في قانون
    الاستثمار ؟
    اها كان بتدخل, في مادة بتلزم المستثمر انو
    ينفذ المشروع خلال مده اقصاها 12 شهر من تاريخ
    استلام الارض الممنوحه لاقامة المشروع ويمكن لوزير
    الاستثمار او الوزير الولائي مدها لفترة يروها
    مناسبه ..
    وتقوم تجي المحسوبية وذوي القربه في المده
    البيروها مناسبة دي لانو حسب رد السيد
    المدير الاداري انو القطعة خصصت في 2003م
    ويادوووووب قاعدين ينفذوا في 2011 م ولمن
    مهلة يمدوها من 12 شهر يمدوها لي 96 شهر دي
    يسموها شنو ..!!؟؟
    وكان المدارس الخاصة ما بتتبع لقانون الاستثمار
    اقيفوا لي الننزل هنا ……

    1. عسل يا جنوبي
      تنزل ليه البص سيرة والناس اهل

  13. الجماعة ديل وزعوا ليكم الميدان منشئات خدمية ,كلام زي العسل لكن حكاية المدرسة الخاصة دي طلعت الكلمة الشازة…و بما إنها خاصة جدا لازم كان يدقوا الجرس ,لكن الظاهر بقوا يدقوا براهم و يرقصوا براهم……قانونا الأرض ملك للشعب و بما إني احد أفراد هزا الشعب :عايز حقي علي رأي هاني رمزي………

  14. يا شمباتي السطر الأخير دة إنجليزي يا مرسي؟؟؟

    1. انت يا ود المبشر مسلسلات رمضان الزمااااان ديك ما كنت بتحضرها … ايها الوزير هامان ؟؟؟

  15. طيب لو فرضنا كلامهم صحيح وعندهم الاوراق متين بقى تعليم القران الكريم بالقروش يا جماعة الخير كلام الله عز وجل بقى للبيع .. اااي المدارس الخاصة فى دول الخليج لكن تدريس القران مجاني والرسوم بتاعت الدراسة بتكون من باب التبرع للقادرين وأهل الخير …لكن نقول شنو بس ما بكلام الله الجماعة ديل بنو الفلل والعمارات والاستثمارات … ما قالوا ما لدنيا قد أتينا .. الخ واهم مالكين الدنيا ومافيها … والاغرب من كده بقول دايرين يعملوا للشعب علشان يوم القيامة عاوزين يقابلوا ربهم نظيفين ويدخلون الجنة بغير حساب .. كلام صاح حا يقابلوا ربهم وما عندهم حسنة واحدة وحايدخلوا نار جهنم بدون سؤال وكده حا يقولوا ليهم خشو النار تووووش وده المصبرنا عليهم ربنا ينتقم لشعبنا وينزل المارد فيهم قطيع قادر يا كريم وحسبنا الله ونعم الوكيل … وتسلم يا شعبنا الله يخلف علينا بالخير

  16. اجمل حاجة انو كل الدول العربية الجاها الربيع العربي بعد شوية تكون راكبة معانا في المواسيير لكن نحنا فتنها بي انو بنشرب من الماسوره بالكوز الماسورة برضو

  17. عباس جدة…سلام…
    حامضة منك لكن !! تعليمتك كعبة كلو كلو ! لازم تقابل المشير يديك كورس ! كااااااك..

    المندهش..سلام…
    نفسى اعرف انت المندهش ليها شنو !!؟ ياخ الكلام دا غلت منك !!

  18. جنوبى…سلام…
    انزل ياخ ! قبل نصل محل الشراب ! هيق …

    ود المبشر…سلام…
    دا ما انجليزى,,دا فارسى ! اممممممم…
    وممكن ترقص على انغامو وكت حارقك رقيصص فلانة ! هههههههههههههههه

  19. الاخ الفاضل جبرا
    الله يحفظك نصيرا الغلابه بقوة الكلمة امين هؤلا القوم كما زكرت في مقالك السابق انه الميادين موزعة من زمان وهنالك معلومات تؤكد تواطؤ هؤلا القوم بس الله غالب وما أصابهم من حادث يجب ان يجعلهم عبرة لمن سواهم نسأل ان يتجاوز عنهم فهم أموات لا يجوز في حقهم سوي ان ندعو لهم أما البقية فيجب ان يرجو الي صوابهم ويتركو هذا الميدان لأهل وهم اصحاب الحق الحقيقيين

  20. حاج أحمد السلاوى | رد

    يا جماعة الخير السيد المدير الإدارى دا بيعمل للآخرة عن طريق الدنيا .. أفهموها بأه ( بالمصرى )..

  21. السلام عليكم ، البرف و الاخوان ، خليناهم لى الله ناس تحت تحت ، و تحت الطربيزه ، و ناس التصديقات بى الليل و بعد صلاة الفجر ، و سبحان الله كمان يغالتوا ، د/ شمباتى فارسى على وزن نبق فارسى ، انا ماعارف الجاب لينا النبق ده منو ؟؟؟ سعال: قراصة نبق دكوه ابو القوى انقاره و هلمجرا ………….. عجبى

    1. ياخي انت بتبحت جنس حاجات , ابو القوي ده لي عشرين سنة مشتهيه وكل ما امشي اجازة قدر افتش لا بلقاه ولا بلقي بنات الفلاته الكان شيلات صوانيهن ولافات السوق العربي !!!
      انت في النبق الفارسي ولا في الليلة البقوها بكره دي !! أجي يا البكور !!!!
      ااااااااااااااااخ يا المريسي البنفخوها ……

  22. أولاً مبروك على المرتبة الخامسة بين الكتاب وكان مفروض تكون الأولى يا أستاذ .. مزيد من التقدم والتميز.. ثانياً نحيى الشجاعة المتقطعة النظير فى ابداء الرأى الآخر والسماح للعبدلله صاحب نص الميدان بالرد على ما جاء بالمقال الخاص ببيع ميدان الفيحاء.. ولا تعقيب على تعقيبكم الوافى الضافى.

  23. انا يا اخوانا عايز النص التاني … او النص الاول من اي ميدان تاني … الاوراق المطلوبه شنو واقدمها لي منو … وانا مستعد احلف اني لا لدنيا قد عملت اي حاجه .

    1. تجيب صورة تذكاريه مع خالتو سناء في هجليج !!!
      كان رجعت بيدوك نص الميدان .. وكان ما رجعت بيسموا الميدان كوللللللو بي اسمك ….
      انت وحظك !!
      لاكين تقعد تباري لي ناس جبرا ديل يمين لعب ساكت ما تلعب في الميدان ..

  24. لسة فاكرين روحهم لما يتكلمو لينا بـ(القرآن الكريم) و(سبحان الله) .. والمدرسة (تؤجر).. وغيرها، حنتغشى ليهم .. عليك الله أسأل سعادتو دا:
    * كم الرسوم في تلك المدرسة المأجورة.
    * ما هي أفضلية أصحاب الحق الذين تم التصديق لهم عام 2003 (دا كان في التركية السابقة؟) وذكرت بأنهم بين يدي الله وكأنهم ورثوها كابر عن كابر ..!!
    * هل جمع الجماهير وحشدها لنزع حق لا يتم إلا إذا أصبح الأمر غابة؟.
    * كيف عرفت بأن الحكومة تبيع الميادين حسب اللوائح،ما دمت ليس طرفاً في الموضوع؟
    * كيف لمن درس القرآن أن لا يخشى من حساب الدنيا والآخرة؟

    { يُخَادِعُونَ اللّهَ وَالَّذِينَ آمَنُوا وَمَا يَخْدَعُونَ إِلاَّ أَنفُسَهُم وَمَا يَشْعُرُونَ }

    صدق الله العظيم

  25. طارق بابكر عبيد | رد

    مبروك والي الامام

  26. البروووف والسمار . سلامات .
    يا جماعه طالما الناس ديل ردو على المقال ومستعدين يواجهو بالدليل القاطع وواثقين من روحم حقو تفكو خبرم وما توجعوا لينا قلبنا ساهى .

  27. يا ربي ما بيبيعوا لي 16 متر مربع بس من القصر الجمهوري الجزء الجنوبي الشرقي – ولا بلاش منو ما بيدوني مية متر مربع بس لصق بيت شيخ على ولا عبودي ؟؟؟؟

  28. الحبيب شمباتي ……سلام
    المشكلة إنة الجماعة ديل برقصوا براهم و لما الحرب تولع عايزننا معاهم,حاجة تجنن……

  29. الأخ جبرا
    أنا بعرف الجماعة أصحاب المدرسة دي من بدري بحكم الجيرة،، طبعا الأسرة كلها مؤتمر وطني وعلى رأسهم الشهيد علاء الدين عباس عركي رحمة الله عليه،، وهو أخو خالد المدير الإداري والشهير بأبو زعبل،، أما صاحبة المدرسة فهي سمية عباس عركي رحمة الله عليها وهي توفيت في حادث الحركة الشهير قبل عدة أشهر في طريق أم ضوا بان مع أفراد أسرتها نسأل الله لهم الرحمة جميعا.. أما موضوع الميدان فقد تم بالغمتي كما قلت ولم يدق جرس ولم يكن هنالك مزاد وإنما تم بالعلاقات الأخوية بين الأسرة والمعتمد عليه لعنة الله وهو ذو علاقة وطيدة بالأسرة بالذات المعتمد الجديد وقد كان حاضرا للتأبين الذي أقيم للمرحومة صاحبة المدرسة،، ويمكن أن يكون استئناف البناء قد تم تعاطفا مع وفاة صاحبة المدرسة وعدد من أفراد الأسرة في الحادث المشؤوم المذكور،، فالأمر لا يخلو من فساد كما أشرت أنت.

    كسرة: يا أبو زعبل ردك هزيل وتعبان وكان تسكت بدل العزف علي وتر القرآنية دي،، كلنا عارفنها مدرسة استثمارية عاديييية جدا..
    نسأل الله الرحمة للفقيدة سمية عباس عركي

  30. كوكو..
    النبق النبق النبق ,,ياربى النغمة دى بتجى مظبوطة مع الهزة والرزة اياها !!؟ كع…

    جنوبى…
    اممممممم,,مريسى مع الصباح !؟ مستعجل للفطور كدة مالك !!؟ بعدين ولدنا خالد دا صغير وجاهل موديهو يتصور وهناى مالك ؟؟هيييييييييييييييييييييييييييييييي….

  31. حجر الظلط….سلام ومرحب بيك كتير…
    اها تانى المدير دا بيجى ينضم !!؟ طااااااااااااااااااخ

  32. ابشر بطولة سلامة يا مؤتمرنا | رد

    ههههههههههههههههه

    جبرة والضبان

    1. ابشر بطولة سلامة يا مؤتمرنا | رد

      جبرا والضبان

      ههههههههههههههههههههه

      1. في غلطة في الاسم برضو ..!!!!

      2. ابشر بطولة سلامة يا مؤتمرنا

        جبرا والحشرات

        واواواواواواواواواواواااااااااا

  33. انتو فى المدينة الرياضية فضل فيها حاجة والا كلها اتباعت؟؟لانو كنت عايز لى خت ستة

  34. امممممممممم…الزول دا عايز دفس !!!

  35. خط ستة ماف إلا تمشي تتسلبط في الحواشات الأدوها للسفارة الأمركية كدي علي جهة سوبا، أعمل حساب يجيك صاروخ يشهيك الهبوب

  36. متعك اللة بالعافية يا أستاذ جبرا – المشكلة يا أستاذ زي فكرة الكباري دي إنت بتقولها للتهويل والتنبيه للامعقول – أيه رأيك هم حيفكروا فيها جد – وبكرة تطلع في عطاءات – يعني أي واحد زي حسن يورو يدفع للحكومة مبلغ ضريبة المرور المقدر وهو يتحصل الضريبة من كل عربية تقطع الكبري نظام Toll وكدة

  37. هسى يا بروف موريهم كوبرى شمبات لييييييييييييييييية ؟؟؟؟؟ دى فكرة كانت رايحة عليهم بقوموا يبيعوه ويقولوا ليك بقى خردة وخايفين على سلامة المواطن

  38. يا ناس توتي ابقوا مارقيين انا حجزته توتي وجهزته قروشي و جايه عليكم دايرة اشتريها بي بيوتها بس دايرة زول يوريني الرشوة بتاعت توتي كم عشان اجهز الضحاكات واجيكم بي ورقي الرسمي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: