نحنا ناقصين؟

قبل عدة أيام قمت بفقدان عدة مستندات شخصية فذهبت إلى قسم الشرطة الذى يقع فى دائرة الإختصاص .. قدمت عريضة لوكيل النيابة .. قام بأخذ أقوالي ثم ذهبت إلى (ديسك) البلاغات لفتح البلاغ (لا أدري ما هو السر في عدم وجود كراسي لجلوس المواطنين في كل مكاتب بلاغات شرطة السودان إذ لابد لك أن تكون واقفاً منتظراً دورك مهما كان عمرك أو حالتك الصحية)! ..
بعد الإنتظار واقفا حتى إنتهى الشرطي من تسجيل بلاغ أحد المواطنين إلتفت نحوي يسألني :
إسمك .. عمرك.. شغال وين ؟ .. ثم (قبيلتك شنو) !
إندهشت غاية الإندهاش لهذا السؤال (الما في محلو) .. وسألت نفسي ما هي علاقة قبيلتى بالموضوع الذي جئت من أجله؟ عندما راي الشرطي الذي كان يقوم بأخذ بياناتي الدهشة قد علت وجهي قال يخاطبني :
– عادي يا أستاذ .. قبيلتك شنو؟
– قلت له : يا أبني لا عادي ولا حاجه علاقة قبيلتي بالموضوع شنو؟ يعني هسه لو قلتا ليكم دنقلاوي ح تفتحوا ليا بلاغ سرقة ولو قلتا ليكم جعلي ح تفتحو ليا (تملك جنائي) ولوشايقي ح (تحفظوا البلاغ) ؟
حقيقة سؤال صادم لم أجد له أي مبررات فهو يؤطر للإنتماء القبلي البغيض على حساب الإنتماء الوطني فتقسيم المواطنين حسب أعراقهم وقبائلهم يمثل توجهاً سالباً بقوم بتمزيق النسيج الإجتماعي (لو فضل فيها نسيج) ووضعه في (كيمان) متناثرة على حساب وطن كامل متكامل !
جميل جداً ما قامت به الدولة مؤخراً من إعطاء كل مواطن رقماً وطنياً يستخدم للوصول إلي بياناته الاساسية مما يساعد على تبسيط الإجراءات الإدارية و تسهيل الخدمات و تطويرها في سبيل الإرتقاء بالأداء العام حيث يستهدف المشروع بناء بنية معلوماتية سليمة , باستخدام التقنية الحديثة في إدخال ، وحفظ ، وتطوير واسترجاع كافة المعلومات الخاصة بالمواطنين في كل مناح حياتهم .
غير ان (الما جميل) في المسالة هو أنه ورغماً عن أن هذا الرقم سوف يطال أي مواطن في البلاد مما يعني ان المسالة ذات كلفة زمنية ومادية عالية إلا أنه من وجهة نظري لم تتم الإستفادة القصوى من هذه (الفرصة) إذ كان من الممكن أن يحتوي الرقم الوطني على بيانات في غاية الأهمية كالأمراض المزمنة (حتى نعلم مقدار حاجة الدواء لهؤلاء المرضي) أو الإحتياجات الخاصة (معرفة أعدادهم وإيجاد فرص عمل لهم) وإذا كان ديوان الزكاة دائماً ما يقول الفائمون على أمره بانهم بعانون من إيجاد آليه تصل للمستحقين الزكاة فقد كان هذا الرقم الوطني فرصة لمعرفة المستحقين وإيصال الزكاة ليهم لحدت (خشم الباب) !
كل هذه النقاط التي ذكرتها أعلاه (وغيرها) كان من المفترض أن ينتبه لها الذين قاموا بتصميم إستمارة بيانات التقديم للرقم الوطني لما لها من فوائد إحصائية لكنهم الظاهر كانوا مركزين على حاجات أكثر أهمية كذلك السؤال (اللا بيودي لا بجيب) الذي سألني له شرطي القسم (قبيلتك شنو؟) والذي جاء ضمن بيانات المواطن المطلوبة !

فيا سعادة وزير الداخلية سألتك بالله أن تشرح للعبدلله ولكافة افراد (الشعب الفضل) من خلال هذا العمود ما هي فائده وجود هذا السؤال ؟ لأنو بصراحة ما شايفين ليهو فائدة بل بالعكس إنه يدعو للقبلية والجهوية والتشرذم
وكمان لو وريتنا السر في عدم وجود كراسي لجلوس المواطنين بمكاتب البلاغات تكون ما قصرتا !

كسرة :
هو بالله أنحنا ناقصين ؟

كسرة ثابتة :
أخبار خط هيثرو شنو(وووو)؟

Advertisements

44 تعليق

  1. برنجيييييييييييييييييييييييييية

    1. بركه الجمعتو ..

      1. مبروووووووووووووووك ، عقبالنا

  2. لكن انا اعترض اي بروف على جملة (وطن كااااامل ومتكامل ) !
    دى ياتو وطن دا !!؟
    بسسسسم الله الرحمن الرحيم…

  3. فعلا سؤال مافيهو اي داعي وهو ينم عن تأصيل العنصريه وكنت أتمني من ان يسن قانون رادع لمحاربه العنصريه ، حاجه غريبه ياخ

  4. بالله هو ينم عن تأصيل العنصرية بصراحة بالغتو فيها
    دا كان زمااااااااااااان لما كان في وطن ولكن الآن لا أعتقد أن هناك وطن تتأصل فيه عنصريه لأنه أصلاً عبارة عن مجموعات من القبائل المتناحرة والمتنافرة والتي لا يجمعها شيء سوى البرنجييييييييييية ولا مش كده يالحبيب شمباتي

    1. طارق بابكر عبيد | رد

      طيب مثلا أنا سوداني وأجدادي سودانين و نجنا لا دناقله لا شايقيه لا جعليه لا حلفاويه ولا جنوبيه وأجدادنا جو من المغرب ومصر و الجزيرة العربيه،، اها الواجد كان مشي القسم يقول ليهم شنو،، سؤال غريب

  5. البروف و السمار سلام . . .
    كيف يا جبرا لزومو شنوالسؤال بتاع القبيله دا ! ما عشان الحكومه تعرفك بتستحق يفتشو ليك حاجاتك الراحت دي و اللا ما بتستحق ! إنتو عايزين خدمات من الحكومه لكل من هب و دب؟ و أوعاكم تكونو عايزين تعملو معارضين بدون ما الحكومه تعرف أصلكم من فصلكم؟ نحن بقينا دوله حضاريه و لازم نعرف منو المتحضر معانا و منو الما متحضر.
    ما سمعتو الرئيس القائد قال: حسه فاروق أبو عيسى دا قبيلتو شنو يا جماعه ؟

  6. الاخ جبرا و السمار
    يعني لو ختو كراسي في محل البلاغات يذلوك كيف و يطلعو عينك انا احلف صادق انو يا اما العساكر و الضباط بستمتعو بالموضوع دة يا اما هي تعليمات واضحة و الما متأكد من كلامي يمشي المغتربين الخرطوم او العلاقات البينية الخرطوم ويشوف الداير يطلع جواز او رقم و طني او اي اجراء تقيف في شمس الله اكبر و تسمع وسخ اضنيك من العساكر غير المهزلة من اليسوى والما يسوى بغض النظر عن عمرك او حالتك الصحية و انت جاي بي حقك و يذلوك والله عجايب.

  7. اخي الفاتح والاخوه الاعزاء
    وانا القايلاك مفتحه وعارفه
    فى حضرت جلالك يطيب الجلوس ……….مهذب امامك يكون الكلام
    انت واقف امام ناس دايره المداس…… ويجزوا ليها الراس
    وبرضك كايس ليك كرسي
    واما السوال عن الجنس يعني بالواضح كده عايزين يعرفو حجم الثقل /كم حقك داخل الحكومه كم
    بالمناسبه ح يزيدوا ليكم تعريفة الكهرباء لدعم الدفاع ….بادوب ممكن تقول (نحنا ناقصين )
    كسره
    بالجد كده انت جنسك شنو
    هههههههههههههههههههههههههههههههههههههه

    1. البروف خلاسي يا بت وراق

  8. شمباتى ياخوي
    انا خايفه علي جبرا مايكون مسكه زهايمر ونسا انو البلد نقصت

  9. هو سؤال القبيلة ده يمكن بس الايام دي عايزين
    يكتشفوا الجنوبيين الما رجعوا واظنو شبهك في
    الشُلك ولا النوير !!!
    اندهشت !!!!
    تندهش في ظل حكومة الاندهاش الوطني !؟
    ديل لمن جوا مش قالوا جايين يغيروا أي شئ ؟
    أها حصل حددوا لينا الشئ الماشين يغيروهوا شنو؟

    1. عزيزي الجنوبي غيرو خريطة الوطن عزيزي ،،، غيرو الأخلاق والقيم ،،، غيرو كل شيء وصدقوا في ذلك ،،،،غيرو الوطن بكامله وللأسف الأسيف للأسوأ واااااااااا أسفاااااي

      1. المندهش .. تعرف انا كل التغييرات بلعتها لكن
        البكور دي اصلها ابت تتبلع لي !!!
        لو اصلو المقصود الناس تبدّر كان يغيّروا بداية
        دوام الشغل ويبقوها الساعة سبعة بدل تمانية
        نفسي اتعرف بالزول بتاع البكور ده واسالو
        الصنف ده جابو من وين !؟ كان خليت البرنجيه دي
        لي ناس كوكو وشمباتي .. سجاير الشفع ده !!

  10. في الزمن الغابر قبل ان يفتح الله علي الانقاذيين بتضمين القبيلة في الاسبيانات الرسمية خوفا من اختلاط الانساب… زمن جعلي ودنقلاوي وشايقي ايه فايداني … الغرض : في زمن الجهل داك تزوج صديق افليقا خ الدنقلاوي وما كان عارف من ا الشايقية وما كانت خاتها بالها من المستقبل المجهول الذي ينتظر ابناء الحلال نتاج ذلك الزواج … ولما جاء ذلك المجهول كان السؤال في استمارة الرقم الوطني ماهي قبيلة ابناء الحلال المذكورين اعلاه ؟؟؟ اختارو من فضلكم لـ خ الاجابة الصحيحة من الاجابات التالية
    أ/ دنقلاشيين
    ب/ شنقلانيين
    ج/ اولاد كلب

  11. جنوبى…سلام…
    والله ياها الجمعة,,انا لى اسه مودر ومجهجه ! احييييييي يا هيلتون العملت لى وجع ضهر !

    كوكو…سلام…
    الله يبارك فيك وعقبالك بعد ها الحال والتأخير ! كع

  12. خالد…سلام…
    انا افترك انو الاجاب ةرقم 3 تصلح لكل اعضاء الحيكومة ! كع..

    المندهش…سلام…
    حتى البرنجية بقوا يتجمعوا حولها بالضرا ! اممممممم

  13. البروووف والسمار .
    صباح الخير .
    حكاية كراسى الجلوس فى الاقسام دى لأنو إنت ماحاتدفع قروش فى البلاغ دة بل بالعكس إنت داير تشغل ناس البوليس بلاش يعنى يرجعوا ليك حقك إذا كنت المجنى عليك وماعندم شغلة فيك تجى مجنى عليك مدقوق ولا مكتول ولا مكسر ولا منهوب.
    لكن لمن تمشى الترخيس بيجيبوا ليك كرسى …
    الله فى…

  14. خالد مدني
    ما وريتني نسبته كم %

  15. خالد مدني .. قول ليهم يدوهم للحكومة وهي
    تتصرف .. يشنقلوهم يدنقلوهم يكلبوهم ..
    اقول ليك !!؟ اسأل هناي الداخلية …

  16. يا اخوانا الناس ديل عندهم تيم بتاع سايكلوجى رهيب يا بروف ما تفتكر انه السوال عن القبيله ده اعتباطى ديل عشان يشغاوك عن كل الحاصل فى البلد وتقوم تفكر فى سؤال زى ده يا اخوانا ديل ناس خطيريييييييييييييييييين

  17. يا بروف انت ما عارف الجماعة ديل أساساً فكرهم الما معروف جنسو شنو بيتبعوا سياسة فرق تسد وا هي واضحة زي الشمس ، أه لو قلت للبوليس قبيلتك جغمساوي هل تفتكر حا يسألك دي من وين ، وهو زاتو ما أظنو حا يكون عارف أي حاجة عن القبائل السودان ، وكان احسن شى تقول ليه قبيلتي جبراوي ولو سألك تقول ليه مش كل قبيلة سميت باسم واحد .. أنا فى عهد الإنقاذ وزي ما كل مسئول بيصرح تصريح مختلف تماماً عن تصريح المسئول الثاني فى ذات الموضوع افتكر من حقي يكون لي قبيلة اسميها برااي وكان عندوا اعتراض اليمشي يعترض إذا لقى حته يعترض فيها..
    بعدين مسألة الكراسي دي .. دي اسمها عذبني وتفنن … عاوزنك تزهج وكده وتمشي براك وتنسي بلاغك لانو حا يشغلهم ويطلع زيتهم ويخليهم مجهجهين فى الحصول على حق الفطور والعشاء الغداء وكده . وتسلم يا وطن

  18. البروف والاخوان..
    مش سؤال القبيلة دا احسن من يقولو ليك انتماءك الحزبي شنو زي ما بيكون في بعض الفورمات يكتبو ليك الخيارات مؤتمر وطني ولا اخرى.

  19. ابو غسان
    والله جبراوى دي عحبتنى شدييييييييييد
    اخى جبرا احب ان انضم الى قبيلتك ما هي الاوراق المطلوبه وجهز لينا الكراسي

  20. بدون تعليق …………………. عجبى

  21. مبروك يا شمباتي…..فاضل ليك إتنين و تحصل ميسي…….
    يا بروف ما هي العلاقة بين القبلية و التوجة الحضاري؟؟؟؟

  22. والله ما فى داعى للاسئلة البايخة دى وان شاء الله ما سالوك عن الديانة؟؟

  23. ود المبشر….سلام…
    يباركوا ليك السمح ياخوى,,,لكن ميسى دا ما جلس خلاس !!!
    انا عايز اجيب اتنين وابقى ذو تلاتة زى فلانة ! امممممم

  24. أستاذنا الجليل متعك الله بالصحة بالنسبة لعمود اليوم انا لا معاه لا ضده في دولة زي الولايات المتحدة في اي اورنيك تعبيه بتسأل سؤال زي دا ما هي اثنيتك التي تنحدر منها اسود ملخبط ابيض. إسباني ووو الي آخره من هذه الإثنيات. الفساد ازكم انوفنا وفي كل لفه وشارع والكلام عنو لو بقي النيل مداد لنفد قبل ان ينفد الكلام في فساد السلطه فهذا امر اهم من اي شي.

    1. مغترب سنين .. سلام .. لكن بعد ده كلو
      اوباما حكم امريكا ونحنا حدنا نائب رئيس
      ( قاعدة سااااااااااكت ) !!وهنا الفرق !

    2. هل سألت نفسك في أي قطر آخر في العالم المتقدم بيسألوك عن عرقك أو قبيلتك – الولايات المتحدة أساساً ما فيها واحد بيدعي فيها إنه مواطن أصيل فيها – إلا الهنود الحمر – الذين أبيدوا على يد المستعمر الذي أتى من بعيد عليه فكلهم وافدين – وما قوانينهم إلا نتاج هذا الاختلاف. فليس بمستغرب أنت تجد فيها مثل هذه الأرانيك. وحتى في الولايات المتحدة ألا توافقني أنه نوع من التخلف أن تسأل مثل هذا السؤال. ماذا يقدم أو يؤخر في أية إجراء يكون في أي ديوان من دواوين الدولة. وهل شاهد العالم كياناً عنصريا كالولايات المتحدة في تاريخه.

  25. بروفنا وحبايبنا
    القبيلة كنت تقول ليهم (بنو قريظة) أو قول ليهم (بنو قينقاع) شوف رد الفعل شنو .. !
    أذكر مع هيجة التوجه الحضاري بتاعهم وبعد ما جابو برنامج (البكور) وغيرو أسماء الشوارع وعملو العملة دينار .. كان في فكرة يغيرو أسماء القبائل بدل جعلي يقولو قريشي .. بدل دنقلاوي يبقى خزرجي .. فوراوي يبقى دوسري وبدل شايقي بني كلاب .. وهكذا .. ويضيفو للجنسية (إبن) فمثلا تلقى الواحد إسمو (البلولة بن عجب الدور الشمري) .. لكنهم للأسف تراجعوا في آخر لحظة .. وليتهم لم يفعلوا !!
    يا حبايب ديل بعملو فينا الدايرنو ومافي زول بقدر يقول للحاجة إتغتي .. !

    1. أب أحمد … شايقي دي خليها قحطاني ..
      لو قال بنو قريظة مع هجليج دي يمين لليلة
      كان يكون معلّق في بوابة عبد القيوم والناس
      تكبّر وتفلّع …نحنا مااا عاطفيين خلاص !!

  26. هييييييييييييييي يا جنوبى ,, حنَا غامديين ! آييييي

  27. الاخوان الاعزاء جنوبى واب احمد
    بني كلاب ولا قحطاني ما فارقه دا اصلا الدايرين يوصلو الناس ليهو واهم نجحوا

  28. بت وراق .. سلام
    صدقتي والله .. لكن هل نحنا كنا نسينا الكلام ده
    وهم رجعوهو ولا نحنا كنا متناسين لحدي ما واحد
    يجي يذكرنا ..
    لكن الكلام ده مفروض ناس الاختصاص يدرسوهو
    ويشوفوا كيف رجع بالسهولة دي عشان نحصّن
    الاجيال القادمة ..

  29. الحبيب شمباتي….سلام
    التالتة دي لسة ما أعلنوها رسمي الظاهر نظام مسيار وكدة…..احسن تخليك زينا كدة من الموحدين و الجماعة اطلقوا عليهم لغب المشركين……

  30. حاج أحمد السلاوى | رد

    أبو ناجى .. كان تقول ليهم جعلتى وتريح نفسك.. هم اصلهم قاصدين يرفعوا ليك ضغط الدم ..

  31. استاذ جبرة والاحباب سلااااااااااااام
    ما يمكن الناس دي عايزة ترجع ليكم الشلوووووخ من تاني
    يعني الاستمارة الجديدة تلقو فيها (( حدد نوع الشلوخ والقبيلة ))
    اخخخخخخخ من العنصرية

  32. غايتو انا البعرفو انو البشر نوعان جنس ونجس
    كسره؟
    جنس ناس زي ديل ………

  33. والله يا أستاذ جبرة ، كأني بك تحكي على لساني – والله لقد صدمت بنفس القدر يا أستاذ وكدت أن أعود أدراجي وأترك البلاغ. الظاهر إنه السودان في النهاية حيتلخص في بيتك الإنت ساكن فيه – تطلع منه إنت برة منه.

  34. الشاهده الغائيه

    بعد إنشغالي بإجراءات إصدار جواز السفر الإلكتروني الجديد الخاص بنا لمدة ثلاثة أسابيع، بين المراحعات و المتابعات في مرز العلاقات البينيه في مركز معاشي القوات المسلحه والشرطه ، من أجل إستخراج الرقم الوطني ومكتب جوازات السفر، والتأخير الذي حدث بسبب تعطل الشبكات الذي إستمر لأكثر من خمسة أيام كاملة،
    وبسبب المراجعات المتعدده و الكثيره أصبح لي الكثير من المعارف و الأصدقاء من بين الضباط والموظفين، وكذلك باعة الشاي / القهوة المناوبين في المركز. وبعد مراجعات إستمرت لفترة ثلاثة أسابيع كامله ، وأخيرا، وبعد عودة الشبكه إلى العمل ( بعد ان طشت بما فيه الكفايه) ، اتى الدور على الموظفين ان يطشوا هم كذلك، فبعد ان كنا نقضي اليوم بأكمله أملين عودة الشبكه إلى العمل، إلى ان تحين ساعات الإنصراف، و بكل برود، يأتينا من يعلن ، بصوت صاخب، يللا يا جماعه هوونا، تعالو باكر، إنشاء الله الشبكه تجي.
    واخيرا ومن حسن الحظ و بركة دعاء الوالدين إستأنفت الشبكه العمل، ومن لطف الاقدار، كان الموظف المعني بالمعامله موجودا، فأخذت ما أريده من إستمارات (أورنيكات) لتعبئتها للتقدم بطلب الجواز الالكتروني. وتم كل شئ كما ينبغي له، وبعد ثلالثه أيام كامله من المراجعه، و حينما وجب علي أن أقر بصحه البيانات لتطبع في الجواز. كانت المفاجأه، وهي عدم تطايق العنوان الفعلي لنا مع العنوان الموجود لشخصنا في ملفات الرقم الوطني.
    إستغرق الأمر أربعة أيام فقط لا غير لتغيير العنوان من مربع 19 إلى مربع 9.

    ولكن الطامه الكبرى ما حدث اليوم، ما حدث اليوم كان أبعد من الخيال. كان هناك هذا الرجل الذي أتى منطلقا ومهرولا من خلف الصفوف بطريقة تشابه ما يفعله أبطال النينجا بل وتفوقهم، ووقف أمامي، للإدخال بيانات ملف رقمه الوطني، ولم يكن فقط مترددا في إسمه بل لم يكن متأكدا من عنوانه بالخرطوم، لم يكن متأكدا ما إذا كان مقيما في مربع 39 أو 29، مإذا كان من سكان الصحافة الشرق اوالغرب أو الوسط،
    ولا كان لديه أي شاهد للإدلاء بشهادته كيتم التصديق على بياناته ومعلوماته الأساسية وتفاصيل شخصه. فعندما سألته السيده التي تقوم بإدخال بياناته (وتدعى نجلاء) عن ما إذا كان لديه شاهد، لم يتعن في الإلتفات لشخصنا الذي يقف خلفه، بل قام بنصف إلتفاته وسألني من فوق كتفه، تشهد يا اخونا. ففعلت ما رايته صوابا ، وإعتذرت. ما حدث بعد ذلك كان المفاجأة بل الطامة الكبرى التي شهدتها ( خلال فترة الثلاثة أسابيع التي قضيتها هناك) فقد قامت الأنسه التي تعمل هناك، وبكل برود ولا مبالاه ، فمددت يدها إلى عدد من البطاقات الشخصيه، التي لم يطالب أصحابها بها إلى الأن، فإختارت بطاقه من ضمنهن لأنسه بإسم سهام. وقالت للفاضل الواقف أمامنا، هذه ستشهد لك يا أستذ ياسر، فقط تذكر إسم الشاهده جيدا، وناولته بطاقة الشاهده الغائبه، وسألته أن يتوجه إلى المكتب المجار لكي يقوم بادخال بيانته ومن ضمنها صوره من بطاقة الشاهده الغائبه في سجلات الأرشيف.

    وقام الفاضل ياسر، بالذهاب الى المكتب المجاور لادخال بياناته الشخصيه في الأرشيف، ومن بينها بيانات بطاقة الشاهده الغائبه. ومن ثم أعاد البطاقه إلى الأنسه نجلاء.
    والتي في رائي انها سوف تقوم بإستخدامها مره أخرى في حاله أخرى.

    سأروي لكم قصتي مع قسم شرطة المرور، و إجراءات إستخراج رخصه بدل فاقد.
    فترقبونا.

    حامي ود الشبل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: