مافي حـ ع ـوجة

أستاذي الفاتح جبرا
بعد التحية والإحترام
أنا إبنتك (س . م) طبيبة إنتهت من الإمتياز وتحاول أداء واجب الوطن…إلى وقت قريب كنت اؤمن بما لا يدع مجال للشك انو الخدمه الوطنيه داخله تحت بند وللاوطان فى دم كل حر يد سلفت ودين مستحق وكلنا عارفييين الديين قاسى والتكفيه حااااااره… لكن يا أستاذي هسه ما بقينا ما عارفين الحاصل ده إسمو شنو! خليني يا أستاذ أحكي ليك وإنتا أحكم …
الخدمه الوطنيه مؤسسه بدأت رشيده كغيرها من مؤسسات بلادى وتشعبت وبدل ما كانت بتحل مشاكل فى البلد بقت من ابشع المؤسسات واكثرها (لغوسة) و (دغمسة) ودا كلو فى كفه و كونها ساهمت بشكل فاعل وما مدرووس فى تأصيل مشكلة العطاله دا فى كفه براااااااهو.. المستشفيات الجامعات الوزارات البلد بقت ما محتاجه ما الخدمه وفرت عماله همله..
ودى وقفه مع الحوجه وخطاباتها:
كلاكيت أول مره :
– السلام.. وعليكم السلام .. دايره اعمل خدمه.. اممممم… يعنى انا خلصت الامتياز… ايوااااا.. وبفتش لى على خدمه… طيب اهه… قصدى انتو فاتحينها ولا كيف ؟
– أسمعى يابتنا قابلت المدير؟
– لا… لالالالا
– امشى قابليو اول حاجه
– طيب مكتبو وين؟
– فوق على شمالك
– شكرا جزيلا… كويس..
وما كضبتا الخبر وطوالي جرى السلالم وأخدتا شمال..
– لو سمحت عايزه اقابل المدير …
-(حاجب فوق والتانى تحت) : لشنو؟ عايزه شنو؟
-عايزه أعمل خدمه
– هاااااه ناس الخدمه! خلاص أصبرى شويه هسى بجى…..
تك تك تك ساعه تك تك تك ساعتييين تك تك المدير جا….
– (فى مكتب المدير) : خير… عايزه
– أعمل خدمه
– أها .. وانت المزكيك منو؟
– (مندهشة) : نعم!؟؟
– سمح سمح … سمعتى بينا من منو؟
– (بكل براءه) : من صاحبتى
-هااااا قلتى لى صاحبتك! الخدمه دي مااا فاتحه هسى غايتو سجلى اسمك فى المكتب التحت وبتصلو بيك لما يكون فى حوجه….
كلاكيت تانى مره :
– داخله وين بطاقتك
– انا طبيبة
-تشرفنا بطاقتك
– ماعندى لكن داخله مكتب الخدمه”عايزه اقدم…
– خلاص خوشى لكن المره الجايه جيبى البطاقه
-إن شاء الله….
– (داخل مكتب الخدمه) : عايزه أعمل خدمه
– هو انتى منو؟
– أنا (فلانه) طبيبه
– قبل ولا بعد؟
-لا أنا خلصت الامتياز
– كويس بس الجماعه ديل مشو يفطوروا
-بجوا متين؟
-مابتاخروا انتظرى بره
– (تك تك تك تك ساعه تك تك تك تك ساعتيين) : لوسمحت ماممكن تورينا بس حاليا فى حوجه وللا لا؟
– ماف طريقه لكن الجماعه ديل بعدا بجو انتظرو حبه
– (تك تك تك تك والزمن ماشى) : يا شباب تعالو بكره الصباح
– (نقنقنقننق نقه تقيله) : الكلام دا كيف نحنا ما منتظرين من الصباح ؟
– والله (المسؤول) دا مافاضى الليله و قلنا ليكم تعالو بكره بكره قريب للحى ولا شنو يا دكاتره؟
– بكره بكره
بكره من النجمه فى مكتب الخدمه:
-جيتو انتظروا هسي نفضى ليكم… (ثم بعد مسااافة) خشو مالكم؟
– فى حوجه؟
– والله حوجه هسى ماف لكن سجلو اسماءكم وبنتصل بيكم؟
– نحنا ما منتظرين من امس شوف لينا طريقه؟
– هسى ما ف لكن راجعونا بعد شهر؟
-ياسعاتك شهر كتير
-يا جماعه حوجه ماف ماقادرين تنتظروا شوفوا حته تانيه…الخدمه عندنا قااااافله… يافلان انا مافاضى شيل اوراق وتلفونات الدكاتره ديل لمن نحتاجهم….. ويدق موبايل سعادتو(مرحب ياسعادتك,ايوااا ,,لالا ماف مشكله,,جدا خليها تجيب ورقها وتكتب رغبتها,,بكره تنزل ان شالله,, نحنا فى الخدمه,, الله يخليك,,) .. – ثم يلتفت نحونا- ماتنسى تشيل من الجماعه اوراق إكمال الامتياز لما تبقى فى حوجه…..
كلاكيت تالت و رابع ولحدى عاشر مره والحكايه دى مستمرة فى كتير من مؤسسات الخدمة الحوجة اختيارية تجى تسألهم يقولو ليك (مافي حوجة) يجيهم تلفون وللا مذكرة تنقلب القصة لي (مافي عوجة) !!

كسرة :
هل نطمع من إدارة الخدمة الرد على ما جاء في رسالة بتنا الطبيبة؟ عشان نعرف الخاصل وكده

كسرة ثابتة :
أخبار خط هيثرو شنو(ووووو) ! – الوواوات زادت واحد عشان دخلنا الشهر الخامس –

31 تعليق

  1. برنجييييييييييييييييييييييييييييية

  2. طبعا انا بحمدالله وتوفيقو قضيت الخدمة دى وانا قاعد فى بيتنا !
    وزعونا مستشفى ما بنوهو !
    واااااااااااااااااااااااااااااااى

    1. أممممممممممممممممممممممم !!!!

      1. ما تشوفوا لينا مقوى للبرنجيه دى ، ان شاء الله B Complex المحايه براها ابت …………. عجبى

  3. صباحكم عسل يا بروف والحبايب
    ثم ماذا بعد الخدمة ….. يا دكتورة ؟؟؟

  4. انا قضيت الزوغة الحمد لله اقصد الخدمة … دا برنامج من افشل البرامج الانقاذية .. حقوا يسمها حاجة تانية

  5. حقيقيه بشعه والابشع غير الوسطه فى حاجات اكعب ( خرتميه مره ) من الوسطه وده الجابنا ورا ولسه

  6. السلام للجميع حسبنا الله ونعم الوكيل
    الله يكون فى عونك وعون أخوانكم يا بتي ،، هم الناس ديل غيروا أي حاجة فى البلد غالبهم يغيروا حرف الحاء فى كلمة ” حوجة ” إلى عين .. المسألة واضحة الما عندو ضهر بيضرب على بطنو وده لو كان فى بطن زاتو .. وهاك ياتبرع للمجهود الحربي والكرامة وكدة وهي وينها الحرب ، ما تقولوا عاوزين تملوا بيها جيوبكم بعد ما ابار هجليج ادمرت وما فى مصدر دخل تاني .. اعملوا ركشات احسن ليكم .. وعجبي

  7. الأحبة سلام……..
    الأخ شمباتي: شنو الحكاية؟ إنت بايت هناك ولةشنو الحكاية؟؟؟؟
    تكون إشتغلت خدمة مع البروف؟؟؟؟

  8. عادي يادكتوره,,,,اول الغيث قطره,,تعالي شوفي كمان لمن تنتهي من الخدمه,,,,المسئول عن الخدمه في المستشفى يتزاوغ منك شهر عشان يجهز ليك ورقك,,,وتمشي بعد داك لناس الخدمه عشان تطلعي كرت نهاية الخدمه,,,,ولو عايزه تعملي اي حاجه يطلبو منك اثبات انك انتهيتي من الخدمه وتقومي انتي بكل ثقه تطلعي الكرت يصدموك ويقولو ليك لا عايزين البطاقه,,,وتسكي اجراءات البطاقه,,,
    ومن حسي اقنعي ممن مهية الخدمه المابتعمل حاجه دي

  9. زمان كنا بنتهرب منها لكن بي قدرة قادر بقت
    هي تتهرب من الناس ..
    يا دكتورة لو خلوكي تقضي الخدمة يبقي انتفي
    عندك اكبر شرط يلزم الحكومة بتوفير وظيفة ليكي
    والحكومة متعودة ترمي اللوم علينا ..!!ولو
    خلوا كل الناس تقضي الخدمة الوطنية بيبقي
    التمكين مكشوف وما قانوني !!
    ومن ناحية تاني هم خاتين حصالة في شئون
    المغتربين وما مستعدين يخسروا ايرادات تصريح
    السفر البيشيلوها بدون اورنيك 15 يعني رسوم
    ( كيري ) !!!

  10. جنوبى..
    هييييييييييييييي,ان بعض الظن اثم !

    ود المبشر..
    ههههههههههههههههههه,,والله انا ذاتى ما صدقت ! عشان تانى تنوموا !

  11. ولدي بعد ما اتخرج وعمل الإمتياز سنة ونص فس السعودية ونجح في امتحان التخصصات الطبية السعودية واشتغل بعد داك سنة .. حسي قاعد في البيت من غير شغل .. عشان القانون هنا في السعوديةلازم يشتغل سنتين من غير مرتب حتى يوظفوهو ..وانا ما لايماهم عشان دي بلدهم وهم احرار فيها .. لكن الولد أبوهو اتوفى ..أها قلنا نجي السودان .. يمكن نلقى طريقة نعيش ..طيب كان دا الحال نطير ويييين

  12. اخى الفاتح والاخوه الاعزاء
    يا ابنتى (س ) خليك انتى السع ما دخلتى الخدمه نحن فى الخدمه بقينا قاعدين ساكت
    فجاء جو ناس غير الناس وخلونا زى مروحة التربيزه ما فاهميين اي حاجه
    تقول لى شنو وتقول لى منو

    1. بت وراق تحياتي
      بمناسبة تقولي شنو وتقولي منو دي …
      بالله الإجابة على السؤال الورد في القصيدة البقول:
      تخيل كيف يكون الحال لو ما كنت سوداني؟ …
      تفتكري الإجابة حتكون شنو بعد الحاصل دا؟

      1. اكيد يا أب أحمد
        اريت ماكنت سودانى واهل ؟؟؟؟ ما أهلى

  13. سلام يا أحباب
    يا سين .. عاااادي يا أختنا في بلدك الجميل .. بلد المليون ميل (المايل شايل المكسر) .. يعني ختي الخمسة في الإتنين وتحوقلي .. وإحتسبي .. الحكاية بقت محبطة بصورة لا يمكن لأكثر الناس تشاؤماً في الدنيا تصورها .. بس عشمنا في الله كبير .. وهو يمهل ولا يهمل .. البلد تلات أرباعها عيانين .. ومافي حوجة للدكاترة .. والله دي فزورة .. يحلها الحلا بلة .. !!

    كسرة
    صوتك كيف يا أختنا سين عشان عندي واسطة ليك في نجوم الغد .. صعبتي علي بالجد .. !!

  14. جبرا والعقد الفريد فى عصرك .
    سلام وتحية .
    عندنا واحد قارى هندسة ميكانيكا قالوا ليهو تقضى الخدمة فى التصنيع الحربى ناس التصنيع الحربى شغلوهو حرس فى الباب وشايل بندقية وينكرش من الباعوضة .
    الله فى …

  15. شمباتي …زكرتني نكتة بلدياتي طوالي طالع الطيش عمة قال لية إنت يا ولد ولا مرة تطلع الأول؟
    رد الولد قال لية: و اللة يا عمي أنا عايز أطلع الأول لكن العيال ما مديني فرقة……..

  16. والله ياجماعه المواضيع دي بقت تحير لو اتكلمت يقولوا عليك انت طابور ومندس وما يدوك صكوك الوطنيه الملكوها براهم واكان سكتنا ترانا فى جنس الحاله دي
    وود الخلا يقول خلوا الحكومه وابقوا فى نفسكم نعاين لنفسنا نلقى الحكومه متلبسانا
    انا ما عارفه الجماعه ديل ولدوهم بالصباح ونحن مع المغارب ولا شنو

  17. مسكينة بالطريقة دى ما تشتغل الا بعد ما تكون حبوبة

  18. طارق بابكر عبيد | رد

    والله أنا اكتر حاجه مزعيلاني حكايه الفطور اللي بالساعات الطويله هو اصلهم بياكلوا في شنو، حقو قصه الفطور دي تمنع او يحدد لها نص ساعه وبس ،، والله أنا عندي عقده من قصه الفطور دي وأتذكر في اجازه من اجازاتي كنت بمشي الاراضي كل يوم ولكن في وكت الفطور و ما عملت حاجه ورجعت تاني، اما بخصوص الخدمه الوطنيه فنحن اشتغلنا الامتياز سنه 1987 و كلنا وطنيه،
    كسره:
    موضوع الفطور ده بالله يالفاتح ضمو لي خط هيثرو

    1. حاج أحمد السلاوى | رد

      الأخ طارق … شنو يعنى الناس ما تفطر ؟..وتطق الحنك وبعدها كباية شاى كاربة ( إنتو ما لاحظتو إنو شاى السوق احلى من شاى البيت ؟ ) من ستات الشاى وشوية ونسة كورة وشوية سياسة ( بتحفظ ) وبعد داك تكون الساعة 12 جات يبتدو يستعدو لصلاة الظهر ( للناس اللى بيصلوا ) وبعد الصلاة الإستعداد للعودة للبيت ..وما تنسى إنو المدير بيكون معاهم فى وسطهم .. ودقى يا مزيكة ..

      1. يقضي الإنسان سنواته الأولى في تعلّم النطق،
        وتقضي الأنظمة العربيّة بقيّة عمره في تعليمه الصمت,.

  19. * أنتو ماسمعتوا انه الطريق الى قلب الرجل معدتو
    * يا مايو يا زاهر يامنور. !!!!!!
    * يعجبنى فيك قبول الاقتراحات لأنك طبقت نظام واوات هيثرو
    وبالمناسبة ممكن واوات هيثرو دى تصبح كناية عن شئ مستحيل
    يا زول ما تخاف الله ……والله واوات هيثرو ما بتحصل زي قصتك دى
    * الراجى الخدمة يرجي خط هيثرو يرجع

  20. ياجماااااعة أفهموها بقى يعني لو ما حصل كده تعرفو كيف إنه إنتو مواطنين درجة تانية في بلد درجة تانية في عالم درجة (تالتة)…….. وعجبي

  21. الله يكون في عونك دي حال البلد كلنا اشتغلنا الخدمة بالواسطة وبالواسطة كمان بعد تعب

  22. ناس فلان قربيهم في الخدمه بجيب ليهم بطاقه انتهاء الخدمه في البيت دليفري شوفي ليك معاهم طريقه!!

  23. اب احمد…سلام..
    امس كنت بتناقش مع صاحبى (انحنا فى السعودية) وقلت ليهو الحكومة فعلتها وتركتها وعملت وسوت فينا,,قال لى هييي اسكت,,,احسن حاجة عملتها الحكومة دى انها طردتنا ! اسه انحنا حايمين فى البلد السمحة دى ومعمرين وحاجين ومرتباتنا سمحة وعيشتنا سمحة…
    اظن كدة اجابتك جاتك لحدى عندك !!

    ود المبشر….سلام…
    اها يعنى ازح ليك ولا شنو !؟ قوم بدرى…هههههههههههههههههه

  24. يا ضوء شبابيك البيوت
    بسرح معاك وأسألك
    عن ظلمة تمتد وتطول
    واتلخبطت فيها الفصول
    عن سر يباس البذرة في طين الحقول
    بائن يا يحي فضل الله – ضوء شبابيك البيوت حيبهت يموت قبال يجاوبك
    لك الله يا هذا البلد – اللهم يا رب – لا تهمل ولا تمهل هؤلاء أكثر من هذا
    اللهم يا رب – أرنا فيهم قدرتك اليوم قبل غداً

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: