نبلغ لمنو يعني؟

عزيزى القارئ : بتاريخ 23 يناير 2010م كتبت مقالاً بعنوان (بدون أورنيك ذاتو) تحدثت فيه عن توجه ولدنا (عبدو) إلى أحد مراكز السجل المدنى لإستخراج شهادة (بدل قيد) إذ يعتزم إستخراج شهادة تسنين للتقديم بها إلى وظيفة بعد أن جلس على (دكة العطالة) لسنوات طوال منذ تخرجه ، لاحظ (عبدو) وهو لا يزال فى الصف ينتظر دفع الرسوم (المكتوبة على الإيصال) والبالغ قدرها (عشرون جنيهاً) أن (الناس بتدفع) ثلاثين جنيهاً وقد رفض (عبدو) أن يقوم بدفع الثلاثين ما لم يتم إعطاؤه أيصال بثلاثين جنيه وعندما أحس (جنابو) بأن (عبدو زول حقانى) طلب منه الدخول (لى جوة) حيث أفهموه بأن (العشرة جنيه الزيادة) دى تعتبر (دعم) ولابد من دفعها كما درج بقية المواطنين على دفعها (بالتى هى أحسن) وأحسن ليهو يدفعا (وما يعمل فيها تفتيحة) عشان أمورو تمشى وكده !!
بعد نشر المقال إتصل بي بى الأخ المقدم (محمد زين) من قوات الشرطة طالباً (الدليل) فبعثت له ببطل القصة والشاهد العيان (ولدنا عبدو) الذى تم التحرى معه وذكرلهم كل صغيرة وكبيرة تتعلق بصحة الأمر فعاد الأخ المقدم للإتصال بى موضحاً بأن هنالك تحقيقاً سوف يجرى فى المسالة وسوف يتم إخطارى بما يسفر عنه … ولما تأخرت نتيجة التحقيق قمت بكتابة مقال آخر حول الموضوع بعنوان (نسال منو تاني) نستفسر فيه عن نتيجة التحقيق .. ولكن لا حياة لمن تنادى ولم يحرك إخواننا في الشرطة ساكنا ليعلمونا بالنتيجة !
لأن العبد لله (زول على نياتو) إعتقد بإنو (الشرطة) لما عرف عنها من (ضبط وربط) قد قامت بإيقاف تلك التجاوزات ومحاسبة من يقوم بها لكن إتضح مؤخراً وبالصدفة أنو القصة ماشة عال العال وفل الفل .. القروش البتدفعا حاجة والبكتبوها ليك على الإيصال حاجة تانية (ناقصة طبعن) ! ولا زالت هذه الممارسات غير القانونية تمارس عيني عينك (ما شرطة وكده) ! وهاكم الدليل (تااااني)
المكان : مكتب جوازات بحري
الزمان : قبل عدة أيام
المعاملة : تجديد جواز مواطن
الرسوم المكتوبة على الإعلان : 96 جنيه
الرسوم التى طلبها المحاسب : 98 جنيه
المواطن : طيب الإتين جنيه الإضافية دي شنو؟
الموظف : دي دمغات
المواطن : طيب ليه ما تكتبوها في الإيصال !
الموظف : دي رسوم براها !
(بعد تسلم الإيصال يتضح للمواطن بأن قيمته ليست 96 جنيها ولكن 84 جنيهاً فيعود ليسأل الموظف)…!!!
المواطن : طيب الجنيهين بتاعين الدمغة خليناهم .. هسه القروش الأديتك ليها دي ناقصة 12 جنيه تاني
الموظف : في رسوم عشرة ألف بتاعت غلاف ودمغة تاااني 2 جنيه
المواطن : طيب انا الغلاف ده ما عاوزو
الموظف : أي معاملة بدون غلاف لا ينظر فيها
المواطن : طيب ليه ما إتضمنت قروش الغلاف والدمغات دي في الإيصال ؟
الموظف : دي رسوم براها !

السيد مدير عام الشرطة :
إذا كنا نعول على (الشرطة) أن تحمى المواطن من أى (جبايات) غير قانونية (معقول) تقوم (الشرطة ذااااتا) بهذا التحصيل غير القانونى لهذه الأموال والتى من الواضح أنها لا تورد في خزينة الدولة (ح تورد كيف و إذاى يعنى؟ وبواسطة ياتو مستندات ؟)
لقد ساءني جداً كمواطن أن أنبه إخواننا في قيادة الشرطة (قبل عامين ونص) إلى هذه التجاوزات فيتم الرد بان هنالك تحقيق في الأمر لأفاجأ بأن (القصة مستمرة) وإنو المسألة (ماشة) رغم عدم قانونيتها ومخالفتها للقواعد المالية !
عزيزي القارئ :
• تري لماذا تمادت الشرطة في ممارسة هذا السلوك الغير قانوني على الرغم من تنبيهنا السابق لها؟
• ما هي نتيجة التحقيق في قصة (ولدنا عبدو) التي اشرنا إليها قبل حوالى عامين ونصف ؟
• ما سر هذه الرسوم التي تتحصل دون إيصال؟ وأين تذهب؟
• لمن تتبع هذه الدمغات وهذا (الغلاف الإجباري) أبو عشرة(ألف) !
كل هذه الأسئلة سوف يقوم بالرد عليها أخواننا في (المكتب الصحفي للشرطة) قبل أن تصبح (كسرة ثابتة) وكده !
كسرة :
إذا كان تحصيل أي مبالغ من المواطنين بأي اورنيك غير أورنيك 15 يعد جنحة يجب ابلاغ الشرطة عن مرتكبها .. أها هسه في الحالة دي نحنا نبلغ لي منو يعنى ؟
كسرة ثابتة :
أخبار خط هيثرو شنو(ووووو) ؟

50 تعليق

  1. برنجييييييييييييييييييييييييييييييية…
    كيتا فى ود المبشر !!

    1. سعيد وبخيت .. لكن برنجيية الليلة دي
      بطلعوها محشية ويطلعوك متعاطي ..
      عِلا زولنا بطلعوه تاجر عدييييل ..

      1. د / شمباتى مبرووووووك ، الجهاز مالنا خربان هالايام ، بلكن تانى .
        جنونى فى الحاله دى ماهو تاجر ، اسمو مروج و لا مهرب ، زى المصرى الجيزاوى بتاع السعوديه ، باقيلك 21 الف و كسور حبه بجيبن كم ؟؟؟……….. عجبى

  2. بعدين يا بروف القصة دى فى كل مكان فى السودان,,فى المجلس الطبى تدفع 80 الف جنيه (قديم) ويدوك ايصال بى 55 الف بس !!
    وفى المغتربين تدفع 8 الف عبارة عن رسوم غلاف برضك ! ومافى اورنيك 15 !
    وكل رسوم المستفيات والمرافق الحكومية (اغلبها يعنى) تحصل بدون اورنيك 15 ,فى دبلكيت بس !
    تقول لى شنو وتقول لى منو؟؟
    وطن..لكنو مو هولك….

  3. طارق بابكر عبيد | رد

    الاخ الفاتح سلامات:
    في إجازتي السابقه في السودان و كنت سايق عربيتي وما اشعر الا وببوليس الحركة يقول لي انت أكلت النور ومشيت في النور احمر وقلت ليهو ياخ ده ما حصل فقام قال لي دي فيها غرامه وسجن وانت كللك نظر ورمضان علي الأبواب ، المهم ما أطول عليكم كنت خاتي الريكوردر أون بتاع الموبايل وقلت ليهو عاوز كم قال لي إديني خمسين الف جنيه بس بالقديم فقلت ليهو لا أحسن نمشي القسم عشان أنا اصلا سجلت كل كلمه ،. المهم غايتو مشيت وحنيت عليهو، يعني دي يحلوها كيف

  4. السلام عليكم الاخ جبرة وبقية العقد
    نفس المواقف حصلت لى 3 مرات الاولى مشيت مع اختى الصغرى عشان اطلع ليها جنسية كانت ممتحنة شهادة ودا فى بحرى قبل حوالى 9 سنة قالو لى تدفع الرسوم ولقيت زياده 5 جنية سألت لية قالو لى عشان تبرع لجمعية القران الكريم قلت ليهم التبرع بيكون برضى الانسان وانا ما داير اتبرع اصرو وانا برضو اصريت فى النهاية ودونى مكتب المباحث ومشيت معاهم قالو الحاصل شنو فهمتهم الحاصل وفعلا قالو للمحاسب ما من حقك تلزمو يتبرع غصب عنا ورجعو لى قروشى … والتانية فى القضائية مشيت اعمل تأشيرة برضو الراجل اخد جنية زيادة قلت لية لية ونفس الكلام رسوم والناس كلها بتدفع قمت عملت جوطة وهو خاف الناس تنتبة وما تدفع طوالى رجع لى الجنية … والتالتة ما متزكر وين برضو شالو من رسوم زيادة وسالت قالو الظرف ولمن رفضت الظرف قالو لى معاملتك حا تقيف اضطريت دفعت رغم انو الظرف ما بيساوى القيمة الهم قالوها
    ودايما الغلط مننا لاننا بنخلى حقنا والمواطن بيخاف من الشرطة حتى لو الشرطى غلطان ….

  5. جاء فى تقرير النائب العام أو الخائب العام أيهما أبلغ أن تجاوزات الشرطه من الرسوم المتخصله و لم تورد للماليه كيما توزع فى شكل حوافز بلغ هذا العام 29 مليار كل مليار ينطح مليار و إذا كترت السؤال موت يا حمار
    دى ما بقت شرطه دى عصــــــــابـــــــــه

    1. يازول صلح اسمك ده ، اصلو زى البمبان …………. عجبى

  6. اخى جرا الاخوه الاعزاء
    انت عارف رسوم القلاف عشان شنو عشان يغطوا ويقفلوا على اسئلتك دى
    اخي شماتى
    اليله حارسه الصف من الصاح مشيت اصوط الحله اجي القاك حجزته مكانى احيييييي منك

    1. لا متين يابت وراق تصوطى ، ما اخير ليك تخلى الصواطه دى ……….. عجبى

      1. كو كو سلام
        اصوط حتى يمل الصوط من صوتي او تحرق الحله

  7. اخي الفاتح
    عندنا جاره لزيزه خلاص جاءت لي امى وبقت تتونس معاها قالت ليها يابت امى اليله مشيت اصرف معاش المرحوم وقفت فى الشباك اصرف ادونى القروش ناقصه قلت للصراف يا ولدي القروش ناقصه تلاته جنيه هو موش قالو قى زياده فى المعاش ضحكوا كل الواقفين فى الصف قالوا لى ياحجه انتى ما سمعتى دا ما دعم للجيش للحرب
    والله من سمعته كلامن دا مسكته بافي قروشي قوي وقمته فلليشن (جريت جري شديد )
    يقوموا يشيلوا الفضل كمان
    ديل نشتكيهم لمنو

  8. الأحبة سلام……..
    مبروك شمباتي…..خلاص بقيت عقيد ,أفتكر بعد كدة ممكن تشوف لينا العشرة جنية دي بتمشي وين؟؟؟
    أكيد الجماعة حيقولوا علينا (خلايا نايمة)………

  9. يا سبحان الله !! يعني لو كل القروش
    البحصلوها دي كانت باورنيك 15
    كان يكون عندنا فائض في الميزانية!؟
    يعني المشكلة في الكنترول ما في البترول !!!
    طالما وزارة العدل من ضمن الجهات البتمارس
    السلوك ده حسب تقرير المراجع العام تبقي
    الشكية لغير الله مذلة ..
    بدل رفع الدعم عن السلع ليه ما يمشوا
    بالدرب العديييل ويدخلوا المبالغ دي
    الميزانية ويريحوا الجمل والجمال !؟
    ااااخ يا قرشي الما نجض دفيقوا جوهوا
    اتقسموهوا وراحوا ما عارفين شقيت في
    دربو والحق لي نفوسن باحوا ..
    نهب مسلّح ونهب مصلّح .. نقبّل وين ..

  10. سلامات بروف والأحباب
    والله القصة دي بقت متكررة لدرجة مبالغة

    وهاكم ديل تلاتة من تلاتات :

    1 / مشيت مرور بحري داير اطلع تفتيش شهري لقلاب تابع لشركتنا – قالي جيب 32 جنيه – اديتو بعد مساااااافة سلمني التفتيش وانا في الطريق فتحت دفتر التفتيش لقيت جواهو ايصال مدبس ب 20 جنيه – رجعت للعسكري قالي دا رسوم هناي وهناي – قلت هناي دا شنو قالي يا خوي قافلة معانا خش للضابط يوريك وفات مني ما عرفت الضابط وين وياتو ؟؟؟
    2 / جوازات المقرن داير اطلع جواز قالو 265 ادفع دفعت جيب 10 و15 و5 لقيت نفسي دافع بدون ناس تصوير وامشي وتعال 295 جنيه
    3 / صاحبي عامل حادث مروريمشينا ليهو عاملين ليهو ضمانة في كرري قالو جيب زول من دائرة الاختصاص – بعد جرجرة قال لينا العسكري كدى جيب قروش اعمل اتصال عشان اشوف ليكم وكيل النيابة لو بيقبل – اديناهو تلفوناتنا انا والمعاي قال لا الا من حقو ادينا 5 قال انا شاحدكم – اخيرا اخد 20 جنيه وفك لينا صاحبنا لا اختصاص لا يحزنون

  11. السلام للجميع ….كل الحاصل زي ما ورد من احد الأخوة انو السبب الناس لأنهم بسكتوا على حقوقهم علشان تمشي أمورهم وفى ذلك مفسدة كبيرة ولو كل واحد رفض يدفع حا يحصل شنو يعني خلي المعاملة تتأخر وفى النهاية حا يخلصوها ليك غصبن عنهم رغم انو القصة خربانة من كبارها .. المعروف ان الرسوم الحكومية يجب ان تتناسب مع الخدمة المقدمة فهل بالله الملف بتاع التأشيرة يساوي المبلغ المدفوع اول مرة نشوف حكومة بتربح فى الخدمات وبعدين فى حاجة تانية فى احدى قنصليات الدولة بالخارج لو عاوز تجدد جوازات عائلتك أحسن ليك تجيبها كلها مع بعض علشان ناخد خصم فى الرسوم نفس موضوع اشتري أثنين وتحصل على الثالث مجاني ..يا جماعة القصة محيرة .. وزي ما الناس محتارة فيها عشرين سنة .. وربنا ينتقم منهم

  12. ياكرام == القصة كلها انو مؤسسات الدولة النظامية والغير نظامية بتلم قروش من الشعب الغنيان دة لتغذية مال التسيير للمؤسسة وكذلك لتغذية جيوب الموظفين = ودى مقننة ومحمية من الحكومة ذاتا مافيش حد يسأل ليه ولو تسأل معاملتك مش حتتم = يعيش المراجع العام (مع التيار ) ويسقط اللى عايز يعوم عكس التيار

    9

  13. والله البشوفكم كده يقول خلاص ما فضل غير الحاجات السغيروووونه دي … يا اخونا انتم عينكم في الفيل وبتطعنو في ضلوا …. نحن بتاعين الكبار والكبار أوي وإحترام الكبير واجب …. شنو يعني جنيه وجنيهين بالزيادة وبالمناسبة وعشان ما تفهمو غلط زي ما قال الريس ما فيش فساد نوهائي

  14. البروف والحبان
    شن جد على كيس المخدة الأول دبلان والتاني سيتان والتالتة ياربي يكون شنو ؟؟
    طبعا المخدة بتعرف تختار أكياسها بذوق عالي وراقي جدا … ما أصلوا هن لباسن للمخدة والمخدة لباس لهن ولا مش كده يا الحبايب

  15. ياسين شمباتى | رد

    جنوبى….
    هههههههههههههههههههههه,,التاجر دا ما بقسم لى معاهو شوية !؟ اححححح…

    بت وراق….
    عشان تانى تبطلى الصواطة ! هههههههههههههههههههههه

  16. ياسين شمباتى | رد

    ود المبشر…..
    ههههههههههههههههههههه,انا عايز الحق مشير ! كع كرع رع….
    البكاسى وقفن سوا,,واحد رائد والتانى لواء,,عريسنا عالى المستوى,يمة اللووووول ليلى انا !!

    جنوبى..
    قبل هنا ! وى وى وى

    1. ده الوحيد الماقادرين عليهو ، تلاته 3 ، و نحنو واحده بس ، تقول اقباط …………….عجبى

      1. كوكو @ شمباتي .. كل ما زادت الكمية قلت
        الجودة ! وما بقصد البرنجييية ..باقي ليكم
        بين القوسين بكون في شئ ؟

  17. ياسين شمباتى | رد

    المندهش…
    كلامك ما سياحى نوهائى ! هههههههههههههههههههههه
    لمن انا اندهشت ! وى وى وى

  18. ويا احوانا ليه ما نكون زى الدول المتقدمة الرسوم تكون فى مكاتب طباعة او الدفع يكون بالماركة او جنيه الكترونى لزوم وقف الغش والاستهبال .. وليه هم مصرين ما يضمنوا الملبغ المستولى عليه فى الفاتورة؟؟ هنا السؤال

  19. يا جماعة الخير أرنيك 15 كان بطلع أيام ما كان عندنا حكومة……..هسع بقت زات قاعدة عريضة جدا ,يعني أرنيك 15 دة يكفي منو و يخلي منو؟؟؟؟؟؟؟؟؟

  20. تقول لى شنو وتقول لى منو؟؟

    إذا خلوت الدهر يوماً بريبة ، والنفس داعية إلى العصيان
    ،،، فاستحيي من نظر الإله وقلها ، إن الذي خلق السماء يراني ..
    “اللهم حرم وجوهنا من النار وأجعلنا من زمرتك المتقين”

  21. حاج أحمد السلاوى | رد

    الشكوى لغير الله مذلة ..
    الشكية ل أب إيدن قوية ..
    الشكية للمانام ..ولا أكل طعام ..
    إلى الله ايها المسنضعفون ..
    وبس ….

  22. ل

  23. الحبان وبروف الهنا
    الضابط قال لعسكري المرور أمشي جيب لينا فطور فول مصلح وسمك ودجاج وماتنسى المخلل والشطة .. وبالمرة جيب معاك 8 شامبيون .. العسكري قال ليهو حاضر سعادتك .. ولسة واقف .. الضابط قال ليهو واقف منتظر شنو؟ .. رد العسكري: القروش سعادتك .. الضابط: يا عسكري يا بليد الفي جيبك دي شنو؟ رد العسكري: صفارة سعادتك .. قال له الضابط: طيب يا كهنة … إنت (حكم) ما تمشي تقيف في الشارع تطلع لينا قروش الفطور .. !!!

    دي حالة فيها أمل (دنقل) ؟؟!!!

    1. طارق بابكر عبيد | رد

      مش قالوا لينا جيبوا ما يثبت ،، فوصيتي استعمال مسجل الموبايل والذهاب للقسم وكده بنكون ساعدنا انفسنا وبلدنا كمان،، ما تخلي ذول ياكل حقك او يغشك ونبقي كلنا زي عبدالسلام عبدالبصير(شاهد شاف حاجه) ونسجل اي حاجه والله المستعان

      1. طارق بابكر عبيد

        تصحيح: سرحان عبدالبصير

  24. البروف العزيز والسمار الكرام
    يا أخوانا بسأل من ناس بحبهم كتير جدا وأكيد يالبروف عندك خبرهم
    أسترايكر
    شابوش
    دقاش
    نيام نيام
    أفليقا
    أبكرون
    بشار بن برد
    عباس ركس
    البشاوي
    ودالخلا
    وكثيرون ،،،، وين الناس ديل ؟؟؟

    1. يكونش كده وقع ليهم اللوتري

  25. الناس دي ارتفعت مع الدولار!!!الي …
    انا و النجم و المساء

  26. الحبيب

    كان على قيمه الظرف ولا الدمغه هيييييييينه لكن تعد هذى المراحل بكتير خلاس وربك عارف الحاصل لكن تحضرنى قصه للامير المومنين سيدنا عمر بن عبدالعزيز حينما جا رسول من احدى الولايات ليلأ يحمل خطاب من الوالى اضاء سيدنا عمر السراج ( الفانوس ) وعندما قرا الرساله طفا السراج واخذ يسال الرجال عن حال اهل الولايه واخبارهم عندها ساله الرسول لماذ طفي السراج فكان رد الامير ان زيت السراج من بيت مال المسلمين واشعله لقراء امرهم فى الرساله

    وبرضك تقول لى الطياره فيها بورى
    دحين من اسي اعمل ليك كسره ولا اقول اعمل ليك طابونه عديل كده

  27. سلام يا بروف وشكرا على إثارة الموضوع
    أنا كمانومعاي الإيصال .. نفس القصة في الفيش بتاع بري،، مشيت أطلع فيش دافع ١٢ ألف أزيد من قيمة الإيصال،، المهم طبعا حاولت أعترض قال لوا لي أمشي اشتكي الشرطة لو بتقدر!!!
    طبعا قلت ليهم بشكيكم فعلا لكن ما هسه يوم الموقف العظيم. وما فرقت معاهم كتير… تحليلي لي المسألة إنو العمالة الرخيصة دايما بتكون عرضة للإنحراف وهو الأمر الحاصل لي شرطة السودان .. وفي الختام بنقول:
    من الشعب ألف تحية لي (رجال) الشرطة السودانية

  28. حاج أحمد السلاوى | رد

    المحاربين القدامى مشو هجليج …

  29. كوكو..سلام…
    يباركولوك السمح وعقبالك كدة شايل الكاس !

    سلاوى..سلام…
    وانت ما مشيت معاهم ليييه !؟ شينة منك لكن…

    1. د/ شمباتى نحنو بتاعيييييييييييين دورى مش كاس ………………….. عجبى

  30. شمباتى …سلام
    حاج سلاوي بجهز في زاد المجاهد

    1. حاج أحمد السلاوى | رد

      كتّر ألف خيرك يا بت وراق كفيتنى مؤنة الرد على الولد المشاغب شنباتى ( بالنون )..
      شنباتى .. سجمنا .. هو انا برضو فى عِداد قدامى المحاربين ..؟؟ ياخ أنا لسه بدرى على أدخل مع الناس المخضرمين ديل ..

  31. يا بروف صبااااااحاتك خير
    أنا وافد للسودان العزيز من السعودية وقعدت في السودان من 2004 الى 2011 وكل ستة اشهر ارجع السعودية وأراجع الجوازات وكنت بلاحظ الفرق بين اللي أدفعه والمكتوب في الإيصال لدرجة قلت ذي أصلا حاجة قانونية
    تخيل تقريبا 15 مرة راجعت اعمل خروج وعودة وفي كل مرة الفرق يتعدى 35 جنيه المرة الوحيدة اللي الفرق كان فيها 22 جنيه شهر 7 سنة 2008 يعني مني بس راحت في جيوبهم 512 جنيه هذي بس في الخروج والعودة وهي اللي حسبت فيها اللي سرقوها مني أو ………… نتنتظر كلام المكتب الصحفي عشان ما نستعجل في الحكم وكدا .
    وبالمناسبة انا كنت براجع الجوازات ل : 1- تسجيل الاجانب مرة لما جيت البلد وطبعا المدخل البحري اغلى من المطار ليش ما أعرف
    2- تجديد الاقامة وكانت اسعارها بورصة وبس
    كل يوم لها سعر وكنا بنحاول نشوف متى ترخص عشان نجدد وجددت 8 مرات تقريبا.
    وأموت وأعرف ليه السبب في التذبذب في الأسعار .
    3- الخروج والعودة وذي قريب 15 مرة .
    عليكم الله ايش رايكم ؟؟؟؟؟؟؟؟؟؟؟؟؟؟؟؟؟؟؟؟؟؟؟

    2-

  32. ياسين شمباتى | رد

    كوكو….
    هههههههههههههههههههههههههه,,امشوا يا قبطة يا ما كويسين ! الله يقدرك على ما بلاك…بس..

    جنوبى…
    اممممممم,,بين (القوسين) فقدنا رجال ! واااااااااااااااى

  33. ياسين شمباتى | رد

    بت وراق..
    هههههههههههههههههههههه,,زاد منو !!؟ الله يقدرو يزود روحو بس ! آيييييي…

    سلاوى…
    ايوا !! شوف العين قالت دا لا لا !! انزل صور؟؟اممممممم

  34. ياسين شمباتى | رد

    كوكو..
    امممممم,,دورى يعنى بى عبار اكبر ولا كيف !!؟؟؟ لووووول

    1. والله في الحالة دي إلا تبلغ أوكامبو!

  35. تذكرني هذه بقصيدة الشاعر أحمد مطر أهديها إليكم
    أين صاحبي حسن …للشاعر أحمد مطر
    زار الزعيم المؤتمن
    بعض ولايات الوطن
    وحين زار حيّنا
    قال لنا :
    هاتوا شكاواكم بصدق في العلن
    ولاتخافوا أحدا ..فقد مضى ذاك الزمن.
    فقال صاحبي (حسن):
    يا سيّدي،
    أين الرغيف واللبن؟؟
    وأين تأمين السكن؟؟
    وأين توفير المهن ؟؟
    وأين من
    يوفّر الدواء للفقير دونما ثمن؟
    يا سيّدي،
    لم نر من ذلك شيئا أبدا.
    قال الزعيم في حزن:
    أحرق ربي جسدي
    أكلّ هذا حاصل في بلدي ؟!!
    شكرا على صدقك في تنبيهنا يا ولدي
    سوف ترى الخير غدا.
    وبعدعام زارنا .
    ومرة ثانية قال لنا :
    هاتوا شكاواكم بصدق في العلن .
    ولا تخافوا أحدا
    فقد مضى ذاك الزمن
    لم يشتك الناس!
    فقمت معلنا:
    أين الرغيف واللبن؟
    وأين تأمين السكن ؟
    وأين توفير المهن ؟
    وأين من
    يوفر الدواء للفقير دونما ثمن؟
    معذرة يا سيّدي،…………………………………….. …………….وأين صاحبي (حسن ) ؟؟؟؟!!!

  36. في حاجة اسمها الصناديق الخاصة وهذه الصناديق تشتهر في الدول التي يتمكن الفساد من مفاصلها وهي عبارة عن ايرادات يتم تجنيبها لصالح مؤسسة او مصلحة مثل (رسوم المغادرة في المطار , رسوم دخول المستشفيات ورسوم النفايات ورسوم المخالفات المرورية كل هذه الرسوم تحصل بايصالات غير ايصالات وزارة المالية ((اورنيك 15)) هذه الصناديق تتبع لمؤسسات الدولة حتى تتصرف فيها لاغراضها الخاصة وغالبا هذه الحسابات لا يكون عليها رقيب وليس عليها مراجعة وهي ميزانيات ضخمة وخارج اطار الميزانية الرسمية للدولة وهذه الصناديق يمكن ان تكون فيها ميزانيات تصل لاضعاف موازنة الدولة الحقيقية اما مسألة النحصيل بدون اي ورقة خالص دي فمعناها مدير المؤسسة يعني في مثالك ((مدير جوازات بحري)) توجيه بتحصيل الرسم لصالحه او لصالح وزارة الداخلية اولصالح حافز الموظفين … الخ المهم الدولة قالت للمسؤول عندك شطر واعرف احلبوا بطريقتك لكن ماتجي تسألني وتقول لي عايز مرتبات ولا حوافز بالمناسبة حجم ميزانيات الصناديق الخاصة التي ((عثر)) حتى الان في مصر تساوي البالغ التي به ضعف الميزانية السنوية المصرية

  37. السلام عليكم ورحمة الله تعالى وبركاته
    الوالد الفاضل الاساذ الفاتح
    دي قصص ما دايرة ليها شاهد ﻻنو اي مواطن( واقصد مواطن لانو لو مسعول او تابع للمسعولين او الجماعة اياهم علي قولة اخوانا المصريين ما بيدفع اصلا رسوم دولة ولو بي دفتر 15 مش اورنيك 15 وبالتالي معناهاالقروش البتندفع بالطريقة الرسمية ما شكلها بتخش الخزنة والبتخش بي اورنيك 15 وطريقة رسمية زااااااااااتها بيجنبوها بالجنبة يعني ومن المراجع العام ما يراجعها وعلي عيييييييينك يا ريس اقصد يا تاجر) بيكون دفع زي دي مرات ومرات
    المهم انا واعوذ بالله من كلمة انا واحد من الناس اللي دفعو مبلغ اكتر من الموجود في الايصال وذلك في المجلس الطبي السوداني مبلغ يفرق من المسجل ب 15 جنيه وبعد الاحتجاج كانت نفس الحجج الواهية دمغة ونريحك من مشوار الدمغة وووو
    تخيل نحن حوالي 1000 طبيب × 15 جنيه
    هذا في خلال اسبوع في عام 2008 ومن قبله كم عام وحتى الان

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: