علم الزرَّة

لوالدي رحمة الله عليه كلمة يرددها بإستمرار كل ما كانت تشغل ذهنه قضية أو مشكلة ما .. والكلمة هي (وبعدين) .. فكنت كلما رايته يقوم بتكرار هذه الكلمة أعلم انه يواجه مشكلة ما .. وأنه (مزرور) في أمر ما ومضيق عليه الخناق فيه مما حدا به للتخفيف عن نفسه بهذه الكلمة (وبعدين؟) كأنه يفتح حواراً بينه وبين نفسه لكيفيه الخروج من تلك (الزرَّة) !
الايام دي وجدت نفسي أردد ذات الكلمة بين كل فينة واخري (وبعدين) ليس لانني مزرور وكده بل لأنني اعتقد بأن البلد كووولها (مزرورة) ويتوقع لها بان تمر (بزرّات) في كثير من الاصعدة .. طيب (وبعدين؟) العبد لله يقترح إيفاد المسئولين لتلقي دورات مكثفة في (علم الزرَّه) وهو علم يعني بدراسة كيفية مواجهة (الزرَّات) والتعامل معها ومحاولة الخروج منها باقل الخسائر ولعمري فإن هذا العلم له فائدة كبرى تعود على مسئولينا الذين دايما ما تجهجههم (الزرَّات) وتجعلهم يلقون على مسامعنا عندما يواجهونها ما يمكن تصنيفه بكل سهوله بانه (كلام الطير في الباقير) !
بعد تبحره في علم الزرّة ونيله لقب (عالم زرَّات) سيتمكن وزير ماليتنا التعامل مع الزرَّة (الإقتصادية الحاصلة) فهل هنالك زرَّة أكتر من أن يتم رفع الدعم عن المحروقات لترتفع نيران الأسعار اكثر مما هو عليه الآن في ظل إرتفاع متواصل للدولار مقابل العملة المحلية (الما معروف حدو وين ده) !
وبعد نيله لزمالة جمعية علماء الزرَّات العالمية سوف يستطيع وزير دفاعنا التعامل مع أى (زرَّات) تتعرض لها حدودنا مع (العدو) بعد أن تم فتح جبهات قتال في عديد من المناطق مما يتطلب جهداً متواصلاً وحراسة مشددة وعين لا تنام ؟
أما وزيرة الرعاية الإجتماعية فبعد تخصصها في (علم الزرَّات الإجتماعي) فسوف تستطيع بكل سهولة التعامل مع (الزرَّات الراجياها) عندما تصل نسبة اعداد المتسولين إلى عشرين متسولاً لكل شارة مرور واربعبن أمام كل صيدلية هذا غير (زرَّات) التعامل مع إزدياد وتنامي اعداد المشردين والمشردات الذين أصبح من المالوف أن تراهم في أي مكان بعد أن كانوا بس (قدام السينمات) !
وزير الصحة المنشغل بإستثماراته العديدة وأعباء منصبه الرسمي عليه ان (يفضي روحو شويه) (ويهرع) لتلقي جرعة مكثفة من (علم الزرَّات) إذ انه سيواجه إذا إستمر الحال كما هو عليه لزرَّات منيلة بنيلة حينما يصل الامر (حتة) ان تتم مطالبة المريض في المستشفيات الحكومية بإحضار (الدكتور) بعد أن كان يقوم بإحضار الحقن والشاش والدواء !
أما وزير الداخليه فالعبدلله يعتقد بأنه لابد له من تلقي (دورة حتمية) في (الزرّات الأمنية) فكل المؤشرات تقول أن أعداد الوافدين قد أصبح يقارب (وافد لكل مواطن) وفي ظل حدود فاتحه (ساااكت) ووجود هؤلاء الوافدين (سارحين ومارحين) من غير تسجيل او أوراق ثبوتية او حصر يجعلهم قنبلة قابلة للإنفجار لابد لمن يتصدى لها أن يكون متفقهاً في التعامل مع مثل هذه الزرّات الأمنية والتي ستقع إن إستمر التعامل مع هذا الأمر الخطير بالطناش الشايفنو ده !
كل الوزراء والمسئولين في ظل هذا الوضع الذي نعيشه والذي تصلح عن التعبير عنه مقولة والدي رحمة الله عليه (وبعدين) مطلوب منهم أن يصبحوا (علماء زرّات) إذ يبدو أننا مقبلون على مستقبل من غير ملامح لو ما الناس خلت البتعمل فيهو ده وفتحت عيونا وتبنت خطة إصلاح عاجلة قبل (الزرَّات) ما تحصل وكده !

كسرة :
ليس في كل (زرَّة) تسلم الجرة !

كسرة ثابتة :
أخبار خط هيثرو شنو(ووووو)؟

Advertisements

42 تعليق

  1. وبعدييييييييين ؟

    1. ود الفريق … ده اسمو تدخين سلبي !!
      الغرفة الاولي خاصة بالمدخنين ..

      1. أستاذي جنوبي
        قلنا نقيف في الصفوف الوراء ولكن ناس الصفوف القدام تأخروا …. الظاهر مشغولين بالكورسات والمحاضرات والدورات وبعدييييييييين البروف لو رجعنا ورا ما حنزعل الرجعو وما قالو حاجة شوية !!!!!!!!

      2. المندهش .. سلام
        الرجعوهم ورا يا استقالوا يا شالوا السلاح
        البروف عكس الجماعة في الهجيج ورا وفي هجليج
        قدااااااام …

      3. الشباك بي وين

  2. وبعديييييييين
    نحنا لسه حا ننتظر لمن الجماعة ديل يمشو ويعملوا كورسات ودورات في علم الزرة ويجو عايدين ويطبقوا الماممكن يفهموه نوهااائي ( العقول تحجرت وكده ) وبعداك ينصلح الحال
    أكان كدي الترابه في خشمنا

  3. صباح الخير….
    هو فضل فيها بعدين؟؟؟؟؟؟ ولا بعدين ولا قبلين اصلها بقت خربانة خاااااالص

  4. ديل الزرّات تجي تعمل دورات عندهم !!!
    وزير الدفاع دخلوهو معهد علم الخجلات عشان
    هو عندنو دكتوراة في الزرّات ..
    وزير المالية طالما في الطايوق والصاج
    والقرقريبة ما بيتزرّه ..

  5. البروف والصحاب
    أولاً .. الرحمة الواسعة للوالد .. تقبله الله مع الأبرار وأحسن نزله، فهؤلاء جيل كان يرى بعين البصيرة قبل البصر.

    تالياً .. طبعاً المؤكد مسؤولينا في أمازونيا حيعفوهم من (بارت ون) و(بارت تو) .. عشان عندهم زمالات مقاربة (زمالة الزرزرة، وزمالة التزوير والتوزير .. مثلاً لا حصراً) .. ورئيسنا عندو دكتوراة (مزازاة) من دول الجوار وإيران ..

    وقد قيل إن الإمتحان لزمالة علم الذرة يقوم عليه قوم من الزرادشتيين في إيران إلى جانب عملهم الرئيس وهو تصدير للنبق إلى الدول التي تأكل مما تزرع ..!!

    1. عفواً .. علم الزرة .. وليس الذرة (عشان ما يتلخبط الإختساس ..!!

  6. اخي جبرا والناس الطيبين سلامات
    حكمة الله …كل الزرات بقدرة قادر تتحول لهجيج ولملمة القروش والرقيص وهيصه والباب يدق كل ساعه مره كيس المجاهد-ومره شنطة المحارب ..كل الاسماء كملوها والخزنه اتملت تاني
    والله ديل الزرات يزرزروها ويوقفوها ركن

  7. شعبنا الفضل هو المحتاج لكورسات فى التعامل مع الزرات واطلب من الاخوه والمشاركيين اقتراح لتسمية دورات تدريبيه في مواضيع الزرزره التي يواجهها هذا الشعب من قشة عينه من النوم الى ان ينوم تانى وهو مزرور

    1. أختنا بت وراق … سلام
      يا أختي ختي الرحمن في قلبك…. من فترة كانت عندي المشاركه أدناه وتحققت منها في ويكيبيديا
      وقلت ليكم باقي لينا 21 سنة تاااااااااني وما تخافي بتجري متل الكضب ونكون في الوكت داك خلاص بقينا أساتذة في فن الزرزرة وندرّس كمان دول الجوار
      1-جمال عبد الناصر ولد سنة 1918 وحكم 18 سنة من عام 52 وحتى عام 70 وجاء الى الحكم بانقلاب عسكري عام 52 ومات وعمره 52 سنة
      2-حافظ الأسد ولد سنة 1930 وحكم 30 سنة من عام 70 وحتى 2000 وجاء للحكم بانقلاب عسكري عام 70 ومات وعمره 70 سنة
      3-صدام حسين ولد سنة 1937 وحكم 37 سنة من عام 79 وحتى 2006 وجاء للحكم بانقلاب عسكري عام 79 ومات وعمره 79 سنة
      4-معمر القذافي ولد سنة 1942 وحكم 42 سنة من عام 69 وحتى 2011 وجاء للحكم بانقلاب عسكري عام 69 وقتل وعمره 69 سنة
      5-نأتي الى عمر البشير ولد سنة 1944 بالمعادلة دي حيحكم 44 سنة من عام 89 وحتى 2033 جاء للحكم بانقلاب عسكري في 89 ويمكن ان يموت وعمره 89 سنة
      أها رأيك شنو ؟؟؟

      1. حماد براهووووو ؟؟؟؟ ده كالنا كوووووولنا

      2. معنى كده نعمل كورس طويييل مدته 21 سنه ونسميه
        علم الزرات فيما تبقى من العشرينات

      3. انت احبطنا لاااااااااااااخر فى داعى للمعادله دى ….الله يكضب الشينه

  8. ياجماعة الخير وين اخونا ود الخلاء بس ماتكون فى عوجه والباقى هين

  9. وبعدين… ح اعرفوا الناس عندها امكانيه تتحول من شعب و امه الي… طير الزرزور
    و بالتالي المجتمع بتقسم تاني الي طير الرهو و الزارازير المستضعفين!! ح ترتفع اغصان الدولار تبعا
    الحكومه سوف تقوم بنبش قبر ابوصلاح و اتهامه بسيناريو الطير المهاجر و التحريض ايضا لتصدير اناث النعام للخارج!!!

    1. تصدير الاناث دي لو عملوها ح تكون احسن ح يقل عدد الذين يدفنون راسهم فى الرمال

  10. ود المبشر عينك حااااره اها اخونا شمباتى لا عقيد ولا مشير اختفا مره واحده
    امممممممممممم

  11. وبعديييييييييييين !!!

    بمناسبة وبعدين

    عندي خالي الله يديهو الصحة والعافية منم نحن صغار لليوم واقف في لسانو ( والله مشكلة )

    أها لازم يدخل والله مشكلة في كلامو يعني لو قعدت معاهو ربع ساعة ويتكلم ممكن يكررو 10 مرات

    في عام 2007 أخوهو اتصل علي قالي امشي لخالك قوليهو انو داير يشيلو حج السنة دي
    مشيت بعد السلام قلت ليهو ربنا يسهل اتصل الخال من السعودية قاليك داير يشيلك الحج انشاء الله

    فرح شديد ونادى زوجتو وقالي متين اتصل قلت ليهو قبل شوية
    قالي كويس
    ربنا يسهل
    حج عدييييييل والله مشكلة

    تاني :
    جو جماعة اتقدمو لبنتو حددو كل شي قاليهم والله مشكلة قالو ليهو في شنو
    قال والله مشكلة العرس بيفرح شديد والله مشكلة

    وبعديييييييييين !!!!!!

  12. واحد مسطول سال واحد جنوبى الاخ جنسك شنو رد عليهو الجنوبى سودانى قام المسطول ضحك هاهاهاهااااااا العب غيرها دا كان زمان انت قايلنى ساطل هها ها ها

  13. بت وراق ……
    اللة يستر ما يكون أخونا شمباتي مزرور في حتة صعبة!!!!!
    الظاهر مشي يسبق الجماعة و ياخد الكورس قبلهم عشان يجي يزرزرهم بمزاج…….
    الإحتمال التاني يكون بقي زينا (خلايا نايمة)

  14. طيب عرفنا الكورسات بتاعت الزرة دي .. حا يدفعوا تكاليفها من وين واوع يكون الدفع بالدولار ووب علينا يعني ما صدقنا هجليج دخل الضخ يقوموا يشيلوها ويدخلوا بيها كورسات الزرزرة وكان لي دي حا تكون هينة بس الخوف من بكرة يدق الباب ويجينا محصل علشان ياخد بتاع الكورسات ويضاف بند جديد مع دمغة الشهيد والكرامة اسم بدل زرزرة ويمكن دي بالذات يكون المراجع العام مسئول عنها شخصيا علشان ما يجينا وزير الشئون الدينية ويقول مزرور وكده وويشيل منها وكده – وما تنسوا فقه الضرورة – يعني الوزير الما مالي مركزو ومزرور بجد حقو راح
    والله الخوف امشوا الكورسات ويقولوا لمعلمي الزرزرة دي قديمة هاتو غيرها وانسونا من زرزرة الدنيا دي أدونا حاجة اكثر احترافية وتكفينا زرزرة الآخرة وطبعا ده مقرر لسة ما نزل تحت الطبع وهم ما حا يقدروا علية لأنو عاوز ليه ناس فاهمة بجد وبتعرف حقوق الناس

  15. هههههههههههههههههههههههه,,,زرونى فى كل سنة مرة ,,حرام تزرونى كل مرة !!
    لسان حال فلانة الماذيانا…

  16. الحبيب جنوبى…
    ههههههههههههههههههههههههههه,,عصرت على ود الفريق بلعتو سيجارتو ! بالغت لكن !

    بت وراق…
    والله سحرونى ! امس غاتس فى الشغل لا اضني ! احححححح

    1. حاج أحمد السلاوى | رد

      شنباتى .. عجبنى ليك زرة الشغل .. عشان تعرف نحنا كيف بنكون مزرورين الوقت كلو فى الشغل .. وإن شاء الله زرتك تطول وتطول وتطول ويخلصوا منك القديم والجديد .. يا قادر يا كريم ..

  17. ود المبشر…
    الدورات دى مهمة خالس خالس,,انا مفكر جديا اعمل ليهم واحدة مجانا ! بس هم يركزوا ويركّزوا

  18. على حس استعجال الزول فى القرايه يمكن ان تقراء عنوان المقال على ثلاثه صور
    علم الذره (علم الفيزياء)
    علم الذره (دقيق الكسره)
    علم الزرة (الزنقات )
    ومن البحث المطول خلال الليل وجدته كل القراءات صحيحه وتودى الى نفس القرض
    عندما تقوم الحكومه فى عمل (زنقات )للشعب فى عيشه (دقيق الكسره ) فسوف يقوم الشع صنع سلاح نووي لدمار شامل للحكومه المصنع من (الذره)
    عشان كده احسن للحكومه العمل على نصيحة اخونا جبرا قبل ان تجتمع التلاته زرااااات

      1. ياجماعه معليش عندى مشكله فى الكيبورد فى حرف الباء عشان كده نقطوا براكم

  19. سلاوى…
    سُب عليك !! ليييه كدة يعنى !!؟ انا طول عمرى بشتغل وبخلص فى عملى,,اهئ اهئ اهئ
    شحدت ربى يشغلوك بعد الساعة 12 بالليل كمان !

    بت وراق..
    هههههههههههههههههههههههههه,,والما عندو نقط يسوى شنووووو !؟

    1. شمباتي / بت وراق .. بمناسبة النقطة دي
      ابو اللمين قاعد مع العازفين وبيبرفو
      والمطرة داقة .. واحد من العازفين كان في
      مدني وجاء متاخر قال ليهم غريبة المطرة
      دي داقة من متين ؟ والله مدني ولا نقطة ما
      ما فيها .. ابو اللمين رفع راسو قال ليه
      عجييب مدني دي زمان كان فيها نقطة …

      1. ههههههههههههههههههههههه
        الشرطه ذاته خلت النقطه وبقت تكابس الناس فى الشارع

  20. ابو ياسر .. سلام ..مسطولك ده قول ليهو يغيّر
    الصنف !! الاصرار علي بقاء اسم السودان في
    الدولة الجديدة ما عبثا .. نحنا نشوف لينا
    اسم تاني ( دولة خاطف لونين ) !!ولآ اقول
    ليك ( دولة المتجهجه الاممي ) لحدي ما نحدد
    الهوية ونشوف نتبع لياتو أمة ..
    المندهش .. 44 سنة !!؟ خشمك فوقو السُكّر ..
    شمباتي .. ود الفريق سأل عن الشباك تاني الا
    ترجعوا انت @ كوكو للقولد ليف …
    كوكو .. الحلّ زرّت شمباتي يحلك ..
    لاكين الحكومة دي زرّتنا زرّه !!!

  21. ياسين شمباتى | رد

    هههههههههههههههههههههههه,,,ود الامين بالغ لكن !! مدنى كلها نقاط ! وى وى وى ……
    وعن عودة ود الفريق لى شباكو,لع والف لع,لااااااااااااااااااااااااع

  22. الحبيب شمباتي ……….
    حمدا للة علي سلامتك, و ليك وحشة…..و الجاتك في زرزرتك سامحتك
    الأخت بنت وراق أحسن عشان كل شوية نقول ليك ختي النقط فوق الحروف.

  23. الما عندو نقط على الباء يا بت وراق – يتحرفن ويكتب كلام ما فيه باء – يعني بدل سب عليك قولي تجيك الكشة مثلا – أهو اتعلموا اطلعوا من الزرات الزي دي

  24. الحبيب ود المبشر….
    الله يسلمك يا حبيب وما يوحشك غالى,,لكن باذن الله بعد افضا من زرتى دى بجى ازر ليك الجماعة ! اممممممم..
    وما منى يااااا ست الحروووووف..

  25. ديل إزرهم الا نام لا أكل طعام…….قادر يا كريم…….

  26. دحين تانى في زره اكتر من كده والله بس زره كلب في غرب القاش وعقب المعارف المثل ده يقول عشان نشرحو ليه بسهاب

    امتي الله الله يصبرك والجاي زراتو كتااااااااااااااااااااااااااااااااااااااااااار

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: