أخبار المقعد شنووو؟

عندما شغر مقعد السيناتور باراك أوباما فى مقعد الشيوخ الامريكى نائباً عن ولاية ألينوى بعد فوزه بمنصب الرئاسة كأول رئيس أسود فى تاريخ أمريكا، خول القانون للسيد روغوفيتش حاكم الولاية تعيين بديلاً لأوباما ليكمل الفترة المتبقية حتى حلول موعد الأنتخابات القادمة. ولكن قام السيد الحاكم ببيع المقعد لمن يدفع أكثر و قبض الثمن. واذا بالموضوع يتكشف فى ظل الشفافية و حرية الصحافة و يقبض على الحاكم من منزله و أمام أطفاله و يكبل بالأغلال و يقاد الى الأعتقال بانتظار المحاكمة.، وفعلا بعد محاكمة عادلة جدا أستمرت شهورا عدة حكم على الحاكم السابق بالسجن لمدة 15 عاما فى السجن الفدرالى بولاية كولورادو، وذهب الى السجن حبيساً.
بعد أن قرأنا الخبر (بالأمريكي) تعالوا معي – ايها القراء- لنتخيل (النسخة السودانية) منه :
عندما شغر مقعد (فلان الفلاني) بعد إقالته خول القانون للسيد (علان العلاني) تعيين بديلا له ليكمل الفترة المتبقية حتى حلول موعد الأنتخابات ولكن قام السيد (علان العلاني) ببيع المقعد لمن يدفع أكثر و قبض الثمن .. القصة في (أمريكا) إنكشفت لكن هنا عندنا القصة ما ح تنكشف بأخوي وأخوك لانو نحنا عندنا حاجة إسمها (الجريمة المنظمة) أو إن شئت (المتكتكة) .. يعني روغوفيتش بتاعنا ما بيكون براهو كل واحد من حاشيتو بيكون عندو دور في (الشغلانية دى) .. واحد بيتولى قصة الإعلان بأنو في كرسي شاغر وعاوزين نبيعو وكده .. والتاني بيكون مهمتو المفاوضة في السعر .. والتالت إستلام القروش وكده .. لذلك فالمسألة بتكون آخر (تعتيم) ولن تخرج إلى النور إلا بسبب واحد من إتنين .. يا تحصل (دقسة) يا (يختلف اللصان) !
إذا القصة إنكشفت رغم التعتيم واللا شفافية و(الغمتي) وتسربت إلى الصحف التى سارعت بنشر ملابساتها وتحصلت على مستنداتها ح يتم حظر النشر في القضية (طواااالي) بحجة عدم التأثير على العدالة .
بعد أن يتم الحظر سبدأ الجماعة في (الجودية) و(فقه السترة) وحتي لا يتساءل سائل (أخبار المقعد شنووو) يتم الإعلان في الصحف عن تشكيل لجنة للتحقيق في الموضوع (نظام محاربة فساد وكده) و بعد سبعة .. تمانية شهور .. سنة.. سنتين كده تعلن اللجنة عن الإنتهاء من مهامها وأنها قد قامت برفع نتيجة التحقيق إلى مفوضية الفساد .
عند إستلامها لملف نتيجة التحقيق تقوم مفوضية الفساد بدورها بإنشاء لجنة لمناقشة نتيجة تحقيق لجنة التحقيق وبعد أن قامت لجنة مناقشة نتيجة تحقيق لجنة التحقيق من الإنتهاء من عملها (بعد كم شهر .. سنة .. سنتين كده) تقوم برفع تقريرها النهائي لوزارة العدل والتى بدورها تقوم بتشكيل لجنة لدراسة نتيجة تحقيق لجنة التحقيق التي قامت بها مفوضية الفساد و(بعد كم شهر .. سنة .. سنتين كده) تتوصل لجنة تحقيق نتيجة التحقيق إلى ضرورة إستدعاء المتهم السيد (علان العلاني) ولكن نسبة لصعوبة تحرك السيد (علان العلاني) فقد رات اللجنة الذهاب لأخذ أقواله بمقابر احمد شرفي !

كسرة :
ونحنا حكينا القصة دي ليه؟…… عشان نعرف قصة (لجان التحقيق) دى آخرتا أيه !

كسرة ثابتة :

أخبار خط هيثرو شنو(ووووو)؟

Advertisements

21 تعليق

  1. برنجية يا شمباتى

  2. السلام عليكم ، البرف و الاخوان ، البرنجيه حنعمله مشترك ، زى شهادة الاساس ، 9 قفلو النمره ، معقول ، و سووا شنو فى الانشاء ، لقوا المصحح عامل واحده بى كرت ………… عجبى

  3. البروف والسمار . صباح الخير .
    المقعد الفاضى دة عندنا جديد لأنو ماكان عندنا مقاعد بتفضى وعلى العموم موضوع الاستقالات دى حاجة دخيلة علينا ويجب وضح قوانين للمقاعد الفاضية من هنا وجاى .
    أما لجان التحقيق فهي طويلة البال وشغالين بى المثل البيقول (أكان غلبك الصبر .أصبر شوية …)
    الله فى …

  4. الاخ شمباتي الظاهر مستني واحدة من الوظائف الشاغرة,عشان كدة عايزين نلم ليه جايز العملية عايزة شوية فلوس و زي ما قال البروف لجان في لجان نكون كلنا لحقنا أمات طة………..
    كسرة جديدة : أخبار الوظيفة الشاغرة شنو؟؟؟؟؟؟؟

  5. السلام عليكم ، البرف و الاخوان ، المصطفى صلى الله عليه و سلم ، و هو قدوتنا ، قال ليه بالبلدى غديل كده امشى اقعد فى بيتكم و شوف كان يهدوا ليك و قلع منو الهدايا ، اهه نحنو نقول كدى امش اقعد عند امك و شوف اكان تسوى ليك ( حوض تعوم فيهو ) ، سعال : زمان كنا بنعرف حوض الجامعه و حوض سودان كلب ، حسه بقى فيها احواض take away ………….. عجبى

  6. يا كرم الله عذّبتنا ………..
    حنين .. المشكلة ما في ادب الاستقالات المشكلة انو
    بعد كده كل ما ننتخب واحد تقوم الحكومة تعذّبو
    وتكرّهو لحدي ما يقدم استقالته عشان تجيب بدله
    واحد تاني بدون انتخابات ..!!!
    انت حاكمك زي بعاتي يعشق الموت والحرابه
    شِدة الفساد مابدورو التقول بينم قراابه!!

  7. البروف والحبان سلام
    والله أنت يالبروف طيب طيبة شديدة خلاس
    إنت من زمن بيكونو لجان تحقيق !!!! ده كان زمااااان يابروف
    دلوقتي ناس أبو قناية سريع المفعول والقضايا سريعة الذوباااان ومين قال في تزوير وفساااااااد ؟؟
    مريسة ساااااااااااااي

  8. حاج أحمد السلاوى | رد

    يا جماعة الخير الرئيس المشير عمر البشير قال ليكم العندو إثباتات بالفساد يتقدم بيها للجنة الفساد (عشان يطلعوا روحه تحقيقات ..وما يعرف كيف يتخارج .. ويحرِّم تانى يقول فى فساد )..
    عاوزين نعرف نتائج لجان التحقيقات .. غزو أمدرمان .. مقتل عوضية .. إحتلال هجليج .. شركة الأقطان .. مصنع سكر النيل الأبيض … وخلافه من اللجان الكتيرة ..
    ممكن يا ابو قناية ؟

    1. ياحاج سلاوي
      ابو قنايه!!!!!!!!!!
      دا قنايه قايمه وقنايه نايمه

  9. اخي جبرا والعقد الفريد
    اقتباس
    ونحنا حكينا القصة دي ليه؟
    عشان نعرف قيمة الجنيه وبما ان الجنيه مااااات وشبع موت كل المربوط معاهو برضو يكونوا من الاموات عشان كل الفساد دا سببه الجنيه من ما قله عندهم الجماعه بدوا يفرفرو
    انت قايلوم استقالوا براهم ياخوي دي سياسة مدروسه وتسريح منظم وانسحاب تكتيكى من الصوره
    وكلها اشياء مفبركه عشان عرفو اقتراب سحب البساط من تحت اقدامهم

  10. طارق بابكر عبيد | رد

    الأحباب ،
    سمعت انو في امدرمان في شيخ طردوهوا ناس الحله اها ده ح ياخد مقعدو منو اذا استقال ، سؤال بريء

  11. عاااااادي الجديد شنو يابروف واحد حلف بالطلاق ضيع علينا كاس افريقيا والتانى امو قالت ليه ما عافيه منك كان شيلتا الزول ده

    كسره مني انا
    دحين اووووووووووووووب علينا وسجم خشمنا

  12. والله ياجبرا ياخوي كلامك في اللجان دا زكرني مقال سابق ليك عن عبد القادر
    عشان كده بقول ليك دي ما بتجى ودا الجننا ذاتو والمشكله نطلع وين صواني مافى

  13. كلمة لجنه يعني واحد من الاتنين (لا جنه ) او(لجنه انتهي من حكايتها خالص)

  14. اخونا جبرا — والسمار – حياكم الله
    انت يابروف زمان مالعبت لعبة الكراسى فى المسابقات المدرسية وكدة — عندنا الكرسى متى ما اصبح شاغرا يتكالب عليه سمان القوم انبطاحا وتسلقا حتى يتكرم به عليهم سادتهم فيصبح موضوع البيع قد تم بالترضية وبالتالى لن يكون هناك بلاغ من اصلو —
    كسرة ==
    ساكت شايل حال الجماعة فى بيع خط هيثرو — اهو احبابنا الامريكان اخدو منهم نقلة وباعو ليهم حتة مقعد

  15. هههههههههههههههههههههههههههه,,,هنا كما ببيعوا !!؟ ابدا وطبعا لا,ديل بهدوا الكراسى سااااااكت,,يعنى فلان دا كدى النهديهو كرسى ولاية احم احم ! وفلان داك كرسى معتمدية احم احم ! وفلان دااا كمقعد وزارة دفاع احم احم ! وااااااااى

  16. حنين ….سلام…
    مبروكة عليك لكن اعمل حسابك ما تكررها تانى ّ (عين بتحمر ليييك) !!

    كوكو..سلام…
    دى حُمرة عين منك !! تقالع الراجل فى برنجيتو !!؟ امممممم

  17. ود المبشر….سلام…
    تشغر وين بس عليك الله !!؟ ديل ما بدوا فرقة,,لكن كان ودونى وزارة الاعلام فى الكرسى دااااك يكونوا ما قصروا ! اححححح

  18. مقعد إيه وسرير إيه؟ بس ده الباعوهو وقبضو ثمنو؟ كل البلد اتباعت … وليس الحاضر فقط وانما باعو كل شيء في مستقبل البلد يمكن ألف سنة لقدام…. وأنت ما هاميك غير بنبر ست الساي؟ وتقارن بلدنابأمريكا بدلا من أن تقارنها بالصومال مثلا….we are no.2 in the failed state index

  19. قربتك مقدودة. وانت تنفخ ومئذنتك ما فيها ميكروفون يسمع. مش في مالطا لو رفعتها في نهاية شارع القصر أيضاً. والساقية مدورة طبعا ساقية جحا ومال إيه.

  20. اها دحين شوفو لينا مقعد نشترى بس يكون هبابى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: