جابت ليها إستحاء

يقول عن نفسه في لقاء أجرته معه صحيفة الصحافة بتاريخ 4 مايو 2012م ً (أنا اسمي دفع الله حسب الرسول البشير، من «اهلكم الجموعية» في محافظة ام درمان وعضو في البرلمان منذ بدايته وموجود في كل دوراته واعمل استاذا بجامعة افريقيا العالمية في كلية التربية الآن عضو في لجنة العلاقات الخارجية ) !
لمن لا يعرفه فهو العضو البرلماني صاحب المبادرة في إلغاء حفل الفنانة المصرية (شيرين) والذي كان من المفترض أن تحييه بإستاد الخرطوم والذي تزامن مع أحداث هجليج ، الحوار المذكور أعلاه والذي شمل عدة نقاط تستحق كل واحده منها الوقوف عندها طويلاً إلا أن هنالك نقطة مفروض الزول (يعسكر فيها) عديل كده .. إذ أجاب العضو البرلماني عند سؤاله إن كان عدواً للمرأة بقوله :
– انا اتحدى اي زول يقول كدا انا متزوج ثلاث نساء الحمد لله ما زي واحد عمرو 60 سنة ماسك ليه في مرة واحدة وما بستحي.
أي والله – عزيزي القارئ- ومش كده وبس بل أضاف (أكرمه الله) قائلاً (الراجل أصلاً ما مصمم لي مرا واحدة)
كدي تعالوا معاي نمسك حتة (الإستحاء) دي وبعدين نجي لي مسألة (التصميم) .. السؤال الذي يفرض نفسه بالطبع هو (نستحي من شنو؟) وهل مسألة إنو الزول (ما يتزوج كلو كلو خليك من متزوج واحدة دي خاجة بتخجل وتخلي الزول يستحي؟).. وماذا يعيب يا شيخنا (لدرجة الإستحاء) أن يكون الزول ماسك ليهو في مرا واااحده ؟ أليس افضل من أن يكون لدية عدة نساء و(كورجة أولاد) مشتتين هنا وهناك ؟ وكيف يتسنى لهذا (البستحى) أن يقوم بالإشراف على هذه الأسر جميعها والتعرف على مشكلاتها ومتابعة سلوك أفرادها؟ خاصة في هذا (الزمن الردئ) الذي تصعب فيه إدارة الأسرة الواحدة ؟
ألا توافقني يا شيخنا بان الإسلام يدعو إلى الاسرة القوية المتماسكة وأن هذه الدعوة (الآن) لا يحققها (مع مشقة) إلا (الزول الماسكك ليهو في مرا واااحدة) خاصة في هذا الزمن الممحوق حيث اليوم أصبح بضع دقائق .. والغلاء الفاحش (طلب الفول بخمسة ألف) والدخل المتدني (إن وجد) !
يا مولانا … تعرس تلاته تعرس سطاشر دي حاجة بتخصك إنتا لكن نحنا نعرس واحده نعرس (نص) ليس من حقك أن تطالبنا بالخجل والإستحاء فنحن يا شيخنا – بإفتراض أيماننا بالفكرة- لسنا (نواب برلمانيين) ومخصصاتنا (الما هية؟) بالكاد تكفينا (لحدت يوم خمسة) .. لا تعرف موائدنا اللوزينج والفلوذج والثريد .. نحاول ألا يمرض واحد من الاسرة (الواااحدة دي) حتى لا تنكشف سوءة (فقرنا) وخلو (أرصدتنا) بل (ثقوب جيوبنا) وعند الأعياد (نشيل هم) ملابس أطفالنا الذين لا يتعدون نصف أصابع اليد الواحدة (النص رضيع وكده) .. أما عن (خروف الأضحية) فقاعد (يجرسنا عديل كده) .. فما بالك لو (تلاته خرفان) رعاك الله ؟ وبعد ده كلو القصة جابت ليها (إستحياء) !
لا شك عندي أن الراغبين في التزاوج مع أكبر عدد من النساء لهم في تبرير رغباتهم هذه صور شتي وهي تبريرات كلها فطيرة (وما بتخش الراس) فهم مثلاً يقولون أنهم بذلك يساهمون في تدني نسبة العنوسة مع إنهم لا يتزوجون ممن فاتهم القطار بل ينتقون صغار السن من الأتراب الكواعب ! وبعدين لو أصلو القصة تخفيض نسبة عنوسة مش كان الأجدي بهم أن يقوموا متبرعين بأموال (زيجاتهم هذه) لتزويج أقربائهم أو جيرانهم من الفتيان الذين لا يستطيعون (الباءة) !
عزيزي القارئ .. نجي لحتة (التصميم) إذ أفاد العضو البرلماني (طبعن بعد إطلاعه على الكتالوج) بأن الراجل أصلاً ما مصمم لي مرا واحدة وهذا لعمري زعم (غريب وعجيب) يتطلب منا الرد عليه بصورة لا تؤثر على الهيكل المعدني الذي يغطي عجلة تغيير السرعة حتى نمنع إنزلاق المكابح فيتأثر (الدفرنش) !!

كسرة :
قال أيه (تصميم الراجل) … هههههه .. والله يا مولانا إنتو لو عاوزين تبرروا ليكم حاجه ما بتعدموا التبرير !!

كسرة ثابتة :
أخبار خط هيثرو شنو(ووووو)؟

Advertisements

52 تعليق

  1. برنجى والحمد لله

    1. سريع سراعتا !! مبروك يا ابو سريع ..

  2. برنجيييييه !!
    الراجل مصمم لي نص واحدة لانها لو اشتغلت بالطاقة القصوي الا نجري !!!
    أأأأأأأأأأأخ يا برلمان البلمان …

  3. السلام عليكم ، البرف و الاخوان ، انا مع الراجل ما مصمم لى واحده ، بل 10 ، مفرد 1 مثنى 2 ثلاث 3 ورباع 4 ، يبقى 1+2+3+4=10 ، البلد دى كان ما فيها 500 مليون فرد لزراعة الارض و تربية الحيوان و التصنيع و التشغيل و الصيانه ثم الاختراع فما فى فايده ، ونملا الواطه دى والا حتبقى هامله لمصر واثيوبيا و اخيراً الجنوب ، و اذا كان الغلا عامل مشكله فده لاننا مادين كراعنا بره اللحاف ، يا برف كدى افتينى فى الشاى و البيبسى و الموبايل والبيره و الرغيف بتاع شرنوبل و البروميد ، التترون و الملابس الجاهزه ، العربات الماليه البلد ، العمارات الفاجره و حمامات السباحه فى البيوت ، التلفزيون و التلاجه و الغساله و المكيف ، الكهرباء اللى بنلعب بيها الكوره و اى فريق درجه 100 يغلبنا و من اصلو الكوره لازمتها ايه ؟ والخروف هل طقوس دينيه ؟ الرسول صلى الله عليه وسلم ضحى عننا ! ولو كانت عاده فبئس العاده ، و السكر المجرسنا كل رمضان و حاقر بينا ، اهه السنه دى انا قررت اذا لم ياتى السكر الى صاغرا فلن استعمل اى شراب فيه سكر سعال: التجار من حسه بلبدو فى السكر لانو حيبقى الكيلو بى 10 جنيه ………………… عجبى

  4. عجييييييب والله !!!! وأنا من زمااااااان كنت مفتكر الراجل مصمم لواااااحدة
    يا دفع الله بالله إستحي على نفسك إنت يا بتاع الكبوريا والكافيار يا ولد يا لعيب ههههههههه

  5. جنونى ، شن نسوى اكان ما عجلت ما كان ختفه د/ شمباتى خطفها ، خطفها ، خطفها ، و كنت محقب يدى فى المبروك …………… عجبى

  6. كوكو…….. جنوبي صباح الفل
    ممكن تخميسة …. عشان أمخمخ كده وأفهم دفع الله الجموعي ده بيقول في شنو ؟؟

  7. د. دفع الله عندو آراء جريئة في برنامج اغاني
    واغاني وفي حفلة شيرين ومراعاة مشاعر العساكر
    الفي ساحات القتال وحاجات كتيرة عجبتني فيهو
    بس ما لقيت ليهو رأي في الفساد الحاصل في الحكم
    ولا لقيت ليه رأي في الحتة بتاعت رواتب ناس
    البرلمان وليه رئيس البرلمان ياخد 31 مليون في
    الشهر والنائب 30 مليون ورؤساء اللجان 14
    مليون والاعضاء 4.500 مليون مع انهم بشتغلوا
    زي كم ساعة بس في الشهر والموظفين بيشتغلوا
    240 ساعة في الشهر وياخدوا 450 ألف بس !!

    يعني 450 ألف دي يعرسوا بيها اكتر من مره
    كيف ؟ اعملوا الحد الادني 4مليون وشوفوا
    كان واحده بارت !!
    بالله هو يعني مشكلتنا كلها في العنوسة
    والله السودان ده مشكلتو ساهلة خلاص !!

  8. الزول دا دخل البرلمان عشان يتابع أمور النسوان والفنانات وبعدين هو شاف شيرين دى وين؟ اذا ما كان دايما ببحلق فى التلفزيون عشان يلقى ليهو مرأة رابعة وبدل الأهتمام بقضايا الشعب الأساسية من جوع وفقر ومرض وفساد متفرغ لشيرين وأغانى وأغانى بالله الما بتسحى منو هسه؟؟؟؟؟؟؟؟؟؟؟؟

  9. ههههههه البرلمان كلو زي دفع الله ده مش ديل البصفقوا للمضره

  10. الناس في شنو الحسانيه في شنو

    1. هههههههه،يا صلاح الدين هسع الحسانية دخلهم شنو؟ الزول دا ما عرف نفسو وقبيلتو … كلام دا زى رد الفنانة السألوها انت بتعرفى بتعرفى تقرئى ردت على السوعال وقالت لا وانا اخوى الـ …. !!

  11. ده ما دفع الله ده دفع امامي ويا جبرة زمان اليابانيين خلو الدفرنش

    1. بركيه سلام ، ياخوى الدفرنش ده اهم عضو ، اوعك تعرس ليك شحطوطه لابسه جينز زى السوط …….. عجبى

  12. الحمد للة نحن من الموحدين ما من جماعة المشركين (أكثر من واحدة)…..ربنا قال في آخر الأية ما معناة لن تعدلوا…
    سؤآل للمدعو دفع اللة : ما هو الدليل علي أن الرجل مصمم علي أربعة ؟؟؟؟؟؟؟لأنة قدر دراستنا في الطب ما قالوا لينا الحكاية دي!!!!!!!
    حينها سنقوم بدراسة الأمر حتي يضاف إلي رصيدنا في الإكتشافات!!!!!!!!

    1. ود المبشر سلامات
      انت الطب قريتو بتين حدد الزمن قبل ام بعد الانقاذ
      اذا كان قبل الانقاذ الانسان انسان والتصميم كما قرات واما اذا كان بعد الانقاذ فان الانسان قد تحول الى حشره ولذلك تحوله تصميمه

  13. يا دفع الله بس ورينا كيف بتصرف على الثلاثة ديل ايدينا المعادلة واوع تقول أنك مسكنهم فى بيت واحد ودي حا تكون كضبة لان المعروف انو نسوان الجماعة ديل ما بي سكنوا الا كل واحدة فى بيت براها ما عارف راتبك ومخصصاتك حا تكفى شنو كهرباء ولا سكر ولا رواتب خدم وخلافو الا كان الحكومة بتديكم مع الراتب والمخصصات البلهبل الأكل ناشف وكده .ياخي اختشوا شوية .. المفروض انت تستحي اولا لأنو السعال حا تصعب اجابته والا تكون حاوي عدييييييييييل بس يظهر الهبش مريحكم وكده .. أدونا فرصة معاكم وحا تشوفوا زي ما قال جنوبي كان لقيتوا واحدة بائرة تاني … صحيح الا ختشوا ماتوا زمان من ناس ديل وا اسفاى

  14. تيب كلام حلو زي العسل بث خلي يمشي لى الزول دااااااااااك ابو ثلاثه عشان يمشي الشارع

  15. حاج أحمد السلاوى | رد

    الإستحوا ماتوا … زمااااااااااااااااااااااااااااااان ..

  16. اخخخخخخخخخخخخخخخ خخخخخخخخخخخخخخخخخخخخخخخخخخخ
    من اين اتى هولاء (المصممين )

    1. بت وراق ، راجل المره …………………………………………………عجبى

  17. هو عضو في لجنة العلاقات الخارجيه عمل ليهو تلاته
    وهو الان منتظر تعينه فى لجنة العلاقات الدوليه لتكملة التصميم (رباعي الدفع )

  18. ياجماعة الخير انا الليله محتاجه لبرنجييييه عديل كده ااااااااي برنجيه
    دايره اقعد غلط وافهم صااااااح
    1-دفع الله دا عضو فى البرلمان وحاااضر لكل دوراته يعنى زول متواجد دايما
    2- استاذ بجامعة افريقيا يعني المفترض يكون متواجد دايما (ما محاضرات وتحضير وكده )
    3- عضو بلجنة العلاقات الخارجيه (انا يادوووب عرفته سر الجان دي )
    4- وعضو فى لجنة تلاته حريم (ومن المفترض ان يكون متواجد دايما )
    السوال هو ………دفع الله دا بيلقى زمن للصلاه بتين

    1. ما دا المجنني !!!!!!!!!

  19. هههههههههههههههههههههههههههههههههههههههههههههههههههههههه,,انت يا بروف ما وقفت فى حتة انو قااااعد فى كل الدورات دى ليه يعنى !!؟ انا مغستنى خالس خالس

    1. ياسين شمباتي
      دفع الله دا مايديك تصمبم واااااحد ويخلى لنفسه التلاته
      اممممممممممممممم

    2. حاج أحمد السلاوى | رد

      شنباتى إنت مصمم على كم ؟ خوفنا تحصل ال 60 سنة وما تلم فى نص مرة ويطلع تصميمك تايوان ساكت … حصل نفسك عاوزين نفرح بيك قبال ما زولنا دا يسوى الرابعة ..

  20. الحبيب كوكو….سلام…
    شينة منك لكن ! شحدت ربى الدفرنش باليقع فوق راسك المدوقس دا !!

    1. يا بختو وبخت التداعيهو ..!!
      ماشه معاك يا كوكو.. برنجيه وهناي …

      1. السلام عليكم ، د/ شمباتى احسن ليك تحصل ، و الا ما حتخش مجال التصميم ، زى ما قال ليك حاج السلاوى ( عندى ليك عروسه ماهله ، و كان قلت ليك دايره داك وديك الا عكازى ده ياكل راسها ، لكن بينى وبينك نحنو المابتدلع ما لازمانا ) ، شنو ليك يا جنونى ؟؟؟ …………..عجبى

  21. البلقى هواهو بضري ..زولنا دا لو مصمم على اربعة معرس تلاتة مالو؟ ما يتمهم أربعة .. ولا دي خاليها للظروف الطارئة .. الناس ديل فجروا في مغستنا .. أرحمونا وخافو فينا الله .. الله لا رحمكم .. !

  22. العنده الحنة … هو لو ما عنده ما كان اتفلسف واتبجح وكان استحى

  23. الأخ أب أحمد …
    يا أخي أصبر شوووية غنائم الحرب ا\لخيرة لسة ما وزعت وصاحبنا منتظر نسوا ن الشهداء من أخوات نسيبة أ خخخخخخخخخخخخ

  24. ياسين شمباتى | رد

    بت وراق..
    بريييييييييييييييييييييييييييي,,قبلو وحدو,,انا مصمم انى افضل كدة ! صامت وصامد ! واااااى…

    حاج السلاوى…
    هييييييييييييييييي,,خليك فى ورقك,,خلاص جاى تغتس حجرى !!؟ صعب صعب يا على….

    1. اذاً انت عدو للمرأه

  25. هو في شغل عشان الواحد يعرس عروسة مولد حتى !!!! الزول ده خرف ،،،عشان زي فهمه ده بنات الناس قلو ،،كل يوم خمسمية شافع جاي دار المايقوما والباقي الكلاب تأكلهم في الخور,,,,
    وبعدين بي وظائفه الكتيره مايخلي لينا حاجه معاه,,تلقاهو ماسك الشغلات الكتيره دي زايغ من نسوانه ،،
    في مبدأ لو عرسته واحده ما بترتاح من نقتها الا تجيب التانيه ،،،والاولى مابترتاح الا تعرس فوق التانيه عشان تضوق المر زي ما هي ضاقته لمن وافقت على راجلها ،،،اها بقى البمبر ما بتقدر تقعد فيه بي 3 ارجل ( او الركشه ما بتقدر تقطع الكبري) عشان كده تقوم تجيب الرابعه ،،،فأناشد الحاج متولي بتاع البرلمان ده يجيب الرابعه عشان يتمكن في القعده ويترقى من بتاع ركشه لي بتاع عربيه 4×4

  26. ياسين شمباتى | رد

    جنوبى…
    هههههههههههههههههههههههه,,بختى بيك انا والله,,,,بس الهناى دا ما تكتر منو ! امممممم..

    المندهش…
    شلتها من كيبوردى ّ شحدت ربى يشيلو الشيال الما براعى لى اهل ولا عيال ! ترااااااح

  27. ياسين شمباتى | رد

    انا !!؟ حرام عليك,دا انا معاكم والله

  28. بت وراق………سلام
    الحمد للة قريناة قبل الإنقاز زمن الناس كانت مصممة علي واحدة (يعني موحدين وكدة)
    شمباتي : شنو طولت كدة ؟؟؟ الظاهر محتاج ليك دروس ولة ساكي موضوع التصميم؟؟؟
    أوعك تتهور تقوم الواحدة دي تطير…….

    1. سلام ود المبشر ، ما تتمها ، سفتك ، اصلو الواحده هى البتطير السفه و اتنين يطيروا الفى الراس ، و تلاته يادوب ترتاح و تاكل تفاح خصوصا لو كانت فى وزارة الماليه ، محل الغرف ، ولا سودابت محل البترول ……………….عجبى

  29. الاخ كوكو….سلام
    مالك نسيت الرابعة ؟؟؟
    يادوبك المكنة ترتاح (نظام الجيربوكس عادي) لكن لو أوتومتك تعشيقة واحدة بتوصلك أمات طة….

    1. الرابعة تكون مواصفاتها كالاتى:
      1- لازم المكنة تكون جاز(انا ما بفسر وانتو ما بتقصرو).
      2- فل اوبشن
      3- مظلله (اللون ابيض وبتلبس عبايات…)
      4- وارد الجزائر … لانو اجازوا قانون ممكن تتجوز مسيار … وذلك للارتفاع نسبة العنوسة
      5- اتومتك يا ود المبشر الظاهر عليك ما سقت الاتومتك فى المسافات الطووووويلة مريح شديد.!!!

  30. ود المبشر…سلام..
    انا مصمَت !!!

  31. كوكو…سلام….
    امممممم,,تدفعوا كم ؟؟

  32. بالرغم من انى جموعية ابا عن ام من غير خلطة تانية لكن ماعندنا راجل بفكر ذى عمنا بتاع البرلمان دا !!! وعندى سؤال ليه اهو ازوج التانية والتالته متين؟؟؟؟!! قبل مايدخل البرلمان ولا بعد ما اصبح برلمانيا ؟!!!

  33. ياسين شمباتى | رد

    ود الزبير..
    بالاشارة للفقرة رقم (1) : شكلك عايز تجيب بوستك دااااك بى جاى !!

  34. السلام عليكم …
    لقد قرأت ما جاء في اللقاء الذي ذكرته سابقا ، و بصراحة من شدة عجبي أصبت بحالة من الصدمة !! و تذكرت حديث الرسول صلى الله عليه وسلم الذي يتحدث فيه عن آخر الزمان و يقول فيما معناه : أنه يأتي سفهاء القوم و يتحدثون في المجالس و يخطبون بالناس …
    للأسف هذه العقول ما زالت موجودة … و العجيب في الأمر أنها موجودة بقوة و ( بمركز أيضا ) ، و أنا حقيقة لم أشعر بألم أسوأ من أن ترى من يفتي بمثل هذه العقلية … و يجر وراءه الكثير من الباحثين عن الأعذار .. لا الحقائق .
    و يؤلمني كيف نربي أبناءنا دون وعي منا على هذا الفكر … حين كنا نحن أجدر بالحكمة من غيرنا …

    رسول الله … لا تعلم ماذا أحدثنا من بعدك …

    و الشكر موصول لك أستاذي الفاتح جبرا .

    1. والله ماظنيت في اسفه منك

  35. جبرا = خالد مدنى – سنكل = نيام = ابكرون – سلاوى – عزت – استرايكر – طارق اب احمد – ودالخلا – ودالمهدى – مخير – ودالزبير – سهيل — وشخصى – مصممون على الاحاد فقط — اما شمباتى مازال تحت التصميم وافليقا قد اصبح ثنائى الدفع لكن عبر ترس وليس اوتو ماتيك — الله يصرف دفع الله ويجعل هلاكه فى تصميمه

  36. انا مصم جدا جدا !!

  37. بعيدا عن التعنصر الذكوري لكن المره كان ما ختت الرحمن في قلبا راجل واحد ما بيكفيها خليك من تلت راجل !! يمكن نحنا الرجال نقدر نعدل في الصرف لكن في الصرفه ماااااا أظن !! ..
    قصة حقيقية حصلت في قريتنا :
    راجل متزوج مرتين واليوم كان علي المره الكبيرة عملت في العشاء ( حمام ) الراجل بعد اكل الحمام استخسروا في المره الكبيرة وانتهز فرصة انشغالها بالتحسينات البديعية وكب الزوغة ومشي للمره الصغيرة , الحاجة جات لقت الراجل مافي , طوالي مشت ليهو في بيت المره الصغيرة , لقت عمنا منسدح قالت ليهو : شوف يا … يا تمشي معاي هسع دي , يا تطرش لي حمامي هنا ..!

  38. ود البشير (المسكين) | رد

    والله عجبتني فلسفلة التصميم دي والله الزول ده المفترض البلد تستفيد منوا اكتر من كدة (مع العلم هو اصلا مستفيد منها ) لي درجة عندوا 3 حريم والقبلوا كتار لاكن ياخوان التصميم دة اظنوا بجي رسالة خاصة لجماعة المؤتمر الوطني والجماعة البلقوها بالساهل وصلا موصفات (التصميم) دي ما بتتلقي الا في الناس الاقنها باردة اس الراجل قالوا قالوا اخد التالتة (البشير الممامسكين ) ولسة والله ما معروف (مصمم) لي كم والله نحنا بقينا انا ومرتي ذي الاخوان لانوا اخوك بشيل همك وانت بتشيل هموا ونشيل هم بعض والاولد لهم (ماكتار)والغريب كان قلتة لي مرتي داير اعرس تانية والله حا تضحك ضحك عارفين لي ههههههههههههههههههههههههااااييييي
    الباقي تمو خيال

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: