ما طنشونا وكده !

قصة رائجة حدثت في مدينة عطبرة قبل سنوات عديدة .. تحكي أن أحد الباعة المتجولون كان يبيع الباسطة والكنافة والبسبوسة وما لذ وطاب من السكريات والنشويات وقد إشتهر صاحبنا بترويج بضاعته من خلال ترديده لبعض العبارات مثل (ما بالسمنة وكده) و (ما حلوة وكده) ، (ما سكر وكده) ، ما عسل وكده !
ما لبثت عبارات صاحبنا هذه أن صارت نوع من (المشاغلة) يستخدمها الشبان لمعاكسة الفتيات مما جعل المسؤولين يقومون بمنعه من ترديد تلك العبارات فأصبح صاحبنا يقف أمام بضاعته صامتاً وعندما يسأله المارة عن سبب صمته كان يقول اهم (ما منعونا وكده) فتلغفها الشباب هي الأخري ليتغير أسلوب المعاكسة من (ما بالسمنة وكده) إلى (ما منعونا وكده) !
عدد مقدر من القراء خاصة عبر صفحة التواصل الإجتماعي (الفيسبوك) يسألون العبد لله عن الكسرة الثابتة ومدي تجاوب المسؤولين معها وهل أدت غرضها في حثهم على عرض نتيجة التحقيقات لمعرفة من قام بسرقة (القرن ) أو ما يعرف بلغز إختفاء (خط هيثرو) !
كنت ولا زلت أجيب على هذا التساؤل بعبارة أشبه للعبارة التى كان يرددها (بتاع الباسطة) حيث أن ردى كان ولا يزال هو : ما طنشونا وكده !
الدولة بكامل طاقمها .. الرئاسي والبرلماني والأمني والعدلي لم تفلح هذه الكسرة الثابتة ذات (الواوات الخمسة) والتي إستمرت لمدة خمسة أشهر (وشوية) بتذكيرهم بأن الشعب السوداني الفضل يسأل عن نتيجة التحقيق ومعرفة أسماء (المتورطين) في القصة دي؟ !
إزاء هذا الطناش (الما عادي) فقد قرر (أصدقاء الكسرة الثابتة) والذين أقاموا لها موقعاً على الفيسبوك http://www.facebook.com/KasraThabta إقامة (الذكري نصف السنوية للكسرة الثابتة) والتي سوف تتم دعوة الفضائيات ووكالات الأنباء لتغطيتها .
تبدأ (المناسبة) بآيات بينات من كتاب الله الكريم تدعو إلى العدل ومحاربة الفساد تعقبها (وقفة حداد) على الشفافية حيث يقف الجمهور المتوشح بالسواد دقيقة حداداً على (إختفاء الخط) وصهينة المسؤولين بينما يحمل لافتات كتب عليها :
• .. الخط وينو أكلو الدودو .
• . الخط وين راح .. أكلو التمساح ..
• الخط كان وقع كتر البتابت عيب .
• . يا أمة ضخكت من خطها الأمم …
• الخط البجيب الريح أسرقو وإستريح ..
• كان عشقتا أعشق بط وكان سرقتا أسرق خط ..
• لا يستقيم الظل والخط أعوج !!

يعقب ذلك كلمة من (أصدقاء الكسرة الثابتة) تعبر عن مدى (حزن) وأسى (الشعب الفضل) لإختفاء (خطهم) ثم يلي ذلك فقرة قطع (التورتة) التي كتب عليها (لن ننساك يا خطنا) حيث يقوم بقطعها وإطفاء (نص الشمعة) ممثلون للفئات التالية :
– مرضي الفشل الكلوى الذين توقفت مراكز غسيلهم
– التلاميذ الذين لا يجدون وجبة الفطور
– المعاشيون الذين يساوي معاشهم الشهري 4 كيلو لحمة
– العاطلون عن العمل ممن زادت سنوان عطالتهم عن العشر سنوات
– المواطنون الذين تجاوزوا الخمسين ولم يستطيعوا اكمال نصف دينهم
بعد ذلك يتم إفتتاح معرض يضم عدداً من الرسوم الكاريكاتورية حيث نجد في احد الكاريكاتيرات مواطن يرفع يديه إلى السماء قائلاً : يا رب خليني أعيش تاني خمسين سنة عشان أحضر نتيجة التحقيق .. بينما في كاريكاتير آخر نشاهد أحد المواطنين يجلس أمام (وداعية) تخاطبه وهي تشير إلى (الودع) قائلة : الخط ده (إحتسبوهو) خلاس وحات عيوني ديل تاني ما برجع .. وكاريكاتير ثالث (بدون تعليق) نشاهد فيه طاولة إجتماعات يجلس عليها أعضاء لجنة التحقيق في إختفاء الخط وقد وضعوا على آذانهم (قطن) !
بعد أن ينتهي الجمهور من مشاهدة معرض رسوم (الخط) يبدأ عرض مسرحية (من سرق الخط؟) وهي مسرحية صامتة (بانتومايم) من مشهد واحد .. يفتح الستار لنشاهد كل المسؤولين على خشبة المسرح وقد علقت على صدر كل واحد منهم لافتة كتب عليها (ما أنا) .. وفجأة يخترق المسؤولين (مواطن) عاري الصدر .. نحيف (لمن عضامو ظاهرة) يتوقف في منتصف خشبة المسرح ثم يشير بأصبع يده إلى صدره وقد كتب عليه (أنا السرقتا الخط) ثم يقفل الستار !
بعد مشاهدة المسرحية تبدأ الفقرة الأخيرة وهى الحفل الغنائي والذي نستمع فيه إلى عدد من الأغاني (الجهادية) من شاكلة : ( أنا ليهم بقول كلام خط هيثرو خبرو نام) !

كسرة :
ما طنشونا وكده !

كسرة ثابتة :
أخبار خط هيثرو شنو(ووووو)؟

47 تعليق

  1. برنجججججججججججججججييييييييييييييييييييييييية ياياسين شمباتى

  2. برنجيييييييه
    كيتا فى ناس الصف الاول

    1. برنجيه مشترك …………عجبى

  3. خط مين ياعم الجاى تقول عليه ماطال انه الناقل نفسه راح غير ماسوف عليه
    وبقينا للاسف نقتنع ونقبل باى شي يحدث وكاننا نشوفها صغيرة لشي مجهول حايحصل لقدام
    فى اللحظة دى اتذكر كاريكاتير للاستاذ فارس بصحيفة اخر لحظة (مواطن ومسؤل ) انه المسؤل يقول الحكومة قررت ترفع العبء عن كاهل المواطن فيرد المواطن : قررتوا تفتحو الهجرة ؟؟؟؟؟؟؟؟؟؟؟؟؟؟؟؟؟؟؟؟؟

    1. لا . فى واحد مسطول سالوه عن خط هيثرو .. اه ده خطو مكعوج وأخير يجب واحد يكتب ليه

  4. والله ياسيدي الساخر لو بقت ال(وووووو)الف ما ظنيت بأثر الموضوع دا كتير فيهم علشان البسرق عينك ياتاجر دا زول ما بيخاف من من رب العباد فما بالك بي عبيد رب العباد
    لا اعتقد انو برجع تاني طول ما نحنا شغالين ب(فقه الستره) يعني كل لجنه تحقيق تقوم تستر الحرامي علشان الموضوع دا حرام وكدا وفي النهايه القروش قروش الشعب والخط خط الشعب والشغب ماعندو وج(ييييييييييييييييييييييييييييييي)ع
    الحمدلله علي كل حال حاجه تفقع المراره

  5. يا اخونا معليش حا أقول ليكم سر حدثني به أحد الواصلين في قصر جمهورية أمازونيا وحلفني ألا أفشيه ولكن لأن كلامكم كتر في الموضوع ده فلابد أن نخرس الألسن .
    أولاً الخط موجود وما إتباع وأدوهو لهناية على شكل أمانة . وكما تعلمون فإن ثورتنا المجيدة جاءت لتحتل العالم وتقوده وتم ذكر الكلام ده من البداية وإنتو وافقتو عليه ( نقود العالم أجمع دي ما سمعتو بيها ) ولأن عندنا مصانع للطائرات ( الصافنات ) فالجماعة قالو بدل نمشي بالطائرات المستوردة من بلد الكفار فنحن أحسن نصنع طائراتنا من مواردنا الذاتية نطير مما نصنع (وتطير عيشتكم معاها ) ويا أخوانا إنتظروا شوية وأحتسبو كلها شهر شهرين ويكون عندنا أسطول كامل من الطائرات الصافنات ونرجع ليكم خط هيثروووووو وكل الخطوط اللي إتسرقت وإنتو ما جايبين خبرا ….. سمعتو ولا لا

    1. حلوة من بلد الكفار دي .. ليه هم حا يصنعوا طائرة ذبح إسلامي ولا شنو

  6. الخط أدو لهناية ( الله يجازيني ما فاهمة أي حاجة ) عليكم الله فهموني

  7. البروف سلامات ومشتاقييين وكده ..
    انا عاوز اعرف حاجه واحده بس
    الخط ادوهو لهناية فى عيد ميلادا ولا فى عيد زواجا من هناى ولا عشان هناى مبسوط منها وبريد فنها ؟؟؟؟
    حتقولو لى ليه بتسال يعنى حتفرق شنو ؟؟
    حاقول ليكم لانو ناوى اهدى المرتين ديل حاجه فى عيد ميلادم وعاوز لى فتوى عن جواز اهداء خط ( كامل ) فى عيد ميلاد مره ( ناقصه ) ( عقل ودين ) !!!
    تحياتى للجميع

  8. صديقى س بعد ان قنع من خيرا فى البلد قال لى :
    يا افليقا انا مسافر لانو قنعت فى البداية كنت مستنى الناس ديل يشبعو ويدونا لانو حنشبع وبرضو حنديهم
    لقيتم ليك لا بشبعو لا بدونا وبجوعونا سااااااااااى اها الراجينها شنو ؟؟؟

    1. يعني ادونا منجتكم نمص ونديكم وتمصوا تدونا يا يا حاجة دقي لي كاروشة

  9. أفليقا سلامات
    يا أخي قول لصاحبك ده إنتو مالكم شفقانين كده ما قلنا ليكم أصبرو علينا شوية كمان عشان تأكلوا مما تزرعو وتلبسو مما تصنعو ولا دي برضو ما سمعتو بيها …. يا أخوانا خلو إستهبالكم ده

  10. ياجماعه انا قاعده االف لى فى قصيده عشان القيها فيى الاحتفال اصبروا لى شويه

  11. يا بروف اعمل مشهد تاني يكونوا ناس الحكومة
    واقفين دائرة وكل واحد يقول انا سرقوا ؟
    يقوم الجمبو يقول ليهو : واا مين سرقوا ؟
    ويأشر علي البعدو , هذا سرقو .. انا سرقو ؟
    وا مين سرقو ؟ هذا سرقو , وفي نهاية المشهد يجي
    رئيس لجنة التحقيق ويأشر علي واحد ويقول :
    هذا سرقو .. يقوم الجمهور يجي ناطي في الخشبة
    ويكفتوا السارق ويقولوا هذا سرقو , هذا سرقو
    كسرة :
    اليسوي الحوار في شيخو يلقي في جلدو ..
    ماااااا باعوهو وكده ..
    ××××
    علاء الدين وبت وراق علي … البرنجيه الجاية
    ما تخلوها لي عِلا اعمل ليكم حركة تحرير جنوب
    القمردينه ..

    1. قبل المشهد بتاعك (طبعا لزيز جدا ) ح يكون فى فقره القاء شعري مني انا
      وبالمناسبه ما دايره اي لجنه تجيز لى النص دا بجيزو برااااااااااي
      انا بسال منك
      وينك
      وينك نهبوك سرقوك
      ولا كمان دسوك
      اتكلم قول ياهثرو او الخرطوم
      لى سته شهور بسال منك
      وما لاقنك
      كل الناس اتنصلو منك
      وقالوا كمان ما عارفنك
      مرقت براك
      خليت اجواءك
      ولا كمان معتقلنك
      ولا شالوك صالح عام
      ولا نزلت معاش
      والميتين ما كفنك
      ولا تعبته من طول مشوارك
      وغسيل معدوم لكلاك
      واقف هسع معا ناس مدنى
      تكابس وتجرى من البمبان
      ولا كمان واقف بين اولادك حيران
      ما للحمه الطارت فى محلك وقفت
      والسكر مافى
      والمويه عكوره
      ولا حسمت امرك وقلت براك
      خط هيثرو شنو الفى السودان
      بلد منهوبه بلد مسروقه
      بلد كله لجان في لجان

      1. والله قصيدتك دي يا بت وراق لو لقتا (عوضية شمارات) .. كان لحنتها ولحقتها لينا الذكرى نصف السنوية .. لأنو فيها حلات جبجبة .. خاصة في الحتة بتاعت:
        وما لاقنك
        كل الناس اتنصلو منك
        وقالوا كمان ما عارفنك

        فما تبخلي علينا دايماً بالجديد لنجوم الغم .. !!

      2. حقو تخلوا قيقم يلحنها ويغنيها علشان الناس وكبيرهم يرقصو ويهيصو وبعد ما تنتهي العرضة وكده يسال الكبير ويقول هو خط هيثرو خبرو شنو … ما هو بره الشبكة وكده حا يقولوا ليه استعين بصديق علشان تعرف الاجابة

      3. علي …. قيقم ده من بقي يغني لناس هناي
        مرق من نفسي .. والما كنت مصدقوا فيهو كلو
        بقيت أصدقو .. الزول ده لو كان ركّز في الحقيبة
        حرّم بعد ( بادي ) ما كان يغني زول غيرو ..

      4. كلامك اشرف من دقنات الفجرة ودين الدقن الشيطانية

  12. حاج أحمد السلاوى | رد

    الله يجازيك ويجازى محنك يا الفاتح .. قعدت أضحك لامن الجماعة الحوالينى قالوا الزول دا جنّ ولا شنو بقا يضحك براهو .. أكتر حاجة عجبتنى هى الأغنية الجهادية ( أنا ليهم بقول كلام خط هيثرو خبرو نام) .. كانت ضربة معلم ..
    أظن حسن كابوس عدّ عليك أمس فى بيت المال وكدا ..
    ربنا يديك الصحة والعافية ويجبر بخطك … أقصد بخاطرك .. معليش أصلو الخطوط كوووولها بقت شابكة …وكدا ..
    سؤال سغيسروووووووونى كدا ( زى كل مرة ) حسه الخط لو رجع .. أصدقاء الكسرة إياها حيعملوا شنو ..؟بس ما يعملوا نايمن ..وكدا.. أنا أقترح عليهم تحسين الخط وكدا ..
    وخلونا النشوف آخرت الخط زااااتو شنو .. !!!

    1. والله ياحاج سلاوي نفس الحاله مرت على الجنبي كلهم قالوا بت وراق اظنها جنت
      الظاهر جبرا يلم في الخط ونحن نكون طوفشنا

  13. يااخونا لأن الخط إنقطع منه العشم وعشان تاني واحد ما يسرق حاجة أن شاء الله السرقو يقرا القصيدة الرائعة دي …… وقولوا معاي آمييييييييييييين للسرقو

    خط هيثرو ضاع منــــــــــــــي والشالو ما يتنـــــــــي
    مايشيل خلافو
    يا ابو فركة ابوي والــــــي في حمو اللهيب اصلي
    مايشيل خلافو

    ياودحسونــــه الحـــــــــــار يا صاحب الــــــدردار
    حيبر ديري في البـــــــــدار اخلو من الــــــــــــدار
    مايشيل خلافو

    ودريا الرابعـــــــــــــــــــــه يا اب فيضا نابعـــــــا
    سل روحه تابعـــــــــــــــــه يشيلوه الاربعــــــــــه
    مايشيل خلافو

    يارجال اب حــــــــــــــــراز مافيكم انفــــــــــــراز
    هيا اطلعوا البـــــــــــــــراز خلوه يمشــــــــي راز
    مايشيل خلافو

    يالعركيين ســــــــــــــــــوا ابلوه شيلو الــــــــدوا
    يشرب من غــــــــــير روا طيرو بيهو في الهــوا
    مايشيل خلافو

    ود عيسي الفي المسيــــد زروق الماك كسيـــــد
    خط هيثرو ما تقلـــــــــــــــيد الشاله شل لي الايـــد
    مايشيل خلافو

    حامد اب عصاةً سيـــــف هيا لخط هيثرو اقيـــــــــف
    الشاله يصبح ضيــــــــف في الشبر الما نضيــف
    مايشيل خلافو

    يارجال ام مرحـــــــــــــي قول للرخا افرحــــــي
    ماتسهي وتسرحــــــــــي الشاله يمّحــــــــــــــي
    مايشيل خلافو

    ياالشيخ ود ام مريـــــوم خليهو اليعيش مسقـــوم
    خط هيثرو مامسيـــوم يبقي ليهو اخر يـــــــــوم
    مايشيل خلافو

    يابرير والنقــــــــــــــــــر الشاله لي ما قـــــــــــر
    يضوق سم الدقـــــــــــــر ابوه يكون كمان عقر
    مايشيل خلافو

    دي هديه جات تهـــــوش فينا وتسوي البــــوش
    الشاله راســــــــه يدوش والبومه تحرس الحوش
    مايشيل خلافو

    يااهل الله بيهو همــــــــو ومن مكه اتلمـــــــــــوا
    القشه بيه فمــــــــــــــــو تحرق حشا امــــــــــــو
    مايشيل خلافو

    صليت علي الرســـــــول عد مافي الكون محصول
    الشاله غير اصـــــــــول من البشر مفصـــــــــــول
    مايشيل خلافو

    1. بعد المقاطع الشعريه الجميله يقوم اخونا جبرا ويقص الخط اقصد الشريط وكلنا نرفع السبابه(اخونا عزت)
      ونقول هئ لله هئ لله

  14. خطنا العاثر حرمنا…..و خطي كدقيق فوق شوك نثروة…..ليت خطي يسمح و أزور ابويا ود مدني…..

  15. السلام عليكم ، البرف و الاخوان ، بعد ما بعنا الخط تانى حرم ما يرجع ، شنو هو لعب عيال و الخط زمان حلو بيهو الموظفين ، و الخط ده خط الاستوا و لا خط بارليف ما خط هيثرو ، احسن من ده وده نتبرع لشراء خط راسا الى لندن ، اصلو ما قاعد يركب الى بلد المستعمر الا المسؤل الكبير ، للعلاج و الفسح ثم المؤامرات ، فليه نتعبهم و ينزلو فى هيثرو ثم يركبوا تانى الى باكنقهام ، اها انا منى 50 جنيه بنات حفره ،…………………… عجبى

  16. علاء الدين وبت وراق..
    عيب عليكم الكلام دا !!
    جد انا زعلان…

    كوكو…
    وانت كمان العاقل الكبير الشايب !!؟ بدل تلومهم تقول ليهم عجبى ! تعجبك زيانة اب ريالة ! هههههههههههههههههههههههههههههه

    1. شمباتى
      في واحد مسطول مرق هدومو ونزل البحر نامن مرق لقى اتنين قاعدين جنبها قال ليهم قاعدين هنا مالكم قالو ليهو منتظرين مقال جبرا ينزل رد عليهم ومال دي هدوم منو

      1. الرئيس سال المساعد بتاعو قال الناس عملت شنو بعد زيادة الرغيف ..قال ليه بياكلو الزفت ..قال ليه طيب ماتزيدو الزفت

  17. جنوبى…
    ههههههههههههههههههههه,,وانا اضم صوتى ليك فى الحركة الداير تعملها دى,حتى لو كانت جبانة او ما ظريفة ! لوووووول…

    غسان..
    منقتك دى ماااااا مريحة ! هيييييييييييييي

    1. رأيك شنو نديكم الفندك تدقوا تدونا ندق ونديكم

  18. المنهدش..
    فظييع لكن,,بس اعمل حسابك بعد شوية بجوك الجماعة اياهم ويطلعوك مشرك ! امشى..
    ههههههههههههههههههههههههههههه,,غايتو السواها فيكم جبرا ما بتمرق تانى ! الكتراااااااابا

  19. ياجماعه طيب ما نرسل صوره الخط وتاريخ ميلادو و متين اختفى

    لي برنامج جسر المحبة يمكن يكون تايه في إي حته

    وإنشاء الله لمن يتلقي ( طبعا دي في المشمش ) نجي نلقاو في الاستديو

    1. أنا غايتو شايف موضوع الخط ده حركة من الجماعة ديل .. كلها أمور عشان يجو يهللوا بيها …الرد الرد الخط الخط ..على نغمة الرد الرد السد السد

      1. الله يسد نفسهم محل ما يقبلوا

  20. جبرا والسمار.
    سلامات .
    موبايلى إتسرق قبل يومين .أمبارح لمن ضربت فيهو ردالى صاحبو الجديد قلت ليهو ياخى دة موبايلى رجعو لى .قالى موبايلك دة ماسورة بى خمسة ألف أبا يتباع .
    وحكيت القصة دى لية عشان تعرفو إنو البتسرق مابيكون عندو قيمة . وإنتو تاعبين روحكم فى الفاضى

    1. حنين ، سلام ، سرقوا موبايلى لما ضربت ليه رد على ده اكان موبايلك انا جنب الزريبه فى العرضه ، لما مشيت لقيت سونى ليستون منتظر ، لما سالتو ، اول شئ حمر لى وتانى نفخ و قال ده موبايلك ؟ وراح مطلع ليهو موبايل هلال اقدم من الكسره ! بعد داك انسحبت براحه و خليت جماعه يتغالطو معاه ، كل واحد يشترى ليهو شريحه بالف ويجى يقول ليك ده موبايلى ، سعال: انا موبايلى سام سونج و الشريحه خط موبتل…………….. عجبى

  21. لقـد أسمعت لـو ناديــت حيــاً ولكـن لا حيـاة لمـن تـنـــــادي
    ولو نـاراً نفخـت بهـا أضـاءت ولكـنك تنفـــــــــخ فـي رمــــادِ

  22. بت وراق..صباح الغرق والبحار !
    دا شنو دا ا بتى؟؟

    غسان..
    صباح الدققان والفنادك ! دق براك انحنا بنسكلب بس !! وييييييييي

  23. مفاجأة وبشرى سااااااااااااااااارة
    خط هيثرو لقووووووووووووووهو
    ختو البياض عشان أكلمكم لقوهو وين

    1. الله انا لو محل الحكومة دي الا اطلع ليكم الخط ده من محل ما وديتو اشوفكم تاني بتنقو في شنو … ديل شنو الشماراتيه ديل .
      كسره : واحد صاحبنا قال جدو كبيير علي جهات الجعليين يدو اليمين اتكسرت .. ختو ليهو الاكل قال للحبوبة اكليني .. قالت ليهو ما تاكل براك يدك الشمال دي ما نصيحة .. قام ليك علي يدو الشمال وككككع كسرها .. وقال ليها اها بتأكليني وللا بتخليني اموت بالجوع .

      1. المشكلة الحكومة ذات نفسيها مش عارفاهو راح وين هو إتسرق صاح لكن منو السرقو هي مش عارفه

  24. السمار
    طلعتو لواليق لياقة شديدة
    وشفقانين شفقة تشفق اشفق الشفقانين
    اصبرو شوية على الجماعة ديل اكيد مشغلين الخط استثمار وبكرة يرجعوهو ومعاهو الفوائد
    وتاخدو ارباحكم ,, عشان كدا اصبرو شوية وبطلو شفقة
    كدا كويس يا جبرة شعللتها وقعدت تتفرج

  25. انتو خط ماعندكم ليهو طائرات دايرين بيهو شنو( ووووو) ؟؟

  26. ههههههههههههههه احلا حاجه المواطن الفي المسرحيه

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: