جديدة لنج !

(ما حأرد عليهو، وما حأشتغل بيهو كتير، وما حأفتح فيهو بلاغات زي ما قاعد يعمل معاي، أنا أصلاً ما عندي وقت للكلام الفارغ دا) .. عندما قرأت هذه العبارات كنت أعتقد أنها للمطربة (عوضية عضلات) تقصد بها شاعر أغنياتها (حسن كلتشات) الذي ظللنا نتابع قصته معها عبر الصفحات الفنية وملاحقته لها مطالباً بحقوقه (الفكريه) عن أغنيته التي طالبها بالتوقف عن ترديدها والتى يقول مطلعها :
يا حبيبي طالعني في الخلا … أنا مما شفتك جبتا ليا الجلا !
لكن بعد إكمال القراءة إتضح للعبدلله بأن المسالة ليست بين (عضلات وكلتشات) ولكنها بين مسئولين حكوميين على قمة الجهاز التنفيذي ، فالكلام (الفوق ده) قائله هو وزير الإرشاد والأوقاف د خليل عبدالله والزول القاعد يفتح فيهو بلاغات (كما قال) بالطبع ليس الشاعر (حسن كلتشات) بل هو الأمين العام السابق للوزارة د. الطيب مختار !
جاءت تلك الجزئية خلال حوار اجرته صحيفة الإنتباهة الصادرة يوم 16 مايو الجاري مع الدكتور خليل عبد الله وزير الإرشاد والأوقاف حول تقريره الذي أدلى به أمام البرلمان والذي كشف فيه عن تجاوزات خطيرة قام بها الأمين العام السابق لديوان الأوقاف .
وعلى الرغم أن تقرير الدكتور خليل عبد الله وزير الإرشاد والأوقاف قد إمتلأ بالتجاوزات الإدارية والمالية (ملايين الريالات وكده) والتي أفاد بأن الأمين العام السابق قد قام بإرتكابها إلا أن هنالك شيئاً واحداً في التقرير قد إستوقفني ألا وهو عقد الأمين العام السابق للأوقاف والذي بموجبه كان يتقاضى مبلغ (60) ألف ريال سعودي(بالخارج) و(40) ألف جنيه (بالداخل) وقد تضمن العقد المزايا التالية: أربع تذاكر سفر للخارج بدرجة رجال الأعمال نقدًا (لم تحدد محطة الوصول) ، إضافة لتكلفة الإنترنت للاستعمال (الشخصي) والرسمي، وإعفاء من ضريبة الدخل الشخصي و(الزكاة)، عربة أو بدل عربة (3) آلاف جنيه شهرياً !
لم تستوقفنى حكاية 60 (بره) و40 (جوه) ولا بقية المخصصات فالراجل برضو يستاهل (المية وشوية مليون في الشهر) المعفية من الضرائب وكمان معفية من الزكاة (يطرشنا ما سمعنا بالزكاة المعفية دي) فهو مؤتمن على ملايين المليارات الموقوفة لله تعالى والإنترنت الشخصي !
طيب أيه إستوقفك يا جبرا ؟ أقول ليكم .. بس (كالعادة) أي زول يخلي بالو من (مرارتو) وكمان لو عندو الأمراض الكلو مرة بنقول عليها ديك يقوم ياخد حبوبو وكده !
طيب بعدما إطمأنينا عزيزي القارئ إنو مش ح تجيك حاجة نقول ليك ماذا إستوقفنا؟ لقد إستوقفنا أن هذا العقد الموقع بين السيد وزير الإرشاد والأوقاف السابق (أزهري التجاني) وبين الطيب مختار الأمين العام السابق ينص على أنه لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين (أيه الحلاوة دي؟) !
العبد لله يعتقد بأن هذا )البند( من شانه أن يدخل وثيقة هذا )العقد( إلى موسوعة جينيس للعقود )الكتامية( إذ لم وكن وصن وبن وهن وكف ولن يحدث في تاريخ الحكومات البشرية أو حتى (الشيطانية) منذ أن خلق الله الدنيا وحتى يرث الله الأرض أن إحتوي عقد عمل بين (موظف) و(حكومة) علي بند ينص على أنه لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين !
معليش عقد يخص (جرسون) وسيد (مطبخ) .. ممكن ، فران وسيد (طابونة) .. ممكن ، فنان و(عريس) .. ممكن ، سواق وسيد (أمجاد) برضو ممكن .. اهو كووولها عقود (شخصية بحتة) والإتنين مخيرين يكتبوا العاوزنو فيها ، لكن حكاية موظف (حكومي) وعقدو (سر) بين إتنين (دي ما أدونا ليها ) وجديده لنج !

كسرة :
يوجد خطأ في صياغة البند إذ يقول : لا يحق لأي طرف أن يكشف عن بنوده أو أن يطلع طرفاً ثالثاً على محتوياته إلا بموافقة الطرفين ! والصحيح (أن يطلع طرفاً رابعاً) عشان الله موجود وشايف العمايل المهببة دي !

كسرة ثابتة :
أخبار خط هيثرو شنو(ووووو)؟

Advertisements

56 تعليق

  1. برنجججججججججججججججججججججججججى

    1. ان شاء الله بالقُحة والبلغم …

      1. جنونى ، من امبارح انا منزول ، تخيل فى الحرايه دى ، و راجين القحه ……….. عجبى

  2. ,والله ياكوكو خاته طبتى من الصباح عييييب منك

    1. بت وراق سلام ، ما قلنا القصه فيها مشترك ، ودى ذاتها ختفه منك جنونى ………… عجبى

  3. معفية من الزكاة دي ما سمعت بيها كيف
    يا جبرا !!؟ ما ياها انا ربكم الاعلي بس
    برواية أخري …
    سمعنا بي ياكلوا حق النبي لكن ياكلوا حق
    الله !! دي جديدة لنج …
    نسيت البرنجيه وكان شالا زول موعدنا لاهاي ..

  4. أها .. منتظرين باقي الفيلم .. بعد ما إتعرفت كل المصايب دي … الحصل شنو؟
    ولا الموضوع “إتلجن” برضو (شكلو ليهو لجنة) ؟؟!!
    شاحدالطرف الرابع يجهجهم جهجهة يضربو بيها المثل .. ويدخلها عليهم بالساحق والماحق والبلا المتلاحق .. ويصرفوها كلها في الأردن برا فايدة .. آمين يا رب العالمين.

  5. السلام عليكم ، البرف و الاخوان ، زمان قلنا العقد بتاع زول سوق الاوراق الماليه عقد ماسوره ساكت ، ولسه ولسه و لسه ، فى عقودات يشيب لسعرها الولدان ، مدير جايب عربيه BMW بى مليار علا 50 مليون ، نص وزير عامل عماره ايجاره 60 مل شهريا ، لكن ده كلو كوم وعفو الزكاه كوم ، طيب ما يعفوهم من اختها فد مره ، وتانى مايعترو لينا فى الجوامع ، ويجوك ابو بدل سوداء يعملو لينا نفسيات ، سعال : ما كفانا الحواجز فى المساجد درجه اولى …………… عجبى

  6. جبورة الحاضرين سلام
    اولا الاسبوع ده او الاسبوع الماضي ما تفرق كثير مليء بالقمجات الرسالية !!
    شيء اعفاء من الزكاة !!! اه والخليفة الراشد ابوبكر يقول لو منعوني عقال بعير لقالتهم عليه والجماعة يعفو الجمارك !!!
    المهم الشيء القرمجة الثانية هي ما قاله عبقري زمانه بان سبب تدهور العملية التعليمية في ولايته يكمن في مكون من مكونات الولاية .

  7. سلامات:
    احلي تعليق سمعتو واحد علق وقال للوزير السابق: انت اصلك كنت مدير مصنع البيره عشان ……. الاموال كلها.
    والله فعلا اندهشت و انصدمت وتقياءت وشعرت بالحسره، كل ما أتمناه الا يكون صحيحا وتكون فقط مجرد اتهامات، لأنو اذا الكلام ده صح وفي و زاره يفترض بان تخدم المسلمين السودانين داخل وخارج السودان،،متالم جداً وانشالله ما يكون الكلام ده مثبت زي خط هيثرو

  8. ما عندي ما اكتبه فقد بكيت بحرقة وألم كما لم أبكي من قبل ….. ملعون أبوك يا بلد

    1. اقسم بالله أني بكيت علي وطني وبس انشالله ما يكون الكلام ده صح،، يارب الواحد يثق في منو وما رأي علماء الدين في هذا،، بدلا من فتاويهم في جواز السجود في الكوره،،، انعدمت الثقه،،،،والله نحن ناس كويسين وما عارف الحصل ليهم شنو

  9. وزارة الاوقاف والارشاد ؟؟؟؟
    طيب لو كان وزير السياحة كان عمل شنو
    اللهم لا تؤاخذنا بما فعل السفهاء منا

  10. كل العقود متشابها والبطانيه وااااحده
    بلد انقسم نصين نص اتباع بليل والنص التانى باليل اتباع

  11. الحبيب جبرا…
    ارجوك ان تكف,,فلقد بلغ الالم مبلغه واعتصرت المرارات وتجرعت الاسى,,,خيب الله مساعيهم اجمعين..لا حول ولا قوة الا بالله…

  12. كوكو..سلام…
    اها الكحة ما خفت !؟ كُح كُح كُح…

    جنوبى..سلام…
    آميييين,وكمان للمتربصين بها والمتربصات !!

    1. السلام عليكم ، د / شمباتى قمنا بعمل محايات وبخرات كاربه ، و نحنو فى طريقنا للتحسن باذن الله ، ربنا لا تمتحنا بالثروه و الجاه و السلطان فنحن اعجز من ذلك ……….. آميييييييييين

  13. بت وراق….سلام..
    ما تشوفى شر…

    المندهش…سلام…
    اشاركك البكاء واسال الله ان يصيبهم به فى مسامعهم ومدامعهم

  14. انت عارف ياجبرا ياخوي كلامن صاح اوريك كييييف دايما العقود حقتوم دي بتكون بين اتنين والشيطان تالتوم

    1. من الله خلقنى ما شفت لى عقد من غير شهود ، تفتكرى يا بت وراق جابوا تالتم بس ، اظنها كانت حفله حافله بما لذ وطاب ……………..عجبى

  15. يلعن أبوكم تهينوا الناس وتدلوهم عشان تأشيرة خروج بسبب الزكاة التي لا تجب على 90% من العاملين بالخارج وتلحسوها بالمليارات وقال الله أكبرقال عاملين فيها بعرفوا الله الله أكبر عليكم

  16. فعلا ما يجددوا جوازتنا ولا يعملوا تاشيره لنا الا ندفع زكاه وليست الزكاه المشروعه بل زكاة راتب ودى طبعا من فقه الضروره زكاة راتب وكان انك ما عندك مصروف……….الله اكبر عليهم

  17. سلامات للجميع
    التعليق مخالف لقواعد النشر ( وانتهى )

  18. سلامات ياسين المتربصين والمتربصات عديل كدة ؟ شايف لغتك مايلة على اللغة الانقاذية ، اعتقد اي بمعنى اظن بل انى متاكد انه من اسوا ماعملته الانقاذ وسدنتها حولو الكلام والعبارات الدينية ذي ( الله اكبر وهى لله ، واحتسب ، وغيرها من العبارات المتاصلة والدالة على التزام من يرددها بقواعد الدين وماسك يمينه ذي ما بنقول الى دلالة واضحة على انك لامحالة مغشوش فى جنبة معينة من مالك العام دة اذا فضل شى يغشو فيه والبيهو عملو الصيوان والساون والكراسى والتجمهر والفنان والاورغن والشنو ماعارف ويرددوا بنفس العدة دى لا لدنيا قد عملنا نحن للدين فداء ياخ ان شاء الله يفتحو الهجرة

  19. علاء الدين..سلام…
    هههههههههههههههههههههههههههه,,عليك الله ابعت لى تعليقك دا فى رسالة خاسة ! وااااااااااو

    1. سلامات ياياسين
      شكلو حا استعمل التعليق دة كتير بعد دة لانه صدقنى آآآآآآآآآآآآآآآآآآآآآآآآآآآآآآآآآآآآآآخر ماتوصلت ليه واظن برضو انه افضل الناس تستفيد من معرفة بعضها احسن من وجع …………. القاعد يجينا من التعليق والانفعال حول حاجات حصلت ليها زمن وغيرها حاليا حاصل حا نعلق عليه بعد سنة وهكذا دواليك فاحسن :
      التعليق غير قابل لقواعد النشر

    2. الشعب داخل المدونة يريد كشف عقد عمل الشيخ شمباتى والا ؟؟؟؟؟؟؟؟

  20. الاخ جبرا
    السؤال: العجل ال الله ابتالانو بيهو دة وين من الحاصل دة كلو ما سمع بي حديث الرسول كولكم راع و كولكم مسأول عن رعيته طيب الرعية ديل هم المؤتمر الوطني بس و الباقي انشاء الله يحرق و لا الريس موضوعو بقى بس عرس و طلاق و الله المستعان على ماتصفون و حسبنا الله و نعم الوكيل فيهم.

  21. رمضان السنه دي مسخن

    متشوفوا لينا واحد يطلع لينا إعفاء منو او تخفيض حتى

  22. الحبيب

    الجديد امسك اي مسعول في الخربه دى تلقا مخصصاته خرتميه اورار مش جنيه بث الله شايف وعارف الاسر التمعففه والنومو القو والله الناس دي قايله موت مافي ولا حساب لكن ربك كريم علينا دحين نسال الله العافيه

  23. سلام ياقبيلة،،،
    بس الله الحي القيوم خالق الخلائق حي وموجود وما دائم إلا وجهه الكريم، وإذا كان هذا الكلام حقيقة فعلا”، فليس هنالك ما نقوله غير حسبنا الله ونعم الوكيل، ولا حول ولا قوة إلا بالله العلي العظيم..
    ويقول الحق جلا وعلا في محكم التنزيل في الآية (47) من سورة الأنبياء (وَنَضَعُ الْمَوَازِينَ الْقِسْطَ لِيَوْمِ الْقِيَامَةِ فَلا تُظْلَمُ نَفْسٌ شَيْئًا وَإِن كَانَ مِثْقَالَ حَبَّةٍ مِّنْ خَرْدَلٍ أَتَيْنَا بِهَا وَكَفَى بِنَا حَاسِبِينَ)
    وحا يروحو من حساب ربنا فين؟؟؟؟
    اللهم أسترنا فوق الأرض واسترنا تحت الأرض وأسترنا يوم العرض يوم المشهد العظيم قادر ومجيب يا ودود يا كريم..

    1. سلام يا ود الخلا . . .
      والله من أمس بسأل في نفسي و أقول يا أخوانا ود الخلا ما يجي يورينا دا من أنفسنا و اللا من أنفس تانيه؟
      تجي يا ود الخلا تاني يوم عشان تقول لي نخليهم لي حساب يوم القيامه. طيب ما كان يخلو الناس البكتلو فيهم من زمن ناس مجدي و الطيار بطرس و الود الجنوبي لي حساب يوم القيامه.
      قبل كدا جبرا ما قبل ال 50 ألف دولار بتاعت ديوان الزكاه الأدوها لقناه و هميه ” الضحى ” ، جبرا ما قبل الحساب يكون يوم القيامه. نحن كذلك عايزين الحساب هنا و بعد داك يشيلو شيلتم في الآخره.
      و الله يا جبرا دا موضوع داير ليهو كسره ثابته مع الاعتذار للفادني بتاع الزكاه الأدا ليهو واحد صاحبو 50 ألف دولار بس. مش بلاوي متلتله ذي دي.
      لا حول و لاقوة إلا بالله.

      1. سلام ياسنكل ياصديقي،،،
        والله ياصديقي العزيز كل ماأقرأ في مثل هذه الفظائع أسائل نفسي، في من كان السبب في كل هذه البلاوي العجيبة والغريبة، والتي حيرتني أشد الحيرة، وطبعا” حساب الآخرة ما منو مفر، ولكن حساب الدنيا ده فيهو إنّ، وكل زول بشيل شيلتو…
        تعرف يا صديقي ما نراه الآن من فتن ومصائب هو موافق لما جاء به المصطفي عليه أفضل الصلاة وأتم التسليم لما سيأتي في آخر الزمان من أنواع الفتن والمصائب التي تجعل الحليم حيران!!!!
        ربنا لا تُزغ قلوبنا بعد إذ هديتنا وهب لنا من لدنك رحمة إنك أنت الوهاب.

      2. اخوانا المصريون قالوا المال السايب يعلم السرقه ، اذا كان المراجع العام خايف و ابو قنايه هايف و الشعب الشعب ما شايف ، يبقى كان ديار ابوك خربت …………. عجبى

  24. البروف تحياتى
    مسأله (اللغف) دى بقت شى طبيعى حتى و لو جات فى البرلمان / يمكن نزل عليهم فقه تانى و نحنا ما عارفين فى خضم متطلبات الحياة
    بس بنسأل اوقافنا الفى السعودية عساها ما اتباعت زى ضمائر الناس ديل ؟؟؟
    قال اوقااف و ارشاد قال !!!!
    لك الله يا سودان

  25. حاج أحمد السلاوى | رد

    60 ألف ريال سعودى ….. بس ؟؟؟
    ما كتيرة ….!!!

    1. سلام ياصديقي سلولو
      60ألف بس ما كتيرة علي زول محروم وجيعان جاء من بيوت جاعت ثم شبعت فالجوع والشح واللصوصية باقية فيها إلي يوم القيامة..

      1. كدا يا هندسه أبنت ووضحت و فسرت ما يجري في بلادنا و لماذا يجري.
        على كدا إتفقنا تماماً.

  26. أقدارنا ماله كُتر
    نيرانا ما بردوا
    كل النصدو يتُر
    حالا يجي البعدو
    للقال بلدنا فقُر
    قول خيرا بي رعدو
    لكين عوارض الضُر
    إنقنقتوا وقعدوا
    صقرين تعاقبوا كُر
    عاقيّن وماب يلدوا
    حد ما ضروعا تدُر
    بي خيره ينفردوا
    ++++
    مجمع الفقه الاسلامي ( يفسي ) بتحريم بيع ( الفكه ) ..
    وطالما جات سيرة الفكه اللهم ارحم ود ملين وارحم حِمّيد ….
    ياربي وزير الاوقاف السعودي راتبه بيحصل 60 ألف ريال !!؟؟؟؟؟
    آآآآآآآآآآآخ يا حروب الرده وعقال بعير بي 60 هللة !!!!

  27. البرووووف والسمار .
    سلامات .
    ياخ ….
    ياجماعه والله ….
    دى ما …
    آآآآآآخ ….
    والله ياجماعه غالبنى الاقولوا .
    الله فى …

  28. جنوبى..
    شكيت محنك ,, لقيت نفسى بصفق مع ايقاع الكول بتاعك دا !!
    صعب صعب يا على..

    1. شمباتي يا حبيّب .. سلام
      تعرف انا كل يوم بسأل نفسي :
      ياربي ناس الحكومة ديل إتربوا وين ؟
      ياخي لا قيم اسلامية لا قيم سودانية
      ولا انسانية !! الناس دي بتنوم كيف !!؟
      عليك النبي امبارح شفت وزير المالية ده
      وسخافته واحمد البلال الاسخف منو ؟
      بتاع فرنسا اول ما فاز اول حاجه عملا
      خفّض راتبه ورواتب الوزراء التلت !!
      حالته ولاااااااااا مسلم !!!

  29. راتب اوبامارئيس امريكا = 33.333 دولار شهري
    حسب سعر الصرف في السودان = 88999 جنيه
    راتب الرئيس الصيني تاني اكبر اقتصاد في العالم
    = 333 دولار × 2.67= 889 جنيه سوداني
    راتب زولنا سيد الاسم ده :-
    40000 جنيه جوه
    42600 جنيه بره ( 60000×0.71 بسعر الصرف )
    الاجمالي = 82600 جنيه.
    اما لو طلع ما عندو ذمة وباع ال60000 ريال
    في السوق الاسود ح يكون 60000×1.5=90000 يبقي
    الاجمالي 40000 جوه + 90000 بره = 130000 جنيه
    يعني اوباما والرئيس الصيني زيط سااااكت ..

  30. الحبيب البروف والسمار الكرام
    اسمحو لي بأن اورد باقي التقرير
    إقتباس …..
    وشرح خليل امام البرلمان امس الخطوات الإصلاحية التي قامت بها الوزارة لتصحيح أوضاع الأوقاف وكشف عن استيلاء الامين العام السابق لهيئة الاوقاف علي مبلغ (633,000) ريال سعودي من اوقاف الخارج اضافة الي مبالغ صرفها برئاسة الاوقاف بالخرطوم بالجنيه السوداني.
    واكد وزير الاوقاف في تقريره المقدم الي البرلمان توريد مبلغ (6,4) مليون ريال سعودي في الحساب الشخصي لامين الاوقاف السابق تم استدانتها من الحج والعمرة بغرض تجميع وتجهيز اوقاف بالخارج، مؤكداً تبديد (2,229,705) ريال منها، واختلاس (1,408,000) ريال، بينما تم تحويل (65,000) جنيه سوداني من رئاسة الاوقاف بالخرطوم لاوقاف الخارج دون ان تدخل فى الحسابات
    واكد تقرير الوزير توكيل امين الاوقاف السابق عدد من الشخصيات بالسعودية بنظارات اوقاف السودان والتصرف فيها بناءاً علي مخاطبة وزير الارشاد السابق للسلطات السعودية باعتماد امين الاوقاف السابق بدلاً عنه، مؤكداً ان الوزير نفسه سلك ذات المسلك من قبل ما سبب ضرراً بالغاً للاوقاف السودانية بالسعودية، كاشفاً عن ان احد الموكلين علي الاوقاف بالسعودية قام بتأجير وقف استلم بموجبه ثلاثة مليون ريال سعودي كمقدم.

  31. جنوبى..
    ههههههههههههههههههههههههههه,,حليييل المسلمين ! خلينى ياخ

  32. الأحباء الأعزاء
    شاعر مايو قال : وريتنا جديد ما كان على بال … ما عارف شاعر يونيو هسه ممكن يقول شنوووووو؟

  33. بعد دخلوها وصقيرا حام تاني يقول ليكم شنو؟؟؟

  34. يا ود الخلا ح يقول : الفينا مشهوده
    عارفانا المفاسد انحنا بنقوده
    والسرقة بندوووووووورااااا

  35. يا استاذ انا المحيرنى
    انو العقد لا يطلع علية غير الاثنين الموقعين علية
    بس داير اعرف كان المدير دا بيصرف قروش عقدو كيف ومن وين ؟؟؟
    الا تكون من تحت المخدة أو من الجيب الخلفى أو من ال …..
    وبخبرتكم الواسعه فى النوع دا حلها وورينا كان بيصرف كيف واعمل فيها مسابقه بالخيارات دى

  36. بشاوى…
    هيييييييييييييي,ارعى بى قيدك !! بكلللم انا !!

    1. هو الجنن عبد القادر بلا الرعاية البى القيد شنو ؟ انا بحب الشفافية والملوخية بس

  37. السكر السكر ، كان الشوال السنه الفاتت عبوة 50 كيلو بى 105 جنيه ، قام سعادتو بعد رمضان و الضائقه السكريه بعمل عبوات صغيره 10 كيلو العبوه الواحده بى 35 جنيه ، يعنى بى حسبه بسيطه الزول سعادتو ربح اكتر من 65% فى ضربه معلم بتاع سوق ، التجار لما شافو القصه هبر كمان هم رفعوا السعر لى 45 جنيه ، ودى اكترمن 105% ، ولا ابو قنايه ولا ابو عصايه يقدر يردع ديل ، و مرت كانه ما حصل شئ ، و الله دى ابليس ما يفكر فيها ، ارجو ان نفكر جادين فى محاربة السكر ، هذا الذى اذلنا و حقر بينا وخلى وشنا زى الواطه دى …………………عجبى

  38. حاج أحمد السلاوى | رد

    البروف الفاتح ..أنت عاوز شاعر يونيو يقول شنو أكتر من إنو امريكا دنا عذابها ..؟؟
    ونحنا بنقول ليهم : عذبنى وتفنن فى ألوان عذابى ….شى ضرائب وشى جبايات وشى نفايات وشى ما بعرفو شنو داااااااااك ..
    وخلونا النشوف آخرتا شنو … !!!

  39. يا جماعة انتو عارفيين انو الراجل مسئول من ادارة اوقاف السودانية بالخارج (وبالاخص) فى السعودية … ومن ريع هذه الاوقاف ينفق على الحجاج والمتعمرين السودانيين … يا جماعة انا زول محاسب … ما مسموح انك تأخذ راتبك من العهدة التى بطرفك… ؟؟؟!!!! حاجة عجيبة

  40. كدة يابروف الصفحة بقت مريحة خالص

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: