عاوزين فتوى

قرأت بالأمس خبراً يقول أن مجمع الفقه الإسلامي بالخرطوم أصدر فتوى حرم بموجبها بيع النوع الواحد من النقود ( الفكة) بسعر مختلف، وقال المجمع أنها من الربا المحرم شرعاً، و لمن لا يعلم فإن (بيع الفكة) هذه تجارة صغيرة يمارسها بعض الأشخاص في مواقف المواصلات حيث يقوم الشخص بوضع الفكة أمامه على تربيزة لياتي إليه الكماسرة فيشترونها منه (الجنيه بتسعين قرش مثلاً) وذلك حتى يستطيعوا أن يردوا للركاب (الباقي بتاعهم) !
حقيقة بعد قراءة الخبر أحسست بسعادة غامرة لا توصف .. فعلى الرغم من أن (قصة بيع الفكة) هذه سلوك محدود يقوم به عدد قليل من الأشخاص وهو سلوك غير ضار في حد ذاته ولا يؤثر على النمو الإقتصادي او يهدد الأمن القومي ولا يتضرر منه شخص إلا أن أخواننا العلماء بمجمع الفقة الإسلامي أبت غيرتهم على الإسلام إلا أن يجتمعوا ليناقشوا (المسألة) من ناحية (فقهية) ليخلصوا إلى حكم الدين فيها ويبينوا للناس حرمة هذا السلوك ليقلعوا عنه .
سعادتي جاءت من منطلق أن يهتم مجمع الفقة الإسلامي بهذه الممارسة الصغيرة المحدودة التى لا تضر بطرف ما ، إذ أن ذلك يعد مؤشراً واضحاً يدل على أن هذا (المجمع) يفتى بلا شك في ما هو أكبر من ممارسات والظواهر والتعاملات التى لها من الأضرار ما لها ويتأثر بها ملايين الأشخاص ، والأمثلة عن هذه الأشياء (ذات الوزن) و التى تحتاج إلى فتاوى عاجلة كثيرة للأسف الشديد ونحن نعيش في هذا الزمن الأغبر الذي كثرت فيه الفتن وإنساق الناس وراء الشهوات وانصرف الخلق إلى الدنيا وانهمكوا فيها وأصبح (الفساد) حاجة عادية وبقينا ما عارفين (الحلال) من (الحرام) والعقد (العلني) من العقد (السري) وخط هيثرو من خط (18)!
كثير من هذه الممارسات والظواهر والمعاملات (ذات الوزن الثقيل) يعلمها علماؤنا الإجلاء ولم يفتوا فيها بعد (إحتمال ما عارفنها)، لكن طالما القصة جابت ليها (فكة) فالعبدلله عاوز فتوى مستعجلة يعلمها العلماء تمام العلم بل ويشاركون فيها بصورة شهرية !
أخواننا العلماء الإجلاء الذين قاموا بتحريم بيع الفكة .. هم جميعاً مثلنا قد قاموا بشراء عداد (الجمرة الخبيثة) من شركة الكهرباء وهم جميعاً مثلنا يقومون بدفع إيجار شهري (نهاية أجله غير معروفة) ، السؤال البرئ جداً ألم يستوقف أحد هؤلاء العلماء الأجلاء هذا النوع من أنواع البيوع التي لم ترد في كتب الفقة ولم يعرفها الإسلام ولم تعرفها الجاهلية (ذاااتا)؟ أليس هذا هو الحرام ذات نفسو أن تشتري (شيئاً) فيقوم من باعه بتأجيره لك بإجرة (لا يعرف منتهاها) ، أوليس هذا الأمر أكثر وزناً وأفتك ضراراً من قصة (الفكة) ويستوجب الوقوف عنده وإصدار فتوى لإيقاف هذه القصة (الما بتخش في الراس) وتبيين رأى الدين فيها ؟!
الإخوة علماء مجمع الفقه الإسلامي أنتم مطالبون اليوم قبل الغد بإصدار فتوى توضح لنا معشر المواطنين إن كانت هذه المسألة تقع في باب (الحرام) وأكل أموال الناس بالباطل ، وإذا القصة طلعت (حرام وكده) هل الشركة من ناحية شرعية مطالبة بإعادة هذه الأموال التي دفعها المواطنون إلى أصحابها
وللعلم فإن شركة الكهرباء والتي تمتلك هذه الخدمة الضرورية (حصرياً) تبيع العداد الواحد بما يفوق( ما يعادل) الألف دولار أمريكي مع أن سعره لا يتجاوز الخمسين دولاراً ودى ما عاوزين فيها فتوى (عشان ده جشع ساكت) !

كسرة :
الأخوة العلما ء الأجلاء .. بيع الفكة عرفناهو حرام أها شوفولينا قصة يبيعوا ليك الحاجة ويأجروها ليك دي !

كسرة ثابتة :
أخبار خط هيثرو(شنو(ووووو)؟

Advertisements

44 تعليق

  1. برنجسسسسسسسسسسسسسسسسسسسسسسسسسسة

  2. الأخ البروف . . .
    و الله بالطريقه دي أنا خايف عليك تطلع كااااافر عديل كده.

    1. أخخخخخخخ بس لو ما كنت من قدامي المحاربين
      لاكين العين ما بتعلي علي الحاجب ..
      وكت اقلعت عنه عليك الله اهديها ليا ..

  3. برنجية ونجى راجعين.
    باقى اليومين دى المواضيع مسخنة

    1. بسسسسم الله الرحمن الرحيم

  4. برررررررررررررررررررررر

    قربت اكتب برنجية لكن التدخين ضار بالصحة

    1. مع انى ما عارفة قصة البرنجية دى شنو . احكوها لى عشان اخش في الخط

      1. اي خط أوع يكون خط هيثروووو …….

  5. البرووف والسمار .
    صباح الخير .
    عمنا سنكل متعك الله بالصحة .
    البرنجية نفست ياشمات .
    مجلس الافتاء دة بياخد مرتباتو من الحكومة ويستحيل أن يفتى بشى يخالف الحكومة .
    موش أمبارح مدير الاوقاف السودانية بالسعودية قال الحكومة مابتصرف لينا مرتبات عشان كدة ماتجى تحاسبنا وقال كمان (فساد الاموال فى الحكومة خلاس كمل عشان تجو تقبلو على مال الزكاة والاوقاف وهو مال الله ؟)

  6. بالمرة يابروف بالله لو امكن يفتونا فى قصة المعايش البقت جبارة دى برضو لأنو اتوقع حدوث حالات انتحار فى القريب العاجل…

  7. السلام عليكم ،البرف و الاخوان ، اها بت وراق و جنونى اديناهم فرصه ، لكن مابقو قدره ، نحنو حنرجع لى برنجيتنا ……………….. عجبى

  8. طبعا ناس الافتاء ديل ما بيفتوا في شئ الا
    يسألم عنه زول وهم بكون شايفين الحاجات دي
    لكن كمان مافي زول سألهم عنها :
    هسع طالما جبرا وجه سؤال مباشر فنحنا نقوم
    نضيف وبعدين جبرا يعملا في طلب واحد ويقدموا
    ليهم عشان يفتوا لينا :
    1- الحكومة دي لمن جات كان في حاكم منتخب من
    الشعب ( بالشوري )وهي انشقت علي الحاكم
    وعملت انقلاب , هل الرئيس الحالي يعتبر خارج
    عن الجماعة ؟
    2- الحكومة بتلجأ للقروض الربوية عشان تبني
    سدود وكباري وتنسبها لانجازاتها عشان تحقق كسب
    سياسي لحزبها وتضرنا نحنا ك بلد , فما رأي
    الدين في هذا ؟
    3- الحكومة بعد انفصال الجنوب لم تعطي اخوانا
    الجنوبيين المسلمين خيار البقاء في الشمال رغم
    انها ترفع شعارات اسلامية, واعادتهم للجنوب
    رغم تاكدها من الضرر الذي سيلحق بهم من حكومة
    الجنوب ( اصدقاء النصاري واليهود ) كما
    تصفهم هي , هل اتفاقية نيفاشا كالحديبية؟
    سؤال هدية :
    س/ انا كنت نايم مع مرتي والاذان اذن أقوم
    منها ولآ اوااااصل ؟

    1. جنونى سلام ، افتيك فى اخر واحد : اكان بتقدر تقوم قوم ، و الا فلا …………………. عجبى

  9. واحد شاف الامام في المركز الصحي : قال ليه كفارات يا شيخنا الحاصل شنو ؟؟ مالك بيجاي الليلة ؟؟
    الامام قال ليه لا يا ابني جيت احلل السكر . قال ليه بالغة ! السكر دا ما محلل من زمان . شوف لينا طريقة في البنقو ….. القصة بقت كدا

    1. سلام ياناس التفاح اللزرق : الكلام بى الكنايه و لا بى القنايه افكه ، و لاشنو؟؟؟؟؟؟؟؟؟؟؟؟؟؟؟ عجبى

  10. يا أستاذ جبرا لو منتظر فتوى فى بيع وإيجار عداد الكهرباء بتطوووول ، ولو لقيت فتوى بعد الطول ده كله بالمرة حاول لينا فتوى فى الجهاز الإستثمارى للضمان الإجتماعى الذى يستثمر أموال التأمين الإجتماعى وهى مبالغ تستقطع من رواتب العاملين شهرياً، فإذا كان هؤلاء العاملين هم أصحاب رأس المال لماذا لا بستمتعوا بعائد استثمارات الجهاز الإستثمارى، بل هم يدفعون مقابل شراؤهم أى عقار من استثمارات الجهاز الإستثمارى للضمان الإجتماعى .. تقولى شنو وتقولى منو …

  11. صباحاتكم ندية يا السمار ..
    بالغتو لكن يا أخوانا دي أسئلة تسألوها و كمان منتظرين إجابات …… بالغتو عديل كده والله
    جنوبي سؤالك الهدية حا يجاوبوك عليه طبعا دي فالحين فيها جدااااااااااااااااا انتظر يومين تلاته

  12. حقيقه لا احب أحبطك بان الضرب على الميت حرام وان زول بسمعك مافى لكن بالصدفة فى كينيا قابلت سودانى غيور وحاولت اعرفه لكتاباتك لقيتو مدمن وحكى لى قصة دكتور بريفى مدنى والناس مقتنعا بعلاجه ومجرب لكن لو حولك مدنى معناه ربنا يرحم المريض. وذات يوم جابو لى مريض وقرر بس يعملو التحاليل بمدنى. المرافق ليه خرج يكورك والعبادة اصبحت بيت البكاء. فأحسن يا صديقى موضوع الكسره وهيثرو احسن الكل نحو لو مدنى. لان الناس كلها ترتاح لان قبل كده إبليس ذاتو نجا والجرح مازال بدمغاتو.

  13. أخونا جبرا لك التحايا والتمنيات الندية شكرا ليك دايما بتورينا جديد ما يخطر على بال عندى سؤال أوجهه عبرك لأخواننا علماء مجمع الفقه الاسلامي بالخرطوم السؤال جاء على وزن تحريم بيع الفكة ، ألا تنطبق نفس الفتوى على الجماعة بتاعين الرصيد يعني تحول 100 جنيه مثلا لواحد في الأبيض ولا كسلا ويقوموا الجماعة بتاعين الرصيد يشتروه منه ب 90 جنيه/ ما ياهو موضوع الفكة زاااااااتو ولا شنو يا اخواني ؟؟؟؟؟؟

  14. ابو هاني .. سلام
    بيع الرصيد ده حللوهوا قالوا عشان المسألة رصيد مكالمات مقابل قروش وما بيدخل في قروش مقابل قروش ومره سمعت شيخ بيتكلم في المسألة دي في التلفزيون , وإتخيل الشيخ ده ضرب مثل بي انو في طلبه اهاليهم بيحولوا ليهم المصاريف عن طريق الرصيد والطلبه يبيعوا الرصيد عشان يتحصلوا علي القروش !!؟ شفت المنطق ده كيف !!؟
    سوال رقم :
    6- ناس الموية فارضين رسوم معينة شهريا يعني فتحنا الماسورة ولآ ما فتحناها , البيت مسكون ولآ فاضي , الموية في ولآ قاطعة تدفع تدفع , أها رأي الدين شنو في الحتة دي ؟
    7- البلد مليانة فقراء ومساكين وعابرين سبيل وغارمين والاغنياء والفقراء كلهم قاعدين يطلعوا الزكاة ( اختياري واجباري ) ويقوم ديوان الزكاة بدل يوزعها للمحتاجين يقوم يخليهم بي جوعهم واحتياجهم ويصرف قروشهم في بناء الابراج وفي سفر المسئولين وفي التبرع لقنوات فضائية وهمية , فما رأي الدين في هذا ؟
    8- المستشفيات ما فيها دواء ينقذ حياة الناس والاجهزة الطبية معطلة ةالحكومة تصرف القروش في صيوانات ومكيفات بي ملايين الجنيهات عشان تحتفل بي تحرير هجليج ( مع انو فتح مكة ما صاحبه الزخم ده كلو ) , اها رأي الدين شنو التبزير ده ؟
    سؤال هدية :
    س/ زول حلف انو تاني ما يشرب سجاير قام رجع وشرب سجاير , اها يعمل شنو ؟

  15. عدم الشغله يعلم المشاط
    و فتواهم دي المشاط بي ام عينه

    زمان كنت عايش في السعوديه وكان في تلفون الهلل ( الفكه ) وكان الناس زمان افتوا في الكلام دا وبعض العلماء اجازوه
    و البعرف شركه الراجحي المصرفيه كان بدايه كده

  16. المشكلة مع العوامة العملوها للدولار الفكة ما تغطس فى الموية وكده …وهم قالوا أحسن يطلعوا لينا بالفتوى دي علشان الناس ما تحس بالغطس … يعني خلاص بقى موضوع الدين كله فى الفكة وتحويل الرصيد .. رأي اهل الفتوى فى الوالي الكان بيسرق الكهرباء من الجامع شنو … الفتوى شنو فى طريق التحدي البموتوا الناس فيه كل كم يوم .. أظنها تسمية التحدي دي قاصدين بيها أكان راجل امشي فيهو بدون ما تجيك عربية تلحقك أمات طه … ما رأي الدين فى مسئولية الراعي تجاه هذا الطريق … وإعفاء المسئولين من الزكاة والضرائب وشيله من الغلابة … يا جماعة الناس ديل ما حا يفتوا فى حاجة ضد انفسهم منو البيشيل اصبعوا ويتبظ بيه عينو … خلونا يا إخوان منهم وأحسن ندعوا انو ربنا يوديهم فى ستين داهية وتخلصنا منهم … اميييييييييييييين

  17. حاج أحمد السلاوى | رد

    الفاتح .. ماأكثر الفتاوى التى تحتاج إلى إيضاح وتفسير وتعليق عليها من علمائنا الإجلاء الكرام ..والفتوى التى أتمنى أن احصل على تعليق عليها والتى تهمنى كمغترب هى :
    فتوى حول الزكاة على الراتب التى فرضتها علينا حكومة التوجه الحضارى ..وجميعنا قدر درس فى المراحل الدراسية المختلفة عن فريضة الزكاة وما يتعلق بها من أحكام ..
    فتوى حول الضرائب والمساهمات التى ظللنا ندفعها قسراً عبر كافة حكوماتنا السابقة ..ألا يحق لنا أن نتلقى عائداً ولو بسيطاً منها فى شكل إعفاءات جمركية أو ما شابه ذلك ؟
    علماً أننى متأكد أنه لن اجد إجابة على تساؤلاتى هذه ..فقد يتهموننا بعدم الوطنية وعدم الولاء والتضحية من اجل الوطن ..
    ويدوم خيرك يا وطن ..

  18. البروف الحبيب…سلام….
    يفكهم عكس الهوا !!
    والله انا الناس ديل من دخلوا معاهم فلان وفلان عرفتهم ما نافعين !
    بعدين قصة عداد الكهربا دى من زماااان انا متحير فيها ! وسالت محامى فاجاب انو دى اسمها عقود الاذعان الجاهزة ويفترض انك توقع على عقد برضاك !
    لكن اسه مافى عقد ! شالو دا وختو دا واجروا دا ! سنة يا انا !

  19. مصطفى بتاع البرنجية…
    بالكحة ان شاءالله !

    جنوبى..
    بطل سغلاة ول ماسئلتك دى عليك ! اسه فى حد سالك ؟؟دا شنو الما (وطنى) دا ؟؟

  20. صباحكم عسل …
    جنوبي ….. نرجو أن تكون أسئلتك في الفكة وفك التكة فقط وده البيقدرو الجماعة يفتوا لك فيه
    د. شمباتي بالله ما عرفت الناس ديل ما نافعين الا بعد دخلوا معاهم فلان وفلان ….. سجمنا

  21. البروف الحبيب ….
    مبروك علينا وعليك اللوك الجديد ….. ودمت لنا

    1. فعلاً يا مندهش كدا أحسن و بكره كمان أحلا لمان يكون البلا إنجلا.
      مشكور يا جبرا على التجديد.

      1. بمناسبة التجديد انا ما طشييييت
        وقلته ياربي جنوبي عمل تمرد جنوب القمردينه ولا شنو

  22. الاخ جبرا والاخوه الاعزاء
    دكتور دكام ربنا يرحمه مره جاء فى الكهرباء وقف في نص الصاله وعضه اصبعه وقال (احييييييييييي شكيتكوم على الله يا الما قدرته عليكم اشتري منكم العداد وتاجروه لى انا ناس الضرائب قدرته عليهم الا انتو )وبعد اربعه يوم اتوقى فى القاهره اظنها زبحه من ناس الكهربا ء
    كوكو
    سحرتونى بعد وقفنا فى الصف الاول رجعنا الطيش
    دايره لى افتاء هل نحن من ذوات الدم الحار ام من ذوات الدم البارد

    1. بت وراق سلام ، لما تفكرى فى ناس الحيكومه و عمايلهم الزى عمايل الشفع تكونى من ذوات الدم الحار ، و لما تفكرى فى الشفع و عمايلهم الزى عمايل ناس الحيكومه تكونى من ذوات الدم البارد ، الله يبرده عليك زى ما عاوزه ، اهه البرنجيه تانى مافى فرصه انتى و جنونى ، وقال بيسال عن بتاع السكاير احسن حاجه يدى نفسو كف …………….. عجبى

  23. المندهش..
    ما كنت متوسم فيهم خير لكن !

    بت وراق..
    ههههههههههههههههه,جنوبى قادر وبيعملها ! قلتى لى دمك البارد مالو !؟ التمبللللو

  24. وااااي هو ديل انتو ? حالتي دخلت 3 مرات ومرقت ! قلت يمكن الحكومه عملت قمر دين موازي !!
    جبرا ,,, صندوق المشاركه لعب معاي سك سك وغلبني اشارك من الكمبيوتر !!
    الاسامي وتاريخ وزمن المشاركه متداخلين فوق بعض عاملين تشويش للاسم !!
    فما رأي التكنولوجيا في هذا ?
    المندهش ,, الفكه والفك ديل مش غريزه بالله في غريزه دايرا افتاء !
    بت وراق ,, نحنا من ذوات كرويات الصبر البيضاء !!
    شمباتي .. شايفك ما عندك سؤال ! ولا آآ انت ما من ناس ما بسألك وأعتب عليك عشان تقول مهتمي بيك ما بسألك !! تررا

  25. مصطفي .. برنجسه يعني شنو ? ( أعد , سي مي بعد الحصة )

    1. ومضى الوزير في سرد القصة المحزنة قائلاً (أمين عام الديوان أخرج الوزارة من مقرها الذي كان وقفاً بشارع النيل بحجة أن المالية رفضت دفع إيجار المقر.. ومن ثمّ تمت إزالة المباني.. لكنّ وزارة المالية قامت بعد ذلك بدفع متأخرات الإيجار التي بلغت 1.528.551جنيهاً «مليار وخمسمائة ثمانية وعشرين مليوناً وخمسمائة واحد وخمسون جنيهاً: إلا أنّ الاموال تم صرفها على غير شرط الواقف على النحو التالي: 493 ألف جنيه «أربعمائة ثلاثة وتسعون مليون جنيه» مرتبات ومستحقات عاملين 270 مليون جنيهاً «مئتان وسبعون مليون» وقود وكهرباء؟؟ و95 «خمسة وتسعين مليون جنيه» أعمال بر وإحسان.. و95 (خمسة وتسعين) مليون جنيه سلفيات للأمين العام المقال!!! أمّا كثرة الوكلاء على الأوقاف السودانية بالسعودية فقد تسببت في أضرار بالغة أهمها توقف العمل في وقف أبوذر بجوار الحرم بالمدينة المنورة وكان ممولاً من بنك التنمية الإسلامي بجدة، وتوقف العمل في مقر قنصلية السودان بجدة والتي أخرجت منها القنصلية لتوفر تمويل لتشييدها من بنك التنمية الإسلامي أيضاً. وقد تلقينا إنذاراً من البنك بوقف التمويل للوقفين خلال شهرين لعدم التزام الأوقاف بما يليها، وقمنا بجهود خاصة قدتها شخصياً مع الجهات ذات الصلة بالبنك تمكنا خلالها من تأجيل الإنذار وتعطيله حتى نهاية العام شريطة أن توفر الأوقاف ما يليها، وقد قام أحد الوكلاء الذين وكلهم الوزير السابق أزهري التيجاني بإجراء نظارة على أوقاف القنصلية بجدة على أساس أنها أوقاف مهملة دون الرجوع للسلطات السودانية!!، والآن هنالك أوقاف سودانية بأسماء سعوديين لم تورِّد أي أموال لصالح الموقوف لأجلهم الوقف منذ العام 2009، أمّا فيما يختص بالأمين العام المقال فقد كان يتقاضى 60 ألف ريال شهرياً بالسعودية بناء على عقد سنأتي على تفاصيله لاحقاً موقّع بينه وبين الوزير السابق أزهري التيجاني يبلغ راتبه الأساسي فيه 20 مليون جنيه ومخصصات أخرى 20 مليون جنيه، وبناءً على ذلك تقاضى الأمين العام 633 ألف ريال سعودي من أوقاف الخارج بالإضافة لأموال صرفها برئاسة الأوقاف بالخرطوم بالجنيه السوداني.. هذا بالإضافة الى استدانة الأوقاف لمبلغ 6.4 مليون ريال سعودي من الحج والعمرة لتجميع أوقاف الخارج، وبدأ في استلام المبلغ بتوريده 1.3 مليون ريال في حسابه الشخصي بالخارج، وتوالت الدفعيات إلى أن اكتمل المبلغ، والمراجع العام أظهر في تقريره التالي:

      أولاً: «إثنين مليون ومائتان تسعة وعشرون ريال تبديد مال عام». ثانياً: «مليون وأربعمائة ريال اختلاس».. ثالثاً: «خمسة وستون مليون جنيه اختلاس حولت من أوقاف الخرطوم لأوقاف الخارج ولم تدخل الحسابات».. كما حاول الأمين العام المقال وبإستماتة وبمقاومة شديدة تعطيل عمل فريق ديوان المراجع العام.. أمّا الكارثة الأخلاقية الأكبر فهي قيام الأمين العام السابق بعد إقالته بتوكيل وكيلين مختلفين لوقف أبوذر بالمدينة المنورة، فقام أحدهما بتأجيره لمدة 20 عاماً واستلم مبلغ 3 ملايين ريال، ثم قام الوكيل الآخر سمير فلاتة بإيجار وقف أبوذر مرة أخرى).

      1. شكيت مِحنو !! ده كلوا سواها في مال الله والرسول !؟ علي الطلاق ده
        لو لم في مال زول تاني يجهجو جهجهة !! هيييع يا حطب النار اب زرد
        سيل الوادي المُنحدٍر ..امسح اكسح قشو ..

  26. جنوبي …. وااااااااااااو دي حالتها الريحه بس عملت فيهو كده معليش يا مصطفى

  27. هو عداد الكهرباء براهو البتشتريهو وياجروا ليك ، ما قطعة الارض بتشتريها ويكتبوا ليك فى العقد انه عقد ايجار بين الحكومة وبينك وعنده مدة محددة وبشيلوا فيهو عوائد ، والغريب يكون عندك حق البيع فى بيكون مؤجر حاجة ويبيعها.

  28. الحبيب

    الملس ماشه بعيييييييييببيد كده ليه ماعندك خط التلفون تشتري وتدفع ايجار برضك دحين الفكه الاسلامى عفوأ ناس الفقه الاسلامى ديل حقو يشوف ليهم زاتو زول يفتى ليهم في شرعيه مجمعهم ده

  29. جنوبى…
    هيييييييييييييييييييي,,ما معانا سيهات بعد الحصص !

    1. يا شمباتي .. يعني عاجبك البزار ده !؟انا وبت وراق نساسق شهر وتجي
      تتشال بالطريقة دي ..
      المندهش .. ياربي الريحه ولآ الفتوي .. وليت تاء الفتوي تبقي سين ..

  30. ههههههههههه,ولا تزعل,بس نادونى ادرس معاكم ! وى وى وى

  31. وعايزين فتوة جادة كمان في بيع الدولار. هل هو من بيع المثل ثانياً أليس ذلك عملاً يضر بمعيشة العباد اذ يتحكم في في سعره قلة من الناس اذاً هذا من باب الأضرار بالناس.  

  32. الفكة الفكة طيب نلقاها وين المنفذ الشرعى الوحيد بنك السودان جوار عمارة الشركة العربية شباك رقم عشرة.وبعد سل الروح تصل الشباك رقم عشرة نطلب فكة نفاجة بان اقل كمية يمكن صرفها مبلغ 2500000 جنية وتقديم من الساعة9الى10صباحأ والله على ما اقول شهيد الحل شنو بس افتونا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: