أحسب أن

هذا ويقام المأتم بمنزل الفقيد بين خطى طول (38.24 21.4) دقيقة، وخطى عرض (8.45 23.8) ….. إنا لله وإنا إليه رأجعون.. قدمنا لكم سيادتي وسادتي مستمعينا في كل أرجاء الكون الفسيح نشره أخبار الوفيات من الأذاعة ( الكونية)
فور سماع نبأ الوفاة تقاطرت الجموع من كل أنحاء الكون الفسيح يعتصرها الحزن والألم والأسي .. نعم.. أخيراً تم نعي ( المرحوم) رسميا بعد رحلة شقاء وعذاب وألم وجحود ونكران من أبنائه.. مات المرحوم بعد فشلت كل المساعي في علاج جراحة النازفه.
– المرحوم كان بشتكي من حاجة ؟
– هسع لمن مات وإلا زمان؟
– زمان كان عندو شنو وهسع الحصل ليهو شنو؟
– والله المرحوم كان زمان كويس وفي أمانتى الله … عندو شوية مضاعفات بسيطة وأولادو القاعدين هنا كانوا قاعدين يعالجو فيهو وشوية شوية قعد بتحسن .
– وطيب الحصل شنو بعد داك ؟
– الحصل إنو عندو ( أولادو) تانين (فجأتن) جو  قالو العلاج دا ما بنفع وعاوزين يعالجوهو بى (كتاب الله) و (الرقية الشرعية) عشان ينقذوهو ، قاموا ( زحوا) اولادو القاعدين يشرفوا على علاجو واستلموا هم المسألة والحاصل براك شايفو
– بإستغراب) شنو يعني أهملو فيهو؟
– والله ما أشتغلو بيهو شغله.. همهم كلو في (العقود السرية) والحسابات (الخارجية) والمدن الرياضية والخطوط (الجوية) والتقاوى والأقطان والما بعرف شنو !
– أها و ما قاعدين يصرفوا على البيت؟؟
– عليك أمان الله ( البيت) من عدم ( الصرف) بقت حالتو صعبه.. يوم الكهرباء قاطعة.. يوم المويه قاطعة.. يوم أكل مافي.. ( الأولاد) خلوا المدرسة عشان المصاريف

– وأولاد المرحوم التانين ديل ساكتين كيف ؟
– والله ما سكتو .. لكن تقول شنو بعد قروش أبوهم كلها (إتلغفت) وحالة ( أبوهم) بقت خطيرة والبيت بقى ما بنقعد من عدم ( الصرف) عليهو.. كلهم الاغترب إغترب والقاعد عاطل بدون شغل قاعد اليوم كلو (مركلس) و(الفكت منو) قعد ليهو في ( صينية) !
– وأولادو العاملين عاوزين يعالجوهو ديل هسع وين ما شايفهم في الصيوان.. يكونوا مع الجثمان في المستشفى

-جثمان شنو عليك أمان الله مما قالو ليهم ابوكم مستحضر واحدين سافرو ليك  ماليزيا وواحدين مشوا ليك     بانكوك  وواحدين الأمارات !

 – وبعد الحالة ما وصلت كدا جيرانكم  ديل ما قاعدين يساعدوكم؟
– يساعدو منو ؟ أي قروش يجيبوها لينا ( تتلحس) أول بأول…
– طيب ما يجيبوها  أكل .. ومعلبات ( يغيثوكم ) بيها ؟
– عليك أمان الله يجيبوا المعلبات الليلة.. بكره تلقاها قاعدة تتباع في (سوق ليبيا)
– والله ديل ناس عجيبين خلاس
– أقول ليك حاجة هسع دا مش البكاء بتاع أبوهم عليك أمان الله البرسلوهو يجيب ( الخضار) تلقاهو طلع حقوه بره.. والمشى جاب (التلج) تلقاهو ختا ليهو كم (لوح) زيادة.. والمشى أجر ( الصيوانات) تلقاهو عمل ليهو  (فاتورتين) .. ( مواصلاً) أنت قايل المرحوم دا مات بالساهل؟
– هسع قلت ليا اولادو ديل كلهم سافروا وللا في ناس منهم قاعدين عشان نديهم الفاتحه؟

-شوف المسافرين ديل خليهم ماخلاص مسافرين … لكن أنا أوريك القاعدين … شفت أي زول لونو (رايق) وفاتح ولامع وجضومو ( نايره) و ( مدغلب) ولابس نضيف وسايق ليهو عربيه جديدة وفاخرة وعندو (العلامة ديك في جبهتو) .. دا وأحد منهم أديهو الفاتحة طوااالي..
– وطيب أولادوا التانين أعرفهم كيف؟
– أولادو التانين تلقى الواحد منهم قاعد يكلم في روخو و( عضام وشو طالعة) ولابس ليهو جلابية ( شربانه) وفيها كم ( فتق) ولابس ليهو في كرعينو ( سفنجة) مقطعة وألا مركوب مقدد وعيونو (ورمانه) من البكاء
تركت ( محدثى) وذهبت إلى بداية ( الصيوان الكبير) حيث كان فى مقدمة ( الصيوان) أولاد المرحوم (المرتاحين) يقفون صفا من كل جانب يستقبلون ( كبار الزوار) والوفود الأجنبية.. المعزية.. وهم يلبسون الجلاليب (الزبدة) البيضاء .. والشالات (المطرزة) والعمائم (التوتال الأصلى) يتكئون بيد على عصى (الأبنوس) المزركشة (بالعاج) وباليدالأخرى على (المسابح) متعددة الأشكال والأنواع … وقد إنتهزها (واحد منهم) فرصة  فقام بوضع تربيزه فاخرة أمامه عليها دفتر وقلم لإستلام الكشف (ما بالعملة الصعبة وكده)  ! بينما  كان أولاد المرحوم الآخرين بثيابهم المتسخة (المكرفسة) يقومون بتقديم الشاي والقهوة والماء البارد للمعزين وهم في حالة الحزن والشحوب والإعياء ..
بعد صلاة المغرب تم تفكيك قطع الصيوان على الأرض حتى تستخدم لأداء الصلاة عليها.. وبعد أن قام الجميع بأداء صلاة المغرب وبينما كانت أسرة المرحوم تتداول حول من سوف يقوم بإلقاء (كلمة الأسرة) بعد أن تم رفع الفراش تقدم (واحد من الجماعة) نحو الصدارة :

– بسم الله الرحمن الرحيم وبه نستعين والصلاة والسلام على أفضل المرسلين سيدنا محمد وعلى آله وصحبه أجمعين .. أيها الجمع الكريم (أحسب أن) :

– (صوت يقاطعه) : إنتو تاااني .. هو بلا (أحسب أن) بتاعتكم دى الكتل المرحوم شنو؟

كسرة :

(أحسب) أن البركة فينا (إن شاء الله) وجزاكم الله كل خير !!

كسرة ثابتة :

أخبار خط هيثرو شنو(ووووو)؟

Advertisements

34 تعليق

  1. برنجيييييييييييييييييييييييية

  2. وتاني برنجيييييييييية

    1. يا أناااااااني !!
      طيب ما كنت تكتفي بالاولي وتكتب شريكي الله والرسول ..

  3. البروف والسمار الكرام ….
    وإنفض سامر جمهورية أمازونيا والبركة فينا وفيكم والفقد واااااااحد

  4. أحسب أن أبوي المرحوم، مات وخلا كمشتو تحت السرير، عشان كدا أولادو جاعو وعينم طلعت، ولا إحتمال يكون شالوها أولادو النايرين وشغالين بيها غرف ولغف ولهف (أفتح الحرف الأول وأكسر التاني وسكن التالت)

    كسره:
    وين ناس الحلة دي، كوكو وجنوبي وبت وراق، وأب أحمد،؟؟؟ يا ربي يكونو في الصيوان

    1. جنوبي تطير عيشتو يا مهند هم ديل ما دننا فرقة ..!ان شاء الله
      عمرو كلو يكون مندهش وفاتح خشمو كده وماشي …
      اسمع مهند بقي يجمعوهو في جياد و لآ شنو ؟؟؟؟

      1. جنوبي حبيبي ….
        ( أحسب أنه ) أنا وإنت ود. شمباتي (جمعاً ) (إن شاء الله تعالى ) ….. تهليل …. تكبير ….. هييييييييييي
        وبالمناسبة الإندهاشة بتاعتي بقت دائمة ومتلازمة يعني زي متلازمة داون كده والكان السبب شيكتو على الله وياخذ لي حقي منو حتى لو كان من حق كشف البكا الحايمين يجمعو فيه بالعملة الصعبة … شي دولار وشي ريال وشي درهم و البجي منهم مرحب بيهو

    2. السلام عليكم ، الاخوان و البرف ، مرسل السوق من الصباح بدرى ، ست البيت عندها ضيفان ، مهند جياد ناس الحله دى الجد المغتربون ، ناس د/ شمباتى و حاج السلاوى و ود الخلا و سنكل و بيقوفنش وابكرون و هلمجرا ، كان لى صديق يدعى د/ ياسر مجابدنا فى البرنجيه ، لمن ظهر لى جنونى و بت وراق و اب احمد …………………..عجبى

  5. الأخ الكريم الفاتح و السمار الكرام . . .
    لكن الخبر دا نهايتو غير كدا حسب كلام “عثمان سيد الدكان و خالد ود الجيران”. قالو ليك إنو أولادو الكانو مسافرين برات البلد جو قبل البكاء بأيام وهم و أولادو القاعدين في البلد جيعانين و عريانين ، شالو العصي و السكاكين و قالو لأولادو السمان الراجل فيكم يجي البيت دا تاني ، و طردوهم من البيت. لكنهم كانوا شدااااد ، عرفوها حتحصل ، قامو طلعو عقشهم و حاجاتهم من البيت أول ما عرفو أخوانهم جايين زعلانين.
    يعد ما طردو أخونهم السمان من البيت ، قامو جابو لأبوهم الدكاتره من بلاد بره ، الدكاتره قالو ليهم أبوكم دا بس جيعان ، لكنما عندو أي مرض. ومشو زرعو ليك ما خلو حاجه وربو البقر و الخرفان ووقعو ليك في أبوهم خضارات و لحوم و جداد و حليب. حتى قال ليك الجيران ظاااتم بقو ياكلو معاهم.
    أبوهم من شدة ما بقا تمام التمام قال ليك مفكرين حسه يرجعو ليه كرعينو القطعوهم ليهو أولادو السمان . لأنهم سألو الدكاتره و الدكاتره قالو ليهم طالما الكرعين سليمه ممكن نرجعها في محلها.
    هديك حسه أولادو الكانو مسافرين كلهم قاعدين معاهو و حالفين تاني ما يفارقو أبوهم.

    و طبعاً ” أولادو السمان قالو إنهم بيحتفظو بحق الرد في الوقت المناسب”.
    يا جبرا دايرين لينا فتوى حول ضرب البرادو في بورسودان.

  6. ‏(ولنبلونكم بشيء من الخوف والجوع ونقص من الأموال والأنفس والثمرات ‏وبشر الصابرين
    الذين إذا أصابتهم مصيبة قالوا إنا لله وإنا إليه راجعون)‏

  7. علي سنكل … تحياتي
    بس إنت أظنك غلطان وده ماكان كلام عثمان سيد الدكان و خالد ود الجيران لأن الزول المامات داك جارنا ولكن الراجل بتاعنا مات من زماااان وحتى القبر بتاعو جات طيارة أمس القريبة دي وفكت فيهو صاروخ …. تخيل !!!

  8. جبرا … خلاااااااص ترمتو وارتحت !!؟
    نحنا ما دايرين ندفنو اصلو, دايرين نحنّطو .. ولآ اقول ليك دايرنو
    واقف زي سليمان لامن الارضة تقنعنا …
    قال مات قال علي الطلاق ما مات وياما ناس كتار بفيقوا في البرود
    ابونا ده حبة موية في وشيهو ويقوم زي الحصان وزح اولادو السمان
    ديل عشان قافلين عليهو الهواء…
    بالمره قول لعابدين درمه جارك ده اتمهل لامن نتأكد …

  9. يعنى ما رفعتوا !!!؟؟

  10. المندهش…
    انا بأمن مع جنوبى و (احسب انو) حركتك ما ظربفة ولا سياحية خالس خالس !
    اعمل حسابك المرة الجاية فوق راسك….كو

  11. جبرا والسمار .
    سلامات .
    أنا حالتى جيت الفراش متأخر لقيت ناس الصف الاول مابشيلو فاتحة لكن رافعين السبابة فوق وبيكبروا قلت ياربى دة بيت البكا ولا إفتتاح مشروعى حضارى ولمن مشيت ناس الصف التانى شلت معاهم الفاتحة لكن علامات الاسى تبدو ظاهرة على وجوههم الصامتة لكن ناس ورا ديل لقيتم غالبن الصبر يكوركو ويحيحيو ويترمدودموعم سايلة وحفايا .
    ولأنى كنت لابس جلابيتى السكروتة والعمة التوتال والشال الاخدر والبمبقة الصفرا مشيت قعدت مع ناس الصف الاول وأول ماجابو الصينية قلت (بسم الله . كل ياكمى قبل فمى .) …

  12. السلام عليكم

    ومضى الوزير في سرد القصة المحزنة قائلاً (أمين عام الديوان أخرج الوزارة من مقرها الذي كان وقفاً بشارع النيل بحجة أن المالية رفضت دفع إيجار المقر.. ومن ثمّ تمت إزالة المباني.. لكنّ وزارة المالية قامت بعد ذلك بدفع متأخرات الإيجار التي بلغت 1.528.551جنيهاً «مليار وخمسمائة ثمانية وعشرين مليوناً وخمسمائة واحد وخمسون جنيهاً: إلا أنّ الاموال تم صرفها على غير شرط الواقف على النحو التالي: 493 ألف جنيه «أربعمائة ثلاثة وتسعون مليون جنيه» مرتبات ومستحقات عاملين 270 مليون جنيهاً «مئتان وسبعون مليون» وقود وكهرباء؟؟ و95 «خمسة وتسعين مليون جنيه» أعمال بر وإحسان.. و95 (خمسة وتسعين) مليون جنيه سلفيات للأمين العام المقال!!! أمّا كثرة الوكلاء على الأوقاف السودانية بالسعودية فقد تسببت في أضرار بالغة أهمها توقف العمل في وقف أبوذر بجوار الحرم بالمدينة المنورة وكان ممولاً من بنك التنمية الإسلامي بجدة، وتوقف العمل في مقر قنصلية السودان بجدة والتي أخرجت منها القنصلية لتوفر تمويل لتشييدها من بنك التنمية الإسلامي أيضاً. وقد تلقينا إنذاراً من البنك بوقف التمويل للوقفين خلال شهرين لعدم التزام الأوقاف بما يليها، وقمنا بجهود خاصة قدتها شخصياً مع الجهات ذات الصلة بالبنك تمكنا خلالها من تأجيل الإنذار وتعطيله حتى نهاية العام شريطة أن توفر الأوقاف ما يليها، وقد قام أحد الوكلاء الذين وكلهم الوزير السابق أزهري التيجاني بإجراء نظارة على أوقاف القنصلية بجدة على أساس أنها أوقاف مهملة دون الرجوع للسلطات السودانية!!، والآن هنالك أوقاف سودانية بأسماء سعوديين لم تورِّد أي أموال لصالح الموقوف لأجلهم الوقف منذ العام 2009، أمّا فيما يختص بالأمين العام المقال فقد كان يتقاضى 60 ألف ريال شهرياً بالسعودية بناء على عقد سنأتي على تفاصيله لاحقاً موقّع بينه وبين الوزير السابق أزهري التيجاني يبلغ راتبه الأساسي فيه 20 مليون جنيه ومخصصات أخرى 20 مليون جنيه، وبناءً على ذلك تقاضى الأمين العام 633 ألف ريال سعودي من أوقاف الخارج بالإضافة لأموال صرفها برئاسة الأوقاف بالخرطوم بالجنيه السوداني.. هذا بالإضافة الى استدانة الأوقاف لمبلغ 6.4 مليون ريال سعودي من الحج والعمرة لتجميع أوقاف الخارج، وبدأ في استلام المبلغ بتوريده 1.3 مليون ريال في حسابه الشخصي بالخارج، وتوالت الدفعيات إلى أن اكتمل المبلغ، والمراجع العام أظهر في تقريره التالي:

    أولاً: «إثنين مليون ومائتان تسعة وعشرون ريال تبديد مال عام». ثانياً: «مليون وأربعمائة ريال اختلاس».. ثالثاً: «خمسة وستون مليون جنيه اختلاس حولت من أوقاف الخرطوم لأوقاف الخارج ولم تدخل الحسابات».. كما حاول الأمين العام المقال وبإستماتة وبمقاومة شديدة تعطيل عمل فريق ديوان المراجع العام.. أمّا الكارثة الأخلاقية الأكبر فهي قيام الأمين العام السابق بعد إقالته بتوكيل وكيلين مختلفين لوقف أبوذر بالمدينة المنورة، فقام أحدهما بتأجيره لمدة 20 عاماً واستلم مبلغ 3 ملايين ريال، ثم قام الوكيل الآخر سمير فلاتة بإيجار وقف أبوذر مرة أخرى

    1. يا خلف الله كوكو …. ياخ ما عذبتنا
      الموضوع بتاعك ده كان قبل خراج الروح … جايبو تااااااني مالك

      1. المندهش .. يعني كوكو اخوكم ده ما تودوهو لي فقير يقرا ليهو ..الولد ده تخلوهو
        ينضم بره الرأس كده لا بتين ..
        جبرا ده الظاهر فتر مننا قدر ما يقول لينا ابوكم عيان , اخوانكم كعبين والماسك
        الحواشات قعد يسرقكم وحتي الممسكنو الجامع قعد يشيل المصاحف يبيعا , وكت
        لقانا ما بنتحرك كتل لينا ابونا عديييييل ..اخوانا اولاد المره الجنوبية بختهم شالوا
        حقهم بيع وشراء وسجلوهوا وطلعوا شهادة بحث دولية كمان ..
        ياربي بي اسمي ده كان مشيت ليهم ما بيتبنوني ويعتبروني من اطفال المايقوما
        فرع جوبا ..؟
        انتو تعالوا !! شفع دار المايقوما ديل ما فيهم جنوبييين ؟ أها ح يودوهم وييييين ؟

  13. يا عزيزي الفاتح
    الجماعة النايرين ديل دفنوا ابوهم قبل روحو تطلع لانهم مستعجلين على موته . الله يلزمنا الصبر نحن الجعانين المبشتنين

  14. أخوي جبرا .. ان شاء الله البركة فينا وفيكم ..الفقد واحد ..والله المرحوم وجعني شديد .. مشيت أعزي مرتو .. أصلهم جيرانا .. لكن مافي أي تواصل بيناتنا .. مع انو النبي وصى لسابع جار .. هم وين ونحن وين .. لكن حق اجيرة لآزم نقوم بالواجب .. ومشيت لأول مرة أدخل بيب جيرانا .. والله إتخلعت وقلبي وقف .. لقيت ليك مرت العدة حابسة جنس حبسة إن شاء الله حبست السرور .. البيت 5 نجوم والإسبلت يقول يا ليل .. ومراتب الهاي سليب مجدعه في السيراميك .. وشاي الفواكه مدور .. ومرت المرحوم بس العروس .. داك يا اللبس الما خمج .. والله ما تقول بيت عزا .. ووطبعا المرحوم مات الصباح زي ما عارف .. وحضرنا الفطور ,, انا كنت قيلاهو فطور زي فطورنا العادي .. والله العصيدة سخنوها في المايكرويف بسرعة عجيبة .. وباقي الصينية مافي داعي أقولها ..لأنو في اللحظة دي دخلت واحدة تنوح وتولول .. ومعاها بناتا يسووا في الحي ووب .. .. لكن ما بشبهوا أهل البيت ديل .. هدومهم مقطعة ووسخانة وحالهم بالبلا .. واحدة سألتني ديل منم يا اختي .. الببكن بي وجعة ديل .. قلت ليها .. والله ما عارفاهم .. أظنهم أهل المرحوم .. وأستمرن العزايات …يا حليلك يا ابوي .. هملتنا وجدعتنا .. يا حليلك يا ابوي في حياتك اتلتلنا ..وإتعذبنا .. وسافرنا واتغربنا .. وحسي بعد الحصل دا يا ابوي نسوي شنو .. كيلو اللحمة قالوا بقى ب 50 .. والسكر مااافي .. وعلبة الببسي بي 3 جنيه ,, والبنازين دالك خلي حكايتو .. وأخوانا اولاد الجنوبية قاطعوووونا وفرزوا عيشتهم ومشوا سووا ليهم بلد تاني . وعيالك المرتاحين ديل ( حسبنا الله ونعم الوكيل عليهم ) كان انت حي .. ولا ميت ما فارق معاهم ..ماهم فالحين كوشوا على الورثة كلها .. وخلوا لينا بس البكا والنواح.. الله يرحمك يابا ويوسدك الباردة
    فجأة شفت ليك مرت العدة قامت من محلها .. ونهرت ليك العزايات جنس نهرة ..الجابكن شنو ؟؟ انا ما قلت ليكن ما دايرة اشوفكن في وشي .. ما قلنا ليكم ما تظهروا في حياتنا .. يا فقرانين يا مقطعين ..اسمعي انتي يا مرة يا متخلفة نقيتي إنتي وعيالك في المرحوم ..ما عندنا .. ما عندنا ..ساويينا بي بمرتك وعيالك التانيين ..لما قصرتو عمرو .. أها مات وريحنا وريحكم ..شوفوا ليكم زول تاني تنقوا فيهو ..
    أسمعي يا اختي المرحوم دا أكلتوا خيرو انتو .. ونحن كاننا لا عيالو ولا بعرفنا .. انتو خليتو شنو ؟؟ ما عصرتو وصفيتو لما خيرو كمل ..!! وحتى كان ربنا نفخ فيهو الروح من جديد يا ربي بنلقى لينا معاكم فرصة .. والله ما أظن ..

  15. السلام عليكم ، فتحيه الفكى ، اللون التانى ده جبتى من وين و لا فير آند لفلى ، قالوا حنة البكاء شفتيها عند مرت العده ولم تذكريها السكر فى بس بى خمسين زى اللحمه ، و الناس المرتاحين ديل انتو حاسدين ولا بقرانين ، اريتنا بى حالهم بعد العمر ده ، سعال : زمان قلنا كل واحد يدوهو فرصه بالدور ، لكن الظاهر احسن ندكها و تتوزع من جديد ، واحد دك …………………. عجبى

  16. واحسب ان الاولاد الثانيين ديل قيامتهم قربت الا بعد شنو ؟؟ بعد ما اتفرتق البيت وكل واحد اخذ من بيت جدو شيتا لا بموت ولا بخلي الواحد واقف على حيله.
    وتاني احسب انه ده لزوم الخطة الثلاثية لمعالجة اثار الانفصال وكمان نحن محصنين من الازمة المالية , وما طالبني حليفة لو العيال التانيين ديل ما جو كان وصل درجة حرارة الوالد لعشرة الاف بمقياس المشروع الحضاري.
    والفااااااااااااااااااااااااااااااااااااااااااااااااااااااااااااااااتحة الي ما تقفل تاني

  17. الحبيب

    والله ياهو الحال وربك يستر من الجاي

  18. خبر عا ججججججججججججججججججججججججججججججججججججل
    بت وراق من سمعت الخبر غمرانه

  19. بت وراق … سجمك خلاص أصحي
    أنا هسع جيت من المحكمة عشان ( عايز حقي ) في الورثة ( كاااااااش ) لقيت ناس كتيرين برضو عاوزين حقهم ولكن مولانا القاضي قال الموضوع طلع من يده وأرسلوهو لمحكمة العدل الدولية عشان هم ما بقدرو يصرفو للتلاتين مليون زول ومحتاجين لقوات أممية .

  20. وااااى ما تصحوني احييييييي خلونى ابكي ابوووووووووي ووواب علي من الجاتك يابه وكر على من خبر السواد
    ويينك يابووووي الليله وماشي وين خالينا وواب على وكر على يايابا انا الراجياك وووواى انا امنتظراك اربي فى ارضك
    اولادى وانا العشمانه فيك رغم البسوه اولادك دايراك تشد حيلك تادبن وتوريهم مقامن مااااااااقايلاك مفارق الجاك كتتتير ووجعك كبييير يابووووووووووى نمشى وين ونطييير وين ديل ماخلوا لينا شي احىىىىى اتكسر المرق وتشتت الرصاص
    واااااى يابوووووى 23 سنه والعشم ما اتقطع الليلله مالك ماشى مخلينا اهئ اهئ اهئ اهئ اخخخخخ جيف
    كسره
    الحقوها بت وراق غمرت تاااااني

    1. كده يا دوووب انا اقتنعت !!
      نادوا عابدين درمة خلوهو يدفنو ويدفنا نحنا ذاتنا معاه ..
      خليكي غمرانه الفايقه ليها شنو !!؟
      بالمره الحقوا اخوكم الجنيه داك مشي علي البحر وهو مابعرف العوم !!

  21. حاج أحمد السلاوى | رد

    ومن حسه أقول ليكم .. كل واحد يلحس كوعه أكان حصلتو حاجة ..

  22. ياها البقت
    الدكاكين التملي تفضي والسماسرة يسمسرو
    القوانين ليها سستم والبناطلين ليها سستم
    والبنوك الفيها بستم من سويسرا لماليزيا
    بالسفارات والعمارات والخبارات
    البسفو التين يسفوهو والبحتوا الراب يحتوا
    بعت الارض بترابا باكر تبيع ابوكا
    ما بنعك عرق الزنوج ولا برقعك لبن العروب
    ياهو عوس ايدك

  23. تعديل (ما بنفعك عرق الزنوج)
    شن فايدة مديدة الحلبة والويقود بشيلوا ال…………
    شكرا يا القدال
    هسع الشارع دا ماشي لوين يا جنوبي (بالمناسبة حسابي القديم قفلوهو– لكن من دمي ما قدروا فصلوهو)

    1. كتلوني ولسه حي .. ده شارع الحرية يا وداك السجانة يا وداك الحلة الجديدة ..!!
      اسمك ده زكرني نكتة الزول اللاقوهو الرباطية في خور ابو عنجه .. بحكيها ليك بعدين , ولآ اقول ليك ما بتتحكي والله …

  24. يا ناس استغفروا ربكم البكاء ما برجع حاجة تاني لكن لازم اولاد المرحوم الفقرانين يقوموا من تاني علشان يمشوا لقدام … وما أظن لو ختوا الرحمن فى قلبهم فى حاجة حا توقفهم بس يقولوا يا باسط والأمور حا تمشي فى صالحهم وما في سيلا وقفوا جبل ولا شنو

  25. حاج أحمد السلاوى | رد

    يا جماعة … رفع الفراش متين ؟

  26. با لله يا جبرة ما تنسج ليك واحدة عن كيجاب بتاعنا دا اقصد جنيهنا العوام ده. مرة يقطعوه بحر ابو رووف ومرة البحر الاحمر ومرة المانش وهسع بي ضعفو وهزالو دا قال ليه لازم تعوم وتقطع الاطلسي تجيب لينا الدولار من ايدو يا جماعة حرام دا ما بقدر يستحمي من الحمي والملاريا والتايفويد عايزين تعوموه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: