دعم الرادار … تاااني

• 11 فبراير 2009م (حسب تقرير أوردته مجلة التايم) قامت عشرات من الطائرات الإسرائلية المقاتلة والطائرات بدون طيار بالهجوم على قافلة شاحنات بالقرب من الحدود المصرية السودانية وبحسب ما جاء بالتقرير فإن طائرات إف 16 قد قامت بقصف القافلة المكونة من 23 شاحنة في حين قام عدد من طائرات إف 15 بتوفير الغطاء الجوي لها .

• 5 أبريل 2011م قام الطيران الإسرائيلي بقصف عربة (سوناتا) بمنطقة (كدنايب) على بعد 15 كيلو جنوب مدينة بورتسودان وقريباً من المطار مما تسبب في مقتل المواطنين السودانيين (أحمد جبريل) و(عيسى هداب) الذين كانا على متنها وأكدت الخارجية السودانية حينها بأن الهجوم قد تم بواسطة طائرتين إسرائيليتين من نوع أباتشي أمريكية الصنع وأشارت الخارجية حينها بأن الطائرتين قد أطلقتا 16 صاروخاً وقد وجدت على مسرح الحادث ثلاثة صواريخ لم تنفجر وعدداً من كبيراً من القذائف المضادة للدبابات والبشر !

• 15 ديسمبر 2011م قامت إسرائيبل بغارة جوية بإستخدام طائرة حربية إستهدفت 6 سيارات لانكروزر أصابت منها سيارتين مما أدى إلى مقتل 4 مواطنين كانا بداخلهما .

• 18 ديسمبر 2011م (يعني بعد 3 يوم بس) : قامت إحدي الطائرات الإسرائلية بقصف سيارة (بوكس) كان يقودها أحد المواطنين الذين يعملون في التنقيب عن الذهب وقد قتل كل من كان بداخلها .

• 22 مايو 2012م تم تفجير عربة ماركة برادو عند مدخل مدينة بورتسودان مما أدى إلى تحطمها تماما ومقتل قائدها (ناصر عوض الله) وقد أفاد شاهد عيان هو المواطن (شلهمة مضوي أحمد) والذي كان يسير بسيارته خلف (البرادو) بأمتار قليلة بأنه فجأة وبدون مقدمات سمع إنفجاراً ضخماً في السيارة التي أمامه بسبب أجسام إخترقتها من أعلى جعلتها كرة من اللهب !

إذن عزيزي القارئ ها هي إسرائيل تحرز الهدف الخامس في دفاعاتنا الجوية وتصوب بدقة متناهية على عربة برادو موديل 2011م تحمل الرقم (9383ب ح 1) فتحيلها وصاحبها إلى كرة من اللهب ، وأين.. فى (بورتسودان) المدينة التى بها قيادة الدفاع الجوى وهو السلاح الوحيد المناط به المحافظة على الأجواء من الإنتهاكات !

هكذا يا سادتي الأعزاء أصبحنا (ملطشة) تدخل الطائرات المغيرة إلى أراضينا و(تمرق) زى الما حصلت حاجه ! لا رادار (يشوفا) ولا دفاع جوى (يضربا) ولا طيارات (حربية) تتعقبها !!

5 غارات جوية في أوقات متفاوته وعقب كل غارة يتم ذاااات السيناريو :
– بيان من شرطة ولاية البحر الأحمر يوضح الحادث ويؤكد بدء التحريات لكشف ملابساته
– السيد والي البحر الأحمر ورئيس لجنة الأمن بالولاية يصرح بأن لجنة أمن الولاية تتابع إجراءات التحقيق والتحريات في الحادث .
– السيد مدير شرطة الولاية يستعرض البيان الذي أعدته لجنة أمن الولاية حول الحادث ، مبيناً أن الشرطة قد قامت بفتح بلاغ تحت المادة (51) من قانون الإجراءات الجنائية ويؤكد بأن فريقاً تقنياً يضم الفريق خبراء من القوات المسلحة والأدلة الجنائية والمباحث المركزية سوف يصل من الخرطوم لمنابعة الأمر .
– وزير الخارجية يصرح بأن السودان يؤكد (شوفو يؤكد دى) على إحتفاظه بحق الرد على هذا العمل الإجرامى !
لا تسألني عزيزي القارئ عن بقية السيناريو فهذا السيناريو ليست له بقية يعني بالعربي كده (نهايتو هنا) ! فبعد كل ضرية من الضربات (البقت كتيره ومسيخة) يتم ذات السيناريو لدرجة أن السيد وزير خارجيتنا هذه المرة ترك حكاية (نحتفظ بحق الرد) وصرح قائلاً بان أسلوب تنفيذ الضربة يشبه الأسلوب الإسرائيلي الذي تمت به الضربات السابقة (متعودة داااايمن) !
وأنا (أقوقل) لمعرفة عدد هذه (الضربات) شاهدت (فديديو) للسيد وزير الدفاع على موقع (اليوتيوب) وهو يتحدث عقب ضربة (العربة السوناتا) قائلاً (ما معناتو) بأن الضربة تمت حوالي الساعة تمانية مساء والناس في صلاة العشاء ، والطائرة المغيرة (أنوارها مطفية) عشان كده إستغلت الظلام الدامس وكمان الطائرة حلقت في مستوى منخفض لا يمكن لراداراتنا تغطيته ! http://www.youtube.com/watch?v=IMqQOky1je4

وكأني بالسيد وزير (دفاعنا) وقد أوتي به مدرباً لفريقنا القومي لكرة القدم يقول مصرحاً على أجهزة الإعلام (حارس المرمي بتاعنا ده تعبان في الكرات الأرضية كان شاتوا ليهو أى حاجة بي تحت بتدخل) وهذا لعمري تصريح من شانه ان يستفيد منه الخصم !
كما قلنا في مقال كتبناه عقب الضربة (رقم تلاتة) .. يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقوا يدخلوا ويكتلوا ويمرقوا زى ما عايزين وما عارفين القصة دى (آخرها متين؟).. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى (اللى خلفونا) فى التعليم والصحة والعلاج والشنو ما عارف .. عشان كده أنا بقترح على الشعب الفضل (تااااااني) يعمل ليهو صندوق يحل بيهو المشكلة دى عشان ما نبقى (ملطشة) ويسميهو زى ما إقترحنا زمااان (صندوق دعم الرادار) بس يمسكوهو لى زول (قوى وأمين) عشان ما يلحق أمات طه !

كسرة :
تنبيه : لا توجد (ما) في السطر الأخير ..

كسرة ثابتة:
أخبار خط هيثرو شنو(ووووو)؟

Advertisements

44 تعليق

  1. برنجييييييية

  2. كوكو ( نج ) دي شنو ؟؟؟؟

    1. اسلم عيك د ما اخصار رجي ظاطا ، من شقتكم قدت تكم

  3. كوكو …. إنت شارب حاجة ولا الرادار بتاعك ما قادر يحدد ….ده شنو الكلام البتكتب فيهو ده ؟؟

    1. السلام عليكم ، البرف و الاخوان ، المدشدش ، نج دى قلب البرنجيه ، يعنى باختصار كده برنجيتك دى درجه تانيه ، و حليل الشراب ، سمعت بالكرفوازير و لا الهنسى و لا الدمبل و البلاك ليبل ، الكامباري و غوردون ، ولا اقول ليك لوفن بروى و اوجستينر و لا الدنكل ، اصلو نحنو بتاعين دورى مش كاس ……………………. عجبى

      1. كوكو !!! ده شنو ده !!؟ لاكين ما لقيتك معتّق !! وييين الطعمية بالسمسم وبالشمار الاخضر وين المِش والطرشي وين المخلل والبيض المسلوق احيييي منك خليتني زي وزير الدفاع كدي اديني منديل ..!

      2. جنونى سلام ، ريقك جمم ، ظنيتك بتاع مزز ، الخواجات اول ما تصل بلدهم اول نصيحه يقدموها ليك ما تشرب مويه !!!! طيب اقعد عشطان ساكت …………….. عجبى

  4. لو فى دولة تانية وزير الدفاع الا يشوف ليه جحر يدسه فيه لانها فضيحة بمعني الكلمة .. طيب وين وزير المالية البقول الميزانية جلها ماشي للدفاع عن البلد وما عارفين قاصد اي دفاع يمكن يكون يا ربي دفاع الفريق القومي لكرة القدم .. والله مهزلة .. أظنهم منتظرين لحدي ما يضربوا الخرطوم وكده .. وياما بكرة نشوف والضربات حا تكتر ومافى واحد بقول حاجة .. ويمكن تكون دي حركة من حركاتهم البصر فوا بيها الناس عن الحاصل فى البلد يخلو هم ينشغلون بالموضوع كم يوم وهاك يا تصريحات جوفاء وعلي بالطلاق وحرم والحليفة بتاعتهم ألما بتودي ولا بتجيب وبعدين أنسى ..

  5. يمكن وزير دفاعنا نايم ليهو فوق خطي …!!! قال حق الرد قال

    1. والله يااا … دا نحنا نايمين في الطراوه يا جدع … وأي حتة في السودان ممكن تتلحس في ثواني بما فيها القصر الجمهوري والقصر الما جمهوري ذاتو

      1. حباب المفلق ، دى اول مره ولا دايما ، تعيش و تاخد غيرها ……………. عجبى

  6. برنجيييييييييييييييييييييييييييييييييييييييييييييييييييييييييييييييية
    معليش يادوب رادرنا لقط !!!!!!!!!!!

  7. ههههههههههههههههههههههههههههه,,الله يجازيكم يا المندهش وكوكو ,,, قطعتو علينا تعاليقنا !

    1. د/ شمباتى المنبرش دخل overhearing ساكت برنجيه ما عندو ، الا يبقى مشترك عطبره ، ما تشيف لينا السكه خشب يا برف ، قال ليك باعوها ……….. عجبى

  8. البروف العزيز..سلام…
    طبعا انا مبسوط خالس خالس من وزيرنا الدلاهة دا ! ببرر بى كلام شوقى وشوارعى وما فى ذرة حياء فى وشو ! مبسوط منو والله على الثقة الخرقاء دى..
    طبعا بعد ضربة العربة السوناتا تم تشكيل قروب فى الفيسبوك اسمو (معا لكشف الطائرات ذات التحليق المنخفض بالعين المجردة…حدق العيون ليك يا وطن ) ! احححححححححححححححححححح

  9. يا أخونا أنا لسه في سنة أولى
    مصنع الشفا ضربوه بشنو ؟؟؟ طيارة ولا صاروخ لأن شهود العيان لحدي هسع ما قادرين يحددو !!!!
    وبعدين بعد خرطمية سنة نشوف حكاية الخمسة غارات التانية … فأرجوكم لا تسبقو الأحداث

  10. اولا ناس البرنجية الاتنين ان شاء تتطلع برنجية اسرائيلية وتتطرشق في وشكم ..
    بعدين السطر الاخير ده لو كتبتا ( ما ) بالوشم ح يعملوا
    ليهو عملية تجميل لازالة الوشم عشان امات طه ما بتفاتن ..
    هو الرادار ده سموهو رادار لييه طالما ما بشوف في الضلام !!؟
    صلاة العشاء دي دخلها شنو ولآ سيد الرادار قفل دكانه ومشي للصلاة !!؟
    وزير الدفاع ده كان يبقوهو وزير الري عشان لو الموية قصّرت يتمها
    لينا تُفاف !!

    1. السلام عليكم ، جنونى برنجية المنبرش زى رادار عمك ، قال ما بشوف فى الضلمه ، و هى دى الوحيده يا ما و يا ما و باراك اوباما ، ما خفى اعظم ……………………….. عجبى

    2. الشــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــارع
      الشــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــارع
      الشــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــارع
      الشــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــارع
      ولو ……………………….

  11. قلنا الشارع
    سكك الحديد بكم—بكم بيت المفتش
    ناس الشرق يبكوكا ناس الغرب يبكوكا ناس الشمال يبكوكا ناس الجنوب يبكوكا ناس الجزيرة………..
    عفوا سيادة الوزير دقات بك بن لا تنتظر احد (مذكرنها) وقت ضربو مصنع الشفاء والوزير الاهبل قاعد يلغلغ
    لامن المذيع قال ليهو الكلام اعلاه–طبعا نفس الوزير

    1. ناس الجزيره يا اب كوكا ، ويب كوكا و يب كوكا و يب كوكا …………………….. عجبى

  12. ههههههههههههههههههههههههههههههههه,,المشترك دا الا يوصل كهربا !!؟ وى وى وى

    1. د/ شمباتى سلام ، الكهربا بقت wire less على ……….اب كوكا ماسمع بيها ………….عجبى

  13. ما الدنيا ظلام والكهرباء قاطعة وما قدرنا نشوف الطائرات المعتدية وكدة مالك حاكيها. خليها مغطية

  14. حاج أحمد السلاوى | رد

    يا جماعة الخير السيد وزير الدفاع كان منتظر الطيار ( دا لو اصلاً الطيارة دى كان فيها طيار ) يضرب بورى ويقول ليهم أنا جيت ..
    والطيار دا زااااتو والله ما عندو ذوق أبدن … كان مفروض يمشى يصلى العشاء مع الجماعة وبعدين يرسل الصاروخ بتاعه .. مستعجل لاحق شنو ؟ كان ممكن يجى بكرة وبرضو حيلقا الساحة فااااااضية وما فى زول يقول ليهو عينك فى راسك .. هى يعنى دى أول مرة ..ولا آخر مرة .. والجايات أكتر من الرايحات ..
    والجاتك فر رادارك سامحتك .. انا خايف بكرة يفجروا ليهو أبراجه الذكية فى الخرطوم ونقعد فى الصقيعة ..قال ابراج مصممة بأنظمة ذكية .. أى ذكاء ؟؟؟؟

  15. انتو موش ابونا دا مات والفراش لسع ما اترفع عشان كده الداخل يدخل والمارق يمرق
    اولا نرفع الفراش
    ثانيا نعمل لينا مجموعه لمحاسبة المتسببين في موت ابونا وح نبدا بي ابو رياله القياظ دا
    ح نعمل ليهو عمليه فى خشمو الكبير دا ونقطع ليهو لسانه عشان ما يملانا بزاق ونحن بنحاسب فيهو

  16. الاحباب

    والله حاجه تبكى بس جععه وطحين من غير قمح

  17. الفاتح و السمار الكرام . . .
    ما تزعلو يا جماعه وزير الدفاع يقطع ليكم لسانو ، ما قال ليكم الرادار كان مقبلنو علي هجليج.
    و إنو السودان محتفظ بحق الرد بشده.
    سؤال سغيروووووني يا السلاوي أبو العفين لحس كوعو واللا لسه؟

  18. دايرييييييييييييين فتوى !!!!!!!!!!!

    معليش لكل مقال مقام لكين بس تابعونا شوية …………

    المكان : برضو مبني تابع لناس الداخلية
    بري – تحقيق الشخصية
    صفوف ما انزل الله بها من سلطان
    من صف لى صف وتوجيهات من ضباط الصف

    وتنظيم ما بعدو وفي دي بالذات التحية للقائمين على الأمر

    ومن ضمن التوجيهات ( اسمعوا يا جماعة الرسوم 128 جنيه )

    وبعد زمن في شباك القروش

    128 جنيه على داير المليم يطلع من جيب العدو

    المتحصل يقطع لي ايصال ويسلمني مع باقي الورق بعدما استلم الكاش القلل النقاش

    وفللي في صف راجيني بس كراسي انتظار بانتظام

    بعدما اتحكرت في الكرسي فتحت الملف وبى فوق الايصال داير اقراهو ما دافع

    مكتوب بخط ما يقري حاجة كدا وقدامو 120 جنيه وتحتو دمغة 1 جنيه

    الجملة تحتو 121 جنيه

    أها يا اااااااااااااا جبرا من خلال قرايتك للحساب في العبتداعية زماااااااااااااااااااااان 128 بلحة تشيل منها 121 بلحة تفضلك كم بلحة ؟؟؟

    والكاتمو في جواي كتير متملك الجوف والعصب ما كنت داير اقولو ليك لكين لسان الحال غلب

    الله غالب

    والكسرة الكبييييييييييييييييرة : ان كان للقروش انشاء الله طايري جنس فرطاقة ما دخلت جرابي

  19. حاج أحمد السلاوى | رد

    أخونا أبو السناكل .. اديها صنة .. فى ناس كتااااااااااااااااااااار حيلحسوا كوعهم ..

  20. قووووووووول عملنا صندوق دعم الرادار والرادار قام شاف الصواريخ
    وقعد يكوووورك , أها يصدوها كيييييييييييف !؟

  21. جبرا والسمار سلام .
    ياجنوبى .
    إنتو بس أدعموا الرادار . ولمن الرادار يشوف الصواريخ جايا من ياتو إتجاة بعد كدة بى قلب قوى يقوم وزير الدفاع يوجة خطاب رسمى لى ناس إسرائيل بقول ليهم (إنتو بى طريقتكم دى بتكتلوا ليكم زول )…

    1. حنين .. انت سلاح الجو بتاعنا مش في بورسودان ولآ انا غلطان !!
      لالا ياخ ما بندعمو خلينا كده احسن لينا قالوا ( كتلوك ولا جوك جوك ) ..
      شكيت محنو غايتو بقولا كان بقي حي !! لاكين مونّسنا والله ,….

    2. حاج أحمد السلاوى | رد

      حنين الحنين .. إنتو يا جماعة متأكدين إنو إسرائيل هى العملت العملة دى ولا بتتبلوا عليها ساكت ..؟ مش يمكن جماعة خليل ابراهيم هم القصفوا البرادو ولحقو الراجل أمات طه ..؟ ما يكون جماعتنا سووا إسرائيل شماعة .. وبعدين ليه يعنى كل الإختراقات دى تتم فى بورتسودان بس ؟

  22. صباحكم عسل
    أمس تم افتتاح مساكن ضباط الصف و الجنود بالإحتياطي المركزي وأبراج مساكن الضباط في منطقة ابوحمامة و شمبات بالله عليكم ده كلام ؟؟؟ ونحنا رادار واحد شغال ما عندنا !!!! بالله عليكم في ضابط شرطة ما عندو فيلا ولا بيت !! ولأول مرة بالتاريخ أسمع أن ضباط الشرطة لديهم أحياء خاصة بهم !!!! يعني صاروخ واحد من (الماعرفنو بيطلق علينا الصواريخ ده منو ) يخلي مساكنهم دي كوم رماد ولكن لأننا نحنا أصحاب المشروع الحضاري ولأن الشعب في خدمة الشرطة نحنا دايما سباقين لما لا يخطر على قلب بشر …..

    يا أخونا لو كانت المساكن دي مستشفيات أو مراكز صحية أو مدارس إبتدائية وشغلنا فيها جيش العطالة ده ما كان أحسن …… أحححح

    1. المندهش يا مطوفش من الله خلقك سمعتلك بي مستشفيات ومدارس دقن ناس المظاهرات !! ولا كتلن عوضيه !!؟
      زمن نميري البوليس وكت يزنقنا كنا بنقول ليهو يا بوليس ماهيتك كم ورطل السكر بقي بي كم !؟ هسع ديل تاني يقولوا ليهم شنو ؟ والله يدقونا دق !!

  23. والله ياجبرا شكل القمردينه بقى ظريف كل ما اقرا تعليقات الاخوان اعاين ليك وانت بتاوق معاى بين الرقراق

    1. تعرفي انا كل ما اشوفو بين الشيش بتذكر محجوب سراج ومن خلف شباكو الحزين !! كان كاتبا لي بي خط يدو لاكين راحت مني الله ينعل الغربة ..!! ان شاء الله ما تبقي فيها التُربه ..

  24. المندهش وجنوبى…
    هووووووووى,يوم بتكتلوا ليكم زول بى نصيحتكم دى !
    قال دق وكتل ! وى وى وى ..

    بت وراق…
    مش فى اغنية بتقول (تعاين لى وانت ماك واعى ) !!؟ يكون قصدك دى !؟ اححححح

    1. شمباتي
      انت قصدك شنو يعني جبرا البرنجيه قايمه بيهو

  25. ههههههههههههههههههههههههههههههههههه,,التفسير لابن جبير !
    وسى يا بدوى سى….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: