ما عارفين حاجة

ينما كان أستاذ عوض ناظر مدرسة غرب الحارات للأساس ينام هو وزوجته الحاجة علوية فى حوش منزله الملاصق للمدرسة فى ذلك المساء الصيفى الساخن إستمعا لصوت هادر أفاقا على إثره من النوم ، تراءى لهما جسم لامع يدور فى حركة حلزونيه داخل ميدان المدرسة الفسيح .. سرعان ما هدأت سرعه الجسم وهو يتوسط الميدان وينزل عموديا ناثرأ حوله كمية من الغبار الذى ما إن إنقشعت سحابته حتى إتسعت حدقتا عينيهما ووقفا يتأملان المنظر .. الجسم مخروطى الشكل تحيط بدايرته السفلية نوافذ دائرية صغيرة لامعة .. يفتح نصف الأسطوانة العلوى ويخرج منه كائن ضئيل الجسم بعض الشئ … حوالى مئة متر فقط كانت تفصل بين هذا الجسم والمكان الذى يقف فيه استاذ عوض وزوجته علوية .. الكائن يتجه نحوهما :
– (فى خوف وهو يتابع الكائن) : إنتي شايفة يا علوية المصيبه الجايه علينا دى ؟
كان طول الكائن القادم نحوهما حوالى متر واحد وجهه مثلث الشكل ويضع فى قمه رأسه شئ يشبه إلى حد بعيد هوائى التلفزيون
– (قالها بصوت يشبه صوت الانسان الآلى) : السلام عليكم
– وعليكم السلااام … (في خوف) ألأخو من وين ؟
-أنا من كوكب المريخ .. أنا مساعد قائد هذه المركبة أما القائد فهو بالداخل
– وجايين هنا تعملو شنو ؟ ما لقيتو إلا الحته دى !
– لقد جئنا لدراسة كوكب الأرض !
– لكن تخلوا كوكب الأرض ده كلو وما تختارو إلا البلد دى؟ والله شقاوتكم شقاوة غايتو !
– جئنا إلى هنا بعد أن قمنا بدراسة أوضحت بأنكم شعب ذو تاريخ وحضارة !
– كدى خلينا من التاريخ والحضارة .. المصيبه اللابسا فى راسك دى شنو ؟
– بصوتة الآلى : هذا جهاز أضعه لأعرف به لغتكم وأيضا لأخاطبكم به !
هنا تفتح المركبة فينزل قائدها والذى هو صورة طبق الأصل من مساعده والذي بلدرهما قائلاً :
– الخارطة التى معنا وكذلك قاعدة البيانات الموجوده على المركبة تقول أنكما تسكنان فى عاصمة البلاد هل ذلك صحيح ؟
– نعم بالحيل
– إذن لماذا هذا الظلام الدامس ؟
– دى قصة طوييييييييييييييلة
– هل تمت طباعتها
– طباعت شنو؟ دى قصة ما بتتطبع بتتعاش بس ..
– إذن هل تستطيع أن تحكيها لنا حتى نتعرف على سر أصراركم على التواجد والعيش فى الظلام ؟
– لا أنحنا مش القاعدين نصر إنو نتواجد ونعيش فى الظلام .. ديل هم !
– هم مين ؟
– المسئولين !
– هل يخاف مسئولوكم من الضوء !
– والله من ناحيت بيخافو منو فهم بيخافو ..ويحبوا ليك العتمة موووت لكن دى ما المشكلة؟
– وأين تكمن المشكلة إذن ؟ هنالك لدينا فى المريخ إذا كانت هنالك مشكلة فلابد أن تكون مسبباتها معروفه !
-هنا فى هذه البلاد إذا كانت لدينا مشكلة فلابد أن تكون مسبباتها (مألوفة) !
– (علوية تهمس للأستاذ عوض) : هسه لو قلنا ليهم المويه ذاتا بتقطع سلوك راسهم دي بتضرب؟
– حسب ما لدينا فى إحداثيات الخريطه التى معنا فإن هذا المبنى هو مدرسة للتعلم ؟ هل يقطع التيار الكهربائى أيضا من المدارس ؟
– إنتا جاي من مريخ العرضة جنوب وللا شنو؟ الكهرباء بتقطع من المستشفيات محل الناس بتعمل عمليات تقول ليا المدارس؟!
يصعد الأستاذ عوض والحاجة علوية إلى المركبة بعد أن طلبا منهما ذلك وذلك لعمل جولة حول البلاد للتعرف عليها ، أقلعت المركبة بصورة عموديه وهى تنفث عنها كمية من الغبار والأتربه :
– لا تخف أستاذ عوض فنحن سوف نحلق على أرتفاع عال حتى لا يرانا الرادار ؟
– عندنا هنا كان عاوز الرادار ما يشوفك تطير (منخفض) !
– لكن الطيران المنخفض يري بالعين المجرده مما يسهل تعقبنا !
– غايتو ده كلام وزير دفاعنا !
– (وهو ينظر إلى شاشة أمامه) : ما هذا المصنع الذي مكتوب على لافتته (صافات) ؟
– هذا مصتع لتصنيع الطائرات؟
– أتصنعون الطائرات وليس لديكم نظم رادار متطورة؟هذا شئ غريب؟
– غريب الشويه دى ؟ والله تبارينا تدخل التجاني الماحي (بتاع المريخ طبعن) !
– (وهو ينظر حيث أراض جرداء تملأ الشاشة) : ماذا تأكلون ؟
– نأكل مما نزرع!
– وماذا تزرعون وكل هذه الأراضى جرداء !
– (مساعد القائد) : إنهم يزرعون .. ألم تر تلك اللافتة المكتوب عليها (مشروع سندس الزراعي) ! ما هى المحاصيل التى ينتجها هذا المشروع الضخم ؟
– كان قلت ليكم حاجه بتقولو سكان الأرض ديل عورا !
– كيف؟ ماذا تعنى ؟
– المشروع ده ليهو 22 سنه لحدت هسه ما طلع ليهو ليمونة وااااحده !
– يبدو أن الليمون يأخذ وقتاً طويلاً على كوكب الأرض حتى يثمر
– لا .. المشروعات هى البتاخد وكت طويل حتى تبدأ
– لدينا فى كوكب المريخ المشروع لا يأخذ من الوقت كثيرا
– لكن إنتو فى كوكب المريخ عندكم (تماسيح) ذى العندنا ديل .. !

كسرة:
ناس كوكب المريخ ديل ما عارفين حاجة ساكت !

كسرة ثابتة :
أخبار خط هيثرو شنو(ووووو)؟

Advertisements

41 تعليق

  1. برنجيييييييييييييييييه

    1. بت وراق .. سجمك دي ماااا برنجييه !!
      انا ماشي بجيكم بعد الريحه تمرق …

      1. هئههههههههههههههههههههههههههههه والله كيتن فيك رش المعطر

      2. دى مدونه قديمه ، و اخدنا برنجيته زمان …………. عجبى

  2. هههه هوشاف حاجه

  3. برررررررررررررررررررررررررررررررررررررررررررررررررر

  4. برنجيييية مشترك

  5. انت عارف ياجبرا ياخوي لو مقالك دا نزل امبارح ما كنته ح اقدر اعلق عليهو… اولا ما جيت الشغل بسبب المويه القاطعه وشايله جردلى ولافه الحله وكل ما ادق باب الجيران القى ست البيت شايله جردله وحايمه كايسين المويه وطبعا الغبار اصبحنا زي الدحوش وقربنا نعمل ثورة الجرادل المدوحشه ولو شافونا جماعة المريخ ديل ح يقنوا لينا (انا شفت ناس دحوش كتييير بس انتو ادحش من دحش )

    1. بنصحك يا بت وراق اليومين ديل في توزيع موتورات 5000 حصان في جياد بس يكون عندك رقم وطني
      وحس وطني وحساب في البنك الوطني بالجنيه العايم وانشاء الله تاني الجردل الا تشوفيهو عند الجيران
      خليك وطني

      1. والله كان كدي الموتور دا بيشفط لى الترابي ذاتو اقصد التراب ذاتو

  6. أنحنا مفلقين ……

  7. اولا نبارك لي بت وراق كيتا للمندهش ..
    مصطفي .. قعدت تتمتم كدي لامن شالوها منك …
    بعدين استاذ عوض ده التخلع الليهو شنو !؟ يعني ما شاف قبل كده
    لا وزير الدفاع ولا علي كرتي حتي !!؟
    اها يا جبرا وكت قلت ليهم ده كلام وزير دفاعنا , قالوا شنو ؟
    عليك النبي قالوا شنو ؟؟؟؟
    هم عاد مااا معزورين ما عندهم مؤتمر كوكبي !!

    1. يباركولك الحجة لي غوانتنامو مروراً بي لاهاي

      1. هههههههههه غوانتنامو ماني مابيها !! لكن انا متين بقيت قدر لاهاي كمان , شفتني قاعد أرقص ولآ تفتفت ليك في الكلام شوف ده بالله !!

  8. الفاتح و السمار . . .
    تحية و سلام . . .
    لكن كدا يا جبرا ما ضيعت أستاذ عوض و مرته علويه ، وزير الدفاع حيقبض عليهم بتهمة التخابر مع دوله أجنبيه و كشف مواقع مشاريع الحكومة الاستراتيجيه ذي سندس و جياد و الصافات و كدا ، وإحتمال كبير يحملهم مسئولية ضرب البرادو.

  9. لكن أستاذ عوض قال لي الجماعة إنبسطو لما شافو الأبراج الذكية لأنهم إفتكروها مختبرات علمية وأعجبوا خالس خالس لما شافو حوش بانقا فرع كافوري ياربي قايلنو شنو !!!

  10. ياجماعة الخير وين اخونا ود الخلا في الفراش ما ظهر ولا جاء وانا غمرانه

    1. ما خجلاااااااااان .. قاعد يقول لينا الدكتور ده كويس , الدكتور كويس , خلوا ابوكم عندو ,. وانتو بس اهتموا بي نفسكم ..
      فاتحتوا مانا قابلنها منو الا يكيل الرماد ويسوي الحي وووب .

  11. حاج السلاوي
    انت الرادار بتاعك طاشي ولا شنو ناس المريخ جو وفاتو انت مشيت وين

    1. حاج أحمد السلاوى | رد

      الأخت بت وراق .. والله ياختى انا زااااتى طاشى مش الرادار ..بس خليها عالله ..
      ولمعلوميتك انا لامن كنت بشجع الكورة كنت بشجع اللون الأزرق .. ناس المريخ ديل مكجنهم كجنة شديييييييدة ..
      بس عندى سؤال سغيروووووونى كدا ( زى كل مرة ) لأخونا أبو ناجى .. الجماعة ديل رجعوا الستاذ عوض وحرمته ( يعنى زوجته باللهجة الخليجية ) بيتهم ولا خلوهم مجهجين فووووق فى السما ..؟

  12. حكومتنا دى مكوجنة كوجين شديد
    سؤال : الجيش كمل خلاص مافى غير عبد الرحيم باقى لينا فى رقبتنا وفاضحنا يبنى فى المبانى والعمارات قال القيادة العامة قال
    سؤال 2 : وزارة الخارجية دى لية ما يقلعوها من ابو شعر دا ويمش يشوف استثماراتو بدل يخالف كل الشعب وينبطح كدا
    سؤال 3 : مش لمن الجنوبين دخلو هجليج بشيرنا قال ما فى مفاوضات ولا انا طرشت وعميت
    سؤال 4 : ناس الاوقاف عملو شنو معاهم ولا برضو الموضوع حا يتدفن زى الغربى قال شنو نتحاسب والجماعة لبتو وحق الشعب ضاع
    سؤال 5 : شنو قصة كافورى دى وقعوها لى كدى برااااااااحة
    يرجى ارسال الاجابات على البريد التالى
    دولة ما ليها وجيع دوت كووووووم
    اخر موعد للسفسفة اقصد للارسال قبل عشرين سنة

  13. وبرضوا يا استاذ جبرا تقول ما قاعد تعملا
    لا لا ما بقدر بقدر اصدق

  14. زي كل يوم وانا راكب المواصلات والرادي شغال في برنامج ديني والشيخ بتكلم عن رمضان قال الصح رمضان يكون
    سته شهور -يعني كلاموا دا يكون قاصد بيهو شنو يا جماعة الخير— الزول الجنبي قال علماء اخر الزمان عندم راي
    في كلام الله —لا حول ولا قوة الا بالله.
    الكلام دا في اذاعة ولاية الخرطوم بعد المغرب بشوية.
    والغريبة المغرب لقانا في الاستاد دابو راكبين الحافلة ماشين ام ضبان–السواق لغاية وصلنا ال13 (محطة بعد كبري
    المنشية) قام وقف الحافلة جوار مسجد ال13 وقال الصلاة يا جماعة انزلو– واحد قال ليهو انت وقت بتعرف الصلاة
    كدا المغرب دا ما لقانا في الاستاد ما كان تصلي هناك— المهم قاعدين نصلي كدا اها العشا اذن

    1. تستاهل انت !! وكت كتلوك تاني حييت لي شنو !!؟
      الشيخ ده ظنيتو بحب الكتشينة داير يلعب سته شهور ..
      اسمع دي !! يومتا في تلفزيون السودان واحده سألت الشيخ انو راجلا
      قبل يموت شال دهبا وما رجعوا ليها جزء هو جايبو وجزء حقها هي وهي
      عندها ضرة تانية لمن الراجل مات ما قدرت تقول ليهم انا عندي دهب
      عند الراجل قامت لفت الايام وفي واحد كان مديون لي راجلا قام جاب
      ليها قروش وقال دي حقت راجلك .. قالت ليه يا شيخ ممكن اشيلا قصاد
      دهبي ؟ الشيخ قال ليها تشيليها طوالي !! والمذيع قدر ما داير الشيخ
      يتراجع الشيخ وقف في الناشف انها ما تديها للورثة !! والمذيع يقول
      ليهو يا شيخ كده ما عالجت الغلط بي غلط ! وهو يقول لالا

  15. جبرا والسمار .
    سلامات .
    بالطريقة دى ناس كوكب المريخ بنومو قفا وبيرسلو تقرير إنو الكرة الارضية ليست بالمناسبة لتعيش فيها الكائنات الحية وليس بها مقومات الحياة الكريمة إلا بالمجازفة والمباصرة وإن الكائنات الحية الموجودة فيها حاليها سوف تؤول للانقراض بسبب أنها لا تستطيع أن تكيف نفسها وتستحدث طاقات متجددة .
    إنتهى …

    1. حنين
      ياريت التقرير يرفعوهو سريع ويحاولو يخارجونا من كوكب الارض ونعيش لينا يومين سمحين

  16. ههههههههههههههههههههههههههه,,لكن ناس كوكب المريخ بكونوا عرفوا الطفا النور منو !!
    عفيت منكم يا الكيزان,,مورين شعاعكم للفوق والتحت ! سى فوقكم

  17. بت وراق….ٍسلام…
    مبروكة (مع عوجة خشم ورفع النظر وترجيعه ورفع الحاجب الايسر) .

    المندهش…سلام…
    غايتو لاهاى دى يوم بتكتل ليها زول ! انا بررررررررررررررررررررا

  18. جنوبى….سلام….
    تفتفها,,تفتفها تفتفها ,, باكر تكبر وتعرف تلغف,
    تفتفها ياخى

    1. شمباتي .. سلام
      نحنا دايرين لا حد يئن لا نسمع بُم لا ينزف دم لا يعجز طب .. قالوا عمرة رجب فتحت والمرضي زي الرز بقيت الطلة غالباك ..( انا في شوية تكليف )
      انتو كوكو ويين الزول ده متعود علي تشعبط الكوارو من صغير ما يكون اتشعبط في المركبة الفضائية دي !! ليهو يومين مافي ..

      1. لكن دي ما (تبتبا) عديييييل يا جنوبي
        ربنا يحفظك يا محجوب شريف

  19. يا اخوانا دا كوم وحكايه الجيش الانسحب من ابيي دي كوم تاني , ناس الحكومه ديل مش شبكونا هجليج والهجيج وجابو فنانيين العاصمه كلهم هججوا عشان يرجعوا هجليج , اسع الحصل شنو

  20. السلام عليكم ، ناس شين كونكت قطعو مننا المويه و النور ، قال شين ايزى للمحادثات بس ، طيب نحنو فعلنا ايزى بى الكونكت اشمعنى قبلتوها ، دى كانت خدمه ونحن ناس شين قطعناها ، لكن ممكن تستعملها فى الموبايل ، طيب ما كلو داتا ، قاطعنها من الجهاز ليه ؟ طيب كنتو تحذرونا بى SMS صغير ما دام نحنو زباينكم ؟ طيب انتو سرقتوا ملايين من الناس ، و هكذا تسير الامور فى نادوس مقلوب سودان دعاء : انشاء الله ياناس شين تدخل عليكم قروشنا بى الساحق و الماحق و البلاء المتلاحق ………….. عجبى

    1. اظن كلام جنوبي صاح اشعبطه في مركبة المريخ وجيت واقع كل القراين تدل على ذلك

  21. منو الماعارفين حاجة؟ في واحد بس في الكرة الارضية دي ما عارف حاجة غ111هو المواطن السوداني ..يلقاها من الطيب مصطفى ,ولا يلقاها من جبرة ,ولا يلقاها من هرطقات ,وأحلام زعوط الوردية حقتبت وراق !! وهو أستاذ عوض ذاتو المسهرو لحدي ما يحلم بالصورة دي شنو ؟ عشان يصحى الصاح تعبان ..ويفش غضبه في الطلبة.. هو جنس ناس أستاذ عوض إخير مغصة المغنربين في مشروع سندس !! مطلعين لينا طلبه جامعيين جاهلين.. الوجع كتيييير كلنا مشتركين في أسبابه !!!

    1. حماد
      هو دا شنو انا ما فهمته حاجه

    2. يا حمد النيل عليك الله وعليييييييييييك الله اديني نفس –اصلي ما قادر افهم كلامك

      1. هوووووووي يا كتلوني ولسه حي أيييي زول اسمو
        حمد النيل ولآ احمد شرفي و لآ فاروق زح منو بعيييد!!
        ديل مااااا بيهزروا …ده لو فهّمك بيودرك ..

  22. يا جماعة حمد دا كان لابد ويادوووب شم نفسو ! خلوهو ..

    جنوبى….
    الحمدلله انا شغلى ادارى بعيييد من الرز دا ! قبلهم وحدهم الدكاترة..

  23. لي كم يوم بحاول أكتب في صندوق الردود والحرف لا يظهر … يا ربي دا يكون من شنو … قطعت ولا شا ديل ناس المريخ … المريخاب ديل عاملين زحمة في كل مكان

  24. البروف

    تحيات كتيرااااااات

    اول حاجه انا زعلان منك جنس زوعوليه تانى حاجه بلاغت معنا جنس انبلاغه مريخ شنو فى العرضه جنوب
    تحديدأ تبدا العرضه من شارع العرضه شمالأ وتنهي عند التقاطع امام سنما العرضه جنوبأ من ناحيه الشرق تنتهي عند الخور الذي يفصل العرضه عن العباسيه غربأ تنتهي عند الزلط الذي يفصلنا عن استاد الوصيف علميا الاستاذ يقع فى تعويضات بيت المال والعرضه حرم يحسب علينا استاد البعيوت ده

    بعدين ناس المريخ ديل اصلهم هم سااااااااااي بنزولو فى حته ناس قروشه محرقاهم ساكت عشان كده بشترو اى حاجه عفوأ بنزلو فى حته

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: