رفع الدعم عن الفساد

تقول الحكاية : أنه في غابر الزمان كان هنالك حاكم يحكم أحد شعوب (اليونان) ولما كبر هذا الحاكم في السن وداهمه المرض وأصبح لا ينفع معه زيت سمسم ولا قرض أحس بقرب نهايته فطلب من الحراس أن يأتوه بعبايته ثم أن يأتوا له بابنه الوحيد وهو شاب عنيد لاشك أنه سيخلفه في حكم الدولة لأنه بذلك أولى !
ولما مثل إبنه بين يديه قال له : يا بني اني أحس بنهايتي الأليمة وسأوصيك بوصية عظيمة يجب عليك أن تنفذها بالحذافير مهما سوف يصير وهي أن وجدت نفسك يوما في زنقة شديدة لأن دولتك أفلست وبقت على الحديدة فاذهب إلى تلك المغارة المظلمة خلف القصر وذلك بعد وقت العصر فستجد بها حبلا مربوطا إلى السقف خذه دون دوران أو لف واشنق نفسك دون خوف أو رعب لترتاح من محاسبة الشعب ، وما كاد الحاكم ينتهي من الوصية (على طريقة الأفلام الهندية) حتى أغمض عينيه ومات.
وما أن تولى (الوارث الوحيد) الحكم وأصبح ذا مكانة حتى تحلقت حوله البطانة، من وزراء ووجهاء ومستشارين وكمان بعض رجال الدين (اليوناني طبعن) فأخذوا يبعثرون الثروة ويبددونها غير عابئين دون أن يرف لهم جفن أو عين حيث أقاموا الفلل والعمارات وإمتطوا الفاره من العربات وأكتنزوا الدنانير ومختلف العملات التي أبانتها بالصدفة بعض السرقات، يلغفون دون أن تطالهم يد العدالة وهم مطمئنون إنو مافيش (إقاله) يفعلون كل ذلك ببرودة دم لأنو عارفين مافيش زول ح يسالهم (تلت التلاته كم) ، فما لبثت فضائح الفساد قد أضحت داوية مما جعل (خزنة الدولة) تصبح خاوية ، وأصبح الوارث الجديد (مزنوق شديد) ، وهنا تذكر وصية أبيه الحاكم الحكيم فقال مخاطباً نفسه في تسليم (لابد من النهاية بعد أن جاطت الحكاية) لابد أن أشنق نفسي وأستريح وأتخارج من هذا الموقف القبيح ، فذهب صاحبنا في الحال إلى المغارة ليشنق نفسه حسب الوصية فقام بدخول المغارة المظلمة في جدية ، فوجد الحبل متدليا من الأعلى مما يوكد أنها طريقة موت سهلة، فما كان منه إلا أن أغرورغت عيناه بالدموع حيث لا مجال هنالك إلى الرجوع ، فلف الحبل على رقبته ثم دفع بنفسه في الهواء في منظر يبعث على الرثاء، ولكن ما أن تدلي الحبل ونظر إلى الخلف حتي وجد النقود تنهال عليه من السقف ، بينما رنين الذهب يصم الآذان في منظر تقشعر له الأبدان ، ثم وجد تفسه مستلقياً أسفل المغارة وإلى جانبه ورقه في شكل رسالة كتبها له أبوه الحاكم يقول فيها يا بني هذه نصف ثروتي كنت قد خبأتها لك لهذه اللحظة بالتحديد عشان عارف رجالك شغالين تبديد، فعد إلى رشدك واضرب بيد من حديد على كل من يحاول أن (يلغف) من هذه الثروة من جديد ، حتى لا تصل إلى ما وصلت إليه الآن من (فلس) عشان تاني ما تتزنق وتدق لينا (جرس) !
إنتهت قصة الحاكم اليوناني .. طيب نحنا جبنا القصة دي ليه؟ حقيقة مش عشان نعرف قيمة الجنيه لكن علشان نشوف آخرالحكومة دي ايه ؟ فقد قررت أن تدخل مغارة (رفع الدعم) المخيفة بعد أن عدمت الخزنة (التعريفة)، فتلف الحبل على رقبتها دون عناء ثم تدفع نفسها في الهواء وما أن تقوم بذلك في إقتدار حتي ينهال عليها الجنيه والدولار، كما جاء في حكاية الملك اليوناني الماعاوزين نكررا تاااني !
ولكن أمنا الحكومة ما أن لفت حول رقبتها حبل (رفع الدعم) حتي اصابتها الحيرة والغم فبدلاً من أن تنهال عليها أوراق النقود والذهب أصبحت في موقف صعب إذ إنهالت عليها (هتافات المواطنين) وهم يصرخون في أنين، لتجد نفسها مستلقية أسفل المغارة وإلى جانبها ورقه في شكل رسالة كتب عليها (إنتو قايلين الشعب ده عندو ريالة) !!

كسرة :
عاوزين النصيحة ؟ دخول مغارة (رفع الدعم عن المحروقات) دي مخيفة ، عشان كده أحسن ليكم أدخلوا مغارة (رفع الدعم عن الفساد) لو أصلو الموضوع جاد ، فالقروش المنهوبة ممكن تصلح الميزانية بدون ما تدخلو الشعب في أذيه، وأبدو لينا بي خط هيثرو العاملين منو طناش في وكت المرضي بيشتروا الحقن والقطن والشاش !

كسرة ثابتة :
أخبار خط هيثرو شنو(ووو ووو) !

Advertisements

56 تعليق

  1. برنجيييييييييييييييييييية

  2. ب . ر . ن . ج . ي . هـ

    1. شوووووووووووووووووووف ياالمندهش موش لو قطعتها انا من امبارح حاجزها الحركات دي ما بتنفع معاي رجعا

  3. يا سلاااام يرفعوا الدعم عن المحروقات ما كلها زيادة اربعة خمسة جنيه في الجالون ما تدفعوها يعني شنو

  4. Bernjiaaaaaah

  5. رائع دوماً يا بروف …. سلمت يداك .

    1. مااا بدري يا خليفة …
      ويين الفرنسي واليوناني واللغة ( الاب احمدية ) .. ايامك يا مان اتجدّع فينا .. ويين الزولة ديك الليلة يوم الربع ولآ شنو !؟

      1. والله يا جنوبي لقيت الساحة فاضية و الناس نيام وطبعا الفرص لا تتكرر … هاك النفس ده

      2. محاكمة مبارك عند المندهش فوائد..
        قات الحزينة تفرح ما لأتلهاش مطرح واللي عند ربنا
        مايروحش !!

      3. انا يا جنوبي مااااا كلمتك وقلت ليك باقي لى اررررررربعه شهور تانى عشان الربع يكمل

      4. بت وراق .. ينوبك ثواب علمينا اكل التيمُم ده !!

      5. ستعلمك الايام القادمه اكل التيمم وشراب فرض الكفايه

      6. والله أب أحمد لو ما مكتف .. عينك ما تشوف إلا نار البرنجية .. لكن ما بتدي حريف !!! مبروكة عليك يا المندهش أكان تفك ليك دهشتك دي !!!

  6. يا بروف سلامات وتحية منورة من بين هذه الظلمات … وربنا يستر من الجايات … وإني أرى في هذا الظلام الدامس … شعب تب يائس … وأظن من بعد كل هذه الكوار(س) وبعد ما الفضل برضو يضيع … وليس لنا من شفيع أو وجيع … بلاك دنيايا مافي ربيع… وسلام مربع

    1. يا أخوانا في زول يدينا … سفّة … ههههههههههههههههههههه

      1. سفّة !!!؟ هم رجال الدين ( اليوناني ) ديل خلو
        فيها حاجة تتسفّة !! ديل الرجيع بختو فوق الاضان
        عشان يسفوهو تاني !!

      2. ههههههههههه … ديل ما فيهم ناس ( أبوالقاسم ) يا جنوبي .. كللللللللللللللللللللللهم بسفّوا …

      3. المفلّق .. انت من زمن ابو القاسم ديل بعد المحَل
        وخروج البترول ما بقوا ( مُوحّدين ) ومال الفضايح
        بقت تمرق لييه !!؟
        سمعت قصيدة ازهري :
        عفوا سيدي الحجاج
        كلابك والافاعي الحايمة
        من روتانا لي أمواج
        كاورت البلد بي حالها
        ما خلت فضل في حاجة لي محتاج
        ولاااااااا لقت البقولها … جَرْ

      4. أهي الطاحونة يا صالح
        أهو السوق الصبح ألغام
        تفضل يا خفيف الضل ..
        ورشرش صبرك الفاير
        وارفع صوتك الحنضل ..
        وألعن ما يهمك زول :-
        أبوك يا سوق سليل الغم
        أبو الطوريه والمنجل ..
        وخال الرجله ، عم الدنيا
        جد الفجله. والفلفل
        وشكل القفه
        والكرتونه
        والجردل
        وألعن ما يفوتك زول
        من الشارين من البايعين
        وجنس البرضا والبزعل
        واشتم ياخى ،ايه فضل
        وايه يحصل ،وهل تقبل
        تميل يا صالح النجمات
        مع القمر الخصى واهبل؟

        عمر الدوش

  7. الباب اتقفل نهائى بتاع الفساد دا
    ماشفنا زول اتحاكم نهائى بالرغم من ان ابوقناية فى نفسو مفسد فكيف لفاسد ان يحاكم فاسد
    ولو هم اصلاً ناجحين يرجعو القروش المنهوية ويصلحو بيها الميذانية المايلة دى

  8. اليوناني بتاعنا بدا بدخول المغارة لشنق منافسه
    حتي ينفرد بالحكم ولمن تدلي الحبل تساقط عليه اليوان
    الصيني والريال الايراني واكسسوارات الموبايل ونبق
    فارسي ووجد رساله من ابوه الحاكم كتب فيها :
    يا ولدي بديت بالحبل ؟ كان فلحت دي دقني !!
    فخرج اليوناني من المغارة غاضبا وامر بالقبض علي
    كل من له لحية وحلقها حتي لا يتذكر كلام ابيه وبعد
    حلق جميع اللحي بدا المطر ينزل .واصبح تلاميذ
    المدارس يرددون في طابور الصباح :
    نزل المطر ونزل ونزل
    وزرع الناس وزرع وزرع
    حصد الناس وحصد وحصد
    واكل الناس واكل واكل
    يا يوناني اترشح تاني يا يوناني اترشح تاني

  9. المشكلة انو الشعب دخل المغارة قبل الملك فلامن الملك دخل لقي الشعب يطوطح ساي قال ليهم دا شنو يا اولاد وين
    ابو ريالة قالو ليهو قاعد يصلح في الانوار بتاعت الطيارة عشان يطلعنا من هنا قبل العشاء
    كسرة : يا استاذ جيرة رسلت ليك رسالة نرجو التكرم بالافادة لاني ماشي يعد يومين كدا الي ابيييي اقصد هجليج
    ولا نامت اعين المنبرشين—- اها بقينا نقعد مع الحشرات ونتفاوض كمان—- سيدي بيسدو– ولا شنو يا جنوبي

    1. من يوم جعجع وقال ما بنتفاوض عرفتو ح يتفاوض
      عشان هم من فصيلة يقولون ما لا يفعلون ,الله يجيب
      يوم في كل وادي يهيمون ..

  10. البروف الحبيب….
    سلام…
    لكن ديل بخشوا المغارة !!! ابدا لا ..ههههههههههههههههههههههههههههههههههههه

  11. المندهش..
    عاد الليلة لقيت ابوها وماها ماف !!

    جنوبى….
    اها خلصت قبلت (علينا ) !!؟ لووووووول

    1. لقاها فااااااااااااااااضيه وصقيره نام

      1. بت وراق …. سلام
        اللقيتا فاضية شنو المغارة ولا الخزينة ولا القمردينة ؟؟؟ حددي

    2. شمباتي .. الليلة صاحبك ادهش البرنجيه زاتا !!
      شفت اولاد الابالسة عملوا إيه! محاكمة العصر طلعوها
      ضحوية , هم زاتم اولاد بمبا ديل العجلة الليهم شنو
      ما كان يستنو لحدي ما تجي حكومة منتخبه وتحاكمو ..

      1. جنوبي
        موش اخير عملوها العصر وما عملوها صلاة العشاء والانوار مطفيه

  12. يا الله المندهش الليلة لقيت الساحة فاضية و قعدت (تبرطع) عربى و انجليزى و شن ما بعرفو داك – لا و بالمفرق كمان – بختك

  13. البروف – مبروك (الواو) السادسة

    1. لالالا يافيلاديمير في الحاله دي ما نقول مبروك نقول اجاركم الله في واوكم السادس

  14. يا الفكيتها وقلتلا سيري وعارف انو الدنيا دميري
    لا فى ضفاف لا شفنا جزيرى لا فى الحيرى ولا في الطيرى
    كسرت جناحها وقلت لها طيرى اتملكت الكانت ميرى
    يا السودت الناصع وجيرى ايد الحق صابونى وليفة
    ……
    قبلك كم متعلم وقاري عكس الريح فكولو الصارى
    مشدوهين متعشى وحارى ريسها شلته والبحارى
    كم سنوات علام البارى واقفى وهم شايفنها جارى
    بقينا هلاك والقيف متضارى لا حجار لا دوحة وريفة
    …..
    حسك عينك ما تتمادى وتنسى الراكب عنده ارادة
    الاهوال الشافها وخاضها كان فى مدرسة والا عيادة
    شفنا الايد الكان اجوادة يا مبتورة يا شحادة
    وياما رقاب كانت سدادة علمت الله من التعريفة
    ……
    يا ريسنا قدر مديرك فك الدفة وادها غيرك
    احفظ نفسك ترضى ضميرك وقف اوع تواصل سيرك
    كان طاوعتنى شن بيضيرك عرض اكتافك وفك البيرك
    لا هنى شكرا وكتر خيرك وكل انسان في الارض خليفة

    1. بت وراق
      الربع إن شاء الله ينفعك
      اللحمة جابت نتيجة … بقيتي شاعرة عديييييييييل كدة

      1. لا لا حقيقه دا ما شعري تقريبا دا الشاعر ازهري وبغنيها جعفر السقيد المفترض كان اقول كده للحفظ الادبي للشاعر
        لكن اخونا شمباتي متابع جيد للشعر والاغاني كتب الابيات الاوله للقصيده

      2. الشاعر هو حاتم حسن الدابي ناسف

  15. تسلم ياابو ناجى اريدوم يفهموا

  16. مدر مدر يارواسى انحنا خلاص وصلنا القيفة ……

    جنوبى…
    عاملين فيها مجانين ! اها اكلوها واتسيكوا فى قبولهم !

  17. يا جماعة الخير … الرسالة دي متلحاني كل ما أحاول أكتب في القمردينة .. يا ربي دي عين .. ولا بفعل فاعل .. أفيدوني قبل ما أمشي ألحق اليوناني .. الرسالة بتقول:

    (خلاصة غير معروفة
    لقد حصل خطأ، من المحتمل وجود خطأ في ملف الخلاصة، حاول مجدداً لاحقاً.)

  18. ههههههههههههههههههههههههه,,خلاصى ولا تبيعة !؟ لووووووول

  19. اليوناني في أمازونيا دخل المغارة وربط الحبل في رقبته وكل شعب أمازونيا دخل معه ليتفرج عليه وهو يشنق نفسه وقام اتطوطح ولأن الجتة تقيله إنهار سقف المغارة فمات ومات كل سكان جمهورية أمازونيا تحت الأنقاض هئ هئ هئ ووووب

  20. هل صحي الحيكومة قاعدة تدعم المحروقات ؟ طيب هي مش
    قاعدة تحسب سعر برميل النفط في الميزانية علي انو
    بي 55 دولار لاكين هي ما قاعدة تبيعو بي اكتر من كده
    طيب الفرق ده قاعد يمشي وين ؟ نقول متوسط سعره في
    السوق 90 دولار ولو فرضنا هي باعت البترول بي نظام
    ( الكَسِر ) ح تبيعو بي كم ؟ نقول 75 دولار !!
    رواتب شعب الحيكومة طبعا عددهم فاق وصف موظفين بقوا
    شعب عديييل كده !!رئيس ونواب رئيس مستشارين رئيس
    ( تقول اوباما ) وزراء ووزراء دولة ( وزير دولة
    يعني شنو ؟ ) دستوريين تشريعيين ولاة ونواب ولاة
    ومعتمدين ومحافظين ونواب ورئيس برلمان ( اول شي
    البرلمان ده مستفيدين منو شنو غير بقي حمل
    زيادة علينا ).
    اها لو خصمنا 25% من رواتب مواطني اقصد موظفي
    دولة حكومة البشير مش ح نوفر اكتر من 2 مليار ؟
    بعدين رفع الدعم ده كل الحيكومات الفاتت جربتو
    وما نفع الناس ديل بيجربو المجرّ ليييه ؟
    بعدين الدين بقول لا يلدغ مؤمن من جحر مرتين
    هم ما مؤمنين ولآ شنو ؟
    ياربي يكونوا قاصدين ( مضاجعة الوداع ) !!

  21. جبرا والسمار .
    سلام .
    والله أنا لحدى أسى مافاهم رفع الدعم عن الفساد دة حا يكون كيف .
    كدى نمسك المتعافى كمثال .
    الزول دة عندو أراضى زراعية مسجلا بى إسمو وأسامى أقرباهو مساحتا أكبر من السودان و عندو آليات زراعية عيييييييييك.
    يعنى لو سلمنا جدلا إنو دة فساد فى إستقلال السلطة أها دة نرفع عنو الدعم كيف وهو وعلى حسب قانون الاستثمار يفترض أن يعفى من الضرائب ويسمح له بأستيراد آليات معفية من الجمار ك .

  22. ببساطة يا حنين رفع الدعم عن الفساد بيكون بتفعيل قانون من اين لك هذا … ونقول للمتعافن ومن شابهه هلا جلست في بيت ابيك وامك ونشوف منو البعمل ليك اعفاء من ضرائب او جمارك بينما لا نستطيع ان نسال شركات مثل شركات هاشم هجو واولاد الشيخ مصطفي الامين … ليس لانهم غير فاسدين والله اعلم ولكن لان ناس المتعافن استغلوا السلطة وفعلوا شعار رفع المعاناة على كاهل الشعب الفضل .
    رفع الدعم يكون برفع تلك المظلة الشفافة التي يحمي بها النظام الفاسدين من اعضائه وتلك البطانة السؤ التي شانت كل جميل في المجتمع السوداني … ركب البعض علي ظهر الانقاذ ودلدلوا رجولهم وهم اول من سيهجر السفينة الغارقة حتما … فانقسمنا مشاتا وركبان .
    كسرة :
    حساب ما كوار : يا وزير ويا مسئول راتبك كذا وامتيازاتك كذا وبدلاتك كذا فمن اين لك ذا وذا وذا … ولا نملك الا ان نقول مع الشاعر/ة :
    سجل لي عرباتك .
    آى سجل لي شركاتك ما انت العسل ذاتك .
    آآآآآي .
    مع رجاء الانتباه للوقف والمد .

  23. الأحباء الأعزاء .. والله إستمتعتا جنس إستمتاع … موبااااالغة !!

  24. اثرت المرور بصمت تعجبأ من حالنا الله المستعان

  25. اها يا بروف المتعة دى هى العايزنكم تصلوا ليها !
    وبركة الوصلتوا !
    آييييييي (تضامنا مع خالد مدنى)….

  26. البرنجيه .. حضرنا ولم نجدك ..قف . بالساحق والماحق علي الياخدك ..
    خالد مدني : قعّدتها قعّيد بالرجاء ده ..
    بت وراق : الدابي لمن قال سد مروي كان اعتذار للحكومة ولآ الرواسي بعد سد مروي ؟ عشان داير آآخد موقف منو !1
    16.5 مليار جرائم المال العام 2010م ياخي كان يرفعوا الدعم عن نصها بس وكنا اتبحبحنا كللللللنا ..ولآ الايرادات المجنبة دي يدخلوها عند الحاجة ويجنبوها عند الفرج اهو برضو شئ من لاشئ بس كفاية عل الدولة تجد نصاااااااح ..

  27. جنوبى….
    خد موقف , انا ذاااااتى ماخد موقف !!

  28. شمباتي .. حاتم الدابي قال :
    بدر مدر يا رواسي نحنا بعاد وصلنا القيفة
    انت مدبج ونحنا نقاسي برد امشير والموج والزيفة
    مركبك الماليها مطارق تمشي تقيف تسرح بي كيفا
    الي ان يقول :
    كل الراكب شاف احلامه دون احساس ماتت قدامه
    ويقول ك لا هني شكرا وكتر خيرك فك الدفه وادها غيرك
    ثم يأتي ليقول في قصيدة اخري :
    رأي الناس في الشجرة اتلما
    كانت شوري ورأي إنتما
    عشان نرتاح وعشان ننجما
    الداير يركب مرحب مرحب
    والما بيركب إبقي اتمقلب
    المؤتمر الوطني يمين ما قصّر
    والسواه من البال اكبر
    لا بتوصف لا بتفسّر
    هسع ده ياخدوا ليهو ياتي موقف !! الدايات !

    1. صدقني ياجنوبي ياخوي رايو ماغيرو علي حسب فهمي فى القصيدتين قول لي كيييييييييييييييف
      اقول ليك
      الزول دا من بدري وقبل الربيع العربي كلامواضح واحساسه واضح وطالب الريس وشلته يفرتقواعشان
      احلام الناس ماتت
      والناس فوق المويه وريقوم ناشف
      والقيفه بعيده والبرد والزيفه
      ونص الناس ماتت والنص التاني جيفه
      وبما انا الشعب اصبح جيفه وما فيش ربيع عربي وناس الريس مكنكشين
      وعارف انهم هم بس المرتاحين وبما ان الجوع كافر ولو كان الجوع رجلا لقتلتهو
      والسواها لا بتتوصف ولا بتتفسر اها زولنا اختار يرتاح وينجم وييييييين محل الراحه والطرطيبه
      الشجره

      1. لاكين يا بت وراق نفففففففس المركب !! كان يسوي التانية فلّوكة …
        اما لا كين صراحة الناس ديل كفهم حار خلاص !! ومِلا الكف دعد تحرقني الغبينة …
        يا بت أمي ناس محجوب شريف اختاروا الفشل الكلوي بدل فِشّيل اللسان !!!
        شمباتي .. عهد قديم بتين يعني ! زمن عبود ؟ ما العشرة سنة برضها جوه الجك .. انت صحي جاكسون سيد الاسم ده منو ؟

      2. نعم هنا تتباين المواقف في مقدرة التحمل0000 ربنا يديك العافيه ياجنوبي

  29. ههههههههههههههههههههههههههههههههههههههههه,,طبعا ود الدابى قصر واتلوم,,والراجل عايز يسوق نفسو ويخوض مع الخايضين,,والقصيدة بتاعت (الرواسى) كتبها من عهد قديم وما طلعت للنور الا قبل 10 سنة,اها اسه ندماااان وسافى التراب ! تقول شنو عاد,الرجال مواقف وجاكسون ما فاضى ليهم @
    وسى يا بدوى سى…

  30. جنوبى..
    دحين العهد القديم دا ما بتاع اليهود !!؟ وى وى وى ..
    وجاكسون دا اظنو قائد من الجماعة ديلاااااك..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: