أوسع من الصين؟

إنتشرت في الآونة الأخيرة ألقاب لا يدرك العبدلله كنهها ولا يعلم متطلبات (نيلها) .. يستضيف أحد البرامج السياسية أحدهم فيقوم مقدم البرنامج بتعريفه للمشاهدين بأنه الأستاذ فلان الفلاني (الباحث في شئون الثورات العربية) او يستضيف أحد أستوديوهات التحليل الكروية أحدهم مقدماً أياه .. الكابتن علان العلاني الخبير في (دائرة السنتر) !
ولأن المسالة جايطة وكده فالعبدلله ينصب نفسه اليوم خبيراً وباحثاً (كمان) في (العمالة الوافدة) والتي اصبحت أعدادها (موبااالغة) ، والآن إلى بعض المقتطفات من الحلقة التى أجرتها معي إحدى القنوات الفضائية بصفتي باحث وخبير وكده .
س- الباحث والخبير الفاتح جبرا : هل دخلت كل هذه العمالة الوافدة التي نراها إلى البلاد بصورة رسمية وشرعية ؟
ج- للأسف الشديد فإن أكثر من 90% منهم دخلوا عن طريق التسلل عبر الحدود وعشان ما يجي زول يغالطني في النسبة دى نقول إنو هذه العمالة دي غير محصورة لذلك لا يمكن وضع نسبة بينها وبين العمالة التي دخلت بصورة شرعية .. يعني النسبة دي مأخوذه من المعايشة اليومية والحاجة القاعدين نشوفا وكده !
س- إذن ماذا يعني دخول هذه الأعداد الكبيرة ؟ هل يوجد خلل أمني سعادة الخبير؟
ج- بالطبع نعم ودي ما عاوزة ليها إتنين تلاته فتسلل هذا الأعداد ودخولها حتي الي (عاصمة البلاد) ناهيك عن المدن الأخري يوضح بأن (المسألة سايبة) وليس عليها أي (كنترول) !
س- لكن يا أستاذ نحنا حدودنا واسعة وكده !
ج- يعني أوسع من الصين؟
س – أستاذ جبرا الباحث في شئون العمالة الوافدة والخبير في الشنو ما بعرفو داك : ما هي المخاطر من هذا الوجود غير القانوني ؟
ج- هي داب مخاطر؟ تصورى (لازم تكون مذيعة) أن يكون داخل البلاد ملايين الأشخاص الذين لا تعرف عنهم السلطات أي شئ ؟ أليست هذه قنابل موقوته؟ في كل بلاد العالم يتم إعادة المتسللين بصورة غير شرعية إلى بلادهم ويتم تسجيل الذين يأتون عبر المنافذ الرسمية المعدة لذلك ويتم أخذ بياناتهم ولا يمكن أن يقوموا بالسكن في الفنادق ما لم يبرزوا المستندات التى توضح دخولهم الشرعي ولا يتم تأجير منازل لهم ما لم يبلغ صاحب المنزل السلطات المسئولة !
س- أليس هو ما يحدث عندنا الآن ؟
ج- يحدث شنو؟ نحنا هسه عندنا أحياء كااااملة وافدين وبس؟ أمبارح دي ركبتا ليا ركشة سواقا وافد وكمان (مدردم ليهو سفة) ومشغل في المسجل (حواء الطقطاقة) !
س- هل هنالك اي مخاطر صحية من وجود هؤلاء؟
ج – بالطبع توجد الكثير من المخاطر الصحية فهؤلاء الوافدون لما يتم فحصهم طبياً للتأكد من خلوهم من الأمراض ومعظمهم لهم تعامل مباشر مع المواطنين كتحضير الطعام أو الشاي وخلافه والله في واحدين من شكلهم عيانين شديد ولو شغلو فيهم (إنتى فايروس) يطلع ليهم 3548 مرض في (الريجيستري) بس !
س- وهل هنالك مخاطر أمنية؟
ج- بالطبع (خاصة) انهم ما معروفين والسلطات ما عندها ليهم حصر أو سجلات والمتتبع للصحف الإجتماعية يري بوضوح تزايد أعداد الجرائم التي يرتكبها هؤلاء الوافدين.
س- وهل هنالك مخاطر إقتصادية من هذا الوجود؟
ج- مما لا شك فيه أن تحويلات هذه العمالة الوافدة بصورة غير شرعية تؤثر في اقتصاديات الدولة بشكل ملحوظ وتساوي نسبة مقدرة من الناتج المحلي الإجمالي .. يعني بس لو كل واحد منهم رسل ليهو 50 دولار شهرياً لي أهلو الجملة ح تكون كم؟ والله إحتمال كبير يكون الدولار الطاير السماء ده واحدة من أسباب طيرانو الناس ديل والزول بتاع (الحج والعمرة) !
س- سعادة الباحث والخبير نحن نتساءل هل هنالك دراسات وإخصائيات تمت في هذا الخصوص؟
ج- والله أنا المجنني عديل كده إنو كل يوم تفتح ليك جريده تلاقي ليك الف وخمسمية تهنئة بنيل الماجستير والدكتوراة والشنو ما بعرف لكن ولا واااحده من الأطروحات دي بتبحث في مشكلة يعاني منها الوطن والمواطن … هسه جنس الشئ الحاصل في موضوع العمالة الوافدة الغير شرعية ده مش عاوز ليهو بحوث علمية ؟ وللا أنا غلطان ؟
س- إنتا ما غلطان سعادة الخبير لكن نستشف من إجاباتك بعض التحامل على هؤلاء الوافدين هل أنت ضد وجودهم بيننا ؟
ج – أنا لست ضد وجودهم بيننا فنحن كسودانيين (ذااااتنا) نشكل عمالة وافدة لكثير من الدول لذلك نحترم بحث الآخرين عن فرص للحياة الكريمة والعمل الشريف في كل بلاد الله الواسعة ولكني ضد أن تكون (القصة سايبة كده) !
س- بما إنك خبير في شئون العمالة الوافدة ممكن تورينا بعد ما (الفاس وقع في الراس) وملايين الوافدين غير الشرعيين (دخلوا البلد) ، كيف يمكننا أن نتعامل مع هؤلاء الوافدين ؟
ج- من المفترض أن تبدأ اليوم قبل الغد حملة من أجل إعطاء الصبغة القانونية لوجود هؤلاء الوافدين بمعني أن تتجاوز الدولة مسألة دخولهم غير الشرعي (لأسباب إنسانية) ولكن تقوم بحصرهم وإجراء فحوصات طبية لهم لإعادة المرضي بأمراض معدية منهم لأوطانهم أما البقية فيتم تسجيلهم وأخذ صورهم وبياناتهم وأماكن سكنهم ! على أن تتم معاقبة كل مواطن سوداني يقوم بتشغيل أو إيواء اى شخص أجنبي غير مسجل لدى الجهات المختصة !
س- والدولة تجيب ليهم قروش من وين للحاجة دي مع رفع الدعم و(الفلس) الحاصل ده؟
ج- بسيطة .. يمكن الإتصال بالمسئولين في دولهم من أجل دعم الإنفاق على (هذا المشروع) لأنه بالطبع يقع في مصلحة هذه الدول ومواطنيها ديل
س- نشكرك أستاذ جبرا الخبير في شئون العمالة الوافدة والباحث في المركز الإستراتيجي للهجرة غير الشرعية في أعالي الجبال والبحار والدول المجاورة !

كسرة :
قولوا المشروع ده تم و(حصرناهم) وسجلناهم .. ح نقدر على مراقبة الحدود كيف مع الباصات البتجي (طافية النور) دى ؟

كسرة ثابتة :
أخبار خط هيثرو شنو(ووو ووو)؟ – عملناها ليهم تلاته بي جاي وتلاتة بي جاي !!

75 تعليق

  1. يوهووووووووووووووووو برنجية بتاعتي أنا

    1. مشيناها ليك المره دي بس عشان اسمك من اسم صاحب القمردينه لكن ما تتعود

      1. لالالا يا بت وراق تاني مافي ليك أنا من زمان كاري الجماعة وراي في الفصل

  2. برنجيييييييييية

    1. معليييييييييييييش في كل مره لا تسلم الجره هههههههههههههههههههههههه

  3. وتاني برنجية
    كيتا في الشمباتة والجنوباب والكوكواب والمفلقين

    1. الفاتح .. لو ما كنت كتبت الكلام ده كنت جاي
      اعفي ليك من الساحق والماحق , عشان دماء جديدة
      للبرنجيه لكن بعد الكيه دي الحال في حاله ..ولسانك
      حصانك … تضامنا مع المندهش نطالب بجولة تانية مع
      انو شفيق ومرسي زي بعض …

      1. تعرف يا حبيبنا … كلامك على العين والراس وكان في طريقة للبرنجية تنحجز بكرة كان الله مد في الآجال بحجزا ليك وكان ما جيت بهديها ليك لكن تاني الناس العواجيز ما بشموها إلا ينومو في خشم باب السيرفر

  4. هههههههههههههههههههه يا مندهش كان ليك يا حبيب
    الليلة بالجد حا تكون مندهش

  5. الأخ خبير العمالة الوافدة و الدولارات المسروقه و الخطوط الرايحه . . تحيه و سلام
    عمالة وافده شنو يا جبرا؟ ديل جايبنهم تمامة جرتق لمظاهرات واحتفالات المؤتمر الوثني.

  6. والله الحبش ديل بقي يشتغلوا طلبة

  7. شي بيوت وشي ركشات وشي حلاقين ( امواس و كده) و مطاعم
    ياخي في ناس عندهم طبالي غايتو المية دولار بدخلوها

  8. بناتنا لبش 0000 اخير ليا جكس الحبش
    هووووووي دا ما كلامي دي اغنيه سمعتها
    أستاذ جبرا الباحث في شئون العمالة الوافدة والخبير في الشنو ما بعرفو داك
    هي الحكومه عارفه عنك وعننا نحن شنو نامن عايزه تعرف عن الوافدين دا اولا
    وثانيا (القصة سايبة كده) آآآآآآآآآآآآآآآي ساااااااايبه هي الطيارات خاشه ومارقه زوووووووول بيساله مافى
    ح نقدر على مراقبة الحدود كيف00000 بنقدر نراقب الحدود بنظرية الدفاع بالنظر
    اما بخصوص الهجره غير الشرعيه نفتح ليهم دار مايقوما ولفمه هنيه تكفى ميه بالقديم قبل عومان وغرق الجنيه

    1. ما مشكلة جكسنا عايز البدلع ما عايز المولع ، بت وراق البرنجيه خليناها لى ناس القافل يمكن تجيب راسو ………..عجبى

  9. الاخ الخبير الاستراتيجى للعمالة الوافدة والغير شرعية وسمارة الكرام .
    سلام ,
    فى حلتنا ومع الظلط يوجد 300 دكان 180 منها بة حبشيات أعمارهن بين الاربعطاشر سنة والعشرين سنة ببيعن شاى وجبنة و الموية والونسة بلاش والكلام دة ليهو ستة شهور ومتوقعين بعد سنتين تظهر حالات إيدز والله يستر على أولادنا وبناتنا .

    1. يا حنين … لو ممكن تديني عنوان حلتكم دي … وما تكلم زول … سمح؟

      1. يا أب احمد شكيت ليك عذري
        من تفاح جناين الخدري
        عليك النبي بعد يحدثك وريني والله ما بكلم زول ..

      2. يا جنبة .. بوريك .. لكن بعد ما أوصل بأسبوع إسبوعين .. عشان ما يقولو جابوهو جاب جماعتو .. ونبقى وافدين جداد كمان !!!

  10. مره مشيت لي مناسبه وانسوان كللللللهن جنس سماحه ودهب جات مواعيد الصلاه كل واحده يابتي ينادو في الشفع عشان يجيبوا ليهم الكراسي للصلاه قبلت على جارتي وقلت ليها بابت امي الحاجات الوافده دي كسرتنا عدييييييل (الدهب الصيني والرقشه الهنديه والبت الحبشيه )

  11. البروف الحبيب…سلام…
    قبل سنتين اتصلت على بت خالتى وقالت انها جابت عاملة منزلية حبشية (طبعا ما مفحوصة) ! وهى حبت تكشف عليها وودتها مستشفى خاص وفحصت وطلع انها مصابة بفيروس نقص المناعة المكتسبة (الايدز) !! طبعا جقلبت لكن انا قلت ليها بكل بساطة رجعيها المكتب ووريهم النتايج….
    فاتخيل بلد تفتح مكاتب من غير ما تلزمهم بالفحص !
    فى السعودية وكل دول الخليج توجد مراكز فحص العمالة الوافدة ومافى حد بيشغل ليهو حد من غير فحص,خوفا من جنس زى دا !
    وأأأأأأخ يا بلد…

  12. الفاتح..سلام….
    بالخنقة ان شاءالله ! لكن بسطتنى فى المندهش,خليتو فاغر فاه !
    ههههههههههههههههههههههه

    1. عليك رايك شنو ولسة هو شاف حاجة إنتو بس خلو لي البرنجية زي كسرة الخط وأبقو على المواضيع 10

  13. مع انو الصين حدودها وااااسعة وعيونن دقااااق
    برضو مافي زول بزوغ منهم !! سبحان الله !!
    حنين .. بختك يا ديامي بطاطير فُل ..
    عندي بيت داير ااجرو جوني حبش ادوني مليون وميتين
    في الشهر اجرتو لي سوداني بي 750 بس ..
    ليست وطنية مني !!
    لكن خوفا من أبوي .. !!
    وقيسو علي ذلك ..
    وييييين مصلحة ايجار الحبش حلو حلا …

    1. انت ياجنوبي قايل اي شي كبيير كويس هسع شفته خشم وزير الدفاع دا قدر شنو جمله وااااحده مفيده ما بعرف يقوله

      1. هههههههه الله يجازيك يا بت وراق … مت من الضحك

      2. ههههههههههااااااي .. مجنونة مجنونة مجنوووووووووووووونة .. الله يجازيكي …

    2. ابوي يايابا ما تقول ليهو لا
      ترلم ترلم ترلم

      1. امشي يا كاوايه .. لاكين بجي حش التمر ويسافر شوفي كان ما اجرتو ..

      2. هههههههههههههههههههههههههههههههه حش مااااااااااااافي السنه دي التمر حته

    3. جنونى سلام الحبش بقى الايحار ليهم بى الراس ، و الحمام بى الوزن و السواك بى الدقيقه و هلمجرا ………… عجبى

  14. البروف مستشار العمالة الوافدة
    ما الحبشة دي زااااتها نحنا عندنا فيها عمالة وافدة ناس المفاوضات ديل رأيك فيهم شنو ؟؟؟
    الجماعة ما بقدرو يطردو الحبوش وإلا سوف تكون المعاملة بالمثل ….. حيقبلوا وين ؟؟؟
    حنين قلت ليّ حلتكم إسمها شنو ؟؟؟
    شمباتي مرن عضلات قلبك على كثرة التسامح والتنازل عن الحقوق
    وعدم الإمساك بحظ النفس ، وجرب… أن تملأ قلبك بالمحبة
    فـلو استطعت أن تحب النـاس جميعاً فـلن تشعر أن قلبك ضاق بهم
    بل سوف تشعر بأنه يتسع كلما وفد عليه ضيف جديد

  15. جنوبى . سلام.
    أنا ماديامى والحبش وصلو لى أى حتة فى ولاية الخرطوم وحتى فى الارياف والمشكلة بقت مشكلة وطن وليست مشكلة حى . يعنى إختراق للقيم السودانية وإختراق للأسلام .
    مالك ياخ …

  16. جارتنا مرة ظريفة جدا, فى احدى المناسبات و النسوان ملمومات و العيال عاملين جوطة نادت واحدة من النسوان: انتوا يا اخواتى الخدامات ديل وين سايبين الشفع كدة؟ فردت جارتنا الظريفة: و الله الخدم انتن, كل واحدة فيكن جايبة ليها واحدة اسمح منها و تقول لى خدامة !!

  17. جنوبى وبت وراق….
    انتو بتندلوا لى حش التمر !!؟

    المندهش…
    قلبى اوسع من الصين !!! اى والله…

    1. إت ماك مندلي معانا ؟ وا حلالي يا القنديلي الليني وبت تموده .. ناس كوكو وجبرا بنجيبلهم الكرشة والجاوا باقي عصيرن بالحيل سمح !!
      عما لينا في البلد عيان شوي اولاده رسلولو حبشيتا زي عجوة المحس في شان تخدمو قالولك البيت بقي بلا السوق الشعبي !!المخاصم عمنا من سنين جاي يحمدلو السلامة ..
      خالا لينا مطموس البنيي الحبشيي جات شايلالو العصير قالها لا لا آآبنيتي انتي اقعدي في الصينيي وخلي العصير يقدمك لينا ..

    2. شمباتي سلامات
      هم خلو لينا تمر سد مروي غير المناخ وبقي التمر يحت وللاسف الكهرباء رجعت تاني تقطع يعنى السد لا استفاد منو السودان كما قيل ولا فضل لينا تمر اححححححححححححححححححي بعد دا الا نحش في مصارينا

  18. المر الما بتبلع | رد

    اححححححححححححححححححححححححى أنا ياخ ديل آفات والله ديل البأجر ليهم يكون دقس . ديل ياجرو منك البيت اتنين بعد يومين تلقاهم 30 واحد من ولد لى بت . وبعد شهر طوالى بقروش الايجار حقتم تبدأ تحفر ليك أدبخانه جديده

  19. امشو يا ناكرين الجميل زمن الضيق وكفار قريش ساكنكم كان ما هم كان لليلة تقولوا أحد احد ..
    يعني ده جزاهم !!؟ الحبش ديل مفروض يكونوا عندهم تأشيرة مفتوحة لجميع الدول الاسلامية ..
    آآآآآآآآآآآآي بحبببببببببببببببببببببببببببببببببببهم عشان هم بحبونا …..

    1. والله يا جنوبي بالغت فيها ….. ها ها ها هاي … والله لمن دموعي جرت من الضحك .

      1. قلت لي احد احد …. لكن خوفي جماعتنا ديل يكونو الجو ساكيننا ديك ظاااااااتم .

    2. حاج أحمد السلاوى | رد

      جنووووووووووووووووووبى .. إنت وكتين بتحبهم ليه ما أجرت ليهم البيت حقك ؟ ولا بس حب من بعيد لبعيد ..؟
      غايتو لاكين جنس حب …!!

      1. حاج احمد يا خوي نسوي شنو !؟ ما الدين قال ولا تقل لهما أفٍ ..!! لكن باقي ليك ابوي ده كان اديتو 10 % ما اخير ليه من نزول حش التمر ؟ وزي ما قالت بت وراق زمان تمرة وااحدة بي عساسقا بتعمل ليها 5 شوالات هسع 5 تمرات ما يملن شوال !!

  20. معاكم المحتار الخبير فى شئون تامين الحدود الجوية والبرية :
    اولا الحدود الجوية محمية بدليل مقالة 26-مايو-2012 دعم الرادار تانى
    ثانيا الحدود البرية محمية بدليل مقالة اوسع من الصين
    ثالثا الحدود مع الجنوب محمية لانها متفقين عليها من نيفاشا (هجليج )
    رابعا كل زول يقيف فى حدو ويعرف حدودو لانو الحدود محمية
    كسرة:
    رابعا دى للمواطن بس ماللمسئولين عشان مايفهمونا غلط

  21. حاج أحمد السلاوى | رد

    الفاتح .. قلت يعملوا ليهم فحص ؟ فحص شنو ؟ هى الحيكومة قادرة تعمل فحص وتعالج مواطنيها عشان تقوم تفحص العمالة اللوافدة السايبة .؟ كدى خلى يقدروا يحصروهم فى الأول بعدين يشوفوا موضوع الفحص الطبى أو أى فحص تانى ..
    يا خ إنت متفائل بشكل …. !!!
    عاوزين تعرفوا آخرتا شنو .. ولا ما فى داعى ..؟؟؟؟؟؟؟

    هبشة سغيروووووووونة .. نحنا كفاية علينا برنجية الفصل ..

  22. البروف الخبير و السمار الكرام:
    أحب أقول ليكم القصة أبدا ما سايبة زي ما بتقولو الناس ديل الجماعة راصدينهم مية في المية والجا منهم الخرطوم (من الحبش يعني) أساسا الحكومة كانت دايراهم يجو الخرطوم عشان تقنص ليهم هنا و الأجانب الإتوزوعو في باقي بقاع السودان أظنهم والله أعلم لمن جو كانو طافين أنوارم تبقى سايبة كيف يعني؟؟؟؟

  23. مشكلة الوافدين غير النظاميين … ويسموهم في السعودية (المتخلفين) ، مشكلة حقيقية خاصة في غياب الرقابة عليهم لأنهم من الممكن أن يشكلوا عبء على البلد دون فائدة تذكر منهم … فقد لاحظت مجموعة من البنقالة شغالين في صالة المغادرة بمطار الخرطوم عمال نظافة .. لاحظت واحد منهم قاعد طول الوكت في الكراسي مع المسافرين والتاني نايم والصالة تعج بالأوساخ … دا نسميهو شنو يا خبراء العمالة الوافدة وشئون الهجرة بالمركز الإستراتيجي لدراسات الإيمان؟

  24. بي مناسبة الامراض والايدز قال ليك البرلمان امس
    الشكلة واقفة لام الف بين وزير الصحة والنواب عن
    الكاندم ( اسم الدلع الواقي الذكري ) وهل يوزعوهو
    لطلبة المدارس ولآ ما يوزعوهوا ..
    واتخيلوا اتضح انو وزارة الصحة بتستورد ( الكاندم)
    بي الاف الكراتين ويجي وزير التجارة يمنع استيراد
    الاسبيرات المستعملة للعربات البتعول أسر واطفال!!
    بي حجة توفير العملة الصعبه..
    بري بري منكم يا ناس البرلمان خجلتوني ! يعني خلاص
    حلينا مشاكلنا ووصلنا للرفاهية دي !!
    هاكم الترابة دي في خشمكم ! ( هي ما خشمكم لاكين مشوها
    لي خشمكم ) !!
    بكره كمان يناقشوا زواج الرجل من الرجل !!!

    1. البرلمان بدل يناقش امور مصيريه وحساسه في وجود البني ادم ذاتو 000 يناقش الكاندم عليك الله دا برلمان ولا بيت دعاره

  25. ههههههههههههههههههههههههههههههههههه,,انت يا جنويى ما كويس !
    وذكرتنى مقولة وحركة ست الدار بت احمد جابر ( هاكم دى يا اولاد الهرمة….)
    قلت لى المشكلة بقت فى الواقى !!؟ انا اقترح يوزعوهو على كل افراد الشعب تحوطا مما يمكن ان ينتج من (عمايل) الحكومة فيهو ! آيييي

    1. ههههههههههه حتى لا يتم (تحميل ) الشعب اثار تعويم الجنيه ورفع الدعم عن المحروقات

    2. معقولة خايفين للدرجة دي (ميلاد) عهد جديد .. الله قال نحن نرزقكم وإياهم .. فما في خوف .. والله في !!!

  26. وحات الله ياسين شمباتي وبت وراق ديل مجانين !!! هههههههههههههههههههههه
    واااااااي انا من محن برلمان فرنسا ده !!!!

  27. اخير الجن من (حمل) الاسية ! وااااااااااااااااااااااااااااااااااااااى
    هههههههههههههههههههههههههههههههه

  28. المقال دا كتبتو فى 11/ديسمبر/2010 م , وما قايل الوضع ببقى ازفت من كدة !!

    لم اجد كلمة تعبر عن ما يحدث للاقتصاد السودانى فى راهن الايام الا كلمة (التحرش),,فهى الاصدق والاوصف للوضع…فدأب الحكومة مع المواطن هو المراودة والتحايل والتمايل والتلون,لكنها آثرت مؤخرا ان تتحرش به اقتصاديا واجتماعيا وسيساسيا وامنيا,,وربما اتينا على كل جزئية بالتفصيل..

    لكن ما يمر به الاقتصاد هذى الايام شئ لا يوصف,فما معنى ان ترتفع قيمة الدولار _بيعا وشراءا_ فى غضون ايام تحصى على اصابع اليد الواحدة؟؟وحتى الريال الذى لم يكن يتعدى ال670 جنيها فى البنك ارتفع مع حبيبه الدولار الى 800 جنيه داخل البنك!! الحكومة او البنك المركزى على وجه الخصوص شرح الموقف بان الدولة ترغب فى جمع (عملة صعبة) او اجنبية تحسبا لما يمكن ان يحدث!! أليس هذا هو التحرش الاقتصادى و الامنى بعينه؟؟فانت حين تعبر عن تخوفك مما قد تسفر عنه الايام هكذا دونما تلطف او تعقل فماذا تتوقع من المواطن ان يفعل؟؟حتما سيصيبه الهلع والخوف والفزع من مقبل الاحداث,,وسيتوجس خيفة من نيتك كدولة تجاه الآخر صبيحة او عشية الاستفتاء..

    ثم ما بال الدولة لا تملك عملة اجنبية متحوطة لغول الزمان؟؟ أ دولة هى ام (جبّانة وهايصة)؟؟ لا حياء او خجل عند محافظ بنك السودان,,هذا المهنى المطبوع لا يستحى ان يصرح بهاتيك كلمات مخزيات..وقوله هذا يناقض تصريح السيد وزير المالية الذى اكد واغلظ القول بان الاقتصاد السودانى لن يتأثر بمغبة الانفصال ابدا !! وهكذا صرّح غيره من الدهماء والغوغاء منسوبى الحزب الجاثم على صدورنا..

    ومن عجب ان السيد نافع على نافع له تصريحات متناقضة قد استمعت لها باذنىّ اللتين سيؤول امرهما الى دود الارض,فيوما صرح بان الوضع الاقتصادى قد يتأثر لمدة سنة,,ويوما آخر قال ان التأثير لن يتجاوز ثلاثة الاشهر!! فداه نفسى كيف يحتسب هذه الحسبة!!؟؟

    ومن عجب ان السيد وزير النفط قد صرح قبل ايام ان انتاج مربع (6) من البترول سيرتفع الى مليون برميل يوميا بنهاية الشهر الحالى,,ولك ان تعلم عزيزى المواطن ان انتاجه اليومى هو 70 الف برميل فقط!! فهل يقصد السيد الوزير ان (يشفط) الحقل كلو فى رشفة واحدة ام ماذا ؟؟ وهل الامر تصريح واعتباط ام هى دراسة وتبصر؟؟ كما ان السيد وزير المعادن قد بشّر الشعب بان انتاج السودان من المعادن سيسد (فرقة ) البترول !! عليك الله امشى نوم يا سعادتك..كما نوّه الى اكتشاف الذهب فى العديد من الولايات الشمالية..هذا الذهب الذى اشار له المساعد نافع فى برنامج (حتى تكتمل الصورة),,وعندما حاول مقدم البرنامج الحصيف ان يناقشه بالارقام والحسابات اختصره ب ((ان الله يرزق من يشاء بغير حساب)) ..ونعم بالله يا سعادتك,,لكن الى متى اللعب بالبيضة والحجر ؟؟

    كما اعجبنى توجيه السيد الرئيس الذى ينص على (الاسراع فى تطبيع العلاقات مع ايران,,خصوصا فى الناحية الزراعية)!!! صديقى الذى انبأنى بهذا الخبر قال لى 😦 يعنى يا امريكا كيتا عليك انتى فصلتى الجنوب انحنا ماشين على ايران)!! ولعمرى لقد اوجز الوصف وابان المشهد..

    هبشة : اخوف ما اخاف ان تعود الهتافات الهوجاء الجوفاء على شاكلة ( يا امريكا لمى جدادك)..وتجيك امريكا بحاملات الطائرات عشان تلم جدادها,,فحينئذ لا ينفع نفس توبتها واوبتها ما لم تكن قد ادّت فروض الطاعة من قبل…

    ونلتقى…………..

    1. يا د. شمباتي
      يا حليل زمن التحرش …. هسع !!!!!!!

    2. زي ما قالوا يا دكتور … المحرش ما بكاتل .. !!

    3. شمباتي … والله المغصة شاقانا كلللنا .. الغريب انو المسئولين والوزراء كللللللهم الالقاب مردومة قدام اساميهم ردم زي ما قال جبرا لاكين صحي اشوف شهاداتك والقابك اصدقك اشوف عماليك استعجب ( او كما قال ) ..
      المسئولين ديل تحروا الكذب حتي كتبوا عند الشعب كذابين .. والله انا كنت بحضر في الحلقة بتاعت وزير المالية ومحافظ بنك السودان وكتها وزير المالية ده كرت كرتونة ولمن قال خروج البترول ما ح يأثر علي الميزانية ونحنا عندنا بدائل تانية نغطي بيها والله منها والكرهه البها كرهتو بي الله واحد … وهسع يومتا يتبجح لي احمد البلال ويقول ليه عن الدعم الجا للحكومة انا ما ح اصرح واقول جانا من وين !! اها الليلة الخبر مرق انهم باعوا مصفاة الجيلي للقطريين .. وحات الله قشر ( الموزة ) كان ما زلقنا لي اخر الدنيا تشوف برااااك …

      1. ياخوي جنوبي كلامك دا صاح !!!باعو مصفات الجيلي طيييييييييييييب الحكومه دي يتتفاوض مع الجنوب على شنو
        معنى الكلام دا اذا رجع البترول تاني (ومااظن) الا نصفيهو بمصفه الشاي بتاع المطبخ

      2. الحكومة دي لاحقاني جاي … باعت حاجاتها كلها … والله ما باقي ليها الا تغترب .

      3. تقترب وين ياخوي بتقدر تمرق راسه بره والله الا تلقى نفسه في لاهاي

      4. خالد مدني .. تبرأ انت من شبه ديل انت وكت بعت
        بعت حقك ولمن حاجاتك كملت اغتربت عشان ما تبيع حق
        غيرك ….وماك الوليد العاق لا خنتا لا سراق …

      5. بت وراق .. طيب قطر لو بكرة قالت لسلفاكير
        نحنا ح نصدر ليك بترولك بي تكلفة دولار واحد للبرميل
        تاني يعصروا الجنوبيين بي شنو ؟
        شكيتك علي الله يا راجل موزة !!

      6. موزه الحبوبه وشقيقها رشاد

  29. طيب يا جبرا رايك شنو في اللاجئين الاريتريين المفروض يرجعو بلدهم سنة 92 و هسي بقو اسياد بلد في كسلا و القضارف و المعروفين بي قبايل البني عامر و رايك شنو في الاريتريين البجو من اريتريا و ياخدو الجنسية السودانية في يوم واحد و يرجعو تاني, طيب اسمحلي اركب الفهامة علشان افهم كيف دولة عندها سيادة و قانون و عندها وزير في وزارة سيادية اريتري عديل كدة ابا و اما و اصلا, تقولي الاجانب في البلد دي بلد ما عندها و جيع و لا رقيب و لا حسيب في ياتو محل في الدنيا بحصل الكلام دة.

    1. انت يا زول شرقاوى يعنى شرقان ولا من الشرق اظن الاولى.بعدين انت مرجيعوم سنة 92 مالك هم المفروض يرجعوا بعد ما انتو جيتوا مع اسيادكم الانجليز

  30. في اللحظة دي في اتنين في المدونة انا واحد يا ربي التاني منو ؟؟؟ وضح ابن افصح .

    1. كوكو و الاجر على الله ، بنفتش على البرنجيه من تحت ، الفوق خليناها للمستجدين يكافتو فيها شويه ، ………….. عجبى

  31. ههههههههههههههههههههههههههههههه,,دا ادمان رسمييييييييييييييييييييييييييييييييييييييييي لمن بقيتوا تكوسو البى تحت !
    صعب صعب يا جبرا….

  32. المندهش…
    قلت لى اسه طوااااااالى الشغلة بتتم ! اممممم,,قبلهم وحدهم…

    اب احمد..
    طيب المتحرش !!؟ هنا تكمن العوجة !

  33. جنوبى…
    انت ما وقع ليك كلام نافع (ان الله يرزق من يشاء بغير حساب) ,, عندك اعتراض على رزق ربنا ؟ آه يا شيوعى…
    بعدين لك ان تصدق انو خالد مدنى دا لمن قرر يرجع السودان نفشناهو نفش وننبشناهو نبيشة تقيلة,قال ستين يمين يرجع يعمر بلدو,,والله ما كمل التلاتة سنة سمعت بيهو مارق تانى !
    عليك الله دى حكومة يرفعوا ليها تمام !!؟ سُب عليهم…

    1. ناس الحلة القعدوا وقاموا اصر والح يمشى كلامه

    2. العربي قالوا الحالة ضاقت بيهو شدييييد قال : بكره ربنا فرجها فرجها ما فرجها ببيع جملي ده وافرجها علي رقبتي …..
      تراهم مصفاتم بقت ليهم زي جمل العربي .. وسمح شنو مريم والمحراب وكان ربنا بجيب ليها العنب ويرزق بغير حساب ..
      زمنن ده كلو لمن ننضم يقولوا لينا طلعنا ليكم البترول طلعنا ليكم البترول !! أها نجهتو براكم سلفاكير شال البير وقطر شالت المصفاة !!
      عاملين زي عوض سطلة جارنا كل جمعه شايل حاجه من البيت ماشي بيها الدلالة !!! الله يدليكم من ضهرنا ده ..

  34. ههههههههههههههههه,,شدولك رِكِب فوق (شعبك) الجماح !
    يا جنوبى ياخوى جملهم دا ما كويس ! وخلينى بس عليك الله …

    بت وراق…
    لكن العبرة بالخواتيم,,احح يا بلد…

  35. والله البشوفكم تنضموا تقول العماله الوافدة دي دخلت فرنسا الجماعه ديل دقسوا ويكونوا بفتشوا في البخارجوم من الحفرة دي

  36. سوداني في الحارة بس | رد

    أستاذنا البروف الفاتح جبرا… الكلام دا ذكرني قصة (أبو تِفّة) أهلنا قالوا: زماااان في راجل دعا النّاس في الشوارع والمساجد لزواج بتّه.. وقال الأعمي يشيل المكسر ويجيني، علي الطلاق أغدّي أي زول وزولة.. إنتو قايلني ضابح سخل، أنا ضابح أربعه تيران … هيييع.. يوم العرس عمّك إتلفح وشال عكّازو ووقف في خشم الخيمة يعاين للناس الجايا… قاليك الناس دي جايا صينية صينية (يعني تمنيه تمنيه) … الساعة خمسه ولدو الصغير جاهو وقال: يابا يابا قالو ليك الأكل كِمِلْ، عمك جاتو عشراقه، وقال كِمِلْ جَتْ، طيب أضبحو السخل سريع… بعد داك عمك عاين لأول كووم رجال خاشي الخيمه ، شاف ليك راجل عندو تفه كبييره خلاص، في اللحظه ديك كان جمب عمّك أخوه ود أمو، عمك استاء وقال لأخوه: هسّع أبو تفه دا الدعاو منو ؟؟
    كسرة: يا بروف، الله يخليك، الجماعه ديل من زمان معانا، بس لمن فلسنا، حسينا بيهم، ولسان حالنا بيقول: هسع أبو تفه دا الدعاو منو ؟؟
    كسرة تانية: إلى جميع معجبي البروف، رايكم شنو؟ نسميه الفاتح الصين، بدل الفاتح جبرا؛ لأن الأستاذ البروف أصبح عالمي، وجبرا دي ……..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: