أخير نسكت

تحدثت صحف الأمس عن الحيرة التي ضربت مواطني مدينة ود مدني أمس حيث عاشت يومها كله تتبادل الأسئلة عن هوية الطائرة التي حلقت في سماء المدينة قبل أن تهبط بميدان يلعب فيه بعض الصبية الكرة بحي (عووضة) وكانت دهشة الجمهور حين هبط طاقم الطائرة و(ركبوا ركشة) غاصت بهم داخل المدينة قبل أن تعود بهم (ذات الركشة) إلى طائرتهم والتي أقلعت مرة أخري (وكأنو ما حصلت حاجة) !
العبد لله وضع الخبر كما هو في موقعه على الفيس بوك http://www.facebook.com/alfatihgabra وإليكم بعضاً من تعليقات القراء :
• يكون المعلم قطع سير الأبنص وماشي يجيب (سفة) وجاي … شيلو الصبر
• الميدان ده آخر محطة والبيت لى جوه فركبوا ركشة … عادي يا شباب
• الجماعة ديل كانوا قاعدين الصباح في الحامية يفطروا قامت الشطة الخدرا نقصت فقالوا يمشوا يجازفوها من سوق مدني .. دي فيها حاجة؟
• والله أنا بفتكر إنو الجماعة ديل مشوا يجيبو زيادة .. بس زيادة شنو … ما عارف !

• عادي يا جماعة الطيارة بتنزل في الواطة عاوزنها يعني تنزل وين ؟ وللا يعني تفضل معلقة في السماء؟
• يكونوا تعبوا من الطيران قالو نتمها ركشات سااااي فما تظلموهم يا جماعة !

• يكونوا بيجربوا في الرادار المنخفض يا ربي؟ا
• إن شاء الله بس الجمهور يكون شال نمرة الطيارة؟
• طبعا دي من ضمن الخطه الخمسيه بتاعتنا تشغيل طيارات ( مواصلات داخليه) بعد ما بقينا دوله نفطيه وبنصنع طيارات وكده !
• يكون ياربي دا (عوض الناظر) ومرتعوضية جابوهم راجعين ناس كوكب المريخ؟
• يكونوا زهجو من القعاد وجاهم وجع ضهر قالو نريح شوية … النشوف اخرتا معاهم!
• تسعة صباحا دي الواطة كاشفة يعني لو كانت تسعة بالليل نقول احتمال الطيارة تكون (طافية نور) والوقت كمان (صلاة عشاء) بس وين المراقبة بالنظر ؟
• فتحوا عيونكم ديل كباااار عشان تكشفوا كويس وأي زول جنبو خور يعمل حسابو ما يطلع يوم يلقى ليهو غواصة واقفة وفيها مارينز أو قراصنة .
• يعني من المستحيل المواطن السوداني ده يكون نافع بي حاجه؟ وللا يقوم بي واجبو كامل؟ نحنا هسسسه دي في موضوع طيارات اسرائيل دي مش قلنا ليكم استخدمو النظر ؟ مش قلنا ليكم ركزووو كويس ؟ عشان نعرف نتصرف؟ اها يعني هسي نحنا نعرف الطياره دي تابعة لي منو ؟؟ الطيارات كتيره ومسيخه ما في زول شاف نمرتها كم ؟؟ عشان نعرفا ترخيص وين ولا موديلا موديل كم ساي؟ غايتو الما قدرت افهمو والمستغرب ليهو بتاع الركشه ده جا من وين فجأتن ؟ غايتو بتاعين الهيلكوبترات ديل بقو يعملوا ليهم في حركات عجيبه خلاص .. المهم الوصيه الاحنا بنقولا للمواطنين اي زول يشوف ليهو طياره وللا طبق طاير يحاول يعرف لينا اوصاف السواق أو حتى بالعدم شكل (الكمساري) عشان نحدد الجهة ونحتفظ (بحق الرد) .
• الحكاية ومافيها انو الخرطوم بقت زحمة والشوارع ضيقة والعربات كتيرة والناس ديل قررو ا يرفعو الدعم من المحروقات للعربات ( البتمشي (بالواطة ) ويكبوهو كلو كدعم لمحروقات ( الطيارات ) وده كلو عشان يقللو الضغط علي الشوارع وحاتكون تاني المواصلات ( هليكوبترات ) وبي محطات محددة يعني الطيارة تقوم من الموقف الجديد في خط الصحافة وتمشي تعمل كونيكشن في ( نادي الاسرة ) وتقوم تاني وتعمل كونيكشن في ( محطة الغالي ) لحدت ماتصل اخر محطة واللي هي ( الميناء البري ) وطبعا مافي حاجة اسمها ( قرصة) وللا ( نزلني هنا ) والدفع يا شاب قبل ماتركب عشان فوق ماتقول انا طالب وللا نازل قريب (الحنك ده) خلاص انسوهو وممنوع اكل التسالي والنبق والترمس وسف والتدخين وسف التمباك وبرضو تلتزمو بي اماكنكم يعني الحريم قدام والرجال ورا وشماعة ماااااااافي وممنوع فتح الشبابيك وطبعا في ناس بكونو متخوفين من الطيارات دي يعني تكون قديمة ولا مافيها نور وكده لكن احب اطمنكم انو الطيارات دي (منتهية الصلاحية) واهم حاااااااااااااااجة إنو فيها نورين نور طويل ونور قصير والمنشات بتاعتا شغالة (تش) ولساتكها ( تيوبليس ) ومكتوب عليها (هبوط متكرر) ،وطبعا اهم حاجة حاتكون أسعارا مناسبة وفي متناول الجميع وده كلو من اجل المواطن (الصابر) وحكاية(طيارة مدني) دي للمافهمنها انهم عاوزين يعملو ( تستا ) برة العاصمة قبل ماتعمم التجربة داخل العاصمة والمفأجاة انو المشروع ده ح يفتح فرص عمل لأنهم عاوزين 1000 كابتن طيار ( سواق سابقا ) و1000 مضيف ( كمساري سابقا ) وحايعملو ليهم تدريب قبل ماينزلوهم الخط…
• أنا بفتكر السبب الوحيد الممكن يخلي الطيارة دي تنزل في الحتة دي رغم خطورة المسألة إنو الطيار فجأتن سمع صوت (الكتينة) وخاف إنها تنقطع فقام عمل العملة المهببة دي .. وركب الركشة هو وجماعتو ومشوا المنطقة محلات الأسبيرات وجابو الكتينة وجو .. بس للأسف الشديد ما ممكن يكون ده السبب عشان مافي زول شاف الجماعة ديل لمن رجعوا بالركشة قامو (عفرتو) الطيارة (وغيرو الكتينة) … الناس ديل ركبوا طوااالي وعملوا إقلاع !!!

كسرة :
جابت ليها نزول طيارات في الأحياء السكنية وكمان محل الأولاد بيلعبوا ؟ غايتو أخير نسكت ساكت وكت مافي زول ح يهببو لينا !

كسرة ثابتة :
أخبار خط هيثرو شنو(ووو ووو)؟

51 تعليق

  1. برنجيييييييييييييه

    1. مبروك لا الك ، تانى برنجيه …………………… عجبى

    2. الحمد لله أنا غيرت لبنسون … يعني ما فارقة معاي كتير … ومن مبدأ: كل زول الصاريهو عاجبو .. بنباركا ليك .. إن شاء الله تضوي ليك

    3. يا بت وراق انتي ما قاعدة تسوي الفطور ولا شنو
      تلاقيك كاتلة الشفع بالفول وانت مقهية في الكي بورد

  2. الناس الكارين الفصل واااااااااااااااااااااااااي

  3. بت وراق – مشترك
    برنجيية على إستحياء

  4. اكتفى بالرد رقم عشره

  5. البروف والسمار
    أنا مندهش …….. وبس !!!!!

  6. السلام عليكم ، البرف والاخوان ، العجب العجيب انو طياره تنزل فى ملعب دافورى ، يا برف فكنا من خط هيثرو ده اذا كان طياراتنا بتنزل فى اى محل ، المره الجايه حننزل فى الميدان الاحمر و بعده فى الطرف الاغر ثم فوق الكلوزيوم ذم برج خليفه ابو الزفت يمكن كمان فوق السحاب …………………. عجبى

    1. والله صحي يا بروف … خط هيثرو بعده أخير تخليهو كلو كلو … ههههههههههههههههههههه
      بالله واحد يدينا … سفّة … ( وش مكرضم )

  7. دي ذكرتني قصة حكاها لي زول قال: كانوا قاعدين في مطعم القراصة بعد شوية جات عربية اسعاف والسواق بتاعها نزل وقعد ياكل مع جماعة جنبهم كانوا يا دوب نزلوا القراصة. فقام قال للجماعة القعد معاهم: والله مع الزحمة دي لو ما كان شغلتا السرينا ما كان حصلتا قراصتكم دي.
    اها جماعة الطيارة ديل بيكون في ناس مستننهم بالقراصة فنظرا للزحمة وضيق الوقت جو بالطيارة وتموها ركشة وحصلوا القراصة ورجعوا تاني طبعا الجماعة العازمنهم كانوا مجهزين ليهم الركشة.

  8. الطيارة دى سايقه صلاح

    سايقه صلاح … سايقه صلاح … سايقه صلاح

    تقوم بينا بينا جب تقع بينا رب

    ودى الطيارة الفى المدنى

    وحى عووضه

    بس ياجماعة يمكن دا كان فيلم اكشن البطل ينزل من الطيارة ويركب الركشة

    ويمشى ينقذ البطلة من الخيانة ويجى راجع البطل والبطلة بالركشة ويركبو الطيارة

    تاليف واخراج هلكو وراكشو كومار

    كسره:

    ناس المرور ماقطعو الطيارة دى ايصال ليه؟

  9. مبروك البرنجية يا بت وراق – التالتة سابتة – و يعدين يا بروف الناس الناس ما عرفو لينا السواق اقصد الطيار لابس شنو؟ يعنى لو كان عراقى و سروال ممكن يكون شادى الطيارة سحبة و مرجعا تانى, و لو كان (ابرول) يكون دة ميكانيكى الطيارة طالع تيستة و راجع – عموما نحنا متوقعين صاروخ عديييل المرة الجاية

  10. كل ما نقول خلصت نلقاها يا دوب بدت
    ويا ناس البرنجية انشاء الله تنفعكم
    سواق الطيارة ود عمي قال لي مشينا مدني ودينا مستندات هامة تخص تنظيم القاعدة فرع مدني لانو الانترنت مراقب من الامبريالية الصهيونية البغيضة
    ما قلتو لي انا جيت الكم بحالي قلت جيت بدري قال…..ز

  11. كلام عجيب

  12. طيارة … ميدان… ركشه
    مدني .. عووضة .. دهشه
    طيارة. ميدان. ركشه
    مدني عووضة دهشه
    طيارة ميدان ركشه مدني عووضه دهشه …..
    بت وراق,, برنجيه,, مبروك
    مبروك ,برنجيه, بت وراق …
    طيارة , ركشه , مدني , دهشه !!

    1. رائع يا جنوبي
      تعرف أن أشهر شعراء الغناء عندنا هم الجونا من الصواني … إنت الصينية بتاعتك وين ؟؟؟وعلى طول وديها لي عوضية عضلات عشان تغنيها في عرس حنان الحنانة

      1. عامل لي فيها مندهش !؟ اها اندهش ..
        وحات الله عيونك المارقن ديل وشعرك المنفّش ده
        اشاعة ساااااااااكت ..

    2. وآآآآآآآآآآآآآآى مالك ياجنوبي كر على ولا ااااه اصلك طولت من البرنجيه
      ياشمباتى
      حالة الزول البكون مدمن وفجاء يتوقف جسمو بيكون ما طبيعي في الطب عندكم اسمه شنو

      1. اسمو زول طيارة ..
        طيارة ركشة مدني دهشه

      2. استهدا بالله انت لو حصلت ليك حاجه بنخلي القمردينه عديييل
        انا اوعدك بديها ليك المره الجايه بس كي روق المنقه
        معليش معليش بحجزه ليك يا مندهش عليك الله جيب البرنجيه من البت الشقيه

  13. بلدنا السودان ** يا أم ضوا ً بان
    أرض الأجداد ** أرض الكيزان
    صوتك ملأ الدنيا **و هز ّ الأركان
    خطوطنا انسرقت ** ليها زمان
    بترولنا اتسحّب ** شالو الأخوان
    جنيهنا رقصْ ** عيان وبيان
    وبلدنا انقسمت ** لي جزءان
    وسلامنا المطلوب ** روّح في خبر كان
    طيارتنا عظيمة ** صنع محلي وفي أم درمان
    وبكل السهولة بتنزل في الميدان
    وليها مساعد إسمو الركشة يا حبّان
    وليه تستغربوا منّ الكان
    ما نحن برانا بعناهو السودان
    ونحن برانا قســّــمْنا السودان
    ونحن برانا نسينا حبيبا ً لينا
    وطنا ً غالي .. وإسمو السودان

    1. بت الفكي .. كان اسمو السودان هسع بقي السوء دان..
      دان دان دان طيارة ركشة مدني دهشه !!

  14. بت وراق….
    عشان خاطر المندهش بس ببارك ليك ! والتدخين ضار بالصحة..

    جنوبى..
    الكتراااااابا !! دا شنو دا ؟؟

    1. شمباتي … تعرف هم الجماعة ديل أي حاجة حصلت
      للرسول والصحابة قالوا حصلت ليهم , ما فضل ليهم
      الا الاسراء والمعراج !! واظنو واحد منهم داير يجينا
      بكره يقول انو اسري به من الخرطوم الي مدني ومن
      (ميدان) (المنتهي) واصل بي ركشه ….
      طيارة .. ركشه.. مدني .. دهشه

      1. اتارينا نحن فى عام الرمادة مع فرق العمرين

  15. انتو يا جماعه وييييييييييين اخونا ود الخلاء
    يقال والعهده على الراوي انو السعوديين لو في سوداني عندو ابوه عيان بخلوه ينزل السودان واذا ابوه اتوفى بيرفضو ليهو
    اه من يوم اخونا جبرا اعلن وفاة ابونا وود الخلاء ما ظهر ياربي يكون الكفيل منعو الظهور

    1. حاج أحمد السلاوى | رد

      بت الوراق .. فى رايى المتواضع البسيط أعتقد والله اعلم إنو لو الزول ابوهو عيان بيخلوهو يسافر عشان يمكن يقدر يساعد فى علاجه وكدا .. أو على الأقل يقدر يشوفو قبال الرحيل .. كلامى صاح ..لا فى محله ؟؟؟؟؟؟؟

      1. بسسسسسس ياها ذاته الانا قاصداها
        كل مره كان عنده العشم ابوهو يكون كويس ويقول لينا انفسكم انفسكم لكنه اظن وليس كل الظن انو اقتنع

  16. حاج أحمد السلاوى | رد

    البروف الفاتح .. نان السُكات دا لمتين ..؟؟؟؟؟؟؟؟؟؟
    غايتو بكتاباتك دى يوم بتكتل ليك مسئول ..

  17. هههههههههههههههههههه,,هم ديل بموتوا يا سلولو !!؟ حسبى الله عليهم بس…

    جنوبى….
    انت ما سمعت الطيب مصطفى لما قالوا ليهو الترابى قال وقال وفعل وترك قال شنو ؟؟؟قال : دعوه,,فالرجل من اهل بدر !
    بالله شفت ليك…..اكتر من كدة !!؟(عد النقاط لو سمحت)

    1. رجاله

      1. لالا يا خالد.. هي حاجة كده زي الارض بالدارجي السوداني !! مش يا ياسين ؟

      2. الدايمه ؟؟؟

      3. ههههه .. زكرتني نكتة الاستاذ الكتب في السبورة ( بجعه )
        وقال للاولاد مين يقرأ الكلمة دي ؟ في شافع قعد يكورك
        استاذ استاذ استاااااااذ , قال ليه اها يا شاطر
        الشافع بي استعجال قال ( ج؟به) الاستاذ قال ليهو
        قرّرررربتا الشافع قال : ( ق؟ي؟ـه ).
        هييييييي انا ما داير معاكم تاني انت وشمباتي
        قعد تجروني للرذيلة …….

  18. يعني سواق بوكس حكومة ولا لاندكروزر حكومة ممكن يزوغ من رئيس السواقين في مصلحتو ويقضي مصلحة خاصة بعربية الحكومة لاكين سواق طيارة يعملا !!! لا لا دي حاجة ما بتخش الراس !! يعني معقول التسيب والاهمال وصل المرحلة دي !!؟
    حاج السلاوي .. من الله خلقك شفت ليك ميت مات تاني !! صاحبك ده بيكتلنا نحنا ديل !! الليلة وصلني صينية التجاني الماحي …

  19. عادى ما كل شي بقا عادى الجديد شنو

  20. سلامات للجميع ماذال التعليق محجوب لمخالفته قواعد النشر تماما

  21. والله يابت وراق … الاستاذ دا مشغلك ..أفوكاتو ولا شنو ؟ ما كله بحقه … إنت ..واستاذك فارغين ..إذا كنتم تريدون البحث عن كل الامور ..ودمغتها ..ومن ثم دهانها بمنظوركم السياسي الذي نعرفه بالنسبة لك ..ولكن استاذك العامل كراع برا ..وكراع جوا .. وإلا فعليه ان يذهب بالرؤية الصحفية الواضحة ..ويخلي السفسطة ..وجدلية آل بيزنطة ..وينتحي جانباً ..ويبرا قلمه صاح وينزل الداره .. لكن البكاء المعاهو ضحك .. قالوا بتاع ناس الإندراوة السياسية ..زي أصحاب الزهايمر السياسي ..وعجائزه .. وإنت يا بروف !! خليناك لله لانك بتضيع زمننا معاك في الفارغة ومقدودة ..وجايب معاك بت وراق صاحبة الشتم ..تدق ومافي زول بعرض ..وختى البعرض كاتلاه الشترة ..

      1. ؟؟؟؟؟؟؟؟؟؟؟؟؟؟؟؟؟؟

  22. يا جنوبى انت قلت لى قريت وين؟ لانو من نكتتك دى انا تقريبا قررررربت اعرف انت قارى وين !!!

    1. فيلا سلام ، هو جنونى قارئ ، ده كاتب و الاجر على الله ………………….. عجبى

      1. برضو بنفتش للقعر ، اصلو فيهو العسل ………………….. عجبى

      2. منتظرين الولعه ، و نمرره لى الشفقانين ……………. عجبى

  23. فيلاديمير .. سلام .. انت اصلو انا حكيت نكتة ولآ قلت اسم الناظر !!؟ عموما …. مريسة قوية .
    بت وراق … الحركة ديك اسما رد السؤال بي سؤال !!
    بالله هو اتاري ( شتم ) انا ما قايلو ( دِنقِر ) !! دقي يا بت أمي والعرضة بتجيب السكران وتجيب الواعي !!
    جبرا .. قلت لي مركبة فضائية ونزلت في ميدان كورة وشالت استاذ عوض !؟ يعني تكتب السيناريو ولمن يمثلوهو ليك تستغرب !!؟
    قريبي داك سايق القطر تلاتين سنة يوام واحد ما قالو لي سوق القطر ده بيتو في البيت معاك ….
    دي حقيقية : طيار اتزوج يوم عرسه جا سرب من الطاترات وعملت استعراض فوق بيت العرس لمدة 10 دقايق ومشت طبعا ديل اصحابوا الطيارين بجاملوهو لكن السؤال ( كم تكلف الدولة طلعت الطيارة الواحدة من قاعدتها لحدي ما تمشي تعمل استعراضا ده وترجع تاني لي قواعدا ؟؟ ) ..
    المال السايب يعلم الـ ….. ( نفس الخمسة نقط حقت شمباتي الفوق ديك )
    واااااااااااي طيارة ركشه مدني دهشه …..

    1. انت عارف ياجنوبي الزول الفوق الاسمه حمد النيل دا ذكرني يونس شلبي في مدرسة المشاغبين من بداية المسرحبه وحتى النهايه ما قدر يقول جمله مفيده

      1. يا بت وراق أختي
        أتركوه … فإنه مامور … !!!

  24. جنوبى…
    ههههههههههههههههههههه,,,,اجابة صحيحة,,وخالد دا بلف وبدور عشان نقولها احنا ! بعرفو الجنا الغتيت دا…

    خالد مدنى…
    هاك الرجالة دى ,,كاااااااااااااااااااااااااك..

    حمدالنيل…
    سبيل !!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: