يا دفع الله ما حيرتنا !

تقول الطرفة المتداولة والتي حدثت وقائعها إبان الحكم (المايوي) أنه قد صدرت أوامر لحراس بوابات ميناء بورتسودان لتشديد الحراسة نسبة لسرقة عدد من (القندرانات) من داخل (حوش الجمارك) ، بعد إنتهاء عمله جاء (أدروب) طالع عبر البوابة وهو يحمل داخل جيبه (حقة سعوط) مانعة فإستوقفه الحارس قائلاً :
– يا زول أقيف وطلع الفي جيبك ده فقام (أدروب) بإخراج الحقة وأخد ليهو سفة مدنكلة ثم خاطب الحارس متهكماً :
– حقّه تشيف .. قندراني ما تشيف .
العبدلله يعتقد إعتقاداً راسخاً أننا ما وصلنا إلى ما نحن عليه وفيه من فقر ومسغبة وهوان وضيق لم يكن إلا بفعل تغاضي بعض مسئولينا (إن لم يكن كل) عن جسام الأمور ورؤيتهم وإنشغالهم وإلتفاتهم إلى صغارها !
ومن هؤلاء المسئولين النائب البرلماني دفع الله حسب الرسول والذي كنا قبل أسابيع قد أفردنا له مقالاً بعنوان (جابت ليها إستحياء) عندما صرح لأحدي الصحف بإنو (متزوج تلاته) وإنو أى راجل بلغ الستين من عمرو وماسك في مرا واحده حقو يستحي !! كما أردف قائلا في ذات الحوار (الراجل مصمم لأكتر من مرا واحدة) !
لنترك مسألة (التصميم دي) والإستحياء جانبا فقد تناولناهما في ذلك المقال المذكور إذ أن ما دفع العبدلله أن يعمل (كلاكيت تاني مرة) للنائب دفع الله حسب الرسول هو طلب الاحاطة الذي تقدم به العضو المحترم لوزير الصحة حول (جمعيات تنظيم الأسرة وسياسة إستخدام الواقي الذكري) والذي يعد مثالاً (لنكتة أدروب) حيث لا يري ممثل الشعب وحارس مكتسباته والمدافع عن حقوقه السيد دفع الله (قندراني الفقر والمسغبة) وما آل إليه حال المواطنين من بؤس وضياع جراء السياسات الإقتصادية المتهورة كما لم ير سعادته (قندراني الفساد) الذي عم البر والبحر و(الجو) الأقطان والتقاوى والحج والعمرة والأوقاف وصندوق تشغيل الخريجين وغير ذلك من فساد يزكم الأنوف ، كما أنه لم ير (قندراني) اختراق اسرائيل لأجواء السودان مرة بعد أخرى والطيارات البقت تدخل وتمرق سااااكت وقتلها للمواطنين الأبرياء والتى تكررت لخمس مرات، كما لم ير (قندراني) إضراب أساتذة جامعة الخرطوم عن العمل الذين لم يحصلوا على استحقاقاتهم المالية ، كما أنه لم ير أيضاً (قندراني) الاعتصام المفتوح عن الدراسة لطلاب الطب بجامعة التقانة والذي يهدد مستقبلهم ! كما أنه لم ير أيضاً (قندراني) إنعدام توفر الدم والصفائح والأدوية الكيميائية لأطفال السرطان ، كما أنه لم ير (قندراني) العطش الذي هدد ويهدد كثير من أحياء العاصمة بسبب القطوعات غير المعروفة ! كما أنه لم ير وهو عضو لجنة العلاقات الخارجية (قندراني) محادثات أديس وقضايا اقتسام النفط والحدود والجنسية كما لم ير أيضاً إحتلال أراضينا فى حلايب وشلاتين وأبورماد ورأس حدربة !
نعم عزيزي القارئ – النائب دفع الله حسب الله – لم ير كل هذا (الكنفوي) من (القندرانات) ولم يطالب بصفته عضوا برلمانياً بمثول أي مسئول من (القندرانات) التي سردناها أعلاه لكنة لحكمة يعلمها الله رأي (الحقة) اقصد (الواقي الذكري) وما يشكله من تهديد لأمن وسلامة وإستقرار هذه الأمة وليست عزيزي القارئ هذه هي المرة التى (يشيف) فيها (دفع الله) الحقة وما (يشيف) القندراني وعشان ما أكون زول بيتكلم ساكت إليكم بعض هذه (الحقق) التي تمكن (دفع الله) من رؤيتها بعد أن عددنا (القندرانيات) التي لم يراها :
• الختان الفرعوني حيث تبنى الدفاع عنه كما شدد على ضرورة ايقاف الورش والندوات التي تنادي بعدم ختان الاناث (!)
• دعا الي ايقاف بث برنامج اغاني واغاني الذي تبثه قناة النيل الأزرق في رمضان.
• ناشد الشركات الكبري بسحب صور النساء من الشوارع الرئيسة والاعلان للسلع والبضائع المختلفة بطريقة اسلامية (!)
• نصح الشباب بضرورة اكمال نصف الدين والتعدد في الزيجات التي تخرجهم من الفقر الي الغني (شباب مين يا عم الظاهر إنتا مش عايش معانا)؟
• قاد من داخل البرلمان حملة منع دخول المغنية المصرية شيرين للبلاد وهو يحمل ملصق الحفلة داخل البرلمان موزعًا إياه بين النواب حيث طالب بإقالة الوزير الذي سمح بإقامة الحفل، وكل الجهات التي منحت تراخيص إقامة الحفل (!)
• أوضح بان المغني زرياب كان سببا في سقوط الاندلس وكوكب الشرق ام كلثوم كانت سببا في هزيمة المصريين امام اليهود (تحليل عسكري فني وكده)!
• تصدى لمحاولة ايقاف شركة دى كى تى لمنعها من استعمال جهاز شفط الأجنة الميتة فى المستشفيات وخاصة مستشفى بحرى..الشركة وكما صرح وزير الصحة لها عقد مع وزارة الصحة وتمارس نشاطها بمهنية عالية بشهادة الوزير.

عزيزي القارئ إذا تتبعت مسيرة النائب البرلماني (دفع الله) بل ومعظم النواب تجدها دائما تشوف (الحقة) لكنها لا تري (القندران) وده شئ طبيعي فالبرلمان برلمان (حكومة) عشان كده الناس (مظلومة) !

كسرة:
يا دفع الله ما حيرتنا (واقي ذكري) تشيف خط هيثرو (ما تشيف) !

كسرة ثابتة :
أخبار خط هيثرةو شنو(ووو ووو)؟

Advertisements

39 تعليق

  1. انشوف المستجدين ……………. عجبى

  2. كوكو يا أخوي مالك بقيت تتمتم … البرنجية دي سطلت بيك ولا شنو ..؟

    1. هى داب سلطه يا اب احمد ، العسكرى قبض واحد مسلط قال ليهو ما عايز اوديك النقطه لكن تورينى جبتها من وين ؟ المسلط قال للعسكرى ما فى مانع ارح ، لما مشوا نص ساعه العسكرى خرخر و قال ليهو وين المحل المسلط قال ليهو : واو واو وااااااااو …………… عجبى

  3. دفع الله ده حيرك صحي صحي حتي الكسرة الثابتة خلاك تكتبا بالادروباوي !!
    دفع الله مؤتمر وطني وياها المحرية فيهم , ابو قردة ده مالو خالي الاجهزة والادوية ومستشفي الذرة ومرضي الكلي وجاي يتكلم لينا في الواقي الذكري ؟ ولآ من عاشر قوما اربعين يوما … هسع بالله ده موضوع يطرحو للبرلمان ( حنبوكه ) من دكان البرقاوي بتقضي الغرض !!
    قلت لي دافع عن الختان الفرعوني !!؟ داير يتلذذ بي عذاب غيرو , شان كدي قدر ما نكورك ولااااااا شغلتو بينا ..
    قعدت اتخيل في دعاية العدس ديك ( عدسٌ طيّب .. لم تقولوا لي , لم تقولوا لي )

    1. جنونى سلام ، قلت لى حنبوكه بت قضى ، لا بت قضى ولا قاضى ، اوع تكون من ناس المفرد …………………. عجبى

      1. امرأة واحدة تكفي بس اريت نحنا نكفي وما ننكفي !!
        وااااااااي …

  4. من ناس ديل واااااااا أسفاي من زي ديل واااااااااا أسفاي….. بس خلاص

    1. سلام المنننننننننندهش ، ديل ذيييييييل ، و لا اسفا على من شال اصبعه خرم بيه عينه ………………………. عجبى

  5. السالم عليكم ، البرف و الاخوان ، رش !!!!! المجلس الو يا مجلس نخنو عارفين انكم هداه مهد!يين بى الحل و الترحال او الحوافز المليونيه ، فاتقوا الله فينا ، لكن يا برف حركة شيرين دى ما اجتماعيه و خفاض البنات سنه ، ما الفرعونى ، لكن السنه ، و اذا عايز من الحديث فعندك برنامج د/ اوزو فى mbc 4 وضحت الموضوع و قالت عمليه تجميليه ، وتانى و تالت و رابع و عاشر الايه 32 من سورة النور ( وانكحوا الايامى منكم و الصالحين من عبادكم و امائكم ان يكونوا فقراء يغنهم الله من فضله والله واسع عليم ) و الحديث ، صور البنات الحلوات مع لساتك العربيات يمكن مع الحلويات و التجميل ، اما زر قرباب فيتحمل وزر كل المغنين من بعده ، لكن الست ليها والله زمان يا سلاحى ، قصائد المديح النبوى ، النيل وما شابه لكنها ايضا اوغلت فى الحب و العشق و الغرام ، لكن ده كله ما بخلى دفع الله يتناسى قنادر شل ، واحد من اخوانا الزمان ختف ليهو جوالين زيت من طلمبة البنزين ، لما قبضوا عليهو وودوهو للقاضى قال ليهو القاضى عامل كده ليه ، قال لقيت مكتوب عليها شل ………………………. عجبى

    1. كوكو .. سلام .. خفاض البنات اثبت الاطباء انه يضر
      بهن ( يعثر الطمث ويعرض الزوجه ومولودها للخطر عند
      الولادة) واثبت الطب ان هناك حالات وفاة للأمهات و
      المواليد بسبب هذا الختان ولا يعقل ان تؤيد السنة
      مثل هذا وكل ما ثبت من السنة هو حديث الرسول صلي
      الله عليه وسلم لأم عطية( اذا خفضتِ فأشمي ولا تنهكي )
      شوف (اذا) دي .وحتي الشيوخ المؤيدين لختان الانثي
      اخدوا الامر من باب تجمل المرأة لزوجها (وينعل ابو
      التجمل البوديها في ستين داهية ده !!)
      لا ضرر ولا ضرار !!!!

      1. جنونى سلام ، ما قلت ليك شوف د / اوزو ، اذا شايفه بمعنى لما او حين ، وتانى نرجع من الاول ، الخفاض السنه وليس الفرعونى ، ثم ثانيا اليس هذا العلم هو التجريبى ، فاذا كان هذا هو الحال من قديم فماذا جد ؟ ولا لو دخلوا جحر ضب لدخلتموه ، عموما كل واحد حر فى تجملوا ……………. عجبى

      2. كوكو .. سلامين وحبه .. صراحة د/ اوزو ما شفتو لاكين
        من الله خلقك شفت فراشة بجملوها بي قصقيص جناحينا!!

      3. اخي كوكو فعلا كما قلت العلم التجريبى والتجريبي كان الدافع الرائسي لمحاربة الخفاض
        نسبة الحجم الكبير لموت الامهات والاطفال في عسر الولاده والاطفال من الاناث التي تمت فيهم
        تلك المجزره باسم الفرعون او الدين وهو منهم براءه
        زمان الوحده تموت في لحظات الولاده ومافي تصريح بان السبب الرئيسي هو الخفاض
        وفي الزواج بدل ما يكون الراحه للجانبين ( الرجل والمراه ) تكون المراه في حالة خوف ورعب شديد
        لماذا؟ اقول ليك سببه الخفاض الفرعوني هاجس يستمر مع المراه من صغرها وحتى تشيخ
        عزيزي كوكو لو استمريت اكتب ليك عن معاناة المراه بسبب هذا الموضوع الا جبرا بعمل مدونه جديد لانها ح تتملى

  6. متجاهلا مجزرة الحولة: الملياردير السوري “وفيق سعيد” يقيم حفل زفاف اسطوري لأبنته بباريس
    شهد قصر “فرساي” بباريس ، الذي كان مقر الحكم لملوك وملكات فرنسا ، حفل زفاف باذخ وصفته الصحف الغربية بأنه واحد من أكبر حفلات الزفاف الخاصة في التاريخ
    وتم خلال الحفل زفاف “رشا” البالغة من العمر 26 سنة وهي الابنة الوحيدة للملياردير السوري “وفيق سعيد” ، الذي يحمل الجنسية السعودية أيضا ، على عريسها خالد خواجة ، وقدرت مصادر تكاليف العرس بأكثر من 100 مليون دولار
    وحضر المدعوون البالغ عددهم 1500 من مختلف أنحاء العالم حيث أكتظ بهم القصر ، الذي كان آخر من سكنه الملك لويس السادس عشر وزوجته جوزفين ، فيما أحيا الحفل أشهر المطربين الغربيين وعلى رأسهم روبي ويليامز
    وتم اجراء عقد القران في قاعة المرايا الشهيرة بالقصر وهي ذات القاعة التي شهدت توقيع معاهدة فرساي بين الحلفاء المنتصرين في الحرب العالمية الأولى مع الألمان المهزومين في عام 1919
    وقال أحد المدعوين “كان حفلا لايصدق .. المدعوين الأثرياء الذين جاءوا للحفل بطياراتهم الخاصة اندهشوا من الاسراف والبذخ بالحفل والذي فاق تصورهم”
    وأبدت العديد من الصحف امتعاضها من توقيت اقامة الحفل والبذخ خصوصا في ظل الظروف والأحداث الجارية في سوريا ومذبحة “الحولة” التي لم يمض على وقوعها سوى عدة ايام
    يذكر أن الملياردير وفيق سعيد البالغ من العمر 72 عاما مهندس سوري قدم للسعودية في عام 1969 وانشأ شركة للمقاولات أثناء طفرة البناء التي شهدتها السعودية في عقد السبعينات من القرن
    الماضي ويعيش حاليا متنقلا بين قصوره في موناكو وباريس ولندن وماربيا والسعودية

  7. دفع الله دا يا بروف يكون عندو تجربة مريرة مع الأمو المن الصرة وتحت ر البتكلم عنها (الخفاض ، والواقي، والتعدد) .. عشان الراجل صاحب تجربة ثرة في هذا المجال … ومن رأي لا كمن سمع .. فأخير كلامو ما ترمو البحر .. والضايق لدغة الدبيب بخاف من جر الحبل … ويمكن داخل البرلمان هواية .. عشان شغلو الأساسي إتو ما عارفنو .. بكرة حيجيكم بموضوع عدد مرات الجماع الشرعية المصمم ليها الراجل … تفادياً للإحراج أحسن نسكت وما نفتح لينا باب من جهنم ..!

  8. الموضوع ياجبرة خطير وفعلا خطير ولكن برضو فى نفس الوقت بنقول مفروض نهتم كمان بى البلاوى المتللتله مثل حقوق الناس والظلم والوزراء التجار وهلم جرا
    وتانى يا جبرة الموضوع خطير ولا يمكن السكوت علية

  9. دفع الله دا جا معانا فى الخط عديييييييييل ياجماعة انا عندى وجهة نظر نبدا بالحقق قبل القندران وتاتى وحته حته نمشى للقندران والله رايكم شنو

  10. دفع الله الدلاهة ! وييييييييييييييييييييييييييييييييييي…

    كوكو..
    مبارك البرنيجة (على مضض )…

    1. د/ شمباتى صبرت ليك ، اظنك مشيت ليك على مضضضض ……………. عجبى

  11. البروف الحبيب
    لدي سؤال لشيخ دفع الله ( المصمم للدفع الرباعي ) سؤالي عن البوخة متى تكون واجباً ومستحبة ومكروهة وطبعا لأن هذا تخصصة أرجومنه الإجابة وجزاه الله خيرا

    1. الطابق البوخه قام ندى … واجبه كل خميس وجمعه و مستحبه السبت و الاحد و مكروهه الثلاثاء و الاربعاء ايام شغل …………..عجبى

      1. الله يجازيك زكرتني واحد في حلتنا زمااان كان ما بترسل
        لي مرتو أيييييي حته الا الزريبة للطلح ومرات كان
        يمشي يجيبو من ابوروف ويشيلو في كتفو قال بيستمتع
        بي شيلتو !!
        هو بتاع الدفع الرباعي ده دار يغش منو ؟ ما نظريه
        شفناها في روحنا ( كل ما قل العمر زاد العمل وكل
        ما زاد العمر قل العمل ) ..

      2. اخوى جنونى ، اعكس النظريه ، و انت الجارى ليها شنو ؟ درب المهله للحول قريب …………..عجبى

  12. البرووف والسمار
    سلام.
    كوكو وجنوبى شايفكم تتباصو براكم والميدان فاضى . أيامكم .
    الزول دة قال متزوج تلاتة وداير الختان الفرعونى لكن لو إتزوج ليهو واحدة بس …… بتشهيهو النوم .

    1. سلام حنين ، وين ايامك يا راجل ، قصدنا كده ، لكن اخونا جنونى مادير يفهمه ، ويقول لى كل ما العمل زاد ، كل ما العمر زاد تشوف حافز جديد و ترجع 10 سنه للخلف ، ما تغالط انت جرب وشوف ، والبيان بى العمل …………… عجبى

  13. سلامات ..
    المثل بقول .. الفيك بدربو .. ماتشيفو الفصاحه دي .. الزول دا يا جنوبي غالبو الشغل في البيت عشان كدا بجي يهضرب بيهو في البرلمان .. زي الزول البساهر في البيت و يجي ينوم في المكتب .. …

    يا شمباتي نوم بدري و لمن تجي الشغل ركز في شغلك .. خلي تتشالق و تتراشق

  14. حاج أحمد السلاوى | رد

    البروف الفاتح .. إقتراح .. تغيير العنوان من دفع الله ما حيرتنا ..إلى دفع الله ما عذبتنا …
    مجرد إقتراح …

  15. جدو : ياعيني علي الإضافه

  16. او يااا دفع الله ما جننتنا

  17. ياجماعه سلامات فردا فردا
    عذبني وتفنن وزيد في عذابك ) اتضح وضوح الشمس ان دفع الله من المتخلفبن والنازيين بمجرد انه نصير للخفاض الفرعونى
    والله المفروض يعملوا ليهو هو خفاض فوق مخه الملوس دا (قال ختان قال ) ….عجبي بعد اذن كوكو

    1. السلا عليكم ، هانتو يا اللخوان ما تزعلوا ساكت ، انا برضه ضد الفرعونى ، ضد الفرعونى ، ضد الفرعونى ، لكن مع السنه ، ادخلوا شاهد نت وفتشوا على الحلقه بتاعت د/ اوزو عشان تشوفوا العلم التجريبى قال شنو ، بالمناسبه انا معاكم ان شاء الله نلقى الحلقه دى ، طيب والسنه نعمل ليها شنو ، بت وراق نحنو ولدونا بى الحبل و انت كذلك و آلاف السنين العمليه دى مستمره ، الجد شنو ، الا اليام دى الحريم مرطبات …………………. عجبى

      1. نحن د/ اوزو ذاتتتتتتتتتتتو وثقب الاوزوان
        وللمعلوميه مافى حاجه اسمه سنه ولا ثبت ان احدى بنات الرسول (عليه افضل الصلاة واتم التسليم ) تم خفاضها
        دا كلام ساكت
        والحريم ما مرطبات الحريم مقهورات جزء كبير منهم والجزا التاني متخلف مع الاعتزار يحاولو يعزبو بناتوم عشان يقولوا
        الراجال ما برضو وما بعرف شنو داك. اريتوم ما رضو

      2. هوووي ياكوكو حبل شنو الولدوني بيهو انا ولدوني في مستشفى العيون وحبيت فى البرسلين ورضعوني الاستيم هههههههههههههههههههههههههه

  18. دي برنجية شنو دي
    بالله من تعلقياتكم العجيبة دي نسيت الموضوع الليلة- هو كان شنو
    بالجد قوية عديل والمعايش جبارة
    to hell

  19. ود اسحاق,,,سلام ومراحب,,
    الهيل اليعمل ليهم قرحة ! وى…

    بت وراق….
    اتاريك مفتحة !

  20. يا برووف مبرووووووووك تم الكشف عن حرامية خط قرينتش اقصد خط هيثرووووووو. بالله كسرتك الجاية ما دام ما الاولي جابت مريسة التامزين خليها عن من سرق السودان

  21. يا اخوانا حلها بسيط جدا نجمع الحقق و نعمل منها قندران ما فى مشكله النمر اصلو قط و القندران اصلو حقهز

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: