الفهم قسمة (شرح مقال)

كنت قبل أعوام قد كتبت مقالًاً بعنوان (فتاوى هايفة) وذلك حين أصدرت لجنة الإفتاء التابعة للأمانه العامه لهيئة كبار العلماء السعودية فتوى بعدم جواز تقديم (باقات الورد والزهور) للمرضى عند زيارتهم بحسبان أن ذلك من أفعال الكفار ، وقد جاءت هذه الفتوى في وقت كانت تنطلق فيه طائرات (الكفار ذاااتم) من قواعد في بلدان (إسلامية) لتضرب إخواننا المسلمين في العراق وكنت في ذلك المقال قد اردت أن اقول (إنتو يا علماء يا أفاضل ما أفتيتو لينا في الطيارات البيقوموا بيها الكقار من قدامكم عشان يضربو أخوانكم المسلمين تقوموا تفتوا لينا في الحاجات الهايفة دي؟) !!
والعبدلله يعلم أنه ما من فتوى (هايفة) وأن كل الفتاوى وإن كانت صغيرة من شأنها أن تنير طريق المسلم وترشده إلى سواء السبيل لكن (الهيافة) هنا عزيزي القارئ تأتي من مقارنة (إهداء الزهور) وإنطلاق الطائرات من ديار الإسلام لضرب المسلمين وإبادتهم.
وعلى الرغم من إنو الموضوع وااااضح والهدف منو أكثر وضوحاً إلا إننى ما أن قمت بنشر المقال وعينكم ما تشوف إلا النور فقد ترك بعض القراء الذين يعتقدون (كمال الفهم الديني) قصة القواعد (الأمريكية) و قتل (المسلمين) وعدم إدلاء (العلماء) بفتوى حول هذا الأمر الجلل .. تركوا ذلك (وقبلو على العبدلله) علي الرغم من أن العبدلله قد قال (كلمة حق) علها تيقظ ضمائر العلماء وبصائرهم التى تري (إهداء الزهور للمرضي) ولا تري دماء المسلمين التي يسفكها الأمريكان منطلقين من ديار الإسلام وأراضيه !
وعلى نفس الشاكلة وذات الفهم فقد قامت (ذات الفئة) بترك ما فعله (الشيخ ونيس) والحتة (البايخة) الذي وضع نفسه فيها وذلك في مقالنا عنه والذي جاء موثقاً بالصورة والصوت و(قبلو على العبدلله) يصفونه بأقذع النعوت والشتائم (التى لا يرتضيها الإسلام) وذلك في موقعنا على الفيسبوك .
http://www.facebook.com/alfatihgabra
تساءل البعض : ماذا يريد الكاتب من هذا المقال !
الإجابة في غاية البساطة وهي يجب أن ينال مثل هذا الشيخ أشد العقاب والتنكيل لأنه يسئ إلى الإسلام فهو ليس فرد مسلم عادي بل رمز إسلامي وداعية يعتمد عليه في هداية الشباب إلى طريق الإسلام الحق والبعد عن الرذائل والمنكرات .. فكيف إذا أتى بها هو؟ وكيف يثق الشباب بعد ذلك في دعاتهم ؟ العبد لله يري إن ما فعله هذا (الونيس) يستحق أن يغضب له أى مسلم غيور على دينه حتي يرتدع كل من يحاول أن يخدع الناس بتدثره بعباءة التدين بينما لا يتورع عن القيام بفعل الرذائل والمنكرات !
ليست المسالة هنا مسالة (إثبات) حدوث الواقعة بل وجود هذا الشيخ في موقع الشبهات الشئ الذي لا يليق به كداعية إسلامي ألم تسمع هذه (الفئة) ذلك الحديث عن الإمام علي عليه السلام: ( من وضع نفسه موضع شبهة فلا يلومنَّ الناس على سؤ الظن به) !
وهل تعتقد تلك (الفئة) أنه كان على العبد لله (كمسلم) أن يصفق للشيخ (ونيس) الذي إختار مكاناً نائياً وطريقاً سفرياً سريعاً وليلاً بهيماً ليجلس في عربة موصدة الأبواب ومعه فتاة لتأتي إجاباته للشرطة تارة بان الفتاة خطيبته وتارة أخري بأنها إبنة شقيقته؟
دعوني أتساءل : أوليس من مسئولية الكاتب (المسلم) فضح ممارسات مثل هؤلاء حتى لا تزداد أعدادهم فياتي يوم يصبح فيه غالبية دعاة المسلمين من هذه الشاكلة المتدثرة بثياب الدين وهي ابعد ما تكون عن تعاليمه ؟ وهل من مصلحة الإسلام إستخدام (فقه السترة) في مثل هذه الحالة ؟ أوليس نحن نعاني من مثل هذا النموذج كحال مسئولي بعض المرافق لدينا والذين تظن من فرط مظاهر تدينهم أنهم من أولياء الله (الصالحين) ثم ما تلبث أن تجدهم من عتاة (المختلسين) !!
لقد كنت أعتقد أن يهب كل مسلم غيور على دينه لإدانه هذا السلوك المشين والموقف المخزي من شخص له مكانة دينية كالشيخ ونيس وأن ينبذه ويتبرأ مما قام بفعله قائلاً بان هذا الفعل شاذ ولا يصدر من عالم وداعية من دعاة المسلمين وأن دعاة المسلمين وعلمائهم لا يقترفون مثل هذه الأفعال الشائنة ولا يضعون أنفسهم في مثل هذه المواقف المريبة حتى يساء بهم الظن ولكن هالني أن (البعض) قام بالتعامل مع الحدث وكأن هذا الشيخ (معصوم عن الخطأ) محاولاً أن يصنع منه (ضحية) رغم موقفه المريب المهزوز والذي لا يمكن أن يكون مدبراً له بأي حال من الأحوال بينما صب جام لعناته على (العبدلله) الذى أراد أن يكون هذا الونيس عبرة لكل من أراد أن يقوم بتشويه صورة دعاة المسلمين (علي الأقل بوضع نفسه مكان الشبهات) … فعلاً الفهم قسمة !!

كسرة :
بعد ده ح نعمل مقال (أبو شرح) للجماعة ديل ومقال أبو (من دون شرح) ليكم !

كسرة ثابتة :
أخبار خط هيثرو شنو(ووو ووو) !

Advertisements

35 تعليق

  1. شوفو غتاتة الكيبورد ده

    1. نبارك ليك وبي كده نضمن توقف الاثار السالبه التي صاحبتك لتوقف البرنجيه عنك ونقول وداعا للصواني
      هههههههههههه

      1. نبارك ليكي السمح كلو إنتي …
        تعرفي الكيبورد ابا يكتب عصلج معاي وبعد اشتغل
        خفت اكتب برنجيه ويكون واحد فاتني واقوم اتهوبل لاكين
        احمد الله اتهوبلوا ناس تانين ..

      2. مشكووووووووووور عزيزي جنوبي

      3. ما جنوبي !! تقول شنو ! تديهو 300 كيلو يشاكلك في 15 كيلو
        خليتنني اتحسس والله لكن اسلوب البشير ده ما بنفع معاي خلي دار تعيني نائب رئيس .

  2. برنجية ، برنجييية ، برنجيييييييية

    1. برنجيييييه !! ومال الفوق ده قولد ليف !!
      كان ليك يا حبيب .. قنوبي خد البرنقي .. اجي ونيس
      ده مالو قلب لسانا …

    2. غلتان و الله يا جنونى المدشدش يجيب 8 تقول ليهو9 و ………………غجبى

  3. برنجيه تانية هدية لجنوبي لظروفه الخاصة بالكيبورد

  4. يا جبرا انت غلطان ياخي وأمين الشرطة غلطان والكانوا معاه غلطانين هم القال ليهم يمشوا يفتشوا في ( الضلمة منو ) تانيا بالنسبة لحالة شيخنا ونيس قدس الله سره وصرف عنه كل جبرا من جبرات الزمن أنه لا ينبطبق عليه الحديث القائل ( ما خلا رجل بإمرأة إلا والشيطان ثالثهما ) لأنه ببساطة لا يلتقي شيطانين في مكان واحد في لحظة واحدة في (ضلمة واحدة ) مع فتاة واحدة ففي هده الحالة لا ينطبق الحديث أعلاه على شيخ الاسلام ونيس لأنه وبما ورد من حيثيات في القضية دي فهو الشيطان نفسه بقرونه وبشاعته وأوصافه وبعدين شنو يعني لقوا ليهم شيطان معاه فتاة في ضلام وهو أصلا الشيطان بعيش وين يعني ما بعيش في الضلمة وبعض الفلل . أنا ما عارف ياجبرا إنت الشيخ ده عمل ليك شنو ما إحتمال كان عندو اجتماع مع البت دي بخصوص اللجان النسائية الحيعملوها لضبط السلوك العام بإعتبار إنهم حيفوزوا ويشكلوا حكومة اسلامية التوجه والسلوك والممارسة . إنت غلطان ياجبرا تاني ما تعمل كده ،،، طيب ؟؟؟

  5. قال تعالى: {يَأَيّهَا الّذِينَ آمَنُوَاْ إِن جَآءَكُمْ فَاسِقُ بِنَبَإٍ فَتَبَيّنُوَاْ أَن تُصِيببُواْ قَوْمَا بِجَهَالَةٍ فَتُصْبِحُوا | رد

    الاستاذ الفاتح جبرا
    ماذكرته صحيح, والاسلام ليس فيه محسوبية والكل يجب ان يخضع لحكم الله, ويأكد ذلك حديث المراءة المخزومية التي سرقت وارد البعض ان ان تعفى من الحد لمكانته ولعزة قومها , فغضب الرسول لذلك غضبا شديدا وقال : ” يا أيها الناس ، إنما ضل من كان قبلكم ، أنهم كانوا إذا سرق الشريف تركوه ، وإذا سرق الضعيف فيهم أقاموا عليه الحد ، وايم الله ، لو أن فاطمة بنت محمد سرقت لقطع محمد يدها ).
    لكن استاذي العزيز : هذا إذا ثبت الجرم وتأكد بما لايدع مجالا للشك اما وهو في طور التحقيق مع وجود ولو شبهة تلفيقه فالاحوط ان لا نخوض فيه وندع التحقيق يأخذ مجراه (وَتَحْسَبُونَهُ هَيِّناً وَهُوَ عِنْدَ اللَّهِ عَظِيمٌ) (سورة النور:من الآية15)
    فهو ليس اول من يتهم وتثبت براته والنظام السابق في مصر اعتاد على مثل هذه التلفيقات فربما كانت هذه واحدة منها
    “اليكم موقع الشيخ وما ساقه من ادلة على براءتهhttp://www.wanees.net/mktab/ ”
    وكذلك http://www.youtube.com/watch?gl=RU&v=F98AlI7HKAQ
    , “ستبدي لك الأيام ما كنت جاهلاً *** ويأتيك بالأخبار من لم تزود ”
    فإذا ثبت هذا الامر فلابد من عقاب رادع , وكل ابن ادم خطاء وحيثما تكون تجد الصالح والطالح , وهذه تحسب عليه لا على التيار الاسلامي وان كان المقصود من القصة حقيقة كانت ام تلفيق, تفريق الناس من حول المرشح الاسلامي د. محمد مرسي وتقديم الدعم لمرشح النظام السابق الفريق أحمد شفيق.

  6. البروف والسمار الكرام سلام . . .
    أعتقد نكتفي ب ( بدون شرح ) لأنو أبو ( شرح ) حينتطو ليك نفس الناس ديل يعملو فيها ما فاهمين لسه.
    هم فاهمين تماماً المقصود لكن دا نهج الترهيب الذي يتبعه دعاة حماية الدين و هي لله.
    ما تضيع وقتك يا جبرا ، مرمي الله ما بترفع.

  7. الاخ جبرا تحيه واحترام
    انت عارف لي قاموا فيك ماااااااااااا انته هبشتهم !!! موش لانهم ما فهموا

  8. ههههههههههههههههههههههههههههههههههههه,,,,انا شرحو,,,ومين شرحو,,,هذا شرحووووووووووووووو…
    لحظ الشراااااح يا بروف,,تسلم الايادى والفهم…

  9. جنوبى….
    ههههههههههههههههههههههههههه,,حامضة من كيبوردك لكن !

    المندهش…
    ما قصرت مع جدك ,,تسلم ويسلم اهداءك…

    الحبيب سنكل..
    وكان رفعوهو بيحصل ليهو شنووووو !!؟ وطييب!

    1. شمباتي
      ما تجيب سيرة (الرفع )اليومين دي الشعب عندو حساسيه

    2. د. شنباتي إزيك و كيفنك . . .
      لو رفعوهو تاني بقع.
      بس ذي ما قالت ليك بت وراق اليومين ديل الحكومه بتزعل لو جبنا سيرة ( الرفع ).

    3. بيقع تاااااااااني وبرميك معاهو ..
      يموت الشعب برفع الدعم موتاً وخير البلد تأكله الكلاب
      كلاب ماليه البلد وما لاقيه اليقولها جر ..

  10. فعلا انو الاستنكار يزيد في حالة ان مرتكب الفعلة
    شخص يفترض ان يهدي من يفعل مثل هذا الفعل المشين .
    الجماعات الاسلامية مشكلتها انو ابداً ما بتدين شخص
    ينتمي لها كي لا تضر يسمعتها ولا يهمها ان تضر بسمعة
    الاسلام .
    رأينا ابشع انواع السرقة في مدعين الاسلام عندنا
    ورافعي شعار التوجه الاسلامي بسرقة الشئون الدينية
    والاوقاف وسرقة ديوان الزكاة حسب تقرير المراجع
    العام ( العام مع الجنيه ) ولم نسمع كلمة استنكار
    من قياداتهم لأنهم كلهم ( شبهينا واتلاقينا ) .
    ديل بيشتروا بآيات الله ثمنا قليلا وقاعدين يغشونا
    باسم الله عشان كده لمن يتفضحوا ردة فعلنا بتكون
    مضاعفة..
    معاي جماعة مصريين لقيت فهمهم انو دي عملية مدبره
    من فلول مبارك عشان يشوهو سمعة الاسلاميين وواحد منهم
    قال يكون حطولوا البنت ديا في سكتو عشان تغريه وهما
    يجو ويمسكوهم !! قلت ليهو طيّب شيخ ونيس ليه ما قال
    ليها ( إني اخاف الله ) !!

  11. المندهش – بقيت تخت ليك (ي) زيادة مع كل برنجية زى (واوات) البروف بتاعت الخط – الليلة كنت ناوى ليها بس النومة جرت شوية و نداء الواجب كان اوشك – المرة الجاية ان شاء الله
    بت وراق – عشان تنافسى لازم تخلى مشى الجزر يوم بعد يوم

    1. انا قلت ليكم الجزر دا بمشي كل سته شهور عارفاكم دايرين تجرجروني وتعرفو انا بعمل شنو في ربع الكيلو لكن اصلو مااااااااا بوريكم
      انا عارفه الشعب دا جنه يشف اي موضوع اقوم اوريكم وتضيع على هااااااااااااااااي دي حصري على بت وراق

  12. انتو تعالوا اسالكم الترابي المفكر والمدبر والاسلامي الكبييييييييييييير دا قال نحن غلطانين والمبادي والشعارات الرافعنها ما عملنا بيها وعملنا عكسها من (فساد وسرقه واكل الناس بالباطل وكذب على الشعب ) اها الناس البدافع عنهم ديل مالوم صاحب الشي قال انا مجججججججججججججججججججججججججرم وما مثلنا الشعائر الدينيه صحيح

    1. هييييييييي يا بت وراق انتي ما مؤمنة ولآ شنو
      ديل لو ردوا لعادوا لما نهو عنه وانهم لكاذبون ..
      وده شيخهم يا بت أمي ..

  13. (صاحب الشي) والشئ دي الجماعات الاسلاميه التي رضعة من ثدي الجماعه الاسلاميه المصريه
    دا طبعا (ابو شرح ) للتعليق حقي

  14. سنكل وبت وراق…
    هههههههههههههههههههههههههههههه,,غايتو جنس تحسس عليكم ! لكن (انا فهمتكم) ! وزينى الزين اب حالا زين..

    جنوبى…
    جر جر جر,,نججججررررررررررررر,جر جر جر (طبعا للجماعة يا حبيب/ودا ابو شرح على قول بت وراق) كع

    1. ههههههههه تعرف يا شمباتي ( ابو شرح ) ده مفيد
      احيانا لاني قررررررررربت افهمك ( صاح ) ..
      واحدة ماسكة ايسكريم شعلة جاها زول قال ليها داير
      اطلب منك طلب لاكين خايفك تفهميني غلط , قالت ليه
      عادي اخد راحتك قال : داير مصه البت قالت : بس
      كده اتفضل الايسكريم كلو , قال : ما قلت ليك ح
      تفهميني غلط …
      ( مش نحنا لسع في موضوع ونيس قليل الادب وشمباتي الانا
      ما فهمتو صاح …وقلة الادب بتجيب اخواتا)
      غيتو ونيس ده زي وزير الدفاع ونّسنا كم يوم كتر خيرو

  15. حاج أحمد السلاوى | رد

    بصراحة يا بروف ..والصراحة راحة غالبية الناس ( والشباب خصوصاً .. زينا كدا ) بقوا ما عندهم ثقة فى أى زول عامل ليهو دقن وغرة بقلم الحواجب فوق جبهته وحافظ ليهو آية وحديثين ويجى يتكلم فى الدين..لأنو المسألة بقت واضحة وما دايرة ليها درس عصر .. المسالة بقت إستغفال الناس البسطاء الطيبين اللى ممكن يصدقوا أى حاجة وبقت إستعلال الدين لتحقيق مصالح دنيوية شخصية والناس البسطاء يقولوا ليك نحنا علينا بالظاهروما لينا دعوة بالشى الفى النفوس ..
    واوفقك على إنو هذا الشيخ إن ثبتت عليه التهمة إياها يجب ان تكون عقوبته مضاعفة عشرة مرات حتى يكون عظة للآخرين من مدعى الإسلام والإسلام منهم بريييييييييييييييييييييىء .والشيخ دا بكل بساطة نسى عبارة : وإذا بٌليتم فاستتروا…ولا شنو ؟
    وخلونا النشوف آخرتا شنو مع الربيع العربى المزيف دا .. !!!

  16. حاج احمد السلاوي .. صدق او لا تصدق غرة الصلاة في واحد في سوق ليبيا بيعملا للناس بالقروش !!!!!
    ويكفيك تعب قيام الليل وكثرة السجود ( طبعا في ناس بسموهو لحقني السوق ) كل الشغلة ما بتاخد من زمنك ربع ساعة تدخل الكُشك تطلع منو كِشِك .

    1. يا جنوبي وصف الكشك محلو وين اصلي داير اعمل عمايل ما كوسية ودي لازما يكون عندك صرة اقصد غرة

      1. كتلوني ولسه حي .. انت سمعت بالنصبة حقت الدهب ؟
        جماعة من ابان دقون وشالات ديل ( لاكين ما عارفم كان
        حقيقيين ولآ متنكرين ) ساقو معاهم واحد جنوبي نضييف
        ولابس بدلة واخر قشرة , دخلوا للصايغ وقالوا ليهو
        ده والي واراب وزوجته دايرة دهب , الصايغ نزل ليهم كم
        كم طقم قالوا للصايغ سعادة الوالي ح يقعد معاك هنا
        ونحنا نمشي لزوجته تختار الطقوم العايزاها ونجي نحاسبك
        وقعدوا الوالي مع الصايغ ومشو المشية الياها , اها
        لمن اتأخروا الصايغ قلبو اكلو ومسك في الجنوبي وطلع
        الجنوبي زاااتو ما عارف الحاصل شنو وانو هو مجرد طلبه
        الناس ديل ساقوهو وحموه ولبسوهو نضييف ودايرين
        يحتفلوا بي اسلامه !!
        ياربي الجنوبي ده بكون صوّت للانفصال !!؟

  17. والله ياجبرة بنفس هذا الايمان الذي تؤمن به ككاتب انا رحت شايت المقال لكل المواقع الاسفيرية لان هذا لو حصل من عادل امام مثلا ما كنت اشتغلت بالموضوع شغلة لكن من واحد شيخ لا افضحه وافضح اللي يتشدد له كمان

  18. يا جماعه إستهدوا بالله .
    ….
    لاحولتن .

  19. لدهشتي ينتشر قراء المدونه في حوالي٥٠‏ دوله حول العالم ولكن الاكثر ادهاشا ان حوالي ‏١٢٢‏ قارئ من دولة اسرائيل عديييييل دي دايره ليها عمود في حالة العدم كسره يا ود جبره‏!‏‏!‏‏!‏

  20. اصلو الدلال حق الشباب…
    قلت لى الشباب زيكم كدة يا سلاوى !! هيييق

  21. حاج أحمد السلاوى | رد

    شنباتى .. الشباب شباب الروح …,القلب … عندك أى إعتراض أو مانع على الكلام دا …..ولا ……….. ؟؟؟؟؟؟؟؟؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: