فن التدبير في الواقع المرير

عزيزي المواطن مهدود الدخل .. أو بالأصح (معدوم) الدخل .. لا عليك أن صار كيلو الطماطم 15 جنيه أو البصلة الوااحدة 2 جنيه او كيلو اللحم بي 40 جنيه .. أو الليمونة بي جنيه ..لا عيك إن إرتفعت أسعار السلع الأساسية والما أساسية (كمان) فهنالك الكثير من الحلول والابتكارات التي عكف العبدلله على وضعها وتقديمها لك في كتاب بعنوان ( فن التدبير في الواقع المرير) ها أنذا أقتطف لكم بعضاً منها وأؤكد لكم أن من شأنها أن تعينكم على البقاء أحياء (حتي اليوم الثامن من الشهر) والباقي (إتصرفو وكده) !.
(1) التوم :
التجهيز : يتم دق الثوم ناعماً ووضعه داخل علبة مصمته لعدة أيام
طريقة الإستخدام : تفتخ علبة الثوم أمام فوهة (الحلة) لتنداح منها رائحته على الملاح مباشرة
تحذير : يجب أن تكون العلبه موجهة لفوهة الحلة بدرجة حاده حتي لا يندلق الثوم داخل الحلة والميزانية تبوظ
تنبية : بعد الإستخدام تأكد من أقفال العلبة بشكل محكم حتى لا يتسرب (غاز الثوم) من العلبة
وتكون الطبخة الجاية من غير توم !
(2) البصل :
التجهيز : يتم إزالة طبقة خارجية وااااحده عن البصلة ، بإستخدام إبرة وخيط قم بإدخال الإبرة في منتصف البصلة واجعل الخيط يتدلي منها ، قم بعمل خرم صغير في منتصف غطاء الحلة
طريقة الإستخدام : إدخل طرف الخيط داخل الخرم الذى في غطاء الحلة ثم أعقده لتصبح البصلة متدلية داخل الحلة ثم قم بقفل الحلة بإحكام حتى تتسبك رائحة البصلة مع محتويات الحلة .
تحذير : تأكد من أن البصلة المتدلية لا تلامس محتويات الحلة حتي لا (تتهربد) مع المحتويات وحقك يروح
تنبية : بعد إكتمال الطهي تأكد من فك الخيط ووضع البصلة داخل علبة وتأكد من أقفالها جيداً حتى تتمكن من استخدامها طوال الشهر .

معجون الاسنان (3)
– أمسك المعجون باليد اليسري بعد أن تقوم بفتحة
-أمسك الفرشاة بيدك اليمنى
-قم بتمرير رأس الفرشاة على فتحة صباع المعجون لمدة 20 ثانية
-(تسوك على بركة الله)
– تنبيه ؛ لا تنسي أن تغسل الفرشاة بعد الإستخدام للتخلص من بقايا المعجون (ههههه) !!

(4) الأحذية :
– قم بإحضار (جوز) من قارورة مياه معدنية فارغة (موبايل) للذين يرتدون مقاس 39-41 أو(فاميلي سايز) لمن مقاساتهم أكبر
– قم بواسطة المقص بقطع الجزء المسلوب الذي يلي رأس القارورة
– قم بقطع القارورة طولياً إلى نصفين متساويين على مقاسك
– أقلب نص القارورة المفتوح إلى أعلى ثم ضع رجلك داخلها بعد ربطها بخيط قوى ويلا أكسح على بركة الله
– لو الواطة سخنت يمكنك وضع (قطعة قماش قديم) كأرضية تحت الرجل مباشرة وكان المسألة (سخنت أكتر) يمكنك رش بعض الماء عليه للتبريد وكده !
تحذير :
تأكد من وضع الحذاء في مكان آمن عند دخولك إلى المسجد حتى لا يسرق !
(5) السفة
– قم بشراءعدد 2 كيس بلاستك (فاضي) ذي (تخانة) تجعل محتوياته نحتفظ بالرطوبة
– أكتب بقلم الشينى على الأول (الجديد) وعلى ظهر الكيس الثاني (الراجع)
– بعد أن ينتهي مفعول (السفة) قم بدردمتها ووضعها في كيس الراجع ثم تأكد من إقفال الكيس جيداً منعا من دخول الهواء وحتى تحتفظ السفة بحيويتها وموادها (المسرطنة)
– كرر هذه العملية حتى (يكمل) التمباك الذي في الكيس الجديد وعندها قم بإفراغ (التمباك) الذي بداخل كيس (الراجع) في (الكيس الجديد) ! لتبدأ الدورة الثانية فالثالثة وهلم جراً حتي يتحلل (التمباك) إلى عوامله الأوليه وعندها أحتفظ به في حرز أمين فالظروف ما معروفة إحتمال يكون في رفع دعم تااااااني !!
(6) العلاج :
– توجه إلى التيمان وقم شراء الآتي وضعه في صيدليتك العائلية :
– شوية زيت سمسم+حبة قرض+حبة كمون+شوية عسل+شوية حبة سوداء +شوية حرجل
– لا تنس أن تسأل (العشاب) عن طرق الإستعمال والجرعات وبلاش تسألو عن (الأعراض الجانبية) لأنها مش ح تكون أسوأ من النحنا فيهو ده
(7) المواصلات :
– وبمناسبة ﺯﻳﺎﺩﻩ ﺗﻌﺮﻓﻪ ﺍﻟﻤﻮﺍﺻﻼﺕ أرسل لي أحد القراءهذا الإعلان :
تعلن شركة (كداري ولا نقوم سداري) عن وصول حمير جميع المقاسات والموديلات صنعت وصممت لتلائم أجواء السودان وذلك بالمواصفات التالية :
– إقتصادية في إستهلاك الغذاء (قصب برسيم عيش ناشف أبو سبعين أبو مليون أبو أي حاجة في أي حتة)
– مدربة على تفادي الحفر والطبات الماليه البلد
– قوة 10 عجلة (دبل) مقاس 26( ما تخاف بتطلع الكبري عادي)
– دفع رباعي وتعشيقة متعددة المهام (أضان شمال يمين ، إشارات جنب ، ضنب خلف)
تنبيه : توجد إكسسوارات (كاتم صوت) و(بامبرز) عشان بتاعين (النفايات) وكده
أيها المواطن سارع بإقتناء حمارك الآن عشان الجماعة لو شموا الخبر ده ح يمنعوا إستيراد الحمير إلا (موديل السنو) و يعملو رسوم (فرق موديل) وكده

كسرة :
نشتري حمير ليه؟ ما نحنا أهو ما شاء الله حمير (فل أوبشن) وبنتحمل ده كوووولو !!

كسرة ثابتة :
أخبار خط هيثرو شنو(ووو ووو)؟

Advertisements

58 تعليق

  1. ب – ر – ن – ج – ي – ة

    1. التالت ، لانو جنونى يكون لابد فى النص

  2. برنجيييييييييية

    1. مبارك مبارك مبارك و عقبال شمباتى و بت وراق الابت تورينا الاقتصاد فى ربع اللحمه و اب احمد و سبتمبر الشماها مره واحده وجن ، امال المدمنين يقابضوا …………..عجبى

      1. كوكو سلامات
        مصرين تعرفوا انا بعمل شنو شايفه اخونا جبرا شرح ليكم البصل والتوم وخلا اللحمه على ما مشكله ح اوريكم السر وعلى الله التوكل
        طبعا زي ما عارفين انو ربع الكيلو اغلبه عضم وشحم وكثير من الجلافيط وقليل من اللحم الوصفه كا لاتى
        بجيب( حلة القيزان ) للذين لا يعرفون حلة القيزان هي حلة الملاح الكبيره بتاعت المناسبات واملاها فل مويه واقوم بوضع العضام وقليل من الجلافيط واعمل شوربه ويتم توزيع الشوربه على جميع تلاجات الحله وكل يوم اطبخ بالشوربه لكل الملاحات واقوم اقسم اللحمه الى قسمين اجفف نص يعني اعمله ( ) واضحه دى وبعدين النص التاني الخبطه مع الرز لزوم المحشي وكده وباقى الجلافيط مع الزيت احمر البطاطس والاسود وبى كده تتم السته شهور واللحمه الناشفه لسع ما اتهبشت
        هههههههههههههههههههههههههههههههههه اوعكم تشفه الطريقه لاني سجلتها فى حقوق الملكيه الفكريه

      2. الله يجازى محنك يا بت وراق, بجد عجبتنى الوصفة دى و حاخلى المرا تعملا طوالى, و على الجزيمة كان ما اخلى ليك ربع الكيلو دة يكمل معاى سنة !! اسكتى ساى بس

      3. يعني ما ح تطلع الشارع ؟
        جبرا مستشار التنفيس وبت وراق مستشارة التدبير والاتنين مع الحكومة . ههههههههه

  3. نقة النسوان يا أبو ناجي .. ما عندك ليهو وصفة إقتصادية عشان ما تقصر العمر الفضل ..

    المندهش
    يبربر شنو أقول ليك ؟؟؟

  4. و بالنسبة للسجاير (البرنجية و كدة) يكون معاك كيس ورق فاضى تجمع فيو (المبسم) و رماد السيجارة زاتو,, و كيس الورق عشان بيدخل هواء و ينشف المحتويات لاعادة توليعها مرة تانية – و صحتيييين

  5. أول مرة في حياتي اضحك يوم السبت الصباح ..
    كوكو .. سلام . البد وين عاين المندهش ده قطعا لينا
    في راسنا كيف !!
    المندهش .. سلام . مبروك برنجيتك المقعّدة ..

    1. جنونى سلام ، شفت اختلاس المدشدش و ماهو اختلاس بس بل و السرقه ثم المواعده بى اللفه و لا فى الشاطئ ……….. عجبى

      1. كوكو إنت المندهش ده قعد يتكلم عن ياتو برنجية ؟
        غايتو الزول ده تاني أصلي ما بضايقو فيها!!لذة
        خلسة ولقاء مسارقة وانتظار موعد ؟ مخيّر الله كلٌ يبكي
        علي برنجيته ..

      2. جنونى سلام ، المدشدش ده الظاهر عليهو لسه حار بى لهب الجاز ، و نحنو دخلنا مرحلة الهبوت ، اديها هزه خليها تروق ……………….. عجبى

      3. تاني مافي هزة يالحبيب والهبوت في حكومة أمازونيا ضيع البلد

  6. جنوبي يباركو ليك السمح ، شفت بالله حلاة البرنجية وأحلى ما فيها لذة الخلسة، ولقاء المسارقة، وانتظار الموعد … وييييي

  7. يا استاذ بالنسبة للسجاير وكده نعمل شنو؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

  8. السلام عليكم ، البرف و الاخوان ، طيب يا برف الجوه الحله شنو ؟؟؟؟ طبيعى انو مويه ، و بما انو نحن المكون بتاعنا اغلبه من المويه ف الافضل شراب المويه عديل ثم بعد داك شم البصل و التوم و الملح و الششششششششمار ، اما التدخين على وزن التمباك ، ف ايضا شراء كيس ونفخ الدخان جواه للاحتفاظ به لقصع الجره و كفاية الغير مدخنين شر التدخين السلبى ، اما المويه ف بدل الجوطه والمظاهرات الما منها فايده فنروح كلنا خشم البحر منها ناكل و نشرب و نرطب و بعضنا يغرق و الاخر ياكله التمساح ، ارضاءاً لى بتاعين المويه الشايلين قروشنا من غير مويه ، اما الوقود شاحد الله يزيدوهو الف% ، عشان المتفلهمين الما بعرفوا انو السواقه فن و ذوق و ادب ، زى ما ادبونا فى الشارع ، و السكر على الطلاق جابوا لينا الزلعه ، كل ما نشوف لينا سكر فى دكان اشترى لى ، شوال ولا ذو القعده ، نص كيلو اوفره لى رمضان ، سؤال : الجداد النصه تلج والربع عضام صار بى 28 جنيه الكيلو ، طيب كيلو جلد الخروف حيبقى بى كم ؟ …………………………. عجبى

    1. طيّب معجون الاسنان ده نعمل شنووو ووو !!
      هو مع الظروف دي كللللها برضو ح نصوم رمضان ؟
      عشان نحس بي منووو ووو ؟

  9. يا أخونا لحمة وجداد شنو الحكاية ومافيها كل واحد يجيب لوح خشب أأأأي لوح زي بتاع الحيران ويرسم فيهو لحمة وجدادة وكل مالذ وطاب من الطعام والفواكه والحلويات وبعد ذلك يغسله بموية البحر (الملانة صارقيل دي ) ويشرب المحاية وبالهنا والشفاء

    1. والحكومة دي تكون قاعدة لحدي ما نرسم الحاجات دي في
      اللوح ونمشي لحدي البحر نغسّل اللوح ونشرب المحاية !!؟
      يااااااااه الحكومة دي ح تقعد كتير خلاص ..

  10. واو خط هيثرو دي نظام من هنا لي واو ولا شنو

  11. بت وراق – مختفية عن الساحة الفنية ليه؟ ما انتى صاحبة تجربة ناجحة فى تدبير الواقع المرير بدليل ربع كيلو اللحمة اللى كل 6 شهور دة, و الا شنو!!! افيدينا انتى كمان فالبروف عدت عليو حتة اللحمة دي على ما يبدو !

    1. الأخ فلايديمير \
      ربع كييييللللللللو في ستة شهور بس كان بت وراق مبزززرة إنت كمان عاوز تبزر زيها ؟؟

    2. مختفيه اسبوع بقيت ممرضه ودكتور عديل فك وتركيب الدربات وطعن الحقن ومعرفة عدد الوحدات للهايبرين وكده
      يعني لو غبته شهر بجيكم جراااح عديل
      اما التدبير فتم شرح الطريقه للاخ كوكو

  12. اخى المندهش – ابدا ما مبزر و لا حاجة, انا اصلا خليت اللحمة خالس من سنين, و بستناها من عزومة لعرس لعقد لطهور و كدة, بس قلنا يمكن بت وراق تدينا وصفة سحرية للربع كيلو دة نقوم نرجع نتذكرها من تانى !!!

  13. ÷ههههههههههههههههههههههههههههه,,بتاعت المعجون دى حامضة جدا !
    ضرورى يكون (ابو وردة) ! كع

    1. ههههههههه انا خفت البروف يقول لينا نحتفظ بي موية غسيل الفرشة عشان نستعملا مضمضة لمن المعجون يكمل ..
      تعرف يا شمباتي بتاعت المعجون دي كيفت البروف نفسه لمن ضحك .. الزول ده رحلوهو من جمب البحر قبل ما يرحلنا من نفسنا ..

  14. المندهش…
    مبروكة عليك يا ولدى,,,دايمة ان شاءالله..

    1. تصدق يا دكتور دي آخر برنجية لأنني قررت الإمتناع عن التدخين والذهاب بعيدا …..
      وبالجد كانت أيام جميلة في ضيافتكم والضيافة ثلاثة ايام ولكن الظاهر أن قعدتكم عجبتني وطولت شوية… وسوف أتابع كما كنت في السابق متفرج فقط …… لكم حبي

      1. ليه كده يا دهشه؟ الزعلك منوووووو؟

      2. المندهش سلام .. امتناعك عن البرنجية يسعدنا وذهابك
        بعيداً يؤلمنا .
        قال صلي الله عليه وسلم : من رأي منكم منكرا فليغيره
        بيده فان لم يستطع فبلسانه فان لم يستطع فبقلبه وذلك
        اضعف الايمان .
        لا تختار الفرجة يا صديقي فهي اضعف الضعف ولا تعتقد
        ان مثل هذه المواقع وهذه المشاركات لا تقلق منام
        الظالمين .. فهل ترضي ان تكون مظلوما حتي في حق التعبير ؟
        هسع بالله زي تدوين الليلة ده لو حاكمنا الشيطان مش
        مفروض يبكي ويجي يعتذر لينا .. لكن شيطانا ده ولاااا
        ببكي …!! لكن قالوا مره زنقوهو في المسجد بكي وقال
        ماكنت عارف ياريت يا ريتني كنت عارف ..
        مشارع الهم كتيييرة نعددا ( الله يرحم ود كرم الله )
        ما تمشي .. سمح ؟
        عليك النبي تعز النبي تجامل وتجي 0
        ( انتو ود المقرن وين )ما ظنيتو مات لانو لو مات كان
        جابو اغانيه في التلفزيون وكان عملوا ليهو تابين
        وطالما متجاهلنو كده معناه عايش !!!

  15. يلا الشارع يا ناس
    يلا الشارع يا ناسيلا الشارع يا ناسيلا الشارع يا ناسيلا الشارع يا ناسيلا الشارع يا ناسيلا الشارع يا ناسيلا الشارع يا ناسيلا الشارع يا ناسيلا الشارع يا ناسيلا الشارع يا ناسررررريلا الشارع يا ناسيلا الشارع يا ناس يلا الشارع يا ناس يلا الشارع يا ناس
    يلا الشارع يا ناس يلا الشارع يا ناس

    1. تررم تررم تررم تررم

    2. عشان ناس الحكومة ما يفهموك غلط .. قول ليهم (ناسيلا) دي بت الجيران … ودايرين نمرق الشارع نلعب عسكر وحرامية ….!!!!

  16. قلبي ينفطر وعينى تدمع اتخيل يوم بكره ولكن للاسف التخيل اصبح لا يجدي نفعأ الوقع يقول بل يخرج لسنه لنا مع قوله طززززززززززز ويقول ما تظنون انى فاعل بكم نقول اخ…….لا يدعنا نكمل يقول اخ تفوووووو عليكم شعب جزمه ولا حتى صوت علا ناس الحيكومه ناس مفتحه زادت المولاصلات قبل البنزين يعني اشترت الكرو اول لكن لكل بديه نهايه ولكل قصه خاتمه ولم تحن خاتمه قصتنا بعد نسال الله ان نشهد ختمتها قبل ان يسترد الله امنته ك

  17. جنوبى…سلام….
    هى لكن هو بفوت البحر والحاجات الجنب البحر (هناى اب روف) لى منو !!؟ بتبالغ انت كمان !!

    المندهش…سلام…
    اممممممممم,,,,اجيك اجضمك ولا كيف ؟؟؟؟ خليط ثابت مكانك….

    1. ياسين شمباتي
      ما كان العشم كل الناس فقدونى الا انته ولا اصلوم دكاترة السودان الا تسال منهم انته !!!يرقدوك فى المستشفى وتاني ما تشوف الواحد الا في المنام

  18. جنوبى (كلاكيت تانى مرة)…
    دينك سمح لكن ! ما تجى تشارك؟؟؟

    البروف جبرا…سلام…
    كوبايلى وكوبايلك دخلوا الكوبالة !

    1. هيييييي انتو البشاركم قاعدين تطيروهو وتقعدوا بكانو , لكم دينكم ولي دين ….

  19. كشفت مصادر برلمانية عن تحديد المتورطين في بيع خط هيثرو ــ دون الكشف عن هُوياتهم ــ وتحويل الملف الخاص بالقضية للنائب العام،

    اخبار خط هيثرو شنو يا النائب العام ؟؟؟؟

  20. والله حكاية المعجون دي لا اراديا لقيتني سويتها الليلة الصباح قبل ما اقرا المقال, بس والله حلول مبتكرة يابروف

  21. بت وراق .. حضرنا ولم نجدكم ..
    مما ذكر اعلاه نقدر نخمّن انو الربع بتاكم ده انتو خاتنو في خزان الموية حقكم وبتغيرو الفلتر كل ستة شهور !!!

    1. بت وراق الايام دى حردانه ، نشرك ليها بى البرنجيه ……………….. عجبى

    2. وييييييييييييييين في ابو جنزير
      احيييييييييييييييييييييييييي

  22. امبارح في اسواق بنده لقيت بودرة بصل ضحكت لمن الجمبي
    بقوا يعاينوا ليا ..
    يا بروف حسب كلام الحكومة انها بتشتري برميل البنزين
    بي 110 دولار ولو باعتو لينا بعد الرفع الاول الجالون
    بي 10 ألف تبقي الحكومة طالبانا رفع تاااااني !!
    جهّز الخطة البديلة من هسي …

  23. بروف جبرا .. الكسرة الثابتة شالت النوّار بس الخوف
    يجي شافع شايل ليهو ( قناية ) ويحتو قبل يثمِر ..!

  24. ههههههههههههههههههههههههه,,انت الرفع دا وقفت ليهو يا جنوبى !!؟
    ما جيت جارى السعودية !
    هى صحى ما جايين علينا الليلة تحضروا الصلاة !!؟
    انا بجهز فى الاكل باقى شايل الغدا وماشى عليهم ! كع

    1. ههههههه , هو ده رفع نصاح عشان نقيفلو , حالتي جيت
      وهم لسع في المداعبة وصلنا مرحلة ندلي باقي العيش
      الناشف من راس المزيرة ونبلو بي السخينة , اولاد
      عبد العزيز ديل الله يسترم زي ما سترونا ..
      مالو يبقالي زي الغدا هو الشايلك وماشي عليهم, كع

  25. مبروك يا بروف .. اخيرآ الكسره الثابته جابت نتيجه ..
    منقول من الإنتباهه
    ( التفاصيل
    نشر بتاريخ الأحد, 17 حزيران/يونيو 2012 07:23
    البرلمان: معتز محجوب
    كشفت مصادر برلمانية عن تحديد المتورطين في بيع خط هيثرو ــ دون الكشف عن هُوياتهم ــ وتحويل الملف الخاص بالقضية للنائب العام، في الوقت الذي أوصت فيه لجنة النقل بالبرلمان بمحاسبة شركة تعمل بطريق الإنقاذ الغربي وسحب الدفعيات منها، في المقابل كشف وزير النقل بابكر نهار عن تكوين لجنة للتحقيق بشأن مخالفات متعلقة بإحدى الشركات الوطنية العاملة بطريق الإنقاذ الغربي.وفي ذات الأثناء أفصحت مصادر متطابقة عن عدم التزام الشركة بتنفيذ مهامها بالقطاعات المحددة، وأضافت أن الشركة نالت دفعيات مباشرة من بنك السودان بتوصية من وزارة المالية دون شهادة إنجاز من إدارة الطرق، وذكرت أن الدفعيات بلغت «75%» ومقدمًا، في غضون ذلك أكد وزير النقل خلال اجتماع مع اللجنة بالبرلمان تكوين لجنة للتحقيق والحاجة إلى «65» مليون دولار لإكمال الطريق، ودعا البرلمانيون إلى تشكيل لجنة لمراجعة طريق الإنقاذ الغربي.

    )

    لنا عوده

  26. البروف :
    بالنسبه لعيد الثوره القرب ده حنعمل فيهو شنو ؟؟
    انتو الاتلوم فى عيدو منو مع التانى :
    الثورة فى عيد الشعب
    ولا الشعب فى عيد الثورة
    لمن يحصل اللوم ممكن نحدد وانا خايف ما يحصل
    طيب كان ما حصل معناها يا الثوره ثوره يا الشعب ما شعب

    1. افلايقا .. سلام .. هو الشئ ده عيد !! مالو يبقالي
      حوليه !!!! آخر كلمتين حارااات والنصيحة دايما حااارة

  27. سؤال تانى :
    نحنا بقينا كعبين قام الله ولى علينا من يشبهنا
    ولا من من يحكمنا اصلا كعبين قام الله ولانا عليهم
    والله الاتنين كعبين قام الله بقانا شبهينا واتلاقينا
    ولا من استمرا الظلم يهن الهوان عليه
    ولا من هان الهوان عليه استمرا الظلم
    ولا الوقود كان لا زم يتذاد ولا القصه ما قصة وقود
    ولا الوقود هو الحيقصم ظهر البعير
    ولا ظهر البعير هو الحيقصم الوقود
    ولا ريحة الابرى دى شنو انتو ضابحييين ؟؟

  28. بدائل :
    شيل الموزه مع مباراة السبايل :
    وهى مصطلح يفهمه من تاثرو بالذيادات منذ وضع اسعار النقل وهو مصطلح يعنى الوصول لابعد نقطه من اقرب نقطه بشرط ان يكون الشارع عامرا بسبايل المويه وظللة الراحه وميادين الكوره للفرجه قد تصل متاخرا بعض الشيئ لكن ذلك بالتاكيد خير من الا تصل .
    ام جنقر بالفلاجيل :
    هل تعلم ان كورية ام جنقر بجنيه سودانى تمثل وجبه كاملة الدسم علما بان الفلاجيل مذاب فى ام جنقر لمنع حدوث اى مضاعفات وعند اضافة سعر الفلاجيل 1 قرش يكون المبلغ جنيه وميه حديد . الوجبه قابلة للتعميم للاسره بالمنازل .
    طحنيه بالزبادى :
    هل تعلم ان الذبادى مفيد للطحنيه وان طحنيه بخمسميه حديد تمثل 10 سعره حرارية !! انت بتتشهى ولا شنو ميه كتير عديل كده
    الزبادى واللبن معروفات من بدرى انهن ميه ميه وعشن كده كيس ذبادى مصنع من الدكان بى خمسمسيه حديد + طحنيه بخمسمية حديد + عيشه ونص بى 250 الجمله 1250 وهى وجبه كاملة الدسم .
    الجزمه :
    المكان زقاق غرب طلمبة اويليبا جنوب صيدلية كمبال الاحذية متوفره حسب الطلب من خمسه جنيه حتى عشرين جنيه احذية ذات تاريخ تليد يمنح مع الحذاء سى دى به عرض بور بوينت عن كبار الشخصيات التى لبست قبلك .
    اللبس :
    المكان مايو الدلاله قد تستطيع التانق تانقا كاملا بمبلغ 10 جنيه قميص بنطلون شراب وربما قاش حزام اذا لم تدقق فى التواريخ ولم تهتم بسيرة من لبس قبلك وكنت شخص متسامح تحب التاريخ والتكافل والمساواه
    الركوب لو مستعجل :
    صنف لاقرب مزه راجية الاوتوستوب وتوقف على مقربه منها نظام معاها وما معاها عند توقف اى شخص كابى بنزين بى غلاتو عشان يطبق مزه بى رخستا اسرع بالركوب معهم واهو على الاقل تونسم فى السكه ومنها تتعود على الاوتوستوب لانو مع الزيادات دى زى ما قال البروف ما معروف نسوى شنو !! هههههههههه

    1. السلام عليكم افليقا ، وين ايامك ، ضحيت بيها ، و ين بيقوفتش و و و ولا خليتم ورا و جايين ………….. عجبى

  29. البرف سلام قال الطشاش فى بلد العمى شوف ، اظن بعد ده تخلى العدل ياخد مجراه ………عجبى

    06-17-2012 11:20 AM
    البرلمان : علوية : اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيع الخط .
    وابلغت مصادر «الصحافة « ان لجنة التحقيق الخاصة بالخط اكتشفت ان هناك سماسرة متورطين في بيع الخط .
    وفي السياق نفى وزير الدولة فيصل حماد وجود تكدس للبضائع بميناء بورتسودان واكد ان المشكلة الرئيسية في الميناء تكمن في التعريفة، واشار الي انها تقلل من المنافسة بالميناء .

    الصحافة

  30. كوكو ود النوبه السمحين :
    اسى عليك الله ده تاكيد الشوق بما يشبه القنع ولا تاكيد العتاب بما يلزم العشم ؟؟؟ ههه
    قاعدين والله يا كوكو بس بقن علينا جرى وطيران
    واحد بلدياتنا قال بقن علينا جرى وطيران اخوهو قال ليهو اوع تقول كده تقوم الحكومه تفرض علينا رسوم طيران !!! ههههه

  31. السيجارة ياجبرا… نسو فيا شنو؟؟؟؟؟

  32. حقو تغير الكسره دي يا بروف تكون اخبار الحكومه شنوووووو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: