ولينا الجنا

لا شك عزيزي القارئ إنك مثلى تلاحظ تزايد نسبة حالات حوادث الإغتصاب التى يتعرض لها أطفالنا وفلذات أكبادنا ، وضعف العقوبة التى تطال (المجرم) الذى يقوم بهذا الفعل الشائن المنكر والتى لا تتعدى بالكتير (سنة سجن) وكم (سوط) كده ! بعدها يخرج لممارسة هوايته فى قتل ووأد مستقبل هذه القلوب البريئة … شخصياً كنت أتوقع أن يهتز (ساكن) المسئولين وأولى الأمر لهذه (الظاهرة) التى أطلت فجأة كالوحش المرعب على مجتمعنا الذى كان إلى عهد قريب لا يعرف مثل هذه الظواهر ، لكن المسئولون معذورون فهم مشغولون (بهندسة الحاضر) وتخطيط (المستقبل) ووضع (الإستراتيجيات الشاملة) والعمل على زيادة (معدل النمو) يعنى هم فاضين عشان يلتفتو للحاجات الفارغة دى؟ شنو يعنى لما (طفل) عمرو (عشرة سنين) يغتصب ويخرج الجانى بعد ما ياخد ليهو كم يوم سجن وكم (شحطت سوط) ؟ وشنو يعنى طفلة عمرها (4 سنوات) ترجع من الروضة وقد صارت إمرأة فى هذه السن (الموش مبكرة آوى) والبركة فى (عمو صلاح سواق بص الروضة) ! والذى سوف بأخد ليهو كم يوم سجن وكم (شحطة سوط) ويرفد من (تلك الروضة) ليذهب لروضة أخرى يمارس فيها هوايته فى الفتك بهذه الأجساد الطاهرة!

متى سوف تتحرك الدوائر الرسمية لوضع حد لهذه الظاهرة المقلقة؟ ربما حين يلمس (رأس السوط) أحد (كبار المسئولين) ويقع أحد أطفاله فريسة لأحد هؤلاء (الذئاب) تمشيا مع حكاية جحا والتى تقول أنه قد قيل له أن النار قد إشتعلت فى المدينة فقال لهم لا يهم ما دام إنها لم تصل إلى الحى الذى أقطنه فقالوا بل إنها وصلت إلى الحى الذى تقطنه فقال لهم لا يهم ما دام أنها لم تصل إلى دارى فقالوا له بل وصلت إلى دارك فقال لهم لا يهم ما دام إنها لم تصل إلى غرفتى فقالوا له بل وصلت إلى غرفتك فقال لهم لا يهم ما دام أنا غير موجود داخلها !

فعلى قول (عمنا جحا) فإن الأمر لا يهمه ما دام يحدث (للآخرين) وما جاهو فى (تولتو) !
نعم لو كنت مسئولاً لقمت – الآن وليس غداً- بتكوين (فريق عمل) – بلاش من قصت لجنة دى – يتكون من عدد من كبار المختصين فى مجالات الإجتماع والقانون وعلم النفس والأمن لمعرفة أسباب هذه الظاهرة المزعجة وكيفية علاجها والحد منها وسن القوانين والتشريعات والعقوبات التى تتناسب وهذا الجرم الشنيع (بدلا من كم سوط وكم شهر دى !) ولقمت على الفور بإنشاء وحدات علاجية متخخصة لعلاج الآثار النفسية والعضوية لضحايا هذه (الحوادث) ويمكن لهذا (الفريق) أيضاً (عشان ما نعمل فريق تانى) أن يقوم بدراسة ظاهرة أخرى لا تقل خطورة تفاقمت مؤخراً لحد لا يمكن السكوت عليه وهى ظاهرة (الأطفال غير الشرعيين) إذ أن الأعداد التى تسجلها مضابط (الشرطة) والحالات التى تستقبلها (دار المايقوما) قد (زادت أصفارها) وحان وقت إخراج (الرؤوس من الرمال) ومواجهه (الحقيقة) والتعامل مع الأمر بواقعية بعيداً عن أى (ثوابت أو مشاريع) !

ما دعانى حقيقة لكتابه هذا المقال هو الحكم بتعديل عقوبة الإعدام لذئب في شكل (معلم) قام بإغتصاب (تلميذته) القاصر التي تدرس في مرحلة الأساس وذلك بإحدى الولايات مما جعلها تحمل منه (سفاحاً) وهي الآن كما يقول الخبر في شهرها (الرابع) ، هل تعلم عزيزي القارئ إلى أي حد قامت محكمة الإستئناف بتخفيض العقوبة أقول ليك .. بس ما تندهش … تم تخفيضها إلى سنة سجن و40 (جلدة) !!
عقوبة للأسف الشديد ممكن (ياخدا) نشال سرق ليهو (موبايل) أو ختف (شنطة) إحدي السيدات !!
وبما أن فلبسفة (العقاب) تكمن في زجر الآخرين حتي يرتدعوا من فعل ذات الجرم إلا أننا في هذه الحالة الماثلة أمامنا نشك في ذلك كثيراً فمثل هذه العقوبات (الميتانه) تغري ضعاف النفوس من ممارسه هذه الأفعال الفاحشة ذات التأثير المدر للمجتمع (وأهو لو قبضوك يعني شنو ؟ سنة سجن و40 سوط) !
كان من الممكن أن يكون أمر هذه العقوبة (مبلوعاً) لو لم يكن هذا الوحش الآدمي هو (معلم) يستأمنه أولياء الأمور على فلذات أكبادهم ويتوفر له عامل الترغيب والترهيب وكل عوامل (الإنفراد) المساعدة ولكن يبدو أنو مسألة (حاميها حراميها) قد طالت على ما يبدو حتي (الأعراض) !

كسرة :
يبدو أن مقولة اولياء الأمور قديماً التي تقول (ليكم اللحم ولينا العضم) حينما يسلمون أبنائهم للمدرسة لأول مرة سوف تصبح في هذا الزمان الأغبر : (ليكم اللحم ولينا الجنا )!!

كسرة ثابتة :
أخبار ملف خط هيثرو الفي النائب العام شنو(ووو ووو)

Advertisements

39 تعليق

  1. برنجية – ب ب ر ر ن ن ج ج ي ي ة ة

    1. مبرووووووووووووووووووووك ، لكن كنا مشركييييييييييييين بيها لى بت وراق ……………… عجبى

      1. الله يبارك فيك يا كوكو, ولكن بت وراق مختفية عن الساحة الفنية اليومين ديل!! يبقالى (راقدالا) فوق راي و الا شنو ياربى!! و الا ربع كيلو اللحمة خلاس انتهى و مشت الجزر

  2. و الله برنجيتكم دي حيرتنا ! يلا, برنجيه برنجيه 🙂
    البروف و الاخوان, هل لاحظ احد انو كللللل الصفات السودانية الجميله شويه كدة و تاني ما تلقاها, لحادي من نصل زمن ” إن في بني فلان رجل أمين ” !

  3. من أمن العقوبة اساء الادب, و فعلا يا بروف الحل فى اعتقادى يكمن فى تغليظ العقوبة حتى لو وصلت للمؤبد أو الاعدام, فالمجرم عنا فعلا اعدم طفولة برئية بفعلته هذه – نسأل الله السلامة و العافية و المعافاة فى الدنيا و الاخرة..

  4. قلنا الشريعة قلتو علمانية اها اخبار العلمانية ششششششششششششششششششننننننننننننووووووووووووووووووو

    1. يا راااااجل ! ! نحن محكومين بشرع الله لينا 23 سنه واللا لا؟
      ولو قلنا علمانيه و اللا ما قلنا البسمع كلامنا منو؟
      يا أخوانا وين سديقنا ود الخلا الأيام دي؟

      1. سنة23 عمر الزهور عمر الهنا شريعة الغاب ولا شنو ياعلى ود سنكل فى الشريعة المحصن يرجم حد الموت والغير محصن 100 سوط شط شطط مع تغريب عام يعنى سجن نكالا لما فعلوا أما الاغتصاب دا دى جريمة مشربكة شربكة صاح الا بفتاوى العلماء يارفيق يا ود سنكل وكمان لما يغتصب ويكتل المغصوب حدها بعد داط ضربة بالسيف تخلى الراس يفرفر زى ضنب الضب ياخوى تقولو لى نحن محكومين بشرع الله كمان ورينى زول رجموه عشان تانى البفكر ساى اتاكد انو قسيمة زواجو موجودة وقبل مايعمل حاجة امشى يطلع بدل الفاقد

      2. سديقي الباشمهندس سنكلوني يسال منك الخير، وآنــــــــــي قااااااااااااااااااااااااااااااااااااااااااااااءد

  5. لا اله الا الله محمد رسول الله
    انا لله وانا الية راجعون
    احسن الله عزاء الامة السودانية فى اخلاقها
    يقام المأتم بدار المايقوما لرعاية الاطفال
    ماتت اخلاقنا على فراش شهوة ودفنا رؤوسنا حتى تعفنت انوفنا
    ملحوظة : لم يتم ايداع كل الضحايا الصغار بالدار فبعضهم دفن فى خلاء وبعضهم القى فى بئر وبعضهم اكلت الكلاب جسده الضعيف

  6. حسبى الله عليه وعلى امثاله…
    اوافقك بشدة يا بروف على موضوع تغليظ العقوبة , ونستشهد ونقتدى بسيدنا عمر بن الخطاب (رضى الله عنه) اللى ضاعف عقوبة شارب الخمر من 40 لى 80 , ال 40 الحدية و40 عشان اذية الناس !
    حسبى الله عليه وعلى ولاة الامر فى الزمن الاغبر دا ..

  7. فلاديمير…
    مبروكة عليك ,, لكن عملتها ظاهرة فى الموضوع دا !!

    السودان ابو الدنيا…
    شريعتك وينها !!؟ واسه القال داير شريعة منو !!؟

    1. شمباتى – الله يبارك فى عمرك, و على قولة جيرانا المصاروة: آهو مرة كدة من نفسى !!!

  8. البروف والسمار .
    سلامات .
    فى الشريعه الاسلامية الزانى يجلد مائة جلدة ويشهد عذابة طائفة من المؤمنين ولكن مغتصب الاطفال والقصر يجب على هيئة علماء السودان أن تجلس وتصدر فتوى تحدد فيها عقوبتها بعد إستشارة أخصائين فى علم النفس والاجتماع بدل مايفتو بحرمة بيع الفكة …

  9. متى سوف تتحرك الدوائر الرسمية لوضع حد لهذه الظاهرة المقلقة؟ ربما حين يلمس (رأس السوط) أحد (كبار المسئولين) ويقع أحد أطفاله فريسة لأحد هؤلاء (الذئاب) تمشيا مع حكاية جحا والتى تقول أنه قد قيل له أن النار قد إشتعلت فى المدينة فقال لهم لا يهم ما دام إنها لم تصل إلى الحى الذى أقطنه فقالوا بل إنها وصلت إلى الحى الذى تقطنه فقال لهم لا يهم ما دام أنها لم تصل إلى دارى فقالوا له بل وصلت إلى دارك فقال لهم لا يهم ما دام إنها لم تصل إلى غرفتى فقالوا له بل وصلت إلى غرفتك فقال لهم لا يهم ما دام أنا غير موجود داخلها !

    يالبروف
    دحين القصه ما كده لكن سمينها رضينا

    بعدين الموضوع ده ما بيحصل للناس الفوق لانو مابركبو ترحيل كمان وربك يستر

    1. يا ود عوض انت برضو كمان انتبهت انو القصة ما كدة؟؟

  10. شمباتى – الله يبارك فى عمرك, و على قولة جيرانا المصاروة: آهو مرة كدة من نفسى !!!

  11. ياسين شمباتى ياخوى المحكومين بيه نحن دا ماشريعة ياخوى كدى تعال نجرب انا وات نشوف الحدود الشرعية فى الاتى
    السرقو خط هيثرو قانونك بقول انسجنو
    الشريعة بتقول تنقطع ايديهم عشان بعدين لما تشوف واحد يدو مقطوعة تقوليهو ياخينا سكرى ولا حاجة تانية
    الزانى زالزانية بالتراضى
    حسب كلام الاستاذ فوق قال اربعين سوط ودا قانونك
    الشريعة فصلت
    محصن (متزوج يعنى) احفرو ليهو حفرة ويطلعو راسو واربطوه ردم بالحجارة لحد مايفارق الدنيا وارجع للنصوص الشرعية
    غير محصن (عذابى وكدا) مية سوط قدام اهلو خالاتو عماتو حبوباتو اولاد الفريق (وليشهد عذابهما طائفة من المؤمنيين )
    تغريب عام أو عامين ( سجن وحاجات من النوع دا عشان راسو اجى)
    واخيرا انتو مفتكرين الزنا دا حاجة هينة ولا شنو كدى الواحد اشوف انو برضى الشغلة دى فى امو ولا اختو ولا زوجتو
    كسرة
    الشريعة وينا ياالحاكمنا عشرون ونيف بشريعة الغاب
    كسرة ثابتة
    ملفات الفساد الواقعين فيها حد الشريعة بتراوح فيها من قطع اليد مرورا بالصلب من خلاف ولا يقع فينا حديث الرسول عبيه الصلاة والسلام اما اهلك من كان قبلكم انه اذا سرق فيهم الشريف تركوه (الزول دا عندو حصانه وكدا) واذا سرق فيهم الضعيف اقامو عليه الحد (دا من ناس زعيط ومعيط )
    على فكرة
    ناس زعيط ومعيط ديل فيهم ناس كان رفعو يدهم للسما بلحقوكم البرامكة

  12. منو العوض وعليه العوض ,, غايتو الورطة النحنا فيها دي إلا يحلها رب العالمين .. الناس ديل ودينا كوشة طيرا عجمي .. رحماك بنا يا الله ..!

  13. في حلتنا قبل كم سنة بتاع دكان اغتصب طفل عمره
    5 سنة الطفل حتي الان يصحي نص الليل مخلوع ويبكي
    واصبح شبه متوحّد . وسواق حافلة الروضة يغتصب
    طفلة واستاذ يغتصب تلميذته . مشكلتنا في من يطبق
    الشريعة او أي قانون وضعي ..
    في الدول العلمانية مجرد بيع السجاير لطفل قاصر
    يعتبر جريمة ناهيك عن التحرش بقاصر ..
    المشكلة في التطبيق وليس في القانون …
    اخيرا اقتنع القائد المفدي باجراء عملية شفط دهون
    لترهل حكومته !! ما كان من اول ياخ ….عنيد .
    وكمان بكل بجاحة يقول يجب تمكين المراجع القومي من
    مراجعة جميع الجهات !! طيب انت في آخر لقاء ما قلت
    ديوان المراجع مفتوحة ليهو كل الابواب !! كذاب .

    1. جنوبى ,,,,,,,,,……….”””
      وكمان بكل بجاحة يقول يجب تمكين المراجع القومي من
      مراجعة جميع الجهات !! طيب انت في آخر لقاء ما قلت
      ديوان المراجع مفتوحة ليهو كل الابواب !! كذاب .

      عرفت شريعة الغاب يا خيو جنوبى على قولت الزلم أحلى واحدة يوم الاعتراف الاكبر عند الانفصال بقوله ملء الفيه امام الملأ
      نحن بعد أنفصال الجنوب دا حانطبق الشريعة ويومها داك كان بحتفلو بالعيد الواحد والعشرون لثورة شنو كدا ماعارف …,,,,
      اللهم ولى علينا من يصلح ,’’ اللهم لا تؤاخذنا بمافعل السفهاء منا ’’’’’ اللهم احفظ السودان من الاتى له ,,,, اللهم حوالينا ولا علينا ,,, اللهم على الاعداء ’’’’’ اللهم يسر لولاة امورنا البطانة الصالحة التى ترشدهم ان غوووووا ,,,,,
      كسرة ………
      انتو عارفين ياخوانا القروض الربوية البشيلو فيها الجماعة ديل بتغطس الحجر قولو لى كيف موش ربنا اتوعد اكلى الربا عندما قال (فأذنو بحرب من الله ورسوله ) ياجماعة الامر ساهل للبسهلو الله ليه ياجماعة زى ماناس القوانين الوضعية بجتهدو فى وضع القوانين مرة نزيد ومرة ننقص مرة نخت ومرة نقوم ,,,,, نحن الله ختاها لينا جاهزة نطبقها ونرمى لقدام نشوف الجاى والحاضر والمستقبل التقدم والرقى والحضارة لكين طالما انو نحن قعادنا وقيامنا كللللللللو فى القانون دا ساهل ودا صعب ماحانتخطى المرحلة دى جيل بعد جيل وربنا يسهل ماهو ات

      1. السودان ابو الدنيا … تخيّل انو بيع الفكة حرام قطعا لأنه نوع من الربا لاكين القروض الربوية حلال !!
        خطاب امس القالوا ح يخفضوا الشنو والشنو ما عارف ما ح يحصل منو الا سيارة المدام وحتي سيارة المدام ستعاد لها بطريقة او اخري لأنو ناس الحكومة ديل نسونجيه جدا ومجرد ان تعتصم زوجة المسئول يوم واااحد عن البوخة سيلبي لها طلبها فورا ولكن كل الغرض من تبجح امس هو رفع الدعم عن المحروقات الذي سيأتي في خطاب لاحق وسيتبعه كثير من التهليل والتكبير ..
        ذهبت قبل كم سنة ولم اجد ملامح سكان الخرطوم ووجدت مدينة تطورت في البنيان وتخلفت في الانسان !! ناس ما بتعرف اكتوبر ولا بتعرف ابريل ناس مجرد انها تمشي في شارع الزلط تعبروا محمدة وتتطور ليهم الخرطوم فقدت اولادها عشان كده اولادنا في الجامعات تحركوا اكتر من مرة ولم يجدوا الا شارع يتفرج عليهم وربما اكثر المتفرجين يتساءلوا العيال ديل مالم .
        الناس ديل غيروا السودان ياخ .. شكل الخريطة وشكل الانسان ..

  14. التحية والتقدير لك أستاذ الفاتح وأنت مرة تلو الأخرى تُبصر بمواضع الخلل، ولكن لا حياة لمن تنادي حسبي الله ونعم الوكيل ربنا يحفظ عيالنا وأعراضنا

  15. الخريطة بكرة بترجع,,لكن الانسان يا جنوبى,,اخخخخخخخخخخخخخخخخخخخخخخخ يا بلد…

  16. القاصر المغتصبة تستغيث

    سنار | عمر ابراهيم الأمين

    أطلقت الاستاذة ست النفر الشاذلي مدير الرعاية الاجتماعية بسنار نداء لأهل الخير لمساعدة المجني عليها في جريمة الاغتصاب ص ع م القاصر من مدينة سنار حي ريح بالك وقالت مدير الرعاية ان المجني عليها في حالة صحية سيئة نتيجة الحمل المبكر وهي نزيلة بعنبر الأطفال وربما تحتاج الى عملية جراحية مشيرة الى ان والدتها فقيرة ووالدها غائب واصيب بمرض عندما بلغه خبر اغتصاب وحمل طفلته التي تحصلت على مجموع 193 في امتحان مرحلة الاساس لهذا العام . وكان وكيل نيابة محلية سنار مولانا الصديق احمد النور قد أصدر شهادة تفيد بأن المجني عليها قد تم الاعتداء عليها بالاغتصاب وقد نتج عن ذلك الاغتصاب حمل وتم محاكمة الجاني بالاعدام تحت المادة 149 ق ج مقرونة بالمادة 45 من قانون الطفل

  17. ده الجنا ، كان مفروض يقطعوا ليهو يدو ……………. عجبى
    أصدرت محكمة جنايات دار السلام العامة برئاسة مولانا سليمان خالد عقوبة السجن «6» أشهر والغرامة «500» جنيه، وفي حالة عدم الدفع السجن لمدة «3» أشهر في مواجهة شاب أدانته المحكمة بضرب وتهديد والدته وإتلاف أواني منزلها على أن يدفع المتهم لوالدته تعويضاً قدره «200» جنيه، وتعود التفاصيل إلى قيام شاب في مقتبل العمر بتوجيه ضربات إلى والدته بـ«البونية» على رأسها وضربها بالعصا على ساعديها، بجانب تهديدها بالقتل وإتلاف أواني منزلها، وذلك بمنطقة دار السلام. وقالت الشاكية للمحكمة إنها أصبحت في المنزل مع ابنها «كالأسد والفريسة»، وبيّن أورنيك «8» جنائي الذي أسعفت به الشاكية للمستشفى وجود ضربات في الرأس والكتف وألم خلف الرأس والكتف وأمر قرار الطبيب بتحويل الشاكية إلى جراحة المخ والأعصاب، فيما أكدت شاهدة الاتهام ابنة الشاكية وشقيقة المتهم، ضربه لوالدته وبداية المشاجرة معها، مضيفة بأنها ليست المرة الأولى التي يقوم فيها بضرب والدته وسب العقيدة لهم بالمنزل، ومن خلال استجواب المتهم بالمحكمة أنكر ضرب والدته ومن أقوال الشاكية ومستندات الاتهام أدانت المحكمة المتهم بالسجن والغرامة.

  18. البروف :
    اول شيئ عدل المدخل بدل ( لااشك انى مثلى ) دى شويه يها ورية ولا انت قاصد تختها فى النهاية ودقست ؟؟؟
    لانو البيقرا الكلام ده ويقبل بيهو الا يكون مثلى بالجد مش مثلى يعنى مثلك مندهش ؟!!!!!!
    تعرف يا عمنا زمان الحرامى كان بيدوهو حجر والبحر وده حرامى الاغراض مش الاعراض انا شخصيا لو حصل ده لبتى او اختى :
    اولا بطبق فيه العملو فى الضحية وبتقزز مش بمتعه
    بعد داك حجر والبحر وبربط الحجر فى حتع صعبه شوية عشان يحس بيها اى زول يلقاهو ..
    ده كلام فارغ البلد دى الرجاله فيها انتهت
    وفى حته مهمه اللى هى تلقفى المره فى البيت ملبسه بتها لبس يخلى الحمار يغتصبا خلى البنى ادم ومرسلاها الدكان وتلقى البت خاشه بى جوه الكاونتر وما فى زول بيمنعا لمن يحكمو على عمك بتاع الدكان بى سنه بسبب الحمل
    وفى حته مهمه جدا اللى هى ايه البيدفع زول بالغ عاقل مع اللحم القى راقد هبطرش فى اى شارع كان سودانيات كان حبش انو يتلذذ او يشتهى اساسا بت عمرها 5 سنه
    يا الزول مريض يا نحنا فاكين اعراضنا ساااى فى السهله
    عليك الله يا جبرا نفس الندوه بتاعة اطفال المايقوما فى الراى العام اعمل وحده عن الاغتصاب البقى اكتر من الاغتراب ده
    المغتربين ما يزعلو عليك الله يا عم سنكل صقور زمان ذاتم مش كانو مؤدبين ؟؟؟ ولا ما عندك فكره نسال بشار !! ولا نرجع للبشاوى يفيدنا عن صعلقة تلك الفترة التى كانت بادب

  19. سلام ياقبيلة،،،
    عدتُ والعود أحمد، وكنت أتمني أن أعود في غير هذا الموضع وهذه القصة الحزينة، والتي تجعل الحليم حيران، هذا الشخص صاحب هذه الفعلة الشنيعة لا أعتقد أنه ينتمي للإنسانية بأدني صلة، وهذا الفعل الفاحش لا يجرؤ علي فعله إلا حيوان قذر، أقل عقوبة يستحقها القتل ولا رأفة…
    هذا يؤكد بعد الناس عن الأخلاق والتي هي اساس الدين والتدين الصحيح، فقد جاء في الحديث الشريف الذي صححه الألباني أن الرسول صلي الله عليه وسلم قال (إنما بعثت لأتمم مكارم الأخلاق)، وعندما نقول ان الأخلاق فسدت وتبعها فساد الدين والعقيدة يأتيك من يقول بأننا نصلي ونصوم ونزكي ونحج ونفعل من العبادات ما لا يفعله بشر وينسي أن هذه العبادات لا تكتمل وتقبل إلا بتمام الأخلاق وكريمها كما جاء في الحديث أعلاه،،،،
    فالعبادات الشعائرية (الصلاة والزكاة والصوم والحج) لا تكتمل وتقبل إلا بتمام العبادات التعاملية وهي كرائم الأخلاق (الصدق والأمانة والوفاء بالعهود وإكرام الضيف وإغاثة الملهوف وإعانة الضعيف…إلخ).
    أصبح الناس في بلادي يكذبون كما يتنفسون، ويقولون ما لا يفعلون، ويخلفون الوعود وهذه صفات المنافقين والعياذ بالله.

  20. حباب القبيلة وسمح الجابك مع انو شين ما سمح :
    اسف لكثرة الاخطاء الاملائية فى التعليق السابق للانفعال بالموضوع
    ملخص رايي يتفق مع راى القبيله فى الاخلاق
    الامانات وخياناتها اعتقد انها سبب اساسى فيما يحدث لنا والامانه ليست هنا مادية فقط بل معنوية
    فامانة الحاكم تجاه المحكومين امانه وقد ضاعت
    وامانة رب الاسرة ضائعه
    وامانة البنت تجاه ابيها واخيها والاخ كذلك والام تجاه الابناء
    فلما تضيع الامانه يبتلى الله الناس بمصائب مثل هذه
    يعنى مثلا بت قامت بيست ما يجعل الحجر يشتهيها وخرجت ضاربة بالارجل ليبين زينتها وخاضعة بالقول ليطمع الذى فى قلبه مرض وكاشفة عن عورتها لتيقظ الغرائز الصاحية اساسا ومستنية اثارة تتوقع انو يحصل ليها شنو ؟؟؟
    يعنى ام رسلت بتها الدكان والبت لا بسه كت وقصير وفى زول مريض مستنى اى ( …. ) لا مؤاخذه ولو كان بلاستيك متوقع ليها شنو ؟؟
    فى حته مهمه وهى مسالة الفطنة والواجب المجتمعى :
    يعنى معقول رجال الزمن ده بقو ما بيميزو بين الزول الكويس والمشبوه والمرضان والبكاى والكبكابه واله زمان ابواتنا لمن الواحد يقول ليك اختى الزول ده وما تخشى يا بت بى ورا الكاونتر والبسى يا بت زى الناس كان نظرتم فى محلها لانو بيقيمو بتاع الدكان والمكوجى والاستاذ وقريبك الفى البيت قاعد يقرا او يتعالج
    الان ما عارف هل الفطنه راحت ولا الظروف وجرى الحياه خصمت من الاباء والامهات بعض صلاحيات التربية
    اكرر يا بروف اعمل ندوة عاجلة فى الراى العام ونحنا مشاركين وندعو اهل الضحايا برضو للمشاركة
    ولو بلغت بتحمى طفل ول سكتت بتحمى مجرم
    قاتل الله الفقر والتفسخ الذين اوصلانا الى هذا

  21. يصر افليقا انو بنت الخمسة سنين لو لبسوها لبس غير محتشم تبقى غلطانة وغلطانين اهلها … تكون دي الظروف المخففة للحكم ؟؟؟ وزي ما بقول كوكو … عجبي !!!

  22. سلام يا حبان
    المسؤلية مشتركة – وزي ما قالو المال السايب يعلم السرقة – فالحذر في مثل هذا الزمن العجيب واجب و اعقلها وتوكل – يعني الوالي -مش بتاع الكورة- لازم يكون عامل حسابو لكل حركة من حركات اهلة- وكما قال الرسول الكريم (كلكم راع وكلكم مسؤل عن رعيتة) ولازم الراعي يكون واعي والا ح يحصل الحاصل دا. وعش رجبا تري عجبا – واحفظنا يا رب.

  23. دا شنو ود الخلا عمل نيو لوك؟

  24. اخي جبرا والعقد الفريد سلامات
    اشكر كل من فقدني وسال عني كنت راقده مع اختى فى المستشفى والحمد لله طلعت بالسلامه
    الموضوع مولم للغايه وفيهي اقول وتوقفت لغة الكلام
    وقصة الطفله مرام ما زالت عالقه فى راسى ودخلتنا خوفه من كل البشر ولو فى زول بهزر مع طفلك ساكت تلقى راسك يودي ويجيب حصل لينا وسواس
    مـرام ما جات
    مرام مرقت علي الجيران ومرن ديل كم ساعات
    غابت نجمة الضــيفان واكتست الأرض ظلمــات
    حكايتـا كان ويامــاكان
    حــكايه تشيب الولــدان
    حيرت الأنــــس والــجان
    وبرهنت انــو مافي امان
    رجع وأد الطفــوله زمان
    زمــن عبــدت هبل ومناة
    *****
    بعد لبست جديد فـي جديد
    مـرام مرقت تبارك العيد
    وقفت سمعتــنا نشيــــد
    حلاة موبايلا الفـي الليد
    مع التسريحــه والباندات
    *****
    اتاريهو القــدر منصـوب
    مسطر ومـافي منــو هروب
    برغم رضانــــا بالمكتوب
    ده غـدرا ماوراهو سكات
    *****
    بدون إنذار بـدون اسباب
    مرام غدروها جمب الباب
    مرام هجمت عليهــا ذئاب
    طباعم من شريعة الغــاب
    ملاكا حـــولوهو رفــات
    *****
    قلوب لا رحـــمه لا إحسان
    مدبجه بي صفات شيـــطان
    وظهرت قـــــدرة الرحمن
    محل اسنانه هو الإثبات
    *****
    دريبه عــلي الأرض منقوش
    سريره مــن العصر مفروش
    معالمه باقيه وسط الحوش
    ملابس الروضـه واللعبات
    *****
    بعد شمس العصاري تــغيب
    مرام كانت تودي تجيـــب
    عنــدها بسكــويت وحليب
    في تــــلاجتن راقــدات
    ******
    وحيدة اخوانا والوالـدين
    عليها يخافــوا مـتمنين
    تتعلــــم تتم الـــدين
    وليها يوزعوا الشربات
    ******
    ياصاحباته وينه مـــرام
    سماح يادوبو فرهــد قام
    عمير ماتم خمس اعــــوام
    ملازماها البراءه سمــات
    *****
    عيال الروضـــه ياسمحين
    لمن جيتو متـــــماسكين
    ماشفتـــوها راحـت ويـن
    مرام سرقت منــام العين
    مرام حرقت حشا الأمــات
    *****
    وليه بنقول مرام ماجات
    مرام كلما وجيها يلوح تبق جـوانا إحساســـات
    مرام بقت القلب والروح سحابه تخدر الـبلدات
    مرام غصــــة حلق مجروح تقوقيها القـميريات
    مرام صفحة كتاب مفتوح يقروا الطلبه والطالبات
    مرام عصفور يئن مزبوح ما شفعلها الدمــــعات
    مرام جزء من محمد ونوح تبارك وعم والنازعات
    مرام شربة محايه ولوح وفي ساعة المغيب بخرات
    مرام دعاء للجميع مسموح بعد ماتكمل الصلوات
    مرام حتظل سؤال مطروح جــوه بيوتنا والطرقات
    مرام حتظل سؤال مطروح وسط اولادنا في الجامعات
    مرام حتظل سؤال مطروح موجه للشباب بالـــذات
    ليه بدت السماحه تروح إرث اجدادنا والعادات
    *****
    أخيرا داير اجيــــــز القول منــو المسؤول
    ماالكاتل قصاد مكتـــــول دي مــــاها حلول
    إذا الوالد صبــــح مشغول منـــــو المسؤول
    ومابنقدر نلــــوم زول بس بنقول منو المسؤول
    نقول دي ثقافة البترول وسيف العولمه المسلول
    الديجتال مع المحمــــول افلام فاضحه والمسكول
    عموما بيوتنا في فك غول مخيـــــف اسمو الفضائيات

    1. الف حمد لله على سلامة اختك – ربنا يواليها بالصحة و العافية و يكمل ليها الشفاء ان شاء الله
      سلمت يمناك و صح لسانك فى كل اللى جادت به قريحتك
      كنت فى اجازة فى السودان و فى مشوار مع الوالدة حفظها الله لمعارفها و كنت مستنيها برة و شفت لى اولاد صغار بيلعبوا (بلى فريت) و ذكرونى ايامنا الجميلة القديمة عندما كنت انا و اخوى نعمل تيم و (نخرت) كل الحلة, فقعدت العب معاهم و الغريبة (خرتهم) كلهم, لحدى ما رجعت الوالدة, فضحكت على طبعا, و فى طريق العودة للبيت قالت لى : تعرف لو واحد من اهلهم شافك كان عمل ليك مشكلة لانو حيقول انت بتلعب معاهم عشان تستدرجهم,, فقلت ليها: يااااااه هل الدنيا انتهى منها الخير و صار الناس تفكيرها كدة؟ فردت الوالدة: من اللى شافوهو قبل كدة !!!

  25. البوست ده حيرجعنا لذكريات المدونه القديمه واهو بقت وجوه تخش وتعيد الماضى واافراحو
    خالد مدنى : افليقا لا يصر على ذلك لكن لو شفت بنات الخمسه سنين بيلبسوهم اهلم شنو انت ذاتك يمكن تشتهيهم ههههه
    انا قلت برضو واصريت انو ززل بيشتهى بت عمرا خمسه سنه ده ما طبيعى يعنى ما ختيت المسئولية على البت
    وعشان اتكلم بتخصصيه شويه :
    شنو البيخلى راجل يشتهى مرا :
    فى نوع من الرجال بيشتهى اى شيئ بيتحرك !!! اى كائن حى انشا ءالله شجره !!! وده مرض طبعا لانو التربية الجنسيه السليمه والفطرة بتورى انو الرجل يشتهى المراه فقط اما لشيئ معنوى او لشيئ مادى جسمانى
    والاشتهاء اخر مراحل الميل والتوق للقرب فانا مثلا اميل لابنتى ساره لانها ابنتى واستمتع بالقرب منها وده شعور ابوى طبيعى
    والرجل يستمتع بالقرب من زوجته او اى امراه اخرى لان الطبيعى هو ميل الرجل للمراه والشاذ العكس كقوم لوط
    عندما يفقد الرجل المتنفس الطبيعى له وهو المراه لاى سبب من الاسباب عدم الزواج او عدم الاختلاط بالنساء فى اى مجتمع الدراسة او الجيره او الملتقيات الاخرى يميل بالطبيعه الى اى كائن اخرى وهناك تجارب علاقات حيوانية انسانية بتكون سمعت بيها كالحمير مع طلبة الداخليات او مستجدى المعسكرات
    نرجع للزول البيشتهى طفله
    الزول العادى بيبدا ينظر لمعطيات المراه البارزه للعيان من صدر ومؤخره وجسد عندما تتبلور فى مستوى معين وهو بدايات سن البلوغ وده احساس طبيعى للرجل السوى
    الطفله ذات الخمس سنوات اما انها بدات عليها علامات بلوغ مبكر او انها كانت ترتدى ما يبر اشياءها الصغيره التى تخيلت للجانى انها تكفى رغبته المريضه
    وده يا خالد كلام علمى انا درسته فى علم الاجرام الدكتور قرن شطه عندو فيهو دكتوراه وممكن يفتينا فيهو
    يبقى تكون رغبه عند الجانى تجاه هذه الطفلة جاء من احدى الاتى :
    اما انه كان فى حالة استثارة كبرى تجعله يسعى ليفرغ مكنون استثارته فى اى وسيط ولو كان حيطة او صابونه بيده !!!
    او ان المجنى عليها قد اتت من السلوك المادى او المعنوى كصوتها او مشيتها او طريقة لبسها او براءتها التى يمكن ان تفسر للجانى على انه دلال انثوى ومن ثم قام بتحويل سلوكه تجاهه لعدائى
    او ان المجنى عليها كانت برغم عمرها عليها علامات بلوغ
    او ان العقل الجمعى الباطن للجانى قد استجمع صورة الانثى التى ربما تكون احدى قريبات المجنى عليها فى صورة المجنى عليها ومن ثم قام باغتصابها تلبية لرغبه باطنه فى عمل ذلك مع احد اطراف اهلها
    او ان للجانى ثار عدائى مع اسرة المجنى علها او والدها واراد الانقتام فى شخص المجنى عليها من شخص المجنى عليه الثانى فكما للجانى تعريف متهم اول وثانى للمجنى عليه تعريف مجنى عليه اول وثانى

  26. الشبع الشديد والجوع الشديد هم سبب آلامي و الحكومة دي خلت السودان طبقتين واحدة شبعانة شديد ودايرة تشتري أي شئ بي قروشا وتانية جعانة شديد دايرة تبيع أي شئ عشان تلقي قروش والغلاء الشديد خلي الشباب ما قادر علي اكمال نص دينه وبقي ميت بالصقرطه والرئيس يرقص ..
    علي عثمان قال لو نحنا غلطانين قدمونا لمحكمة الشعب وخرج الشعب لممارسة سلطاته وبدأ العسكر باعتقال القضاة لحماية المجرمين من عدل القضاة ..
    الرئيس خرمان شديد وما لاقي حفلة يرقص فيها والرقيص كان بينفع كان نفع ( علوب ) ..
    نافع خاتي راسه بين ايديه اليوم كله وكأنه ما كان عارف نهاية العيان الموت ..
    وغضب الامه اتفجر نااااااار والشارع ثار …
    اهلنا زمان بحزرونا ويقولوا الكديس ما تزنقوا في حتة ضيقة عشان ما ينط في رقبتك وكديسنا ده زي كديس ليبيا ما عندوا فرقة يجري بيها وحتي لو لقي فرقة الكرعين ما بساعدنو وح يكون شرس جدا والناس مفروض تتصرف علي كده وتعرف انو الردع ح يكون قاصي جدا ونتمني من اشراف القوات الامنية ان تقف مع الكل ضد الفرد وفي النهاية لابد للقيد ان ينكسر …

    ياريس جزم شعبك رقد موجوع
    ولاهماه تاني حضارة المشروع
    الظلم والمرض علمنا لحس الكوع
    :
    طير طير يا البشير

  27. الاخ جنوبى :
    تحليل سليم يشير الى نهاية المنحنى التاريخى بتاع طارق اب احمد !! بيودى للحيحصل .
    طبعا فى زول حيكون خايف انو الثورة لمن تقوم ما نلقى بديل وبقول ليهو انو مصر لقت البديل فى الاخوان ونحنا ممكن نستبدل الاخوان المسلمين بالاخوان السودانيين وده حزب العامه من الشعب اللى هم اخوان فى الانسانية القالا مصطفى سيد احمد طبعا حيجى زول ناطى يقول ليك مادام انسانية وقالا مصطفى يبقى يسارى طيب ايه رايكم فى الانسانيه القالا الله واريتكم تقولو ما دام قالا الله يبقو حزب اللاوى والا ان الحزب الالاوى هم الغالبون ..
    فهمتو ولا نفسر ؟؟
    طير طير يا سلفاكير

  28. عند الغرب الاعتداء على القاصر من اقل 18 تنزل عليه اشد العقوبات التي تصل للاعدام او المؤبد
    وهناك عقوبات حتى على من يعتدي بفاحش القول على قاصر او حتى الضرب
    وعندنا في السودان الذئاب البشرية التي تغتصب الاطفال من دون عمر الخامسة يحكم عليها بسنة سنيتن سجن و40 جلدة
    في مصر القريبة الكلها رقاصات دي الإغتصاب عقوبته الاعدام حتى لو لم تكن قاصر

    لن تقوم لن قائمة حتى نحكم حدود الله
    القاتل يقتل
    السارق تقطع يده
    من يعتدي على المال العام والمغتصبون يقام عليهم حد المفسدون في الأرض ويصلبوا في ميدان عام او يقطعو من خلاف

    اسي دفع الله حسب الرسول بتاع المجلس الوطني بدل اهتماموا بالقضايا الفارغة وحفلة شيرين لو شاف قضايا اغتصاب الأطفال التي ملأت الجرائد ما كان افضل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: