وكمان مستشفيات

تنبية :
هذا المقال ضار بالصحة ننصحك بعدم قراءته أو إتخاذ التدابير الصحية اللازمة لو (ركبت راسك وقريتو) ..
عزيزي القارئ .. لا تندهش إن وجدت إعلاناً بإحدي الصحف تطلب فيه وزارة (الخارجية) من بيوتات الخبرة العالمية التقدم لتنفيذ (دورات مياه عامة) بالمدينة (الفلانية) ، أو إن قرأت إعلاناً بصحيفة ما تطلب فيه وزارة (التربية) مقاولون أكفاء لتشييد (مراكز للشرطة) بالمدينة العلانية ، أو إن طالعت بصحيفة أخري عطاء لوزارة (الري) تطلب فيه من أصحاب (المطابع) التقدم من أجل طباعة (الكتاب المدرسي) لهذا العام الدراسي .
لا تصيبنك الدهشة يا صديقي فكل شئ ممكن في السودان فالقصة (جايطة) والإختصاصات (ملخبطة) وأي وزارة أو هيئة أو وحدة ممكن تعمل أي حاجة في أى حتة دون أن تلقى بالاً إن كانت هذه (الحاجة) تخصها أم لا .. والكلام ده على مسئولية العبد لله وهاكم الدليل بعد أن أنبهك عزيزي القارئ للتنبيه الذي ورد في صدر المقال .
جاء هذا الإعلان على صحيفة الشرق الأوسط (اللندنية) الصادرة في يوم السبت الموافق 23 يونيو 2012م وهو بعنوان (مشروع مدينة الأبيض الطبية – مستشفى الأبيض التخصصي ومركز علاج الأورام والسرطانات )
يقول الإعلان (في إطار التعاون المشترك بين وزارة الصحة الإتحادية ووحدة تنفيذ السدود ترغب وحدة تنفيذ السدود في تأهيل بيوت خبرة متخصصة في دراسة وتصميم مستشفيات ووضع منهجيات التشغيل والإدارة لمشروع مدينة الأبيض الطبية بعاصمة ولاية شمال كردفان بجمهورية السودان.
يتكون المشروع من مستشفى تخصصي بسعة (300) سرير ومركز لعلاج الأورام والسرطانات بسعة (100) سرير بكافة ملحقاتها الخدمية والسكنية .
بيوتات الخبرة المحلية والعالمية التي تأنس في نفسها الكفاءة الفنية يمكنها التقدم للحصول على مستندات التأهيل في الفترة من 27 يونيو حتى 12 يوليو 2012م على أن تعاد مستوفية للمطلوبات في تاريخ لا يتعدى 12 أغسطس 2012م !
إنتهي الإعلان وبالطبع لم تنته دهشتكم يا سادتي .. (قبل أن تستمر في القراءة أخير ليك راجع التنبيه الفوق داك تااااني )
بالرجوع إلى (قوقل) لمعرفة المزيد عن هذه الوحدة التي تنفذ سدود وكمان (مستشفيات) فقد إتضح لنا أن هذه الوحدة قد إنشئت بالقرار الجمهوري رقم 217 بتاريخ 18/9/2005م وقد نص القرار على تبعيتها مباشرة لرئاسة الجمهورية وقد تم منحها هذه الصلاحيات (البسيطة) :
• إدارة عملها بطريقة مستقلة ماليا واداريا
• لا تخضع لقوانين الخدمة العامة ولا قانون محاسبة العاملين
• لا تخضع للائحة الإجراءات المالية والمحاسبية الخ .
ولعلمك فقط أيها القارئ فإن صلاحيات وحدة تنفيذ السدود (وكمان مستشفيات)هي :
• إستقطاب التمويل اللازم (لعملها)مع إلزام وزارة المالية أو بنك السودان بضمانها .
• الدخول في مشاريع مشتركة مع دول الجوار لإنتاج الكهرباء وإنشاء شبكات وخطوط نقل الكهرباء
• التصرف في عائدات المشروعات التي تنفذها الوحدة (يعني ما تدخل الخزينة العامة)
• تعيين العاملين في كل الدرجات (لا لجنة إختيار ولا منافسات ولا يحزنون)
• وضع التصور اللازم لطريقة قيام المشاريع وصيغة التمويل والترويج لها
• وضع شروط الخدمة واللوائح والنظم الإدارية والمالية والتقنية
• مراجعة الأداء العام للوحدة .
طيب ده كوووولو عرفناهو .. كمان جابت ليها (مستشفيات) يعني (وزارة الصحة) دي تحفر (خيران) الخريف الجانا (فجأتن) ده !!

كسرة :
العبدلله يعتقد إنو عاوزين لينا عطاء لإستيراد كميات من (الدم) للمسئولين وعطاء تاااني لإستيراد (فهامات) لينا نحنا وكده !

كسرة ثابتة :
أخبار ملف خط هيثرو العند النائب العام شنو(ووو ووو)؟

Advertisements

51 تعليق

  1. طارق بابكر عبيد | رد

    برنججججييييييييه

    1. طارق ……….. سلام
      مبروووك وإن شاء الله تنفعك ما تضرك

      1. طارق بابكر عبيد

        شكرًا ولك مودتي وتقديري

    2. حاج أحمد السلاوى | رد

      إن شاء الله برنجيةً تضوى ليك ..قول آمييييييييييييين ..

    3. (ويلكم اون بورد) بالانجليزى, يعنى مرحبا بك بالعربى يا ود بابكر,, ومبروكة عليك البرنجية بس ما تكتر منها عشان ما تضرك.. بس عملتها واااضحة يا فردة!!

  2. البروف صباح الدعاش :
    لو احسننا الظن ممكن نقول انو فى الدول الكبرى لمن يكون هناك مشروعات كبرى وسرية واستراتيجية بيقوم الرئيس بيختار اصلب واقوى العناصر من رموز الحكم المشهورين بالكفاءة ويسلمو المشروع الاستراتيجى ويديهو كل الصلاحيات التى تمنع تحقق البيروقراطية وتعطيل المشروع ويفتح له ميزانيات خاصه غير قابلة للمراجعة الا بواسطة رئاسة الجمهورية وده كلو عشان المشروع يعيش ولانو مهم واستراتيجى .
    نمره اتنين فى حتة السدود تنشئ مشروعات فى كل العالم المتحضر يا بروف اى مشروع عندو اثار بيقوم يعمل مشروعات خيرية لدعم مناطق التاثر منها المستشفيات قرى التوطين المدارس واى خدمات اخرى محتاجه ليها المنطقة عشان انسان المنطقة يحش بانو المشروع ده خير ليهو وليس شر وما يعطل قيام المشروع .
    اما اذا اسانا الظن فممكن نقول :
    انو شيخ اسامه بتاع السدود البقى وزير الكهرباء وبقت السدود حته سغنتوتيه من مملكتو زول قادر والقادر بيسوى وربما يكون مرشح للرئاسة وعاوز يسوق نفسو وربما عاوز يكبر كومو قدام الريس البيثق فيهو ثقه عمياء شديد ..
    بالله يا بروف اضيف لينا تعبير عمياء شديد ده لمصطلحات امزونيا !!!
    بجيك راجع بعد نضرب الانسولين ونستعد لانو البلد دى الا تضرب انسولين ولا تضرب انهروين عشان تقدر تفهم وتستحمل الفهمتو

  3. برنجية على استحياء

  4. البروف والسمار صباح الدعاش والإندهاش
    اخي أفليقا …. لأنني أثق في رأيك ثقة عمياء شديد …. إلا أنني محتاج فهامة حجم عائلي لحكاية مستشفى الأبيض التخصصي من حيث أنه مشروع كبير و إستراتيجي نتج عن آثار تأثر المنطقة بقيام شئ ما !!

  5. الحبيب

    ما عايره وادها سوط الجديد شنو يعنى

  6. انا بفهمك الجزء الفوق بخصوص وحدة تنفيذ سدود تعمل مشتشفيات ,لكين الجزء التحت دا انا زاتى داير فهامة
    قبل خمسة سنة تقريبا عملت لى جولة فى الشمالية الواحد اعرف بلدو وكدا لما مريت بمروى وحدة تنفيذ السدود كانت ممولة أو بالاحرى مشرفة على تنفيذ مستشفى الذرة مروى فهى لاتتعدى كونها شركة مقاولات ليس الا
    وقعت ……………………..ولا اوقعها ياجماعة

  7. دي بس ياها نشد السراير ونلحم الحلل ونصلح الرتاين
    وحدة السدود دي النقاطة بتاعت المؤتمر الوطني عشان كده مرفوع عنها القلم …..
    هو اسامة ده زاااتو قالوا هندستو ولااا قدر ده ….
    اقترح انو نديهم دم بقري في البداية عشان نهيئ جسمهم يتقبل المرحلة التانية من النقل …
    قال لو دايرين ممكن ننزل ليهم مجاهدين يتصرفوا معاهم !!! هو المجاهدين بجاهدوا في ناس المظاهرات يا أهبل ما توديهم يجاهدوا في أبيي وحلايب والفشقة .. الله يفشقك اكتر مما انت مفشق كدي …

    1. جنوبي … سلام
      أنا قايلو أمس حيقول لينا أنا خلاص فهمتكم فهمتكم أتاريهو بيهدد بالشبيحة والبلطجية والمرتزقة …

      1. المنهش .. سلامين
        شفت صاحبك بعد صبرنا ده كله يقول لينا شذاذ آفاق !!
        كمان بكره يقول لينا يا مقملين ؟

      2. جنوبي سلام
        انت شذاذ افاق يعني شنو

      3. بت وراق شايله قرعتك وحايمة بيت بيت بوست بوست زنقه زنقه … شذاذ الافاق ديل ياهم زي حالتك دي حايمين ساي من مظاهرة لي مظاهرة … حأشيل التعليق ده وأشذ بيهو الافق التاني اشوفك بعد كده حتافقي وين .

      4. خالد ياخوي الكلام ما خلعني عديل عمل لي فاك كل ما اخش بوست تجيني الشذاذ ناطه
        هههههههههههههههههههههههههههههههههههه

      5. المندهش سلام
        ماتنسي المرتزقه المجاهدين (هئ لله هئ لله لا للسلطه ولا للجاه )

  8. حاج أحمد السلاوى | رد

    البروف .. غايتو واحدة من إتنين .. إما الجماعة ديل عباقرة زمانهم ..وإما نحنا أغبياء ما قادرين نستوعب أفكارهم الجهنمية دى .
    إنت رايك شنو .. تختار شنو ؟؟ زى ما قال الجعلى …

  9. هذا والله ما أوردنا المهالك! انعدام الشفافية وغياب المحاسبة

  10. أحمد وحاج أحمد كلو واااحد …… سلام وتحياتي
    الجماعة ديل عباقرة زمانهم …. ونحن أغبياء ما قادرين نستوعب أفكارهم الجهنمية دي برضو وااااحد
    يعني أحسن حاجة نختار الأثنين وياريت لو في خيار تالت ورابع …. لحدي العاشر لأننا بصراحة بقينا نحنا المرفوع عننا القلم

  11. اتاااارى – عشان كدة واحد من اصحابنا قال لى ناس هيئة الطيران المدنى عايزين يمسكوا استيراد الاسبيرات المستعملة الكانوا منعوها دى, و نحن قلنا دى فرصة انا و الميكانيكية اصحابنا نطلع الخليج زيارة و (تشليح) و نورد للهيئة و ناخد عمولتنا – و ما عليكم يا سمار بنراعيكم فى السعر, بس انتوا اعملوا لينا (الشيرنج) بتاع الفيز و التذاكر

  12. والله وتالله ووالله نحنا مرقنا وما برنجع والرهيفة التنقد وانشاء الله ما تتلتك مرحبابو الشر محل ما بتق
    واحنا شذاذ لكن لذاذ
    وابقي قدرها والله باسوندا تشحدنا كان نفكك ليها لكن هيهات جوه هنا بس يا متخلف ومجاهدينك ديل اللينفعوك
    بعدين يا جماعة الان ركزو معانا شوية الناس في الشارع الشارع الشارع — سد شنو ومستشفي ماهو كلو خبوب وطين في طين
    الشارع — قال الراجل يمرق والمورقو ديل (اخوات مُصيبة) الله لا جاب باقيكم يا سلفة والحساب ولدا ضكر بس الاتوو بتعاكم كمل والله سيك في قبولك يا الما تعرف اللعب……. تفوووووووووووووو عليكم

  13. البروف الحبيب…سلام….
    هى لكن اسامة دا ماااا حبيب نافع وصديقو ! دا ما الشالوا ليهو مكاوى مدير الكهربا عشان اختلف معاهو , بغض النظر عن انجازات مكاوى العظيمة , واسامة دا مااااااا…خلونى يا ناس !

    1. خد دى كمان ياشمباتى —- برضو اسامة دة غير حبيب المانافع يقال انه عديل البشير بالزوجة التانية — ابحث فى قوقل او جبرة ياتيك بالاخبار

      1. ايوااااااا يعني هو اتاري سد مال هنايا واختها!!ده
        العرس ولا بلاش …

      2. جنوبي … سلام
        يا اخوي عمك بابكر نعم التربية … ودي الولادة ولا بلاش وعمك بابكر …
        واحدة راجلها رئيس والتانية وزير شبه رئيس …. تجي تقولي ناس هناية وهناية

  14. طارق….
    مبارك يا حبيب وعقبال كل يوم ! اححححح….

    جنوبى المقمل…
    هندسة !!!؟ هو دا مرفود من سنة تانية هندسة ! قال مهندس قال !

    1. طارق بابكر عبيد | رد

      شكرًا يس، وعقبالك ،كنت بره ألشبكه وما كنت فاهم قصه البرنجيه، يعني مسطح ولكن الاسبوع الفات ام أولادي شرحتها لي،الموضوع الفات كانت البرنجيه الأولي وو راها حتي يتم استرداد خط هيثرو،

      1. ههههههههههههههههههههه,,دىة ورطة شنو الوقعنا فيها دى !!؟

      2. ههههههههه ,, والله يا شمباتي مع الشرحوا ليهو ده
        تاني ما تشمها بعد ده الا تجي تفليني

  15. الباير…
    ما تكمل لعابك بدرى , محتاجين ليهو ضروووورى! آييييييييييييي

  16. الجماعه رقدوا لي امريكا في الواااطه !!
    طيب بدل البشتنة ورقاد الواطه مش اخير تخلونا مع
    الجنوب وقافي !! برميلين ليهم والتالت لينا عشرة
    كيلو ليهم وعشرة ليناوعشة كلمينا ميري ذكرينا
    كل سنكي احسن يبقي مسطرينه بور وبورسودان بارا
    والجنينه عبري ولا واو حاجة مش كويسه كل زول براو
    ولعوا الرتينه وكل سنكي احسن يبقي مسطرينه .
    ياخي نعتبر نفسنا سواقين الحافلة وهم الجلابي وللسواق
    التلت وسيد الحافلة التلتين وغسيل الحافلة علي الكمساري
    الصيني ماهو برضو بيسترزق معانا …

  17. الموضوع دا بيعمل حصوه في المراره
    وزي ما بتقول امى (الدنيا بقت ماشه بي ضهره )
    ويا مااااااااااااااااا حنشوف

    1. حاج أحمد السلاوى | رد

      ولسه منتظرين نشوف آخرتا شنو ؟؟؟

  18. بشاوى..
    اتاريييييهو! حدثت العدو ما حدثتنى ..

    جنوبى..
    قلاية تفللى وما فى حل غير تتفرطقى..كع

  19. بت وراق / خالد مدني .. سلام .. انتو ما ملاحظين انو في تطوّر في اللغة رغم انو الاستخدام ما كان في محله يعني زي الزول البلاقيك في المقابر ويقول ليك صدفه سعيدة !!
    البشير خت الكورة واطه واقعد مع الناس الليلة شان كل ما تتأخر شروط القعده بتحِر وسقف شذوذ الافاق بيرتفع ,
    عموما القذافي وصف شعبه بالجرذان وكان نهاية داخل مواسير المصارف التي تعيش فيها الجرذان ..

    1. قسما بالله يا جنوبي وبت وراق انا من ما سمعت انو البشير قال كده احترت … ياربي الزول ده جاب الكلمة دي من وين … دي كلمه بقت من وحشي الكلام عديل كده … شي يحير … تعرفو طوالي اتذكرت امرؤ القيس ولاكي لوك .
      تراجم :
      يس : لاكي لوك ده اسال منو كواشف القوم ولو ما وروك ليهو ارجع لي في العام مافي شي بدسوهو … يا شــ ….ذاذ انت
      سهيل : وحشي الكلام دي اسأل منها شيخنا ود الخلا او عمنا نيام … يا وحش انت

      1. انتو عارفين كلام البشير ذكرني نكته (قالو في مره سمعت كلمة فجاةً وعجبته شديد ودايره ليها فرصه تقشر بيها لجارته يوم طلعت بالحيطه يافلانه عليك الله دايره لى ملح وفجاه معاها شطه )

  20. جنوبي الزول ده يقول لينا فئران ، كدايس ، لحس كوع ووووو كلو ده مقبول منو لأنو ياهو ده كلامو النحنا أتعودنا عليهو ولكن يقول لينا شذاذ آفاق دي المشكلة لأنو ده ما كلامو وأكيد في زول قال ليهو قول كده …. يا جنوبي ده الما البشير النحنا بنعرفو من زماااان والموضوع فيهو إنّ

    1. لالا يا المندهش ياهو ذاتو بس اظنو غير المستشارين ..
      عزيزي البشير نشكر لك انقاذك لنا بس لينا 23 سنة بنقول ليك الانتا ماسكنا منها دي رقبتنا ما يدنا , فك الحلقوم وجرنا من اليد ياخ .

      1. ده يكون منو المستشار الجديد البحضر افلام الويسترن ده ؟؟؟

      2. غايتو شذاذ الافاق دي بتشبه لي الطيب مصطفي والخال
        خالي وانا ود اختو ….

  21. يا اخوانا سلام للجميع- ماعدا شذاذ الافاق- تم حجب موقع الراكوبة وحريات وسودانيز اونلاين
    لكن الجمعة الجامعة الجاية – لحس الكوع- ابقوا رقاق
    يا بت وراق حمد الله بالسلامة — يلا جهزي الصاج اصلو يوم الجمعة عندانا شية كاربة

    1. ما عليكم السلام … ما نحنا الشذاذ ذااااااتم … ضابحين شنو ؟؟
      كسره : سمعت نكتة الجزار مع العميان الاتلحو كل يوم وبعد ما يجس اللحمة : لحمتك دي كعبه .. انت ضابح شنو ؟؟؟

      1. ضابحين ابو العفين انشاء الله

  22. خالد مدني .. اتخيلت هناي في لاهاي وبيغني :
    انا من حوش بانقا وحيد وحيد
    وموطني بعيد بعيد
    ما تستغرب وحشي الكلام من وحشي الرؤساء !!

  23. هههههههههههههههههههههههههههههههههههههههههههه,,حنضل انت يا جنوبى,ابرا منك..

  24. انتو يا جماعة شذاذ الآفاق دي عندها علاقة ب أمين حسن عمر !!!! الزول ده حاسي بشنو ؟؟

  25. الطبلة باظت دايرين نركب واحدة جديدة
    الولد قبض الحرامي قال لابوهو يابا قبض حرامي قال فكوا ….الولد قال لكن هو ابي يفكني
    اها نقعد في جنس دا

  26. حااااااااضر,,,,
    وبطنك دى ما ببردها الا الجماعة ديل يدونا قفاهم الشين دا !

  27. اخبار ترعة كنانة والرهد شنو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: