قدر عن قدر يفرق

عندما تشتد الأزمات يبدأ المسئولون في الخروج بتصريحات (غريبة) و (عجيبة) هكذا علمنا التاريخ القريب ولعل الرئيس الهالك (معمر القذافي) يعد خير مثال لذلك َفقد أبدع (القائد الأممي) في نعت شعبه الذي صبر على (خطرفاته) أكثر من أربعة عقود بأقذع الألفاظ !
ونحن نعيش (عام رمادة) كما وصفه وزير ماليتنا مؤخراً والحال الإقتصادي قد آل إلى ما آل إليه من (دمار شامل) حتى إستحالت الحياة على المواطنين بسبب إرتفاع الأسعار في ظل ثبات الدخول والأجور .. في هذا الجو (الملغم) يجب أن يبقي (المسئولون) على ألسنتهم (عشرة) !!
فهم وحدهم لا شريك لهم من أوصلنا إلى ما نحن فيه من (سجم ورماد)إذ تركهم الشعب
(يهيصوا) داخل رقعة الشطرنج (برااااهم) ربع قرن من الزمان و(بدون ما يقول ليهم تلت التلاتة كم) .. لذا فإن كانت هنالك من تصريحات فلتكن متزنة ومنطقية و(تدخل الراس) والأهم من ذلك كله ألا تكون (مستفزة) !
لعل من التصريحات (غير المنطقية) التي صدرت مؤخراً ذلك التصريح (الفلتة) الذي صدر من السيد وزير المالية والذي قال فيه ( الفقر قدر من الله) ! يا له – عزيزي القارئ – من تصريح يوضح مدي إيمان وزير ماليتنا بالقضاء والقدر .. غير أن العبدلله يرى أن السيد الوزير قد ذكر (الفقر) وفاتته أشياء أخري هي أيضاً (قدر من الله) ! فالجوع (قدر من الله) وتردي الخدمات الاساسية البسيطة (قدر من الله) والازمة المالية الطاحنة (قدر من الله) وارتفاع اسعار السلع الضرورية (قدر من الله) واحتكار السلع عبر تجار الحكومة (قدر من الله) والسيطرة علي التجارة في الاسواق (قدر من الله) والتلاعب باقوات الناس (قدر من الله) ورهن الوظائف العامة للولاء الحزبي والقبلي والاسري الضيق (قدر من الله) والفساد والمحسوبية (قدر من الله) والبطالة والفساد المالي والاداري والاخلاقي (قدر من الله) والتدمير الممنهج للمشاريع الوطنية الهامة وخصخصتها (قدر من الله) والتخريب المتعمد لمؤسسات المجتمع المدني (قدر من الله) رفض بعض المؤسسات والشركات الحكومية للمراجعة (قدر من الله) ، تجنيب المسئولين لأموال الوزارات والمؤسسات ووضعها في حسابات خاصة (قدر من الله) الصرف البذخي على المسئولين والدستوريين (قدر من الله) وترك المفسدين دون محاسبة (قدر من الله) !! والتقاوى الفاسدة (قدر من الله) والأقطان (قدر من الله) .. وعمارة الرباط (قدر من الله) وأطفال المايقوما الكل يوم زايدين ديل (قدر من الله) ، كما أن بيع خط هيثرو (في سماهو) قدر من الله !
سعادة السيد الوزير عاوز يقول ليكم يا جماعة الخير إنو (كل شئ مقدر من الله) والحاصل لينا ده مافيش مسئول واحد عندو بيهو دخل .. (في زول عندو أى إعتراض) !
يا سعادة الوزير :
الناس يقبلون بأقدار الله ويؤمنون بها حين تكون الأسباب غير التي نعرفها وقد نفذ مداد قلمنا ونحن نشير إلى هذه الأسباب حتى تسارعوا للإصلاح لكن دون جدوى .
ألعبدلله يرى أن أسباب الأزمة الراهنة (أيها الوزير المؤمن بقضاء الله وقدره) هو الإبتعاد عن تعاليم ديننا الحنيف فيما يختص (الحكم) وتولي المسئولية والذي قادنا للأسف الشديد إلى ما نحن فيه الآن و ما كنا سنجد نفسنا في هذا الحال (البطال) لوكان فينا مثل الخليفة عمر بن عبدالعزيز حين جاءه البريد ذات ليلة فأشعل السراج ليقرأ الرسائل، ولمّا انتهى من القراءة أطفأ السراج، وسئل في ذلك فقال إنّ زيت السراج من بيت مال المسلمين، وقد أضاءه ليبحث في أحوال عامّة المسلمين ويسأل عن أمرهم ليعرف ما هم وأمراؤهم عليه، وأطفأه لأنّه الآن يبحث في أموره الخاصّة (وما عاوزين نجيب سيرة الطبلة)؟.
كان (رضي الله عنه) يعلم أنّ الله استأمنه واستخلفه على أمّة المسلمين، فقام بحفظ الأمانة وقام بأمر الخلافة ومسؤوليّة الحكم خير قيام (مافيش كده وللا كده) ، ولذا فقد كان عماله يبحثون عمّن يستحقّ الزكاة ليدفعوها له فلا يجدون أحدًا يأخذها ! (بالله شوف؟)

كسرة : (ما يستفاد من المقال) :
ما نحن فيه (قدر من الله) وما كان فيه المسلمون أيام الخليفة عمر بن عبدالعزيز (قدر من الله) بس (قدر عن قدر يفرق) وكده !!

كسرة ثابتة :
أخبار ملف خط هيثرو العند النائب العام شنو(ووو ووو) ؟

Advertisements

71 تعليق

  1. برنجييييييييييييييييييييييييييييييييية

    1. طارق بابكر عبيد | رد

      مبروك البرنجيييه يا يس، لولا فروق الوقت مابين السودان وبريطانيا،،، الفرق ساعتين والواحد يا دوبو صحي وبستعد للشغل

    2. السلام عليكم ، د/ شمباتى برنجيتك مضروبه ، كنا في الجنينه الكلها لالوب و عشر ، الناس ما فضل ليها الا ترجع لى الجراد البقى ما بظهر ، لانو الناس اكلوا البيض ، مع انو سوق اطباء بلا حدود فيهو اى شئ يخطر على البال ، ماتسوق فيها …………… عجبى

      1. ههههههههههههههههههههه,,,يا زول لالوب ولا نيق !! برنجية اصليييية ومع الصباحية,,شنو ليك؟

  2. والرماد كل حماد…
    والله يا بروف الزول دا بالذات انا عايزو حى ضروووورى ,, عشان يعرف القدر الحينزل عليهو شنو…
    كسرة : شايفك الليلة لابس عباية فضفاضة كدى !

    1. خليت الوزير الحمبليطة طلعت للوزير البرنيطة ياشمباتى حتبارى الوزراء ديل واحد واحد انت ماتمسك فى زعيم العصابة وتريح بالك

      1. ههههههههههههههههههههههه,دا قرنبيطة ساى !
        وكبيرهم ما زحلقوهو زماااان ! لكن بلاقيهو وبحاسبو على افقو الشاذ جاد دا …

  3. برنجية وبرنجية وبرنجية,كيتا فى جنوبى وكوكو والمندهش وبت وراق واى مبرنج …

    1. شمباتي تحياتي …. نحن يا اخوي البرنجية بنشيلها عديييييل ما تحت تحت واتصالات وكده …. عموما مبروكة عليك

    2. مبروك كاس الصفيح.. واضم صوتي لام محمد والمندهش
      طارق بابكر .. ليس فروق وقت ولكنه امر دُبر بليل … عملتوها ظاهرة يا الطنطاوي وشفيق !!

    3. اممممممممم دا شنو البيقى يحصل دا نطالب بلجنة لتقصي الحقائق لسحب البرنجيه

      1. بت وراق سلام ، مده لم نسمع منكم ، قدر ماشركنا ليك بى برنجيه ، خطفها د/ شمباتى وناس جنونى ودخل علينا المدشدش زى الطربوش الواسع ………………….. عجبى

      2. لسان ممدود من هنا لا نمولى ,, سورى لا الروصيرص بس !

      3. حاج أحمد السلاوى

        بنت وراق .. كلو شى ولا لجان تقصى الحقائق دى ..لأنو التحقيق ما فى زول حيعرف عنه حاجة ومصيره حيكون جوة الأدراج .. يعنى حسه الشعب السودانى عرف حاجة عن تقرير عمارة الرباط ..ولا غزوة خليل ابراهيم لأمدرمان ..ولا خط هيثرو الجنن البروف الفاتح وخلاهو يهضرب ليوم الليلة حتى بعد النيابة عرفت السرقو منو ؟ عشان كدا خلي الطابق مستور وما فى داعى لأى لجنة وقولى لشنباتى ( بالنون ) مبروكة عليك البرنجية … وبس .

  4. د ياسين شمباتى
    اتهم البروف بانه امس قال ليك اضرب لى ضروري عشان يوريك معاد نزول المقال وتجى تعمل لينا فيها الاول .

  5. عزيزي البروف
    في وطن تنعدم فيه مصطلحات المحاسبة ومساءلة المقصر
    وتسود فيه ثقافة الكمونية كما يسميها الراحل المقيم حسن ساتي
    لا يكون أمامنا إلاّ الإيمان بأقدار الله التي منها أن يكون وزير
    مالية السودان رجل تدور حوله شبهة فساد علاج ابنه
    دون اتباع الإجراءات المطلوبة إن كانت هناك أصلاً إجراءات
    معروفة

  6. السلام عليكم البروف و لاخوة ( مافي إلا السيد شمباتي)

    بالمثل, يثور الشعب السوداني على امثال هذا الوزير ” قدرا ” .

  7. ههههههههههههههههههههههه,,والله حسادتك عينة يا ام محمد !
    الكلام دا ما كدة , غايتو يا ناس الدنيا وكت تقبلوا على الواحد ما بتريحوهو كلو كلو…

    طارق….
    يباركوا ليك السمح,,لكن اصلو المقال اليوم نزل بدرى,على نيتى البيضا…

    1. اى حسااااااااااادة عديل كدة . لكن نقول شنو قدر زي ما قال وزير المالية

    2. حاج أحمد السلاوى | رد

      شنباتى .,. نيتك البضاء …ولا كمونيتك البيضاء .. غايتو عملتوها ظاااااااااااااااااااااهرة ..
      هبشة سغيرووووونة كدا .. وين أخونا أبو عصمت ( د. عزت .. الكاشف بن الورد بشار ..والمدعو أبكرونا ..ونيام نيام والأمير مخير ( مخير الله … ) وغيرهم من قدامى المحاربين ..

  8. وايضا شذاذ الافاق قدر

  9. طارق بابكر عبيد | رد

    يجسد رئيس دولة الأوروغواي خوسيه موخيكا الحاكم القريب من مشاعر الناس وقيم التضامن التي تبقى في وقتنا الراهن وخاصة في العالم العربي نوعا من ‘اليتوبيا’ وإن كان التراث الإسلامي يزخر بأمثلة من الماضي، ويرى مراقبون عرب مقيمون في امريكا اللاتينية ان ظهور موخيكا في الاوروغواي يمثل ظهور الخليفة العادل عمر بن عبد العزيز في عصره حتى لقب بخامس الخلفاء الراشدين.
    منقول حتي لايكون القضاء والقدر شماعه تستعمل في غير موضعها،
    اسأل الله العظيم بان يسهل الحال ،،
    اخليكم حسه ماشي علي الشغل اللي ما بنتهي

  10. البروف الحبيب تحياتي واحترامي
    نأمل من سيادتكم الكف عن التوجيه بما يجب أولا يجب وما يجوز أو لا يجوز من قول المسئولين
    يا أخي خلينا ننبسط ونستمتع ونندهش شوية ( فيما تبقى لهم من أيام) و طبعا ( ده كلوووو قدر من الله ) بأقوالهم وأفعالهم حتى توثق للأجيال القادمة ……

  11. يا شمباتي برنجيتك دي والله غايتو بس نقول شنو ( قدر من الله) ….
    البروف والسمار كيفكم عدنا بعد غيبة وتاني ناس البرنجيات ديل نعمل ليهم ( سهر الجداد ولا نومو )
    ونهدي لي وزير ماليتنا اللحن القادم
    أقدار يانور عيني …
    كسرة :
    مع الإعتذار للأستاذ مجذوب أونسة !!!!!!!!!!!!!!!!!!!!!!!!!!!!!!!!!

    1. هههههههههههههه,حلوة منك يا حبيب,,تانى نوموا !!

  12. من باب التأدب مع الله قال ابراهيم عليه السلام : ( الذي خلقني فهو يهدين , والذي هو يطعمني ويسقين , واذا مرضت فهو يشفين )
    نسب سيدنا ابراهيم الخير في الخلق والطعام والسقيا الي الله ونسب المرض الي نفسه ( ابراهيم ) ونسب الشفاء الي الله !!
    من باب قلة الادب مع الله قال المؤتمر الوطني : ( نحنا استخرجنا البترول وبقيناكم دولة مصدرة للنفط ونحنا وفرنا ليكم العيش بعد ما كنتوا بتقوموا من صلاة الصبح وتقيفوا في صف الفرن ونحنا عملنا ليكم السدود ومدينا الناس بالكهرباء الما كانوا بيحلموا بيها وعملنا ليكم شوارع الزلط وبقي السفر يستغرق كم ساعة بس بدل ايام في الصحراء وعملنا ليكم الجامعات والمستشفيات ووطنا التعليم والعلاج وكل الخير الذي اتي نسبوه الي أنفسهم والمؤتمر الوطني وعندما جعنا ومرضنا واشتعلت الحروب بيننا قالوا لنا من الله ونسبوا الخير لهم والشر الي الله , وهذا لم يحدث ولم يسبقهم احد اليه سوي ابليس اللعين حين قال : ( فيما اغويتني ) مع ان ابليس اللعين هو الغاوي ……..!!!!!!!
    وقال صلي الله عليه وسلم يثني علي ربه تبارك وتعالي : ( الخير كله بيديك والشر ليس إليك ) ..

    المؤتمر الوطني مهما بقية الاحزاب حاولت تتفاهم معاه كان بقول ليهم انا اكثر منكم مالا وأعز نفرا وعضويتي بالملايين والحسوا كوعكم , وحكم دولته وهو ظالم لنفسه وقال ما اظن ان تبيد هذه ابدا وما اظن ان المظاهرات قائمة..

    1. الله على الظالم | رد

      تسلم ايدك

  13. جنوبي ….. صح لسانك
    بس برضو في النسخة السابقة ( طبق الأصل ) من حكم العسكر أيام نميري كانو بيغنو ويقولو ( جبت الموية للعطشان وجبت اللقمه للجيعان وجبت العافية للمرضان وعمّ الخير في كل مكان ) …. ده نقول عليهم شنو !!!

    1. مادي مشكلتنا يا المندهش أي زول يجي يبشر طوالي
      نخط الدلوكة ونقعد نغني ليه قبل ما نعرف ح ينقط
      ولا زول عرضه ساااكت , عراض ولا اشتر ساااكت , من
      ناس العرس ولا شذاذ آفاق ساااكت ..

  14. يا أخونا وزير المالية بتعانا دا من اين اتى ؟؟؟؟؟؟؟؟
    غايتو ما عارف شيخ اسحاق معاه حق … !!!!!

  15. هو الكلام المستفز كلام وزير الماليه براهو دا البشير ذاتو قام يطربق قال ح ينزل المجاهدين (الحقيقين) وطبعا الحقيقين دي اخته فيها وقفه يعني عندهم نوعين من المجاهدين وحدين حقيقين ووحدين خيال علمي هههههههههههههههههههههههههه ما سمعنه بيهو دا كور علينا

    1. ظهرت من وين الليلة اوعي تكوني كنتي مع الشذاذ الافاقين ديل انا لو لقيتك معاهم تعرفي حاجة

    2. بت وراق …أختك إن شاء الله بقت طيبة … تحياتي

  16. نزار عبد الماجد | رد

    يا بروف الفاتح ،، السلام عليكم ورحمة الله وبركاته ..
    في قصة يحكيها مغتربو الإمارات عن أحد شيوخ الإمارات ،، شكى له الشعب عن توقف المطر وعزو ذلك لإنتشار الفساد ،،فكان رد الشيخ بأنه كان قريباً في أوروبا والمطر نازل في حين أن الفساد يملأ الأرض !!!
    يابروف الشافتو البلد دي الإنس والجن منه براء ….

  17. حاج أحمد السلاوى | رد

    البروف الفاتح .. غايتو الليلة ما قصرت تب ..وطلعت الفى نفسك كووووولو لاكين والله انا خايف عليك من زيارة جماعة الأمن مع إنو كلامك كووولو فى الصميم ..ونفقدك ونفقد كتاباتك البنتنفس بيها شوية وعلى أمل إنو المسئولين يستجيبوا ولو 25% بس من مقترحاتك..
    هبشة سغيروووونة كدا ..الأخ الفاتح .. انا شاعر إنو كان فى تنسيق بينك وبين المدعو شنباتى الأمر الذى هيأ للكدتور شنباتى الحصول على البرنجية .. وبالتالى تعتبر برنجية مضروبة .. وعليه نطالب بإعادة الحق إلى اهله ..
    كسرة غير ثابتة .. حسن كابوس اخباره شنو ؟؟
    وخلونا النشوف آخرتا شنو ..!!!!!

    1. الاخ العزيز انت ليه متفائل كد ٢٥٪ مره وحده كده قول ٥ قول ١٠
      البروف صوتو إنبحه ورا الخط لو كان في استجابه ولو ١٪ كان ردوا ليو و قالوا الخط وين (انا ما بتكلم واقول رجعوا )

  18. معيادنا معاهم يوم الجمعة (لحس الكوع)
    انتو في دا ولا البر الما امان (البرلمان) قالوا يزيدو الشورت بتاع لعيبة الكورة يصل لغاية الركبة- لانو بالوضع دا بكشف عورة الاعب-
    الناس في شنو والحسانية في شنو…………جنس عواليق ربنا جعلهم لينا قدر او كما قال وزير السجم والرماد الكالنا

    1. خلي يحجبوهم هم كدا اصلا ما نافعين

    2. حاج أحمد السلاوى | رد

      شذاذ آفاق ..,مرجفون ..
      الناس فى شنو ونوابنا البرلمانيين فى شنو ..
      ديل حقو يلموهم كووووولهم وما يكون فى زول منهم غايب ويفقلوا الأبواب ويكبوا عليهم شوية كيروسين ويشختوا كبريتة ..تصور قبل فترة كانوا بيناقشوا موضوع العازل الواقى وتوريعه على الطلبة فى الجامعات ..والليلة بيناقشوا موضوع تطويل الشورة لللاعبين ..
      هل ننتظر منهم أى خير .. فئة غير منتجة وتكبف الدولة مبالغ طائلة فى كلام فارغ ..
      حسبنا الله ونعم الوكيل فيهم جميعاً..

  19. بلد عايشة بالشحدة وفيها طاشر وزير مالية, عشوائي
    وطاشر وزير تخطيط عمراني , نسبة النجاح كم وستين في
    المية وطاشر وزير تربية وتعليم, رئيسا يقول كديس
    وشذاذ افاق ورجالة والتاني يقول الحسوا كوعكم وواحد
    يقول طافية النور وفيها طاشر وزير ثقافة واعلام ,
    رئيس كل خطاباته سوقية وعندو طاشر مستشار ( لالا
    ديل شالوهم خلاص ) , ياخي حلو حكومات الولايات دي
    بلا وزراء ولايات بلا مجالس تشريعية ودستورية مكملا
    علينا قروشنا في الفاضي بلا برلمان معاكم هو برلمان
    ما فيهو معارضة لزومو شنو ..
    جوبا مالك عليا جوبااااااا
    عليكم الله شفتو ليكم زول يضر رقبتو عشان يضر غيرو
    آآآآآآآآآآآآآي شفناه سلفاكير ابو الدقيق ده .

  20. معك حق في كل ماقلته
    فهذا يحدث لدينا أيضاً, فحسبي الله ونعم الوكيل على كل ظالم

    أخي هذه المرة الأولى التي أدخل فيها مدونتك
    في الحقيقة لقد رأيتها صدفة, فدخلتها وراقني أسلوبك الكتابي
    وفقك الله لما يحب ويرضى

  21. سلام ياقبيلة،،،
    البروف قال وبعضمة لسانه ألعبدلله يرى أن أسباب الأزمة الراهنة (أيها الوزير المؤمن بقضاء الله وقدره) هو الإبتعاد عن تعاليم ديننا الحنيف فيما يختص (الحكم) وتولي المسئولية والذي قادنا للأسف الشديد إلى ما نحن فيه الآن و ما كنا سنجد نفسنا في هذا الحال (البطال)
    أن الحال التي فيها نحن هي بسبب البعد عن تعاليم الدين ، يعني بالعربي الفصيح لو كنا متمسكين بديننا ما كان ده حصل!!!!
    مارأيكم دام فضلكم أيها السادة الأفاضل ، ناس حاج أحمد السلاوي وكل الأخوة الصعايدة في كلام البروف هذا والذي هو عين ما كنا ننادي به ونقول به حتي بح صوتنا وجف ريقنا وناس أب أحمد وحاج احمد ومن وشايعهم يعارضون من أجل المعارضة واليوم حاج احمد السلاوي يوافق البروف في ما قال دون ان يطرف له جفن!!!!

    1. حاج أحمد السلاوى | رد

      ياااااااااااااااااا بن الفلاة .. نحن لسنا ضد الدين والعودة إلى تعاليم الدين وياريتنا نعود كووووووووووووووولنا حكاماً ومحكومين إلى الله نعمل بما امر به وننتهى عما نهانا عنه والبروف اليوم ينادى الحكومة التى جاءت بإسم الدين شكلاً ورمزاً ولم تطبق منه شىء أن تعود إلى الله وإلى تعاليم ديننا الحنيف لأنهم ابعد الناس بممارساتهم عن الدين …وكما قال الشاعر : لا تنهى خلق وتاتى مثله عار عليك إذا فعلت عظيم ..فالشعب السودان شعب متدين إلى ابعد الحدود دون شك ولذا نريد من حكامنا أن يكونوا مثله وأن يراعوا الله فى هذا الشعب المتدين ويحفظوا حقوقه ..وإلا فالويل لهم من عذاب يوم عظيم ..
      وأنا لازلت عند سؤالى القديم الجديد لك .. هل شعوب أوروبا الغربية وغيرها من بلاد الكفر كما تسمونهم يصومون النهار ويقومون الليل وبالتالى فإن امورهم ماشة فى السليم ؟؟؟ كلا والف كلا ولكنهم وحكوماتهم يعملون بتعاليم الأديان السماوية ( حتى الأديان غير الإسلامية تنادى بكل الفضائل الحسنة ) وهم لا يؤمنون بها وحكامنا يؤمنون بهذه التعاليم ولا يعملون بها ..
      إعتراضنا دوماً كان على مطالبتك الشعب المسكين المغلوب على أمره العودة إلى الله دون حكامه بينما ولاة أمره لا يرعون فى حقه إلاً ولا ذمة ويكذبون عليه ليل نهار ..بلأمس القريب قرأت فى صحيفة الإنتباهة أن الحكومة استوردت 540 ألف طن سكر لسداد حاجة المواطنين فى شهر رمضان المعظم ..وحكومتنا لديها العدبد من مصانع السكر بل وتصدر السكر .. مالكم كيف تحكمون ..
      واترك المايكرفون للبروف الفاتح لمتابعة الرد عليكم ..ولنا عودة إن شاء الله ز

  22. الحبيب

    ونعمه بالله لكن محمد احمد المسكين ده عايش بالبسيطه وعامل حسابو لي يوم بكره ومدخر لليوم الاسود اها ده محمد احمد الغلابان حكومه فيها خرتميه وزير واريس وخرتميه مستشار ماعارف تتدعيات فقدان النفط بعد توقيع اتفاقيه الزفت دى خلونا نلف صنيه وحقنا في رقبتهم ونحن خصوم لهم يوم القيامه بعدين في اليوم دلك خلي يجيبو البكاسي والببمان وخلي اى مسؤل يلف المستشفيات ولا المساجد في اطرف العاصمه وما الاقليم ويتزكرو كويس انو في يوم حساب ونحن بنصبر لانو ده ابتلأ ولانو الله قال لعبده المظلوم لانصرنك ولو بعد حين نتضرع الى الله ان حفظ ماتبقي من بلدنا

  23. سديقى ود الخلا
    اتفق معك … … ونطالب البروف بعمل (شرح مقال) فى النقطة المذكورة تلك…. لانو صراحة نحن ما فهمنا
    مع تحياتى للجميع

  24. صديقي ود الخلا .. بما اني واحد من الاخوة الصعايدة انا ما شايف انو البروف غيّر كلامو لأنو بقول انو الاصلاح يبدأ من فوق يعني من الحاكم وليس المحكوم وده الامر الطبيعي وكل نظافة بتبدأ من فوق وتنزل وليس كما تتطالبنا انت تريد ان تبدأ النظافة من تحت ..
    الغسل يبدأ من سكب الماء علي الرأس وبعده غسل باقي الاعضاء نزولا من الرأس ..
    في الحمام بنبدأ نغسل الرأس ووسخ الرأس ينزل لي تحت يسوق معاه وسخ الصدر وينزل يسوق وسخ البطن نزولا للحته ديك ثم الساق واخر شئ القدم وينزل كل الوسخ الارض , لكن لو بدينا بغسل القدم والارجل سينزل عليهم وسخ الراس والاعضاء العلوية ونبقي زي الما نضفنا شئ …

    1. الشرح ما عندك لكن !!

  25. اخي ود الخلا ثرو ابو مازن … جنوبي عمل ( شرح مقال ) بعربي جوبا إن شاء الله تكون وقعت ليكم الفكرة
    شمباتي …. يايابا سنهوري اضرب ضروري وما تقولي الرقم طشا …

    1. هاهاهاها انا وقعت لى يا جنوبى
      ياربى نعيدو لى ود الخلا
      ولا شنو يا سديقى

      1. ابو مازن يا حبيب ود الخلا فاهم اكتر مني ومنك لاكين
        ما هاين عليهو يطلِع ناسو غلط ومصر يغالط نفسو
        في اصرار ويقول يمكن انا الما جيت ويعاتب ويخت اللوم
        علينا عشان ما يعاتب المحبوب .
        قالوا بكره الخطبه ح تكون عن تحريم لحس الكوع .
        زميلي مصري سألني يعني إيه لحس الكوع ؟ شرحت ليه ,
        قال لي : ده إنتو بادين م الصعب أوي …

  26. سلانات يا فرد ..
    اولآ احب اطمئن الإخوه الصعايده إنو العبد لله لا له في تور السياسه ولا طحين الحيكومه .. والمؤتمر الوطني ..

    ثانيآ .. اخونا ود الخلا علق علي كلام البروف لتوضيح ان البروف في البوست اعلاه تطابقت افكاره و افكار ود الخلا في الجزئيه الخاصه بالرجوع للحق و الدين .. و انا اراهما محقين فيما ذهبا إليه ..

    ثالثآ : حبيبنا ( جنوبي) .. مثلك بتاع النضافه جميل و مفهوم .. لكن ماليهو علاقه بكلام ود الخلا ..

    ود الخلا : .. خلاص احمد الله إنو كلام البروف توافق مع كلامك .. ماعند شغله بسكوت السلاوي ولا نضمي جنوبي ..

    1. حبيبنا سهيل .. سلام
      انا رديت علي مبدأ ود الخلا المعروف لنا وليس علي نص
      المداخله الاخيرة .

  27. يحكي في جديد الزمان إنو في حلة كبيرة وفيها سهريج كبييير
    وصادف إنو المسئول من الحلة (العمدة يعني) إنو ساكن جنب السهريج . (أصلو القرعة بتاعت درجة أولي بتعرف تجي لي منو )
    المهم … المسئول بيشرب من السهريج زيو وزي الناس . لامن جابو ليهو ولد .
    قوم يا الولد أعمل ليك مزرعة جوة البيت بحجة الإكتفاء الذاتي وزرع فيها الطماطم والذي منو
    الموية الجاياهم من السهريج ما بتكفي . قوم قد السهريج وخليهو يدفق في المزرعة . السهريج الحمد لله ملااان وبيكفي الحلة 20 سنة.
    المسئول شايف الموية كاسرة لكن ما بيقدر يقول حاجة
    يكسف ولدو ؟ ما مكن
    فلان صاحب المصانع البيجي يتغدي معاهم ويجيب ليهم شوية عطاءات لما يجي ما يلقي طماطم ؟ ماممكن
    عربية المدام البيتتوسخ كل يوم من مشوار أب روف تقعد من غير غسيل والمرة تزعل ؟ مااااامكن
    الجنايني الجايبنو بي عقد خاص وسري يوقف الفيلا البيبني فيها ؟ مااامكن

    لما السهريج خلاااص فضل فيهو “كوزين” موية ، والناس إشتكت قام المسئول عمل خطاب جماهيري
    – نحنا خلاص عرفنا الحل
    حا نسد الخرم الفي السهريج
    طيب يا حضرة المسئول ، السهريج ده البيملاهو شنو تاني ؟ موش صاحبك فلان إشتري البير وعمل ليهو خصخصة وباعو لي شركة بتاعت شعير من غير كحول ؟
    قروش ولدك وقروش مصنع الشعير وقروش المواسير ودهب المدام وقروش الجنايني وعماراتو وشقق بناتك البرة السودان و و و و
    دي موش كووولها جات من موية السهريج ؟ يعني حقت الشعب !
    غايتو الأكلتو في بطنكم دي من محمر ومشمر عفيناهو ليكم ، الحاجات العينية والمادية العندكم دي أظن ترجعوها أحسن

    ولا نقول قضاء وقدر ونقعد نرجي المطرة ؟

    قبل شوية قريت في الجريدة أنو في مؤذن بياخد 35 جنيه في الشهر ماهية . ومكتب الدعوة بيشيل منوو 10 جنيه تجديد بطاقة سنوي !
    ده يا حضرة المسئول عايزين نوديهو كورس في دولة إستهباليا عشان يعرف يتصرف
    بما إنو قاعد الخمس صلوات في الجامع وما بيقدر يشتغل في حتة تانية
    – ممكن يشوف الصلاة من ناس الأوقاف بالجملة بتجي للجوامع بي كم ويعمل فيها سمسرة . أو يعمل إعادة تعبئة . الصلاة من الوزارة بتجي ركعات زنة 50 كيلو يقوم يفرتقها يبيعها للزاوية الجنبهم الضهر بي 35 والعشا بي 50
    – يتفق مع المرتاحين من ناس الفريق وياخد منهم تسهايل عشان يأخر ليهم الصبح لحدي الساعة تمانية.
    – يعمل بزنس خاص ، الأذان في أضان المولود بي 100 جنيه
    – يدخل شوية إعلانات في الأذان علي وزن : …. مع تحيات عبدو السباك .
    – مع صلاة الجمعة يبيع كتاب إجباري لتعليم غسل الجنابة ومعاهو طفاية حريق
    – يجيب أولادو ويلبسهم أحمر ويعملو سيرفس لي ناس العقد ، ومرتو تعمل الفيشار والبلح بي جوز الهند
    – يزرع حاجات غالية (…) في حوش الجامع ويبيعها وبعدين يبلغ الشرطة 🙂
    – عمل جنازير بي طبل لي شباشب المصلين ويأجرها
    – يأجر المئذنة لي ناس زين

    1. الله على الظالم | رد

      محتار وحيرتنا معاك وخصوصا (قبل شوية قريت في الجريدة أنو في مؤذن بياخد 35 جنيه في الشهر ماهية . ومكتب الدعوة بيشيل منوو 10 جنيه تجديد بطاقة سنوي !
      ده يا حضرة المسئول عايزين نوديهو كورس في دولة إستهباليا عشان يعرف يتصرف
      بما إنو قاعد الخمس صلوات في الجامع وما بيقدر يشتغل في حتة تانية
      – ممكن يشوف الصلاة من ناس الأوقاف بالجملة بتجي للجوامع بي كم ويعمل فيها سمسرة . أو يعمل إعادة تعبئة . الصلاة من الوزارة بتجي ركعات زنة 50 كيلو يقوم يفرتقها يبيعها للزاوية الجنبهم الضهر بي 35 والعشا بي 50).
      تسلم

  28. سلام ياقبيلة،،
    حبيايبنا.. وقرايبنا… بتلومونااااااااااا..
    واحكموا فينا بالديرنو وده قدر وأنكتب لينا…
    أحيييك ياسديقي سهيلا، وكل الأخوة اللفهموني صاح واللحبوني غلت، ونحن ما وانتو ما مشينا بعييد ولا أفترقنا، وأن شاء الله ربنا يلمنا ويجمعنا علي الحق يا بروف سهيهل!!!!

  29. سيد البلد ” جنوبي ” .. لك كل الود و التحايا ..
    الرد عادة ما يكون علي النصوص الواضحه حيال مداخلات بعينها للنقد او السخريه او المداعبه .. لكن ان يكون الرد على المبديء .. دي والل ما ادونا ليها … و منكم نستفيد يافرده

    1. سهيل سهيل ، رفعت رايات جنونى فى السما ، وكبرت ليهو راسو ، يقوم يطلع فيها و يعمل ليهو قمر اربعطاشر براهو …………….عجبى

      1. كوكو .. ازيّك , كيف , تمام ؟
        انت الزول ده قعد يشكرني ولا قعد يستهزأ بي ؟ وحاة الله ما فهمتو !! عليك النبي اشرح ليا عشان راسي ده يقدر ياخد ردت فعلو !! يصغر ولا يكبر ….

  30. معليش للخبطه يابروف

    منقول .. اعترف وزير النقل أحمد بابكر نهار بعجزه عن إدارة وزارته والإدارات التابعة لها، وفيما طالب برلماني بإعلان شهادة وفاة الوزارة لعجزها، تساءل برلمانيون عن أموال بيع البواخر السودانية، ووصف برلمانيون ملف خط بيع هيثرو بـ «حجوة أم ضبيبينة».
    وفي غضون ذلك فتح البرلمان التحقيق حول استلام شركات للطرق أموالاً قبل الانتهاء من عملها بطريق الإنقاذ الغربي، متهماً شركة شريان الشمال تحديداً بذلك، وشكا منها نهار بقوله: «إذا تركنا العمل في الطريق للشركة فلن ينتهي قبل 90 عاماً»، وفيما هاجم رئيس البرلمان أحمد إبراهيم الطاهر الوزير لاعترافه بعجزه عن إدارة وزارته وقال له: «لا يكفي أن تشكو من مشكلات بوزارتك، وعليك حلها ولو بالقانون أو باللجوء لرئاسة الجمهورية».
    وقال نهار أمام البرلمان أثناء النقاش حول تقرير برلماني عن وزارته أمس، إنه ورث وزارة مليئة بالمشكلات، وأشار إلى أن أموال بيع البواخر السودانية ذهبت للمالية.وكشف عن عدم وجود مجلس إدارة بشركة سودانير، مشيراً لرفض مدير الشركة العمل. وشدد تقرير برلماني تلاه رئيس لجنة النقل أوشيك محمد، على ضرورة الاتجاه لشراء الطائرات من الشرق، ومراجعة عقود شركات الطرق، وتكوين لجنة برلمانية لمراجعة العمل في طريق الإنقاذ الغربي

    جابت ليها ضبيبينه يا عمك

    1. حاج أحمد السلاوى | رد

      يا سهيل بن سهيلة السهلى .. الوزارات دى شللية وكل وزارة عاوزة تكوش على كل شى وإن شاء الله باقى الوزرات تتحرق وما فى أى تنسيق بين وزارة التجارة والمالية والخارجية كأنما كل وزارة حكومة قائمة بذاتها وأقرب منثال لذلك الخلاف الذى حدث بين والى القضارف ووزارة المالية بغض النظر عن صحة موقف اى طرف ..وقرأنا فى الصحف المشادات التى حدثت بين هؤلاء المسئولين فى حكومة واحدة ..
      تقول لى قال ليك ؟؟؟؟؟؟؟؟؟؟

  31. جنوبي يا صديقا” بت أشكو قسوة الوجد إليه، صدقني وأحدثك صدقا” وعدلا” ما عهدنا في أصحاب القمردينة الأولي سخرية أو إستهزاء بعضهم ببعض، قد يسخرون من واقع مرير ، لكنهم حاشا لله أن يسخروا من بعضهم وأنت بعض من بعضهم يا صديقي!!
    وصيتي ليك دوما” يا جنوبي يا صديقي ولكل الأحباب ان يحسنوا الظن دوما” ما لم يتبين لهم غير ذلك، وعليهم دائما” أن يتبينوا وأن لا ينقادوا خلف الأوشاعة أو السراب،،،،

    1. ود الخلا ايها الصديق اللدود .. سلام من نمولي لي حلفا ولا اعترف بالحدود الجديدة ( زي ناس كده ) ..
      لأني احسن الظن دوما فطلبت مساعدة صديق , نزعل من منو وشان شنو !!

  32. يا ريسنا يا أفاق
    منو القال ليك شذاذ آفاق
    صبرنا سنين علي كذبك
    تعشّم فينا خير دفاق
    ونصبح كل يوم اسوأ
    حروب ودمار وضيق أرزاق
    بطانتك تعبد السرقة
    نهب دون رحمة دون إشفاق
    حدودنا تملي مغتصبة
    دفاعنا وزيرو ليك سواق
    برلمانا بيعشق الصفقة
    ودار فلاح تكوس صفاق
    ياخي اتذكر المولي
    ويوم يبدأ الحساب الشاق
    ولم وسخك من الشارع
    بلا مجاهدين بلا عولاق
    شذاذ آفاق شذاذ آفاق
    بس لا خان ولا سراق
    شعب بعيش من الركشه
    شعب بعيش من الدرداق
    بس لا عاق ولا سراق

  33. العزيز جبرا
    سديقي ود الخلا

    اصبحنا قراء فقط للمدونة ونستمتع جدا بمداخلات ابطال المدونة
    ما اعادنا للكتابة هو اتفاق الاراء بينكم جعله الله دائما
    مع تحياتى للجميع
    وو عجبى!!!! والنشوف اخرتا شنو!!!! و وووو كع

    1. سلام ياقبيلة،،
      سديقي أبو مازن، أين أنت يا رجل وليك مدة.. جفيت ما بنت.. وأبيت مالنت.. ما تبين يا إنت!!
      تعرف يا صديقي زي ما بيقول المثل إختلاف الرأي لا يفسد للود قضية ونحن البينا عامرة، بس نقصنا عدد من المحاربين الأشداء الأشاوس الذين كانت تحلو بهم القمردينة ويزيدونها ألقا” وإشراقا”، ولكنها الأقدار أبت إلا أن تشتتهم أيدي سبأ، ونتمني أن يكونوا قراب مننا وسامعننا بنسأل عنهم زي ما بيقول حاج أحمد سلولو..

  34. أوطاننا قيامة

    لا تحتوي غير سقر

    والمرء فيها مذنب

    وذنبه لا يغتفر

    إذا أحس أو شعر

    يشنقه الوالي.. قضاء وقدر

    إذا نظر

    تدهسه سيارة القصر.. قضاء وقدر

    إذا شكا

    يوضع في شرابه سم

    .. قضاء وقدر

    لا درب.. كلا لا وزر

    ليس من الموت مفر

    يا ربنا

    لا تلم الميت في أوطاننا إذا انتحر

    فكل شيء عندنا مؤمّمٌ

    حتى القضاء والقدر!

  35. مؤمن بقدر الله | رد

    ومن قدر الله إنه سلط علينا ما لايخافه فينا ولا يرحمنا

  36. يا ريسنا يا أفاق
    منو القال ليك شذاذ آفاق
    صبرنا سنين علي كذبك
    تعشّم فينا خير دفاق
    ونصبح كل يوم اسوأ
    حروب ودمار وضيق أرزاق
    بطانتك تعبد السرقة
    نهب دون رحمة دون إشفاق
    حدودنا تملي مغتصبة
    دفاعنا وزيرو ليك سواق
    برلمانا بيعشق الصفقة
    ودار فلاح تكوس صفاق
    ياخي اتذكر المولي
    ويوم يبدأ الحساب الشاق
    ولم وسخك من الشارع
    بلا مجاهدين بلا عولاق
    شذاذ آفاق شذاذ آفاق
    بس لا خان ولا سراق
    شعب بعيش من الركشه
    شعب بعيش من الدرداق
    بس لا عاق ولا سراق

  37. الاحبه الدانقوست كما يحلو لنيام ان يسمينا :
    تعرفو مشكلة قضاء وقدر ومشكلة العوده للدين دى بتذكرنى برفع المصاحف على اسنة الرماح وتحكيم عمرو
    يعنى الحكومه اتفقت معانا نحن نقعد كلنا فى الواطه ونرجع لله
    انحنا استجبنا ورجعنا لله
    جا مندوب الحكومه فى التحكيم قال :
    اما انتم فقد رجعتم لله واما انا فاعيد حكومتى هذه كما اعيد هذا الخاتم فى اصبعى الى الدنيا !!!!

  38. هيثرو دا منو ؟ والخط بتاعو علاقتو بينا شنو ؟ والخط ذاتو عربي ولا انجليزي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: