الإستعجال ليه؟

سأل سيدنا عمر بن الخطاب «رضي الله عنه» واليه على البحرين «أبوهريرة رضي الله عنه» من أين لك هذا؟ وكان أبوهريرة قد اجتمعت له عشرة آلاف درهم (يعني لقطا لقيط) .. فقال: خيل لي تناسلت (يعني ما شركات ولا مزارع ولا مصانع) ، أجاب عمر«رضي الله عنه» خيل لك؟؟ تأتي المرعى فيقال: خيل الأمير دعوها ترعى وتأتي المورد فيقال: خيل الأمير دعوها تشرب فتسمن خيلك على حساب خيول المسلمين.. (وهنا صدر القرار الرئاسي الفوري) : القِ المال في بيت المال.
. لم تكن هناك طريقة أفضل مما سبق لحماية حقوق الناس مع أن أباهريرة هو من هو في التقوى وخوف الله عز وجل وعمر «رضي الله عنه» يعلم ذلك ولكنه أراد أن يُرسي قواعد محاسبة المسئولين وقد عُرف عنه«رضي الله عنه» شدته في محاسبة ولاته حتى لايتطرق الفساد إليهم وبالتالي للمجتمع.
لم يأمر (نائب عام الدولة الإسلامية) بحظر النشر في قضية (والي البحرين) ولم يشكل البرلمان تحت ضغط (الصحافة) لجنة لتمكث شهوراً من أجل التحري والتقصي (والشنو ما عارف) حتي (تطول المدة) وينسى الناس الموضوع حتي إذا (نكشت) أحدى صحف (عكاظ) الموضوع تاااني وتململ الناس في شعاب مكة وأطراف الحجاز وتساءلوا عن تأخير (لجنة التقصي البرلمانية) وما هي توصياتها قام رئيس البرلمان بالتصريح قائلاً بأن ملف (والي البحرين) قد تم تحويله للنائب العام ليجلس جنباً إلى جنب مع ملف (خط هيثرو – يثرب) !
نعم يا عزيزي القارئ لقد صدر القرار فورياً عندما وجد الفاروق (رضي الله عنه) أن هنالك شبه (إستغلال للمنصب) ولم يكن المشتبه من ناس (قريعتي راحت) ولا (الكشا مشا) الذين كانوا من عوام الشعب قبل أن يتسنموا المناصب بل هو (ابا هريرة) الشخصية التي يعرفها كافة المسلمين ، ولم تكن قيمة الإشتباه فلل في (شاطئ النخيل) أو حسابات خارج (الجزيرة العربية) ولا عمارات في أطراف الحجاز أو ضواحى كافوري والمنشية ولا رهط من الجياد (اليابانية) ولا تمت سرقة (منزله) تسع من عملات الفرس والروم والحبش والتتار والهكسوس والليرة السورية بل كانت قيمة الإشتباه بضع ألوف من الدراهم جاءته من خيل له تناسلت (يعني ما كومشنات)!!
رغم بساطة الشبهة وتقوي وورع المشتبه به فقد كان القرار (فورياً) .. ولم يترك (الفاروق) الحبل علي الغارب حتي لهؤلاء الصحابة (الأخيار) ليأتي بعد (ربع قرن) من توليه الأمارة وبعد أن أصبح بيت مال المسلمين (على الحديدة) من فرط (النهب المصلح) و (اللغف المقنن) ويعلن الشروع الفوري في تطبيق قانون الثراء المشبوه “من أين لك هذا”؟
وعلى طريقة عادل إمام في (مدرسة المشاغبين) حينما طلبت منه المعلمة أن (يقيف حيلو) فأجابها متهكماً (بعد سبعطاشر سنة ثانوية عامة بتقولي أوقف) !! بعد 24 سنة البيه وزير العدل بيقول لينا ح نشرع في تطبيق قانون (الثراء الحرام) .. طيب ليه الإستعجال ؟

كسرة :
هسه زي الزول (المرتبو) مليار جنيه في السنة ده وضعو كيف؟ ده ثراء حرام وللا حلال وللا نص نص ؟ والله خليتونا ما نعرف الحلال من الحرام ذاااتو !!

كسرة ثابتة :
أخبار ملف خط هيثرو العند النائب العام شنو(ووو و ووو)؟

Advertisements

41 تعليق

  1. برنجيييييه

    1. مبرووووووكة البرنجية يا طارق …… ودايمااااا

      1. الاخ المندهش،

        شكرًا ويباركوا ليك السمح

      2. اخي طارق … بعد قلت شرحوها ليك …خلاص فقدنا تاني فيها العشم …. بس ما تكتر منها … عشان الإدمان وكده

      3. اخي المندهش،
        حسه الطب أتطور وبقي يدو لصقات و لبان وحاجات كتيره للادمان،،

        بس. ااخ السبت والأحد وكذا يوم مسافر بره ،،،، وحسب الظروف

    2. حبيبنا طارق شنو الحكاية إنت مانمت ولا شنو !!!
      يا أخوي أسأل مجرب البرنجية دي ما ( بتتحارس ) زي الدنيا مادوامة وفي ناس بيجيبوها بالتلفونات ( وأسمعي وإياك أعني يا جارة ….!!!)
      عولمة وكومشنات وكده !!!

      1. حبيبنا،،،
        والله بس رزق من الله ،،،ما قلنا ليكم فروق الوكت،،،، الفرق ساعتين وكده،،،، يعني اعملوا حسابكم بعد الشرح
        أصلو أنا كنت ما فأهمها ولكن بعد الشرح ما ح تشربوها كتير

    3. اخونا ود العبيد شايفك سرحت فى موضوع البرنجية دى,, بالهناء يا سيدى, بس زى ما قاليك المندهش خلى بالك من الادمان (خاستن) و نحنا داخلين على رمضان…

      1. طارق…سلام..
        عاد شلتها ضراع بس !! مبروكة ياخوى…

        الفاتح…سلام….
        امممممممم,,الجارة جاااااتك ! ما تشككوا فى نزاهتنا يا جماعة..

    4. مبروك البرنجيه ..
      قف : ما تكنكش عشان ما نكشكش ..

  2. حاج أحمد السلاوى | رد

    البروف الفاتح .. حمدن لله على السلامة ..
    إستفتِ قلبك ..وتوكل على الله .. فقد إختلط الحابل والنابل ..

  3. هسه زي الزول العندو اربع نسوان ومرتبو خمسيه جنيه ،، دي بتجي كيف وهل ممكن

  4. البروف والسّمار … سلام
    أتاري نحنا ما كنا مطبقين قانون الثراء الحرااااام ، في الحالة بنعتذر لجميع المسئولين أشد الإعتذار لإتهامهم بأنهم حرامية ومختلسين و معفنين ونحنا طلع ما عندنا أصلاً قانون لتجريمهم ….. للمرة الثانية أكرر إعتذاري أصالة عن نفسي ونيابة عن كل أفراد الشعب السوداني وذلك لأننا كنا داقسين وقايلين البلد فيها قانون أتاااريها …
    كسرة
    صراحة أنا ما عارف ليييه سيبدأ تطبيق القانون إعتباراً من يوم الخميس ….. ولماذا الخميس بالذات !!!!

  5. ابدااااااااااااااااااااااااااااااااع

  6. البروف سيد الإسم
    والسمار حبايبي الحلوين
    إنتو ما ملاحظين مافي تاريخ لى الخميس يعني الدغمسة من هنا بادية ، مفروض يقولو من يوم الخميس الموافق كذا من عام كذا !! ولا أنا غلطان ؟!
    وبعدين يا مندهش إعتذارك ما بيفيدك ودموعك ما بتعيدك لي 24 سنة لي ورا ولا حاجة أصلو السودان بقي بعيد عنك والله يكرم السامعين والقارئين ( زي الحمار المكادي حاااااااااااااااااااااااااااااااااااارن )

  7. البرووف والسمار .
    سلامات .
    القانون دة حايطبقوة من يوم باكر الخميس لكن ما بأثر رحعى يعنى الغنيان قبال الخميس ما حايسألوة لأنو حايبدو يحصرو فى الغنيانين من يوم بكرة ولو زادو واحد بس بعد يوم بكرة دة بيكون حرامى وعفى الله عن ما سلف .
    الله فى

    1. حنين …… سلام
      يعني عندك لسه وكت كتيييييييير 12 ساعة … بسرعة نشوف لينا كوميشن ولا قرض غير قابل للسداد و لا إختلاسه …. يعني زي ما تقول خم رماد

  8. سلامات ..

    الخميس ؟؟؟ دي يا فرد مش ياها ذااااتها ” غداة غد بتاعت ود الخلا “؟؟؟؟

    يا حنين : اعمل حسابك عشان ما تلحق انات (طه) السمين داك

  9. الاخ جبرا وباقي العقد الفريد سلامات
    والله ياجماعه موضوع العدل دا بقى درجه من الرفاهيه نحن دايرين اولا يعترفوا انو نحن بشر

  10. يا بت وراق .. شنو ليك .. نحن نان شنو ؟؟؟

    1. انتو شذاذ آفاق … وللا نسيتو ؟؟؟

  11. المر الما بتبلع | رد

    غايتو جنس غايتو

  12. البروف الحبيب
    ما ممكن كل يوم تفتح الصالون وتدخل الناس وتروح تجيب ليهم موية وحاجة باردة وتكب منهم الزوغة …. إتاوق بس مممم
    السمار الحلوين
    شاحد الله عليكم كل ما تفتحوا التليفزيون ، القناة الأم أو القنوات الرديفة ، تلقوا أمين حسن عمر بيتكلم عشان تعرفوا إن الصبر قااااسي والمحبة قدر

    1. شفتو يا المندهش .. بقي زي هناي ينضم ويضحك بلا سبب .

      1. ههههههههههههههههههههههه,,,بقى مدهش جدا !!!

  13. حليل عمر البيسأل وحليل أبو هريرة البطيع !!
    عمر حقنا مره قال لاحد ولاته تعال , قال ليهو ما جاي
    وكان دايرني تعال إنت .
    ووالي تاني غير الوالي الاولاني جاء لي عمر حقنا وقال
    ليهو انا داير 25 من الخيل الحرة المسرجه , عمر قال
    ليهو امشي لي خارب مال الدولة , ولمن مشي ليهو خارب
    المال قال ليه ابيييت اجيب ليك من وين انا , قام
    الوالي ادي خارب بيت المال بونيه ورمي صك الولاية
    ومشي ..
    ووالي تالت غير الوالي الاولاني والتاني عمر قال ليهو
    لا تأخذ الجبايات من العامة , قام قال لي عمر ده
    موضوع يخصنا وما عندك دخل فيهو .
    يا يابا عمر حقنا هويييييين حليل العمر البنهر
    ويهز وحليل عمر الكان بكجن الرقيص والغُنا ..

    طالما المليار اجر وليست ارباح تجارة فمن اخذ الاجر
    حاسبه الله بالعمل ومستحيل الزول ده بيشتغل قدر 185
    موظف دولة بياخدوا 450 الف في الشهر .
    اريت عمراً يعذّب بلدو طاير يسوقني الشوق ..

    1. صعب صعب يا على…..

  14. مشاركة اولى
    استاذ الفاتح.
    و يتواصل مسلسل اللعب على القنابير, فبعدما صرح النايب الاول قدام البرلمان وحلف بالتقطعو انو مرتبو 10 مليون بس وما ورانا بصرف منو كم : ظهر علينا والي الخرطوم و قال انو مرتبو 7 مليون ج و شوية حرابيش(التعبير للوالي). ي جماعة ارحمونا من التصريحات المستفزة دي و حاولو احترمو ما تبقى من عقلنا الراح مع عمايل الحكومة دي. 7 مليون بس؟ دي بتكفي شنو؟ حق الايجار ولا حق البنزين البقى غالي دة! ارحمونا!

    1. حاج أحمد السلاوى | رد

      الممكون وصابر ..وعند الله جزاك ..
      البشوف ماهية غيرو .. تمسخ عليهو ماهيتو ..
      وخليها عالله ..دا اسمو ذر الرماد على العيون .. المبالغ الأفصحو عتها دى هى الراتب الأساسى بس لاكين ما جابو سيرة للحوافز الرسمية والغير رسمية ولا للجان الفرعية المشاركين فيها .و,,,,,,, و……..
      ما تفكروا كتير فى الموضوع دا عشان المغسة ما تكتلكم .. الفى إيدو القلم ما بيكتب روحو شقى ..
      كلامى صاح ..ولا فى محلو ..؟؟؟؟؟
      وخلونا النشوف آخرتا شنو … !!!

  15. ماحيرتونااااااااااااااا ……. وكدة

  16. يا اخوانا سلام
    خلاص الشعب قال كلمتو ومرق الشارع يلا كلنا فت مرقة وما بنرجع ولا بنتراجع لامن نجيب خبرم بعدين
    حكاية من اين لك هذا نطبقا فيهم زي الترتيب
    — بعدين رئيس البرلمان دا عندو ولدو (محمد) عندو اكتر من اربعة شاحنات جياد(Hino) قبل 5 سنوات ما عارف هسع
    بقن كم وعمرو لا يتعدي ال30سنة . سالت الزول العرفني بيهو قلت ليهو الولد دا لقي الحاجات دي من وين قال شالها
    من جياد وكتب شيكات بضمانة ابوهو….طيب انا مواطن وداير لي عشر عربات فت مرة وابوي ما بعرف الشيك دا
    ذاتو شنو اها بدوني ولا لا………..بضمانة البشير مش هو قال رئيسنا وامير المرمنين

  17. والله حقنا دا نطلعو من ……………………………… والحاضر يكلم الغائب
    الشارع الشارع ولا بديل للشارع الا الشارع
    بالمناسبة التعليق الفوق دا موثق مع السيد/ محمد احمد ابراهيم الطاهر ولد رئيس البر الما امان
    تقول لي مكافحة فساد في زول بكافح نفسو………… دي قربة مقدووووووووووووووووووووووووووودة

  18. ياجبرا ماتشوف لينا موضوع الحج دة والزيادة فى تكاليفة أسبابة ومبرراتا ولأنى قريت عن أحد المسؤولين بيقول نحن زدنا تكلفة الحج عشان الحجاج المتمتعين وعليهم هدى (زبح ) مابيكونو مستطيعين وجاهزين يدفعو تكاليف الهدىعشان كدى نحن ضمناها رسوم الحج .

    1. حنين .. بالله المسئول قال كده !!! طيب الما مستطيع للهدي ده ما يحج مفرد .
      هو زاتو ده بقوهو مسئول كيف الما بعرف انواع الحج ده .
      تعرف يا حنين قدر ما ضربنا ال 14 مليون دي لقينا الحكومة ربحانه في الحاج قريب 7 مليون .

  19. البروف والسمار الافاضل
    اسمحوا لى بان اقول بان الشعب السودانى كلوا (فارات وداقسين) آآآآآآآآآآآآآي لماذا؟؟؟؟؟!!!!
    لانو القانون تم تفعيله فى هذا الوقت بالضبط بعد ما كل الجماعة قاموا بتظبيط امورهم المالية وتحويل الامور التحت تحت لجوكية النظام (الاخ جنوبى لتعريف كلمة جوكى)
    وكل الذين قاموا بتظيط امورهم قد قام باعلان مرتباتهم على الملا
    واتحداكم بان النائم العام سيعلن بانه قد قام بسؤال كل المسئولين (من اين لك هذا)
    مع العلم بان ال!!!!(هـــــــــذا) غير موجوده اساسا
    ولا رايكم شنو
    مع تحياتى للجميع

    1. يعنى بالعربى اى مسئول الان (من اللى بالي بالك)
      لا يملك مزرعة ولا يملك منزل ولا يملك ارصدة بالبنوك ولا يملك عملات بمنزله ولا يملك من حطام هذه الدنيا سوى مرتبه (والذى سيعلن تباعا من المسؤلين)
      برضو !!!!!!!!ولا رائكم شنننننننننننننننننننو

    2. ابو مازن .. سلام .. البشير ده زااااتو مش الترابي جابو جوكي !!؟
      انا حاسي الزول الاسمو مدحت داك ح يشيلوهو حاجات كتييييرة من باب تظبيط امورهم دي وحتي خط هيثرو ذاتو …
      بمناسبة مرتباتهم دي , معقولة نائب محافظ بنك السودان راتبه اكتر من نائب رئيس الجمهورية !!! الخضر يا ( حرباشه ) اتاريك دفعه ونحنا ما عارفين ..

  20. يحكى ان احد المواطنين الصالحين قد لفت انتباه الناس وهو يهتف فى احد لقاءات الرئيس :
    عاش البشير موحد الاديان – عاش البشير الارجل من عمر بن الخطاب .
    فاعجب الرئيس القائد ايما اعجاب برغم الاستغراب للمبالغه فى المدح وارسل فى طلب الرجل لمبنى الرئاسة ودار الحوار التالى بينه وبين الرجل الحلفاوى كما نقلت الانباء :
    الريس : يا عمنا انا عارف انك والشعب السودانى كلو بتحبونى شديد لكن ما بالغت شويه فى الهتاف ده ؟؟؟
    المواطن : ابدا يا ريس واله تانى انا بقول ليك انت موحد الاديان وارجل من عمر وعلى مسئوليتى يا ريس ده والله اقل من حقك .
    الريس : طيب كدى بس لو سمحت فسر لى كيف يعنى الكلام ده .. معليش عشان نفهم يعنى وكده .
    المواطن : طيب يا ريس بالنسبه لموحد الاديان انت حاكم ليك كم وعشرين سنه فى الزمن ده المسلم خلى دينو والمسيحى خلى دينو واللادينى خلى دينو وبقى كلهم ما عندهم دين وحدتهم ولا لا ؟؟؟
    الريس بضحك : ايوا طيب دى عرفناها طيب ارجل من عمر بن الخطاب كيف يعنى .
    المواطن : سيدنا عمر يا ريس ما كان بيخاف من اى راجل فى الدنيا دى وانت برضو يا ريس .
    الريس : هيع .. طيب كده انا ما زيو ارجل منو كييييف ؟؟
    المواطن : لالا ارجل منو طبعا لانو عمر كان بيخاف من الله يا ريس !!!!!

    1. افليقا .. سلام .. ياربي لمن قال ليهو كده , عمر حقنا يكون افتخر ولا انقهر !!
      امانه دينا ما كان سمح قبل يطلعو لينا ..

  21. ياهو ده اللقيناه من العرب بلا نباريهم في كل شئ , حتي الحاجات العلمناها ليهم جاتنا صاده وكأنو ما سويناها قبل ده !!
    جمعة لحس الكوع جمعة شذاذ افاق جمعة شنو وجمعة شنو لحدي ما يجي يوم ونلقي الجمعة ما تامه النصاب ونصليها ظهر !!
    اكتوبر ما حضرناها لاكين ابريل فينا الكان بيرجع بيتو نص الليل ويقوم من الصباح يدفر وفينا القعدوا ستة يوم ما رجعوا بيوتهم !!
    مطلوب عمال يومية لهدم النظام !! وقالوا البتبلبل يعوم .

  22. ممكن تأجرونى !!؟
    اصلى من يومى مأجور وعميل !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: