بدري عليها

كثير من الناس يعتقدون بأن (الإنقاذ) قد مكثت في دست الحكم ردحاً طويلاً من الزمان وإنو (الكلام ده كتير) ويجب أن تفسح المجال لغيرها (عل وعسى) لكن العبد لله (عندو راى تانى) فالإنقاذ (لسه بدرى عليها) إذ أن الفترة التي قضتها وهي تحكم ويتنقل أفرادها (من منصب لي منصب براااهم) حتى هذه السطورهى فقط 23 سنة وسبعة يوم :
أي ما يعادل :
• 1201 أسبوعا
• 8408 يوما
• 201،792 ساعة
• 12،107،520 دقيقة
• 726،451،200 ثانية
أى أنه ومنذ أن جاءت الإنقاذ (30 يونيو 1989م) فإن المواطن (الما مات لحدت هسه) :
يكون قد دق قلبه (خلال الإنقاذ) حوالى 968،601،600 دقة (بس) علماً بأن متوسط دقات قلب (المواطن) هي 80 دقة في الدقيقة
وإذا عرفنا أن (المواطن) يشرب في المتوسط عدد 3 لتر ماء في اليوم (لو الموية ما قاطعة) فيكون المواطن قد شرب (خلال هذه الفترة لمن روى) حوالى 25،224 لتراً من الماء بس
وإذا علمنا بأن (المواطن) يتنفس في المتوسط حوالي 15 مرة في الدقيقة فإنه يكون قد تنفس خلال (الإنقاذ) حوالى 181،612،800 مرة !
ولك أن تعلم يا عزيزي أنه إذا ترك (المواطن) أظافره ولم يقم بقصها خلال هذه الفترة فإن طولها كان سوف يصبح حوالي 35 بوصة إذ أن الأظافر تطول بمعدل بوصة ونص سنوياً !
واذا علمنا بأن متوسط إفراز (المواطن) للعرق يوميا يتراوح بين نصف لتر ولتر ونصف فإن المواطن يكون قد أفرز خلال هذه (الحقبة) حوالي 8500 لتر عرق !
أما ما نامه (المواطن) خلال هذه (الفترة) فهو حوالى 67،264 ساعة (النايم ليها شنو)؟
في هذه (الحقبة المذكورة) حكم أمريكا أربعة رؤساء هم خلال6 فترات رئاسية :
جورج بوش 1989 ـ 1993
بيل كلينتون 1993 ـ 2001
جورج بوش الابن 2001-2009
باراك اوباما 2009 – حتى الآن

كما تعاقب على منصب رئيس الوزراء فى بريطانيا أربعة أشخاص خلال6 حملات إنتخابية :
– جون ميجور
– توني بلير
– جوردون براون
– ديفيد كاميرون

كما تم خلال هذه الحقبة تنظيم (6) كاسات عالم !!

1990 إيطاليا
1994 أمريكا
1998 فرنسا
2002 كوريا الجنوبية واليابان
2006 ألمانيا
2010 جنوب أفريقيا

كسرة :
يا جماعة الخير أدو الناس دي فرصة وكده !!

كسرة ثابتة :
أخبار ملف خط هيثرو العند النائب العام شنو(ووو و ووو)؟

Advertisements

86 تعليق

  1. طارق بابكر عبيد | رد

    برنجييييييييه

    1. طارق يا اخي ما بالغت لكن …. مبروكه عليك البرنجية

      1. طارق بابكر عبيد

        الاخ. المندهش،
        شكرًا ووالله أنا ذاتي اندهشتا. وكمان. بالغتا

    2. اها يا طارق هسي موضوع الليلة ده ما عن الكنكشه !! مااااااابروك ..

      1. طارق بابكر عبيد

        الاخ جنوبي
        وطبعا الكنكشه. دي. جات. بعد. الشرح
        وزي ما قلت ليك الموضوع فروق الوكت ويعني في رمضان البرنجيه ح تكون مع السحور وكده

      2. كنكاش عبيد…
        مبروك ياخوى وصباحك سكر…
        عليك الله استهدى بالله شوية !

    3. يا ود العبيد ما قلنا ليك الكنكشة الشديييدة دى بتؤدى للادمان, و دة ما كويس عشان رمضان عالابواب و كدة,,, شوية شوية و قرصة قرصة و سنة سنة خلاس وصلنا !!!

      1. طارق بابكر عبيد

        يا اخونا فلاديمير ،
        والله العظيم ما كنكش فيها ولكن تقول شنو ، صدفه وبس ما أبدا بقرايه الموضوع القي البرنجيه قاعده. منتظراني،،، وأكون امين معاك فروق الوكت. هو العامل فرق،،، وعلي مستمعينا في السودان مراعات فروق الوكت،، اما في رمضان الواحد الظاهر ح. يتسحر مع البرنجيه،،،،تحياتي وكل عام وانتم بخير ورمضان كريم وربنا يكثر الخير في الشهر العظيم وربنا يلطف بعباده قول ااميين

  2. صباح الخير…ناس البرنجية لسه نايمين ولا شنو؟؟؟؟؟

    1. و الله يا ام ايمان ناس البرنجية ما نايمين,, بس فى ناس زى ود العبيد ما قاعدين ينوموا خالص ,, غايتو جنس كنكشة

  3. بدرى عليك وعلى وداعك
    يا المغرى وفاتن إبداعك
    جاثم ومازال عندي شعاعك

  4. اتاري ناس امريكا وبريطانيا ديل بيعادوا رؤسانا غيرة ساااااااكت !!

    1. ينصر دينك ياجنوبي

    2. (طبعن) – وين ليهم من العشرينات و التلاتينات و الاربعينات سنة دى – لو صبروا علينا شوية بنوصلهم الخمسينات و الستينات كمان !!!

  5. سلام ياقبيلة،،،
    لكن يا بروف جبرا ما بالغت عدييل كدا، والظاهر عليك إنك نسيت تذكرنا بما سرقه النظام خلال هذه الفترة بالأرقام وما سرقه الشعب خلال نفس الفترة بالحروف، وهل خلال هذه الفترة كان الشعب نايم أم منوّم يا صديقي؟؟؟
    الظاهر عليك إنو معينك نضب وبقيت (تلجق) ساي وبقي ما عندك موضوع، مع إنو المواضيع التي تحتاج للطرق وبشدة كثيرة، وليس بآخرها ما نشاهده هذه الأيام من سيناريوهات الكر والفر بين أجدادنا القدماء!!!!
    صديقي جبرا ما هو قادم أسوأ مما يتصوره عقل أو يتطوف به خيال، وعليك بتبصير الناس بما يحاك ضدهم ، ولا تلهيهم بمثل هذه الأحاجي أو الفوازير كما يقول إخوتنا اللي علي شمالنا يا صديق، وقبل أن يقع الفأس علي الرأس بصرهم ونورهم فأنت أدري مني ومنهم بما هو خلف الأفق، ولات ساعة مندم ياصديقي العزيز!!َ!!!!!

    1. السديق ود الخلا
      بالغت في هجومك غير المبرر على البروف … وهل في هذا الزمن الاغبر غير البروف من صرخ وهتف وهاج وماج في اموال الشعب المسروقة وتحمل في سبيل ذلك ما تحمل من ظلم الاقربين والاغربين ولعلك تذكر موضوع مدرسة الجريف وكيف اتهم البروف بانه صدق فاسق جاءه بنبأ وغير ذلك كثير وكثير … ولماذا يكون ذلك دور البروف فقط ونحن نتخفي خلف الكيبورد ونحمس الطار وهورجل مريض وانت تعلم ذلك فهل تريد منه ان يكون دون كيشوت يحارب طواحين الهواء ودونه اسرة وعيال … ولكن ساعة وساعة .
      وعلى ما اعتقد ان دور البروف ينتهي بالقاء الحجر في هذه البرك الآسنة ونحن من ينبغي ان يقود الدوائر في باقي الاتجاهات ونوجهها حيث نريد … وكلنا نريد بناء الهرم ولكن الاختلاف هو في من اين نبدأ .
      اما عن المعين الذي نضب والجليق وما الي ذلك فكل يري من مواضيع البروف ما يحب ان يراه واحيانا لا يعجبني ما يكتبه الربوف ولكن من الذي يستطيع ان يرضينا جميعا ؟؟؟
      واخيرا اذا كان البروف كما تري يلهينا بالفوازير والاحاجي فها انت تخوفنا بالغول وود ام بعلو وكل الاساطير .

      1. سلام ياصديقي العزيز خالد بن مدني غريب الديار والأوطان،،
        عُدت بي يا صديقي العزيز لأيام خلت ودهر تولي ليته ياصديقي يعود!!
        أوافقك في كثير مما ذهبت إليه، وأنت تعرف ما بيني وبينك وبين البروف وبين الآخرين دوت كوم من السمّار والرواد الأوائل، فما بيننا وثيق العري متين القوي لا تفصهم العاديات ولا تهده الأهوال ولا الشدائد، ولكنني رأيت ورأي خطأ قد يحتمل الصواب أن كتابات البروف لم تعد كتلك التي كانت، مثل بترول وعيشة، وعم صابر، ودكتورة منال…الخ وتلك الكتابات الزاهية تذكرني بعهد زاهي كنا فيه نتسامر ونتنادر ونبني ونهدم فلا نضج ولا نثور، فكل منا كان يعلم ما يقوله الآخر قبل أن ينطقه أو هكذا كان يخيل إليّ، وأردت من هجومي الخاطف هذا أن يصحصح البروف قليلا” وأن يعود لسابق العهد والآوان…
        هاتفني سديقي الباشمهندز سهيلا” عن نفس الموضوع وطلبت منه ان يكتب مايريد في القمردينة ولكنه آثر السلامة…
        أين الأستاذة بنت الشيخ وراق علك بخير عافية؟؟
        لك ياصديقي خالد كل الود والمحبة وللبروف العتبي ولكل الأحبة كل الأماني وصادق المُني.

      2. الحبيب ود الفلاه
        لو لم تكن انت انت لما رديت على تعليقك … وكما قلت فكلنا على قلب رجل واحد وقد خبر بعضنا البعض بما يكفي ويزيد .
        ويا حلو السكوت مرات كلام
        وعدم الملام هو كمان ملام
        يا سلام
        يا سلام عليييييييك
        يا سلااااااااام
        كسره :
        يا جنوبي التزمو بعدد الحروف في المقطع اعلاهو … يا ربي وين الزووووووول ابو سبعه واوات ؟؟؟

  6. فعلا بدري عليها والحكومة دي في جعبتا ( جعبتا حقت
    اللغة العربية الفصحي ) الكثير لسه ما شفناه !!
    القذافي : من غدا اخرجوا الي الشوارع غنوا وارقصوا
    وامرحوا ..
    الانقاذ : من اليوم اجلسوا امام النت جكسوا وسكسوا ..
    ” قامت سلطات الحجب بالهيئة القومية للاتصالات بإتاحة
    الوصول لمواقع الجنس في الانترنت التي كانت محجوبه في الماضي ”
    ( حريات )

    1. صديقي اللدود جنوبي،،،
      لو كان مافعلته الحكومة بإتاحتها للمواقع المحجوبة للناس صحيحا” حسب ما ذكره موقع حريات، ما كان ينبغي لحريات أن تنبه الناس لذلك، إذ أن هذا يندرج تحت حث الناس علي إشاعة الفاحشة، وكان الأحري علي حريات التي تدافع عن مقدرات الشعب وأخلاقه ومثله وقيمه المهدرة بواسطة هذه الحكومة ، أن لا تفعل ذلك لأنهم يدّعون ( وأعني بذلك حريات ومن شايعها من أقطاب المعارضة ) بأنهم الأحرص علي مصالح الناس ومعاشهم ، ولكنهم قوم يفتنون!!
      هذه الحكومة وبرغم سؤاتها البينة والواضحة للناس، إلا أنهم أحيانا” نجدهم أفضل من كثيرين من اجدادنا القدماء الذين ينادون بنزع الحجاب وإشاعة الفواحش بين الناس والعياذ بالله.

      1. صديقي ود الخلا .. سلام يحمل مناي يحمل محبه
        انا الحار في دواي حكماء واطباء
        يا روحي سلام عليك ..
        مااااااالك طواااااالي المرحوم غلتان ..
        بمناسبة نزع الحجاب قالوا اتحاد الكورة سمح للاعبات كرة
        القدم بتغطية الرأس !!! برضو من باب السترة وكده..

      2. جنوبى يا فاحش يا فاسق !!!
        اتذكرت النكتة بتاعت الزول التاب من الخمرة ولما الامام طلع المنبر يوم الجمعة ونعل الحكومة (سمحت بفتح بار فى ناصية الشارع),,زولك اتململ تب وبعد الخطبة جرى على البار : سلام يا خواجة,,والله ما عندنا خبر الا مولانا كلمنا فى الجمعة !
        غلتان الامام وحريات وانت…

      3. ههههههههههههه .. سب علينا نحنا ..
        شمباتي واحد من حلتنا اتصل علي وقال لي اباحية شنو
        البنقو بقي بي تراب القروش ومتوووووووفر ولااااا
        بمسكوهم !! عليك النبي مش ياها غنوا وارقصوا وامرحوا
        زااااتا ..اخلاءاً للمسئولية : البنقو حرام وضار بالصحة .

  7. بااااااااااالغت يجبره — نسيت اْنو الفترة دي فيها (كاااام صلاة ودعاء مظلوم) + وكااام جمعة ودعوات مظاليم — ولانسيت كاااام مولود (سيء الحظ) ولد فيها —– ولا نسيت (ككككاااااااااااااااام كضبة من مسئول قيلت فيها)— ولا نسيت كااااااااااااااام عملية اختلاس وتولي مناصب ومحسوبية — ولا كاام موظف محترم تم تشريده—-ولا كاااااااااام فيلا بنيت (بالحرام) ولاكااااااام بطن (شبعت بالحرام ) ولا كااااااام ساعة ضاعت من عمرنا ولا كااااااام فرصة لنهضة السودان ضاعت — ولا كااام مستثمر هرب —- ولا كاااام قرض مالي تم لحسو ولا كاااااااام ليتر من المحروقات (أهدر في الفسحة والجري وراء المصالح الشخصية) ولا كااااااااااااام من قروش البترول ودخول الحكومة (اتبلعت بدون جقمة موية)—-
    ياجبرا ياخوي كدي (كبّر دفتر حساباتك) وحات الله الناس ديل أختر من النار ذاتها كلما (لقفوا——— اذدادوا لقفا) —-
    الله كريم علينا وأخو (قدر من الله) ذي ماقال العالم الجليل والعالم النحرير والفهامة الكبير والاٍقتصادي القدير وأخو الأخوان — صاحب القول الأمان — وراجل (الثلاثة) نسوان — صاحب الطلعة البهية معالي وزير المالية

  8. كان بدرى عليك….
    حسب معرفتى البسييييييطة بالسياسة انو الناس ديل خلاص آيسوا من خيرا فيكم وقرروا الرحيل !!

    1. طارق بابكر عبيد | رد

      يا يس
      دي حكمه ولا اايه

      1. ولا طرفك من طبعو نعساااااان….
        اثرت فى شجونا كنت اكتمها عفا يا حبيب….

  9. إنت يا بروف قايل بسخريتك التي لا يفهمها البعض ..الواحد بس داير يتابع موضة الايام دي ..والتعليق في الشماعة .. وعبارات صاحب الثلاثة نسوان ..دا شنو يا( مروان ] ناقشوا بعقل ..وخلوا كلام المشاطات دا .. ودي ما سخرية ..ولا معارضة ..دا سخف ساكت يكون عندو ثلاثة نسوان ولا واحدة .. دا ما مهم عندك منطق في ما يقول البروف ادينا ليه ..ولا خليكم زي بت وراق ..أو بت قوقو .. أو قاقول ..مع تحياتي

  10. يا حمد اب عصاية يا الفقرا الراية راية !!!

  11. ياشمباتى — الجماعة ديل دمهم فاير ليه؟ يكون من كلام جبرا ولا كلام تانى

  12. الاخ جبرا واخوة القمردينه سلام
    كان (بدري عليك) تودعني وانا مشتاق ليك ترلم ترلم ترلم
    فعلا بدري عليها اوريكم كيف عندما طالعت المظاهرات فى ام درمان وبحري لقيت اغلب المتظاهرين يجلسون على الارض
    ودي بيعني انو الشعب دا حبة لياقه ما عنده بسبب البوش يعني المظاهرات دى ما بتقلب ليها تربيزه ولكي نتفاده الموضوع دا لازم نعمل لينا مديدة دخن وكل متظاهر نديهو كوريه يشد حيلو شويه عشان نقدر نغير
    ولهذا اقترح عمل صندوق (زاد المتظاهر ) ويتكون من كوره مديده وعصير شامبيون للطاقه

    1. لالا يا بت وراق كان اديتينا المديدة بنشبع ونرجع !!! مرات الجوع سمح . وقالوا جوع كلبك يتبعك ونسو انو الكلب عندو خيار تاني وممكن يعضي ….

      1. ياجنوبي ياخوي ناس سوريا ليهم سنه ما فتروا ونحن من تاني جمعه قعدنا في الواطه الناس ريقه يابس موش ابى يتبلع ليك
        ومع ناس الامن الشبعانين ومدوعلين ديل لو ما عملنا المديده بياكلونا اكل

  13. ” الحصار المضروب علي السودان بسبب رفع راية لا اله الا الله ” ( البشير )
    ” دستور السودان الجديد سيكون اسلاميا بنسبة 100% ليكون مثالا للدول المجاورة ” ( البشير )
    ” عندنا مجاهدين لو نزلناهم كانوا حسموا المتظاهرين , لاكين نحنا دولة مسئولة وخلينا الاجهزة الامنية تتعامل معاهم ” ( البشير )
    وتأتي الامطار بما لا تشتهي الركشه ..
    ” بيان رقم 1
    يسعدنا ان نعلن عن تشكيل هذه الجماعة ذات الاسس الحقيقية وسيكون لنا نظرة نزيهه نحو كل شئ نأمر بالمعروف وننهي عن المنكر ونحاول القضاء عليه .
    الاسم : جماعة انصار المسلمين في بلاد السودان .
    الشعار : الجهاد في سبيل الله الذي يعني القتال في سبيل الله .
    الشارة : القران ورشاشين في كل رشاش راية سوداء كتب عليها , لا اله الا الله محمد رسول الله .
    الاهداف والغايات : الدعوه للصراط المستقيم وتوعية عامة الناس وحماية حياة وممتلكات المسلمين والرد السريع والانتقام من أي عمل ظالم او ارهابي ضد المسلمين …” ( جماعة انصار المسلمين في بلاد السودان )
    كدي نبلع ريقي ونجيكم !!!

    1. ياجماعة الخير موضوع المجاهدين البنزلوا الشارع للمتظاهرين ويحسموهم موضوع قريب انا ح استلف من جبرا الفهامه حقته نامن يتعسر عليه فهم تصريح بعض المسؤلين حتي اقدر افهم

  14. مالو ابا يتبلع !!

  15. جنوبي إنت جنيت ولا شنو ؟؟ ما سمعت الريس في آخر تصريح قال شنو !!!؟
    مقتبس:-
    البشير : الأرزاق بيد الله وتاني لا علمانية ولا شيوعية
    أكد رئيس الجمهورية المشير عمر البشير أن دستور السودان المقبل سيستمد من الشريعة الإسلامية وقطع بألا مجال للعلمانية والشيوعية في السودان .
    يعني بس انت عاوز تعارض من أجل المعارضة بس ولكن ابلع ريقك أول عشان ما تعشرق
    وين أخونا كوكو ؟؟

  16. احم احم…

    1. مين هنااااك ؟؟؟

      1. طوخه على طول (تكون سهلةعلي ناس الامن ونقصته ليهم معارض (شرس)
        ههههههههههههههههههههههههههههههههههههه

      2. المندهش..
        انا المحراك !

        بت وراق..
        كان طخيتونى ولا خليتونى ,,, بتعارض ليهم محل ما يقبلوا لحدى ما اجضم فلانة واعضى علانة !

  17. السمار …. هاكم دي
    مقتبس من حديث للسيد / الطيب مصطفى
    😦 إن حديث نافع علي نافع مجرد ( تطمينات لا تستند إلى معلومات احصائية دقيقة) ونصح مصطفى، الرئيس البشير بالتحلل من المؤتمر الوطني والانحياز إلى الشعب كي يتفادى مصير زين العابدين ومبارك والقذافي. على الرئيس، بحسب الطيب مصطفى، أن يخرج من عباءة المؤتمر الوطني و”يتعامل مع جميع الأحزاب والقوى السياسية على قدم المساواة بما يمهد لديمقراطية حقيقية وتداول سلمي حقيقي للسلطة بعيدا عن الاحتكار والاستئثار الذي ينفرد به حزب واحد”.
    يعني يا حلوين تاني في عباية جديدة …. ما قلنا ليكم لسه بدري عليها ..

    1. الطيب حق التور الاسود !! واها كان البشير سمع كلامو
      واتحلل من المؤتمر الوطني ح يعمل شنو ؟ يقطع شجرة !!

      1. لا ياخفيف حايكون رئيس لحزبك افنت عملتو ( جماعة انصار المسلمين في بلاد السودان )

  18. بت وراق .. كملي حوامتك كلها سريع سريع بحري
    ام درمان وأي حته وحاة الله جاياكي ايام !! الجزر
    تمشيهو مع محرم والاسكيرت والبلوزة ديل يبقنلك ملابس
    سباحه ….
    المندهش .. امانه مابتندهش !!!
    شمباتي .. احم احم !! تموت بي عشراقتك دي وما تلقي
    اليمدلك كوز موية ماك مصنف هناي ..
    سبحان الله المجاهدين ديل اصلهم ما بيعلنوا الجهاد الا
    علي المسلمين !!! يوم وااحد ما سمعناهم مشوا تل ابيب

    1. ابرا من العشاريق انا ,,الحقونى بى جغمى ان شاءالله جغمة هناى ! واااااااى..
      وامانة ما اتصفنت لمن انا ذاااتى اتلخبتا فى رويحتى دى !

  19. جبرا : لالا بالجد ما طولو يعنى الواحد ما يجرب عشرة سنه ويراجع الجربو عشرة سنه ويصحح الاطاء فى عشرة ثالثه عشان تكون تلك عشرة كاملة زى ما التاصيل بيقول . انا خايف عيد الثوره الجاى يكون تحت شعار ولبثو فى حكمهم ثلاث مئة سنين واذدادو تسعا !! هههههه

    1. سلام ياقبيلة،،،
      أفليقانو إنت جنيتا ولا شنو؟؟
      دا كلام شنو البتقول فيهو ده، إنت خليت شنو لي ناس هناي وهناية الحمر وخضر ديلاك!!!!
      ياصديقي الودود عبدو خليك جادي وإنت عارف وأنا عارف أن ما يجري الآن هو سيناريو لإسقاط النظام ثم من بعد ذلك تفكيك للدولة، فالمسألة بدأت وأنت سيّد العارفين بمطالبة النظام بالإسراع في تنفيذ إصلاحات جذرية وهيكلية بنظام الدولة السياسي، فهل هذا من المستحيلات؟؟ أويصعب تنفيذه وإنجازه بالسرعة المطلوبة، ولكننا عندما نقرأ قراءة متأنية للواقع الحقيقي نجد أن المطلوب فعليا” هو تغيير الوضع الجيوسياسي الحالي والالتحاق بمعسكر إقليمي ودولي مفروض من القوي العُظمي والتي لن يهدأ لها بال حتي يخر السودان صريعا” تتناوشه الكلاب، وأنا ما بفسر وأنت بالطبع لن تقصر،،،،

      1. اخي ود الخلا … سلام
        ياريت قبل أن يخر السودان صريعاً تتناوشه الكلاب ، أن يعي المسئولين ذلك ويتنحوا ويسلموا ويستسلموا قبل أن يحدث ما تتخوف منه وأنت تدري وأنا أدري ان هؤلاء ليس من يستطيعون قيادة السفينة قبل ان تغرق وليس هم من إصطفاهم الخالق سبحانه وتعالى ليكونوا هم من يقودون السودان ( وليس العالم أجمع كما يزعمون ) وياريت يتنحوا بالطريقة التي تحفظ لهم أرواحهم ولا أقول ممتلكاتهم قبل أن تقع الفأس في رأسهم

      2. حاج أحمد السلاوى

        سديقى بن الفلاة .. رعاك الله ..
        أى إصلاحات وأى تقشف .. ها نحن اليوم لينا اسبوعين منتظرين ولا شىء يلوح فى الأفق عن أى مبادرات تقشف أو إصلاح .. كلام فى الهوا وتخدير للمساكين ..والتصريحات ليست بفلوس ..
        وخلونا النشوف آخرتا شنو ….!!!!

  20. الكلاب بدت النهش والتناوش مطلع فجر 30 يونيو 1989 م…والتاريخ لا ينسى او يغفل…

  21. باقي لرمضان 11 يوم ومظاهرة وااااااحدة بس , جمعة
    خم الرماد , بس خم الرماد للشعب ولا للحكومة ما
    معروف , لاكين كان بقي للحكومة سجم خشم اولادنا الفي
    المعتقلات وسجمنا في البقالات والمواصلات ويا خراب بيتنا
    بالاحتفالات ..

  22. البروف والسمار .
    سلامات .
    مع إنو الموضوع مفتوح على كل الجوانب لكن بعض الاخوة تعليقاتهم جميلة وتنم عن إدراك متوسع للأحوال.
    متابعين لكن الموجعنى رسوم الحج البقوها أربعطاشر مليون ونص والمسؤول بيقول (( مع إرتفاع رسوم الحج إلا أن الاقبال علية أعلى من السنة الفائتة بسبب الدهب ))…
    الله فى …

    1. المسؤول ده غبيان ساكت , ما بي سبب الدهب , بي سبب القهر . الناس دي ماشه تشتكي وتتوسل ..
      25 % من عدد البعثة بكونوا حاجين ملح سااكت والحكومة تقوم تحمل تكلفتهم علي الحجاج مع انو ال 25 % ديل مستطيعين اكتر من باقي الحجاج الدافعين دم قلبم ..
      عندي اصحاب فلاته من دولة مالي ( بالمناسبه دولة مالي دي زمان كان اسمها السودان ) نظام الحج عندهم بجوا من مالي الحجاج بس , والسفارة هنا بتتولي ادارة امر الحجاج من مطار جده وبيستعينوا بابناء مالي من المقيمين في السعودية كأمراء حج ومطوفين , وتكلفة الحج عندهم بسيييطة مقارنة مع تكلفة الحاج السوداني مع انو تذكرة مالي طيران ذهاب واياب بي اكتر من اربعه الف ريال ونحنا تذكرة ذهاب واياب اقل من الف وخمسمية ريال .

  23. مافي برنجيييه !!
    كرستوفر , فرانسيس , ميري , فيفيان , جون قلوال , بول بتاع السجاير , أبوك ست الهناي… مبروك ( اشعال ) الشمعة الاولي .
    وكم دمعه سالت فوق خدود الشمعه !!!!

  24. جنوبي ….. من قبيل أنا لابد ولكن شكلها اليوم أوف
    خلينا نتنونس شوية بآخر فيديو كليب عوضية عضلات في اغنيتها الجديدة ( بس هو يجي ) والبتقول
    وووب البوره مابتنطاق عريس انشاء الله شاذ افاق بس هو يجي
    عريس انشاء الله لوجربوع وجرب مره لحس الكوع ويعدي معاي بس اسبوع بس هو يجي
    عريس انشاء الله رباطي اومضروب طلقه مطاطي بس هو يجي
    عريس انشاء الله لو سجمان يومي استنشق البمبان بس هو يجي

    1. عريس انشاء الله ديامي وحق الحله ما لامي ويضربو طلقه قدامي بس هو يجي
      عريس انشاء الله شايل طوب وركب بوكس بالمقلوب بس هو يجي

    2. حاج أحمد السلاوى | رد

      عريس إن شاء الله عيونه دُقاق ..ويكون شذاذ آفاق ..

    3. عريس انشاء الله لو طرطور يجي بطيارة طافية النور
      بس هو يجي
      انتو يا ناس كوكو وين , العندو رقمو يتفقدو لينا..
      كوكو : اريتك تبقي طيب انت وانا البي كلو هيّن

      1. كوكو عريس !!!
        يا بتاعين الشذوذ الزواجى انتو !

      2. بالله دي ظروف يعرسو فوقا !!
        لاكين بختو بيوفر في الزفة حق الدخان والالعاب النارية

  25. ود الخلا :
    استمراء نظرية الانقاذ او الفوضى هو ما يطيل عمر الانقاذ ويعطى اشارات سالبه بضعف التغيير .
    من ناحية استراتيجية كما يقول ود الزبير الله يطراه بالخير :
    هل كنت تظن قبل الانقاذ ان يكون هناك بديل لسيد صادق ؟؟ وهل كنت تظن البديل لسيد صادق لن يكون سوى الفوضى برغم ان هناك من روجو للديمقراطية او الفوضى !!
    نظرية الخوف من الفوضى الخلاقه او البناءة او الهدامه نظرية تصلح لدول ولا تصلح لاخرى ويتحكم فى تغذية هذا الشعور الاحساس الخاص الذى يتضمن :
    الخوف من التغير
    نجاح اعلام النظام فى تصوير النظرية
    وجود مصالح مع النظام ولو عقدية بملمح الاسلام
    فى مصر مثلا جاء الاسلاميون بديلا لمبارك برغم ان هناك فوضى كلفت مصر الاف الجثث والمليارات والسعه لكن الفوضى اللانهائية لم تحدث بسبب رغبة الشعب الواعى فى التغيير .
    اس المشكلة يا قبيلة ان شعبنا لم يبلغ بعد درجة الوعى التى بلغها المصريون ففهمو ان الشعب مصدر السلطات هو البديل لاى مبارك يظهر ولو كان مرسى نفسه ولا يظنن مرسى ان القصه قد انتهت بقصر الرياسة بل هى بدات لان الوعى الجمعى للشعب المصرى اصبح برلمانا بذاته .
    حين نصل اخى ود الخلا القبيلة الى مستوى من الوعى يؤهلنا للتغيرر فلا خوف من الفوضى .
    الفوضى التى اخشاها هى فوضى عدم التمييز بين الديمقراطية والفوضى سواء لدى المحكومين اوالحاكمين وهو مفهوم شبيه بضبابية تعريف الارهاب لدى المجتمع الغربى والعربى .
    انا شخصيا غير متفائل باحداث تغيير جذرى الان .
    متفائل باحداث تفكيك للنظان من الداخل عبر ثورة الاخوان نفسهم على تهديد زوالهم من السلطه كليا هذا التهديد قد يدفع بعض الاخوان الصادقين الى احداث حراك بدات ملامحه تظهر الان فى تحركات الدوله والحراك الذى يعتريها .
    اما بخلاف ذلك فاننى اعتقد بان اى ضغط من الشارع السياسى او الفلوتر لن تكون الا وقودا للانقاذ لاحداث التغيير بيدى لا بيد عمرو وسيكون تغييرا متدرجا حتى لا يفهم بانه تلبية لضغوط الشارع حتى لا تتوسع امال الشارع فوق اصلاح المعيشه .
    هذا والله اعلم وهناك فرق بين ما اتوقعه وما اتمناه .
    جنوبى : مبروك العيد الاول حنبنيه البنحلم بيه يوماتى يجب ان يكون شعار العيد وفاء لوردى ( من طواقى الجبهه من دقن الترابى ) ولا نسيتو ؟؟
    تمنيت ان يكون العيد الاول عيدا سعيدا والجارتين ( احىىى من الجارتين الكانن واحد ) ترفلان فى ثياب السلام والاستقرار .
    قول لسلفا يكلم ميرى بكره حنقلع لبس الميرى وميرى ميرى مسطرينه .
    وكنا تلاته ونوباويه .

    1. افليقا .. ليت التغيير يكون من داخلهم وينتصر خيارهم علي شرارهم ويبددوا مخاوف ود الخلا ومخاوفنا ..
      احدهم كان صديقي ينصحني بترك الهناي ويحثني الي المسجد ويعلمني سماحة الاسلام , أتي الانفصال فصنف هو تبع الجنوب المسيحي وصنفت انا تبع الشمال المسلم حسب الشعارات المرفوعة من الطرفين !!
      جئناكم لنبني معكم ولكن حظر علينا ان لا نكون مهندسين او مقاولين او حتي معلمين وآثروا لنا ان نظل ( عمال طلبه ) او نذهب لبني في مكان آخر , وذهبنا ..
      تمنيت ان يكون العيد الاول هو نفسه عيد الوحدة ولكن …
      ياربي المانيتين ما كوريتين …

  26. اهداء لجنوبى بمناسبة ( ايد تااكم ) تمنيت ان نحضره فى ديسكو جوبا جوار سوق كونجى كونجى :

    الرابط الاول :

    الرابط التانى :

    الرابط الثالث :

    وهدية تانى من حميد :
    شرقت شمس اليوم التاني
    كنا حداشر ونوباوية
    متهمنا بالتخريب والتحريض والشيوعية
    البوليس صاقع شيوعية
    وفاكر نفسو بنبذ فينا
    هي آ بوليس أمك مسكينة
    البوليس عمدني شيوعي
    التحقيق طلعني مدان
    التحقيق طبعاً تحقيقهم أو تحقيق الأمريكان
    اسبوعين عشناهم جوه
    اسبوعين زادننا قوة
    ست الدار ما تشفقي خالص
    ست الدار أنا ياني الزين
    ست الدار سامعاني كويس

    1. أحييييييييييي يا حميد .. اريتني الخنساء وابكيك بي دموع الدم ..

  27. هديمك يا وليد
    مقدود
    وصابحنا الفقر
    و الجوع
    صبح جلد البطن
    مشدود
    * *
    شن بتسو
    و اخيك
    من شهر مرفود
    قالو .. صالح عام
    عشان قال
    العُوج في العود
    حمدّ يارب
    اخير من قول
    هديك البغلة
    في الإبريق
    كان ودوهو
    بيت الأشباح
    و كان دوقو
    زول هلفوت
    * *
    هديمك يا وليد
    مقدود
    و صابحنا الفقر
    و الجوع
    صبح باب التكل
    مسدود
    كمل حتي الملح
    في البيت
    وشن همّ
    الملح في البيت
    وكت ملح
    الدموع موجود؟!
    دحين يا وليد
    هو ديل
    موُ قالوا ناس
    إنجاز ؟!!
    وشن سّولنا
    مما جونا
    غير حرقو
    الفضل بالجاز ؟
    كّل شيتا
    صعب في السوق
    من الكبريتة
    للطايوق
    و كان جانا
    البخت تموين
    رطيل سكر
    و صابونتين
    نجيب من وين ؟
    و اخوك مرفود
    و عدمان الشهر
    ملين ؟
    أمس زازيت
    اكوس الدين
    مشيت لسمية
    بت مامون
    لقيت جابولها
    تلفزيون

    سمح بالحيل
    تشوف الصورة
    بى كم لون
    وكت في نشرة
    ألأخبار
    ظهر مك البلد
    يضحك
    جضومو كبار
    مزرر الكرش
    بزرار
    لا مهموم
    لا مغموم
    لا زعلان
    و شيهو
    يراري بالألوان..
    وقّد في حشايا
    تباق نار
    طريت رفد
    الوليد و الجوع
    و سال
    دمع الغبينة الحار

    * *

    اريتك يا ملك
    فد يوم
    يخلى الجوع
    عينيك ما تنوم
    أريتك يا ملك
    فد يوم
    تحس بي غصة المظلوم

    دحين يا وليد
    هو ديل ما لهم
    و مال الدين
    وكت قولهم
    كلام الله
    و فعالهم
    ما فعال صالحين
    كتير فيهم
    عديل حقار
    و بالقرآن
    كمان تجار
    و كضابين
    أكان بنزين
    عدم .. أو جاز
    وتعبوُ الناس
    و ضاقو خلاص
    صفوف واقفين
    يقولولك
    إرادة الله
    وكان عدم الرخيص
    و الغالى
    في التموين
    يقولولك
    ده . غضب الله
    و كان الموية
    صبحت طين
    يقولولك
    ده من امريكا
    والعملا
    حمونا الشب
    ولاد الكلب

    عشان الشعب
    يحرن تب
    يقبّل
    من صراط الدين
    دحين يا وليد
    هو ديل
    ما لهم
    و مال الدين
    أكان كنزو
    الدهب و المال
    بلايينهم
    تسوى جبال
    وعرباتهم تخطف
    العين
    و بنياتهم قصور
    في قصور
    وحاة الله
    و كتاب الله
    أكان ادونا
    طوب فد سور
    كان سوينا
    الف أويضة
    لي مسكين
    ……. كم أنت رائع يا هاشم صديق

  28. يا سلام يا المندهش .. هاشم صديق ده حاجه تانية براااو كده ..
    استفتيت بابايا في نمولي
    واستهديت بي نخلة في مروي
    كتير تاتيت .. في رحلة عقلي
    واتمنيت .. في مجاهل قلبي
    لقيتك ساكن .. جوه مواطن
    يا ود ميري عزيز لي نفسي
    غرسك اخضر .. قدرك اكبر ..
    نيلك … دمي
    وسقفك جلدي
    عارف قدرك .. وعارف قدري
    يا سانتينو قول لي ميري
    اقطع ايدي
    لو راضيني اقسم نفسي
    بين كسلا .. وفشلا
    وحلفا .. مريدي
    اقطع ايدي
    لو اتخيلت …
    اجيك بي فيزا .. يتم تجديدا
    كأنك غُربة .. ما .. فد تربة
    جرحك .. جرحي
    حزنك .. حزني
    صبحك .. صبحي ونيلك نيلي
    يا سانتينو وامك ميري
    يا دفع الله وامك عزة
    جعلي وشايقي .. دينكا وزاندي
    وزي ما قال زمااان عبادي :
    إيه فايداني ..
    غير ما يخلي اخوي عاداني
    نيل ده ابونا
    جنس سوداني
    نيل ده ابونا … جنس سوداني
    +++
    تمنيت ان تكون هذه القصيدة هي الورقة التي يحملها طرفي التفاوض في اديس ابابا ..
    واعمل ليكا إيييييييه لو ترجعلني تااااني , افتح ليك خطوووووط واصدرلك مجانييييييييي …

  29. اصحوا يا حلوين .. عشان مايحصل علينا الحصل لناس ” منعرج اللوى” ..

    1. منعرج اللوى بين الدخول فحومل …

  30. منعرج اللوى بالشنقيطى ولا بالنص ؟؟
    نصحت قومى بمنعرج اللوى ان يا بلادى تحدى
    فلم يستبينو النصح الا ضحى الغد

  31. سهيل العريس :
    ما زلنا نكرر انم غلطة الانفصال تجرع كاسها حتى الامريكان الذين ظنو ان البلدين سينعمان باستقرار يمكنهم من استغلال الثروات او بحرب ضروس تمكنهم من نهب الثروات عنوه .
    فلا استقر الشمال ولا الجنوب فاستثمروا
    ولا جاطا للنهاية فنهبو
    تابع مجريات الاحداث الجميع يبحث عن وحده ولو شكلية
    وما تهديد البشير بالشريعه الا اشارة للخارج باننا اذا ضغطنا سنتزمت
    فكوها علينا ولو بالجنوب
    اقرا صاح يا حبيب

  32. الأخ الحبوب افليقا..
    ” اقرا صاح ” .. شكرآعلى النصيحه .. مع إني حسب فهمي البسيط قاري صاحين ..
    لكني يا عزيزي اراك لازلت في ضلالك البعيد .. وحد بين الشمال و الجنوب على اساس شنو ؟؟؟ طيب .. نحن منذ البدايه كنا متحدين مع الجنوب .. ماذا جنى الجنوب و ماذا جنا الشمال ؟؟؟
    إذا فرضنا جدلا ان شعبي السودان قررا الإتحاد مجددآ .. هل سيعجب هذا الامر البيت الابيض ؟؟؟ ياراجل الكلام في الشأن السوداني يتطلب ان تكون مصفحآ ضد الامراض العقليه و العصبيه بالإضافه لبعض الامراض الخفيفه كالسكري و الضغط و الجلطات ..
    البوست دا كان ماشي كويس .. لكن الناس المابتقرا كويس زيي ديل كسرو رقبتو و ودوهو في موضوع الوحده و إعادة الإتحاد و احلام اليقظه و افلام الخيال ..
    ذكرتوني نكته ادروب مع المارد لمن طلع ليهو من القزازه و قال ليهو طلباتك شنو .. قام قال ليه عايزك تعمل لينا كبري بورتسودان جده .. قام المارد قال ليهو دي صعبه .. اطلب حاجه غيرها .. قام ادروب قال ليهو طيب اقلب الحكومه دي و طير ناس الإنقاذ ديل .. المارد نطا فووق وقال قال ليهو ( قلتا الكبري دايرو من وين لوين ؟؟؟)
    الوحده بين السودان و جنوب السودان دي إلا تجي من ” فوق” .. لكن بالواطه كده وناس فلان وعلان موجودين و مكنكشين .. ماااا ظنيت ..

    وشكرآ

  33. مسيلمة الكذاب قالوا ليه محمد صلي الله عليه وسلم ما دخل بستان خراب والا اخضر شجره وزاد ثمره وأتي اكله , وانت لازم تبارك لاهل اليمامه بساتينهم عشان الناس تصدق انك نبي زي محمد , قام شاف احسن بستان في اليمامة ودخل باركه وبعدها البستان شجره صفّر ويبس وعدم الخضرة .
    النائب الاول لناهب الجمهورية مشي ولاية نهر النيل قبل كم يوم وباركم وقال ليهم انتو حتكونوا احسن ناس في السودان وخيركم حيزيد ويدفق ويدي باقي الناس , اداهم مباركتو ورجع الخرطوم , ناس مدينة الدامر قاموا تاني يوم يشوفوا آثار المباركة بلا يلقوا افرانم عدمانة الرغيفايا ولا يوم الليلة واقفين في صف الفرن كايسنها قروض ساااكت ما لاقنها !!!
    الصين مساحتا 9.6 مليون كيلو متر مربع وعدد السكان 1.5 مليار وتاني اكبر اقتصاد في العالم وعدد الوزراء 17 وزير !!
    السودان مساحته 1.8 مليون كيلو متر مربع وعدد السكان 33 مليون وتاني افشل اقتصاد في العالم وعدد الوزراء 37 وزير ووزير دولة !!!!!!
    باالمناسبة وزراء الصين لمن الصين كانت بتتحسس طريقا كانوا زي عمال السكة حديد في عطبرة عجلاتهم تطاقش وتلقي الوزير قايم سداري عشان يلحق شغلو ورئيس الوزراء حقهم كان عندو عجلة رالي دبل عشان التمييز وكده !!!!
    امبارح ضياء الدين قال يستصحبوا طريقة التعامل مع تشاد في حل مشكلة جنوب السودان , واتخيلت لو سلفاكير قال داير بت هناي !!
    وااااااااااااااااي ……..

    1. واااااااااااااااااااااااااااااااااااى

  34. لمن يري الوحدة صعبه تلت مساحة السودان كانت مهرا لسلام الشمال ولا اظن ان الجنوب سيبخل بتلت كمية نفطه مهرا لسلامه !!
    الحريات الاربعة التي وقعناها مع طرف لم يوقع عليها هو حتي الان هي من يجب استصحابها لحل مشكلة الجنوب !!
    اليوم التكامل لشعب وادي النيل جعفر والمبارك هم جمال الشيل ( انفضوا الغبار شوية عشان تتذكروا )!! لماذا التكامل شمالا فقط .

  35. جنوبي بيه .. ياخ أنت راجل ظريف و زيك مافي .. لكن مرات مرات كده بتبقى لي زي شمباتي ( مافي زول يسألني شمباتي مالو ) ..
    مسألة التكامل دي عويصه شويه .. يعني عشان إنت تتكامل مع دوله أخرى لابد من توفر الرغبه اولآ وبعداك نجي لقصة المتكاملين ليها شنو دي .. مثلآ السعوديه تتكامل مع العراق لأنو السعوديه عندها قروش و العراق عندو علماء في العلوم الدنيويه بالهبل .. امريكا تحمي الخليخ من إيران و غيرو مقابل كم دشليون دولار كده ( تكامل دفاعي إقتصادي) ..
    لكن يا فرده نتكامل مع اوغندا و لا كينيا عشان هم يطلعوا بشنو ؟؟ ولا نحن غايتو إلا نطلع بالواحد .. ناهيك عن تكامل بين السودان و جنوبه .. ياخ دي عامله زي المرا الطلقوها بالتلاته و عايزين تاني يرجعوها .. و زي ماقال عادل إمام ” لابد ان يدخل بهماااااا” .. و اظنو نحن محتاجين لكبري عشان نرجع اللي كان .. بس ماتنسو شرط الرجوع حسب الشرع ( الخول فحومل يا شمباتي) ..

    نأسف لعدم اللباقه في بعض المقاطع .. إستصحبوا فقه الضروره للعفو عني ..

    1. فحومل دي يعني شنو ؟؟؟ كاااااك .

  36. تصحيح .. (الدخول فحومل يا شمباتي)

  37. يا اخواننا عندي مشكله في كتابه التعليق .. الصفحه عندي بتظهر نص صفحه و بتكب غيبيآ .. يعني بيظهر نص السطر الانا بكتبو والباقي بتمو خيال .. عشان كده ماعندي طريقه اراجع بيها الشي الكتبتو ..

    نأسف مره اخرى و لكم العتبى حتى تتحدو ..قصدي ترضو

    1. بالله !!!
      قلت لى خطأ ؟امممممممم…
      الكلام الهلو بخور الباتن يا انت !
      لكن عجبتنى منك يا رفيق.

  38. سهيل .. اول حاجة ازيك
    تاني حاجة التصحيح ده ما عارف شمباتي يقبلو ليك ولا ..
    لاكين انا ابا يتبلع لي لأنو جا بعد (نأسف لعدم اللباقة)
    الفوق ديك !!معليش اخوك ترباية امبده وعقاب عباسية..
    وبمناسبة الغلطة المطبعية تعرف يا سهيل الجنوبيين ديل
    العرق السوداني الوحيد الماعندهم ( جنس تالت )!!
    ولو قلت الشكل ما مساعد اقول ليك حتي في بعضهم وما
    بخونوا الجار !!
    بخصوص نص الصفحة اعاني من نفس المشكلة واتعامل معها
    بفقه ما بنمشي لي ناس ما بجونا و طوالي enter وسطر
    جديد …
    كان في جنوبية اسمها حنان بتعمل اكل في سوق
    مربع 4 اب سعد , اكلت عندها ؟ نص عمرك ضايع ..

  39. و(صابر) سارح
    لنفسو يصارح
    -يا صابر هوي
    رمضان جاييكا
    حجتيب من وين
    قروش السكر
    وحق الويكة؟!
    ..
    (الرادي) يناهد
    وسط الحوش
    بين (بن لادن)
    و(عمر المُلا)
    و(مستر بوش)
    -تصريح
    من لندن أخبار
    من (غزة)
    وجيران صابر
    عاملين (قعدة)
    انقلبت (ندوة)
    في الكأس العاشر…
    ترد الحاجة تفتش لكيس
    تمباكا
    في الكراب
    نقول همين
    عذاب وعذاب
    تخت السفة
    وتبرطم
    -دحين يا وليد
    ده مو الإرهاب؟!!

  40. جنوبي .. قلتا لي حنان دي وين لمنعرج ابسعد ؟؟؟ ياربي عندها كجيك ؟؟.. طيب هسي هي وين ؟ شمال ولا جنوب حدود56 ؟؟

  41. أدوم فرصة معاهم ليه هو اوانطة
    يعني بالفاتح اخوي هسه انت قايل المشكلة الحكم المشكلة الجماعة ديل ماسكين اي راية شركة وأي مدير مكتب وأي حاجة تفكر فيها تلقي الماسكها من الجماعة اياهم يعني بدون حرج زي السرطان …..
    يعني الموضوع ماموضوع راسة ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: