هواء ساكت

(هذه الصحيفة تحتوى على تصريحات للمسئولين قد تسبب الشلل الرباعي) .. لقد طالب العبدلله مرات عديدة بوضع هذا التحذير على صدر كل صحيفة إذ أن هنالك تصريحات من بعض المسئولين لا تملك إلا أن تتحسس (مرارتك) بعد قراءتها ..
بالأمس القريب طالعت على عدد مقدر من الصحف تصريحاً للسيد نائب رئيس الجمهورية (الدكتور) الحاج آدم يصلح (مثالاً) للتصريحات التي تصيب الإنسان بالشلل السباعي وإلتهاب فقرات القلب (ده لو ما لحقتو أمات طه) .. يقول التصريح (كشف نائب رئيس الجمهورية د. الحاج آدم يوسف أن الحكومة أجرت إحصاء للإحتجاجات الأخيرة فوجدت أن 85% من المتظاهرين أجانب من خارج السودان ) وأضاف سيادته (كل الحكاية هواء ساكت) !!
وطالما إنو القصة فيها إحصاءات وكده فدعونا نتعرف علي كيفية عمل الإحصاء (علمياً) والتي تبدأ بمصادر جمع البيانات والتي حددها العلماء بمصدرين إثنين لا ثالث لهما المصدر الأول هو مصدر تأريخي وهو ما يؤخذ من السجلات كسجلات المواليد الوفيات وفي هذه الحالة (المتظاهرين) ! أو كالبيانات الواردة في رسائل الماجستير والدكتوراة (يعني زول يكون عمل ليهو دكتوراة في (نسبة الأجانب الذين يقودون مظاهرات غير بلادهم بالخارج) !
أما المصدر الثاني فهو ميداني وفيه يتم جمع البيانات مباشرة عن طريق بعض الوسائل أولها (المقابلة الشخصية) وفي هذه الحالة يكون (سعادة النائب) قد أرسل فريق عمل (يحوم) وسط المظاهرات وهو يسأل كل متظاهر (إنتا يا زول جنسك شنو؟) !
أما ثاني المصادر الميدانية فهو (الإستمارة الإحصائية) questionnaire ويتم تصميمها بحيث تشمل عدداً من الأسئلة تخص الموضوع الذي من أجله يقوم الإحصاء وهو في هذه الحالة (نسبة الأجانب في المظاهرات الأخيرة) ويراعي في هذه الإستمارة (كما يقول العلماء) الآتي :
1- أن تكون الأسئلة واضحة وسهلة .. يعني إنتا جنسك شنو؟ وكت إنتا أجنبي المدخلك في المظاهرات دي شنو؟ وحاجات بالشكل ده !
2- يجب أن تكون الإستمارة غير طويلة حتي لا يصاب الشخص محل الدراسة بالممل والضيق ، (وفي الدراسة دي بالذات حقو ما تكون طويلة لأنو الجو جو معافرة وبنبان و سيطان وكر وفر !)
3- يجب التأكد من سرية البيانات محل الدراسة حتى لا تكون إجابته بعيدة عن الواقع (يعني تقول ليهو إنتا بس أكتب جنسيتك ونحنا لا ح نرحلك بلدك لا بنعمل ليك حاجة دى بس إحصائية ساااكت عشان نوريها للشعب الوهم ده )
4- يجب على من يجري البحث أن يقوم بعد إعداد الإستمارة بإختبارها عن طريق أخذ عينة أخري للتحقق من جميع الشروط السابقة (يعنى إذا كان شال البيانات دي من مظاهرة في الكلاكلة يقوم تاني يوم يمشي يشوف ليهو مظاهرة تانية في شمبات ويوزع نفس الإستمارة للمتظاهرين)

أها طيب بعد ما جمعنا البيانات نعمل شنوووو؟ (العلماء بيقولو) بعد جمع البيانات من المصادر التاريخية أو من المصادر الميدانية نقوم نعمل ليها (تلخيص) لأنها (لحدت هسه) بيانات خام وغير منظمة عددياً ويصعب دراستها أو إستنتاج (حاجة منها) عشان كده لازم نعمل جدول (نخت فيهو) الحبش بى جيهة والأرتريين بي جيهة والمصريين بي جيهة و(البنغال) بي جيهة وكل جنسية نختها براها ونكتب قدام كل زول (بياناتو) العمر و الموقع الجغرافي للمظاهرة الإشترك فيها وكان شايل شنو؟ وسبب إشتراكو في المظاهرة؟ وهل يتبع لأي حزب سياسي (عندنا) .
بعد جمع الإستمارات دي من (المتظاهرين) القاعدين يملو فيها بي (رواااقه) وكل البيانات التى تم رصدها (يقول العلماء) يجب أن نقوم بعمل تلخيص لها وهذا التلخيص يتم خلال جدول تسهل دراسته يسمى (جدول التوزيع التكراري) يعني بعد عمل هذا الجدول يمكن وبسهولة معرفة (الأرتري) حزب أمة من الأرتري الختمي و(البنغالي) البعثي من البنغالي (الشيوعي) والحبشي (جناح الصادق) من الحبشي (جناح أم جكو) !

كسرة :
حتي الوصول للنتائج النهائية والـ 85% القالا (السيد النائب الدكتور) لازالت هنالك الكثير من الجداول والعمليات الرياضية والشنو ما بعرف التي يفترض القيام بها فهل تمت كل هذه الإجراءآت الإحصائية العلمية حتى تم التوصل لهذه النسبة العجيبة وللا (كل الحكاية هواء ساكت) !!

كسرة ثابتة :
أخبار ملف خط هيثرو العند النائب العام شنو(ووو و ووو)؟

Advertisements

43 تعليق

  1. طارق بابكر عبيد | رد

    برنجيييييه

    1. مبروكه ليك و ما مشكله البركه فى الإسم

      1. يبركو فيكم خنق الطارقين

      2. هههههههههههههههههههههههههه,,والله ختفتها من كيبوردى !
        ينصر دينك يا حبيب..

    2. لايوم خمّصت لي زول معاك ولا يوم حللت برنجيتك بي كلمة
      كلمتين تدفعن ( شيرنق )معانا , بس بلا تجي تشيل البرنجيه
      وتبقي مارق !!!
      زعلاااااااان منك ..

      1. جنوبي … يعني قصدك برنجييييية هواء سااااكت ؟

      2. طارق بابكر عبيد

        ليه كده بس ،
        خليتو ربيع وقبلتو فييييني أنا ،،
        أنا عارف الكنكشه ما حلوه. ولكن تقولوا شنو كندوره،،، يالفاتح ما تقول حاجه وأنصر اخاك. …….
        أنا ما قلت 1800. ضولار أنا قلت برنجيييييه. ، يا جنوبي ما تزعل ياااخ

    3. ما رضيت كلامنا .. وجيت براااك .. اهو ده العذااااااب اتحملوا واتحملوا ..

    4. اهااا يا ود العبيد, الكنكشة دى كيفنها؟ عموما بنخلى روحنا رياضية و برضو بنبارك ليك, و بالهناء ان شاء الله

      1. هووووووي يا فيلاديمير المهدي انت .. حدد موقفك .!

  2. برنجيه

  3. طارق بابكر عبيد | رد

    برنجيييييييه،  
    كندوره ،كنكشه وكلبشه     ومعليش كمان الي حين اشعار ااخر.

  4. عندك واحد تانى أسمو ربيع قال دخل الفرد فى السودان 1800 دولار يعنى زى أكتر من عشره و نص مليون
    ما بفقع المراره دى بفقع ال…..ت ذاتو

    1. طارق بابكر عبيد | رد

      الاخ برضو طارق:
      أنا حضرت الاتجاه المعاكس. وفعلا كان الدكتور ربيع مضطرب جداً اما دكتور القراي كان هادي جداً وقال اللي عاوز يقولو. بهدوء شديد،
      ولكن اللي عجبني في اللقاء نحن فعلا ما بنشبه الشعوب الأخري وأرجو ان يعي كل شخص ذلك،، طيبين وحنينيين وأي واحد قريب التاني ولكن ما بنحب الذله ،،

  5. النسبة صحيحة لأنو ناس الامن بيدقوا المعتقلين ويسألوهم
    انت مؤتمر وطني ولا اجنبي ؟ يقول انا اجنبي
    يقولوا ليهو بلدك وين ؟ يقول شذاذ آفاق .

  6. الزول دا قصدو يقول إنو الاجانب بقو ارجل مننا .. شفتا كيف يا عمك ..
    اب احمد .. قال كم ؟؟ قصدو 1800 ضورار في السنه
    خلي قلبك ابيض امااااال.. دا ربيع عبدالعاطي ولا ربيع عربي ؟!!!

  7. جنوبي .. بالله عليك ربيع و شمباتي ديل مش في شي بجمع بيناتهم ؟؟؟؟
    علا بس نقول شنو ؟؟ظ الله غالب

    1. الاتنين عندهم علاقة بالربيع .. ربيع بالاسم وشمباتي بالنسمه ..

      1. يعنى انا منسم !!؟ وى وى وى

  8. هوووووووووى يا سهيل,,,,تربعن فى رمضان !

  9. غايتو انا يابروف ربيع دا اصابنى بى اسهال فموى !
    والله الاقيهو الا اعضيهو !
    1800 ضورار يا مفترى !
    سُب عليك..

  10. يا اخوانا يمكن مصدر المعلومات دى من ناس الاحتياطى المركزى, يعنى لمن يمسكو ليهم زول و يجلدوهو بياخدو معلوماتو و يزودو بيها الرئاسة بعد نهاية كل مظاهرة !!

  11. شمباتي : خلي الفصاحه .. اها خاشي متين ؟؟؟
    جدو سلاوي : دا انت طلعت راجل اي كلام ياجدع .. الشافع دا “يس” يغلبك و يقعد 5 سنين في السعوديه بدون ما تلحلحو و تفطس ليهو نخرتو و تعرس ليهو ؟؟ الود دا شقي و مجنون و عايز ربايه من اول وجديد .. بس باين عليك إنت خلاااااس عجزتا و غلبك التسوي … انا بقترح على البروف يحظر نشاط شمباتي لحين إبراز القسيمه و بعدداك ينظر و يفاد ..
    ولا ما كده يا جنوبي ..
    عجب كوكو

    1. يكون متزوج القضية ….
      كوكو عرفناهو عريس , نان بت وراق وين !!

      1. ههههههههههههههههه,,والله يا سهيل دا حقد اجتماعى منك ! عايز تورطنى مو كدى ؟؟ماااااااااااااااا بعرس كلو كلو انا …

        جنوبى…
        اى والله ,, عرفتنى كيف؟؟

      2. بس كان عندي صاحبي شمباتي زيك كده وكان بقول كده !
        انت تعال نسألك انت دكتور شنو ؟ نساء وتوليد ؟
        ايواااا شان كده !! نفسك طاااامه ..

  12. ساخر سبيل سلام عليك انا صراحة اشتريت كل الفهامات الفي السوق (ملحوظة ما فيهم ولا صينية واحدة) يعني فهامات تمام بس برضه لسه ما فاهم اي شئ من امنا الحكومة ولي هسه ما عارف الحاكم منو وكل واحد شغال بي جيهة يمكن الشغلانة بقت في الزمن الضايع ما عارف التاصيل ما شايفنه لكن اظن وبعض الظن اثم انو الحكاية خلاص استوت وممكن كلووووووووووووووولهم يركبو ذات صباح في خط هيثرو ونلقى البلد خلا لا امنا الحكومة موجودة ولا امنا الغولة يعني تفتح الراديو بح التلفزيون بح تسال الجماعة بتاعين الشنو ما عارف الوطني يقولوا ليك ديل ما سافرو بي خط هيثرو هي فلست من هين سلامي ثاني وثالث ويلا الكل يشغل الملحمة

  13. فخر الدين بلال | رد

    ياجماعة الحاج ادم دا زول طيبان ساكت يعني زول ممكن يونس الناس في برش رمضان القرب دا يااستاذ الفاتح زول زي دا لامن تبقي ليهو في رقبتو تاني مابطلع صينيتو بره يعني الحبش والبنقاله العاملين مظاهرات ديل برضو فيهم مسلمين يعني يفطروا وييييييييييييييييين.

  14. سلام ياقبيلة،،،
    يابروف جبرا إنت دقست ولا شنو؟؟ الحكاية ما محتاجة لي إحصاءات أو بيانات، الحكاية وما فيها أن الشعب السوداني الفضل من قرائن الأحوال أصبح لا يتعدي ال15%، وبالتالي كل الباقين هم أجانب!!!

  15. بمناسبه فتح المواقع الاباحيه للشباب و سياسه (اشغلهم بانفسهم) متوقع يعني لو الكتمه ذادت شويه بارات و كده ما نقدم في اللوتري بتاع السنه الجايه و لا كيف؟ البلد ماشه علي انفتاح راسي و مع الاجانب ديل ح اكون جانبي كمان.الله ارحم علي المك قال الخدمه البقدموها لينا الحبش ديل لا تقدر بثمن!! فاهمني يا جيل السبعينات؟؟

  16. اجانب قال تيب ناس جايه من بره تعمال مظهرات يعني ناس الداخل مرتااااااااااااااااحين تب والله قصه تحير السفها عجبي

  17. أخذوا الحمار فقلت يا ناس الحمار
    قالوا سنطعمه ونلبسه سوار
    فرأيتهم قد عظموه وقبلوه
    عن اليمين و قبلوه عن اليسار
    فسألتهم ماذا جرى قالوا ألم
    تعلم فهذا لم يعد أبدا حمار
    هذا سيصبح مثلنا يجلس كما
    نجلس و يملك مثلنا بالأرض دار
    هذا حكيم سوف يعقد أمرنا
    سنطيعه و قراره نعم القرار
    ومضوا جميعا رافعين رؤوسهم
    و أمامهم سار الحمار ابن الحمار
    فبدأت فوق الأرض أصرخ قائلا
    يا رب إن العقل مني اليوم طار
    لكن و بعد دقائق معدودة
    هرب الحمار مخلفا بعض الغبار
    فضحكت حين رأيته مستعجلا
    و بدأت أسأل ما لذي يا قوم صار
    عاد الحمار لأصله بكرامة
    و أبى الحمار بأن يكون سوى حمار
    و الناس تبحث عن حمار أخر
    و كأنهم خلقوا ليحكمهم حمار!!

    1. عجيييييييييييييييييييييييييييييييبة

  18. احتمال السودانيين بقو اجانب في بلدهم ؟؟؟!!

  19. مش يمكن الحاج آدم يكون قاصد اجانب من ( تجنيب ) وكده …
    جنب يجنب تجنيبآ فهو اجنبي .. زي عرب يعرب تعريبآ فهو عربي ..

    والله اعلم

    1. وزي جنب يجنب تجنيبا فهو مال منهوب !!

  20. ” نحنا ما عندنا ربيع عندنا صيف مولع نار وحا نشوي
    الاعداء شوي ”
    ما فضل ليهو الا يقول لينا : أحيييي انا . ( ويمسك
    ايديهو الاتنين يمدهم مع قفل الكفين ويجرهم لا وراء مع
    تقديم النصف اسفل الصرة الي الامام ).
    ” ما دايرين ناس النيل الابيض يجوا الخرطوم ويغسلوا
    العربات ويبيعوا الموية ”
    فيهلل الحضور ( بدون تعليق )
    عريس في حلتنا يوم عرسه حصل عزاء في الحلة والحفلة
    طرشقت , وشاءت الاقدار انو بعد شهر حصل طهور في
    الحلة , اصر العريس علي ناس الطهور يعملوا حفلة
    وانو ح يتبرع بالفنان , ياخي العريس ده حتاهو حت !
    وكل الشافو انكر غيرو يكون في سكر .. تارارا

  21. ههههههههههههههههههههههههههههههههه,,الله يجازى محنك يا جنوبى ,, دا شنو دا !!؟
    اريتك ما صاحبا لى ,, فك ايديك ديل..

    1. هههههه , تنكرني والايام قد تنصف الانسان !!
      بالله ديل جونا من وين ديل !! النايب يقول علينا اجانب والضُرس يطلع ارباب التجارة في السودان تجار السوق العربي وسوق ام درمان واصحاب البقالات والدكاكين في احياء العاصمة وحتي في جوبا ماسكين التجارة يطلعن غسالين عربات وبياعين موية !!
      هسا ده يسموهو شنو ده ؟ !!!!!!

      1. شذاذة !!

  22. يا اخوانا زعلانين ليه ماوزير قال الطيارة الضربت المصنع جات من كدة حسب رواية الغفير و مرة طافية انوارا في ضربة تانية و رئيس قال على الشعب شذاذ افاق (لو سمحتو واحد يشرحة لي لاني والله مافهمتها) و ما عرفتو قال شنو لمن واحد يتكلم بي نسب مئوية يعني في تقدم اتجاه التحليل العلمي احتمال غلط في الطريقة لكن برضو نقول عليهو اخذ اول خطوة و بعدين انتو بتعرفو احسن من الحكومة يعني على قول عادل امام امن سالو عن اسمو قال(هو احنا بنعرف احسن من الحكومة)؟؟؟؟؟؟؟؟؟؟؟؟

  23. السيد المبجل نائب الرئيس بتكلم كلام علمي بلغة الأرقام لأنه أستاذ جامعي ومش اى جامعة جامعة الخرطوم كمان يعني كلام ما خمج ساكت عشان كده لازم نصدقه ونقول آمين

  24. وطن يثير فيك كثير من الدهشة والاندهاش من امنا الحكومة والله كثير زمان بيقولوا انه ريسين غرقوا المركب لكن لما تكون المركب كلها (مرايس) الحكاية بتبقى غير ربك يلطق بعباده

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: