ده المجننا ذاتو

ما أن دخل الأسطي (عباس الحلاق) إلى منزله في مساء ذلك اليوم عائداً من المحل حتي بادرته زوجته (عواطف) وعلى وجهها تبدو علامات الجدية :
– كاتل ليا حيلك كده ونائم بالدولارات دي براااكا !
– دولارات شنو يا وليه إنتي جنيتي؟ أنحنا الدولار ده بي عينا ما بنشوفو ! إنتي قايلانا بنحلق لي خواجات
– بتشوفو ما بتشوفو (الحكومة) ما بتكضب
– والحكومة دي بتعرفني من وين كمان؟
– هي من ناحية بتعرفك بتعرفك بس كدي بطل الحركات بتاعتك دي وأطلع لينا بي كم ألف دولار كده من القاعد تحوش فيهم !
للوهلة الأولي ظن (الأسطى عباس) أن الولية قد أصابتها ملاريا بعد المطرتين (البوظو الدنيا) وجابو الناموس .. وإنو (الكلام الما ياهو) ده لابد أن يكون (هترشة ملاريا) وكده لكنها سارعت بالجلوس على أقرب كرسي لتشرح له الموضوع :
– إنتا قايلني بتبلا عليك؟ هسع قبل شوية دى ناس (الجزيرة) ديل جابو ليهم زول من ناس الحكومة إسمو منو كده عبدالعاطي قال متوسط دخل الفرد ألف وتمنمية دولار في الشهر ! أها بس وريني القروش دي بتوديها وين؟
– يا حاجه ناس الحكومة ديل مزرورين وقاعدين يهضربوا ساااكت ما سمعتي الزول القال قبل كم يوم إنو 85% من المتظاهرين ديل أجانب !
– يهضربو ما يهضربو أجانب ما أجانب ورينا الدولارات الحوشتهم لي هسه كم؟
– يا حاجة دولارات شنو؟ أنا هسه كان حلقتا (للأمم المتحدة) كوووولها بعمل ليا مليون جنيه في الشهر؟
– ما دي لعبتا .. ما لازم تدس الثروة دي يعني مع الدولارات دي عاوز تتعامل معايا بى شفافية ؟ .
هنا دخلت إلى المنزل جارتهم نعيمة زوجة (حسن سواق الركشة) وبعد السلام خاطبت (عواطف) قائلة :
– عليكي الله ما بلاقي ليا عندكم طماطماية طماطميتين ؟ كيلو الطماطم الليلة بقى بي خمسطاشر جنية !
– ويعني شنو كان بقى ما يبقى .. هسه لو بقى بي مية جنيه يعني شنو؟ راجلك ده ما بقبض ليهو في الشهر عشرة مليون بنات حفرة !
– (في إندهاش) : عشرة شنو؟ إنتي جنيتي ؟ وحات الله البيت عدمان نفاخ النار
– والله كان جنيت ما عارفة .. يعني عاوزاني أكضب الحكومة وأصدقك إنتي ؟
– والحكومة قالت شنو؟
– الحكومة قالت أي مواطن سوداني متوسط دخلو في الشهر 1800 دولار يعني عشرة مليون ! أها حسن راجلك ده ما سوداني وللا كمان من ال85% الأجانب !
– (هنا تدخل حسن) : يا عواطف ياخي ما قلنا ليك الجماعة ديل فقدو البوصلة وبقو يهترشو ساكت !
– (نعيمة) : هسه لو دي ما هترشة هسه (حسن) ده أيرادو بتاع (الركشه) في اليوم يعني بالكلام ده يكون تلتمية وتلتين جنيه هو أصلو سائق ركشة وللا أيرباص !
– شوفي يا نعيمة .. ركشة أيرباص أيركوولر غايتو الشئ الأنا عارفاهو الرجال ديل بطنم غررررريقة والحكومة دي ما بتكضب نصيحتي ليكي قبل ما تقطعي ليهو (السلطة دي) وتعشيهو أسأليهو بيودى القروش دي وين !
– (الأسطى حسن) : إنتي شنو شابكانا الحكومة ما بتكضب .. الحكومة ما بتكضب القال ليكي كده منو؟ هسه سمعتي ليكي بي زول نزل المعاش بيدوهو عشرة مليون ؟ سمعتي ليكي بي دكتور بيدوهو عشرة مليون ؟ سمعتي ليكي بي عسكري بيدوهو عشرة مليون؟ سمعتي ليكي بى ست شاي بتطاع عشرة مليون ؟ سمعتي ليكي بي مكنيكي بيطلع في الشهر عشرة مليون ؟
– أجي يا أخواني .. ناس الحكومة ديل مش مسلمين؟ كمان شفتو ليكم (مسلم) بيكضب؟
– (حسن ونعيمة بصوت واااحد) : ما هو دة المجننا ذاااااتو

كسرة :
قال رسول الله صلى الله عليه وسلم (أيكون المؤمن جبانا؟ قال نعم ! قيل له: أيكون المؤمن بخيلا ؟ قال نعم ! قيل له: أيكون المؤمن كذابا ! قال لا ) .. رواه مالك .. ده كلام سيد الخلق يعني ما كلام (الفاتح جبرا) وبقية الأجانب !

كسرة ثابتة :
أخبار ملف خط هيثرو العند النائب العام شنو(ووو و ووو)؟

57 تعليق

  1. بنقوية عدييييييييييييييييييييييييل كدة ما كلو بالباء
    مكندك جدا
    الاول بعد مذاكرة شديدة

    1. هههههههههههههههههههههههههههههههههه,,والله كتلتنى انا بالضحك…
      مبروكة عليك ياخوى…

    2. كتلوني .. مبروك البرنجية
      قف .. العاقل من اتعظ بغيره ( يعني من زار وخف )
      طارق بابكر اريت كل المكنكشين زيك ويستجيبوا من اول
      احتجاج ) نقبل عودتك بعد برنجيتين متتاليتين وعفا الله
      عن ما سلف ..

      1. نعمل شنو ،، قالوا بعد الموافقة علي النشر،، يعني عديل كده ،،. كفايه كفايه كفايه،
        أنا ما. زعلا. ……….ن منكم ولكن زعلان من التكنولوجيا البليده والتي لم تسمح لي من المرور ولكني شربتها برنجيه صافيه قبل البنقويييه الكتلت الحي،،،،

    3. و الله مبروكة يا اللسة حى, و صحيح لكل مجتهد نصيب (شكلك صحيت بدرى الليلة) – و يا ود العبيد هاردلك, نشوفك فى البرنجية الجاية ان شاء الله

      1. الظاهر انو دي موامره كبيره. دبر أمرها بليل والظاهر. صنفوني من الأجانب .
        واهو. يضيع الحق.
        اللذيذ حتي اسمي اتلحس وبقي عبيد بس،، يا الفاتح ما تقول حاجه

  2. برنجية بالإسم

    1. كده وكمان شمتان علي زميلك

  3. البروف والسمار … تحيات
    والله أنا شايف أن ناس الحيكومة ديل ما كضابين نوهائي وفعلاً متوسط دخل الفرد السوداني 1800 USD
    أقولكم ليه ؟؟؟ 85 % من عدد سكان السودان أجانب وشذاذ آفااااق …. و 15% ديل وزراء ووزراء دولة ومستشارين وحكام وليات ومدراء مكاتب للوزراء والمستشارين وحكام الولايات وووووو طبعاً مرتباتهم لما نجي نحسبها بالمتوسط حا تكون أكثر من 1800$ وبتاتاً لا نشك ابداً في صدق مسئولينا ونتهمهم بالكضب وحاشا لله …

  4. يا جبرا يعني والي الخرطوم القال مرتبو سبعة مليون اقل من متوسط دخل المواطن والنائب الاول قال مرتبو ٩ مليون برضو اقل شفتا التقشف كيف اكبر مسئولين في الدولة مرتباتم اقل من المتوسط
    والله قصة
    ههههههههههههههههههههههههههههه 

  5. هههههههههههههههههههههههههههههه,,امس كنت بتناقش مع صديق حول نقطة الاسلام بتاع الحكومة دى ,, واتفقنا على انو الناس دى ما بتعرف شئ عن الدين ومفروض تطلع فتوى بزندقتهم ! اى والله ,,والسووهو فى الدين ما سواهو مسيلمة الكذاب ! سٌب عليهم….
    ويا قسيم الريد الريد فوقك النبى…

    1. الغبوا عرفوهو والعرفو سوهو والسوهو بلقوهو
      اصبحت زي الزول قادل بوسط السوق سروالو نصلوهو

  6. السلام عليكم ، البرف و الاخوان ، اكيد دخلنا 1800 $ فى العشره سنين الفاتو ، ولا يمكن العشرين كولها ، حسبى الله زى قولت د/ شمباتى ، انتو ناس ا لحكومه ، بياخدو كم فى الشهر ؟…………….عجبى

    1. كوكو حمدا لله بالسلامة ….. طبعاً العرجا لي مراحا … خلاص دوراراتك كملن ورجعت لينا …. بيني وبينك ال 1800$ زاتا ما بتسوي حاجة مع المولات البفتحو فيها كل يوم دي

      1. كوكو…سلام وشوق ومحبة…
        بركة الجيت بركة الجيت,,آييييييييييييييييييي

      2. كذا محاوله للدخول ولكن لايسمح لي بالمرور
        أخوكم طارق

    2. (ويلكم باك) يا koko – شفت العربى بالانجليزى دة كيف بالله؟!

  7. الاخوه السمار احتجاب .. لأنو لم يسمح لي بالدخول فلذلك:
    الاخ الفاتح والسمار:
    احتجاب،،
    يعني بالضبط كده لا زايده ولا ناقصه 1800 ضولار وهذا يدل علي الدقه،، يعني مثلا ما قال متوسط الدخل ألفين ضولار،،، احتجبت اليوم عن البرنجيه ولذلك ولانو مافي داعي للكنكشه والكلبشه وزعل السمار ، وعليه احتجبنا، الغريبه ولا واحد من المحتجين علي الكنكشه شربها،

    كندوره ،كنكشه وكلبشه ومعليش كمان الي  كل السمار وطارق اب احمد وخط هيثرو اللي لسه عند النائب العام.

  8. علي عثمان نائب الرئيس لمن فتح الظرف قدامنا وسط
    احتجاجات بعض النواب (لا ياعلي ما تفتحو يا علي )
    وقال بمنتهي الشفافية انو صافي راتبه 10 مليون وشوية
    يعني ( 1666 دولار ) بسعر الحد الادني للدولار .
    ونبي الخرطوم الخضر قال راتبه 7 مليون وحرباشات يعني
    (1166 دولار ) مع انو يوم ربيع قال الكلام ده الدولار
    كان بي 7 الف !! بس ما مشكلة الالف هواده مني …
    يكون قاصد في السنة ؟ كدي نشوفا ( 1800÷12 ×6000)
    =900.000 , لا لا ما بتجي طيب كدي نشوفا في السنتين
    ( 1800÷24 ×6000 ) = 450الف في الشهر . ايييييييي
    لقيتا لقيتا !!

  9. حاج أحمد السلاوى | رد

    بس يا الفاتح أخونا عبدالعاطى دا ما قال لينا ال 1800 دولار دى بعد الإستقطاعات والضرائب ولا قبلها …تفرق كتير ..
    المشكلة إنو الزول دا ورط نفسه جدنس توريطة … مشى يدافع عن الحكومة والمؤتمر الوطنى فى قناة الجزيرة الجماعة فالوا الزول دا ما أديناهو الإذن يتكلم بإسم المؤتمر الوطنى ولا شيتين .. يعنى شلاقة منو ساكت مشى قطر ..مشى يتفولح جاب ضنبه يتلولح ..
    غايتو لاكين جنس شلاقة ..ولقافة ..

  10. يا الفاتح يا أخوي إنت أمش أقرأ ليك شوية إقتصاد وأعرف يعني شنو متوسط دخل الفرد وبعدين تعال اتظارف،،، متوسط دخل الفرد من IMF للعام ٢٠١١: 
    ليبيا: 5787
    تونس: 9478
    مصر: 6540
    سوريا: 5041
    الهند: 3694
    غانا: 3083
    جيبوتي: 2642
    اليمن : 2307
    موريتانيا: 2179
    تشاد: 1865
    السودان: 2726 imf
    السودان ١٨٠٠ حسب ربيع عبدالعاطي
    يعني نقصها ليكم شوية كمان.
    يعني هو فعلا كضاب لانها 2791

    أكتب في قوقل متوسطزدخل الفرد وافهم الحاصل

    1. يا حجر الزلط يا اخوي يعني كلام عواطف مرة عباس ده صاح … هي كان كده ما انا غنيااااان وما لاقي … بالله دخلي الشهري 1800دولار … الفرق بين الدولارات الدخلت جيبي ودولارات الحكومة دي زي الفرق بين الكتابة الجادة المتخصصة والكتابة الساخرة .
      كسره :
      جبره اخوك ده بروف … تفتكر انو ما عارف متوسط دل الفرد يعني شنو ؟؟؟

      1. وينك إنت يا خالد مدني يابتاع الإقتصاد ؟؟
        ليك وحشة والله ، رد الله غربتك غانما” سالما” يا صديقي..

      2. حبيبنا ود الخلا … انت عارف اخوك ما بيتداخل كتير لكن معاكم كلمة بكلمة … بس مرات مرات كده الواحد الكلام بحرقو … آآآآآآآآآآآي زي مل بقول يس .
        المتوسط 1800×34 مليون مواطن سوداني بالقديم ( ؟؟؟؟) = قروش كتيره خلاص
        قروش كتيرة خلاص – التكتح الادونا ليها = قروش كتيره خلاص اكلوها الناس ديل
        شفتا يا ود الخلا المعادلات الاقتصادية دي طلعت الناس ديل حبرتجيه كيف … انت قايل ناس المؤتمر نكرو ربيع الدنيا ده لييييه ؟؟؟ ما عشان كده .

      3. والله لو عارف ما كان قال ربيع كضاب،، وما كان قال متوسط الدخل شهري والمعلوم أنه يحسب سنويا

    2. يا حجر الظلط يا خوي الحكاية ما محتاجة ليها لقراية إقتصاد قليل منه أو كثير ، ولا تحتاج لدروس عصرية يا ظريف إنت يا بتاع الإقتصاد، صحيح أن دخل الفرد بيقاس بالطريقة العلمية البيعرفوها ناس الإقتصاد وهي في حقيقة الأمر كما ذكرته أنت وصححته ، ولكن واقع الأمر يكذب هذه الحقيقة ، فمتوسط دخل الفرد المذكور شهريا” هو فعليا” لصفوة الناس في هذه البلاد، وهمن السكان الحقيقين بما يعادل 15% من السكان أما البقية من الأجانب فليس لهم في الحلو نصيب….
      لو كانت هنالك عدالة وأمانة وصدق بين الناس لكان الحال غير هذه الحالة ولكنها أفعال الناس وعمايلهم سلطت عليهم بذنوبهم من لا يخاف الله ولا يرحم عباده، وكل شيئ بتمنه، والجزاء من جنس العمل،،،
      لن ينصلح حال هذه الأمة إلا بالعودة إلي الجذور والتوبة والأوبة لربهم حتي يُغير الله ما بنا إلي الأفضل!!

    3. متوسط دخل الفرد من الناتج عام 2010م وعلي لسان الخبير / عبد الرحيم حمدي كان 1517 دولار ونحنا الان في 2012 وفقدنا عائدات البترول وفشلنا في الزراعة وحتي كانت في ايرادات وهمية زي المبلغ الافترضو وزير المالية من رسوم عبور بترول الجنوب فكيف زاد المتوسط ؟
      وهل حسب المتوسط علي اساس في عقود عمل لمسئولين فيها بنود بتقول لا يحق لاحد الطرفين كشف بنود العقد لجهة ثالثة ؟
      والعقود الاخري الفيها راتب بره وراتب جوه ؟ وهل تم افتراض ان كل العائدات ستدخل خزينة الدولة ولا عملوا حساب للاموال التي سيتم نهبها ؟
      ربيع من شدة ما جابا كبيرة لمن ناس المؤتمر الوطني خطوا ايدينهم في راسهم وإتبروا منه !!

      1. ياجنوبي ياصديقي وأي سرب يتهادي بين أفياء الظلال يتثني في جمال ويغني في دلال
        مثل عنقود تدلي بين شغاف القلب مال مال مال مـــــــــــال كتير خلاس

      2. إن في عينيكِ سحرا ملء عيني سراب
        دمعةُُ حري هتون وكؤوسٍ من عذاب
        يا ود الخلا ياخوي ما ده المجننا ذاااتو ..

    4. حاج أحمد السلاوى | رد

      أخونا حجر الزلط .. خلاس امشى لربيع عبد العاطى عشان يديك نصيبك .. ال 1800 دولار ..
      هى الحكاية بس عالورق ولا شنو ؟ ياخ الناس ما لاقيه سخينة تاكلها ..

  11. سلام ياقبيلة،،،
    صديقي بروف جبرا وبقية العقد الفريد، شايفك يا صديقي بقيت تعرج الأيامات دي كتير يمين الطريق، وإن شاء الله دايمن!!
    أوافقك كثيرا” ، وكثيرا” جدا” يا صديقي في أن الذي نراه بأعيننا ونسمعه بآذاننا يجنن ويودي المورستان علي قول حبايبنا أولاد الشمال، كما يقولون تحلف لي أصدقك أشوف عمايلك أستعجب!!
    تعرف يا صديقي العزيز أن هنالك فرق كبير جدا” بين المؤمن الذي ورد ذكره في الحديث الصحيح الذي ذكرته وبين المسلم الوارد ذكره في الحالة التي ماثلة أمامنا، وقد قال الحق جلا وعلا في محكم التنزيل في الآية (14) من سورة الحجرات بعد بسم الله الرحمن الرحيم (قَالَتِ الأَعْرَابُ آَمَنَّا قُلْ لَمْ تُؤْمِنُوا وَلَكِنْ قُولُوا أَسْلَمْنَا وَلَمَّا يَدْخُلِ الإِيمَانُ فِي قُلُوبِكُمْ)، وجاء في الحديث الصحيح عَنْ أَبِي هُرَيْرَةَ ، رَضِيَ اللَّهُ عَنْهُ ، أَنّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : ” آيَةُ الْمُنَافِقِ ثَلَاثٌ : إِذَا حَدَّثَ كَذَبَ , وَإِذَا وَعَدَ أَخْلَفَ , وَإِذَا اؤْتُمِنَ خَانَ، وكذلك لما رواه البخاري ومسلم عن سعد بن أبي وقاص رضي الله عنه قال : قَسَمَ رسول الله صلى الله عليه وسلم قسما ، فقلت : يا رسول الله أعطِ فلانا فإنه مؤمن ، فقال النبي صلى الله عليه وسلم : أوْ مُسلِم – أقولها ثلاثا ، ويُردِّدها عليّ ثلاثا – أوْ مسلم . ثم قال : إني لأعطي الرجل وغيره أحبّ إليّ منه مخافة أن يكبه الله في النار .
    وعليه يا أصدقائي الأعزاء فإن كل مؤمن مسلم، وليس كل مسلم مؤمناً، لذلك يحكم للمنافق في أحكام الدنيا بالإسلام، وقلبه خاوٍ من الإيمان، وإن مات على نفاقه فهو في الآخرة من الخاسرين.
    فهذا تفريق بين المسلم والمؤمن .
    والله تعالى أعلم .
    سؤال سخيروني : ما رأي أسدقائي اللدودان الباشمهندزان (السينيان) سنكلوني وسلولو في هذه المعمة؟؟

  12. يا الفاتح تلفوني ٠٩١٢٣٢٨٦٦٦ أضرب لي عشان أوضح ليك أكتر يعني شنو متوسط دخل الفرد أو نصيب الفرد من الناتج المحلي الإجمالي

    1. هناك طرائق عديدة لحساب متوسط دخل الفرد في بلد في سنة محددة:

      = مجمل الإنتاج القومي السنوي (GNP ) للبلد في السنة نفسها ÷ تعداد السكان الكلى للبلد في السنة نفسها.

      = مجمل الإنتاج المحلى السنوي ( GDP ) الحقيقي للبلد في السنة نفسها ÷ تعداد السكان الكلى للبلد في السنة نفسها.

      والفارق بين معدل الناتج القومي ومعدل الناتج المحلى، هو في اعتبار الدخل العائد من مصادر أجنبية، فمعدل الناتج المحلى، هو قيمة الناتج ( بضائع وخدمات )، الذي يتم إنتاجه داخل حدود الدولة . أما معدل الناتج القومي، فيشمل كل ما ينتجه المواطنون في أي مكان في العالم بما فيه الناتج المحلى، ص 1 .

      وهناك متوسط الدخل السنوي للفرد العامل، الذي يشير إلى الدخل المتوسط لمن يعمل في تلك السنة و = مجمل الإنتاج المحلى السنوي ( GDP ) الحقيقي للبلد في السنة نفسها ÷ تعداد القوى العاملة الكلى للبلد في السنة نفسها.

      1. التوزيع المكاني للدخل في الوطن العربي
        د. احمد فؤاد إبراهيم المغازى – مدرس الجغرافية والتخطيط الحضري – بالجامعة العربية المفتوحة لشمال أمريكا
        وقسمت الدراسة الدول العربية على مستوى الدخل إلى أربع فئات:
        الفئة الأولى والتي يقل مستوى دخل الفرد فيها عن خمسة آلاف دولار وشملت دول السودان، وجزر القمر، والعراق، وسورية، واليمن، وجيبوتي، والمغرب، وموريتانيا.
        والفئة الثانية: من خمسة إلى أقل من عشرة آلاف دولار: ويمثلها: الأردن، ومصر، وتونس، والجزائر.
        الفئة الثالثة: من عشرة إلى أقل من 15 ألف دولار: ويمثلها لبنان وليبيا.
        أما الفئة الرابعة: من 15 ألف دولار فأكثر: فتشمل دول مجلس التعاون الخليجي
        ملحق (1) نصيب الفرد في الوطن العربي من الدخل القومي الإجمالي مقارناً بعدد السكان عام 2010م.
        م الدولة نصيب الفرد من الدخل القومي الإجمالي بالدولار الأمريكي عدد السكان بالألف نسمة م الدولة نصيب الفرد من الدخل القومي الإجمالي بالدولار الأمريكي عدد السكان بالألف نسمة
        1 قطر 107721 1699 12 مصر 5269 78728
        2 الإمارات 59993 5386 13 سوريا 4243 20619
        3 الكويت 47926 2675 14 المغرب 4196 31841
        4 البحرين 28169 1235 15 العراق 3177 32481
        5 السعودية 23274 25952 16 فلسطين 2656 4048
        6 عمان 22841 2773 17 جيبوتي 2335 821
        7 لبنان 13076 6572 18 اليمن 2213 23154
        8 ليبيا 12637 5703 19 السودان 1894 40299
        9 الجزائر 7658 35978 20 موريتانيا 1859 3343
        10 تونس 7281 10549 21 جزر القمر 1079 687
        11 الأردن 5300
        نصيب الفرد من الدخل القومي الإجمالي بالدولار الأمريكي عدد السكان بالألف نسمة
        السودان عدد السكان 40299 ونصيب الفرد من الدخل القومى 1859

      2. الخلاصة

        ربيع ما كضااااااب . دة راجل مطلع على اخر الدراسات
        السودان واقع في الفئة الاولى الاكثر فقرا

  13. الما مصدق كلامي ده ممكن يدخل هنا ويشوف متوسط دخل الفرد في الدول كلها من البنك الدولي وصندوق النقد الدولي
    http://en.wikipedia.org/wiki/List_of_countries_by_GDP_(PPP)_per_capita

    1. حجر الزلط .. انا مشيت محل ما قلت لينا لكن لقيت
      انو البنك الدولي وصندوق النقد والمخابرات المركزية
      كلهم ما قدروا يتفقوا علي مبلغ واحد للمتوسط يعني
      نحنا محناهم عدييييل كده !!
      بعدين التلاتة حاسبين متوسط الدخل قبل الانفصال .
      يبقي نحنا مفروض نشوف كم كانت تمثل عائدات النفط
      وباقي العائدات التي كانت تجينا من جنوب السودان
      نشوفا بتمثل كم في المية من الناتج ونقوم نطرحا
      من متوسط الدخل المذكور عشان تدينا النسبة الحقيقية
      لمتوسط دخل الفرد في دولة الشمال , وانا خايف نطلع
      مطلوبين والحكومة تجي تطقطقنا وتخلص حقها عشان البجينا
      من الجنوب كان اكتر بكتييير من عدد مواطني الجنوب الحا
      ننقصم من عدد السكان .
      د. ربيع لو قال الكلام ده قبل الانفصال صادق لاكين هو
      ما قالو بعد الانفصال ياخ .

  14. يا حجر الظلط ما قلنا ليكا الحكاية ماديرة ليها لكاشر أو سكاشن، الموضوع واضح وضوح الشمس في رابعة النهار ، دخل الفرد المذكور صحيح 100% ، ولكنه إندكيشن لدخل السكان الأصليين في هذه الدولة ، أما بقية الأجانب فأمشي أسعل عنهم؟؟
    مالك يااخ زي ما بيقول سديقي الحنين حنين!!!

  15. حجر البتاع…
    فى فرق كبير جدا بين نصيب الفرد من الدخل القومى او ناتج العائدات وبين متسوط دخل الفرد ,, وياتقول كلام فيهو ثمرة او امش على ظلطك دا اقرشو….

    1. البحكن بيهو النسوان كرعينن داك ؟

    2. الجاهل عدو نفسه،، أسأل قوقل وتعال

  16. ربيع عبد العاطي قال الحكومة ما قاعدة تشيل قروض
    وحاة الله كان ما كضاب الترابة دي في خشمنا , معناها
    الشغلة بيع وشراء !!!!

  17. عشره سنه سجن في كوبر والله نحن التجار دخلنا ما بحصل الكلام ده لمن يقعو فيهو خوصمات وشنو شنو وحاجات تانيه حامينى حقو الناس دى تتوب وتبطل كضب ونفاق ودجل عشره شنو والله الكلام ده زى مقوله وزاير هم القال الكيره بتاعن بورسودان جات بالليل وطافيه النور خلاس المره البعد جو بالنهار وجوه المدينه طااااااااااااااخ هاك العشره دى

  18. الحكومة لاتكذب يا هذا ولكنها تتجمل

  19. الاخ جبرا والعقد الفريد سلامات
    شكرا للاخ المندهش وودالخلاء للسؤال عني ولكل من فقدني وتمنعه كيبورتيه للسوال
    شغلتني بعض الظروف الخاصه من متابعة الاخبار وانقطته عن العالم قىتماما
    واليوم رجعنه ولقيت دخلي 1800 دولار اتخلعته وبطني قبضتني وبقيت اقرا واضحك واقفل المدونه وافتحه تاني وقلت ياربي جبرا ديو
    يهظر ولا شنو واصلت القرايه لقيت الكلام جد وما هظار وكلام حكومه كمان عشان كده عندي آله حاسبه ح اضرب بيها الفرق حقي كم عند الحكومه

    1. اهااا يا بت وراق, هسة مشى الجزر كيف؟ و يا ترى لسة اللحمة ربع كيلو و الا بتمشى (الجزار) بتاع الرياض؟؟

      1. جزر جزر شنو تانى من قزاز العربيه وقول لسيد الخرفان لو سمحته ارفع لى الخروف الفوشى داك

  20. عن العالم الخارجي تماما
    انا ما عارفه الكيبورد دا ما لو

  21. سلامات ..
    يا جنوبي .. إنت كرعيك مشققات ولا شنو ؟؟؟ خلي بالك في فرق بين القشف و التقشف ..
    ام محمد : ربنا يكرمك .. والله انا بقيت زاهد في في معرفة المعلومات الإنتي إجتهدتي في جمعها دي لأنها في الآخر غير ماتورم قلبي ما حأطلع منها بحاجه .. عشان كده أنا شايف إنو نحن ننشط في الحاجات دي بعدين .. لمن يكون في زول يخاف الله فينا ..
    يا سديقي يا ود الخلا .. قلتا لي الجماعه ديل يجننو الما بجن .. زي قصة صاحبك اسحق فضل الله لمن قال ( زمن الإستعمار كان في خواجه بيمشي الإندايه يمخمخ .. وست الإندايه كانت بتجهز ليهو الحاجات النضيفه ” جن – كونياك – ويسكي” .. المهم مره صاحبك الخواجه جا زهجان و قال ليها اديني عرقي .. قامت المره تزغرد و قالت ” الخواجه أسلم “)

    1. والله ضحكتنى شديد بالقصة دى . مبالغة

  22. جبرا والسمار .
    سلامات .
    شكرا على شرح التوضيحى لدخل الفرد بالدولار .
    عمر البشير لاقى سلفاكير على هامش المؤتمر . سلفاكير قالليهو نحن هشرة يابشير .البشير قالليهو ياخى ماتزعل دى حركات ساهى بنوهم بيها الكرور ديل ما تاخد فى بالك .

  23. سهيل .. بتعرف الكُركي ؟ بس دي كِرعي ..
    فرق شنو كمان ما كلو بشتنة وشق قيق ..

    ربيع قالوا تاااني في صالون سيد احمد قال للناس
    انا مرقتها من ذمتي وكل سوداني نصيبه 1800 دولار
    والحاضر يكلم الغايب وانها بتمشي وين او مافي عدالة
    توزيع دي ما شغلتي , أسألوا الحكومة !!

    مدرسة العرضة اسم الدلع ( عثمان بن عفان ) مقابل
    جامع فيصل كانت مدرسة حكومية حتي نهاية العام الماضي
    حضر التلاميذ للعام الدراسي الجديد وتفاجاوا بان
    مدرستهم قد تم بيعها لاحد المستثمرين في التعليم ويملك
    مدارس خاصة ولا يعرف التلاميذ ولا اولياء امورهم
    ما هو مصير ابنائهم حتي الان !!
    ( صراحة موقع المدرسة مغري جدا
    قطعة سنقل وتفتح علي تلاتة شوارع ) اييييه يا استاذ
    حسن ابو سبيبه واستاذ سيماوي واستاذ هباش !! زمن .

    مظاهرة للصحفيين المصريين امام سفارتنا بالقاهرة لمناصرة
    الصحفية شيماء لافته كتب عليها :
    ( أفرج عن شيماء يا زول )
    كلمة زول خارج السودان تستعمل للتهكم علي السودانيين
    والكلمة دي حرقتني شديد بس قلت ما بدي الحكومة فرصة
    تستغل سودانيتي . ونتمني من اولاد بمبه انهم يراعوا
    شعورنا وزي ما بنقول الكلام بخور بطن والترجمة بالمصري
    يعني الملافظ سعد …

    1. جنوبي سلامات
      التلاميذ واولياء الامور تم بيعهم قبل المدرسه واصبحوا اجانب

  24. سلام ياقبيلة،،
    جنوبي يا أبقلبا” حار، ما تحرق روحك ساي وترفع ضغطك في مثل هذه الترهات فأولاد بمبا يا صديقي يعتبروننا أوثمانات ولن نرتقي لمستوي البشرية في نظرهم مهما فعلنا فما علينا إلا أن نعاملهم بالمثل، وحينها يا سديقي سيكون الجزاء من جنس العمل وما لا ينفع معه الإحسان تنفعه البسطونة!!

  25. هههههههه الناس البتحسب في متوسط دخل الفرد وعاملين الغلبة دي كلها هو وينو الفرد زاتووووووووووووو ما كلنا طلعنا في الخمسة وثامانية بالمئة يا جماعة الخير حاجة واحدة اعملوها نحرق لساتك ونشوف اخرتها شنو بعدين الناس تكون عنها ثقة في نفسها يعني ليه يجو ناس سيدي مرة ثالثة او يجينا المسيح الدجال ثاني يجب ان يكون لنا رأي ناس كل الناس اتعلمت وفهمت وتقدر تتحمل المسؤولية يعني نطلع وما نقول البديل منو البديل نحنا بتاعين الشارع وغلطة ابريل قدامكم صلحوها والا ايه ؟؟؟

  26. انت ياجبرا متأكد انو دولار امريكي امكن دولار بتاع ناس شرق اسيا ديلك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: