برضو ما لافقة

لا حديث للمواطنين الاسبوع الماضي إلا ما قاله الأستاذ ربيع عبدالعاطي في برنامج (الإتجاه المعاكس) عن أن متوسط دخل الفرد في السودان يبلغ 1800 دولار .. (أي ما يساوى عشرة مليون بالقديم أو أكثر قليلا) .. وعلى الرغم من أن الكثيرين قد ظنوا بأن الأستاذ ربيع يقصد (الدخل الشهري) نسبة لضآلة المبلغ (ونحنا بلد بترولي وكده) وقربه من أن يكون (في الشهر) أكثر مما أن يكون (في السنة) إلا أن الأستاذ ربيع قد صرح (بعد الحلقة) بأنه بقصد متوسط دخل الفرد السنوي .
وهنا قد يتساءل أحد العاطلين عن العمل (هو وينو الدخل من أساسو؟) أو يتساءل أحد باعة مناديل الورق في أحدي شارات المرور (1800 دولار؟ يعني أكون بعتا ليا كم علبة مناديل في السنة؟) .. وحتى نجيب على مثل هذه التساؤلات المشروعة تعالو نشوف إلى اي مدي يمكننا أن نقول بأن متوسط دخل الفرد في البلد الفلاني هو كذا وهل ينطبق ذلك على ما قاله الأستاذ ربيع؟
لنبدأ أولاً بإيضاح كيف يتم إستخراج (متوسط دخل الفرد السنوي) وهنالك عدة طرق لذلك إلا أن أكثرها شيوعاً طريقة GDP وفيها نقوم بحساب قيمة كافة السلع والخدمات الأنتجناها وأستهلكناها محلياً ونضيف عليها صادرات الدولة من الإنتاج المحلي وده بسموهو إجمالي الناتج المحلي GDP – gross domestic product وبعد ين نقوم نقسموا على عدد السكان يطلع لينا (متوسط دخل الفرد السنوي) .
مثال للتوضيح :
لو قلنا أن عدد سكان بلدة 10000 نسمة وأن قيمة ناتجها المحلي (صناعة ،زراعة، رعي، نفط ، غاز،….الخ) بقيمة إجمالية 50000000000 جنيه فإن متوسط دخل الفرد (السنوي) هو 5000000 جنيه (50000000000 / 10000)
طيب لو قلنا أن ما ذكره (الأستاذ ربيع) صحيحاً وأن متوسط دخل الفرد (في السنة) هو 1800 دولار فهذا يعني أن الدخل السنوي لأسرة مكونة من 5 أشخاص هو 9000 دولار وهذا يعني بأن دخل هذه الأسرة الشهري هو (بعد قسمته على 12 شهر) 750 دولار يعني حوالى 4500 جنيه (يعني اربعة مليون ونص بالقديم)
وهذا بالطبع (إفتراء) على الواقع الذي نعيشه إذ أننا جميعاً نعلم (وربيع ذاااتو يعلم) أن متوسط دخل الفرد الفعلي أقل من الكلام ده بكثير وأن الرقم الذي ذكره لا يعكس الواقع لأن الواقع يقول بان العجزة والأطفال والطلاب و(العطالة) ليس لهم دخول كما أن المعاشيين وصغار الأطباء والمهندسين والموظفين والمعلمين والجنود والباعة المتجولين وأصحاب المهن الهامشية وغيرهم .. إلخ دخولهم وراوتبهم أقل من ذلك بكثير.
إن الطريقة الوحيدة (في حالتنا دي) إذا أردنا التوصل إلى حساب المتوسط الفعلي لدخل الفرد هي أن نقوم بحساب متوسط دخل الفرد (المكتسب) فعلياً عن طريق إحصاءآت (دقيقة) إذ إن إستخراج متوسط دخل الفرد السنوي عن طريق قسمة إجمالي الناتج السنوي GDP على عدد السكان رغم أنها طريقة شائعة الإستخدام إلا أن هذا (المتوسط) لا يكون حقيقياً ومطابقاً للواقع إلا إذا صدقت البيانات والأرقام الرسمية (التي لا تصدق دائماً) ، وبغير ذلك تكون المسألأة (دغمسة ساااكت) .
كسرة :
يعني بالعربي كده الـ (1800 دولار دي) لا في (الشهر) لافقة ..ولا في (السنة) لافقة .. يا ربي تكون في (القرن) !

كسرة ثابتة :
أخبار ملف خط هيثرو العند النائب العام شنو(ووو و ووو)؟

Advertisements

82 تعليق

  1. برنجيه

    1. دي فيها مؤامرة —انا مقهي فيها من الساعة كم تجي تشيلا انشاء الله تنفعك
      علي كل مبروك لكن اصبر لي بلاقيك في اللفة

      1. هههههه كان دي مباركتك الله لا جاب يوم شكَلك !!
        انت ما تشيل سكينك وتمشي عليهو ..
        طارق أب أحمد .. مبروكة عليك ..
        انتو طارق عبيد ده يعني يا البرنجيه يا ما داير معانا !!

      2. سلامات يا شذاذ الآفاق
        أنا ما قادر اخش لي كذا يوم وحتي اسمي اتلحس بقي عبيد بس. يا دوبو سمحوا لي بالدخول وكده شوفوا ردودي في المدونه السابقة اللي بس حسه ظهرت

      3. هو ده انت ؟ سمح مااالك قلبت ؟ استلمت الجواز ولا شنو
        عجبني ليك لاكين , تعرف البرنجيه دي زي الفيها جان ان مشت
        اصلا ما بترجع تاني , اسألني انا ..

      4. هاها والله انت الذ شخصيه وزي ما قلت ليك ما قدرت اخش كلو كلو واضطررت اضطرارا بان اخت اسمي بالمقلوب
        عبيد بابكر طارق دكتور

      5. بالمناسبة ما معني في انتظار الموافقة بالرد،، لأنو اي حاجه بقت بالمقلوب،،،

  2. الغريبه يقول ليك الخبير الوطنى ة الدكتور و الشنو ما عارف داك و هو ما بعرف الألف من كوز الدره و فى روايه أخرى …. من سبحان الله

  3. يا شيخ جبرا رغم إنك مشيت ذاكرت وجيت بعد مقالك الفات لكن يبدو إنك ماذاكرت كويس لي سببين:
    السبب الأول: GDP ليست طريقة كما ذكرت وإنما هي المصطلح الإنجليزي لعبارة” الناتج المحلي الإجمالي”.
    السبب التاني: كونو إنه المؤشر ده ما بيعبر عن دخل الفرد الحقيقي ده ما معناه إنو ربيع كضاب،، معناه إنو المؤشر كضاب لأنو من ناحية إقتصادية ربيع ما كضب.
    كسرة: 
    أمشي ذاكر عن حاجة إسمها “منحنى توزيع الدخل” عشان المقال الجايي يطلع ١٠٠٪

    1. “نبدأ أولاً بإيضاح كيف يتم إستخراج (متوسط دخل الفرد السنوي) وهنالك عدة طرق لذلك إلا أن أكثرها شيوعاً طريقة GDP وفيها نقوم ب”

      1. كان تتم الناقصة و تجيب منحنى الدخل مرة واحدة معاك وقت بديت محاضرة في الاقتصاد يا محمد احمد

    2. حجر الظلط .. وإن كنت غليظ القلب فظا لانفضوا من
      حولك …
      متوسط دخل الفرد يتحسب بعدة طرق وال GDP هي اجمالي
      الناتج المحلي وهي طريقة لحساب متوسط دخل الفرد وهي
      ايضا طريقة لقياس حجم الاقتصاد وايضا طريقة لقياس
      معدل التضخم في الاقتصاد ..
      رجاءا يا حجر الظلط القمردينة هي مكان للتنّور و
      التنوير فكن منوّراً او متنور !!
      اكتب ما تريد بالحقائق والاقناع ونحن سنقرأ لك او
      فارق لا تلم ..

    3. يا جنوبي والله أنا ما بكره حاجة في الدنيا دي قدر الإسمو ربيع عبدالعاطي ده، لكن الغايظني أكتر كونو الناس تتغالط في رقم صحيح.
      عندي تعليق تاني الفاتح رفض ينشرو لي وبكتب لي “تعليقك في إنتظار الموافقة”.

      1. حجر الزلط … حجر الزلط … جحر الزلط .

    4. امبارح كان جبرا اخوك والليله شيخ جبرا … ذكرتني عادل امام في : طب الدم اللي في البنطلون ده جيه منين … ما تقعد ياحمد … اقعد ياحمد ياعبد السلام .

  4. أستاذنا الجليل حاول مرة أخرى مثلآ جرب فى العمر

  5. ياجماعة الخير الحجر المظلوط دا مالو داير يكرهنا المدونة … خليك مع قوقل يا ولدنا والمذاكرة والشطارة خليناها ليك

  6. يا حجر الزلط 😦 إنت جادى فى إنو ربيع ما كضاب و المؤشر هو الخطأ

    1. الحديث لابد أن يكون علمياً والنت متاح للتأكد من طرق إحتساب المعادلات الاقتصادية لقياس النمو الاقتصادي والتضخم و غيرها إذ أن الحديث هنا يجب أن يصطحب بإفتراض العدالة في توزيع الدخل بمعني أنه يمكن أن يكون متوسط دخل الفرد السنوي 1800 دولار وبعدم إفتراض العدالة في توزيع الدخل يصبح كلام ربيع صاح ( الحديث يجب أن يركز علي تمركز الدخول في جيوب واحدين )

    2. يا طارق .. حجر الزلط دا شكلو كده جادي .. لأنو متأكد من إنو دخلو فعلآ 1800 ضورار من النوع ابو كديس “جورج” ..

      1. والله يا سهيل أنا ختيت ليكم اللنك لو دايرين تتأكدوا حسب صندوق النقد الدولي والبنك الدولي للعام 2011،، وأفتكر إنو دي تصنف من المؤسسات الإمبريالية الصهيونية العالمة ،،، ولكن هل يؤثر دخلي الشخصي على صحة أو عدم صحة الرقم ؟؟؟
        كسرة:
        دخلي الشخصي فهو وللأمانة والحمد لله يتجاوز الـ 14 ألف دولار، علما بأن 35% منها إستثمارات خاصة من غير الوظيفية..

      2. 1800/14000=7.8 تنفار
        حجر الزلط وانا وسهيل وشمباتي وحنين وود الخلا وجنوبي = سبعه وبت وراق الـ 8. الباقية
        كده تكونو عرفتو دولاراتكم وين … يلاكم نقبض … او نقابض .

  7. الداير يتأكد يخش هنا وح يلقى الرقم أكتر من 1800 دولار ،،
    http://en.wikipedia.org/wiki/List_of_countries_by_GDP_(PPP)_per_capita

    يا عالم الرقم ده كمتوسط بسيط جدا جدا ويعبر عن فقر المواطنين،، هل تعلم أنه في تشاد متوسط دخل الفرد السنوي 1865 دولار؟؟؟
    يبقى حسب كلام ربيع نحن أكعب من تشاد ..
    كسرة:
    أول مرة ألقى لي ناس بتغالطو في أرقم محسوبة من جهات عالمية وموثقة في النت.
    http://en.wikipedia.org/wiki/List_of_countries_by_GDP_(PPP)_per_capita

  8. المشكلة فى الصادق المهدى والترابى والميرغنى والبشير وطة ونافع ومصطفى وفى كل السياسييييييين
    مرضوووووونا وكتلونا
    اللهم اصلح بشيرنا وان لم يكن فية خير فابدلنا ببشير خير منة

    1. اللهم لا تصلحو اللهم عوجو اكتر من ما هو معوّج اللهم
      بدلنا بخير منه وما يكون فيه اسم البشير ده لي عاشر جِد .

  9. فظيع المعاطي ما كضاب وفعلا ده ممكن يكون متوسط الدخل السنوي للفرد… لكن ده دليل واعتراف صريح ان الجماعة ديل شغالين نهب وسرقة وانه قروش البلد ماشة لناس معينين.
    يعني مجموعة صغيرة شغالة تاكل في نصيبنا \”الافتراضي\” من خيرات البلد واللي بتعادل 1800 دولار للفرد.
    خلاصة كلام المعاطي: البلد فيها حبة قرووش وداخلة جيوب وحسابات ال… اكمل الفراغ

  10. الداير يتأكد يخش هنا وح يلقى الرقم أكتر من 1800 دولار ،،
    http://en.wikipedia.org/wiki/List_of_countries_by_GDP_(PPP)_per_capita

    يا عالم الرقم ده كمتوسط بسيط جدا جدا ويعبر عن فقر المواطنين،، هل تعلم أنه في تشاد متوسط دخل الفرد السنوي 1865 دولار؟؟؟
    يبقى حسب كلام ربيع نحن أكعب من تشاد ..
    كسرة:
    أول مرة ألقى لي ناس بتغالطو في أرقم محسوبة من جهات عالمية وموثقة في النت.
    http://en.wikipedia.org/wiki/List_of_countries_by_GDP_(PPP)_per_capita

  11. الحديث لابد أن يكون علمياً والنت متاح للتأكد من طرق إحتساب المعادلات الاقتصادية لقياس النمو الاقتصادي والتضخم و غيرها إذ أن الحديث هنا يجب أن يصطحب بإفتراض العدالة في توزيع الدخل بمعني أنه يمكن أن يكون متوسط دخل الفرد السنوي 1800 دولار وبعدم إفتراض العدالة في توزيع الدخل يصبح كلام ربيع صاح ( الحديث يجب أن يركز علي تمركز الدخول في جيوب واحدين )

  12. يا اخوانا ربيع ما كضب ولا حاجة لكنه اعترف بعظمة لسانه ( مع انه اللسان مافيه عضم ) انه السودان واقع ضمن افقر دول العالم لانه الدخل السنوى المذكور هو اقل شئ . وزي ماقال استاذنا جبرا برضو ما لافقه لانو في ناس كتاااااااااااااار ما عندهم دخل اساسا
    الا يكونو حسبو مستوى دخل الفرد العامل (متوسط الدخل السنوي للفرد العامل، الذي يشير إلى الدخل المتوسط لمن يعمل في تلك السنة و = مجمل الإنتاج المحلى السنوي ( GDP ) الحقيقي للبلد في السنة نفسها ÷ تعداد القوى العاملة الكلى للبلد في السنة نفسها.)
    ولو افترضنا انهم ما حسبو العاطلين والمعاشيين وستات الشاى والكماسرة والمعلمين وعمال النظافة وعمال المصانع والمشرديين … الخ الخ
    برضو مالافقة

  13. اعزائى السمار
    قولوا معاى :
    جبرا ولا يهمك واثقين منك
    كيتن في حجر الظلط

  14. غايتو الواحد لمن يشوف حجم الاختلاسات الحاصلة وحجم
    الايرادات المجنبه يصدق كلام د. ربيع وبالذات لمن قال
    انو مافي عدالة توزيع يعني الفئة الحاكمة قاعدة تشيل
    اكتر من حقها وبعدين يقسموا باقي الفضل علي بقية
    الشعب الفضل وكه يبقي حقنا في الورق شئ والبيصلنا
    شئ تاني !!
    لكن كمان لمن نجي نشوف ان معظم الناتج القومي مبني
    علي افتراضيات زي افتراض رسوم عبور بترول الجنوب ويقوم
    الجنوب يوقف البترول وافتراض انتاج السكر ويقوم المصنع
    ما يشتغل ولأن كل شئ عندنا مبني علي كلمة ( لو ) ولو
    بتفتح عمل الشيطان عشان كده مافي ميزانية بتصمد اكتر
    من شهر شهرين وجري علي الانعاش واخيرا بقت تصمد
    اسبوع اسبوعين بس .
    متوسط دخل الفرد يتم حسابه في الدول ذات الشفافية
    المعلوماتية وتكون الدولة عندها حساب منكر ونكير
    مش في دولة تُنهب اموالها ويجوعونا وقولوا لينا اوعوا
    تحتجوا عشان الجوع من الله واهلنا بيقولوا الله ما شق
    حنكاً وجوعو ..

  15. يا جماعة الخير …. يا شذاذ الآفاق
    ( أحسب أن ) الموضوع تم التطرق له من قبل ولذلك ( أحسب أن ) تعليقي عليه كما في السابق
    و ناس الحيكومة ديل ما كضابين نوهائي وفعلاً متوسط دخل الفرد السوداني 1800 USD
    أولاً :- عدد سكان السودان 34 مليون نسمة منهم 85% أجانب وشذاذ آفااااق يعني 29 مليون
    15% يعني 5 مليون ديل وزراء ووزراء دولة ومستشارين وحكام وليات ومدراء مكاتب للوزراء والمستشارين وووووو طبعاً مرتباتهم لما نجي نحسبها بالمتوسط حا تكون أكثر من 1800$ وبتاتاً لا نشك ابداً في صدق مسئولينا ونتهمهم بالكضب و لا مش كده يا حجر الظلط …

  16. يا اخوانا ربيع ما كضب … لكن متوسط دخلي السنوي ده وينو … حاجه تجنن بوبي ذاتو .. والله بس ياها حيرت بشري : وينو البنوت ووينو الجنيات .
    يقوم الدين على الايمان القاطع بغيبيات اخبرنا بها الرسول الكريم صلى الله عليه وسلم كالايمان بالجنة والنار … وهذا الايمان هو قوام السلوك البشري والمعيار الاخلاقي للتعاملات … ولا سبيل للتأكد العياني البياني من تلك الغيبيات ولكن تصديقا لرسول الله وايمانا برسالته نتعامل معها كحقائق مسلم بها .
    اها والله 1800 دولار ربيع دي الا كان غيبيات … لكن عيانا بيانا !!!! بببح .
    كسره : يا حجر الزلط … دي ما ياها ذاتها نكتة انا اقتنعت البقنع الديك منووووو .

  17. يا ناس يا سمار هدو اللعب وختو الكورة واطة إنتو عارفين وأنا عارف والناس كلها عارفة لافي دخل بالأرقام دي ولا حاجة بس بالراحة كده إذا كان الدكتور البغنو ليه دخلو الشهري 650 جنيه بالجديد بعد سهر جداد ولا نومو في الشهر ( وده السبب الخلاهم يكابسو في السعودية وبقية العالم ) فما بالك بالمهن التانية . ده لو على إعتبار إنه في ( شفافية) في الحسابات وأكيد في فرق كبير بين النظريات الإقتصادية المعروفة واللي بتعمل بيها الدول الماشة عديل لأنه معادلة المصداقية + الإستقرار + الأمانة + التنمية + الصرف الواضح والمكشوف = دولة قائمة على أساس سليم
    مش زي العندنا
    هو الناس دي بتغش في روحنا ولا بتغش في منو
    والله جنس فشفشة والمصيبة بيقولو للعالم ( لا أكذب ولكن أتجمل ) لي منو ؟ وعشان شنو ؟ ما عارف
    يكونو دايرين يحنكو صندوق النقد العربي يديهم قروض على الفرضيات دي
    ولا لا لا لا لااااااااااااااااااااااااااااااا أظن ما عارف !!!!!!!!!!!!!!!!!!!!!!!!!!!!!!!!!

  18. يا ابكروووووون وين إنت ووين بشار (ما الاسد) ..

  19. قالوا ولم نقل
    قالوا انو عبدالعاطي ما كضااااااااااااب كضاب المؤشر
    زمان فى تلفزيون السودان وقبل القنوات الفضائيه طالب المزيعين بتاعين النشره الجويه بي بدل ملابس
    رد عليهم المسول عشان شنو يعني قالوا ليهوا عشان بنظهرفي الشاشه قال ليهم تظهروا ليه خلو المؤشر بس يظهر
    عشان كدي ياخوي حجر عبدالعاطى كلامه صاح ولا ما صاح دي ما المشكله نحن دايرين المؤشر حقه يكون صاح
    (يا حليلك يااااااااااااا خروفي ) ح نرجع الجزر تانى

    1. جزر تاني !! والله الربع ده ماتشوفي تاني الا بيعزف
      ورا فنانة …
      علي الطلاق يا بت وراق لمن جابو خالتنا تشتهي السخينة
      بكيت ….

      1. الما ببكيك شنو اذا كيلو الطماطم وصل 1800 دولار هئ وااااا سجمي قصدي 18 جنيه
        اهئ اهئ اهئ اهئ احييييه ياود امي

    2. مرة تانية يا جماعة الرقموده عبارة عن متوسط دخل الفرد وهذا لا يعني أن كل فرد دخله ١٨٠٠ دولار في العام ، كما لا يعني أن الشعب يعيش في رفاهية بل العكس، ولو بتذكروا في أول حصة إحصاء في الإبتدائي نجد عيوب الوسط الحسابي هي:

      مزايا الوسط الحسابي : أ‌- يأخذ جميع القيم في الاعتبار . ب‌- شائع الاستخدام . ت‌- لا يحتاج لإعادة ترتيب البيانات .
      عيوب الوسط الحسابي : أ‌- يتأثر بالقيم المتطرفة ( الكبيرة والصغيرة) . ب‌- لا يستخدم في البيانات الوصفية . ت‌- لا يحتاج لإعادة ترتيب البيانات .

      1. والله يا حجر الظلط دي ما بتلفق الى يوم يبعثون

    3. اختى بت وراق, و االله زعلت ليك شديد خلاس عشان خروفك الفوشى, بس ان شاء الله ما تكونى خربتى علاقتك مع عم سعيد الجزار و حجة عشة بتاعة السلطة و الدكوة, ياهم الباقيين لينا لحدى ما نشوف قصة ال1800 دولار دى حتقيف وين…

      1. شكله ح تقيف يوم الموقف العظيم

  20. جبرا و السمار سلامات .
    والله ياجبرا الليلة رجعتنا لى موضوع أول أمس وخليت حجر الظلط يتفسح فيك وفينا .
    يا حجر الظلط .قبل كدة شفت ليك كتابة مسيخة . ياها كتابتك دى وتهكمك لا نقبلة .
    قد نتفق مع البروف وقد نختلف معه ولكن لا نتعدى حدود الادب واللياقة . البيت بيتو ونحن ضيوفو
    ياجماعه حجر الظلط دة خلووه يكون قارى الجامعه .
    القلم مابزيل ….

    1. يا حنين شكرا على اللياقة بتاعتك” اللباقة” !
      أول حاجة أنا والله لا بهاتر لا بتهكم والله،، ولو راجعت لي ردود سابقة في المدونة دي بتلقاني من أكتر الناس المعجبين والمؤيدين للحق وليس البروف جبرا أو غيره..
      وما أخفيك والله أنا مداوم علي كتابات الفاتح جبرا من قبل ما تظهر المدونة دي هنا وكنت بشتري الجريدة عشان أقرأ ليه.
      لكن بتصدم حقيقة لم ألقى زول كاتب كبير ويعد منوالطليعة والنخبة المثقفة ويتناول الموضوع بهذه الطريقة من السخرية والتهكم والنقد الشخصي المبني على جهل محكم بأبجديات الإقتصاد.
      والغريب في الأمر إنو ما كلف نفسه يدخل ويكيبديا ويشوف في ثواني هل الرقم صحيح أم لا وكيف يتم حسابه حتى يكتب وهو عالم بالموضوع..
      أنا أقدر كثيرا أن لا يفهم عامة الشعب متوسط دخل الفرد وماذا يعني وما إذا كان مؤشرا للرفاهية أن لا.

      فمثلا كان يمكن تناول كذب الإنتهازي ربيع عبدالعاطي عندما أنكر أن المشاريع التنموية ليست بقروض أجنبية،، فهذه فرية وكذبة واااضحة.
      كما كان يمكن أخذ هذا الرقم “١٨٠٠” دولار كدليل على فقر الشعب السوداني ،، حيث أن متوسط دخل الفرد في تشاد ١٨٦٥ دولار.. يعني ربيع إعترف بي نفسه إنه السودان أفقر من تشاد..
      أما المغالطة والسخرية والتهكم من صحة رقم يمكن التأكد منه في أقل من دقيقة فهذا أمر لا يليق بشخص مثل البروف الفاتح جبرا .
      أنا مع الحق أينما وجد.. والحمد. لله المعرفة بقت متاحة في عالم اليوم وما محتاجة ليها تخصص عشان الزول يتأكد من معلومة بسيطة زي دي.
      والعفو والعافية لأنو في ناس هنا إتضايقو من وجود صوت عقل وسط هذا الزحام العاطفي

      1. أخونا حجر الظلط حياك الله ، اولاً أتفق معك تماماً أن هذا الرقم الذى ذكره د. ربيع هو عبارة عن متوسط دخل الفرد ولا يعنى حتماً أن كل فرد فى السودان دخله 1800$ ولكنها السياسة يا أستاذ التى تجعل الساسة يتشدقون بكلمات مقرونة بأرقام إفتراضية ويملأون الدنيا تصريحات غير مسئولة ، سامحهم الله وكفانا شرهم ، وثانياً بالتأكيد كل من قام بالرد على تعليقك لم يتضايق من وجود صوت عقل وسط الزحام العاطفى، بل هو اختلاف وجهات النظر الذى لن يفسد للود قضية . لك التحية ولجميع أصدقاء القمردينة وللأخ الفاتح جبرا الذى جمعهم على كل خير أنشاءالله.

      2. وكمان يا حجر الزلط انت في حاجة راحت عليك وانو
        المدونة دي اسمها ( ساخر ) سبيل !!والبروف سخر من
        كلام د. ربيع لأنو ما بمثل الواقع حتي واقع الفقر
        المفروض نعيشو بالنسبة دي .
        بعدين اظنو المتوسط المفترض عالميا انو دخل الفرد يكون
        11100 دولار وزي ما قلت انت معناها نحنا فقرانين حد
        الفقر لاكين البقنع ربيع منو انو ده ما انجاز للحكومة
        حكومة الفقر الدمار الكُضُبت والصهينة ..

      3. اخونا حجر الظلط .. ياراجل نحن هنا زي ما سبقوني الإخوه جنوبي و ام ايمن بنتناول المواضيع من عده زوايا و بسخريه كمان .. وزي ماقال د. محمد عبدالله الريح ( غيبونه) يعني الدخول في غيبوبه بسبب الغبينه .. ونحن هنا بنفش غبينتنا مع العلم بأننا كذلك نمارس اعلى درجات الجديه في الحوار إذا اقتضى الأمر ..

        لذلك لاداعي للزعل .. انت وانا و كذلك باقي امدونين نسري هذه الدار بآراءنا و نشاكس و نتحامل و نتحاور لكننا لا نهجر الموقع بسبب رأي أو نقاش حالفنا فيه او جانبنا الصواب.
        وخليك قريب يافرده .. الدنيا مابتستاهل توير النفس دا كلو ..

      4. تصحصح .. نثري بدلآ عن نسري

  21. قصدك شنو يا حنين … يعني نقول بلم الظلط ؟؟؟

  22. سلام ياقبيلة،،،
    يا أخوانا كدي إستهدوا بالله وهدو اللعب وختو الكورة في الواطة دي!!
    إنتو هسي متفقين علي شنو ومختلفين في شنو، وأخونا حجر الظلط (شن بسو) مالكم زعلتوه لينا، ونحن محتاجين ليكم كووولكم علشان الدرب راح لينا في الموية وبقينا ما عارفين البينا من العلينا، وطرونا البينا…. ترمتم وبكت عيننا… ترررلللم وشنو كدة ماعرف البيا…
    يا جنوبي ما تشوف لينا باقي الحكاية دي شنو!!
    علي العموم أنا شايف إنو ربيع ما كضاب وإنو الحساب ولد ، وإنتو من كترت شفقتكم القدت مكنتكم بقيتوا تتغالطوا في أي حاجة ما بتستحق حراق روح منكم ساكت وكمان بس لأنكم مستعجلين ودايرين تعارضوا أي حاجة وتتقاتلون فيما غير معترك!!!
    ال1800دولار دي لوشهرية أو سنوية أو حتي قرنية هي قروشكم الأكلوها الناس ديل بالواضح كدا،، وربيع عبد العاطي عاوز يفتنكم مع (حكومتكم) لأنو قال عاوز يبرئ زمته من الكلام الحارقو ده وبعدها أنتو أمشو أسألو الحكومة عن محل ودتها!!!
    دي دايرة ليها محاضرة في الإقتصاد ولا درس عصر بريال حتي؟؟؟

    1. انا شفت اتنين
      قمري وقمريه
      راكين في جنينة طرونا البينا
      وبكت عينينا
      ود الخلا يا مجنون … ترلم ترلم ..

      1. يا سلام علي السجع والمترادفات … يعني شوفو الجنوبي ده قال شنو :
        قمري وقمرية
        راكين في جنينة = مجنون
        ود الخلا يا مجنون = مجنون
        وجنوبي ذاتو مجنون
        ده الشعر وللا بلاش ويسواز = عامل هندي في الخليج .

      2. خالد مدني سوق معاك اخوك سهيل ده وبالمره امسكو
        اخوكم الصغير شمباتي داك قبل يجي عشان انا وعمكم
        ود الخلا ده عندنا كلام ناس كبااار ..
        دي غنية يا خالد لي فنان اسمو ابوسريع سمعت بيهو
        محمد حسنين ؟
        وبقول كنا الاتنين تالتنا غرام
        عزولنا الليل الطيف والنيل
        خمرتنا إحساس والريد والكاس
        وسكوتنا كلام …
        سمعت سايق البوباي يا خالد ؟
        ياروح غناي وحجاي
        إن جيتنا او ما جاي
        اصلو العشوق رجاي
        سوق لف يمين وشمال
        رش في طريقنا جمال
        نميل محل ما مال
        اصلو الجمال راس مال
        ود الخلا سمح انت مالك مرات تبقي لي عبد الحي عبد الحي كده !

  23. جنوبي ..مالك ؟؟؟ جنيت ولا بتضرضر في التراب ورا ود الخلا ..؟؟؟

  24. شكرا يا سهيل وجنوبي وأم أيمن وبقية العقد الفريد،، الحمدلله كلو زول وضحت وجهة نظره وقدرنا نصل لي فهم مشترك عن الموضوع..
    وأنا والله العظيم ما قصدي أعكر الجو هنا ولاحاجة،، لكن حبيت إنو السخرية والمزاح ما تجي علي حساب الحقائق والتفكير العقلاني الذي هو مفتاح التقدم لهذا الوطن..

    1. حجر الزلط .. ياخي شكرا ليك انت بس انت دخلت علينا
      دخله كده انا قربت اكتب في مداخلتك .. هنا يسكن
      امنجي …ههههههه
      بعدين بيني بينك كدي فتش كده ولا كده ما ناسي ليك
      حاجه تديها لي زول حاجه كده زي دولاااار إعتذااار ..
      اسمع قلت لي دخلك كم ؟ مابلقي لي فيك فرقة لي صُحبة ان
      شاء الله صحبه مسيار .. هههه

  25. احتمال بقصد طوب احمر للبناء او رمل وما تظلموا الراجل ساكت

  26. الليله ساعة المغرب يعني في السودان ساعة العصاري
    وساعة العصاري الضُل يمد فوق الجروف يكسي التبيسات
    الطرح والغيم ينقط من دموعو علي الصفيقات السبح
    يا سلااام ياخ ده ما وكت الجبنة حقت امي !! الله لا
    تاجرك يا البشير يا المرقتنا في اخر العمر نكوس الرزق
    في بلد الناس …
    المهم يدي التنقطع دي لعبت في الريموت وجابت قناة
    النيل الازرق ولقيت لقاء مع شاب في مقتبل العمر
    جابو اسمو في الشريط ( د. أشرف منو كده ..مدير مشروع
    توطين تقانة وانتاج فطر المشروم بالسودان )
    وجابو ليهم يجي اكتر من خمسة تنفار ما بين بروف ودكتور
    شئ سودانيين وشئ مصرين وهنود وماليزيين يتكلموا عن
    فوائد المشروع الاقتصادية والغذائية !!
    د. اشرف قال زاد الطلب علي فطر المشروم في السوق
    نسبة لزيادة عدد الاجانب في البلد وانو الدولة بقت
    تستوره بكميات كبيرة عشان كده جات فكرة التوطين !!
    ( طيب ما توطنو القمح والبطاطس والبصل ) بالله ده
    كلام ده السعودية فيها ملايين السودانيين يوم واااحد
    ما سمعنا بيهم وطنو الويكة ..
    وعلي الطلاق نفس البرنامج في الاستراحة جابو نشيد ديني
    كده ما ختيت ليهو بالي شان كلام د. اشرف ده طلع ؟؟
    المهم الصور المعروضة اثناء النشيد كانت لنساء دارفور
    شايلات شوالات الاغاثة وبعد النشيد طوالي جابو لقاء
    مع شاب برضو في مقتبل العمر اسمو استاذ منو كده منصبه
    شنو كده في جمعية منظمة الرحمة الخيرية واول ما بدأ
    كلامه قعد يشحد في الناس عشان تتبرع لتوفير وجبه افطار
    الصائم للاسر الفقيرة ..
    ود الخلا .. فطر المشروم ده مش ياهو ( ود الواطه )
    خالد وشمباتي فطر المشروم مش ياه ( ؟؟ الواطه )

    1. يا جنوبي سويتا شينه … لي ود الخلا ود والواطه ولينا انا وشمباتي علامات استفهام الواطه ؟؟؟ لكن بيني وبينك شمباتي يستاهل وكذالكا سهيل .
      قلت لي فطر المشروم … الله يشرم نافوخو .

      1. وااااااااااااااااااااااااااااى,,,بكلم ليكم !!!
        وكمان عدد العلامات ! امممممممممم
        وجرى كدى وجرى كدى

    2. يااااااااااااهو ظاتو، وكمان جايبين ليهو صور مقززة ذكرتني أيامنا الزمان زمن كنا صغار ، عندما كان الخريف خريف بيوقف اللواري والمصاريف، ويكترن التعاريف علي ستات الكسرة،،، ويقوم ود الواطة داك المابيغباني وريحته الكريهة ديك (بتذكرك بريحة شنو؟؟(ما فلوردامور طبعا”)كان زمان يا سديقي.. وناس كبار وسغار في جريف حلتنا، نمشي جنب الساقية…
      قلت ليا مرات مرات ببقا ليك متل عبد الحي ،،،
      مش أحسن من ما أبقي متل الشيخ حسن!! ياودحسونة الفوق حسن أبو جلابية أبو قبة لبنية!!!

    3. هو والله ذاتو انا ما عارفكم بتلقو الحاجات دي وين … توطين تقانة المشروم آآآآآآآها … محن … والله سوت لي الحسكنه

      1. ههههههههههه والله يا خالد الشئ ده كان في الخريف
        بيملأ الخلا البين العباسية وامبده ملي , بلا نشلتو
        بالكرعين , وكنا قايلنو سام , اصلي ما كنت قايلو
        بياكلوهو , اول مره اكلتو بلا قايلو كلاوي ..
        هو زاااتو الحكومة دي ما توطنا نحنا المضايقين خلق
        الله في بلادم ديل , ود الواطة ده متييين اشتكالم من
        الغربة عشان يوطنوهو !!
        انا خايف الهايف داك يجي يرقص لينا في حصاد ( ؟؟ )
        الواطه …

      2. ( الخلا البين العباسية وامبده ) ده زمن المهدية مش ؟

      3. يهد حيلك انت يا شيال الحال , انا الكُبر ناكرو !!

      4. تعرف يا خالد مدني ياصديقي أنا من زمن أسائل نفسي وأقول يا ربي جنوبي ده حاضر زمن الأنجليس ولا يكون دفعة جدو سلولو، ولا يمكن يكون دفعة الناس العملو السودنة
        قال الخلا البين العباسية وأمبدة قال!!
        آه منك آه يا ديناصور إنت يا جنوبي إنت،،،

  27. الناس ديل الله يهديهم ناي تصاريح ساااااااااااااااى وكلام كلو ملفق وحايوديهم التوج

    بعد شويه نسمع انو سعر الخبز ٤ بجنيه وعلي مشهدينا فى الاقليم مرعاه فروق الوقت عفوأ الوزن

    1. هههههههههههههههههههههههههههههههههههههههه
      والله امبارح القريبه دي اشتريت العيش من الفرن طازج يعني لقيت العيشه قدر كفت يدي بدون اصابع قلت لناس البيت سجمى يدي كبرت ولا العيشه صغرت

  28. يعنى و بعد الردود الكثيرة – ممكن يابروف نعرف الصاح شنو – يعنى دخل الفرد الصحيح فى السودان كام ؟؟؟و لا دى كمان دايرة ليها كسرة – يابت وراق بلاش عيش اوكلو كسره !!!!!!!! او كما قال (اسق ) عبدالرسول !!!

  29. الخلاصة وزي ما بقولن امهاتنا بدون فلفسه وفلهمة
    الميزانية معجزه 2 مليار دولار وشوية وطالما البلد
    حقتنا كووولنا يبقي مطلوب من كل سوداني
    ( 2 مليار وشوية ÷ 33 مليون وشوية ) يعني تقريبا
    الحيكومة طالبة كل مواطن 60.60 دولار × 7000 = 424200 جنيه
    بالقديم عشان مايدقسونا ويدفوعنا بالجديد وكمان الداير
    يدفع بالجديد يدفع 424 جنيه بس !!
    او كمان كووولنا يوم الجمعة الجاية نسميها موسم الهجرة
    الي الجنوب ونمشي نقول لسلفاكير ده عليك المسيح يا سلفا
    وعليك الفول وزيت السمسم البينا كان ما فتحت البير
    دي وبنشيل منك في البرميل 12 دولار بس ونستر حالنا
    وتستر حالك ..
    وكان سلفاكير ابا نقوم كووولنا نجي راجعين وكل واحد
    يدفع للحيكومة قروشا , بالله شوفو قوة عينا دي الحكومة
    طالبانا بدل ما نقول ليها كتر خيرك نقعد نفلع
    فيها بالحجار ونحرق ليها اللساتك ؟!!

    1. هووووووووووووووووووووي يا جنوبي زي ما قال المثل (فى حزنكم مدعوين وفي فرحكم منسيين ) الحكومه ما قالت نحن اجانب
      وشذاذ افاق ندفع لي منو

      1. بت وراق عليكي النبي شوفي سماحة الشعار ده :
        ( نحو شراكة مثمرة بين الدولة والمغترب )
        المغترب الفصلوهو من شغلو باسم الصالح العام !!
        المغترب الاهلو باعوا ليهو بقرة حلوب يسر ضرعها
        الناظرين مع عجلين عشان يشتروا ليهو اقامة !!
        المغترب المتخرج بي تفوق ورفضوا يشغلوهو في السودان
        عشان ما من الجماعة !!
        المغترب الخلوهو يقفل دكانو عشان ما قادر يدفع
        الضرائب !!
        هسع لو فرضنا نحنا قبلنا نشارك الدولة , أها نحنا
        حا ندفع قروش الدولة حا تدفع شنو ؟

  30. جنوبى . والله حيرتنا
    يعنى أسع لو كل سودانى دفع العليهو الحال بينصلح والقروش دى بتخش خزينة الدولة وتانى برخسوا لينا السكر والبنزين .؟و (متوسط دخل الفرد السنوي) GDP حايستعدل ويصل 11 الف دولار وحانصل للرفاهية.
    الله فى

    1. حنين .. وحاة حنيني اليك تدفع وتقول ياريت زماني
      الفات يعود تاني ..
      فلّع فليعك يازول دي طرطشة مني ساااكت ..

  31. حنين : كدي جرب ادفع إنت الاول .. كان الحاجات رخصت .. انا برررررضو ما بدفع

  32. يا ناس يا هو كل كتاباتنا راحت ادراج الرياح يعني مش فاهم ليه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: