نعم للفساد .. لا للإصلاح

العنوان أعلاه هو شعار لصفحة إليكترونية على (الفيسبوك) إسمها (الحقيقة السوداء) قامت بإنشائها مجموعة من الشباب (الأردني) يسخرون فيها من الفساد الحكومي الذي ضرب بأطنابه الكثير من مفاصل الدولة ودواويين الحكومة وقد درج هوؤلاء الشباب على عمل وقفات إحنجاجية سلمية أمام مقر رئاسة الوزراء وهو يرتدون ملابس (سوداء) ويحملون بوسترات (سوداء) كتبت عليها “الحقيقة السوداء.. نعم للفساد .. لا للإصلاح” .
وقد درج هؤلاء الفتيان والفتيات في وقفاتهم الإحتجاجية هذه على عدم حمل أية شعارات أو يافطات (حزبية) بل إنهم يكتفون فقط بتكميم أفواههم ورفع شعارات تنادي (بالفساد) وعرقلة (الإصلاح) وذلك في رسالة مباشرة إلى المسئولين بالدولة الأردنية (الهاشمية) !
لقد إستخدمت كثيرا من الشعوب ومنذ القدم (السخرية) كسلاح ضد القهر والقمع وتكميم الأفواه وها هي الشعوب العربية تسخر في أحلك الظروف وهي تواجه الأنظمة الباطشة خلال الثورات التي شهدتها الساحة العربية مؤخراً .
عزيزي القارئ إسمح لي بأن أنقل لك بعض مما يكتب على اللافتات (الساخرة) التي يرفعها أعضاء جماعة (الحقيقة السوداء) الأردنية وهم ينظمون وقفاتهم الإحتجاجية السلمية أمام مقر مجلس (الأردني طبعن) !!
– نعم لتدخل المخابرات في كل مفاصل الدولة
– تسقط التنظيمات والأحزاب المرخصة وغير المرخصة
– نعم لسرقة قوت الشعب
– نعم لخصخصة المواطن
– نعم لبيع مؤسسات الدولة
– نعم للذل والإهانة
– الحياة حلوة بس تفهمنا
– راتبي بكفيني 57 يوم بالشهر
– أنا بدي أعبر عن رأيي .. إذن أنا عميل أجنبي
– بلا سياسة بلا وجع راس .. البندول غالي
– توبة دي آخر نوبة
– أنا مش بعتب عليك .. خدني بحنانك خدني
– مااااع .. ماااع .. أنا خروف
– كتم الأنفاس مطلب شعبي
– نعم لتزوير الانتخابات
– نعم لتوريث المناصب
– نعم لفتح مكاتب للبلطجة وأخذ إذن التظاهر منهم
– أنا إمّعة
– نعم للفساد والفاسدين
– طيري طيري يا عصفورة .. حكومتنا شو غندورة
– نعم لرفع الضرائب
– مين حكى في عنا فساد ؟
– افتح فمك عند طبيب الأسنان فقط
– الرشوة .. الفساد .. المحسوبية .. فاكهة الحياة
– مش بدنا نعرف مين باع خط هيثرو

إنتهت لافتات (الحقيقة السوداء) فدعونا نستعرض بعض لافتات (الحقيقة المرة) :
– الأرزاق بيد الله .. والتضخم برضو
– سوف نمنع الأجانب من التظاهر بدلاً عننا
– هذا أفضل وضع تمر به البلاد .. قرضوو على كده
– لو ما جينا لبلغ سعر الدولار عشرين جنيه
– نحنا شذاذ آفاق وحمير كمان .. مش متحملين ده كووولو
– مافيش داعي لنيابة الثراء الحرام نحنا أصلا ما بنشك في ذمتكم
– أقطع ضراعي نحنا أكتر دولة (مطبقة) الشريعه و(قاعدة عليها) !
– إبن حلال يدينا تصريح بمظاهرة سلمية
– نحتج على أيه ؟ المرتب مكفينا وزيادة .. والدولار نازل في مواجهة الجنيه .. والمواصلات فاضيااااااه
– حد يعترض على إرادة ربنا؟
– حواء السودانية ولدت 50 (كوز) …. وعقرت !!
– 1800 دولار في السنة؟ ده نحنا في نعمة يا شباب
– مش الشيكل (الإسرائيلي ) ما من العملات الإتسرقت؟ يبقى مفيش مشكلة
– الله يخليكم كمان وكمان .. 75 سنة تااااني
– المتظاهرون لا يتعدون أصابع اليد الواااحدة !
– مافيش مشكلة : نأكل السدود ونحلي بالكباري ونتعالج بالطرق !

كسرة :
خط هيثرو موضوع مع اللافتات الأردنية ليه؟ يكون مشى يتعالج؟
كسرة ثابتة :
أخبار خط هيثرو العند النائب العام شنو(ووو و ووو)؟

Advertisements

91 تعليق

    1. مبروك علييييك الليلة يا بتنا….

    2. حاج أحمد السلاوى | رد

      بت وراق .. مبروكة عليك البرنجية .. والله قدر ما حر سناهو اليوم ما لقينا طريقة .. يعنى ما ننوم ..ولا شنو ؟؟

    3. و الله فرحت ليك من كل قلبى يا بت وراق – و الظاهر عليكى قنعتى تب من ال 1800 دولار بتاعتك, و من ربع كيلو اللحمة اللى كل 6 شهور داك و قلتى احسن اقابل الكيبورد, بالبركة و السعادة و البخاتة عليك يا يمة …

  1. الخمستاشر كملت تاني تشموها قدحه

    1. مبروك البرنجيه
      تشموها قدحه !! الحس كوعك !! الراجل يقابلنا في
      الشارع !! نقلي الناس !!
      الشعب السوداني ده كلو طينة وااااحده ..

      1. سلام ياقبيلة،،
        ده الشعب السوداني يا فردة، نسوانو رجال ورجالو رجاااااال!!
        رايك شنو، عندك كلام تاني؟؟

      2. آآآآآآآآآآآآآآي كلمه بالله وكلم عمر كمان

      3. كلمناو – لكن البيقنع الديك منو ؟؟؟

  2. برنجييييييه،. 
    !!!    !!  تعليقك بانتظار الموافقة باالنشر!! ؟؟؟؟ دي معناتها شنو،، حاجه تعقد ذاتو

    1. هههههههههههههههههههههههه,دا اسمو تواطؤ يا حبيب !!

  3. كان كده خوفي يجيبو خط هيثرو فى تابوت
    ونقبم العزاء فى السودان

    1. الارادنة خط هيثروهم اتلحس برضو؟

      1. لا لا يافلاديمير دا خطنا نحن ذاتو لكن اخونا جبرا سفروا الاردن للعلاج

  4. بت وراق ،،، الف مبروك البرنجيه ولكن بعد كذا مره،، ما ح تقدري تخشي الا تقلبي اسمك ،،،، اسأليني أنا

    1. ما مشكله ح اكتب الاتنين بت وراق (وراق بت )واشوتوم البدخل اول يكون تمام لكن زول تاني (ابدا وطبعا لا)

      1. المره الجايه اقلييهو
        وراق راجل

      2. هي القلبه في (الاسم) ولا في شئ تاني وووووووواب علينا

  5. ونعم بالله رضينا بالفقر ما دام الفقر من عند الله

  6. ما أجمل لغة النافع و القذافى و ما أجهلك يا طه حسين والطيب صالح

  7. يا خرطوم غورى غورى الحاكم العادل سيد كافورى

    1. 2 Like

      1. هههههههههههههههههه,,,حلوة وملعوووووبة يا اب احمد…

    2. يا اب احمد, لمن ما نفعت الاولى قلبتوها ل(سيد كافورى) – كلام يا عوض دكام

  8. البروف والسمار .
    صباح الخير .
    يا جماعه لو ختيتو الرحمن فى قلبكم وإقتنعتو بى الرزق المكتوب ليكم لا إرتفاع دولار بأثر فيكم ولا غلا معيشة بيعمل ليكم حاجة . قبل كدة سمعتو ليكم بى زول مات بسبب إرتفاع دولار ؟
    مالك ياخ ….

  9. خارج السياق
    قال ليك حناكيش طلعوا مظاهره (( مافى بيرجر – مافي عصير – يسقط أونكل البشير ))
    البوليس فك فيهم بخور تيمان

    1. يا أب أحمد .
      أوعى بس يكونو أغمن عليهم وشالوهم بالاسعاف

      1. الي مستشفي الزيتونه

    2. هههههههه قوية .. لاكين الفئة كترت في السودان ما
      عارف لييه ..!

      1. الفئه ياته ؟ الاجانب ولا شذاذ الافاق

    3. بمناسبة الحنكشة والحناكيش ياحنين ويا أب أحمد يا أسدقائي وزمن الدنيا كانت طيبة والحياة كانت أحلي والحكومة دي كانت حنينة وسكرة قبال ما تقلب لينا ظهر المجن وفي أيام صيف العبور الكانت نسايمو هابة وجايبة الطراوة وفي أحد تلك المتحركات وقع هجوم مباغت علي المتحرك وأتخمش الناس في كمين معتبر (كوماج) وكل واحد طبعا” أخد الساتر وبدأ التعامل مع الكمين حتي أنجلت المعركة وأنقشع النقع، فقام الناس يتفقدون بعضهم البعض، فإذا بأحد الحناكيش وهو جديد لنج ويحمل علي كتفه دبورة زي عصفورة وزي ما بقولو الضابط العاجب خالتو (مافي داعي لذكر منطقته فهو من إحدي المدن المثلثة)، قام هذا الحنكوش وبدون أن يشعر أو يحس بالناس الحواليه أخذ ينفض الغبار عن ملابسه وجسده بتلك الحركة العفوية التي يفعلها الناس عادة، فنظر إليه الأشاوس وهم مستائين غاية الإستياء من تلك الحركة وصاح به أحدهم : معليش يا سعادتك هاك المعطّر ده!!!!

  10. خط هيثرو موضوع مع اللافتات الأردنية ليه؟
    حد يجاوبنى

    1. يكون جبرا قنع من الاجابة هنا مشى يكوسا في الاردن

    2. والله يا أم محمد عمرك أطول من عمرى ، لسه بقول خط هيثرو بتاع ناس الأردن كمان ضاع واتباع ، اللهم لا تؤخذنا بسوء أعمالنا.

  11. فكره حلو والله لكن الطير ديل برضك بفكو الببان ونبقافى ى الجرى يا بروف

  12. يا اخواننا هوي .. الناس ديل مافاضين لينا ..

  13. المشكلة فى الصادق المهدى والترابى والميرغنى والبشير وطة ونافع ومصطفى وفى كل السياسييييييين
    مرضوووووونا وكتلونا
    اللهم اصلح بشيرنا وان لم يكن فية خير فابدلنا ببشير خير منة
    منقوووووول

    1. يصلحو لي رقبته 000 نحن الدخلت فينا دخلت

      1. لي رقبته ذاااتا ما يصلحو خلوهو عولاق كدي بس .

  14. قبل فترة جابو مظاهرات في لبنان كل المتظاهرات مُذذ
    جايبين نففففففس اللساتك النحنا قعد نحرقا دي بس هن
    مزينات اللساتك بي شريط الهدايا وخاطات فيها زهور
    وبعض اللساتك فيها رسومات وجن ختن اللساتك دي في نص
    الشارع بعد شوية جاء البوليس حقهم وبي كل ادب قعد
    مع النسوان ديل واتناضموا واخدوا معاهم صور تذكارية
    وكل واحد رجع بيته !!!! ( يا الله لبنني ) ..
    هسع ناس الاحتياطي المركزي حقننا ديل كان الزول اداهم
    وردة , ياربي بعرفوا انو دي وردة !!؟

    1. هههههههههههههههههههههههههههههههههههههههههههههههه
      احي قطعت مصاريني
      ورده الجزائريه وماتت

    2. like

    3. و الله حلوة و ملعوبة يا سديقى الجنوبى – قبل فترة ليست بالقليلة كنت فى بانكوك و قام انقلاب على رئيس الوزراء هناك, فالدبابات طلعت و أمنت المواقع, بس كلها كانت مركبة زهور فى مدافعها, و الجكس التايلندى يرموا عليهم ورود كمان (واحنا واقفين نتفرج) !!!

  15. جنوبى . كيفك؟
    ( يا الله لبنني ) ..إنت ماتتم الناقصة وتقول( ياالله مزمزنى)…

    1. ههههههه يومتا بشوف اخبار سوريا لقيت بشار ضارب
      حته اسمها ( المزة )!! بالله اسم يفتح النفس زي ده
      يضربوهو !!
      يمزمزني واقوم اشيل قماش بنفسجي واكتب فيهو
      ( منحبك يا بشير شو مهضوووم )

  16. انتو ياخوانا ملاحظين اخونا جبرا بقى يخت لينا جك المويه ويعاين لينا بالشيش بس

    1. فظييييييعه يا وراق بت .. كع

      1. كان بعاين بالشيش ذاتو ما كعب

  17. -نحن ما حانسلم الحكم الا لي عيسى عليه السلام.
    -نحن حانقعد في الحكم احدي يوم القيامة العصر.
    -حانحكم و لو فضلت لينا توتي بس.
    ‏(و الما عاجبو يلحس كوعو).
    من درر النافعابي اكرمه الله و امد في عمره علشان يطلع عين ام الخلفونا.

    1. يا عيسي تعال لينا
      يا عيسي الحقنا
      يا عيسي نحنا والحكومة غلبنا النسوي
      يا عيسي الرووووووووب

  18. حاج أحمد السلاوى | رد

    والله يا جماعة إنتو ناس حاسدين حسادة شديدة … فيها شنو يعنى لو ناس الإنقاذ شالوا ليهم شوية دولارات لحسابهم الخاص ..حسه عليكم الله أكان أى واحد فيكم سووهو وزير ما بيخمش ليهو كام خمشة قبال ما يشيلوهو من الكرسى ؟
    نعم للفساد لا للإصلاح …وحقو يسووا هيئة يسموها النهى عن الإصلاح والأمر بالفساد ..

    1. هو نحن الببقين وزير منو ما الجماعه مكنكين وفي الكراسي ملصقين

  19. منكنكشين تتر جم الي : كلمه وحيده في مساحه بيضاء تنتظر الرحيل!!! من ايدي الظلم الي الجوعي…

  20. مكنكشين مره اخري باملاء صحيحه: سيناريو اعاده الغسيل من بدايه القصه لتنتهي الحبكه بنفس المشهد!
    من القصص التي لا يفهمها ذوي الاتجاه الواحد…من السياسين المحليين.

    1. انا شكلي كده اتجاه واحد … ما فهمته منك ولا حاجه . وشمباتي ذاتو ما فهم معاى .

      1. وأنا برضو!!

      2. ياخالد مدني وشمباتي وودالخلا الما فهمتو شنو الكلام دا واضح وضوح الشمش
        يعني بالواضح كده كل وزير مكنكش مده طويله بيكون اتلوس واتملا وسخ من اكل الحرام يقوموا يدوهو فرصه جديده في وزاره جديده عشان يغسل وسخه القديم بواحد جديد
        هييييييك هي القصه

      3. بالمناسبه انا سياسيه دوليه متعددت الاتجاهات

      4. يا وراق راجل
        اتجاهات متعدده سياسيه دوليه انت مناسبه
        اي حاجه بالمقلوب

      5. الله يقلعك يا خالد ! مالك على ياخ ؟؟انا فااااهم ومستعد افهمك ,, بس انت كيف تجى !!

    2. يعني محل الغسال ده فيهو عاملين لا تالت لهما بس ممكن
      يتم تغيير المكان يعني بتاع المكوه ( المكوه بالسوداني
      عشان ما يجيني واحد ثقافته خليجية ويقول لي احترم نفسك )
      يقوموا يمسكوهو طشت الغسيل والكان في الغسيل يدخلوهو
      في المكوه ( برضو بالسوداني )والساسيين المحليين ياهم
      الزبائن …
      في السعودية معظم المساجد بتكون حكر علي اسرة واحدة
      يعني تلقي الامام والمؤذن واحد فيهم ابو التاني , مره
      مسجد جمبنا قاعدين حارسين الامام اتاخر والناس بدت
      تتململ وقالوا يقيموا الصلاة ويقدموا واحد قام المؤذن
      وبنبرة تهديدية وقال ( ترا لا يكتر هرجكم , المستعجل
      يروح يشوف مسجد تاني )!! يعني امام وااحد هو البيصلي
      هنا وممكن المسجد يتغير لاكين الامام لا ..

  21. يستحق الاهتمام شكرا

  22. أخونا الفاتح
    تحياتي لكم موضوع ال1800 دي اكن هو ماقاصد الدوالار الامريكي امكن جنيهنا سموه دولار ونحن ماعارفين ولا شنو ؟؟؟

  23. السمار ….سلام
    دي الإرادة و نحن ما بنقدر نجابه المستحيل
    و دي الإرادة و المقدر ما بنجيب ليهو بديل ….. آآآآآآي

    1. يعني نخليهو كدي ؟ غصبن عني وغصبن عنك

      1. خليهو لي الله …. خلاس نحنا الفينا مشهودة والباقي على ربُنا

  24. أ. محمد فضل الله الدرديري / عضو الآلية العليا
    للمعالجات الاقتصادية ولاية الخرطوم ..
    قالوا خبير اقتصادي لاكين انا ما متأكد من المعلومة دي !!
    قناة الشروق جابت استطلاعات مع المواطنين عن السكر
    المدعوم الذي وعدهم به نبي الخرطوم الخضر بمناسبة قدوم
    الشهر الفضيل بعض مواطني محليات الخرطوم قالوا استلمو
    سكرهم كامل ومواطني محليات اخري قالوا استلموا نص
    الكمية المقررة لهم ومواطني محليات اخري قالوا ما
    استلموا اييييي حاجه !!!
    المذيعة سألتو ليه في ناس ما استلموا ؟
    قال ليها وليه ما تقولي في ناس استلموا ونحنا اصلوا
    السكر ده بنوزعو بي طيارات وهو زااتو الوالي اتفضل
    بالسكر للناس وهو زاتو ده ما سعرو الحقيقي والقرار ده
    من اتفضل بيهو الوالي يا داااب ليهو اسبوعين بس الناس
    دي ما تصبر ما بنديهم ..
    المذيعة قالت ليهو لاكين رمضان ما دخل علي الناس دي ؟
    قال ليها وهو متين نحنا قلنا ليكم حا نوزعوا قبل رمضان ؟
    انتهي …
    طيب يا سيادة الخبير تعال اسمع رأيي انا الما عندي
    أي فهم يبقيني خبير اقتصادي ولا يبقيني عضو آليه :
    مفروض اول تشوف السكر المتوفر في يدك وتجي تشوف عدد
    المحليات كم وكل محلية فيها كم اسرة وترجع تشوف نصيب
    كل اسرة من السكر المتوفر عندك في المرحلة الاولي وتدي
    كل محلية علي حسب عدد الاسر الفيها , بعد داك السكر
    ده يكفي الاسر دي يوم ولا عشرة يوم تبقي انت عملت العليك
    وعداك اللوم وكل ما تجيك كمية توزعا بي نفس الطريقة
    لاكين يا محمد فضل الله لمن تدي محلية كوتة شهر كامل وتخلي
    محلية تانية بدون سكر معناها انت لاعندك آليةولا عندك
    فهم زاتو ..

    1. يعني يا جنوبي إنت العندك فهم ؟؟؟؟
      إنت نسيت أهم حاجة … قالوا ليك دي آآآآآلية وعليا كمان يعني فيهم كم آآآآلة كدة …. نسيت نصيبهم من الكوته دي كيف أنا ما عارف ؟؟؟ أفهموها بأة

    2. ياجنوبى .
      إنت لاك عضو فى آلية ولاك خبير ولاك إقتصادى بتتشوبر مالك فى إختساس الناس المتخسسين .
      أها قول فى محليات كاملة وكتيرة لحدى أسى ما وصلا السكر مايصبروا شوية هى الدنيا دى طايرة وبعدين حقهم محفوظ إنشا الله لحدى الضحية حايجيهم . وبعدين إنو ما مقتنعين إنو الارزاق دى بإيد ربنا ولا شنو .
      آآآآآناس…..

      1. لاكين كده ما حا يدوا لأمريكا واسرائيل فرصة ويجو
        يقولو لينا مش الحكومة ابت تديكم السكر ؟ اوعكم
        تصومو رمضان !!
        الحكومة دايما بتدي فرصة للاعداء يبقو بينا وبينا ..

    3. انت محمد فضل الله دا عم اسحق احمد فضل الله

    4. إنتو يا جنوبي مش ياكم الزمان ياناس كنتو (شحاتين) ، وبتنوموا في صف البنزين وبتقوموا لي صف الرغيف مع النجمة !!!
      هسي بعد شبعتو وبقيتو ناس زي الناس وبقيتو تركبوا البرادو ( إنت البرادو دي يا ها البوباي بتاعت زمنكم)، دايرين كمان تنتروا وتقولوا دايرين حقنا في السكر، السكر ده ما مدعوم من جيب الوالي الوارث البلد من سنسفيل أجدادو..
      إنت مش الوالي ده يا هو زاتو القال الما بيقدر يعيش في الخرطوم دي يمشي يشوف ليهو بلد تانية؟؟؟
      عجبي بتاعت كوكو!!!
      إنتو وين الزول ده صحي (دقس) و(إتلحس) وراح في شربة موية، أقصد في عرسة!

  25. الوالي الخضر كتر خير بيو – ابوهو باللبناني يا جنوبي – ادانا ما خلانا الله يخضر ضراعو … اتفضل علينا وحلا لينا حلو مرنا … وأحييييييييييي انا .

    1. خالد … سلام
      إنت ادوك خلاس ؟؟!!

      1. المندهش سلام
        بمناسبة ادوك دي نحن في الوزاره التي اعمل بها وعدونا بي كرتونة رمضان تحتوي على بعض الاشياء وكل يوم والتاني يقولوا لينا لسع بكره لسع بكره واهو رمضان وصل فجاه ونحن في الترحيل كل ما تمر بينا عربيه فيها كرتونه تلقي الترحيل كله مرق راسه لحدة ما بقة عندنا حاله هستيريا اتجاه الكراتين (والله في )

      2. اوعكم تضايقوهم شديد عشان هم لما يتضايقو بيفلتو
        ويقوم يجيكم واحد يقول ليكم هو اصلو رمضان ده نحنا
        الفرضنا عليكم امشو شوفو الفرضو عليكم منو ,
        مش قبل كده نسبو ليه الفقر !!وسبحانه تعالي عندو
        99 اسم من ضمنهم الغني والرزاق الرازق الوهاب !!

      3. هو نحن ضايقناهم بس بنسال سااااااااااااكت

    2. يا ود مدنى انت محليتكم وين الادوكم بدرى كدة؟ نحنا رمضان دخل علينا (فجأتن) كدة و لسة ما عارفين نطعم حلومرنا و الا نشربو مر ساكت كدة , و نطعمو مع كوتة عيد الاضحى ان شاء الله

      1. تعرف يا ود بوتين الحكومة دي عشان ما تتفاجأ كده كلو مره وذاتو الخلع الكتيرة دي ما كويسه بتخليها تزوزي فالمفروض انها تقوم من بكره توزع سكر رمضان وتساكك خرفان الضحيه وتحفر مجاري الامطار للخريف وتجهز كتب العام الدراسي … وكلو يومين تلاته كده في الغبشه حقت المغربية ديك تفك ليها صاروخين تلاته مضادة للطائرات يمكن تصادف ليها طيارة جات بي فوق وطافيه النور بدل ما كلو شويه تجيها حاجه تفاجأ … آآآآآآآي .

      2. الله يجازى محنك يا خالد !
        العالم فاكرنك اخدت كوتة ! (الادتك) ليها منو ؟؟؟لا تبقى الشيخة هناية !؟؟ وى وى وى

  26. هاكم دي الباشمهندس زميل دراسة وكده في الكهرباء قال جابو ليهم كرتونة رمضان ب500ج …. وقت ضربوها
    بالسعر الجاري طلعت ب350ج بس ……قالو ما دايرين ما دايرين

    1. هي الشلاقه الليهم شنو ؟؟؟
      مايشلوها و يدفعو و يعملو رايحين..
      يعني خلااااااص الأولاد مفنحين
      هاك الهندسه دي

      1. هي داب شلاقة بس يا هندسة !
        الكرتونة ب 500جنيه في خمسة شهور (يعني الشهر بي مية بس) يا بلاش، والله الحكومة عندكم يا مهندسين تسكت فيكم موظفين وعمال لا حمدة ولا شكرة وخلت باقي الأجانب خارج الشبكة،،بالله دي حكومة دي حتي بين ناسها عندها خيار وفقوس!!
        رمضان كريم تصوموا وتفطروا علي خير إن شاء الله

  27. السمار وكل اهل بلادي:
    إستطاب الزمان 
وجاء رمضان
ودنت ليال الغفران
وصفاء الأذهان
وتراضي الأحبة والخلان ..
اللهم قونا وبارك لنا في صيامنا واهدنا وأتم قيامنا وضمنا لمن تحب وذاك غاية المنى ..
”سامحونا..لله “
 وأدعو لنا
حفظكم الله .. .. رمضان كريم ..

  28. الحمد لله الذي خلقنا علي فطرة الاسلام وجعلنا من خير
    أمة اخرجت للناس .
    اللهم بارك لنا في رمضان ويسر لنا صيامه وقيامه
    ولا تحرمنا فضل هذا الشهر الكريم وارحمنا واغفر لنا
    واعتقنا فيه من النار يا ارحم الراحمين يا ذا الجلال
    والاكرام ..
    البروف وكل السمار شهر مبارك عليكم جميعا ..
    أ. محمد فضل الله الدرديري انت ذاتك شهر مبارك عليك
    وسامحنا .. لاكين الفيك اتعرفت وفقدت دعوات كتيييرة
    كانت ح تجيك مع اول جقمة حلومر بااااااارد وطاااعم

  29. خطاباتي البوديها تقول لا بتمشي لا حاجة ورسلت ليهو زول مرسال والمرسال مشى وما جاء يا ناس شاركنا معاكم بس ايه الحاصل مش عارف ممنوه من النشر والا ايه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: