قال ايه : غفلت اللجنة

كنت أظن وليس كل الظن إثم أنه بعد وجود هذا العجز الهائل في الموازنة و(الإنهيار الإقتصادي) الذى تعيشه البلاد والذي جاء نتيجة حتمية للإستباحة غير المسبوقة للمال العام تحت راية (لا لدنيا قد عملنا) من صرف بذخي وفساد تزكم رائحته الأنوف وتجنيب لأموال الوزارات والمؤسسات الحكومية في حسابات خاصة (عديل كده) وعقود (سرية) لا يجوز لأحد سوى (الطرفين) الإطلاع على بنودها المليارية وشنو ما عارف .. كنت أظن – عزيزي القارئ- أن تقوم (الحكومة) بإجراء حزمة من الإصلاحات الفورية أولها تقديم كل من ثبت ضلوعه في قضية فساد إلى العدالة إذ لا يعقل أن تترك (أموال الشعب تنهب) مما يتسبب في عجز الميزانية ليقوم الشعب بتسديد ما نهب منه !!
لكن للأسف الشديد ورغم التصريحات عن إنشاء آليات لمكافحة الفساد ونيابات للثراء الحرام وشنو ما عارف إلا أننا لم نشهد خلال ربع القرن الماضي (من عمر المباراة الما عارفين الزمن بتاعا كم دي) مسئولاً واحداً وقف أمام القضاء (شفتو النزاهة؟) بل الأنكى والأمر أن التعامل (الباااارد) مع حالات (التسيب) ومحاولات التلاعب بالمال العام (ماشه فى زيادة) والجماعة قاعدين يسووا في البسووا فيهو رغم (التململ) وحالة (العصيان) والتظاهر التي وصف (الخبير الوطنى) ربيع عبدالعاطي من يقومون بها بأنهم لا يتعدون أصابع اليد الواحدة (يعني من خمسة وإنتا نازل) !
وعشان أوريكم إنو الحكومة بتسوي في البتسوي فيهو وما شغالة (بي كلامنا ده شغلة) دونكم هذه المسألة التي شغلت الرأي العام مؤخراً والتى تخص الأستاذه (هبة محمود) التي عملت في وظيفة الأمين العام لصندوق تشغيل الخريجين .. وشخصياً العبد لله ما عارف الصندوق ده بيعمل شنو طالما إنو الخريجين قاعدين عطالة (وعلى قفا من يشيل) .. المهم الي هنا الامر عادي لكن الشئ الما عادي هو ما حدث بخصوص إستلامها لمكافأة نهاية الخدمة الخاصة بها (والما عارفنها كم لحدت هسي على الرغم من إنو الموضوع إستهلك) ! إذ ثبت بما لا يدع مجالاً للشك بان طريقة إستلامها (للمبالغ) لم تكن كأي طريقة إستلام (موظف عام) لمكافأة نهاية خدمتو !
فالشئ المعروف في دواوين الخدمة المدنية (الراحت شمار في مرقة) إن الموظف العام عند إنتهاء فترة عمله يتم (تضريب) إستحقاقات نهاية خدمته وفق النظم والقوانين واللوائح التي تحكم (المسألة) ثم يقوم بصرفها ..
لكن يبدو أن (الصرف) لم يتم حسب النظم والقوانين مما جعل المسألة تذهب إلى نيابة المال العام والتى ما أن بدأت في عملها حتي جاءها بتوقيع وزير الدولة بمجلس الوزراء، د. محمد مختار، بتاريخ 27 مارس 2012م مرفق نسخة منه للمراجع العام (لزوم إنتا خليك عارف) يؤكد سلامة الإجراءات وأن المبالغ هي عبارة عن استحقاقات نهاية الخدمة (يعني ما حاجة تانية) !
ولم تكتف (الحكومة) ممثلة في أذرعها المختلفة بهذا فحسب بل صرح الدكتور الفاتح عزالدين رئيس لجنة العمل والإدارة والمظالم العامة بالبرلمان بأن لجنته قد تقصت حول ملابسات القضية، بحكم دورها الرقابي وفي إطار الحرص على المال العام (طيب ما تشوف لينا هيثرو ده) .. وقال إن (السيدة/هبة) بعد انتهاء مدة خدمتها تم تشكيل لجنة من وزارة الرعاية ووزارة المالية والصندوق لتحديد المخصصات، وبعد أن تم اعتماد المبالغ وفق اللوائح الحكومية، غفلت اللجنة عن اعتمادها رسمياً من مجلس الوزراء؛ مما أخل بالخطوات الإدارية .
من الوااااضح أن هنالك خطأ (ما) في جهة (ما) لأمر (ما) حصل ليهو (ترقيع) بعد أن فاحت الرائحة وخرج الموضوع ليتم تناقله عبر الصحف ووسائل الإعلام والمنتديات الأسفيرية فهل يعقل أن تغفل لجنة مكونة من (وزارتين) و (صندوق) عن إعتماد ما توصلت إليه من (نتائج) برفعها رسمياً لمجلس الوزراء؟ وعلى أي أساس (إذن) تم (صرف المبالغ) إن لم يصادق عليها مجلس الوزراء؟وكم هي (أساسن) جملة المخصصات (البيعملو ليها لجان دي؟) وهل أى (موظف حكومى) بيعملو ليهو (لجان) عشان تحدد (مكافأة نهاية خدمتو؟) وهل يعقل أن تحدد (المخصصات) بعد (نهاية الخدمة) وليس عند بدايتها؟ وأخيراً هل تمت محاسبة الجهة التي قامت بهذا الخطأ (الطبعن غير مقصود وكده) !
على طريقة (الإتجاه المعاكس) نقول :
هذه الأسئلة نطرحها على ضيفنا الدكتور الفاتح عزالدين رئيس لجنة العمل والإدارة والمظالم العامة بالبرلمان والذي تقصت لجنته حول هذا الأمر .. فهل يتفضل بالإجابة على ما طرحناه من أسئلة؟

كسرة :
ممكن شوية بندول !

كسرة ثابتة :
أخبار ملف خط هيثرو العند النائب العام شنو(ووو و ووو)؟

Advertisements

36 تعليق

  1. برنجيه محجوزه بعد الفطور

    1. تؤجل كلمة ( مبروك ) لما بعد الفطور

      1. السودانين ديل بقوا مقرضنها حتي قولت مبروك لحدي ما تولعه (انتظر الجمعه البعد رمضان هههههههه )

    2. حجز ما معانا يا تشيل يا تخلي ..

    3. مبروك يا بت وراق و قبل الفطور كمان (كيتن) فى المندهش – بس و الله زمان – العود احمد

  2. سلامات ياناس ياطيبين
    البندول لو بحلك برسل ليك كرتونه دا اكبر من البندول والطاقه النوويه
    سبحان الله قبل موضوعك دا ما ينزل كنا بنتناقش فى موضوع قريب منو
    سالنا ياجماعه المرتبات نزلو لينا مية الرئيس ولا لع قالوا لينا لا ما نزلت لانو الماليه ما عارفه العدد الحقبق (بتاع الفصل الاول)كم
    قلنا ليهم كيف الكلام دا قالو وهذه ترجع لناسنا انو العدد المدنو لناس وزارة الماليه غير صحيح
    وانا بكل بساطه وعفويه طبعا قلت ليهم طييب ما يشوفه القروش الخصموها مننا لنفرة هجليج كم بعرفو العدد الحقيقى
    ولا شنو ياجماعه (يعنى يخصمو مننا ومن غير ما يشاورونا والعدد معروف يجو يدونا العدد مفقود ) الارقام في امزونيا العظمي سحريه والله حكايه

    1. بت وراق …. بالجد خطيرة .. تنفعي في التشكيلة القادمة ههههه

    2. انتي صحي القروش حقت كشف هجليج كم ؟ ووينا ؟

      1. جنوبي يا شفاف ….. هاك الشفافية دي

      2. كم دى ما عارفينا, لكن وينا كيف يا سديقى, أمال هجليج دى حررناها ليكم بشنو؟؟!!

  3. ملحق
    والقريبه خصمو مننا قصد كرتونة رمضان ونحن ما استلمنها
    والله حكم (تقول لى بندول )

  4. سلامات …رمضان كريم…
    سؤال:اها كان دى اتحلت بالبندول..زيادة الكهرباء الجديدة دى يحلوها بشنووووو؟

    1. يرجعوا للرتاين ياام ايمان
      المظاهرات الدور الجاي الا يمرقوها المرطبين موش قالوا بعد 600 كيلو ونحن وين بنستهلك 600 نحن يادوب 200 المدعومه
      لكن دي زي ما بقوله (حركه في شكل ورده )يعني لو نجحت ومرت وما في زول قال بقم الدور الجاي حقنا ولو شفته( اخوك حلقو ليهو بل راسك)
      وبرضو تقول لى بندول

      1. انتو في افتتاح سد مروي لمن الرئيس رقص لينا رقصة القرد مش قال بعد ده مافي قطوعات وح نرخص الكهرباء !!
        الغريبة كل يوم قايم سد وسد يعلوهو وبقولوا لينا عشان نحل مشكلة الكهرباء .
        بي مظاهراتنا دي اخير نبل راسنا ساااكت عشنا وشفنا مظاهرات قاعدة داخلية تجي لاهلا يوم في الاسبوع ..

  5. بت وراق….
    برنيجة مشترك وما عايز اى نقاش ! الدنيا صيام…

    1. هديه ليك يا شمباتي ومعها الفطور كمان (بس خلي الكرتونه تصل )

  6. البروف الحبيب…
    عليك الله المغايس دى ما بتفطر ؟؟؟؟ انها هبة الله , هيفاء ,, ورقاء ,,, فرعاء مصقول عوارضها…
    بس خلاس….

    1. شنو ياشعبان عبد الرحيم
      انا بكره اسرائيل 00 انا بكره اسرائيل آآآآآآآآآيه بس خلاس

      1. جنس حقارة عليك يا بت وراق !!
        يعنى الشعر العربى الاصيق المصقول الفوق دا ما انتبهتى ليهو وخليتى بالك مع (بس خلاس) !!؟
        جنس غتاتة لكن.

      2. ههههه هههههههههه
        انت ما عارف العبره بالخواتيم

  7. المشكله انو الجماعه كلهم في الهو سوا و مافي زول بقدر اقول تلت التلاته كم

    اها وناس الكهربه ديل مالون يارب ؟ انت عارف واضح انو في جهة ما مادايره الشعب السوداني (الفضل) يستمتع ب حتي هوا بارد. الجماعه شافو المكيفات كترت والناس بقت تنوم علي انغام المكيفات وكدة…خافو الناس ماتصلي الصبح حاضر..
    هو ما اصلو المكيفات ما حراااام.. اوع الكلام دة اصل ناس جمعية حماية المستهلك.. اقصد الحاجه الأسما شنو كدة علماء السودان

  8. سلام ياقبيلة
    والله يا بروف أنت بتسأل أسئلة عجيبة خلاس،،، يا أخي ما تمشي تفحر في الحفر تقوم تقرص كمان ، مالك ومال كدا ياااخ!!
    ما قالوا ليك غفلت اللجنة ، يعني اللجنة دي حا تكون غفلت من شنو؟؟
    ما غفلت من جنس أسئلتك دي وما يتبعها من إجابات قد غميسة ومدغمسة ومجغومة وليست مدعومة!!!
    اللهم إني صائم اللهم إني صائم

  9. بالجد الوضع بقى مقرف وممل وفضيحة ,,, يا الانقاذ اتقوا الله فى الشعب وفى اموال الشعب ,, وبعدين يوم القيامة والوقوف امام الله والحساب والعرض على الجبار مظالم الشعب فى رقبتكم فى رقيتكم فى رقبتكم
    اللهم اجعل رمضان شهر خير وبركة وتغيير على السودان وكل المسلمين

  10. اللزيزه في موضوع هبه ده انو بعد اللجان الصرفت
    ليها حقوقا دي وناس الفاتح عز الدين اعترفوا انهم
    غفلوا عن اخذ تصديق الصرف من مجلس الوزراء والموضوع
    اتحول للنيابة , قام مجلس الوزراء قال للنيابة انتي
    متورة نفسك فوق كم ؟ مش تصديقنا ده ! اها صدقنا
    ليهم ( يعني سيد الحق راضي والحرامي راضي شن دخّل القاضي )
    المؤسف انو موضوع النيابة كان عن صرف ( حقوق )مع
    نقص في اجراءات الصرف يعني البلاغ من اول مقدم علي انو
    يا نيابة ده حقها لاكين ما شالتو زي ما الناس بشيلو
    لاكين من ناحية حقها الشهادة لله هو حقها ..
    عملوا لينا التمثيلية دي من نيابة واتهام ثم براءة
    المتهم ولكن … كم المبلغ الذي صرف لها؟ وكم هي مدة
    خدمتها؟ وماهي الحقوق في العقد التي تصرف علي اساسها
    مكافاة نهاية الخدمة ؟ الله أعلم ..

    1. و الله اخدت السؤال من (طرف كيبوردى) – فعلا هى خدمت كم؟ و الخدمة القدمتا شنو؟ و المبلغ موضوع الفيلم دة كم؟ فحسب علمى البسيط ام الصندوق دة زاااتو اتاسس قريبااات دى !!!

      1. نقول مدة خدمتا 23 سنة زي عمر الانقاذ يعني عندها
        راتب 20 سنة ونص يعني ما محتاجة لجان لصرف الحقوق الا
        يكون برضو عقدها فيهو بند لا يجوز لاحد الطرفين كشف
        بنود العقد لجهة ثالثة ..

      2. 20 سنة ونص دي شنو 20 شهر ونص ما تقوم تمشي
        تطالب وتخرب بيتنا اكتر من هو مخروب

  11. بمناسبة مجمع الفقه واجازته لمواطني بورسودان انهم
    يفطروا عشان الصيف عندهم قلاية ( قلاية حقت هناي )
    رمضان السنة الفاتت معانا واحد هندي اسلم قبل سنوات
    قليلة. يوم كده واليوم كان حار , لقيتو فاطر قلت ليهو
    عبد الله ليش انت في اكل مافي صوم, قال لي هادا يوم مره
    حار , قلت ليهو هادا حار في اجر زيادة , قال : انا
    ما يبغي زيادة اجر , شوية اجر كافي ..

    1. ههههههههههههههههههههههه,,النصيحة دى مى حااااارة !!

  12. يابروف

    عليك الله اسلو لينا عن قروش النميه امن كان محافظ امدرمان طشششششششششششششت واين

  13. البروف والسمار .
    سلامات .
    هى طالما الامين العام لصندوق تشغيل الخريجين معناها عندها فى كل راس مرتب شهر من ذلك الراس .
    إنتو قايلين من ماجات ثورة التعليم العالى الخريجين كلهم عطالة ولا شنو ؟
    أكثر من 10% من الخريجين سنويا يتحصلون على وظائف .
    أها شوفو الكلام دة ما محتاج ليهو لى لجان من وزارتين وصندون عشان يلموا القروش دى ؟.
    مالك ياخ ….

  14. باقي 6 يوم لانتهاء المهلة والقرار 2046 بيسخن في
    كنبة الاحتياطي .
    مافي طريقة لي ده حار وده مابنكوي بيهو ولازم نختار
    والخيرهو حيروهو , يا لو جنّك ضررين شيل الاخف يا كمان
    لو غلبك سدها وسّع قدها وفي الحالة دي تبقي محل الرهيفه
    التنقد والرهيفه شمال..
    الدنيا قبايل عيد والعيد داير مصاريف والحكومة
    مفلللللللسة , عباطا والنجم وال 8 مليار دولار مغلفة
    في صينية الشيلة وابو العروس مرييّل واخوانا واحدين
    يقولوا نديهم وواحدين يقولوا لو اديناهم المسيريه
    بخربوا لينا السيره والفنانه تغني سجم الماعندو مال
    أبيي طلبوها الرجال ..
    الخوف كلو من عرس المسيار ونتفاجأ بي كرش العروس ..

    1. ههههههههههههههههههههههههههههههه
      ونتفاجا بي كرش العروس ويقول الجنين قاعد غلط ولازم عمليه قيصريه واحتمال نجاة الام ضعيف والجنين معدومه

  15. يا ناس قولوا لينا حكم اب تكو او قرقوش انا من زمن بحاول انزل الحاصل على القران ما راضي ينزل اصبحت افتش في الشافعي والمالكي (مش بتاع العراق) والحنبلي وابو حنيفة ومش عارف ايه في النهاية طلعت انا حنبلي ههههههه يمكن يكون فيه …..جديد وانحنا ما عارفينو علبتونا يا ناس امنا (امنا الحكومة)

  16. سلام للبروف وكل الحادبين على بلدي المنهوب بلدي حبيبي بدل ما تحرضنا بالعميتي حرضنا عدييييييييييييييييل بدل الدغمسة دي وانا اضمن لك عند الله الاجر ولكل محرض حتى ترجع في سبيل الله قمنا

  17. يا بروف اظهر الجماعة حا يرجعوا لتحصيل بدل استخدام ضوء القمرة وكدة وده حال بلدنا لمن يكون فى عجز فى حتة يقرضوها على الناس من هنا ويفتحوها على نفسهم بهنا والله الحكمة فى كونك ظريف اهلك ارابيب الندى عارفك بتدلل على ولا الحكاية معاندة ده حرام عليك يا بشير ما بصح ليك تعمل كدة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: