ده البرلمان وللا بلاش

غني عن القول أن البرلمان هو السلطة التشريعية التي تتولى كثيراً من الإختصاصات المختلفة وفقا لما حدده دستور البلاد فهو يتولى سلطة التشريع وإقرار السياسة العامة للدولة والخطة العامة للتنمية الاقتصادية والاجتماعية والموازنة العامة للدولة كما إنه يمارس الرقابة على أعمال السلطة التنفيذية كما أن للبرلمان دوراً هاماً فى التأثير على السياسة العامة، نظرا لما يتمتع به من قدرة على التعبير عن المطالب الشعبية وأولويات الرأي العام.
في كل بلدان العالم يقوم (البرلمان) بمسألة التشريع ووضع القوانين (عشان كده سموهو السلطة التشريعية) لأنو (القانون) دائماً يأتي تعبيراً عن إرادة المجتمع الذي يمثله نواب البرلمان الذين إختارهم الشعب ! يعني بالعربي كده (قانوناً ودستوراً) مافي اي قانون بيكون ساري المفعول إلا بعد ما يقوم البرلمان بمناقشته والموافقة عليه .
للأسف الأسيف أن الحكومة لا شغالة بي دستور ولا بى غيرو والبرلمان بتاعنا المفترض يدافع عن حقوقنا واضح إنو (خاتي راسو مع الحكومة) وفاكينا عكس الهواء .. الحكومة ممثلة في جهازها التنفيذي أصبحت من (يشرع ويجيز) وما على هذا الشعب (الطيب الغلبان) إلا أن ينفذ صاغراً ما تطلبه الحكومة والبرلمان (قاعد يتفرج) !
قرار بحجم رفع الدعم (الما موجود أساساً) عن المحروقات يتم تنفيذه دون أن يمر على البرلمان ليجيزه ! ويسمع به (نواب الشعب الفضل) كما يسمع به (العامة) وعندما يطالب البعض بسحب الثقة من (وزير المالية) لهذه السابقة الخطيرة التي تنتقص من كرامة وهيبة (البرلمان) يقوم رئيس البرلمان (القانوني الضليع ) بتبرئة الوزير قائلاً أنه قد شاوره في الأمر (شفتو كيف؟) ! يعني (شاورو وخلاص) !! غايتو أمشوا فتشوا في الدستور أو اللوائح البرلمانية إحتمال تلاقوا ليكم بند بيقول : (يجوزلرئيس البرلمان إجازة القوانين بمفرده) !
يعني قامت السلطة التنفيذية بإحراز هدف في مرمي (الشعب) من حالة تسلل واضحة وسط سكوت مدرجات المتفرجين (نواب الشعب طبعن) !
لم تمض ايام قليلة على هذه (المهزلة) وهذه الزيادات المؤثرة في حياة ومعاش الناس والتي تم تنفيذها قبل أن تمر بالبرلمان في مخالفة واضحة للقانون ومرت المسألة (مرور الكرام) ونواب الشعب (سكتوا) عن هذا التجاوز (المهين) والشعب (سكت) على (سكوت) نواب الشعب والقصة مشت وأصبحت واقع !
لم تمض أيام قليلة حتى تكرر ذات السيناريو (بي ضبانتو) وقامت السلطة التنفيذية بإحراز هدف آخر وبنفس الطريقة في مرمي (الشعب) من حالة تسلل واضحة وسط سكوت مدرجات المتفرجين (الجابوهم يتفرجوا) !
حيث فوجئ المواطنون كما فوجئ نواب الشعب (ذاااتم) بزيادة فاتورة الكهرباء زيادة (فاحشة) .. و(برضو) دون أن يمر الأمر على البرلمان (ما خلاس القصة مشت وكده) ولكن هذا المرة لم يصرح السيد رئيس البرلمان بأن (وزير الكهرباء شاورو في الموضوع) إنما ترك مهمة التصريح للسيد رئيس اللجنة البرلمانية الذي قال بالنص : ( البرلمان لايقبل الزيادة ولايرفضها، بل يود معرفة المنطق الذي تمت بموجبه الزيادة)..
عليكم الله شفتو ليكم برلمان (قاعد ساااي) زي برلماننا ده؟ في أقل من شهر يتم تنفيذ أهم قرارين يمسان حياة المواطن في الصميم دون أن تمر عليه لمناقشتهما في خرق واضح للقانون وتهميش متعمد لصلاحياته و(الفاجعة بل الكارثة) إنو بدلاً من أن يثور أعضائه ويغضبون لهذا التجاوز المهين يصرح أحد أعضائه بأن غاية مطلبهم من السيد وزير الكهرباء إنو يوريهم (المنطق) التمت بيهو الزيادة .. ده بدل ما يسألو عن (القانون) التمت بيهو الزيادة

كسرة :
يعني السادة النواب ما عندهم مشكلة لو السيد الوزير إتجاوز البرلمان بس عاوزين يعرفوا المنطق .. ده البرلمان وللا بلاش !!

كسرة ثابتة :
ملف خط هيثرو العند النائب العام أخبارو شنو(ووو و ووو)؟

Advertisements

55 تعليق

  1. ramadan kareeem

    1. بردو تريقة جديدة ..
      بت وراق اذا بليتم فاستتروا شنو مبرنجه عيني عينك ..

  2. بنجيه مشتركه يا ود الخلاء
    والله اكرم

    1. شنو يا بت وراق إنتي رمضان دخل في العضام ولا شنو ؟؟؟! برنجية مشتركة بي وين بس ؟!! كدي عايني فرق التوقيت والدقائق ؟!! إحنا هنا برلمانا صاحي ومصحصح ما بتمرري فيه متل برنجياتك بتاعة السلبطة دي وكان دايرة الدغمسة أمشي البرلمان داك ولا شنو يا جنوبي وشمباتي ويا ود الخلا ما يحنكوك

      1. هههههههههههههه
        هو رمضان جاء ونحن اصلا عضام قول دخل النخاع الشوكى
        هسع ارسل ليك سكر مدعوم خوفي توصل لي البرنجيه البيت

      2. هههههههههههههههههههه,صدقت يا الفاتح ياخوى,,ألقصة بقت سلبطة وجربندية ساكت !
        بعدين انا لو محلها اشيلها برنجية كاااااملة ! لان ود الخلا شكلو مستحى يبرنج فى نهار رمضان ! كع

      3. يالفاتح يا خوي بت وراق دي إنت ماك عارفة ، هي أظنها شايقية، والشايقيست ديل هم أصلا بتاعين سلبطة، ودايرين ديمة يكونوا قدام بس ما بدفروا ليها حصان ولا بتوروا ليها نفس علا كان جاتهم باردي كدي ما بفكوها تاني بأخوي وأخوك، ودونك غتاتة ناس الحكومة شوفهم مدورين الشغل كيف!!
        تقول لي منو وتقولي شنو؟؟
        بت وراق يا أختي نحن لابنعرف نخمس ولا بنعرف نشارك ، بس لينا الصدر دون العالمين أو القبر!!
        وبس خلاس!!

      4. انت ياود الخلاء ياك زولنا الزمان ولا في زول داخل بي اسمك
        لانو دا ماكلامك المتعودين عليهو

      5. حاج أحمد السلاوى

        والله يا بت وراق أنا زاااااتى لامن قريت مداخلة أخونا بن الفلاة قعدت فى واطاة الله وحكيت راسى مرتين وقريت الكلام مرتين تلاتة عشان أتاكد من الزول الكاتب الكلام دا ياهو حبيبنا ودالخلا ..ولا زولاً كُتُر ..لاكين أعتقد وإن بعض الإعتقاد ظن إنو الزيادات الأخيرة دى اشتغلت شوية وعملت مفعولها وبدت البوصلة تميل ناحية الجنوب بدلاً من الشمال ..وربنا يستر من الزيادات الجاية ..
        وتصوموا وتفطروا على خير ..

      6. يانا الزمان يا ناس مالكم نسيتونا؟؟؟

    2. بت وراق شكلك خليتى مشى الجزر كلو كلو و قابلتى الكيبورد,, طيب ما قاعدة تمشى الطاحونة تجيبى دقيق العصيدة, و الا هى برضو نص كيلو دقيق لاخر شهر رمضان ؟؟!!

      1. عرفتها كيف !!!! هو اصلو قالب عصيده واحد عملته اول يوم في رمضان وكل يوم اخته ليهم ياشرواعليهو بس وادخلو التلاجه لكن المشكله مع ناس البرلمان ديل ما ح يحل مشكلة زيادة الكهربا ويزيدوها لينا اه التلاجه نحلها كيف ؟

      2. مشكلة كهرباء التلاجة تحليها بأن تنقصى نص كيلو دقيق العصيدة لربع كيلو بس, و كدة الحسبة بتكون لااافقة ان ربنا اراد..

  3. الاستاذ/ جبرة
    اولا ديل نوام وليسوا نواب بعدين انت مقتنع بانه عندنا برلمان وتشريع والحاجات الفي الكاتلوج دي !!!!؟

  4. ولو كمان ما داير البرنجيه اكون انا الاولى كيتا على جنوبي

    1. غايتو جنس حنك
      يا بت وراق بي طريقتك دي ممكن أسألك وأنا متأكد بعتي خط هيثرو لي منو وبي كم ؟!!!!!

      1. انت قايل شنو ما اخونا ود الخلاء ما بتعاطه البرنجيه وانا اتي متحيره الليله القعدو جنب البحر مع المقارب شنو

  5. سلام ياقبيلة،،،
    إنت يا بروف راجيلك رجا في الناس ديل،،،
    هاك دي ووراءها دي…
    مثل سوداني قح كنت أسمعه من حبوباتنا وأمهاتنا زمان لمن تيأس الواحدة مننا حين تأمل فيهو لقضاء مهمة ما ونفشل فشلا” ذريعا” كما فشلت هذه الحكومة وبرلماناتها الستاشر وشعبها الفضيل!
    مثل آخر يقول ليك الترابة دي في خشمك كان راجيلك رجا في هؤلاء الممثلين الذين مثلوا دورهم أحسن تمثيل ومثّلوا بشعبهم ابشع تمثيل…

    اللهم إني صائم اللهم إني صائم

    1. يا اخوانا ما تظلموا (نوام) البرلمان ساكت, هم عايزين يعرفوا المنطق اللى زادوا بيو الكهرباء, و دى طبعن الخطوة الاولى, و بعد ما يعرفوا المنطق شنو, هنا حيصحى النوام و يشوفوا شغلهم فى سؤال وزير المالية عن منطقو هو كمان فى رفع الدعم,, يعنى بالعربى (البسيت) كدة لوكو الصبر, الفرج جاى قريب لباقى الشعب الفضل

    2. 🙂 اللهم (نحن) صائمييييييين
      سلام عليكم يا أحباب ورمضاااان كريم عليكم يا رب
      البروف و ود الخلا و ياسين و جميع الأحباب (برلمانكم كريم)

    3. يا ود الخلا ما تلف وتدور انت قاصد أرجا سفيه ولا
      ترجا باطل .. بس خلاص ( حقت شمباتي عبد الرحيم )

      1. والله يا جنوبي….
        بس خلااااااس

      2. هههههههههههههههههههههههههههههههه,اما انك فاطر !
        الراجل يسمح فيها ويحاحى فيها تجى انت ترميها بب كدة !

  6. الاخ جبرا الله يطراك بالخير والله انعشت لى الذاكره بتاعتي هو ما صحي البرلمان الذمان بنعرفه هو السلطه التشريعيه ولكن يمكن ان نسمي البرلمان حقنا (السلطه الشوارعيه ) آآآآآآآآآآآى بالواضح كده ديل عباره عن تشكيله شوارعيه ليس لديهم فهم او منطلق قانوني عاملين بيهو
    وانت لسع شفته حاجه الجاي افظع وكما قلت سابقا زيادة الكهرباء للفئات المرطبه شويه عاملنها حركه يقيسوا بيها مدى تعامل الشعب معها وبعد كده يزيدوا لكل الشعب الفضل

    1. ىا بت الناس مرطبين شنو ………لما ترجعي لبيت اقري عداد كهربتكم بالزمن وبكرة اعملي نفس الحكاية حتكتشفي انك انتي زاتك مرطبة
      قال مرطبين قال
      دقسوكم تاني
      الكلام دا الزوار بما فيهم استاذنا جبرا …………زاكرو العداد كويس الامتحان بعد بكرة
      كسرة
      المغتربين —-امشوا اولمبياد اصلو الافتتاح كان رهيب— بلا كهربا بلا برلمان (البر الما امان )

  7. بالمناسبه السلطه القاصداها بين القوسين دي السلطه الفيها الطماطم والعجور والجرجير

    1. من اشتهيتي السلطة كده معناها رمضان ده عصر عليكي
      شدييييد , انتي ماطولتي من خالتك الفي بورسودان ديك
      ما تمشي تقضي يومين تلاتة معاها وتبقي ليكي فطرة وصلة
      رحم !!!

      1. حاج أحمد السلاوى

        الجنوبى .. الله يجازيك ويجازى محنك ضحكتنى لامن وقعت من الكرسى ..دى عملتها كيف … من راسك …ولا من كراسك ؟؟
        عاوز أعرف موقعك الجغرافى وين ؟

  8. ما في زيك يا بلد ….. ترلم ترلم ….. لمة سودانية ….. ترلم ترلم

  9. الشجره الشجره الشجره ررررررررررررررررررررررررررررررررررررهههههههه

  10. البروف والحبايب….سلام….
    كمان سمعت انو رئيس البرلمان ضرب للوزير لقى تلفونو مقفول !
    يكون ما عندو شاحن ولا سافر برة بعد عملتو المهببة دى ّّ؟
    حاجة تمحن …

    1. دي حركة (تفشُّف) لُزُوم (الزيادة) من (الوزير) الحبيب ياسين 🙂

    2. انت عارف ياشمباتي حقو الزول يمشي يقيف جنب البرلمان ويغني ليهم
      حبيبي اضرب لى … وانا اضرب ليك
      وريني الحاصل بيك … واوريك الحاصل بي

  11. نواب البرلمان اول ما جو الحكومة وقفت معاهم وقفة
    اخوان وادوا كل نائب كم قعطة ارض يقمن صلبه ,ادتم
    كل ما يحتاجون والداير دعم ادوهو والداير بنطلون
    جنز جابو ليهو والداير بانوسونك جابو ليهو بانوسونك
    قصرت معاهم في شنو الحكومة دي عشان يقصروا معاها
    ياخي ما ينكر الجميل الا اللئيم , نحن صحي ما قصرنا
    معاهم واديناهم اصواتنا لاكين كمان الصوت ما ملموس
    زي الحاجات الجاتم من الحكومة !!!!
    ودفع الله داك رأينو شنو في موضوع زيادة الكهرباء ؟

    1. جنوبي يا صديقي العزيز كلامك في حكومتنا السُنية وبرلمانها الرشيد ده زكرني قصة أبوسن مع لص البهائم لمن جابوه ليهو بالثابتة وقام ليك فيهو هرشة ونهرة:
      أبوسن: إنت يازول بتسرق حق الناس قايل البلد دي فوضي ولا دي حقارة منك ساكت، عامل لي رأسك الماكن ده ( واللص صامت ينظر إليه من طرف خفي)، إنت إسمك منو؟؟؟
      اللص: إسمي يا حضرة الناظر قاسم ود رابح، آآآآآآي قاااااااسم ودرااااابح!!!!
      أبوسن: ها ناس هوي ، يا أهل البهايم هوووووي أمشوا شوفوا بهايمك السرقا منكم منو، الزول ده وشو صباح خير وما ضنيتو سرق بهايمكم دي أمشوا شوفوا محلها وين!!!!
      أها باقي ليك ناس البرلمان ديل وناس أبسن وناس منو وناس منو، مش يا هم ظاتم من نفس الطينة وعلي نفس الطريقة!!

  12. دفع الله كهربتو زايدة ! وى وى وى

  13. إنتو يا جماعة الخير الزول العامل لايك فوق ده مع أخونا شمباتي يا هو أخونا الدكتور محمد حسن الزمان داك الله يطراهو بالخير ولا زولا” آخر؟؟؟

    1. 🙂 هو بذاتو أخوي ودالخلا الله يديك الصحة و العافيه ؛

  14. سيئول، 17 يوليو (يونهاب)-

    رفضت الحكومة اليوم الثلاثاء طلب مؤسسة الكهرباء الوطنية الرامي لزيادة فاتورة الكهرباء بمعدل قدره 10.7 في المائة ، مؤكدة أنها لن توافق على زيادة بهذا المعدل.

    وتعتبر هذه المرة الثانية خلال شهر واحد تجد فيه المؤسسة رفضاً من لجنة الطاقة الكهربائية لزيادة أسعار الكهرباء.

    وفي يونيو الماضي، طالب أعضاء مجلس إدارة المؤسسة بزيادة أسعار استهلاك الكهرباء بنسبة 13.1% ، إلا أن اللجنة رفضت ذلك الطلب.

    وفي الأسبوع الماضي طلبت المؤسسة مرة أخرى زيادة سعر استهلاك الطاقة الكهربائية بنسبة 10.7% ، لكن وزارة اقتصاد المعرفة، التي تهتم بشؤون الطاقة في البلاد، زعمت إن شركة الكهرباء كانت تحاول رفع الأسعار بنسبة 16.8 في المئة في الوقت الذي تسعى فيه لجمع 6.1% من مجموع الرسوم من الحكومة للتعويض عن الرسوم المستحقة.

    وقال مسؤول من لجنة الكهرباء للصحفيين فيما يتعلق بسبب الرفض ‘(اللجنة) اقترحت زيادة بنسبة 13.1% وكانت عالية جدا، وتعين على المؤسسة أولا اتخاذ إجراءات إعادة هيكلة جادة لخفض التكاليف، ولكن الاقتراح الجديد لم يعكس أي من هذه المخاوف، كما أن زيادة رسوم استهلاك الطاقة الفعلية كانت في الواقع أعلى من من السابق.’

    ومن المنتظر أن يلتقي أعضاء مجلس إدارة المؤسسة اليوم الخميس لتقديم مقترح جديد.(انتهى)

  15. من الابرول ابت تطلع ومن ايه مش عارف برضه ابت تطلع عموما الناس لو بطلت السلبية وتحمشنت كده الحكومة دي اخف من الريشه وكل الناس تقريبا مجمعة على كده بس كلهم بيثيروا نفس التساؤل نطلع ونغير علشان يجينا منو (الثلاثي المرح) لكم اوكد لكم لو خت الرحمن في قلبه وقال نجي نحنا زاااااااااااااااااااااااااااتنا راح يعملها لانه بلغ السيل الزبي عاوز معاي اثنين بس واعمل مظاهرة

    1. داير ليك إتنين بس يالغلبان ، كدي جرب وامرق حتلقاهم أربعة ويقوموا يشيلوك علي أكتافهم وأنت تهتف بسقوط شنو كدا ما عارف ، و تبقي وقعت عليك حكاية الزول المتحنفش داك وطلع في المظاهرة، ولأنه كان أكثر الناس حماسا\” وهتافا\” فقد تم حمله علي أكتاف مجموعة من المتظاهرين وأخذوا يلفون به حتي إذا فتر المتظاهرون وأخذو ينثلمون شيئا\” فشيئا\” أو رويدا\” رويدا\”، ولم يتبقي إلا أولئك النفر الذين يحملونه علي أعناقهم طلب منهم صاحبنا أن ينزلوه هنا وينصرفوا كل لحاله حتي لا يأتي ناس الأمن ويقبضونا، فأجابه الحمالين بنفس واحد: آآآويييييين داير تمشي مننا، ما نحن ناس الأمن زاتنا!!!!!

      1. صديقي ود الخلا .. تعرف الحاصل الان زي الانت حكيتو ده
        واولاد الحكومة داخلين في نص المظاهرات مع الناس حسب
        المعلومة الانا عرفتها انو مسجد ود نوباوي كل جمعه
        برسلوا ليهو اولاد لابسين جلاليب انصارية ويصلوا
        معاهم ومهمتم بس يعرفوا الناس المحرضة ويرفعوا
        التقارير وبموجبا يتم الاعتقال وكده في كل المناطق
        التنكر حسب المكان وهسع معظم الدينموهات في المعتقل .
        ياخي الحيكومة دي قادرة قدرتا !! بس لو كان قدرتا
        دي موجهاها في العمار كان بقينا بلد تانية ..

  16. الاخوة بالمدونة النقد الساخر واللاذع سلاح يستعمله اخونا البروف لو بقينا في الموضوع يكون احسن والا انتو داخلين المدونة لاشياء اخرى مع تقديري للكل ومشاركاتهم بس اامل ان نضع بقية السودان في حدقات العيون

    1. رمضان كريم :
      إذا دخل خروف البرلمان فقال : ( ماع ) سيأتي الجواب: ( إج…ماع )
      هذا فيما يخص خرفان الدول العربية ..
      أما خرفانا نحن فتسرح وتمرح على كيفها لدرجة إنو الشعب بقى ما قاعد ياكل لحم نهائي ..
      فناهيك عن إنو تضرب تستشير أو تطلع علينا و تقول ماع أو ساح ( من تلاشا وذهب أدراج الرياح ) أو باع ( من يبيع بيعا شديدا في المال العام ) ..
      أما النقطة الأخيرة هي أنو النواب ذاتم من نفس فصيلة ( الشيب ) الغنم بالانجليزي بس حرمت علينا لحومها!!!!!!!!!!!!!!!!!!!

      1. محمد عمر … لاكين ما الخروف هو القاعد يديهم رواتبم
        وبدل اعياد وتصاديق فك الزنقات !!
        مافي طريقة انو يعملوا شغل البرلمان ده تطوع بدون
        راتب شان الحكومة ما تكسر عينم !! ومنها نخلص من
        النواب الاستغلاليين !!
        او كمان رئيس البرلمان ما يكون تبع الحكومة عشان ما
        يدغمس لينا الشغل ونبقي في شاورني وانا قلت ليهو
        خلاص انا بكلم الجماعة, الشئ سلام هو ولا عزاء ..

  17. ناس المجلس ادهم عربات ومرتبات وحصانه تااااااااااني لو مات محمد احمد زاتو مايموت فى البكري واحمد شرفي وحمد النيل ده كلام فارغ وقالو بصدرو الكهربا طيب حقو وزير الكهربا بس يمشى يشوف تاسير سدو المناخي علي المنطقه شنو ويلعم الجميع ان للشعب رب وهناك يوم للحساب اتى لا محاله

  18. بروف ……..
    ربنا يلطف بينا ..
    الناس دى مصائب و ربنا ابتلانا بيها .. ياربى نحنا سوينا ليهم شنو عشان يسوا لينا دا كله .. .. يا الله لطفك و رحماك ..
    والما بشوى بالاسعار يشوى بالكهربا احسن.. شكرا سيادة الرئيس لاننا عرفنا انو البلد ما عندها ريس واحد هنالك كم رئيس
    ريس للمالية و ريس للكهرباء و ريس للنفايات .
    بس سؤال فواتير كهرباء الحكومة اسددت ؟؟؟؟

  19. عارفين يا أحباب و نستأذن أستاذنا الفاتح جبرا 🙂 .. مرات الواحد بحس و بكون عاوز يرجع (الشريط) لوراا عشان يصلح أو يعدل أوحتى يبدل حاجه (غلط) اكتشفها أو لقاها حصلت (قدام) معاهو بسبب (الوراا) !! لكنو بنسى أو بتغيب عليهو لأسباب كتيره إنو لسع في إمكانية لل (تغيير) و إنصلاح الحال بس (لازماها) ليها شروط محددة …. حسه الحاصل في البلد زي الإحساس دا و البسوي فيهو ناس الحكومة و المعارضة و (البرلمان) من جنس دا!!
    حقيقة (الشعب السوداني) طيب و مسكين لكن (الكرامة) عندو أبدا ما بتهون عليهو ؛
    و (الصبر) الفيهو هو (بصيرة) أنعم الله بها عليهو .. بس تبقى (الحقيقة) البغفل عنها جميع الساسة في السودان و جميع الحركات و الجماعات إنو (للصبر حدود).
    و ما غريب ـ أبدا ما غريب ـ إنو نلقى في ناس في (السُلطة) بتتصرف بقرارات (بلا رحمة) و تقدير لحقيقة كرامة الشعب السوداني و كإنها (متعمِّدة) تضغط على الشعب (لحاجه في نفسها) !!
    و الأمثلة كثيرة .. و أوضحها ـ دون سب أو قذف ـ (وزير المالية) و (نواب البرلمان) !!!
    و في حقيقه (غائبه) أو (مُغيَّبه) بغفل عنها من حُسن الظن أو سُوء الخاتمة قيادات الأحزاب و الحركات السودانية ؛
    أن : كيف تضمن ولاء (العُضو) لفكر العُضويَّة ؟!!
    هي حقيقة (المُنافقين) و سلاحُ (الطابُور الخامس) …
    إن كُنا سنتعلَّم الآن لنبدأ (التغيير) من حيثُ انتهينا ـ و يا سُوء ما انتهينا عليه ـ فعلينا أن نعُود فقط و فقط لنقرأ جيداً التاريخ حُولنا.
    فالتغيِّرُ يبدأ من (داخِلنا) و اللهُ عَليمٌ بما في أنفُسِنا

  20. و (ثورة الكرامة السودانية) قريبة و ليست غريبة ، و لا أقصد بها ما كان يُحاول من نعلمهم جيدا استغلاله و الدعوة إليه كربيع عربي ..
    و إن تفجرت فهي حقٌّ رغم كل ما يُقرأ و عن السُودان يُستبصرُ الآن ..
    فكرامة المُواطن السُوداني هي حياته .
    و العالم كلو (مستغرب) أين الربيع السُوداني ؟! و العالم يعلم علم اليقين أن الشعب السُوداني هُو مُعلِّم الثورة ؛
    و الشعبُ السُوداني حقا عظيم و العظمة لله وحده.
    مدرسة أنت يا شعب السودان
    و العار عليكم يا البرلمان
    .. الله

  21. و بينما كان الجميع يُغني على ليلاه في السلطة أو المعارضة أو التمرد أو حتى (الجنوب)
    كان (الحقد) يَطفحُ بروائحه المُنتنة في كتابات تجدُ حظها و تُفتحُ لها الأبوابُ و القنواتُ لتُبثَّ و تُنشر!!
    و قلّة ـ أسفا ـ من كان ينتبهُ و يتنبه ؛
    و ما يفعلُه الوزراء و يتخذونه في السلطة من قرارات ظالمة قاهرة للشعب و ما يُجيزهُ (البرلمان) أو يُظهر لنا تغافله عنهُ
    دليل على (الغفلة) التي هم غارقين فيها و هي الآية أن الله أعمى عليهم و لا حول و لا قوة إلا بالله.
    و بينما كانت بداية الثورة من ظلم في داخليات الطالبات طابق قرارات مُجحفة سببت الغلاء
    تعالت (أصوات الفتنة) عُنصريَّة بغيضة تصطاد في الماء العكر أنها (ثورة الهامش) !!!!!!
    و بدأت … و لا زالت
    و (حمقاء النظام) لم يجدوا إلا التجبُّر و التكبُّر على الشعب !!
    قلبي دائما و سيظل على إخوتنا في قوات الشعب المُسلحة
    و يأتي (وزير مُنعَّم) بجرّة قلم دُون رؤيّة أو مسئوليّة أو (أضعف إيمان) يزيد القهر على الشعب الشجاع الكريم المظلوم الصابر.

    أطلتُ من المرارة فعذرا
    و يا أستاذنا الفاتح جبرا يا بروف :.. (((يا بلاااااااش)))

  22. يابسير ربنا بسالك يوم القيامة عن كل سوداني فضل تغلوا الكهرباء الانتو ما بتدفعوا فواتيرها جاياكم باردة وكده الا الجمرة بتحرق الواطيها

  23. انابة عن نواب الشعب افيد الشعب بالاتى :
    ايها الشعب الفضل يعنى انتو ما بتحسو العيد قرب وفى منحة عيد وخرفان بالاقساط يعنى عاوزيننا نتلوم مع الحكومه وما نعيد !!
    بعدين شنو يعنى كهرباء وحاجات سطحية زى دى بقت على كده ما بتاكلو فى خاتركم من زمان بس بقت قبايل العيد المحتاجين فيه لى المنحه ده ؟ خلونا نختتم الدوره البرلمانية دى بدون مشاكل نحنا ناس غلابه انتو ( ما ) انتخبتونا عشان نصلح اوضاعنا !! خليكم حنينين

  24. الشعب الفضل يرد على النواب :
    اى صح المعايش قاسية علا النايب يموت وما ياكل بثدى منتخبينو

    1. والله يا افليقا ديل مش اكلو بيهو , ديل اكلوهو
      هو زاااتو ..!
      هو بلا انتخبناهم !! ما جونا بالخج وهم عشان عارفين اننا ما
      انتخبناهم وجونا بالخج عشان كدي بسوو فينا جنس
      سواتم دي ..
      وسبحان الله اصلو مهمة النايب انو يثبت عشان الضرس
      يطحن ..!!
      شاحد الله بي فضل رمضان ده يطحنن الطاحون والمرض الملعون ..

  25. آميييييييييييييييييييين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: