قال أيه : بريد سريع

الأستاذ الجليل : الفاتح جبرا
السلام عليكم ورحمة الله ورمضان كريم وكل سنه وانت بصحة وعافيه مرفق ليك رساله مني موجهة لما يسمى بالبريد السريع وما وجدته من معاناة في استلام طرد عبارة عن (كرتونه) وليس (كونتينر) كان من المفترض استلامه خلال 5 او 6 يوم بالكتييير من تاريخ إرساله والان 15 يوم ويمطوحوا فينا
إلى السادة البريد السريع
السلام عليكم ورحمة الله
اولا ارجو ان توقفوا اعلاناتكم في وسائل الاعلام المختلفه لانها تعطي فكره عن خدماتكم وسرعة ادائكم التي للأسف الشديد لا تنتمي للواقع نهائي كما ارجو ان تدربوا موظفات خدمات العملاء علي تقديم المعلومه الصحيحة بدلا عن الكذب واللف والدوران فقد عانيت الكثير منكم بسبب طردين مرسلين من الرياض تم ارسالهم في يوم 15 يوليو واكد لنا موظف البريد السعودي أننا سوف نستلمهما خلال 5 الي 6 يوم بالكتير وبعد مرور اسبوع اتصلنا علي (سودابوست) يقولوا لسه ما عندنا اي معلومه عنها لازم تعطونا رقم السفريه لكي نتاكد واتصلنا علي البريد السعودي واكد لينا انه الطرود وصلت من يوم 16 الي السودان ومشينا تاني وثالت لمقر الشركة بشارع الستين ابسط شي يسالك الموظف نحن اتصلنا عليك؟ اذا ما اتصلنا عليك ما تجي طيب؟ ويوم 28 اخيرا اتصلوا قالوا في طرد واحد وصل تعالوا استلموه وجيبوا قروش معاكم ولما سالنا عن التاني قالوا لسه في (الجمارك )جمارك شنو هو اصلوا كونتينر ولا كرتونه عشان تقعد في الجمارك اكتر من 10 يوم قلنا خلاص نستني يومين عشان نجي نستلم الطردين مع بعض بدلا من تكلفه مواصلات وزمن ، وفي يوم 30 يوليو مشينا لسيادتهم طلعنا لخدمات العملاء الموظفه قالت لينا الطردين جاهزين مفروض تكونوا استلمتوا واحد يوم 28 والتاني اليوم طيب. قلنا جميل مشينا للموظف في الكاونتر ولكن الساده في الكاونتر ببساطه يقولوا ليك ما في اي طرد وصل .. كيف يا ناس وانتوا قبل يومين قلتوا تعالوا استلموا واحد يعني لو كنا جينا بعد اتصالكم طوالي ما كان حا نلقي اي شي وتاني يوم وتالت يوم في الاخر يقولوا ليك الموظفه غلطانه اتصلت علي اساس انها استلمت اوراق الطرد بس ما اتاكدت انه وصل قدامها شنو .. يا ناس الاستهتار والاستخفاف علي الناس كاننا مابنفهم الاجراءات بتمشي كيف . وبعد حجه طويله معاهم قام موظف طلع ليهو لسته فيها اسماء اصحاب الطرود وفيها اسم من الطردين سلمه للمسئول وقال انهم بيتصلوا من الصباح علي مخازنهم في (جبره) عشان يجيبوا الطرود دي (بدون تعليق ) ولما قلنا عايزين نقابل المدير قالوا (مسافر) ده كلام ده يا ناس البريد السريع معقوله بس اسبوعين واعزاركم نحن ما لينا دخل فيها (شغل كتير) دي مشكلتكم ما عندكم (مخازن) تستوعب البضائع بروضو (مشكلتكم) نحن علينا نستلم في الوقت المحدد لاننا دفعنا اجرة بريد (ممتاز ومستعجل) والعجيب بعد ده كله تدفعونا مبالغ قال ايه خدمات بريديه شنو الخدمات القدمتوها لينا المفروض تدونا تعويض عن التاخير وتعويض اذا حصل أي تلف في الاشياء المرسله .
ياريت مشكلتي دي تجد الاهتمام منكم والحل الجزري للحاصل في مكاتبكم ..
مواطنة

تعليق :
هذه الرسالة وصلتني من إحدي القارئات (نحتفظ بالإسم والبيانات) نرجو أن يصلنا من ناس (البريد السريع) ما يبرر الحاصل ده .. وطبعا إحتمال كبير يصهينوا وما يهببوهو لينا زي ما جهات كتير بتعمل فيها رايحة !!

كسرة :
بتنا في الرسالة قالت مفروض يدوها تعويض على التأخير .. هو يا بتي مش بركة الكراتين الوصلت .. قال أيه : بريد سريع

كسرة ثابتة:
أخبار ملف خط هيثرو العند النائب العام شنو(ووو وو ووو) ؟ بقت 3-2-3

Advertisements

35 تعليق

  1. Bringi

    1. أب احمد رمضانك كريم و مبارك – و مبروكة عليك البرنجية – و الحكاية شنو انت ما بتساهر زينا و الا شنو؟ و الا بقيت بتنوم بعد البرنجية !!!

  2. الناس مع رمضان نوم شديد الموضوع دا ليه عشره دقايق من نزل و لامن نا لقيت زول صاحى قلت أشيل البرنجيه

  3. يا بتنا إنت عافه سودابوست دى ملك لى منو
    يا زوله أسهل ليك تلقى الباع خط هيثرو

  4. الغالي جبرا / اتفق تماماً مع الأخت ومفروض فعلاً يوقفوا إعلاناتهم السخيفى
    لأنو ماعندها علاقة بالحاصل وأنا بعتبر اختنا محظوظة على قولك
    على لمت في الكرتونة نحنا عندنا كرتونة من الامارات من تاريخ
    1/7/2012 ولغاية اللحظة مامعروفة وين؟؟؟؟ مع انو اتاكدنا (اونلاين(
    من بريد الامارات ولقينا الكرتونة طلعت يوم 2/7/2012!!
    (طبعا حكاية (اون لاين) دي لسه بدري علينا في بريدنا؟؟
    شكراً

  5. الظاهر المشكلة دى عامة أنا رسلت طرد من يوم 8/7/2012 طبعاً متفائل جداً مرسل حاجات رمضان للناس الطيبين أهلنا وللان الاول من أغسطس لم يصل وراجعنا البريد والسنترال والمخازن لكن حبة ملح وذابت الله المستعان الغريب انو بريد الامارات بيأكد أنة الطرد دا وصل يوم 9/7/2012 …الله المستعان قال حاجات رمضان قال

  6. الساعه ماشه على إتناشر وبت وراق و المندهش و بقية العقد الساخر ما ظهروا نعلوا رمضان ما يكون خش العضم

  7. الساعه ماشه على إتناشر وبت وراق و المندهش و بقية العقد الساخر ما ظهروا نعلوا رمضان ما يكون خش العضم
    ولا مو هيك

  8. الساعه ماشه على إتناشر وبت وراق و المندهش و بقية العقد الساخر ما ظهروا نعلوا رمضان ما يكون خش العضم
    _____________________________________________

    1. انا يا طارق حردانه عديل كده والسبب ود الخلاء

  9. أب أحمد …سلام
    شغال براااك أمسك لي وأقطع ليك … أخد راحتك نحن بنجي بعدين

  10. الغريبة انا نفس السيناريو حصل معاى حيث ارسل لى طرد من الخليج و ابلغت بان الوصول فى خلال اسبوع بالكتير, و بعد اكتر من اسبوعين من الايميلات و المراسلات و محاولات الاتصال بسودابوست و بريد الخليج وصلت لتلفون احد المدراء, بس و الامانة لله انه كان جدا متعاون و اعتذر بأنه فى اجتماع و ادانى (موبايل) احدى موظفات خدمة العملاء و التى كمان بدورها كانت (أديبة) و بتحاول تساعد, و دة بس اللى كان عندهم, يعنى أدب فى الكلام و اعتذار عن التأخير, و لكن لم يصلنى الطرد الا بعد 3 أسابيع بدون معرفة السبب !!!

  11. البروف والسمار .سلام .
    بالطريقة دى راسنا مابنقطع . تانى الحلومر نرسلو مع منو إذا كان سودابوست دى طريقتا .
    غايتو ياجبرا إذا كان الكراتين دى فيها علاج لى مريض فنحن ندين ونشجب ونقيف الف أحمر أما إذا كان غير ذلك …. أنفخ ياولا…

  12. ياحلييييل زمن البريد

    1. دي مش الدعاية بتاعتهم ، ما تفهموها من أول يوم قالوا ليكم ياحليل زمن البريد ، انتو ياجماعة متوقعين انو الخدمات بتاعت البلد تتصلح وترجع زي أول . هه لما حمار الوادي يهنق لانو المسئولين ما فاضين للحاجات دي والناس كالعادة مستسلمة للوضع الحاصل ، دي بلد بقت زي عربية ال….. تدفروها لقدام ترجع لوراء

      1. أبو غسان
        بللاى أسأل واحده من حبوبانك عن باقى المثل دا (( يبخروها تـ………)) ياهو دا بالظبط الحاصل للبلد و مؤسسانا

      2. هو حمار الوادي ما بهنق ؟؟؟ يا ربي بهوهو ؟؟؟

  13. السلام عليكم . الموضوع المطروح هو بنفسه اللي حصل لينا . بل اننا بنرسل طرود وهي مجرد اغراض شخصيه ومنزليه وبيدفعونا عليها جمارك . المضحك في مرة اضطرينا نشحن ملابس ومعظمها ملابس مستعمله اتخيل سيدي انهم جمركونا عليها !! وكمان بالرغم من اننا كتبنا مكتب الستين عشان نستلم منو الطرود قالوا لينا امشوا الرئاسه هناك واستلموهم واستلمناهم وكمان فقدنا اشياء . فعلا مهزله

  14. سلام للجميع … والله ياجماعة الكراتين البيجيبوها من بره دى زاتو حيرتنا … غلطانين ثم غلطانييييييييييييييين ثم غلطانييييييييييييييييييييييين . انتو تندمسو زينا وتقتنعو بالجوه بس.

    1. ينصر دينك يا استاذ ابو عمرو .. جنس حساده

  15. البريد السريع وسودانير والجمارك وشركات الاتصالات و و و كلها بتتشابه في انها غير سريعة بس كلمة سريع وسريعة دي جات من وين مش عارف

  16. لو سمعت اي دعايات او اعلانات في جمهورية الخرتيت سد دي بي طينه ودي بي عجينة

  17. ولا تحمل هم يكون بس من رمضان المرة الجاية خلي الطرود تجيك في اي شهر ثاني لانه رمضان واظن وان بعض الظن اثم ان موظفينا كلهم نيام مش نحنا بلد نيام نيام زمان وبلد الخرتيت كمان

    1. إنت يازول ما بتعلاف نيام حقنا بتاع مدني دا ولا شنو ؟؟؟

      1. تصحيح .. ما بتعرف

  18. شنو يا جماعة الليلة الخميس والساعة 11ص الخرم كتلنا– لو مافي حاجة خلونا نشوف غيرها — في ناس راجنها
    من السحور ولا شنو يا الغلبان

  19. يا خالد مدني .. كلم جدو سلاوي كان عندو نيه يرسل حاجه لرمضان الجاي يرسلها من هسي .. إحتمال تصل

  20. يا عمك زبطت ليك موضوع البتاع الجنب عوضية اتصل ضرورى ما لامى فيك

  21. نهارا جهارا كدة !!؟

  22. العوض عند الله بابت الناس ديل كرور ساااااااااااااى كان طرودك دى صمي خشمك واحمدى الله سااااااااي

  23. الاخ جبرا والعقد الفريد سلامات
    موضوع اليوم دا فيهو موضوعين بخصوني اولا- موضوع الكرتونه دا من ما قريته جاتني (حساسيه كرتونيه )انا ما عارفه سر الكراتين البتتاخر شنو كرتونة رمضان استلمنها بعد هلال العيد بقى يتاوق معليش يا بتنا اصلو حال الكراتين كده
    وموضوع سودابست راجلي كان شغال فيهو قبل ان يحال الى الصالح العام مره بهظر معاهو قلت ليهو والله البريد والبرق بعدكم بقىت
    جمال مكاتب وحيط كيف وعربات كيف والعجب الموظفين بقوا قاعدين فى الكراسي الدواره موش زيكم زمان الكرسي مقدود
    ضحك ضحكه كبيييييره وقال لى دي سماحة (جمل الطين) وما زاد
    انا يادوب فهمت قصده
    كسره
    انت ياجبره المخازن دي ما قالو عندك (اذا انت متواطئ مع ناس سودابوست )

  24. الكسره الثابته
    3-2-3 دي الا تجيب ليها مدرب وحكم دولي بعد كده

  25. البريد في السنين البيضاء :

    في العام (1858) تم افتتاح أول مكتب بريد في السودان بواسطة الأتراك بسواكن ، ثم جاء البريطانيون وطوروا خدمات البريد ، من تاريخه وحتى وقت قريب ظلت ذاكرة السودانيين تحفظ عن ظهر قلب النشاط الثر الذي كان يقوم به البريد والبرق في خدمة العامة ، وخلد ذلك الاحترام خلال شخصيات سعاة البريد وعامليه في كل العصور ووضعهم المميز في المجتمع السوداني.
    وفي العام 1898 تم تحويل البريد والبرق من مصلحة حربية إلى مدنية تحت مسمى البوستة والتلغراف وفي العام 1910 صدر أول قانون منظم لخدمات البريد والبرق وف يالعام 1919 تم تحويل الاسم إلى مصلحة البريد والبرق والهاتف حتى 1971 حيث تم تقسيمها إلى مصلحتي البريد البرق ومصلحة المواصلات السلكية واللاسلكية ، وفي العام 1978 صدر أمر تأسيس المؤسسة العامة للبريد والبرق وأصبح لها مجلس إدارة مستقل حتى 1990 أحد ثاني أهم السنين السوداء والمنيلة بستين نيلة ليتم تحويلها إلى هيئة مستقلة باسم الهيئة العامة للبريد والبرق .

    البريد في السنين السوداء :

    وبعد كده فى 1992 وعينك ماتشوف الا النور بقينا ما سامعين عنه أي حاجة .. بس شايفين المبنى السمح البنوه الإنجليز في شارع الجامعة ده ، وبيخيلي انهم بيخططوا يبيعوه .. المهم إنو الهيئة التى تدعى سودابوست دي حقت واحد فيهم وبيقولوا إنها شركة مملوكة ( للجهاز الاستثماري ) للضمان الاجمتاعي يعني شنو الكلام ده أنا ما فاهمو .. يعني الضمان الاجتماعي يستقطع من الموظف المسكين ويسوو بقروشم استثمار مثلا يعن ولا مأجرين الهيئة لصالح المواطن المطحون المهم انو الشغلة جايبلايها اسثمار وكده وخاشة جيوب الجماعة الحلوين ( تخصيص وكده ) وبعد ده فيها جرجرة .

  26. شر البلية ما يضحك – البريد والبرق والرسائل وال وال (ملحوظة حتى الان لم ولن افهم كيف الناس بفتحو حاجة الزول ويشيلوا منها وينكرو كل حاجة )

  27. البريد السعودي عندهم خدمة اسمها تتبع رسالة , يعني
    المرسل بمجرد خروجه من مكتب الارسال يديك رقم الرسالة
    وتدخل موقع البريد السعودي وتدخل رقم الرسالة يوروك
    كل تحركات الرسالة من الاستلام لحدي المحل الوصلت ليهو
    بالساعة والدقايق وتمشي مكتب البريد المحدد وتستلم.
    الوالد رجع خروج نهائي من السعودية سنة ستين قال
    زمان بريد السعودية كان بجيهم عن طريق بورسودان
    يعني زي لمن تكتب جمهورية السودان ومنه مشكورا الي
    المملكة العربية السعودية !!! زمن !!!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: