بالغتا يا فاروق

صديقي (فاروق) هو الآن في منتصف الخمسينات ، كان والده من أغنياء التجار وقد كان بحكم ترحاله متابعاً لتجارته
مزواجاً إذا نزل في (جوبا) تزوج وإذا زار (حلفا) تزوج وإذا مر بشندي تزوج وإذا بات بسواكن تزوج وقد حباه الله بأبناء من كل زيجاته هذه كان يرسل لهم ما يكفيهم من مصاريف بإنتظام إذ كانت مصادر رزقه متنوعة كانت له حواشات ومشاريع زراعية بالجزيرة وشركة تعدين وتنقيب للذهب بالكرمك (قبل أن يعرف الناس التنقيب) ، كما كان وكيلاَ لعدد من شركات البترول ومحطات المحروقات .
كان شاطراً في التجارة ومستقيماً وذا سمعة حسنة في السوق ، لم يهتز موقفه المالي في يوم من الأيام لأنه كان إدارياً محنكاً يتابع كل هذه الأنشطة المختلفة بدقة ولا يتوانى في عقاب كل موظف أو عامل يقصر في عملة أو تمتد يده للأموال .
فجأة توفي والد (فاروق) وكان حينها فاروق شاباً يافعاً في منتصف الثلاثينات ولأنه كان أكبر إخوته من جميع الزيجات فقد كان وصياً على التركة لكنه للأسف الشديد لم يكن أميناً عليها .. كان كثير الأسفار الخارجية (في الفارغة والمقدودة) ، لم يكن يتعالج في المستشفيات العامة (ولا الخاصة ذاتا) ما أن يحس بأى أعراض مرض (حتى لو نزلة سااكت) حتى يبادر بحجز مقعد له في الطأئرة المتجهة لألمانيا مستشفياً بإحدى مستوصفاتها ، كان يصرف ببذخ شديد على مناسبات العائلة ويقوم بتغيير أثاث مكتبه ومنزله الفخيم أكثر من مرة في العام الواحد كما لم يكن يركب هو وأبناؤه إلا (موديل السنة) .
أول قرار قام بإتخاذه بعد وفاة والده أن قام بإقصاء كل الموظفين والعمال الذين قد عينهم والده لأمانتهم وكفاءتهم وإستبدلهم بأصدقائه وأقاربه والذين بدورهم كانت تهمهم مصالحهم الخاصة فأدخلوه في مشاريع فاشلة وغير مدروسة لا تحصى ولا تعد بل أوعزوا له ببيع بعض الشركات الرابحة بحجة خسرانها فباعوها بأبخس الأثمان وقبضوا (الكومشنات) ، وعلى الرغم من أن هذه الأموال أموال ورثة (وما حقتو) إلا أنها كانت ملكاً مشاعاً لأصدقائه ومعارفه ومحاسيبه (كل زول يلبع على كيفو) ، لم يكن فاروق يلقي بالاً لنصائح أصدقائه الخلص الذين كانوا ينصحونه بأن (يضبط المسألة) وأن يحاسب المفسدين وأن (يمسك أيدو شويه) بدأت احواله تسؤ خاصة بعد أن طالب أخوانه من أبيه أن يتم فرز ما تبقي من التجارة وأن يعطيهم (حقهم) وقد كان أن حكمت لهم المحكمة بذلك .
قلت موارد تجارة فاروق بعد أن ذهبت توكيلات (المحروقات) إلى إخوانه .. وأصاب مشاريعه الزراعية الجدب والعطش بعد أن باع كل المحاريث والآليات الخاصة بها ، أعوام طويلة لم تعد شركة التعدين والتنقيب تظهر عائداتها في ميزانية الشركة بفضل من ولاهم على إدارتها !
لم يعد فاروق قادراً على دفع أقساط (السلفيات) التى أخذها من أجل تسيير ما تبقي من أعماله مما جعل البنوك تقيم دعوات قضائية في مواجهته وتقوم ببيع ما تبقي من عقارات وعربات وشاحنات ومكاتب وفجأة وجد فاروق روحو (أباطو والنجم) لم
يسلم منزله الذي يسكن فيه من البيع لتسديد ما تبقى لديه من ديون لدى البنوك !
حاول صديقي فاروق أن يستدين من أصدقائه لكنهم أشاحوا بوجوههم عنه لأنه لم يكن يستمع إلى نصائحهم ، البعض طرح عليه أن يقوم بمقاضاة من نهبوا وإختلسوا أمواله فربما تعود إليه (قرش قرشين) فتتحسن أحواله من جديد إلا أنه لم يأبه لذلك (ما قروش ورثة وكده) ، لم يكن أمام فاروق إلا أن يمتثل للأمر الواقع وهو أنه قد أفلس تماماً و(عدم التعريفة) !
بالأمس زارني (فاروق) في المنزل شرح لي ما يعانيه من مسغبة قال لي أن الأولاد تركوا الجامعات والمدارس وقعدوا في البيت وإنو البيت ذاااتو ما إتولعت فيهو نار ليهو مدة وإنو واقف من تناول حبوب الضغط والسكري والقلب عشان مافي قروش يشتريهم وإنو سيد البيت جاب ليهو أنذار بالإخلاء عشان ليهو أكتر من سنة ما دفع ليهو !

– وح تعمل شنو يا فاروق في الوضع ده هسه؟
– ما ده الجابنى ليك ذاتو يا أستاذ
– إن شاء الله خير
– لا خير أصلو أنا جيت أشاورك عشان في زول ح يديني قروش أحلحل بيها مواضيعي دى
– والمشكلة وين يا فاروق
– المشكلة يا أستاذ إنو (بالفائظ) .. الجنيه بجنيهين .. يعني ربا !!
– أيوه ربا وأبوهو ربا
– لكن يا أستاذ مش قالو (الضرورات بتبيح المحظورات)؟
– والله بتبالغ يا فاروق تشتت في القروش يمين وشمال ولمن تفلس جاي تقول الضرورات بتبيح المحظورات ؟ لكن بعد ده كولو خلينى أسأل ليك ناس مجمع الفقة الإسلامي عشان ديل ناس علماء ومتفقهين ما ذينا نحنا ناس قريعتي راحت !

كسرة :
يلا يا جماعة أفتوا لينا بى سرعة عشان أخونا فاروق ده مزنوق شديد وكده!

كسرة ثابتة :
أخبار ملف خط هيثرو العند النائب العام شنو(ووو وو ووو)؟

Advertisements

51 تعليق

  1. برنجيه مع وقف التنفيذ

    1. والله بالغت انت يالفاتح
      تعليقك بانتظار الموافقة بالنشر دي معناتها شنو

  2. تضامنا مع شهداء نيالا
    اللهم ارحمهم جميعا
    الاول……………ززوي وي وي

    1. قرصتك نملة !؟
      وى وى وى

  3. مبروكه عليك

  4. يا استاذ قووووووووووووووول الحكومة عدييييييييييييييييييييييييل كدة في شنو
    نصيحتي لفاروق دا خليهو يمشي يلاقي اوكامبو او باسودا بدل البهدلة الهو فيها دي

  5. انا بقترح عليه بيع أبنائه لانهم نجباء ومحل ما يمشوا يشار اليهم بالبنان اخلاص وأمانة وتفاني في العمل وشطارة ما عادية في الأكاديميات وخلي يشبع ويتم باقي شبعو من البقبضو من ثمن بيعهم. دا حرام عليكم يا الناسين حسابو
    يوم يسألكم الله. ولو في خطوط ما اتباعت برضو يتم بيعها والله ستسئلن يوم إذن عن النعيم وكل مليم دخل جيوبكم لم تكونوا الأحق به ناهيك ان تكون سارقه.  

  6. البروف الحبيب….
    نعلو دا فاروق بتاع المقابر !!؟ كع…
    اليمشى يشوف ليهو قبر سااااى ويتخمد فيهو,لانو بعد دا مافى امل او بدر ذاتو !!

  7. بالغت يا فاروق ..
    الغريبة الفواريق الفى الدنيا كلهم
    بيضيعو قروشم فى اشياء ضد الدين
    وبيسموها سفاهه
    اها البيضيع قروشو باسم الدين يسموها
    ليه شنوووووو ؟؟
    محتاجين يا عمك قاموس جديد لتعريف
    المصطلحات وتسمية الحركات
    الانقاذية

  8. قلت لى حالتو اخوها السغير
    طيب لو الكبير كان عمل شنو
    كان سف اختو ذاتا ؟؟
    باااالغت فوكا

  9. سلام يا بروف وكل المشاركين … انت يابروف فاروق دا مرتو واولادو وين من المسرحية دي ولاكمبارس وفاروق بعدا قادر عليهم

  10. الضرورات تبيح المحظورات
    إنتحر يا فاروق ولع النار في نفسك – بس – يعني أبعد بعيد جدا من البيت وولع في روحك عشان ترتاح وتريح

  11. الاخ جبرا والاخوه الاعزاء
    انا من وجهة نظري ومن غير نظاره اقول لفاروق حل سليم ميه ميه واخلي يمشي يدين بالربا ودا الحل الوحيد والسليم
    آآآآآآآآآآآآآآآآآآآي ما يجي واحد (ناطي ) لي ويقول لى حرام وما حرام انا عااااااااااااااارفه انو حرام لكنها الطريقه الوحيده النقدر
    ننتقم بيها من ناس فاروق عشان زي (ما توعد الله اكل الربا فى بطنه نار ) خليها تولع فيهم وتشويهم شي

    1. 🙂 حرام حتى في الإنتقام أختنا بت وراق

      1. انا عشان جنس الكلام دا قلت مافي واحد يجي ناطي لي ما انا عارفه انو حرام وهم عارفين انو حرام داير يغش علي ربه
        اديناهو الصراح البريحنا

      2. 🙂 و أخوك جاكي (ناطي) عشان جنس الكلام دا
        سلام يا بت وراق

      3. ياخوي محمد هسع جبرا دا ليهو كم سنه بنصح في فاروق لكن فاروق راسو ناشفه وما خايف من الله يسو ليهوشنو

    2. يا ربى لو عمل صندوق و اخد الصرفة الاولى, دى ما يتحلو؟؟!!

  12. أستاذنا الفاتح و الأحباب .. محزنة قصة الأخ فاروق و هي حياة !!
    فيا سبحان الله نسأل الرحمن لنا جميعا ستره و نصرته و أن يحفظنا من الذل و الشماتة.
    لكن يبقى الحرام حراما و حكمة الله تبقى فينا تتجلى
    من أحل حرام الله أو أجازه بدعوى (سوءالظروف) و (الضرورة) فإنه يتتطاول ـ و العياذ بالله ـ على شرعة ربه !
    فوحدها (المحظورات) ما تجوز عند الضرورة لا (المحرمات) ؛
    و إلا لعمت الفواحش فينا جميعها حتى القتل بداعي (دفع الضرر) و الضرورة!!
    اللهم فرج عنا جميعا و يسر لنا ما ترضاه خيرا حلالا يا رب
    .. يا بروف إنصح (فاروق) باللجوء لله وحده متيقننا نُصرة ربه بالإجابة .. ما ضاع من توكل على الله وحده
    دع الربا.
    فمن ترك شيء في الله أكرمه الله بخير منه

  13. و دا (الحال) الحصل فينا حسه في السودان .. السبب (أكل الربا) و من زمان كمان و (نهب المال العام).
    بس حقيقة أظرف موقف حصل من شاكلة (المضحك المبكي) هو لمن أحد نواب البرلمان رئيس لجنة المالية ـ الوزير المالي السابق ـ أوضح وجهة نظره (الدينية) في شرح أسباب الأزمة و كيفية (التصدي) لها بال (دُعاء)!!
    و نعم بالله لكن … 🙂

  14. يا بروف الناس (البتتلاعب) و (تتحايل) على حرام الله و سبحان الله هُم ما بعجزوا الله أبدا لكن الله يُمهل و لا يُهمل.
    عارف يا بروف عن موضوع (إغتصاب الأطفال) الظاهرة العمّت مُجتماعتنا و سبق للأستاذ الفاتح جبرا الدعة إلى مُراجعة (القوانين) بخصوصها في مقالة عارف أستاذي الطيب إنو السبب الأساسي هُو (القوانين) المُعدلة دي نفسها !
    فالأحكام في (الإسلام) التشريع جاهز و فيه الحكمة لكن (البشر) براها (بغرور) بتعدل و تمسخ التشريع الرباني و كأنها هي ـ و العيذ بالله ـ أحكم من الذي خلقها !!
    .. في (الأردن) سُنَّ قانون (الإغتصاب) بأن أجاز العفو عن (المُغتصب) إذا (قبل) ـ وافق) على الزواج ممن إغتصبها !!!!
    و يا سُبحان الله ماذا ينتظرون بعد هذا (القانون الإنساني الجديد) أن تشيع (جرائم الإغتصاب) فيهم أمام كل شاب (إشتهاء) فتاة و لقي صُعوبة في الوُصول بالحال إليها !!

  15. و الحق أن ليس لأحد من الخلق و لا حتى (مُجمع الفقه السُوداني) ذاتو بتحليل ما حَرم الله.
    و الأدلة مَوجودة و (مَكرُ الله أكبر) و العياذ بالله

  16. الآن إذا جاء مُجمع الفتوى بفتوى بسبب الضرورة أباح فيها (الزنا) و هُو (حرام الله) فمن يقبل أن يُزنا في أهله و لحمه و عرضه !!
    إن صُعبَت هذه البفتوى علينا تطبيقا فلماذا (استسهل) البَعضُ إباحة الربا ؟!!!!
    الأنَّ السبب هُو أنَّهُ مُجَّرد (مال) ؟!!
    أليس الله يعلم أنَّهُ مُجَّرد (مال) ؟!! أم ـ و العياذ بالله ـ غاب ذاك عَنه جَّل و تعالى !!

  17. 🙂 و الحُكومة أكلت الحرام و من زمان و مجلس الإفتاء أحلَّ الحرام و من زمان و (شعب السُودان الفضــَّل) ليهو الله والعالم الله و الحافظ الله و من زمااااان

    1. لكأنى بك حبيبنا (محمد حسن) المدهش !!
      اعترف سريييييع لو هو…

      1. 😆
        أيوه الحبيب ياسين

      2. طيب ليه كدة ياخ !!؟
        عملت ليك شنو انا عشان تخل ىبى كدة ؟؟اهئ اهئ اهئ …
        واصلنى ودا رقمى 0555040149

      3. العزيز دكتور ياسين : قووووووووول (تم) ؛
        🙂

  18. الاقتصاد زمان لمن كان صغير كان كويس و بسمع الكلام و كان مجتهد واهلوا كانوا بصرفوا عليه دمهم عشان يكبر ( دمغه شهيد، دمعة جريح ،……..) ودروس خصوصيه وكتب ولبس على مستوا عشان يكون زي اصحابوا المعاه في المدرسة المهم ما قصروا معاه
    أسي اول ما كبر ( شم صناحو ) مشى اخر اياموا مع شله خربانه والعياذ بالله فعلموا الفساد و السرقة  و العربده وأي حاجه تخطر على بالك ف خربوا و اول ما حاول يوعى لقى نفسوا ضيع اي حاجه  و ماعارف يرجع يقول لي اهلوا شنو ؟
     حاول يلقى ليو كذبه يمشيها على اهلوا بس لقى وأثناء ما قاعد حيران جاو فردتوا اسموا  سلڤى فسالوا مالك مهموم 
    فحبينا حكى ليوا الحكايه 
    قام سلڤى قال ليو حلك عندي 
    اقتصادنا : ألحقني بيو هو شنو ؟؟؟ وانا ما بقصر معاك يافرده و حقك محفوظ 
    سلڤى: اسمع يا وجيه تعال لي في هجليج نعمل نظام أنوا جوك شماشه ضربوك وشالوا حقك بس اهلك ديل حمشين جداً ارجع ليهم وهدومك مقطعه شويه كده  وقول انك دقيت الصعاليك ديل بس هم شالوا حقك وجروا 
    وكده انت تبقى بطل قدام اهلك  وبعد المعمعه دي براحه كده قوليهم الدولار بقى بي ٥ عشان تتم الناقص عندك تظبط الامور . لقتني كيف معاك يا حبه ؟؟؟؟
    اقتصادنا : استاذ يا سلڤى شغلك نظيف 
    سلڤى: اها حقى متين وكيف ؟؟؟؟
    اقتصادنا : ياخ انت دايما مستعجل كدا خلي خطتتك دي تمر وانا بزبطك في اول او تاني طاوله مباحثات 
    ..
    ..
    ..
    ..
    ..

  19. ما نلحق. جماعتنا بي توتو كوره ولا اي لوتو ولا يانصيب و نمشي الشغلانه
    ولا نعمل ضريبه على بيوت العرقي و الدعارة و نلم ليهم اذا الفوق داك كان حلال البحرم دا شنو ؟؟؟؟؟؟؟

  20. انا بقول ليه يا فاروق الزم الاستغفار فان الله غفارا وسوف يرزقك الله ان اتقيته فان من يتقى الله يجعل له مخرجا ويرزقه من حيث لا يحتسب واهم حاجة يمشي لاخوانه الاكل حقهم ويطلب منهم يسامحوه ويعفوا عنه حتى تستقيم اموره واحسن ليه يجوع ولا النار

  21. هو اكل مال الايتام قروش الربا حاتعمل شنو غير تدخلو السجن وبث خلاص ربا ربا

  22. جنوبي وين يا اخواننا .. يكون فاروق فاطر معاهو ؟؟؟

    1. بري وحات الله ما ياكل معاي , ده بعد ياكل بيخري
      في الماعون ..
      هو جبرا ده ذاااتو ما يستنضف اصحابو …
      بالله يا سهيل انت الوحيد الفقدني ! والله فيك الخير ..

  23. انت يا استاذ جبرا فاروق دة ابوهو اتوفى في يونيو 1989؟

  24. سلام ياقبيلة،،،
    فاروق لم يبالغ ولم يفعل أكثر مما فعله الآخرون، وإنتوا قايلين المصائب الواقعة عليكم دي من هين ولا من ساهل، ما كلوا من عمايلكم دي، إنتو عينكم في الناس تأكل في الربا من زمن طويل (وكمان جابت ليها فتوي بجواز الإقتراض بالفائدة قال إيه علشان الضروروات)، وهو في زول بيلجأ للمحظور ده من تلقاء نفسه ، مش لابد أن يكون إضطُرّ إليه إضطرارا”، ومع ذلك حرمه المولي جلا وعلا وهو أعلم بالمقصود والحكمة من ذلك ولكن أكثر الناس لا يفقهون، وتعال شوف باقي البلاوي والمصائب من أكل في أموال اليتامي والمساكين، وأكل للسحت، وفعل السيئات والخبائث وما أكثرها من كذب وغش وخداع ورشوة ونفاق وما كان أخفي فهو كثير قد عفاه رب العباد الرؤوف الرحيم، (وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ ) الشوري آية (30) وما نشاهده من نتائج ماثلة للعيان من تدني في كافة مناحي الحياة، ومن تسلط للحكام علي الرقاب، وإذاقتهم للناس مُرّ العذاب ماهو إلا نتيجة لسوء السلوك هذا…
    وفي ذلك يقول الحق جلا وعلا في سورة السجدة الآية رقم (21) بعد بسم الله الرحمن الرحيم ((وَلَنُذِيقَنَّهُمْ مِنَ الْعَذَابِ الأَدْنَى دُونَ الْعَذَابِ الأَكْبَرِ لَعَلَّهُمْ يَرْجِعُونَ ))
    والمعني الواضح والذي لا يحتاج لعناء أو لكثير تفسير هو غاية إذاقتهم العذاب ليرجعوا، ورجوعهم المرجو هو الرجوع إلى الله بالتوبة و الإنابة و المعنى: أقسم لنذيقنهم من العذاب الأدنى أي الأقرب مثل السنين و الأمراض و القتل و نحو ذلك قبل العذاب الأكبر يوم القيامة لعلهم يرجعون إلينا بالتوبة من شركهم و جحودهم. وهل هنالك بيان أكثر من الذي نعيشه اليوم والعياذ بالله.
    الناس دي فكت الدرب من زمان وقاعدين يلفوا صينية وعايزين أمورهم تنصلح؟؟؟
    لا والله لن ينصلح الحال إلا بصلاح النفوس الخربة وعودة الضمائر الغائبة والتوبة والإنابة والعودة لربهم العفو الغفور..
    هذا هو العلاج الناجع لكل المصائب والبلاوي والأمراض فما تلفوا وتدوروا!!
    مالكم كيف تحكمون؟؟

    1. حاج أحمد السلاوى | رد

      أخونا بن الفلاة ..عاوزك توجه رسالة للحيكومة السنية تدعوهم فيها الرجوع إلى الله .. الشعب صابر ومحتسب أمره إلى الله ..
      ورمضان كريم والسنة دى ( مش السنة الجاية ) ربنا يحقق الأمانى كوووووووولها ( الظاهرة والخفية ) ويبلغ المقاصد ..

    2. نعم كده انت ود الخلاء

    3. هو يعني الرسالة دي ما للحكومة ؟
      لالاالزول ده قاصد الحكومة لأنو ختم ب “مالكم كيف تحكمون ”
      زمان يا ود الخلا كان اكل الربا واكل حق الناس بين
      الافراد العاديين وكان العقاب محصور برضو بين الناس
      دي , لكن هسع الحكومة هي القاعدة تاكل الربا وحق
      الناس وتأكلنا ليهو عشان كده اتمحقنا كووولنا .
      ود الخلا اكيد قاصد الحكومة لانو طالبا بالتوبة ولو قاصدنا
      نحنا نتوب كيف يعني هو نحنا المشينا الصين وشلنا القروض
      دي ولا مشينا قطر ولا عملنا خط بترول مخفي وسرقنا بيهو
      بترول الجنوب ولا شايفنا بنينا في كافوري ..

  25. صاحيك ده يا جبرا اسمه فاروق عمل كده لو كان اسمه سيف الاسلام كان ذبح اخوانه وناس الحلة

  26. فاروق قال ؟ ياخى البلد كلها فاروق مزرزرين ومخنوقين من الكبار للصغار والظروف صعبة الحكومة اجاز نوابها فى البرلمان قروض ربوية عشان البلد ماتقع ؛
    وبرضو ياود الخلا تقول علينا عمايلنا كعبة ؟

  27. لكن مش شينه نسميهو فاروق على الفاروق الفرق بين الحق والباطل ده ممحوق مش فاروق !!
    انا بقترح عليهو انو يجرب الربا مع الشعب ده انحنا بندينو بالفايص على الاقل تكون بضاعتنا ردت الينا الخوف ما يرجع الدين ويكبر اللفه !1

  28. يا ربي فاروق دا ياهو (عمر) زااااااااااااااااااااااااتو والله يا ربي مذكر وهي المقصودة (امنا الحكومة زااااااااااااااااااااتا) يا ربي انا شاطر والا بليد لكن ان كان هذا او ذاك نقول لي فاروق (عمر) او امنا الحكومة (الامر سيان) ياخي فارقونا نحنا الصغار في البيت دا وشوفوا ليكم صرفه ثانية ونحنا الصغار ديل (يعني ناس البيت وكده) بنقر بي جاي بي جاي نصلح الحال بس فكونا من تولا وكان لي دين الله البنعرفو ما ياهو دا وكل اسف للمارين على كتاباتي وللبروف واحسبوها خطرفة صائم (رغم انه صايم جد جد من زمان) ورحم الله صائم ديمة لو كان حي مش عارف كان راح يصوم كيف لانه الكل بي رمضان من غيره صاييييييييييييييييييييم

  29. 🙂 الأحباب تقبل الله منكم الصيام و القيام و أعانكم ؛
    و أستاذنا الفاتح في حاجه لازم (نقف) عندها و نعمل ليها (وقفة) كمان ؛
    ألا و هي (أخوان فاروق) القوميين ديل ما شاء الله فوالله خسارة (إنجاز وطني) لوالد الأخ فاروق رحمة الله عليه يضيع ساكت وسط (مشاكل الورثة) دي!!
    هم لو شكلو (حزب جامع) أو حتى (حركة قومية) فيا بروف ولدك طوالي معاهم مُنضم 🙂

  30. اذكرت كلمات (أعمل ليك إيه لو ترجع لي تاني) و سيد خليفة رحمة الله عليه ؛
    … آااااااه يا بلد

  31. بارك الله فيكم و جزاكم الله 1000 خيرا

  32. صُلح الحُبيّشية
    لا يحق لحكومة السودان ان تطالب بزيادة سعر ترحيل
    النفط بينما يحق لحكومة الجنوب المطالبة بتخفيض السعر
    في الاعوام القادمة .
    يرجع الشمال لحدود 1905م او أي حدود يتم تحديدها ولا
    يحق لهم العودة لحدود 1956م لا في عامهم هذا ولا في الاعوام
    القادمة, مقابل 3 مليار دولار تدفعها حكومة الجنوب
    مساعدة لحكومة الشمال ( اسم الدلع لشراء الذمم ) .
    تعيد حكومة السودان أي جنوبي يخرج عن دولة الجنوب
    ومن يخرج عن دولة السودان لا علاقة لحكومة الجنوب به
    وعلي السودان ان يحلّ مشاكله الداخلية دون رمي اللوم
    علي الآخرين .
    الله يمحقكم لا في الحرب نافعين ولا في التفاوض فالحين .
    تاكلو تاكلو بس .. تاكلو السم اليسممكم ..

    1. ههههههههههههههههههههههههههههههههههههههههه,,عجيييب يا سوبر ديب..
      عن اذنك نشرتها فى مواقع اسفيرية اخرى…

  33. يا بروف …
    خليك من فاروق … و من خط هيثرو …. اخبار لجان التحقيق الاتشكلت شنو ؟؟؟؟

  34. اما كان لك ان تقتدي بالفاروق يا فاروق

  35. يا حبيب كل سنو وإنتو طيبين .. عشان طولتا الغيبة وكدا !!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: