عندما يتأخر المرتب

المرتب أو الماهية طالها التدهور ونقصت خلال الشهور الماضية (النص بالنص) يعني الزول الكان بيصرف ألف جنيه (مليون بالقديم) مرتبو أصبح 500 جنيه وده يا جماعة لأنو الأسعار زادت بنسبة مية في المية (أو كمان أكتر في بعض السلع) وذلك نسبة لتدهور السعر الموازي للجنيه السوداني أمام السعر (المزازي) للين الياباني أمام السعر (التركوازي) للدولار الأمريكاني ..
وإنخفاض قيمة الجنيه خلت الناس يا جماعة بقت مزنوقة شديد والمرتب الكان بيخلص يوم خمسة في الشهر هسه بعد الزيادات دي بقي يخلص قبل ما تستلمو لأنو بيكون (في أحسن الحالات) كلو عبارة عن ديون وإلتزامات يستوي في ذلك الزول المرتبو 500 جنية أو الزول المرتبو 5000 جنيه .. لكن مع هذا الرهق تعالو نقرأ بل نشاهد ماذا يمكن أن يفعلة هذا المرتب (بى تفاهتو) لو إتأخر شوية يعني فات يوم 8 في الشهر .. طبعاً لو كنتا عندك (سنام) تاكل منو مفيش مشكلة لكن المشكلة تكون من الجماعة (أبو من غير سنام ) .. يعني الرزق اليوم باليوم !
• قبل أن تخرج من المنزل تبدأ في رسم خارطة طريق لتكتشف أن هنالك شارع واحد (آمن) هو الشارع الذى توجد فيه (الجزارة) وذلك بعد أن قفلت حسابك مع الجزار واصبحت إنت والأولاد (نباتيين) رغم أن للثروة الحيوانية وزارة ووزير وشنو ما بعرف !
• تبدأ في ترديد الإسطوانة الثابتة التي سمعها البقال والخضرجي وبتاع اللبن وسيد البيت لسنوات طويلة :
– والله يا جماعة لحدت هسه ما صرفوا لينا
– والله أول ما أصرف أجيب ليكم القروش
– يا جماعة لو صرفنا مش كنتا جيتكم؟

• عندما يتأخر المرتب تكون حبوب الضغط خلصت وإنتهت فتبدأ في تناول البدائل العشبية التي من المفترض أن تخفض من ضغط الدم ، شئ (قرفة) شئ (كركدي) وشئ شنو ما بعرف إلا أنها تفشل تماماً في تخفيض الضغط العالي لأنو (الفلس) ما معاهو كلام !
• كما تنتهى حبوب السكري (وسكر السكرين) فتبدأ في شراب الشاي بالسكر العادي (إذا توفر) وإذا لم يتوفر فما عليك إلا شراب الشاي مسيخ والدعاء بأن يحفظ الله أمنا الحكومة التي لا زالت تجتهد في أن تجعل حياتنا ماسخة أكتر من موية (الترمس) !
• تبدأ في ترشيد (الترشيد) الكهربائي الكنتا عاملو في البيت (حتي لا تحرم من الكهرباء وكده) فتقوم بإستخدام لمبه 50 شمعه لقراءة العناوين الرئيسية عندما تقرأ الصحف مساء ثم تطفيها وتولع أخري ذات 100 شمعة لقراءة التفاصيل .
• تبدأ في التعامل مع الفكة الحديد بكثرة .. زيت بي جنيه ونص .. فول بجنيهين ونص (طبعن لازم تشتري بالكاش لأنك زائغ من سيد البقالة)!
• تقوم بركن العربية (لو عندك عربية) وتبدأ في ركوب الحافلات لتكتشف أن هنالك شئ أسمو (كرسي النص) وما أدراك ما كرسي النص ينزل راكب من الكنبة الأخيرة الحافلة كوووولها تنزل !
• تزوغ من حضور المناسبات الفيها (كشف) حتى لا ينكشف حالك المكشوف أصلاً.
• تتنامى وتزدهر لديك ملكة (فن الإقناع) : يا أولاد والله الكسرة بالموية والشطة وزيت السمسم دي أحسن منها مافي ولذيذة وصحية وبتنهضم بسهولة ! وعندما يتم الإقناع وتبدأ في خطوات التنفيذ تجد إنو (4 طماطميات بعشرة ألف) غير الكسرة ذاااتا والبصل والزيت (لو فضل فينا زيت) !
• تتوقف عن شراء اللبن بعد أن (يفطك) سيد اللبن فتبدأ في إقناع أولادك بأن هذه الأيام ينتشر فيروس (جنون اللبن) ولازم ناخد هدنة منو لحدت ما (المرتب) أقصد الفيروس يمشى !
• تتوقف عن إستخدام (مكوة الكهرباء) لكي الملابس وتلجأ (للفحم) لتكتشف أن (الفحم) لا يقل سواداً عن الكهرباء !
• تبدأ في (قرص) السيجارة إذا كنت من المدخنين لإعادة إستخدامها أكثر من مرة مما يجعل نسبة التدخين لديك تنخفض وهنا تتجلى الحكمة وراء المثل الذي يقول (رب ضارة نافعة) !
• عندما يتأخر مرتبك تنخفض لديك الرغبة في الإستماع إلي الموسيقى والغناء (مع الفلس ده المستمع ليها شنو)

كسرة :

عندما يتأخر مرتبك تبتسم عندما يتقدم نحوك متسول طالباً (حاجة لله) لأنك محتاج لنفس (الحاجة) لكن بس هو ما عارف سااااكت !!

كسرة ثابتة :
أخبار ملف خط هيثرو العند النائب العام شنو(ووو وو ووو)؟

Advertisements

50 تعليق

  1. برنجية رغم أنف الحاسدين والراصدين ..
    تسجيل حضور وبنرجع ليكم بعد فسحة الفطور ..يا اب احمد وشنباتى ,,بت وراق

    1. مرحب يا المعادلة الرياضية و مبروكة عليك البرنجية. و انت يا معلم العاجبك شنو صاحى ليها بدرى و مقابل الكيبورد اول ما نزلت رحت (مبرنجا) كدة زى بتاعين الكوتشينة لمن يجر ليو خمسين !!!

    2. بلاك بيرى ولا شنو !!؟
      مباركة على مضض !!

    3. الفين مبروك عليك انا لو ما حردانه بالتباديل والتوافيق وجميع المصفوفات ما بتلقاها

  2. المتسول البجيك بتكون فايتو بالصبر يا عمك
    لكن بعد كده الشاف الناس ركبت صوانى ما كضب.

    1. بعااتي و ما فاضي | رد

      الصواني ركبوها كتااااااااااااااار لمن شالوها و ختو محلها استوبات,,,,

    2. مرة فى السوق العربى واقف مستنى لى واحد و تأخر كعادة السودانيين, قعدت اصور فى الناس اللى فى الشارع شفت لى واحد شكلو موظف بس زهجان جدا, قصدوهوا اكتر من شحات لحدى ما كورك فى اخر واحد قاليو: هو السوق دة مافيو غيرى انا و الا شنو؟ كلكم جايينى قايلين القبة تحتا فكى, و الله انا لو ما شوية كدة, كنت زاتى لفيت معاكم اشحد فى الناس, قوم كدة عليك الله… الله سبحانه و تعالى المستعان

  3. بعااتي و ما فاضي | رد

    برررررررررررررررررنجية سحور, الله يدي العافية و يهون كل قاسي…

    1. أحلى ما قيل والدنيا قبايل عيد ( الله يدي العافية و يهون كل قاسي ) …

  4. البروف والسمار .
    سلامات.
    والله ياجماعه لمن الماهية تتأخر الزول بيكون ماطايق روحو ومقلق . الغريبة الشحادين بقو يفهموها لمن يمد ليك يدو وإنت تبتسم ليهو يقوم يقول ليك الله كريم ويرجع صاد .

  5. سلامات يا قبيلة
    انتو البوست دا غيرو مواعيدو ولا شنو— ولا دي مؤامرة —اصلها البلد دي اليومين ديل مليانة مؤامرات.
    هسع بدل الالكسرة بالزيت والطماطم والبهدلة دي ما اخير نمرق الشارع
    بلا مرتب بلا اتاخر

    1. و قايل الشارع هو الفيو اكل و الا شنو؟؟ دى حتى صينية فطور رمضان بقت تطلع من البيوت على استحياء !!! و كمان فاضل ليها 10 ايام و تقيف خالس – اكرب جريدتك يا اخوى و امرق ليك حتة تانية ,,,

  6. يا جماعة الزوار الان 8 والتعليقات 7 اهنا هنا برضو في مراقبة ولا الاستاذ قاعد يتاوق بفوق

  7. فرَّج اللهُ عن الجميع و حفظ السُودان و أهلهُ و صَرَفَ عنهم شرَّ ما قضاهُ ولطفَ برحمته بهم و أكرمهُم و عَوَّضهُم .. اللهُمّ آمين.
    و للفائدة نستأذن أستاذنا الفاتح و إخوتنا بهذه التذكرة :
    —————————————————–
    -أَوْحى الله عزّ وجلّ إلى نبيّ من أنبيائه: “إنّي أنا اللهّ مالكُ المُلوك، قلوبُ المُلوك بيديِ، فمَن أطاعني جعلتُ الملوكَ عليهم رحمةً، ومَن عَصاني جعلتُ الملوك عليهم نِقْمةَ.”
    وأوحْى الله تعالى إلى نبيّ من أنبيائه: هَبْ لي من قلْبك الخُشوع، ومن نَفْسك الخضوع، ومن عَينيْك الدموع، وسَلْني فأنا القريب المجيب. وفي بعض الكتب: عَبْدي، كم أتحبّب إليك بالنِّعم وتَتبغَّض إلي بالمَعاصي! خَيْري إليك نازل، وشرُّك إليّ صاعد.
    ..(منقول عن كتاب العقد الفريد باب من وحي الله تعالى إلى أنبيائه)
    —————————————————————-

  8. هو الشئ ده لسع اسمو المرتب ؟ قاعد يرتب حياة منو
    ولا ينظم امور منو وحتي هو ذااتو في جيته بقي ما مرتب
    مره يجي يوم 5 ومره يوم 10 ومره يجي جزء منه ومره
    يجي مع الشهر البعده !! ده مفروض نسميهو المشحتف .
    المسئولين رواتبم بالملايين وبيستلموها قبل نهاية الشهر
    والموظفين المطحونين رواتبم اقل من نص مليون وبيستلموها
    بعد نهاية نص الشهر الجديد ليه بس كده بس كده بس ..

    1. هههههههههههههههههههههههههههه
      كل مسول بمرتب بتاعو الاانا الموظف دا 0000 ليه بس كده بس
      والله ياجنوبي ضحكتني واتخيلت كل الموظفين الشهر الجاي فى حالة الفنان الرايع طارق الامين وكل موظف مطلع جيوبه وبنطط فى الشارع ويقول ليه كده بس ليه كده بس كده بس

  9. الاخ جبرا والاخوه الاعزاء
    المرتب اذا تاخر بيحصل الكلام القالوا جبرا اما اذا اعطونا المرتب قبل مواعيده كما امر وزير الماليه بان تصرف المرتبات قبل 20 يوم من المواعيد الرسميه بدل يدو الناس قروش لدعم ظروف العيد ح يدونا مرتبنا يعني الشهر الجاي شهر نفسه وربما نجد كل الشعب السودانى واقف يشحد ما مرتب ماااافي
    كسر ه
    انت يا جبرا ما كلمته ندي القلعه ولا شنو

    1. هي ندي خلت الغنا وبقت تعمل مديده ؟

      1. مديدة حارة !؟

  10. غريبة يامرتب ! تجى بدرى الناس تتبهدل — تتأخر برضو الناس تتبهدل — وبعد دة كلو الناس تنتظرك – ومابتكفى – ————
    اليوم قرأت خبرا فى جريدة المجهر عن رجل شنق نفسه داخل منزله — هذه جريمة — وباقى الخبر ان الشرطة تجرى تحرياتها لبحث اسباب الجريمة — مع العلم ان المرحوم كان مغتربا وترك الاغتراب ومتزوج للمرة الثالثة ويعول كمية من الاطفال — دى دايرة ليها بحث عن الاسباب ولا يحزنون —

    1. احسن ذاتو !!!!!!!!!!!!!! دي بلد يعرسو فيها واااااااااااااااااحده خليك من تلاته

      1. والله صدقتى يابت وراق الواحدة دايرة ليها وزارة مالية منفصلة خليكمن تلاتة

      2. يا بت أوراق أنتي شاهدة وﻻ شنو غريبة والله أمرك أول مرة أشوف وأسمع وأقرأ لكن زمان قالو المحرش ما بكاتل ههههههههههههههه

    2. قلت كان مغترب ورجع ؟؟؟ آآآآآآاااا ؟؟؟؟

      1. بس ثاااااااااااااااااااااااااااااااااابت خليك مكانك

      2. اااااااااااااااااااااااااااااااااااااى ياودمدنى كان مغترب وكدة —- اوريك كان مغترب وين ؟

    3. غايتو الله يرحمه لاكين هو وكت مغترب البوديهو للمره
      التالته شنو ؟ هو قايل نفسو دفع الله اصلو ؟

  11. بمناسبة ذيادة الاسعار بتي صايمه قالت لى انتو موش الاذان دا المفترض كل يوم ينقص الوقت بتاعو ؟ من اول يوم ولحدي هسع زمن الاذان واحد الحكايه شنو قلت ليها احمد ربك انو ثابت وما زاد وتلمه مع العشاء انتي شفتي ليك حاجه في البلد دى بتنزل

    1. والله يا بت وراق بتك دي عندها حق , تعرفي هسع رمضان
      النحنا فيهو ده هنا في السعودية اول يوم فطرنا
      الساعة 6.44 دقيقة ويوم 20 رمضان فطرنا الساعة6.33
      يعني في العشرين يوم نقصن 11 دقيقة والامساك اول يوم
      رمضان كان 3.48 ويوم 20 رمضان 4.02 مع انو هنا
      رمضان بااااااارد مع كده الزمن بيلعب في صالحنا
      بالجيهتين افطار وامساك ..ولااااا عندنا فاروق صاحب
      جبرا وييييييي انتو عندكووووووم .

  12. شكرا على التدوينة المميزة
    و المدونة الاكثر من رائعة

  13. شكرا على الموضوع المميز
    و المدونة الاكثر من رائعة

  14. يا عمنا كل ما ذكرته يدخل تحت بند علم الجراط وهو علم واسع جدا يسمى دارسوه ومعتنقو فكره بالمجارطين وهى اسم والاصل اتجارط يتجارط تجارطا فهو مجارط والجراط لغة هو جرجرة الدنيا للتغلب عليها واصطلاحا هو التكيف مع ظروف الحياه التى هى دوما ضاغطه دون الخوض فى المحرمات . وعرف العلماء علم الجراط بانه ينقسم لثلاث انواع :
    جراط سلبى وهو ما يعين الدوله على العسف وذيادة الظلم وهو ان يقوم المواطنون بوضع الحلول للدوله لمشاكلها المتمثله فى عدم القدرة على حل مشاكل المواطنين !!!
    جراط ايجابى : وهو ما يعين المواطن على التكيف مع الحياه دون الولوغ ( حلوه الولوغ دى مش ؟؟ ) فى المحرمات
    جراط بالفطرة : وهو ان تولد مجارطا لاسرة مجارطة فى منطقة جراطية ميه ميه وده العلاج منو صعب خلاس !!
    اختصاصى علم الجراط اخونا بلدينا المعز واستشارى علم الجراط اخونا سيكبا هندسة لهم باع طويل فى هذا المجال واعتقد ان الاثنان الان شايلنها موزه من العربى للمهندسين !! ومبارين السبايل لتوفير المواصلات والبارد !! حيث كان التمام قبل التحرك خمسميتين حديد وميتينايه !!

    1. انت يا افليقا في الفطور شربت ابري ولا حاجه تانيه
      هههههههههههههههه

      1. الغريبة يابت وراق كنت مع افليقا فطرنا سوا وشربنا شاى بلبن بس الشاى ماعمل لى حاجة زى افليقا – الظاهر مكنتو بقت خفيفة مابتتحمل مشاوير البلد دى –

    2. يعني الشعب السوداني ده كوولو عندو دكتوراة في علم
      الجراط ؟
      ذكرتني واحد صاحبي عندو دكتوراة في الجيلوجيا مرتو
      بتقول ليهو دكتور الحُجار .

  15. معلومه بايخه : فتيل الانسولين الذى لا يكفى لشهر صار بمبلغ 51 جنيه !!!! بعد ده الا يتباع قدر ظروفك بالجرعه زى الكريمات ههههه

    1. علم الجراط دا ما فيهو قسم تصنيع الانسلين محليا

    2. افليقا
      حاول تهيش بالخطة رقم ( 1 ) لكى تتخلص من السكرى البيوديك للانسولين

  16. الحبيب

    اسمو النائم العام وكلو محصل بعضو

  17. الفاتح جبرا و السمار الكرام
    تحيه و سلام . .
    الزمن دا كولو ما كنا عارفينك طباخ و بتصلح ساعات.

  18. ههههههههههههههههههه,الساعات عرفناها لكن الطبيخ دا !!
    امممممممم,,
    يطرشنا ويعمينا

  19. لو ناس امنا الحكومة طلعوا ضواحي العاصمة وكان عندهم قلب تعرفوا ايه اللي بيحصل (راح يحنو) يا ربي هم ما عندهم اصول من الضواحي ي ساااااااااااااااااااااااااي

  20. صراحة انا ما سمعت بي علم الجرافط هذا لكن اكيد بعد التعريف بيه انا احسن من يمارسه بس متمني اتعلم (لاحظ اتعلم) العلم اللغفي قبل ما كل حاجة تنشف والا اظنها نشفت من زمان ولحقت امات طه (في حلفاية الملوك) لكن حسب ظني العلم يحتاج لنسبة 98% افي مادة انعدام الضمير ودي انا غشيييييييييييييييم فيها عديل

  21. طبيخ البروف سمعنا بيه والله بس مسالة الساعات دي لو بيقدر يرجع عقاربها لوراء محل ابو امنة حامد يكون اعظم بروف بالكون وراح ندعيلك خاصة الاجانب بتاعين المظاهرات الطالعين لينا فيها اليومين ديل هههههههه

  22. المرتب
    انا شغال اعمال حرة وبقبض في الهواء من تسعة اشهر (كنت مغترب ويا ريتني ما جيت لجمهورية الخرتيت)

  23. ياريت لو التمر ياريت لو اشيل كل تلات اشور. انت لو كنت بتسمع ل مصطفي في الغربه كان دا ما حالك؟ بس الظاهر عديته طلال مداح و الرماده في خشمك

  24. هههههههههههههههههههههههههههه,,,ِشيل الصبر يا خالد !!

  25. اخي الظل او (shadow) انا مجنون مصطفى سيد احمد ومجنون اكثر بالذي اخفيت جنازته بفعل فاعل الساحر وردي واستغربت من جنازة واحد صغنن حضروها العظماء وهو لسه مقلد يعني ما عاوز اقول ملعون ابوكي ……… لانه دا وطنا البي اسمك كتبنا ورطنا وبرضه يا صاحبي ارض الله واسعه ثااااااااااااااااااااني متخارجين بس ما غربة المرة دي هجرة

  26. ربنا يلطف بي السودانيين يا استاذ

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: