قفلنا عليكي وكده

على الرغم من أن برامج مرشحات (فلاتر) البريد الإلكتروني أصبحت ذات كفاء عالية في اقتناص الرسائل غير المرغوب فيها والتخلص منها، إلا أن عمليات الاحتيال عبر الانترنت لا زالت تهيمن على الشبكة العنكبوتية وآلآف المستخدمين يسقطون يومياً ضحايا لعمليات الاحتيال عبر الانترنت وهنالك طرق كثيرة للإحتيال من أبرزها هذه الطريقة التي تبدأ بمثل هذه الرسالة التي وجدتها في بريدي الأليكتروني والتي قمت بالرد عليها وكأنها رسالة (جادة) .. وإنو المسألة (مشت على العبدلله وكده) ! وهاكم الرسالة والرد :
أنا صفية فركاش زوجة الرئيس الليبى الراحل الزعيم معمر القذافى( رحمة اللة) ,أثناء الثورة الليبية لم استطع تحمل الأوضاع فى بلدى لذا سافرت الى جارتنا العزيزة الجزائر مع ابنتى التى كانت حامل وانجبت بسلام (والحمد للة) , ومنذ فترة وانا ابحث عن شخص أثق فية ويكون شريك لى وأستطيع أن أعتمد علية فى الأمور المهمة, قبل ان يتوفى زوجى (رحمة اللة) قمت بتحويل مبلغ من المال بواسطة إحدى الشركات الخاصة فى الشرق الاوسط باسمى, وبعد الثورة قررت الأمم المتحدة وأمريكا ودول الإتحاد الأوروبى عدم استخدام اسم القذافى فى أى جهة اذا كانت بنك او شركة أو أى شى ولا أستطيع أن أقوم بفتح حساب فى أى بنك لذا صراحة لقد راسلتك لكى يتم تغير هذا المال باسمك إذا سمحت لى وأنت من ستقوم باستلامة نيابة عنى فى بلدك , ولكن وقبل كل شى يجب أن تعدنى بان تلتزم الصمت حتى يتم الأمر فى سرية تامة ولا يعلم بة أحد.
سارسل لك مزيد من المعلومات بعد أن ترسل لى موافقتك وانك شخص يمكننى أن أثق فية, فى الوقت الحالى لايمكننى ان اتصل بك لاسباب أمنية ولكن ساتصل قريباً إن شاء اللة,سنتواصل عن طريق الايميل
وشكرا
مدام. صفية فركاش القذافى
الرد :
السيدة الفضلى صفية فركاش القذافي
تحية طيبة ..أول حاجة عاوز أقول ليك البركة فيكم فقد كان موت زوجكم ملك ملوك أفريقيا فقد كبير لكل الفرق الكوميدية بالقارة السمراء أذ بعد موته أفتقد الناس التصريحات الذكية التي تدل على إنو (الفهم قسمة) ، أثناء فتحى للبريد الأليكتروني الخاص بي لم أستطع تجاهل رسالتك لذا قمت بفتحها وها أنا ذا أرد عليك وبالمناسبة بركة (بتك الإتحلت بالسلامة) وإن شاء الله تكون جابت ليها (قذافي) سغيروني عشان بعد تلاتين سنة يعمل ليهو إنقلاب ويمسك الحكم تاني وما يفكو لحدت ما يرث الله الأرض وما عليها .
الأخت فركاش .. عملتي كويس إنك حولتي ليكي قروش لي بره يعني معقولة بس تكوني شغالة ليك أربعين سنة (زوجة رئيس) وتطلعي منها ساااكت كده؟ زوجات الرؤساء المكنكشين ديل كووووولهم قاعدات يحولو ليهم (قروش بره) إشمعني إنتي؟ لكن يا صفية إنتي طلعني كيشه وما فاهمة اللعبة لأنك حولتي القروش بعد ما (الحفلة إنتهت) والناس قاعدة (تلم في الكراسى) .. ما شفتي زميلتك في المهنة (سوزان مبارك) ظبطت إمورا من بدري كيف؟ وللا كمان (ليلى الطرابلسي) زوجة زين العابدين الطلعت ليها بي طن ونص (دهب) ، عموما حصل خير وبرضك إتصرفتي ، لكن ناس الأمم المتحدة وأمريكا ودول الإتحاد الأوروبى ديل إتلومو فيكي لوم شديد شنو يعني لو خلوكي سحبتي القروش دى؟
أنا ما عاوز أقول ليك القروش الحولتيها بره دي (كم) عشان زوجات الرؤساء ديل معروف إنهم بيهبرو هبر شديد المهم يا زوله مافي مشكلة وخليكى مطمئنة إنك لقيتي الزول الممكن تثقي فيهو ، غايتو بس نقول القصة دي حصلت عشان الله يلمنا فيكي وكده .
أنا أشكر ليكي صراحتك لأنك راسلتيني عشان أساعدك في تحويل القروش دي بإسمى وإستلامها نيابة عنك هنا في الخرطوم وأعدك يا صفية يا بت فركاش إنى أحفر ليا حفرة كبيرة وأدفن فيها الكلام وناس (الأمن الإقتصادي) ديل الكلام ده (شم ما يشموهو) ، أنا برسل ليك الرسالة دي عشان أعلن ليكي موافقتى على الصفقة دي أقل حاجة الزول يشتري ليهو قطعة قطعتين في المنشية وللا كافوري وللا قاردن سيتي يبنيهم (أبراج) ويسميهم أبراج (الفاتح) عشان يضمن مستقبل أولادو الما معروف ده !
أنا منتظر منك مزيد من التواصل عشان نكمل العملية دي وأي حاجة تدينا ليها قبلانين بيها بس ما تعملي نايمة وتقطعي أخبارك لأني قفلنا عليكي وكده ومن بكرة أنا ح أمشي البنك أشيل ليا مرابحات عشان أعمل صيانة للبيت عشان باقي الخريف ده كان جات مطرة (كاربه) ح يقع لينا في راسنا !
وتقبلي تحياتي !

كسرة :
ناس ما عارفه حاجة ساكت .. هو أنحنا عندنا حاجة عشان يشيلوها مننا .. غايتو إلا يشيلو المرتب البنتهي من يوم خمسة ده !

كسرة ثابتة :
أخبار ملف خط هيثرو العند النائب العام شنو(ووو وو ووو)؟

Advertisements

19 تعليق

  1. الرقم وااااحد

  2. برنجية العييييييييييييييييييييييييييييييييييييييييييييييييييييييييييييييد

    1. مبروكة عليك و تتهنا بيها شديد بعد العيد – برنجية بدون مبسم

  3. كل سنة وصاحب القمردينة والسمار الكرام بخير وصحة ويعود عليكم بالصحة والسلامة وخط هيثرو

    1. شنو يا شمباتي الحسادة ليك شنو ياخي ما النوم بجيب اللوم

    2. ما تحسدو يا شمباتى,, بكرة بتجيك ان شاء الله – و زى ما قال ليك الفاتح قلل النوم و قوم

  4. لكن يا جماعة صفية دي ما رسلت لي أنا ذاتي هي الحكاية شنو يكون الإسم عاجبا على العموم الحمد لله ممكن أنا والأستاذ نعمل ليها (أبوالقاسم) وناس شمباتي وجنوبي وبت وراق ياكلو نيم

  5. البروف والسمار الكرام …. عيدكم سعيد وعمر مديد
    أنا مستني رسالة من هناية زي رسالة صفية دي لأنو لالوب بلدنا ولا تمر الناس

  6. كل عام واجميع بالف خير
    ونجاكم من ركوب الانتنوف
    سؤال صلاة عيد الضحية وين وبمنو وفيها طيارات ولا لا
    ومبروكة ليك يا الفاتح

  7. السيد البروف ود جبرا um aymn الغلبان شرقاوي بت وراق المحتار خالد مدنى حاج أحمد السلاوى كتلوني ولسه حي Tariq حنين ياسين شمباتى ام محمد حنين الجنوبى المندهش طارق اب احمد و من فاتنى ذكرهم من اخوانى و اخواتى السمار الكرام, عيدكم سعيد و مبارك و كل عام و انت جميعا و اسركم الكريمة بخير و الف صحة و سلامة و ربنا يحقق ليكم جميع امانيكم من العيدية الكبيرة و ايجاد خط هيثرو و الما بعرف شنو داك,,

  8. انا جاتنى ايميلات و اتصالات كتيييرة زى دى, لكن و لا واحدة منهم من (ناس هناية و هناى ديلاك) و بالله لو جاتكم طليات زى دى حولوها علينا جاى و نحن جاهزين, و حاقسم معاك يا شمباتي وجنوبي وبت وراق, (و كيتن) فيك يا الفاتح

  9. الحبيب

    كل سنه وانت والسمار طيبين لمين

    تانى اوعا تنسانا من القريشات لو جات

  10. الرسالة يا اخي جبرا ضلت طريقها هي كانت لوزير المالية علشان تتم الناقصه

  11. تعرف يا بروف كلنا راح نقفل عليها وكده

    1. انا سبقتك يا غليان و قفلت عليها قبلك,, انت استنى هناية ديك يمكن ترسل ليك

  12. ياخي لو مرت بشار اتصلت بك حو له لينا نحن مقشطين ولو اي
    واحدة تاني بعد تغير الحروف

  13. يا جماعة ما تنسو الموضوع لازم يكون في طي الكتمان ( علي قول عادل امام في الود محروس بتاع الوزير )

  14. الرسالة دي برضو جاتني لكن انا كنت خايف ارد عليها وبعدين الريحة تطلع وكدة ،، لكن يا جبره لعبتها وما خفت من حاجة اهو ان تعيش على امل احسن من لا شئ ،، وربنا يديك الصحة والعافية وتهبر الهبرة السمينة بس اودع تخلي المدونة بتاعتك دي وتنسى الغلابة وكدة لانو الهبرة حاتكون سمينة وممكن تنسى كيف بيمسكوا القلم ،، بس انا خايف عليك من الغفلة وكدة لحدى ما تتقفل اكثر ما هي مقفلة.. ومبروك مقدما

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: