المرار قنعنا منها

لأن العبد لله مصاب بالقلب فهو لا يشاهد محطاتنا المحلية .. غير أنه وجد نفسه أول أمس مشاهداً لحلقة من حلقات برنامج (حتى تكتمل الصورة) الذي يقدمه الأخ الطاهر حسن التوم والتي إستضاف فيها الباشمهندس محمد عبد العزيز مدير هيئة الطيران المدني وقد كان موضوع الحلقة عن حوادث السقوط المتكررة للطائرات السودانية والطائرة التي سقطت مؤخراً بمدينة تلودي على وجه الخصوص .
أكثر ما لفت إنتباهي في الحلقة هو محاولة الأخ الباشمهندس محمد عبدالعزيز إقناع المشاهدين بإنو الأمور عال العال وإنو (وقيع الطيارات) ده حاجة عادية بتحدث في (أرقى الدول) وقد إستخدم (الباشمهندس) في ذلك شاهدين ، الشاهد الأول إحصائية قامت بها مواقع متخصصة (كما قال) هذه الإحصائية تشمل الفترة الزمنية من 1945م وحتى الآن (2012م) – يعني خلال الـ 67 عاماً الماضية – تقول الإحصائية أن هنالك 25 دولة تعتبر الأسواء في حوادث الطيران في الفترة المشار إليها (طبعن نحنا ما فيهم) هذه الدول حصل فيها 2600 حادث بمتوسط 100 حادث لكل دولة ، وبلغ عدد الضحايا 48062 تقريباً بمتوسط 1000 ضحية لكل دولة .
طيب ونحنا حوادثنا كم؟ وضحايانا كم خلال نفس الفترة؟ هنا يفيدنا الباشمهندس بانه حوادثنا في الفترة موضوع الإحصائية هي 33 حادث (مقارنة بـ 100 حادث للدول الأسوأ) وأن ضحايانا 258 ضحية (مقارنة بـ 1000 ضحية في الدول الأسوأ) !!
ويختتم الباشمهندس حديثه بالنتيجة (العجيبة) قائلاً (من هذه الإحصائية يتضح بأننا لسنا الأسوأ) !!
قد يسألني سائل : وأين العجب في الكلام ده .. والإجابه ما عايزه ليها أي (فهم) فهذه الإحصائية التى أوردها الباشمهندس قد أغفلت تماما أهم عنصر وهو (الحركة الجوية) والتي تتمثل في عدد الطائرات ومقدار المسافات التى قطعتها (ونحن أقل البلدان إمتلاكاً للطائرات) .. يعنى مثلاً لو أن بلداً (خلال الفترة المشار إليها) خدمت لديه 500 طائرة وقطعت ( مليار ميل) مثلاً وكانت عدد الحوادث التي تعرضت لها طائراته 100 حادث لا يمكن بالطبع أن تقارنه ببلد خدمت لديه 50 طأئرة قطعت جميعها خلال الفترة المعنية (مية مليون ميل) مثلاً ؟
وعشان الناس الما بتحب الحساب نقول إفترض دولة عندها طيارتين بس ودولة عندها عشرة طيارات (خليكم من المسافة) فلا يمكن أن نقول بان الدولة أم طياراتين (ووقعت منهم واحدة) أحسن من الدولة أم عشرة طيارات لأنو ام عشرة طيارات دي وقعت ليها طياراتين !! وهذا ما أراد الباشمهندس أن يقنع به المشاهدين ، ومش كده وبس فالباشمهندس أورد شاهداً آخر أراد أن يقنع المشاهدين به وهو (لدهشتي) أن حوادث (طيراننا) أقل كثيراً من حوادث (الطرق) لدينا !! (شفتو كيف؟) حيث قال بالنص مخاطباً مقدم البرنامج والمشاهدين (قارن بين ضحايا حوادث الطيران وبين ضحايا حوادث الطرق، نحنا في السبعة سنوات الماضية عدد الحوادث بتاعت الطيران عندنا حوالي 9 حوادث ضحاياها 72 مقارنة بحوادث السير والمرور اللي هيا في الربع الأول فقط من 2012م حسب الإحصائيات بتاعت الطرق والمرور 378 حالة وفاة و 1082 إصابة !!)
بعد أن إستمعت لهذه المقارنة التي عقدها الباشمهندس طفقت أشحذ ذهني.. وأسأل نفسي (وقربتا أركب الفهامة) تري ما هو وجه الشبه لهذه المقارنة التي قام بها الباشمهندس ؟ دى طيارات ودي عربات .. دي (ميه) طيارة بالكتير ودي (كم مليون عربية) .. الطيارات بتقطع (بضع آلاف) من الكيلومترات يومياً والعربات بتقطع (ملايين) الكيلومترات يومياً ، الطيارات (بتطير) في السماء والعربات (بتمشي) بالواطا !! غايتو الإحتمال الوحيد إنو وجه الشبه يكون إنو الطيارات بتلاقيها (مطبات هوائية) والعربات بتلاقيها (حفر) و(مطبات إصطناعية) !

كسرة :
يا مثبت العقول ثبت عقولنا … (المرارة قنعنا منها ) !

كسرة ثابتة :
أخبار ملف خط هيثرو العند النائب العام شنو(ووو وو ووو)؟

70 تعليق

  1. برنجيه التوقيع اعمال حره

    1. د / تستاهل البرنجيه و الاعمال الحره …………….. عجبى

    2. والله زمان يا عم طارق (ويلكم باك) يعنى مرحبا بعودتك – و مبارك عليك البرنجية

  2. اولاً استاذ جبرا اختلف معاك فى حكاية المرارة قنعنا منها ، لسه ما قنعنا منها والله ومحتاجين ليها بشدة عشان تمتص لينا الوجع الوجيع ده ، وثانيا البشمهندس بعد الحركة ال فى شكل وردة ال عملها – واعنى بها تقديم استقالته – كان أحرى به ان يعتذر عن المشاركة فى هكذا برنامج ، لأنه واضح من احصائياته غير الدقيقة انه غير متابع ، فطائرة بورتسودان وحدها جاوز عدد ضحاياها ال 100 ان لم تخنى الذاكرة.

    1. اختى ام أيمن, و مين فينا اصلو ما زال عندو مرارة عشان يحتاجا, انا اتفق مع البروف فى (قنعانو) منها دة

  3. هههههههههه
    وبعد ده يتم الغاء الاستقالة ويرجع سعادتو لمنصبو تانى

  4. عزيزي البروف
    طيب وقت انت فاهم كده ليه ما عملت تداخل ..

  5. البروف والسمار صباحاتكم نديّة
    ماطارت طائرة وارتفعت الا كما طارت وقعت
    ده شعار هيئة الطيران المدني
    والحمد لله باقي لينا طيارتين وتلاتة طيارات رشّ وخلصت الحكاية … الراجل عاوز يأخذ مستحقات نهاية الخدمة قبل الحكاية ما تفركش

    1. البروف والسمار صباحاتكم نديّة
      ماطارت طائرة وارتفعت الا كما طارت وقعت
      ده شعار هيئة الطيران المدني
      والحمد لله باقي لينا طيارتين وتلاتة طيارات رشّ وخلصت الحكاية … الراجل عاوز يأخذ مستحقات نهاية الخدمة قبل الحكاية ما تفركش

      1. مدير ادارة مقاييس السلامة بادارة الطيران المدني
        وجه شركة الفا للطيران بابقاء طائراتها علي الارض
        لانها لا تصلح للطيران حسب ماكشفه اسحق فضل الله , طيب
        كيف طارت الطيارة دي ؟ وليه جازفت الحكومة بمسئولين
        باوصاف وسيرة زي ما بتقولا عنهم بعد ماتوا دي ؟
        ناس شرق اسيا بيجوا الحج عجاااااائز وبتعمدوا يرموا
        نفسهم تحت الحجاج في الحرم عشان يموتوا لانهم عندهم فهم
        انو البموت في الحج بيدخل الجنة طوالي !!
        وبما انو الحيكومة عارفه الطيارة دي احتمال 99.9%
        تقع وخلت المسئولين ديل يركبوها ولم تلتفت لاعقلها
        وتوكل وبعد وقعت هرتنا بي شهداء الطائرة اظنها
        عندها نفس فهم ناس شرق آسيا في حتة الشهداء.

      2. المندهش : ايه رأيك في الحركة الخرمت منك بيها دي .

      3. عملت برشوت ؟؟ زعلان منك … وبس
        لكن بكرة في برنجية تانية والأيام دواااااارة

      4. هههههههههههههههههههههههههه,,والله يا جنوبى طلعت كوز عدييييل كدة !!
        دى عملتها كيف دى؟؟؟ممنوع التجاوز يا انت..

      5. تاني البرنجيه الا يحسموها في لاهاي !!! أو نقبل
        بالقسمة والنصيب ..

      6. البروف جبرا : لمن اعمل رد للمشاركة الاخيرة بقوم
        الرد بتاعي هو البنزل ويبقي اخر مشاركة بعد ده
        شوف انت الباقي والمشكلة وين اللهم قد بلغت اللهم
        فاشهد .

      7. با جنوبى جقلبة ما عايزين, اصحى بدرى و جهز مزتك و قابل الكيبورد, اكيد بتلحق البرنجية و القمردينة من اولها!!!

      8. هههههههههههههههههههههههه,,دا شغل التلات ورقات يا حبيب ! اسالنى انا…
        هههههههههههههههههههههههههه

      9. المندهش سمع كلام الحكومة وربط الحزام .

  6. السلام عليكم ، البرف و الاخوان ، معليش يا برف ، اصلهم فاكرين هم الوحيدين البفهمو و باقى الناس دباس ساكت ، و على ذات النسق كان فى واحد فى قناة الخرطوم ، قال هو رئيس المجلس الاعلى للبيئه ، قعد ينظر و يقول فى احلامه طول الوقت ، ولما جابت المذيعه شخصين فقط من عينات الشارع ( اظنها حجبت مية عينه ، لانو اكيد كلهم سبو البيئه و الرسوم و الناس البتجبى وما اظن الكاميرا تطلع الشارع وترجع بى راى نفرين بس) العينات دى افحمت الدكتور الرئيس ، لكنه بدل ما يرد رجع تانى لاحلامه وقال ايه عندو اكياس حيوزعها مجانن فى المحليات على الناس ، قال ايه لما نلحس الكوع و ده اسهل شئ لانو الكوع نهاية الكف هو بيقصد المرفق ، اخوانا المصريون كانو اشطر و قالوا ( لما تشوف حلمة ودنك ) بيقصدوا اضانك و بالعربيه اذنك و خط هيثرو لما تشوف حلمة ودنك …………………. عجبى

    1. شفت يا كوكو لمن قال مفروض المواطنين نفسهم يساهموا
      طيّب هم بشيلوا من المواطنين قروش مقابل شنو ؟ يعني
      داير يشيل قروشنا مقابل ( لا ) خدمة !!
      ياخي المسئولين ديل بجحين خلاص .

      1. المواطنين ديل محجوب شريف قال فيهم …
        حليلك بتسرق سفنجة وملاية
        وغيرك بيسرق خروف السماية
        وفي واحد لو تصدق بيسرق ولاية ؟!

      2. سلام جنونى ، وين اراضيك ؟؟؟ نحنو زرعناها قطن ( معدل جينين ) ، و فى طريقنا للوصايا التانيه .
        سلام المندهش وين برنجياتك ؟؟؟ شفطوها ناس تارك اعمال حره …………….. عجبى

  7. مصيبتنا يا بروف إنو أنحنا في دولة ما فيها محاسبة
    يعني ما في زول بيسألك ليه عملت كدا؟
    ورحم الله حسن ساتي الذي كان يصف الموت في السودان
    بالموت سمبلة

    1. والبحاسب نفسه ما بخلوهو يحاسبا يا طلحة !!

  8. اولا شت عليكم كل سنة وانتو طيبين وطالما التهاني
    بتجيب بعض نبارك لهناي الماجستير ..
    قالوا الطيارات الروسية دي معمولة للشتاء والبراد
    ( الشئ سويتر أصلو ) ..
    هي طيارة تلودي دي كانت ماشة تفتتح بلاد الروم ولآ
    شنو ؟ كل ما تفتح التلفزيون شهداء طائرة تلودي .
    أها وقبلوا استقالته ولآ حلفوا عليهو زي هناي يقعد
    شوية !!!
    كوكو : بركة الحلو قيدك .. ( في رمضان ما شفناك )
    شمباتي : خزنت رقمك عشان اقابلك لكن للاسف سرقوا
    جوالي قبل اخلص العمرة لاكين النية زاملة سيدا وطالما
    جات سيرة السرقة في الحرم قالوا مصرية في الطواف واحد
    غتت زنّق عليها شديد اتلفتت وقالت ليهو يا خويا احنا
    بنوسّخ هناك ونجي عشان ننضف هنا ! انت لما توسّخ
    هنا حتنضف فين ؟ .
    فيلاديمير : في ذمتك دي طيارات تدونا ليها ..
    المندهش : في ذمتك المتعافي ما ادهشك بالحركة دي .

    1. جنوبى….
      احزنتنى والله وكان تكون عمرة وغمرة !!
      اسه اديك ليهو تانى ولا كيف؟؟؟

      1. تتعشى ولا تنام خفيف
        ههههههههههههههههههه
        تديهو الرقم ولا نديهو ليهو نحن

    2. و الله يا جنوبى سؤالك فى محلو بخصوص طياراتنا دى, و لكن نحنا ما اديناكم ليها, نحنا كنا عاوزين نقصقصا و نعملا ردميات للشوارع لكن انتو اللى اصريتو علينا و ما حبينا نكسفكم, (خاستن) انو ناسنا يتاعين الكرملين قالو طالما بتجيب قروش ادوها ليهم و اردمو بحاجة ارخس شوية!!!

    3. جنونى العمره مقبوله ، سافرت بالطياره ولا البابور ، شفت دى ، ما اظنها فاتت عليك
      يقول لك الريس جاب الماجستير الماهو خمج فى صعوبة تطبيق الشريعه على الشعب السوداني ، لانو بعض القبايل ( اقصد الاحز…. ) عندها السرقه عز ……………. عجبى

      1. كوكو : ياتا الما أظنك ؟ الباااابور ؟
        انت النسعلك الماجستير ده مش كان بعد البكلاريوس ؟
        ولآ واحداً تاني !!
        شمباتي : هو يعني انت اديتني ليهو أول ؟
        بت وراق : تبات عَندِنا ولا بترتاح في اللوكانده ..
        تعرفي من سجلت رقم صاحبك ده موبايلي اتسرق !! انا
        ياداااب عرفت جبرا ده موبايلاتو بتتسرق كتير كده ليه ..

  9. الحمد لله علي كل حال ممكن ده لاننا بعدنا عن الدين واعمالنا صارت سيئة واعمال باقي الاخوة الدول زينة وطيبة انا العبدلله القدامك ده ركبت شتي انواع الطيران من الدول الغير السودان (ويسكي عدييييل وافلام خليعة عدييييل مدورة في اثناء الرحلة في حين انو ما شاءالله علي الطيران السوداني دعاء السفر و عضة بس يعني منكرات مافي ده بس علي سبيل المثال اععمالنا اثناء الرحلة) برضو تقول لي الازمة الاقتصادية دي من الفسق العايشين فيهو ووقيع الطيارات ده من الفسق العايشين فيهو ياخي جبل في تلودي انت ما شفت مطار اديس ابابا فضحتونا بين الشعبيات والحمد لله علي كل حال والله يجبر الكسر::::تحياتنا ليك يا استاذ جبرا مع انك ما رديت علي رسالتي .

  10. ههههههههههههههههههههههههههههههههههه,,والله انا ذاتى استغرشت !!
    المرور والطيران ! امممممممم,,
    وعشت يا سودانا عالى وغالى..

  11. السلام عليكم ورحمة الله وبركاته اخي الفاتح شفاك الله وعافك وانشاء في ميزان حسناتك وانشاء الله ماتشوف شر وتسلم والله يعنا ويعنك ليس لديه غير انو اقول حسبي الله ونعم الوكيل

  12. جنوبي … عمرة مقبولة وربنا يعوضك بلاك بيري جديد

    1. المندهش : البلاك بيري خليهو ركّز دعواتك في الـ
      black oil الكشف حالنا ده ..
      شايفك قنعت من البرنجية بقيت تحجز السبارس …

  13. البروف والسمار … في حتة المقارنة بين حوادث العربات والطيارات عندي نقطة صغيرووونه … حادث السيارة انت بصورة او باخري مسئول عنه في الغالب الاعم … لكن لما اركب في طيارة واتعلق بين السماء والارض وكمان المضيفة تقول لي اربط الحزام بكون المسئول عني منو ؟؟؟ ما اسياد الطيارة والجهات السمحت ليهم بالطيران .
    كسره : المضيفة بتشرح في اجرائات الطوارئء قبل الاقلاع وانا ما متابعها … قام ج الراكب جنبي قال لي ما تسمع المضيفة دي بلتقول في شنو … قلت ليهو لو طيارتك بقت علي وقوع في اجراء طاريء واحد تعملو … تتشهد وتذكر الله .

  14. أخي الفاتح كل سنة وانت بخير
    لك الد والتحية
    والله الواحد بقى مابيعرف المسؤوليين في السودان عندما يتحدثون في وسائل الاعلام يخاطبون عقول بشرية ام( بهائم ) اكرمكم الله أم يستخفون بالبشر كنت اتمنى من الباشمهندس محمد عبد العزيز أن يقوم بإجراء عملية نسبة مئوية بين عدد الطائرات وكمية الحوادث ليعلم هو قبل غيره مدى كارثية الامر وقد حاولنا الاتصال بالبرنامج لعمل مداخلة ولكن للاسف لم لم نتمكن من ذلك .
    غايتو الله مبتلينا باشخاص لاندري من اي كوكب أتوووووووووووو

  15. المهندش سلاااام … ورا ورا ورا ورا … الما عندو دش يرجع ورا .

    1. انت صحي المندهش دا ماشي وين

    2. سمح الدش كعب الغش,,آييييييييييييييييييي

      1. آآآآآآآآآآآآي

  16. الاخ جبرا والاخوه الاعزاء
    عليك الله ديل طيران شنو البقدرو عليهو ؟؟؟؟؟الضبان والناموس ما قدروا عليهو

  17. هو ياجماعه الزول دا موش قدم استقالته وطيييييييييييييييب
    والاستقاله معناها انو في مسوليه والمسول قصر فيها وهو يتحمل النتيجه (الجقلبه تاني في شنو !!!!)

  18. حضرته حلقة العيد معاك يابروف في قناة الشروق حلقه مميزه لكن ناس الشروق ديل مابالقوا فى الفاصل الاعلانى البباركوا فيهو العيد
    البت واقفه قدام كوشه وبقولو لينا عيدكم مبارك

  19. والله كلام عجيب وياهو دا السودان !!!!! وكلامكوالحمد لله باقي لينا طيارتين وتلاتة طيارات رشّ وخلصت الحكاية … الراجل عاوز يأخذ مستحقات نهاية الخدمة قبل الحكاية ما تفركش زكرنى زمان كنا فى الجنوب وقابلت ضابت هناك قلت ليهو ليك كم سنة هنا ؟ قال لى تلاتة سنة . وقلت ليهو بترجع الشمال متين ؟ قال لى كتبتى باقى فيها سبعة جنود مستى متين يموتوا وامشى ارفع تمامن فى الخرطوم اقول ليهم كتيبتى كملت ….. الله يكون فى عون السودان وناسو

  20. احنا مرة جاتنا المتحصلة بتاعة النفايات وشالت رسوم سنة كاملة وعملت خصم شهرين للبيدفع سنة كاملة وبعد شهر جانا متحصل تانى يطالب بقروش النفايات وقال المتحصلة الفاتت سرقت القروش وماعارفنها وين وفى النهايىه دفعنا تانى

  21. أستاذنا الفاتح جبرا ناسنا كلهم حكومة و معارضات و حركات
    ما بعاينو أبعد من تحت رجليهم و أنوفهم و شهواتهم و عقدهم و عجزهم كمان !
    عشان كدا ما بتعجز زولا فيهم (المبررات) لكل حاجه يعملوها أو تتعمل بينا و فينا بسببهم حتى الحرام بإسم الدين ؛
    و التاريخ شاهد على الجميع.
    و قلة الفيهم و منهم جميعا زولا أحسن من زول و أصدق من زول ؛
    و الله وحده الحافظنا و حافظ بلدنا.
    يا بروف (التاريخ) قاعد يتكرر فينا جميعا ؛
    و حقيقة حولنا ما في زول منا عاوز يصدقها
    حقيقة أن التاريخ قاعد يعيد نفسه و .. الآن !
    ..
    البروف و الأحباب ما حدث حولنا لغيرنا أو لنا في البعيد ليس من الغريب إن لم يكن من حُسن الفطنة أن نحتاط من توقع حُدوثه من جديد فينا!!
    و الحذرُ ممّن هُمُ منا ـ نحسبهم ـ و هُمُ يُشهدون الله لنا أشدّ العداء
    وَ الحذر فمكرُ الله أعظم

  22. يا بروف ويا اخوة الجماعة الكبار كبار مو بتاعين تلودي برضه بيركبوا سوداطير وصراحه زعلت للارواح لكن فيه ارواح ربنا ياخدها وعموما طالما في طيارات زي دي بتخفف منهم شوية شوية ان شاء الله يركبوا كلهم في طيارة واحدة في يوم واحد وتروح صادمة لاندروفر في شارع الانقاذ وتوتة توتة خلصت الحدوته

  23. طيران شنو هو نحن لقين ناكل حقو الناس دى تحترم نفسها وتشوف ليها شغله تانى قال طيران قال

  24. ههههههههههههههههههههههه,,تعال يا جنوبى شوف تعليق المندهش بتاع حصة التسميع دا !
    كل يوم (ناصل) لا تحت ! وى وى وى

    1. يا عزيزي دي تكنولوجيا وبرمجة جديدة للبرنجيييييية والشاطر فيكم يعمل زيها وي وي وي

      1. ههههههههههههههههههههههههههههههههههاااى,
        انا عملتها زيها زمان بس حسيت انى (مكشوف) للناس كلها ! فخجلت وكدة,,واااااااااااااااااااااى

      2. آآآي صاح كانت في الخريف الجا فجأتن داك ..
        تعرف يا المندهش القمردينة دي زي امريكا لا عندها
        صديق دائم ولا عندها عدو دائم ! مفروض جبرا يلمكم
        كلكم ويركبكم طيارة ماشة الدلنج وتدق الدلجة .
        كعبين خلاص انتو ..

    2. تعرف يا شنباتي الواحد لما يصل تليق المندهش ده زي الوصل قعر الحلة … طوالي يقش فيهو يدو ويبقى مارق .

      1. الملافظ سعد !!!

    3. يكون داقي سستم ؟

      1. ما خليتو للمندهش صفحة يرقد عليها, حبة حبة وقرصة قرصة و سنة سنة خلاس وصلنا

      2. خالد..
        هههههههههههههههههههههههههههه,,الزول الوصل,,,والبريدة عسل,,ليه ما اتصل…ورا ورا ورا…
        المندهش…
        الملافظ هينة,ارفع شيتك دا ! كاااااااااااااااااااااااااااك

      3. جنوبى…
        يدق بى ياتو دقاق !!؟ وى وى وى …
        فلاديمير….
        والراقد ليها شنو !!؟ اليقوم على اندهاشتو دى….

  25. بروف كل عام انت و المشاركين بخير

    بروف
    الراجل خلاص رفضوا استقالته ما لازم يفسحنا و يتفسح و ياخد راحته .. يعانى نحنا بنفهم احسن منه فى الطيران .. يعنى هو مدير ساى يا اخوانا … اه يا بلد ….. مدير هيئة الطيران فيها يتحدث عن حوادث الطرق .. باقى يورينا وجهة نظره فى حوادث مستشفيات بحرى وام درمان و الخرطوم .. يا ما تحت السواهى حوادث هاهاها!!!

  26. البروف والسمار .
    سلامات وكل سنة وإنتو طيبين .
    يا جماعه نحن غير سودانير ماعندنا شركة طيران حكومية . يعنى لو وقعت طيارة واحدة نقول بالفم المليان نحن سبعطاشر فى المية من طياراتنا وقعت . وقالو طيران السودان ممنوع من التحليق فى الاجواء الاوروبية لعدم توفر سبل السلامة والامن فى طيراننا . مع العلم إنو عندنا إدارة للطيران وبيعرفو يعملو إجتماعات وبيناقشو فيها مشاكلم مع الطيران العالمى وبيطلعو بى توصيات لحل هذة المشاكل وبيضعوا الميزانيات على هذا .
    لكن الله فى …

  27. الاستاذ الفاتح جبرا
    السلام عليكم ورحمة الله، وكل عام وانتم بالف خير.
    نسأل الله العلي الكريم أن يتقبل موتانا ُفي فلزات أكباد، واقول بان الأمر في شرعنا كسودانيين قضاء وقدر، ولكنه عند سوانا كارثة تزلزل الأرض تحت الأقدام، ولأعود لأعدد:
    ابدأ بالتحية والتجلة للسيد المشير/ عمر حسن أحمد البشير واتقدم لسعادته بالتعازي الحارة فهو الوحيد المهموم بهموم هذا الشعب الوفي المحب لرئيسه والذي أشهد الله أني أحبه، وأثق تماماً في صفاء سره وسريرته.
    1. اقدم مقدم البرنامج بخبث ومكر ودهاء اشيد به واطنب عليه به (بدا في عينيه وهو لا اقول يسأل المهندس بل يُعريه امام الكاميرا) فقد بين للمشاهد حجم المأساة التي نعيشها، وكنا نرتكب طائراتنا خاصة في سودانير والداخلية وآخر رحلة قمنا بها كانت للحاضرة شرق دارفور مدينة الضعين علي طائرة انتينوف واحلف بالله انها طائرة (كارقو) حُورت بلا احترافيه لشحن البشر السوداني الما عندو وجيع، ولو لا عناية الله ومهارة الكابتن لكنا السابقين.
    2. ايقنت تماماً بان الحامي للسودانيين هو الله فقط، وما عندنا أي مسؤل مسعول مننا لو كانوا امثال المهندس مدير الطيران المدني، وكنت اتمني لو اعترف سيادتو بانهم قصروا، بل أهملوا وقتلوا فلذات أكباد رطبه بتعمد متعمد بسماحهم لهم بركوب نعش طار بهم ظناً منهم انه طائرة ستقلهم للمعايدة مع أخوة لهم في الجهاد.
    3. يا للعجب كيف تثني لمحدثنا (الفقع مرارة جبرا، وقطع فشفاشي) أن يعقد مقارمة بين حوادث السيارات والطائرات؟ ألا يدري أن المقارنة تكون بين: عدد السيارات الموجودة في الدولة المعنية وعدد الحوادث؟ كذلك عدد الطائرات وعدد الحوادث؟ بل تجرأ وقال أننا ما من ضمن ال 100 دولة الأكثر حوادث، هل نحن مصنفين أصلاً في السجلات العالمية إننا عندنا طيران؟ وكنت اتوقع أن يقول ان المتبقي من الطائرات أقصد النعوش الطائرة الكارقو اصبح بسيط جداً والمستعجل يحصل لأنو الفضلن لو ما وقفوهن مصيرن يقعن.
    4. اين ما ادعي المهندس من برنامج إصلاحي، أليس هو في ما شهدنا من تطور في الجباية في البوابات الآلية؟ هل شاف سعادته ما يسمي مهبط الضعين؟ وسؤال بريء جداً كنت اتوقع من مقدم البرنامج البريء جداً/ الطاهر حسن التوم أن يسأله للمهندس محمد عبدالعزيز: هل من الممكن أن يركب هو واسرته احدي تلك الطائرات المستخدمة داخلياً والتي يدعي بانها صالحة للطيران؟ (أنا غايتو لو ملكوني ليها وسجلوها باسمي ما ح اكرر التجربة دي تاني)
    السيد رئيس الجمهورية:
    استحلفك بالله وبحقنا عليك وبحبنا لك أن تُريح السيد المهندس محمد مدير الطيران المدني من العذاب الذي من المفترض أن يعانيه لو كان له ضمير، فهو المتسبب في فقد السودان لكفاءات، والأسر لعوائل فقدناهم فجر العيد، ولا احمله المسئولية فقط بل كل من له علاقة بالطيران، فالمسئولية في رقبتك أولاً واخيراً، فارجو أن تبرئ نفسك أمام الله فالبشر ساهلين، ولأني أحبك أقولها لك، اطلب لجنه تحقيق من الخارج وسيتضح لك ما كان عنك خافيا.

  28. شمباتي : القمردينة دي مسكونة ولآ شنو !! مااالك
    بقيت بدل المندهش !!
    المندهش : وحاتك بس توفيق من رب العالمين ..ههههههه

    1. بسم الله شوفوا مداخلتي دي مشت وين !!
      هووووووي يا جبرا الحق قمردينتك وحات الله دايرين
      يلحقوها ليك طيارة تلودي ..

      1. هههههههههههههههههه,,انا اصلا البديت الشغلة دى لكن المندهش ادهشنى !!

      2. طيب مالك ياخ ولا ……. ركوب العجلة بتنسي ؟؟

      3. حم حم يا حمام,,شتتا ليك سكر !!!

  29. موضوع الليلة شفتو في الراكوبة ومن قبيييلك خاتي
    مزتي وقاعد راجي البرنجيه ان شاء الله اليشيلا يدوهو
    اربعين جلدة … ولااا يقولو ليهو قول حاح .

  30. للحفاظ على المرارة من الفقيع، الرجاء عدم مشاهدة اي لقاءات تلفزيونية مع مسئولي الحكومة، ياخي اتفرج قنوات ميلودي بتاعت المسلسلات واتسلى، على الاقل تشوف خلق زي الناس

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: