الإثبات بالشم

وصلتني هذه الرسالة من إحدي بناتنا الطبيبات أنشرها كما هي :
إزيك يا أستاذى و كل عام وانت بألف خير.. ربنا يحقق أمانيك :
القصه المرسلة ليك دى يا أستاذ حصلت لزميلتي في مستشفى أثناء النبطشية.. يعنى نحنا عادى فى المستشفى قاعدين نملأ أورنيك 8 للسكرانين “لامؤاخذه” لكن ما فى يوم (شرطي) واحد طول ولا قصر معانا بشيلو أورنيكهم و بيمشوا.. لكن المرة دي زي بالغوا وكده وزودوها حبتين .. أخليكم مع الحصل مع زميلتي أثناء النبطشية :
جلست زميلتي خلف ذلك المكان المعروف ب”مكتب الطبيب”.. داخل ما يسمى بـ”غرفة الطوارئ”.. تحاول أن تؤدى ما نسمع أنه “الطب”..فدخل عليها “المفروض أنو عيان”.. ولكن من سياق و مشهد الدخول إتضح أنه متهم بتناول الكحول.. و بكل “ظرافة” طلب الشرطي من الطبيبة إجراء اللازم و تعبئة الأورنيك المعنون بـ”أورنيك 8″.. “عااااااادى” زى كل مره قامت الطبيبة بعمل اللازم و كتابة التقرير.. الذى أفادت فيه و حسب علمها”لا تفوح منه رائحة السُكر”.. عاد لكن “تتكتب للعدو” ما أن قرأهاالشرطي حتى “إنفصم فيها” و إتهمها بالتلاعب و التقصير فى أداء عملها.. وطالبها بإعادة الكشف مستخدمة الطريقة” الشُرَطِيه”.. و قبل ما نطش كلنا شبكة إليكم شرح مبسط لطريقة الكشف التى يطالب بها الشرطي :
(ان يتم تناول قطعة ورقية.. يتم لفها على شكل قرطاس.. ومطالبة المتهم بالنفخ فيها بقوة “يعنى يجيب النفس دا من لاغاليغو”.. من ثم يقوم الطبيب بأخذ “شمة” طويلة أو قصيرة المدى على حسب نفاذ الرائحة..و عليه يقرر الطبيب وحسب حاسته الشمية.. مصير المتهم إما مذنب بجرم”السكر” أو لا.. و فى حال عدم توفر ورق يمكن إستخدام الأورنيك نفسه.. وفى حال إستحييت إنك “تكرفس” الأورنيك.. فطاقية الشرطى خير وعاء لإحتواءأنفاس المتهم) !
إذن و بناء على الطريقة أعلاه نجد أن مقومات الكشف تتطلب:
أولا: توفر ما ينفخ داخله
ثانيا: مهاره شميه عالية
ثالثا: معرفه بروائح الخمور!!
طيب يا أستاذ وكت الحكاية “شم” ما خلاص ناس “الشرطة” يشموهو ويودوهو المحكمة جايبنو لينا ليه ؟ طبعاً ما قامت الطبيبة بعمله هو أنها إستبعدت جانب “الشمه” الفريدة من نوعها.. و إكتفت بملاحظة الرائحه التى قد تفوح فى المكان بحكم حاسة شمها (والحتة دي فيها ذاتو كلام).. و سجلت بناءعلى ذلك تقريرها الذى لم يأت على “مزاج” الشرطي.. فإتهمها بالتزوير وطالب بسحبها و مدير طبى الحوادث إلى مقر الشرطه للتحقيق معهم فى هذا الجرم المشهود.. لولا تدخل إدارة المستشفى “الخجول” بالإعتذار و الإعتراف بالخطأ الذى وقعت فيه الطبيبة.. حيث وافقوا على إحضار وفد التحقيق إلى المستشفى..
وجدت الطبيبة مع إنتصاف نهار النبطشيه نفسها متهمه بـ:
• إساءة الأدب مع السلطات الشرطية..
• التلاعب في وثيقه رسمية..
• الإستهتار في أداء واجبها.. و بذلك تعطيل سير العدالة..
وعليه يجب عليهاالإعتذار عن سلوكها و التراجع عن موقفها.. و إلا سيتم رفعها فى”البوكسي”.. وللرفع فى البوكسى قصص مؤثره.. ليس هنا مقامها حتى لا أتهم بتطاير الأفكار.. نرجع للطبيبة التى ثبتت عند موقفها و أوضحت لقائد فرقة التحقيق.. أن الكشف عن السكر يكون بمعرفة نسبة الكحول فى جسم المتهم ” لابشمشمته” .. يعني هسى الزول دا كان رشوهو بي حبة عرقى كدا قبل ما يدخل المستشفى ما بكون الشمة إستوفت شروطها!!”..
و بعد مناورات جاده من إدارة المستشفى “فى تحنيس” الشرطى وورديته الذين أكثروا من الإساءة إلى الطبيبة و المستشفى إقتنعوا بترك الموضوع مع خلفية الوعيد و التهديد فى حال تكررت الحادثه..
لم تجد الطبيبة إلا دموعها لتمسح الإهانة التي لحقت بها . و لم تجد من المواسين إلا كلمات “الحمد لله ما داقاك و لا حبسك .. قدر أخف من قدر”.. و مازالت تسأل نفسها عن الخطأ الذى إرتكبته حتى يتم إهانتها و تعريضها لهذه المهزلة.. و ما أشد حيرتها من موقف إدارة المستشفي القائم على “لملمة المواضيع”!! .
أما عن الخطأ فهو أن الطبيبه تغاملت وفق ما تقتضيه مهنيتها بناء على ما هو ماثل أمامها أما عن إداره المستشفى فما تعودنا من الإدارات إلا التلميحات الخجوله والمواقف المائعه إلا ما ندر “عشان ما نظلم لينا إداره بجاى ولا بجاى”..
غايتو يا أستاذ بعد المناقشات و جدت الطبيبة فى نفسها الجرأه الكافيه للمطالبه بحقها فى معاقبة من أساءوا إليها وذلك بتقديم شكوى نأمل أن تجد طريقها إلى التحقيق ومن ثم المحاسبة !!

الرد :
هذا حد من حدود الله ينبغى تحري الدقة في إثباته .. وعشان ما نبقى على جنس الكلام الزي ده نأمل من الإخوة في الشرطة توفير اجهزة فحص الكحول الحديثة التي تحدد نسبة الكحول في الدم بدل قصة (الشمشمة) دى !!
كسرة :
لو مافي قروش ما مشكلة ممكن نعمل ليكم (ص د أ ف ك) .. صندوق دعم أجهزة فحص الكحول !!
كسرة ثابتة :
أخبار ملف خط هيثرو العند النائب العام شنو(ووو وو ووو)؟

Advertisements

71 تعليق

  1. دى برنجية ولا شم سااااااااااااااااااااااااااااااااااااااااااااااااااااااااااااااااااااااااااااي

    1. ابو عمرو هاك الكباية بس المزة ما بديك ليها تضرب
      إسكتو بس …

      1. نسيت … اريتو باليحش حلقك حش ..

      2. هههههههههههههههههههههههههه,,,آمييييين

      3. من يومي القلت ليكم البرنجيه( تشموها )قدحه طارت مني
        اتاري الشم دا صعب خلاص فيهو ارنيك وكده
        بكره جبرا وكل المدونين بفتحو فيهم بلاغ لانهم بتاعين برنجيات وشمامين

      4. لو طرب اسكتو سجم امو من الشم

  2. والله دي قصه اي حاجه دايره ما يثبت وما قلنا ليكم وما صدقتونا ,التوقيع الرقم الوطني اعمال حره

    1. لا تحسب يا عم طارق رقم وطني وداته مطروبة وموظف لا يعمل انا عندي ما يشيب له الولدان ومن تجارب شخصية بعد غربة عشرين سنة وهسع احاول الفكاك وطالما سستمنا بايظ من مجاميعه بيكون بدون عودة وقع المرارة كثير

  3. غايتو بس الحمد لله … كدي نشوف بتاع البقالة بيرضي
    يرجع الزيتون والجبنة ديل ….!
    هو يعني العسكري النفر ده عندو صلاحية يعترض علي
    تقرير الدكتور !!؟
    الحمد لله انو الاطباء ما كلهم تعيين سياسي زي ادارة
    المستشفي ولا كان ممكن عادي شيخ محمد احمد حسن يفتحوا
    ليه بلاغ سُكر !!!!!!!

    1. العجب لو كان الزيتون مصري يقولوا ليك انت هسع ما كنته في العمره الرجعته تعمل فيهو دا شنو
      ههههههههههههههههههههههههههههههههه

    2. يا جنوبي عليك الله الدكتوره الرقيقه دي شنويقولو ليها شمي وما تشمي عرقي ومريسه
      (لعطرك صوت يثير جنوني
      يهز صداه العنيف حنيني
      يظل ينادي ويسهر ليلي
      ويسمع روحي ضجيج سكوني )

      1. زماااان يا بت وراق في نهايةالتمانينات كان في دكتورة
        في بنك الدم مستشفي ام درمان قادر الخلاق انا عشانا
        كنت بمشي اتبرع ولو كنت احتسبتو لي الله كان دخلني الجنة
        لاكين ما خسارة فيها والله ..

      2. ههههههههههههههه
        ذكرتني نكتة ادروب فاتح حساب في بنك الثروه الحيوانيه وفيهو موظفه جميله كل يوم يورد جنيه وتاني يوم يسحبه مره جاءلقى واحده شينه شنه مره سال من زولته قالوا ليهو نقلوها
        قال ليهم تنقلوا ثروه وتخلو حيوان
        هي بسم الله هو الموضوع كان شنو

      3. هسع الجاب طاري الدوم منو !! هههههههههاي

  4. البروف والاحباب….سلام…
    طبعا دا عرف قديم بل ويتم تعليمه لاطباء الامتياز الجدد ! طبعا الواحد بكون فرحان انو كشف على وعرف الزول القدامو دا سكران !
    لكن فعلا لما يمشى لا قدام فى الحياة العملية بيعرف فداحة الظلم البسببو للمكشوف عليه , اريتو ما كشف حالكم…
    بل وازيدكم من الشعر بيت , اورنيك (8) دا ما مفروض يملاهو طبيب امتياز ابدا,,لكن كنا بنملاهو عااااادى وداك يا التوقيع !
    وانا مرة قربوا يدبسونى فى جريمة بسبب الاورنيك دا !
    الله لا كسبهم عافية…
    وشمى يا حاجة شمى,,,

    1. انا كده يادوب عرفته المرقق من البلد دي شنو
      (مطلوب في تار ) يوه يابوووووي

      1. بت وراق..
        ههههههههههههههههههههههه,,,,لا لا الحمدلله قعدت بعد القصة دى قرابة السنتين,,انحنا كمان بنجرى ؟؟افو افو,,,
        اطلق نسيبتى الما عارفها لى اسه !!

        الغلبان..
        امانة ما اتلومت معاى !! ياخوى انت قايلنى انا ولد بتين ؟؟
        ههههههههههههههههههههههههههههههههههههه

    2. اخي شمباتي شكلك شمام قديم بس زمنكم ما كان فيه شم كان الشرطه في خدمة الشعب وبودوا السكران بيته عجبي

      1. لا وحاتك يا غلبان, زمان الشرطة كانت بتشيلو منك (تصادرو منك قال), و لو بقى بوليس عندو شوية زوق ممكن يديك منو شوية (يخمس معاك يعنى), لكن بخلى ليك المزة !!!

  5. نحن لو جينا للحق الشعب دا كله سكران في شعب واعي كده بيتحمل المتحملنو دا

    1. زمان يا بت وراق كان الاستاذ بيسال نص زائد نص كانت الاجابة قزازة – بس هسع بقى قزاز بنايات وغابات اسمنت يا تو اهون نسال فلادمير والا نستيقظ جيفارا

  6. هههههه الشرطة في خدمة الشعب – الشعب ال85% الكان – ركبوا الفهامات بسرعة بس مش ميد ان جاينا هههههههه

  7. السنة ساهلة لكن في الحوادث (حوادث بحري شفت زول مريض مركب درب وهو واقف شماعة) هذا المنظر لن يفارق مخيلتي ما حييت وال اختشو ماتو تقول لي خط هيثرو يا بروف ما هثرواتنا كثيرة وااااااااااااااااااااة راح المرارة خلاص

    1. لا حول ولا قوة الا بالله,,
      اللهم سلط عليهم من لا يخافك او يرحمهم…

  8. الشرطة يا جماعة الخير بتعمل كل حاجة وماسكة القانون بيدينها تعمل زي ما عاوزه واتحدات تعاين ليك لي شرطي بس شوية وعينك ما تشوف الا النور والتهم كثيرة وجاهزة في مرة كنت حاملا لكيس حليوة فيه هدايا وماشي وانا غبيان ساكت وقلت اغشى سعد قشرة اشتري لي اضافة (ملحوظة كيس الهدايا م الخارج ) اتشربك فيني شرطي واخر قبقبة ومن كل بيت من بيوت البذاءة بيت حتى وصلت قسم الشرطة وهناك طلع المتحري ود حلال وفهم انه العبد لله مغترب وشايل هدايا لناس بعد ان تصفح جواز سفري يعني دي اقسم من ارض الواقع مو خيال وهنا في قلب الخرطوم (سوق سعد قشرة) يعني موش في الواغ الواغ غايتو الشكية لابيدا قوية

  9. هو البخلي الناس تسكر شنو غير الهم والغم النكد الكل يوم زياده في الاسعار وفنجطه في القرارت واجتهاد في غير محلو وبلد شخبط لخبط والله لو ما السكر ده ام الكبائر حقو مره مره يفكو للماسوفى المواسير بدل المويه القاطعه دى والشرطه المحترمه مفروط يكون عندها معمل خاص تداتحليل نسبه الكحول فى الدم لانو الناس بطلت العرقى وبقت تشرب الدواء والاسبرت وديل تب ما فيهم ريحه وسلام يا حكومه

    1. من تحديات تطبيق الشريعة في المجتمعات المعاصرة انو
      الشعب لو بقي واعي ما في صالح الحاكم عشان كده الحاكم
      ما بكون جادي في التطبيق … والله اعلم.

      1. انت كنت من الدكاترة الناقشو رسالة الماجستير بتاعت هناى و الا شنو؟؟

  10. الكلام حرقن شان كده جيت صادى تانى

    السيد المحترم المبجل صاحب الكاكى العسكرى ده حدو واين فى الدراسه بلا شك فاقد تربوى لو بلاغ اساس طيب بتنا المسكينه دى اهلها دفعو كم امن بقت دكتوره ودكتوره عشان تشم عفن السكاره كمان عليك يابروف لو بث فى امكانيه الدكتوره دى تكتب لينا رقم الشكوه والجهه الاشتكت فيها واسم القسم لو امكن

  11. سلام ياقبيلة،،،
    وكل سنة وجمعكم بخير وصحة وعافية، وإن شاء الله تامين ولا مين…
    أيوااااااااا.. وأنا من زمان بقول الناس دي مالها كلامها بقي كُتر.. أتاريكم كنتم شمّامين، آه يا بتوعين الأنصاص…
    بالله يا جنوبي إنت طلعت قديم للدرجة دي، يعني إنت من زمن أبو رحط وأبو تركتر وأبو شنو كدا ما عارف داك، الكانت دعايتو بي صورتها الكبيرة وكبايتها أم رغوة ديك، قال إيه أكتحة إسكتو.. باللاي!!
    وشوف كمان الغلبان أنا كنت قايلو من جيل الإنقاذ الزادوا خوازيق البلد خازوق، طلع من جماعة ع قزاز!!!
    يللا يا جماعة كلكم غنوا مع جنوبي الذي أظنوا كان يغني لمشروب الشعير أبو شنو داك: الشنو كدا ما عارف أم إيه كدا إنتو عارفنو.. وكب يا منو كدا ما عارف، في كبابي الإيه يا جنوبي يا عفريت، ده إنت طلعت دفعتك لواء..
    إهداء لصديقي العزيز خالد ود مدني بعد طول غياب وشوق وإشتياق:
    هاتي كاسي هاتي خمري
    ثم هاتي العود هاتي
    علني يانفس اشفي بعض ما شاب حياتي

    1. ود الخلا سلام كير
      وينك وين وين اراضيك بعد ما خليتني حرته البرنجيه جاي تقول(هاتي كاسي هاتي خمري)

      1. بت وراق سلام كتيير والله..
        وما كان قصدي أن يكون ذلك كذلك، وحردانك البرنجية ما عجبنا، ولكن نقول شنو بس عين حسود صابتك،،،،
        ويا عثمانا هاك دي كمان ثم هاتوا العود كي نسمع شعرا
        وهاتوه فلربما قد يضفي على المهجة سحرا، والباقي عند سديقي اللواء جنوبي…
        ولد دي!!!!

      2. ودالخلا .. كل سن سنة وانت طيب.. جنوبي ثقافته
        ( أنادي ) ساكت وهو كوبلي واااحد نرددوا من ندخل
        لامن نمرق .. عوضية كُبي ليا من قزااازة العرقي ..
        انتو النسعلكم علاقة الانجليزي بالسكر شنو ؟ زمان
        الناس من تاني كاس اللسان يقلب ..
        انا برضو اللواء طيب ما تشوف بتاع القزاز ده باقي
        ليهو اصلح السراير ويبقي مشير ..
        بت وراق .. الحمد لله الما طلعتي ود وراق !!
        هسع توقيت الموضوع ده مصادفة ولا عملا بي رمضان ولي
        هاتها يا ساقي …

    2. ع قزاز شوالات صفايح
      جيردق الحرجل … النبك النبك
      قيييزقز قز قز قز
      طروططططتك طروووطوط – حلاوة قطن .

      1. يا ود مدنى هاهاهاهاهاها – و الله ضحكتنى جدا جدا و ذكرتنى بزمن جميل قدييييم لما كنا بنصحى بدرى يوم الجمعة نجرى لعند بيت جارنا فى اول الحلة عشان نلم قزايز (الشرى ابو جمل) و نبيعها لبتاع القزاز بقرش و نص ,, و كان اجمل صوت هو صوت القزايز (يتطاقش) فى شوالات حمار بتاع القزاز و هو جاى علينا !!!

      2. فيلاديمير .. انت لو من اولاد ام درمان بتعرف بتاع
        القزاز الحلبي الاضانو تقيلة ولسانه اعوج البقول
        ليك القجاجة دي مكسولة ؟
        وانا من زمان خجلان وقايل نفسي براي عمك ..
        سبحان مبدل الضُمنة بي الكيبورد …

      3. ÷ههههههههههههههههههههههه,,غادى غادى

      4. امشى كدة يا شمباتى, تلاقيك فايتنا بي غادى, بس ساااي بالعة فى بطنك

      5. هههههههههههههههههه,ما تقول كرشى كبييييرة وتشبه كرش المريسة !
        وى وى وى

  12. سلام يا بروف وأحباب ومريدي البروف
    طريقة إثبات حالة السكر بالشم دى موجودة من زمنا و ما اتغيرت رغم تقدم العلم ووجود اجهزة حديثة ورخيصة للفحص عن مستوي الكحول
    اذكر في بداية التسعينات أحضرت الشرطة متهم بتناول الخمر الى حوادث المستشفى وقام احد الزملاء وكان مناوب بالكشف على المتهم
    المشكلة انو المتهم قبل ما يصل المستشفي اكل كمية من البصل لتغيير رائحة الفم قبل الكشف
    قام زميلي بالكشف بطريقة الورق الملفوف باستخدام أورنيك ثمانية شخصيا وكتب في أورنيك ثمانية وبكل أمانة وصدق ( تفوح منه رائحة البصل)!!!!!!!
    الشرطي سال الدكتور: يعني يا دكتور الزول ده سكران؟
    وكان رد الدكتور: لو البصل بيسكر عندكم امشوا اجلدوه

  13. ود الخلا – عدت و العود احمد – وينك؟ هل كنت فى العمرة برضو و الا كنت طاشى بالخلا؟؟

    1. سلام ياقبيلة،،
      تعرف يافلاديمير أيلتش لينين يا صديقي، أنا كنت فعلا” طاشي بالخلا، وأهلنا بيقولو الخلا ولا الرفيق الفسل، دحين كدي شوفوا لينا مخرج ، من أم بلبلل دي ، وطبعا” رفيقك الفسل داك وهو عارف نفسو تمام ما بيجيب عدلو وديمة عليهو مفونس ولو ما عرفت معناها أسـأل منها سعادة اللواء جنوبي أو الفريق جبرا …………..
      وأنا كلما دنا طيفها الحلو وأنثني عادني الهم والضنا!!!!

      1. جف في كاسي الرجا وبكت فرحة السنين !!
        ياخي يا ودالخلا انت لمن تدقش الخلا بتبقي حلو خلاص ..
        اتاري القمردينة دي مليانة تائبين ..

  14. البروف السمار .
    سلامات .
    ياود الخلاء عمك جنوبى وفيلادامير ديل من زمن القرش المقدود والرغيف المخروم فى النص وناس البلدية بلمو جرادل الحمامات بالليل وبودوها ورا السلخانة يحفروليها أحواض .
    لكن دايرين شمباتى يورينا السكران فى الطب بيعرفوهو كيف وبيحددو نسبة الكحول فى الدم .
    وداير أسأل عن متعاطى المخدرات (البنقو مثلا ) بيعرفوهو وعندو حكم أم لدى ما يقبضوهو متلبس وبيتعاطى .
    وفقكم الله .
    والله كييييف…

    1. حنين..سلام…
      فى السودان,, ياهو الشم دا !!
      فى اى دولة محترمة,,لازم يشيلوا عينة دم ويفحصوا نسبة الكحول فيها , وممكن يحددوا نوع المركب بتاعو كمان..

    2. ههههههههههه وانا اقول حنين ده اسم اولاد صُغااار اتاريك
      من زمن ( ود بانديّه ) قادر الله .. اظنك كنت من البجرو
      ورا عربية البطري الصفرا ديك كتالين الكلاب الضالة ..
      هسع الكلاب ملت البلد من روتانا لي عفراء ولا لقت اليقولها
      جر ….

  15. السلام يا بروف و على الأحباب ؛
    مسكينة طبيبة الإمتياز و زميلتها يا بروف بس الخطأ على زملائها (السناير) عليها في الوحدة لأنهم ما نبهو الطبيبة
    لحقيقة الإجراء السليم و (المُبرئ للزمّة) و (المُخــَارج) كمان في حالة الكشف على (تعاطي الكحول) و تعبيئة استمارة (اورنيك تمانية).
    مما أعطى الغير و أولهم رجل الشرطة المذكور فرصة (التطاول) على الطبيبة بدون حق و اتهامها بالتقصير كمان !! و سبحان الله.
    إحنا يا بروف ـ و الفائدة لجميع الإخوة و خاصة أطباء الإمتياز ـ علمونا إخوانا الأقدم منا و زملاءنا إنو (أسلم) و (أعدل) طريقة للكشف و تعبيئة (أورنيك 8) في (حالة الكشف عن السكر) و لأننا في السودان نفتقد وجود الإمكانيات في المستشفيات لفحص نسبة الكحول في الدم هي القيام بفحص (الشم لأنفاس الزفير) أولا بالطرق المتوفرة لنا من (الورقة الملفوفة) المذكورة في خطاب زميلة الطبيبة تحاشيا لمسألة احتمال أن الرائحة عالقة في الملابس و ليست من جوف المريض ؛ و اختبار (التوازن) في طلب السير على خط مستقيم بخطوات تتلامس فيها الأقدام خلف بعض ثم التعليق بهذا النص :
    إما (تفوح من المذكور رائحة السكر) و يحول للمعمل الجنائي لمعرفة نسبة الكحول في الدم
    أو
    (لا تفوح من المذكور رائحة السكر) و يحول للمعمل الجنائي لمعرفة نسبة الكحول في الدم.
    يعني المسألة في النهاية يحول الشخص للمعمل الجنائي المتوفر به فحص الكحول في الدم فيُنصف الطبيب بذلك نفسه و يحفظ الإنسان المتهم حقا أو (ظلما) بالسكر حقه.

  16. و أعتذر من الخطأ في جملة (رائحة السكر) و الصحيح هي (رائحة الكحول) و العتب يا إخوانا على الجهاز المعاي 🙂

  17. و نصيحة تانية بعيده عن موضوع (السكر) و في موضوع (أورنيك 8) يا بروف لإخوتنا (الإمتياز)
    بس (مُشفــَّرفة) 🙂 ليهم يا بروف ؛)
    : ما تنسوا دائما جملة (ما لم تحدث مُضاعفات)

    1. (مُشفــّره) .. و معليش العتب على النظر يا جماعة 🙂

  18. عارف يا بروف و الإخوة الأحباب :
    أخوانا أطباء الإمتياز ديل قلوبهم طيبه شديد 🙂 و فيهم حاجة جميلة من (الرحمة) رغم كل البعانو منو سواء من وسط العمل الصحي أو من المواطن و المُجتمع .. هُم (أساس الصحة) و لو الدولة ركزت معاهم و تعبت فيهم تدريب و تأهيل و تعليم و برامج و (منهج مُنتظم) للتخصص والله يا بروف هُم من خيرة أطباء العالم بإذن الله.
    فمعاك يا بروف و الأحبة و من (القمردينة) نـُرسل التحية و الإعتذار لزميلنا و أختنا طبيبة الإمتياز و صديقتها و لجميع أطباء الإمتياز
    عما حدث لها من ظلم بلا حق في بلد شعب الطيبة و السياسات العجيبة !!

  19. و للفائدة برضو 🙂 (الخواجات) في شرطة المرور عندهم جهاز (محمول) يتم به الكشف عن نسبة الكحول في (هواء الزفير) بالنفخ فيه مباشرة ـ عامل زي جهاز بخاخ الربو ـ و القانون حدد نسبة معينة للتحفظ على كل سائق متهم بالقيادة تحت تأثير الكحول. و الجهاز ما غالي و ممكن توفيره إن أخلص و إجتهد الناس عندنا 🙂 بس في الصحة قبل المرور.

    1. قبلها كان عندهم ـ طبعا الخواجات 🙂 ـ (بالونه) لمن ينفخوها السكرانين (بتتلون) حسب نسبة الكحول في الزفير 🙂 .. بس منو الفينا الزمن دا في البلد دا بقدر ينفخ بالونه!!!

  20. (طلب خاص) لأستاذنا الفاتح جبرا 🙂 .. حدثنا يا بروف في القريب سيناريوات عن (قصة اسطوانات) الأكسجين و الغاز

  21. ههههههههههههههههههههههههههه,,,,حتى النفخ عدمونا ليهو ! سُب عليهم….

  22. سنة كم وتسعين في صالة مطار أديس راجعين الخرطوم لقيت راجل
    كبيير خاتي قدامو ( بلاك ) ياخي الراجل ده ودّع القزازة
    دي وداع أظنو مرتو ما ودعا كده .. قلت ليهو طيب لمن
    نصل الخرطوم حتعمل شنو ؟ قال اريت عساكر العالم كلهم بي
    بلادة عساكرنا البقولو ليك قول حاح ديل ..
    يعني زي الاطباء ديل ابسط شئ يكون عندهم شئ لكشف المخمور
    يميزهم من بقية الناس العاديين لانو تقريرو ده بيحدد مصير
    زول ..

  23. أبوتركتر وأبو شنو …… ود الخلا إنحرف يا رجااااالة

  24. هههههههههههههههههههههههههههههه هههههههه….راجل برضك !!؟
    اممممممممممممممممم

  25. استاذنا والعقد الفريد
    السلام عليكم وكل عام وانتم بخير (اصلها بايته)
    يا اخوانا اذا كان الكشف عن الطائرات التجي تضرب وتمشي ساي بقي بالنظر اشمعني يعني دا ما يكون بالشم واهو كلو بالحواس
    باقي سقوط الطيارات دي تكون بالذوق مثلا والضبان والباعوض وباقي الحشرات باللمس وكشف الزنا لمسؤولئ المؤتمر الوثني يكون بالسمع
    ولا كيف
    انا جيت راجع تاني البرنجية الا تلقوها في شقة معاها اربعة ولاعات وكبريته بالعدم

    1. انت يا المكتول وحي صحي بتاع ال Four Cats داك عملوا
      ليهو شنو ؟ وهو زاتو طلع منو ؟ قالوا هناي كبييير ..
      صحي جلدوهو ؟

      1. قدو قدو لي ناس مو كل الناس الله

      2. يا زول طلع هناي كبيييييييييييييييير خلاص وبتاع خلاوي وبلاوي لامن ناس الخلوة طلعوا بيان – غايتو تحت تحت كدا قالوا جلدو لكن كم الله اعلم.
        لكن يا جنوبي يا اخوي الزول دا ما بالغ four cats حته واحده ليه رابط ليهو قربه ولا شنو …….. ههههههههههههههههههههه
        دا كلو من ال Sildenafil 100 mg
        بالمناسبة في واحد من شيوخم المشهورين جدا جدا ………الامام قالو كتر فيها قربتو توديهو الفنقا الا ودوهو المانيا ودا شمار من زول قريب منو شديد

  26. يعني يا الفاتح يا ولدي انت عايز من السبعين في المائة من ميزانية الدولة المخصصه ليهم يصرفوا منها لبالونات الشم كدا تخرب عليهم بالحيل

  27. و برنجييييييييييية الختاااااام

  28. غايتو يا المندهش !!
    قامت بيك ساااااااى

  29. بدل الشمشمه والجهجهة دي وضياع وقت الطبيب (في مرضى احوج للطبيب)، خلو الناس تسكر سكرها وتنسى همومها

    1. راى برضو !!

    2. ينصر دينك والحساب عند الله لانه اصبح حسابهم المتكول على الله فشنك هع

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: