لملذا يستقيلون؟

• في سبتمبر 2008 قدم وزير الزراعة الياباني (سيشي أوتا) استقالته بسبب فضيحة غذائية تتعلق بأرز ملوث. وذكر (أوتا) في مؤتمر صحفي عقده وقتها لذات الخصوص أن “فضيحة الأرز الملوث صارت مشكلة اجتماعية كبيرة , وقررت أنني في حاجة إلى توضيح مسؤولية وزارة الزراعة والغابات والمصايد”. وقد قام رئيس وزراء البلاد (ياسو فوكودا) بقبول إستقالته (يعني ما رفضا) !
وقدم وزير الزراعة الياباني استقالته بعد أن قامت شركات يابانية بشراء أرز مستورد من فيتنام والصين وتايلاند مصاب بالفطريات أو يحتوى على كميات من المبيدات الحشرية تتجاوز الحدود القانونية , مما جعله غير صالح للاستهلاك الآدمي . وقد أصر وزير الزراعة الياباني على إستقالاه على الرغم من أنه لم ترد تقارير حول ظهور حالات إصابة بأمراض بسبب استهلاك الأرز الملوث .
• عندنا طبعاً عادي تستورد تقاوى فاسدة .. أدوية فاسدة أي حاجة فاسدة يموت اليموت ويدخل السجن اليدخل من المعسرين وتكون قاعد في حتتك وكمان ممكن تعمل فيها زعلان وتقوم (تحرد) وتقعد في بيتكم ويجو يحنسوك عشان ترجع وكده !
• في مارس 2011 اعلن وزير خارجية اليابان (سيجي مايهارا) استقالته بعد ان اقر بتلقيه هبة بقيمة (450) يورو من اجنبية تقيم منذ فترة طويلة في اليابان بما يخالف قوانين البلاد وعقد وزير الخارجية حينها مؤتمرا صحافيا قدم خلاله استقالته.وقال مايهارا (48 عاما) “خلال الايام القليلة الماضية فكرت مليا وقررت الاستقالة من منصبي كوزير للخارجية”.
وتابع “اقدم اعتذاري للشعب الياباني على هذه الاستقالة التي تأتي فقط بعد ستة اشهر، لانني اثرت الريبة مع ان تاريخي السياسي كان نظيفا حتى الان”.
• 450 يورو مش ده زول مفتري ؟ ده أنحنا عندنا أمين ديوان زكاة متبرع لقناة فضائية بخمسين ألف دولار ولا إستقال ولا حاجة (لحدت ما شالوهو)ولمن سألوهو قال ح يحاسبو الله عليها يوم القيامة .. ولى هسه القروش ما معروفه وين؟ الوزير ده بيستقيل عشان 450 يورو (بس) مع إنو ما بعرفش حاجة إسمها (يوم القيامة) !
• في أكتوبر 2011 استقال وزير الداخلية البريطاني (ديفيد بلانكيت) من منصب وزير الداخلية بعد العثور على رسالة بريد إليكتروني اثبتت أن طلب تأشيرة دخول لمربية يود إستقدامها قد لقي عناية خاصة ،وجاء في رسالة البريد الإليكتروني المذكورة: “لا أفضلية ولكن أسرع قليلا”. وقال بلانكيت إنه “لم يكن على علم بمضمون الرسالة كما أصر على أنه لم يرتكب خطأ”. وأضاف: “ولكن الشك في أمانتي قد أضر بالحكومة”.
• يعني الخواجه ده إستقال عشان طلب من ناس الهجرة (يسرعو ليهو شويه) في إستقدام الخادمة !! بالله شوفو (الكافر ده)؟ بالله دي عملية يعملا ؟
• في أكتوبر 2011 استقال وزير الدفاع البريطاني (ليام فوكس) من منصبه على خلفية الكشف عن علاقته الوثيقة برجل أعمال له مصالح تتصل بشؤون الدفاع ، وقد أقر فوكس في خطاب استقالته إلى رئيس الحكومة بالخطأ والخلط بين المصالح الشخصية والحكومية, وقال في خطاب الاستقالة “أنا آسف جدا لما حدث”.
• عندنا عادي ممكن تلاقي (الشركة) البتبنى في مباني الوزارة قاعدة تبني للوزير في البيت بتاعو .. ومفيش مشكلة ولا أي (خلط) بين مصالح شخصية ومصالح حكومية .. دى حاجة هسه يستقيلو بيها لو ما ده خواجة مطرطش سااااكت ؟

• في فبراير 2012 قدم (فيليب هيلدبراند) رئيس المصرف الوطني السويسري، استقالته من منصبه على خلفية مزاعم تكّسب زوجته من صفقة تحويلات ضخمة قبل أسابيع، من تحديد المصرف المركزي السويسري سعر الفرنك.
وصرح هيلدبراند، في مؤتمر صحفي في برن عقب إعلان استقالته قائلاً : وصلت إلى قناعة باستحالة تقديم دليل قاطع على أن زوجتي طلبت تحويل العملات دون علمي .
• شوفوا الزول ده قال شنو؟ قال ما قدر يثبت إنو زوجتو طلبت التحويلات دون علمو عشان كده إستقال ، (عاوزين لينا 900 سنة ضوئية عشان نصل الحتة دى) !
• في فبراير من العام 2012 م إستقال وزير الطاقة والمناخ البريطانى (كريس هون) فى أعقاب الإعلان أنه سيواجه اتهامات تتعلق بالتفافه حول غرامة لتجاوزه حدود السرعة القصوى، وذلك بوضع الغرامة على رخصة القيادة الخاصة بزوجته التي كانت حينها منفصلة عنه .
• أيه الفساد ده ؟ يخت الغرامة في رخصة قيادة مرتو؟ دي عمليه يعملا لازم يستقيل عشان لو خلوهو يعمل في عمايلو دى ح يهدم المشروع الحضاري .. (البريطاني طبعن)!

كسرة :
يعيش يعيش .. صباع أمير !!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟ – شكلهم بقى حلو مش كده؟ –

Advertisements

44 تعليق

  1. مبرووووكة عليك

    1. غصبا عنك
      احنا حارسنا من السحور يا حبيب / ة

      1. هههههههههههههههههههههههههههه,,,والله دى رجالة وحمرة عين سااااااااى..
        ع البركة…

      2. هههههههههههه لاكين يا الشبح !!
        ممصمص بي موية ترمس …

      3. المكتول و لسة حى ,,, برضو نحنا بنباركا ليك ,, لاكين اصحى يا بريش, السحور دة كان فى رمضان و هسة العيد زاااتو انتهى,, و الا انتا قاصد السحور لصيام الستوت؟؟ الله يقبل ان شاء الله

    2. السلام عليكم ، عرفنا البرنجيه و لا فخر دى جديده و لا جداده …………… عجبى

      1. اولا حمد بالسلامة يا كوكو ليك وحشة……..بعدين انت ما عارف انو في جداد الكتروني قول بس داير كم كيلو اصلو رخيص خلاص

  2. افتونا يا جماعة — جريمة الزاني المحصن شنو لما يكون قبضوهو معاهو اربعة بنات في شقة في شهر رمضان
    يقدم استقالتو مثلا……………
    وهل بقبلوهو منو ولا يقولو ليهو اصبر شوية
    ولا يرجموهو

    1. اربعة بنات و رجل معناها مافي خلوه ! شنو كمان
      دايرين تتهمو الناس سااااكت !!

      1. ههههههههههههههههههههههههههه,,صدقت فيها دى,,,,
        لكن الفتة دى ما ناقصها زيت سمسم !!؟
        وى وى وى

  3. ةييييييييين ج نر ب ما عاوزين برنجية نبيع سبارس يااااااا

    1. بنفتش على خمسه ؟؟؟؟؟؟؟؟؟؟؟؟

      1. !!!!؟؟؟ وتاني !!!
        بدو الاضراب ولا شنو ؟

      2. سمع اضاااانى, قالو ليك النسوان من شكلهن كدى تانى يوم الصباح, لا فى اضراب و لا شيتن, الحكاية كولها اعلام سااااى عشان عايزات يترشحن لمناصب دستورية فى الحيكومة الجديدة و عايزات يكسبن اصوات النسوان الزيهن,,, و عجبك يا كوكو

  4. والله يا بروف وياحبايب أن شايف من الأسهل يستقيل شعب أمازونيا الفضل من حتة الدولة (الماشه ناقصة كل يوم دي) ويشتري دماغه

  5. تصدق وتآمن نحن عايزين حكومة منتدبة والله
    انا من المؤيدين للاستعمار البريطاني

  6. اشاده: ذهبت اليوم لاستخراج الرقم الوطني لابنتي وذلك بصدد التقديم للجامعات والله العظيم قمه في الذوق والاحترام وهذه اشاده وتقدير واحترام لهذا المركز، اما مركز كرري فأرجو منهم بان يحذو ويستفيدوا. من مركز حي الرياض إذ انه لدي تجربه عجيبه مع مركز كرري

    1. يعني ما أعمال حرة وكدة ؟؟

      1. السلام عليكم ، يعنى مركز الرياض و المنشيه يكون زى كررى و كرور ياتارك ………..عجبى

  7. البروف والسمار …. قرأت قبل كم يوم الخبر التالي
    النساء في توغو يضربن عن المعاشرة الزوجية جنسيا لاجبار رئيس جمهوريتهم على الاستقالة في واقعه هى الاطرف حول العالم قررن سيدات توغو الاعتصام ولكن على طريقتهم الخاصة وهى الاضراب عن المعاشرة الزوجية لاجبار رئيس الجمهورية على التنحى والاستقاله من منصبه كرئيس للجمهورية وقررن النساء بداية اضرابهم من اليوم الاثنين ولمدة اسبوع وذلك لاجبار رئيس الجمهورية على اتنحى وتقديم استقالته وقالت المتحدثة باسم اتحاد نساءتوغو من اجل الحرية ان الهد ف من الاضراب هو حث الرجال على الوقوف في موقف موحد واجبار الرئيس عن التنحى أها رأيكم شنو ( وووو 23 واو ) !!!

    1. اممممممممممممممممم,,احنا عندنا اضراب طبيعى !
      وى وى وى

      1. شمباتي ..
        يعني ممكن يكون اضراب رمزي (يوم الخميس ) لمن استطاع اليه سبيلا

      2. سلام د/شمباتى و المدشدش ، ده ما يبقى يوم المنى ، نسوان ومضربات ، طوالى تجدد ولا تعمل احلال …………… عجبى

      3. المندهش..
        ههههههههههههههههههههههههههههااو,,,رمزى ابو هانى !؟ هيي يكا..

        كوكو….وعليكم السلام ورحمة الله…
        احلال بشنو عاد !!؟ خليك مستووووووووووووووووووووور..

    2. غايتو انت يا المطرطش !! اهن علمن عليك الله
      علمِن الزي ده كمان ..
      إيه رأيك نحنا نلبس حريمنا دقن مستعار وكل مره وحسب
      غبن راجلا …
      الكسرة بقت ديلك جن تلاتة اعرف تومتي ياتا انا دستوري
      نازل في الخرطوم تلاتة وانت تقول لينا جنس كلامك ده !!
      زعلان منك …

  8. تقول ليا إستقالو مش قبل كدة طيار طائرة شراعية تنزل فى مبنى البنتاقون استقال حينها 45 موظف بما فيهم وزير الدفاع … المشكلة ماعندهم بشير يرفض الأستقالة .

  9. والله ياجبرا دي بالغته فيها نقعد بلا حكومه يعني ولا شنو

  10. ياجماعه وين الحاج سلاوي اوع يكون استقال

    1. حاج السلاوى فى امازونيا العظمى..
      محتجز وما قادر يقول بغم !!
      وى وى وى

  11. أدب الإستقالة و فن الإقالة … لماذا لا يَستقيلون و لا يُقالون يا بروف ؟!!
    🙂

  12. عبد الوهاب عثمان قدم استقالته لرئيس الجمهورية
    عبد الله مسار قدم استقالته لرئيس الجمهورية ورئيس
    الجمهورية هو رئيس مجلس الوزراء ..
    طيب المتعافي ليه قدم استقالته لنائب الرئيس علي
    عثماااان ؟ والدم اللي ع البنطلون جا من فييييين ؟

      1. ما يأدرش يئووووول !!
        امممممممممممممممممممممممم

  13. فى هولندا فى التسعينيات من القرن الماضى (و نحنا لسة تلاميذ) استقال وزير التربية لان احد الطلبة و فى رحلة مدرسية ضرب ليهو بجعة فى بحيرة و كسر رجلها, و الوزير فى خطاب استقالتو ذكر ان سبب الاستقالة انه لم يتمكن من توصيل فكرة احترام حياة الحيوان و الرفق به للطلبة و هذا يعتبر تقصير منه و من فريقه !!!
    البروف,,,, ان شاء الله تلاقى ليك رد للعند النائب العام دة قبل ما (الواوات) يملن السطر و تخت شولة او نقطة. سطر جديد

    1. فلاديمير .. أوع البجعة دي تكون بتاعت ناس جنوبي ؟؟؟ ههههه

      1. شحدت الله بجعة (فلانة) بالخراج !!!

  14. طيب عماره وردلب وغفير مات عادي
    تقاوى فاسده عادي
    عربيه انضربت باليل والوزير الهمام قال ليلأ وبدون اضاء عادى
    تانى ضربو عربيه نهارا جهارأ وفى نص بورسودان عادى
    قوات خليل دخلت امدرمان عادى
    الكهربا زدوها ورجعوها عادي

    ياشباب ده اسمو استقيل يا سقيل وبرضك عاااااااااااااااااااااااااااااااااااااااااااااااي

  15. صراحة مش عارف اقول ايه الامثال المضروبة خلت راسنا مضروب ولا تعليق هل يقرأ هؤلاء على وزن (من اين جاء هؤلاء) يمكن جابهم اسحاق احمد فضل الله والله هو معاهم والا ايه الحاصل والا شنو فهمونا يا بروف الحقنا بي الفهامة من الححم العائلي

  16. من سلبيات صباع أمير الحسنة إنك ما ممكن تفك الملصوق
    سالم ..!!

  17. يعني الخواجه ده إستقال عشان طلب من ناس الهجرة (يسرعو ليهو شويه) في إستقدام الخادمة !! بالله شوفو (الكافر ده)؟ بالله دي عملية يعملا

    حير2نا

  18. البروف السمار سلامات .
    أدب الاستقالة فى بلدنا بقت مخرج للمسؤل عشابن يحسن صورتو عند الراى العام .
    يعنى المتعافى يعمل شركات إثتسمار كتيرة جدا ومشاريع زراعية ويلم ف حساباتو دولارات السواد والرماد ويقوم يقدم إستقالتو نتيجة لخطاء وقع فية لا تتجاوز نسبتة الواحد فى المية من الاخطاء التى تساهم فى معانا المواطن الغلبان .وترفض الاستقاله وهكذا حتى يصبح أى مسؤول فى الدولة يستقيل ويعاد تتيجة لإعترافة بخطائة ووبد ذلك يكون هو من يوثق بنزاهتة ونظافتة .
    الله فى …

  19. و برنجية الختام ,,,,,,,,,,,,,,, حسب اخر اختراعات المندهش !!!!

  20. والله يااستاذ ماقصرتا لكن ناس المشروع الحضاري شغالين بمثل اسمع بي هنا وفضي بي هنا نتمني ان تواصل في هذا الطريق وفقك الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: