طلعنا أي كلام

الكثير من القراء (خاصة أبنائي على موقعي بالفيسبوك) يطلبون من العبدلله أن يرفق (بي نفسو شوية) وما (يحرق دمو ساااكت) خاصة وهو زول بتاع (قلب) و(تصلب شرايين) وينسى حكاية (خط هيثرو دى) بإعتبار إنو (المسألة عايرة) وما بقت (على دى) وهنالك الكثير من ملفات الفساد التي تمتلئ بها أدراج الجهات العدلية والتي لم نسمع يوماً واحداً أن أصحابها قد قدموا للعدالة .
غير أن العبدلله عندو (فهم تاني) فقصة سرقة هذا الخط الجوي تختلف تماماً عن اي قصة فساد آخر ويكمن الإختلاف الجوهري في إنها وااااضخة وثااابتة وما عاوزه ليها دليل .. يعني مش ذى (التقاوى) واحد يقول ليك (نسبة الإنبات) عالية وواحد يقول ليك (لا منخفضة) والتالت يقول ليك
فيها (فطريات) والرابع يقول ليك ما عارف شنو داك !
خط وإتسرق وإتباع .. والجهة التي قامت بشرائه (معروفة) .. قضية ما عاوزة (المحقق كونان) وممكن لأصغر (متحري) أن يكمل تحرياته فيها في أقل من (شهر) بالكتير .. يعني هى كيمياء .. الحكومة (إتنشلت) ووجدت الحاجه النشلوها منها (قاشر بيها زول تانى) .. خلاس تخاطب (الزول التانى) ده بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى)؟
لكن يبدو أن الجهات الممسكة بملف القضية عندها فهم تاني إذ مرت على الموضوع سنين عددا ولم يبت في الأمر ولم يقدم شذاذ (الأجواء) هؤلاء الذين قاموا (بتنفيذ هذه السرقة) إلى القضاء .. لجان تحقيق تقوم ولجان تحقيق تقعد (تحقيقات برج التجارة العالمي ما أخدت وكت قدر ده) ، هسه الموضوع ده عاوز ليهو سنين عشان (ينعرف؟) هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟
والظريف في الموضوع كل خمسة ستة شهور يقوم مسئول يصرح بأنو (التحقيق لسه ما إنتهى)
حتي جاء ذلك اليوم الذي صرح فيه السيد وزير الدولة بالنقل (فيصل حماد) بأن التحقيق قد إكتمل وذلك في خبر نشر بصحيفة الصحافة بتاريخ 17 يونيو الماضي (يعني قبل شهرين ونص) بعنوان (وزير الدولة بوزارة النقل : إكتمال التحقيقات في بيع خط هيثرو) والخبر يقول :
(اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيعه)
بعد تصريح السيد وزير الدولة بالنقل تنفس العبد لله الصعداء كما شاركة التنفس أفراد الشعب (الفضل) ولسان حال الجميع يقول (أخيراً سوف نسترد خط ناقلنا الوطني)
تنبيه : أيها القارئ الكريم (قوم أخد حبوبك وخليك ريلاكس) وتعال (واصل) عشان تقرأ معاي آخر التصريحات وهو للسيد أوشيك محمد أحمد رئيس لجنة النقل بالبرلمان بعدد الأمس (2 سبتمبر)من صحيفة ألوان (يعني بعد شهرين ونص من تصريح الوزير بأنو التحقيقات إنتهت) والذي جاء بعنوان (توقعات بإنتهاء التحقيق حول خط هيثرو خلال أيام) حيث جاء في الخبر ما يلي : ( كشف رئيس لجنة النقل بالبرلمان أوشيك محمد أحمد عن إقتراب الفراغ من التحقيق حول خط هيثرو المفقود ورفض أوشيك الخوض في الحديث حول هذا الخط وقال أن عمل لجنة التحقيق شارف على الإنتهاء وأنه خلال اليومين القادمين ستظهر نتائج التحقيق حول هذا الأمر) !
يعني وزير الدولة بالنقل كان مفتكر التحقيق إنتهي .. والعبدلله إفتكر التحقيق إنتهى .. وإنتو إفتكرتو التحقيق إنتهي .. وأتاريهو التحقيق لسه ما إنتهى … ده نحنا طلعنا أي كلام يا جدع !!

كسرة :
سؤال لعلمائنا الأماجد : هل هذه سرقة (حدية) أم أن (ثمن) الخط (أقل من النصاب)؟

كسرة ثابتة :
أخبار ملف خط هبثرو العند النائب العام شنو(ووو ووو ووو)؟

55 تعليق

  1. 🙂 ربنا يمتعك بتمام الصحة و العافية يا بروف
    و التحقيق شكلو (تحقيق تاني) ما الأولاني !!

    1. و (تاني تاني) أستاذنا الفاتح 🙂

  2. محمد حسن
    برنجييييييييييية هدية إلك

    1. سلام المدشدش وين جنونى و بت وراق وحنين و د/شمباتى و د/ تارك و كتلهو و جميع المشركين للبرنجيه ، …………… عجبى

      1. انا حردتها تب !!!

      2. كوكو .. نحنا هينين .. وينو كتلوني الامبارح عامل
        لينا فيها حجار سيد مصنع البرنجي زاااتو !

      3. ايوه حجار ورئيس نادي الهلال ………عندك كلام ……..وانا ما زعلان كمان

      4. ده كلو وما زعلان !!
        علي كل حال غضبك جميل زي بسمتك …

      5. وأنا من يوم ما حصل تزوير البرنجية بتاعتي ولحقت خط هيثرو خلاص بطلت وقررت إني ألتفت لي قرايتي

      6. انا زاااتى كنت مشرك ليها و استنيتا كدااااا, لاكين لامن اتاخرت قمت على شغلتى, و لامن جيت صادى لقيت لك ود الحسن نطا فوقا و جلاها, و المندهش بيباركا ليو….

      7. تعرف الإمور جاطت من يوم ما البروف ذاتو بقى مذيع في قناة الشروق يقدم في البرامج مني وما أنا قلت الجماعة ديل حا يرسلو ليه ولدهم الناعم الملمس جيمي الله يستر عليه مافضل لينا زول يولول معانا غير البروف والسمار

      8. هههههههههههههههههههههههههههاااى,,,حلوة منك يا الفاتح,,
        اها دخلت علمى ولا ادبى ؟؟ كع

  3. السلام عليكم ، البرف و الاخوان ، ما دام الخط معرو اتباع لى منو ، نرجو توضيح الجهه التى تستعمل الخط الان عشان نرجع خطنا (ب ادراع ) ونشوف الراجل منو فينا ؟ و الاشتراهو يشيل شيلتو مع البائع ، بالمناسبه هل عندنا طياره بتقدر تطير من هنا لاعن لندن ؟ يادوب تصل جده للعمره وتجى راجعه بى سعر لندن ذاتو وقيل اكتر ، فليه السفر الى بلاد الكفار و الريس عندو طياره خاصه للايداعات ……………………..عجبى

    1. ينصر دينك يا استاذ نفيساااااااااااااااااااااااا راح نطير عليهو شنو

  4. كل سنة وإنتو طيبين يا جماعة .. وربنا يديكم الفي نياتكم .. ويديك العافية يا بروف
    أنا ما عارف الناس ديل جلدم بقى تخين للدرجة دي ليه؟ يعني لو ضحوا ليهم بحرامي حراميين عشان يبيضو وشهم قدام خلق الله ما أخير ليهم من الورطة الهم فيها دي خاصة إنو الموضوع بعد كسرة البروف الثابتة بقى حديث الغاشي والماشي لكن البقدر يقول للأعور عينك مفقوعة منو ؟ وبيني وبينكم شعبنا ذااااتو بقى ما عليهو الرك .. نام في الخط وبقى راجي يقرروا ليهو وهو يتبع صاغرا دون أن يحرك ساكناً … فنحنا نستاهل طالما فقدنا آخر أسلحة التغيير الفي يدنا .. وكتر البتابت عيب .. ولا شنو يا قبيلة ؟

  5. السلام عليكم بطلب من كل من يطالب بترك موضوع خط هيثرو بدوعي لاسباب صحية ينوم في بيتم ويخلي الناس في حاله لانو في مثل بينطبق علي الجماعة كترت التكرار يمكن تجيب خط هيثرو ويختشو علي نفسهم ويرجع لينا خط هيثرو رجوع القمره لوطن القماري رجعنالك وكيف نرفط رجوع القمرة ونحن حاضرين ومستعدين للعلاج مجاني علي حسبنا ما عليكم وتاني وتاني وتاني مليون تاني

  6. البروف والاحباب….سلام….
    هو كان ما ملعوبية لزومو شنو يعملوا لجنة نقل بالبرلمان وفى وزير نقل اتحادى وكمان ولائى !
    اححححححححححححححححححححححححححححح يا يا البتاع !!

    1. هو زااااتو وينو النقل اليعملوا ليهو وزارة !!

      1. عشان كده الدنيا كلها عطرابة وسيارات كورية وصينية – مجرد ملحوظة مجلس تنفيذي ابوظبي (يعني مجلس الوزراء) من دخول السيارات الصينية خالص خالص عجبي

  7. أب أحمد … سلامات
    نحنا ما بنضحي بي جلد كديسه لأنو جلد الكديسه بيعملو منو مركوب !!!
    سؤال سغيروني لناس جامعة الجزيرة ( متى تم إنشاء قسم معهد إسلام المعرفة ) ؟؟؟

  8. وزير الدولة في تصريحه الاولاني كان تحت ضغط المظاهرات
    وأي حاجة تحت الضغط لا يؤخذ بها اما أوشيك فقال تصريحه
    وهو بكامل اطمئنانه وراحته السياسية !!
    علمائنا بيجو في الهايفة ويتصدروا قال تمباك قال !!
    الليلة الكسرة الثابتة والغنيه مطقمين ..سفاري بس ..
    بي طاري أوشيك ده , كيف يتم تسجيل حزب سياسي يجاهر
    بالقبلية زي مؤتمر البجا ويمنعوا حزب يدعو للتوحد زي
    الحركة الشعبية !!؟

  9. يا سيدي البروف جبرا ، مهما تحاول تديهم خارطة طريق ( بتاعين التحقيق) وتقود فيهم الي طريق التحقيق القصة لسع يعني كم سنة وكم حافز وكم سفره لزوم التحقيق وكدا دا يا بروف باب رزق وانفتح داير تطيره زي ما طار الخط كمان يخلصوا ليه وانت قايل واواتك لو وصلت مليون بتهمهم بيصروفوا في الحوافز وانت اصرف لينا واو كل شهر وانا اقترح تعمل تربيع يعني واو كل شهرين عشان القلب والشرايين

  10. كضبة بيضاء يعني تسهيلية ذي فتوى تحليل الرشوي بالنسبة للسواقين اللواري البيدوها لي بتاعين القبانة والله أعلم…..!!!!!!؟؟؟

  11. يا بروف, ما يمكن سيادة الوزير لمن قال اكتمل التحقيق و تم تحويل (الاطراف الضالعة) فى البيعة دى, اظنو فى (ضلع) وقع جاى و الا جاى و دة اللى اخر التحقيق شهرين و نص تانى,, عموما اهو رئيس لجنة النقل قال كولها يومين و تكمل (الفتة) – ما لقو الضلع الواقع و كدة – و حنشوف النتيجة قريب… قولوا يارب بس ما تجيب ليها (واو) عاشرة …….

    1. يا خوي امنا الحكومة اخف من الريشه ولو طلعوا سبة عساكر من بوابة القيادة العامة بتتقلب بس ما زال الشعب الفضل خايف من البديل لكن لما يقول البديل نحنا يبقى ام الحسين اتنفخت

    2. ا خوي امنا الحكومة اخف من الريشه ولو طلعوا سيعة عساكر من بوابة القيادة العامة وضربوا الكواراك ساكت بتتقلب بس ما زال الشعب الفضل خايف من البديل لكن لما يقول البديل نحنا يبقى ام الحسين اتنفخت

  12. سلام لكل الناس الحلوة في زمن المرارة (السنة دي ما تحلموا باي مرارة الخريف حلو والحافايرمليانه وما في زول بيفرط في بهايمو) صحي عاوزين نعرف السرق الخط منو بس لو رجعوهو لينا ثاني زي ما بيقول كوكو نطير عليه شنو لكن ممكن يكون قاعد للاجيال القادمة بس مش نسبة الستة عشر في المية بتاعت الحكومة نسبة الوافدين ال 84% من الاجانب البيظاهروا ضدها وعجبي ……

  13. الأخ العزيز / الفاتح
    سلامي لك ولكل الكادحيين ولكل ضمير حي في زمن ماتت فيه الضمائر .
    نقول اللهم ولي علينا من يتقي الله فينا
    أبشرك بعد إنتهاء التحقيق سوف يتم تشكيل لجنة تحقيق أخرى بحجة ان اللجنة السابقة صاحبتها بعض القصور كما حدث في لجنة مستشفى الخرطوم وذلك حتى ينسى الناس الموضوع بحكم تقادم الزمن .
    لك ودي ولقلمك الحر .
    وقآآآآآآآآآآآآآآآآآبلني لو طلع تقرير
    ســــــــــــــــــــــــــــــــــــــــــــــــــــــــــلامي

    أخوك
    حمد احمد

  14. أصغر منك دوسو
    محكمة ( طالبان ) فرع امبده
    محكمة امبده قبل كم شهر حكمت برجم فتاة بعقوبة الزنا ويقال
    ان الفتاة تعتبر قاصر حسب كلام بعض منظمات المجتمع المدني !
    اليوم لقيت خبر عن محكمة امبده حكمت بالاعدام علي طالب أساس قتل
    طفل زميله في مشاجرة داخل المدرسة!!!
    يعني الشافع ده ح يكون عمره كم سنة ؟
    وهل طفل الاساس ده حسب سنه ربنا فرض عليه ركن من اركان
    الاسلام غير الصلاة ؟.
    وطفل الاساس ده مش مرفوع عنه القلم حتي يحتلم ؟
    يا جماعه لو في قانونين في القمردينة يوضحوا لينا نحنا محكومين بي
    ياتو قانون وياتو دين شان الكلام ده طلع ؟؟ني .!!
    هو زاتو غير الكلام الزي ده الحصل في قوانين سبتمبر النفر الناس من
    الشريعة شنو !!

  15. جنوبي … لحدي ما حااااا نعمل دستور نحن بنحكم بقانون أم تكشو !!! والما عاجبو يلحس كوعو

    1. وما تنسى قانون ام تكشو دا نيلنا بيهو درجة الماجستير مع مرتبة الشرف وعقبال الدكتوراه و …. نعيش ونشوف

    2. حتي ام تكشو عندها مقادير بتتعمل بيها يا المندهش !!
      بمناسبة الدكتوراة .. دكتور مشي للخطاط قال ليهو اعمل لي يافطة
      دكتور فلان اخصائي باطنة وقلب وانف واذن وحنجرة و .. الخطاط
      قاطعه قال ليهو يا دكتور ما اكتب ليك دكتور فلان علي كل شئ قدير !
      الله يجازي العمل اكبر رتبة في الجيش مشير وخلاهم يفتشو بره !!!

      1. ما ضروري مقادير ما اصلو هو ملاح عزابة ( القطر قام ) النسوان يا إنت مشن ساحات البتاع وحملن الكلاش و الرجال بزبطو براهم ملاح أم تكشو شوشوشو

      2. ما غشوهن بي ولاد الحور !!
        سمعت حقت المره الجابو ليها خبر ولدا الاستشهد في الجنوب ؟ جن اخوات
        نسيبة يزغردن وداخلات عليها بالخبر قالن ليها ولدك مع بنات الحور
        اتغازت وقالت ليهن انتن ما تمشن وحات الله قالوا ولاد الحور في الجنة
        عندهم ؟؟؟؟؟؟ قدر ده ( واشارت بساعدها مع مسك الكوع بالكف الاخري )

      3. يا حول الله يا جنوبى,, دى قوية شديييد خلاس, و الام المسكينة دى اكييد موجوعة بالحيل على ولدها

      4. آآآآي والله انا زاتي بعد كتبتها لقيتا كبيرة .. لمن خجلت !!

      5. ترااااااااااااااااااااح

  16. انت يا المندهش دحين ام تكشو دا قانون ولا ملاح !!؟ آآآآآآآح

    1. بريّ يا ده أسأل منو بت وراق

      1. وهى زااااتا بت وراق وينا؟؟ اوع تكون عرفت انو الخط قربوا يلاقوهو و قررت تسيب القمردينة و تشوف ليها حاجة تانية !!

      2. المندهش….
        ههههههههههههههههههههههه,,بس اوعا انت تكون حارى الشئ القالت عليهو المرا الجاب سيرتها جنوبى !!؟ وى وى وى ..
        فلاديمير…
        ياربى !!؟ غايتو فى موضوع بتاع (شنط وعرس) فى منتدى نخبة السودان,لا تكون مشت عليهم ! وى وى وى

  17. برنجية ولا فخر
    معليش يا جماعة —- بايتة معاي………ههههاااااااااااااااااااااااااااااااااااااااااااي

    1. منو البايتة معاك ؟ كاك !!

      1. انت مالك انشاء الله بايتة معاي كونداليزا رايس في امبدة كمان

      2. مبرووووكة عليك كوندليزا والبرنجيييييية

      3. بالمناسبة قالوا اصلا هى من امبدة كرور, و اسمها الاصلى (قونقليزة بت الريس) و ابوها كان عندو كارو ابو برميلين لتوزيع الموية و فى المساء بيشغلو (تكسى الغرام), و لكن لمن جاها اللوترى و مشت امريكا غيرت اسمها

      4. واااااااااااااااااااااااى…
        انتو مالكم بقيتو كدة ! ويكأن القطر قام بيكم انتو !

  18. بلدوزر البحر الاحمر وفتيات علي طريقة قوة الدفع الرباعي-
    الكاتب : محمود سيدي
    الموقع: الركوبة
    اخر فرصة للاطلاع اليوم
    اقرا وتعال قابلني باللفة

  19. الا الشوارع للبنات متحينة ترسل تراتيل الخروج في يوم وتقطع سرتن
    الارض تعريف الهديل
    هدل الحمام بشري شوق السلام انسان

  20. هلا كل الاحباب شايف الجميع خارج المواضيع وناسين امنا الحكومة او قل امنا الغولة الناس محتاجة منكم تحريض مش تهريج والا انتو ساكنين قصادنا في كافوري وكده كل هبشة وهبرة في امنا الغولة بتصحي ليها محمد تمن زولين او اخو فاطمة السمحة والا نسيتو حبوباتكم اكان كدي الرماد كالكم واصحى يا بريش

    1. الغلبان .. سلام .. لاكين نحنا ما طلعنا أي كلام !!
      انا غايتو اقتنعت انو الشغلة دي إلا انقلاب ومقتنع تماما انو
      الجيش ما فضل فيهو راجل وبمناسبة اصحي يا بريش دي الله يرحم رمضان
      حسن وبمناسبة حسن دي حسن الزبير قال ان شاء الله القيامة تقوم !!
      الناس ديل شكيانهم لي الله والله مخيّر في عبادو يأتي الملك من يشاء
      وينزع الملك ممن يشاء بس نحنا نتشهد ونقعد وطالما جات سيرة الشهادة
      هو بدون شهادات حكمنا 23 سنة !!!

  21. إنت يا أخ الفاتح جبرا زعلان ليه على بيع خط هيثرو  دا ليه ما خط وباعوه وأحل الله البيع وحرم الربا

    Dr. Ammar Mhagoub Mohammed Zaki

    ________________________________

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: