حردان !

بسم الله الرحمن الرحيم

وزارة الخدمة المدنية
تعميم رقم (0) لعام 2012م
إسم التعميم : إجازة حردان

حسب نص المادة المادة 34/2 من لائحة الاجازات التي تنص على أن ( تقوم وزارة الخدمة المدنية بوضع الضوابط والإجراءات التي تكفل حسن تنظيم منح الأجازات ) فقد تقرر ضم هذه الإجازة والتي تسمى (إجازة حردان) للعمل بها في إدارات شؤون الموظفين في الأجهزة الحكومية والمؤسسات العامة إعتباراً من تاريخه :
أ‌- يستحق المسئول أجازة (حردان) مدفوعة الأجر تحسب مدتها (حسب نوع الحردة) على أن لا تتجاوز ستة وثلاثون (36) يوماً عن كل سنة من سنوات خدمته ، ويجوز صرف راتبها مقدماً اذا كانت مدة (الحردة طويلة) وتتجاوز الشهر ويرخص له بهذه الإجازة سنوياً سواءً لفترة واحدة أو على فترات على الا تقل فترة (الحردان) في كل مرة عن عن خمسة أيام ولا يجوز تمديد (فترة الحردان) أكثر من مرة واحدة ، ولا يؤجل التمتع بها اكثر من ثلاث سنوات ، وعلى المسئول التمتع (بحردانه السنوي) بمالا يقل عن( 36) يوماً خلال ثلاث سنوات وعلى (مجلس الوزراء) التنسيق لإتاحة الفرصة للمسئولين جميعهم التمتع بأجازات (الحردان) السنوية من خلال وضع برنامج سنوي لذلك يتمشى مع مصلحة العمل
ب‌- لا يشترط على المسئول إخطار الجهات المسئولة عنه بإنو (حردان وماشى بيتهم) حتى تتمكن الجهات المسئولة تعيين من يقوم بعمله خلال فترة (الحردان) لأنو أساسا هو (الكل في الكل) ولا يمكن لأحد أن يقوم بما يقوم به .
ت‌- يمكن للمسئول أن يضم (إجازة الحردان) إلى إجازته السنوية إلى إجازة الحج إلى إجازة العمرة إلى إجازته المرضية إلى بقية الأعياد والعطلات الرسمية (ده لو السنة بتكفي طبعن) !
ث‌- لا يساءل المسئول عن أسباب حردته حتى تنقضى ويعود إلى مباشرة عمله
ج‌- من حق المسئول (الحردان) الإمتناع عن الإطلاع على أى معاملة أثناء فترة حردانه ويمكن قفل الوزارة أو المنشأة التي هو على رأسها بالطبلة والمفتاح لحين عودته بالسلامة .
ح‌- إذا لم تفك (حردة المسئول) خلال شهر فعلي (جهاز المسئولين الحردانين بالداخل) مخاطبة (جهاز المسئولين الحردانين بالخارج) من أجل تسفيره لقضاء بقية إجازة (الحردان) في ماليزيا أو ما شابه (إحتمال الحردة تفك) !
خ‌- إذا فكت حردة المسئول وعاد لمباشرة عمله يسمح للعاملين بالمنشأة أو الوزارة التي يعمل بها بنشر إعلانات التهاني بعودته ويجوز لهم في هذه الحالة القيام بوضع صورتين للمسئول .. صورة إثناء (الحردة) وهو زهجان ومقطب الجبين وصورة بعد الحردة وهو يبتسم إبتسامته المعهودة على أن يكون متن التهنئة كالآتي :
العاملون بالوزارة الفلتكانية يهنئون الوزير (الحردان) (فلان) بإنتهاء (حردته) التى تعرض لها مؤخراً وعودته سالماً لمباشرة عمله الذي لم يتأثر أبداً بغيابه !

كسرة:
أقترح بأن يصرف للمسئول (الما قاعد يحرد) بدل (حردان) بواقع مرتب شهر عن كل سنة .. أصلها بايظة بايظة !!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟

Advertisements

47 تعليق

    1. مُفتّح انت .. شايفك اتعظت من برنجية امبارح !!
      الناس تشيل وتبارك للتالت …

      1. ههههههههههههههههههههههه,,ما كدة يا جنوبى,,
        زولك دا حرد البرنجية وكدة !
        بعدين امس د/محمد حسن امتنع عن تعاطيها ! وى

      2. تعرف يا شمباتي امبارح في محل بتاع منتوجات سودانية
        صاحب المحل قال لي عندنا برنجي قت ليهو الله يجبر خاطرك
        ومرقت كحلت ليهو لقيتو بعاين لي ساااكت ..

      3. ياربي بعاين ليك يكون عاوز شنوووووو ؟؟؟!!

      4. هههههههههههههههه,,وما مدى تكحيلته ؟؟امممممممم…
        بعدين انت اي المندهش ما تحكها كدة ! الراجل بنعرفو برضك,,, وى وى وى

      5. المندهش & شمباتي .. يكحّل ليكم الكحلاوي ان شاء الله
        ويقالدكم ويسوقكم معاه ….

  1. مشترك معاك

    1. انت ح تستعبط ؟؟

      1. ما قال مشترك … وانا الشريك المخالف .

      2. خلف خلاف …
        هههههههههههههههه

  2. مفترض ذاتو المسئول يكون حليييييم مش بي اقل سبب يقعد
    يتعافن ويحرد كدي !!
    زماااان كان عندنا باشكاتب لمن واحد فينا يقول ليه
    انا بكره ما جاي , يقول ليهو حا نقفلا يعني ما شغالة
    من زمن الانجليز ومن قبل ابوك ما يعرف امك ( يعرف !)
    زي الباشكاتب ده نحنا محتاجين ليه يكون باشكاتب
    الحردانين ديل ..

    1. طيب كده يا جنوبي الحردة ما حتيجب مردودها .. والمسئول حردتو حا تكون فشوش .. ما هو علشان الحردة يكون ليها وزنها لازم المسئولين يحسوا بقيمة الحردان ده .. ويعرفوا انو حردتو ما ساهلة

      1. ابو غسان .. ما عشان نعرف الحردان من البتحري الحرد ..

    2. هههههههههههههههههههههههههه,(يعرفك) شنو اقول ليك !
      طااااااااااااااااااخ

      1. حفاااااااار انت !! اشتغلت نقاش قبل كده ؟

      2. ههههههههههههههههههههه,,حتى الان ّ دى مهنتى الاساسية , وى

  3. معاكم,, و (البدخن براو) بيعشرق

    1. بقيت تستعطفا !! وا شريري آآ ود بوتو ..

  4. مشترك معاكما

  5. ت‌-)- )( يمكن للمسئول أن يضم (إجازة الحردان) إلى إجازته السنوية إلى إجازة الحج إلى إجازة العمرة إلى إجازته المرضية إلى بقية الأعياد والعطلات الرسمية (ده لو السنة بتكفي طبعن) ! نسيت يا بروف تضيف ليها اجازة وضع و اجازة رضاعة و حضانة !!!

    1. فلاديمير ..,, يعني بكلامك ده السنة بدل 365 يوم حتكون 563 يوم والجماعة يكونو عاوزين فرق بدل اجازة
      بت وراق ,,, حردانة ولاشنو ؟؟

      1. حاجة تدهش جدا مش كدة بالله يا المندهش!!! ما تقلق على طول السنة دة ابدا, بكرة بيدوهو لناس الافتاء و الفقه يطلعو ليك: بأنه يجوز تمديد طول السنة لتصبح 563 او اكتر حتى لا تضيع حقوق المسئولين الحردانين…
        بت وراق و بقية المدونين,, صحى حردانين و الا شنو؟؟ ياربى بقيتو مسئولين و نحنا ما عارفين !!!

  6. والله دة افترا على نعمت الله
    هو المسئول ذاتو يحرد لي عربات عندو منها مرحات تقروش لا حد و لا عد بيوت بدل الواحد كمية شي جوة البلد و شي برة و كامنن موت ما بموتو تاني عايزين شنو

    1. العين يا شرقاوي ما بيملاها إلا التراب… بس ما تعمل ليها ي ويبقى التراب حاجة ثانية

  7. السلام عليكم ، البرف و الاخوان ، نحنو لاقين حاجه نحرد منها ، كان الشغل ادونا حريتنا زمااااان و خلونا نقشر بصل ، و كان البيت ما بنقدر نحرد منو ،تمشى وين ؟؟؟ على الط… ما يقبلونا فى القبل التلاته 3D ، و كان الاكل خلانا هو من زمن ، ابراهيم عوض رحمه الله قال ايه : يازمن وقف شويه ، واهو نحنو بنقول : يازمن ارجع شويه ………………… عجبى

    1. يازمن أرجع شوية وخفف الالام شوية … بعدها شيل أي حاجة لو لقيت حاجة تسيلها

  8. يا زووووول ,, انتا شكلك مغبون بالحيل و شايل شديد, صدقنى انتا اكتر واحد فينا المفروض تحرد ,,,, الله يقيويك

  9. الحردة يا جماعة ما ليها فنونها وناسها البيعرفوها .. من أين يؤكل الكتف ،، ما سمعتوا بحردة فلان داك لمن المباني وقعت ،، اهو حردتو جات بفائدة أريتو حال ولدي .. مفروض مجلس الوزراء يقيف على أسباب الحردة ويحلها للمسئول حل جذري يعني ممكن يدوه من أراضي التخصيص المعارفين بتطلع كيف من الأراضي .. أو يحولوه لجهة اللغف فيها أكثر من الأول علشان يرتاح كدة وما يحرد تاني ويوقف مصالحهم ،، وأقترح أنو المسئولين يكون من حقهم إذا انتهى استحقاقهم لإجازة الحردان أن يطلعوا مظاهرة تسمى مظاهرة الحردانين يكون شعارها .. المسئولين حاسدين الحردانين .. بس يا جبرة نسيت حاجة مهمة ألا وهي درجة المسئول الوظيفية لاستحقاق إجازة الحردان لانو لو خليت العملية غير محددة كده ممكن الغفير أو الحارس يحرد ويفقل المصلحة والموظفين يرجعوا بيوتهم ويقولوا الغفير فى إجازة حردان وكده … لازم تضيف البند ده … وتراعي فروق الوقت

  10. الدكتاتور المتسلط دائما لديه فكره انو لو حرد و رجع البيت الدنيا من وراءه ح تخرب و الشعب ح يتشرد و يطالب برجوعه, لانه يمتلك عبقريه لا مثيل لها …ولكن هولاء الحردانين اصبحوا عصابه من الموظفين , البلد من غيرهم ستكون افضل و انظف
    -الحردان حق مشروع للفئات العليا من موظفين (الموتمر الوثني) ما تكون من ناس (موتمر قريعتي راحت) و تحرد زول بشتغل بيك مافي… و بناء عليه انتم ايها الضعفاء عليكم بممارسه الحردان علي ام العيال و دا اخر امتيازاتكم في امازونيا …

  11. كان بقت علي المتعافن اريتو بي حرد الجقر … زعل من امو رقد في الشمس جات الحدية خطفتو … وعجبك يا كوكو .

  12. أستاذنا الفاتح جبرا و الإخوة التحية ,
    و يبقى أن حقيقة (الخدمة المدنية ) تحتاج الرجال الحق و النساء فيها إخوة الرجال ؛
    فهل يعرف منا أحد ذكر أكان أم أنثى معنى أن تكون في الكلمة و الموقف (رجل) ؟!!
    ما أفسد علينا الثقة في قيادات الخدمة المدنية و الإدارة و الساسة
    و ما أضاع البلد
    إلا تخبطهم ـ هم ـ في القرارات علينا و الحال ـ حالهم ـ ما بين عبط و فزع و (دلع) !!
    فقط أين الرجال ؟!!!
    .. عارف يا بروف في التاريخ (أسماء في الذاكرة) خـلُدت فينا رغم قسوتها على شعوبها إلا أنها كانت تحفظ في قسوة قراراتها و إداراتها أمن شعوبها ؛ .. لأنهم كانو و كنّ (رجالا) في مواقفهم و كلمتهم.

    1. و الحمد لله مازال في السودان رغم (حُردَة الأشباه) الرجال 🙂

      1. و أستأذن البروف رسالة التحية لرجال السودان (قوات الشعب المسلحة) أعزهم الله و أيّدهم بحفظه و نصره

  13. البروف والاحباب..
    سلام…
    علا انتو الحرد منو !!!؟

  14. سلام ياقبيلة،،،
    إنت يا بروف جبرا ما عندك ناس كتار حردانيين في القمردينة دي، ولا إمكن ديل حردهم ما مهم!!!!
    نحن غايتو بهمونا كتيير و بنزعل شدييد لمن نلقي زول حردان من ناسنا المعانا هنا ديل وأعني بهم شيخ الحردانين سديقي أسد الخلا الورو أبكرونا، وسديقي نجم القمردينة سهيلا، وشيخ القمردينة دكتور صالح وعمدة القمردينة بقوفتش الدكتور عزت، وكذلك من حرائر القمردينة الأولي الحردانات ناس سماسم والغبشة وسالي ونونو، وحرائر القمردينة التالية ناس بت مصطفي نورا وبت وراق وبت النيل وبت السودان وبت بتي وهلمجرا…..
    وياليالي جفوني سمارك ووحشتني أغاني مزمارك…. لما كنا نغني أشعارك والعواطف تصطلي بنارك

    1. والله يا ودالخلا كلامك صاح نحنا زمان بنقرأ من بعيد
      لي بعيد وكانو في ناس رايعين خلاص هسع مختفين !

    2. ود الخلا …. سلامين
      تلك كانت ايام الزمن الجميل …. لما كنا بنجي نتاوق لناس القمردينة وهم في قمة التألق … المشكلة أنا زاتي سألت جنس سؤالك ده لكن البروف ما هببو لينا !! فلنبحث عنهم نحن

      1. سلام ياقبيلة،،،
        اوافقك سديقي المندهش في إرسال هذه الرسالة ولكنني موقن تماما” إنها ستكون مثل رسالة ناسا (NASA) التي أرسلتها للفضاء الخارجي بكل لغات الدنيا حديثها وقديمها علها تصادف كائنات أو مخلوقات تستطيع الرد عليها ، وها هم ما زالو منتظرين ونحن معاهم منتظرين ونغني كمان
        كل ما سألت عليك … صدوني حراسك
        وردواالجواب كافي … مع أني من ناسك
        وليس من ناسا…. هههههه

    1. حردان التكريتي….………………وبث

    1. هاك القهوة التقيلة دي شان تفك ..
      الدكاترة في السودان بقو اكتر من الركشات وبقينا
      عندنا فائض دكاترة !!!
      مش باعوضنا طلع عندو تعقيم زاتي وبيعقم إبرتو قبل
      ما يعضينا !! ما شفت حالات الملاريا انخفضت كيف ؟
      حكيم سيد الإبرة دواااي ماااااا خبره ..أوووو أووو

  15. البروف والحبان الكرام
    دحين المسئول الحردان دا بحرد بعرباتو وبيوت الحاكومة .. ولا حتى ديل بحردن وبمشي بقعد في المنشية ولا كافوري ولا بالكتير قول ماليزيا … ويجو ناس المصلحة الحردان الشغل فيها شايلين دلوكتهم ويغنو ليهو: أحردوا إنتو يا الحلوين .. نجيكم نحنا بالأعذار … والمتربصين أعداء المشروع الحضاري يغنو بالجهة التانية: الحردان كلمو … يقع الخزان * .. كلمو .. الخزان لو بعيد .. عربة توسان في الطريق** ..!!
    توضيح لابد منه :
    *: الخزان المقصود هو سد الرد .. سد مروي
    **: الطريق المشار إليه في الأغنية هو طريق التحدي الكمل الشعب الفضل
    غايتو شذاذ الآفاق ديل عليهم جنس حسادة !!!!

  16. يا اخوانا الليلة الحاصل شنو —- البوست نزل ناقص ومعلق حالف ما ينزل
    كسرة:
    يكون حردان ولا شنو
    كسرة تانية:
    ودر لينا البرنجية من الصباح

    1. عجبنى ليك !!

  17. الدكتاتور المتسلط دائما لديه فكره انو لو حرد و رجع البيت الدنيا من وراءه ح تخرب و الشعب ح يتشرد و يطالب برجوعه, لانه يمتلك عبقريه لا مثيل لها …ولكن هولاء الحردانين اصبحوا عصابه من الموظفين , البلد من غيرهم ستكون افضل و انظف
    -الحردان حق مشروع للفئات العليا من موظفين (الموتمر الوثني) ما تكون من ناس (موتمر قريعتي راحت) و تحرد زول بشتغل بيك مافي… و بناء عليه انتم ايها الضعفاء عليكم بممارسه الحردان علي ام العيال و دا اخر امتيازاتكم في امازونيا …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: