الماد 38

أخي المواطن .. أختي المواطنة .. (خاصة المغتربين) .. إن كنت تمتلك منزلاً ، مزرعة أو (قطعة واطة) ولم تستخرج لها شهادة بحث (منذ خمس سنوات) يؤسفنى ويحزننى إني أقول ليك إحتمال كبير تمشي وتلاقي حاجتك دى بإسم زول تاني !!
طبعن ح تقول ليا : يعني شنو ؟ ما المسألة تزوير وح أفتح بلاغ وأعمل قضية وأثبت للمحكمة بأني لا قمتا بعمل بيع ولا عملتا لي زول توكيل عشان يبيع !
ح أقول ليك أيه رأيك .. تعمل ده كووولو وتمشي البوليس وتفتح بلاغ ويقبضو (العصابة) العملت كده وفي النهاية (القانون) يقول ليك : الناس ديل زوروا أوراق بيتك ده قبل خمسة سنين والمادة 38 بتقول أي جريمة يفوت عليها خمسة سنوات بتسقط بالتقادم .. يلا ورينا عرض أكتافك !

العبدلله ما قطع ليكم الحكاية دي من راسو .. فهي قد حدثت (وبالمستندات) مع المواطن (محمد ) الذي عاش نصف حياته متغرباً من أجل توفير حياة كريمة لأسرته
• في 2002م وفي إجازة له بالبلاد قام المواطن (محمد) بشراء قطعة أرض سكنية فى أحد أحياء الخرطوم وتم تسجيلها بإسمه .
• في العام 2009 م عاد المواطن (محمد) للإستقرار بوطنه وأجري بعض الإتصالات للإستفسار عن أسعار الأراضي في المنطقة (عشان يشوف قطعتو عملت كم؟) إلا أنه فوجئ بأحد سماسرة الأراضى يخبره بأن (القطعة) قد قام ببيعها في العام 2002م تاجر اراضى يدعى (عباس) .
• بعد التحريات إتضح بأن تاجر الأراضي (عباس) قد قام باستخراج توكيل مزور بإسم المواطن (محمد) صاحب القطعة وهو خارج السودان ، وبموجب هذا التوكيل (المزور) قام ببيع الارض لشخص يدعى (هـاشم) والذي لم يقم بتحويل سجل القطعة بإسمه بل تركة بإسم صاحبها المواطن (محمد) لمدة خمس سنوات .
• في العام 2007م أراد (هـاشم) أن يبيع القطعة الى مشترٍ جديد الا ان الأمر كان يتطلب منه أن يسجل القطعة فى اسمه ثم يبيعها ولكن التسجيل بدوره كان يتطلب منه أن يستخرج توكيل جديد لان التوكيل الذى معه مرت عليه خمس سنوات و بالتالى فقد صلاحيته أو أن يقوم بتجديد التوكيل القديم حتى يكون صالحاً للإستخدام فى عملية التسجيل.
• رجع (هـاشم) الى من باع له الأرض وهو تاجر الأراضي (عباس) وطلب منه توكيل جديد بإسم (محمد) أو تجديد التوكيل القديم فقام (عباس) بتجديد التوكيل عند نفس المحامى (ف. ج) وهو ذات المحامي الذى وثق له هذا التوكيل المزور سنة 2002 .
• قام (هـاشم ) باستخدام هذا التوكيل المجدد فى تحويل القطعة الى اسمه و من ثم تسنى له بيعها الى المشترى الجديد.
• عندما تحرت نيابة مخالفات الأراضى فى الآمر امرت باعتقال المتهمين ووجهت لهم تهم تحت المواد 123/178/21 التزوير و الإحتيال و الإشتراك فى ارتكاب الجريمة.قامت النيابة باخلاء سبيل المتهمين بضمانات شخصية .
• عندها قام المتهمون باستئناف التهم التى وجهتها لهم نيابة مخالفات الأراضى مطالبين بشطب الدعوى تحت المادة 38 من قانون الإجراءات الجنائية المتعلق بالتقادم إلا أن إستئنافهم رفض لأن الكل اجمع ان المادة 38 “التقادم المسقط للدعوى الجنائية ” لا تنطبق على هذه الحالة لأن الجريمة لا تعتبر قد وقعت عند تحرير مستند مزور ولكن عند استخدام التوكيل المزور لاحداث اثر قانونى – و بالنسبة للشاكي فان الأثر القانونى قد حصل سنة 2007 و بالتالى لم تمر عليه فترة الخمس سنين المشترطة لاستغلال مادة التقادم.
• بعد اكثر من سنتين و نصف من تاريخ فتح البلاغ تم نظر القضية حيث قام محامي المتهمين بتقديم طلب لشطب الدعوى بإعمال المادة 38 (التقادم المسقط للدعوى الجنائية) –( أي مرور أكثر من خمسة سنوات على الجريمة) وبالفعل قام القاضي بشطب الدعوى .
• لم ييأس المواطن (محمد) وقام بإستئناف الحكم الى محكمة استئناف الخرطوم والتى اصدرت
• قراراً يقضي بالغاء قرار محكمة الدرجة الأولى و إعادة الأوراق اليها للإستمرار فى المحاكمة .
• ولكن قام المتهمون بالإستئناف للمحكمة العليا والتي جاء قرارها بنقض حكم محكمة الإستئناف وسريان قرار محكمة الموضوع القاضى بشطب الدعوى إذ سببت المحكمة العليا قرارها بأن (التقادم يسرى من لحظة وقوع الجريمة و ليس من تاريخ العلم بها) !

كسرة :
ده معناتو أي (حرامي) يطلع ليهو توكيل مزور (بتاريخ رجعي) قبل خمسة سنين إلا يوم (لحظة وقوع الجريمة) ويمشي بكره يبيع (بيتك) لى زول والزول يسجلو بإسمو(وبيتك يروح) ويطلع هو زى الشعرة من العجين مستخدماً هذه المادة (العجيبة) وللا ما كده يا أخواننا القانونيين ؟ كان غلتانين قولو لينا غلتانين عشان ما قرينا قانون وكده !

كسرة تاااني:
العبدلله يعتقد بأن الجهات التشريعية يجب وبسرعة أن تستثني في هذه المادة الجرائم المتعلقة بالتملك الجنائي عموماً و(الأراضي) على وجه الخصوص إذ أنها تتنافي تماما ومقاصد الشريعة الإسلامية في صون وحماية الأموال والممتلكات الخاصة ، غايتو أي زول ما طلع ليهو شهادة بحث قريب أحسن يطلعا عشان يشوف بيتو بقى بتاع منو؟ (والكلام ليكم يا مغتربين)… !!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟ – أوعا تكون المادة 38 ؟

Advertisements

77 تعليق

  1. انا خالك يا شمباتي

      1. يباركو ليك السمح ان شاء الله … ما كلمت اخوانك يجو يباركو ؟؟؟؟

    1. مبروك عليك ود أختك

      1. الله يبارك فيك يا المندهش ياخي … وانت عملت شنو مع فلاديمير ؟؟؟ احضرنا يا جنوبي .

      2. اولا بالتبادى يا ود مدنى ابندور نباركا ليكا, و تانيا شكرا للسؤال, و تالتا الجرى وراء المعايش ما ادانا فرقة نداقش فيها معاكم,, و بالهنا ان شاء الله

    2. بركة ليكم بركة ليكم ..لو اتأخرت دقيقتين بس كان
      طارق عدما العافية ..
      مالا هجمتك كده ؟

    3. هههههههههههههههه,,مبروووكة يا خال ,,,
      عقبال الاكبر منها ! كع

    1. مي يا اللتي

      1. خت الخمسه فوق الاتنين ..))

  2. يظل القانون مواد بليدة متحجرة لا تحمى المغفلين – طيب تحمي منو ؟؟؟ المفتحين ديك ما محتاجين القانون يحميهم … نحنا المحتاجين للحماية .
    والاغرب من كده يقول الجهل بالقانون لا يعفي من العمل به او ما شابه ذلك من العبارات … وي

    1. تعرف يا خالد اكتر عبارة محيراني ياها القانون لا يحمي
      المغفلين والجهل بالقانون لا يعفي دي !!
      صحي هو القانون ده مش اتعمل عشان يعاقب الناس
      البتستغل المغفلين ؟ يمكن تكون منطقية شوية لو استعملت
      ضد الفاعل لاكين المفعول به زاتو ما معفي ولا محمي !!
      طيب لو كده اليدرسونا ليهو من الروضة ..

  3. … ويظهر ذلك واضحا لما تدق ليك حرامي وتكتفوا وتودي التمنه – انا جدك يا شمباتي – فهناك احتمال وارد ان توضع انت وحراميك في زنزانة واااااحده .
    ويقول ليك الناس ما تاخد القانون بيدها … والله واحد يخوزقني في بيتي الا اخد القانون بي سيف وسكين وجبه وصديري ذاتو … كلب .

    1. ههههههههههههههههههههه,,ونادينى انا اجى آخد معاك ,,
      قال ما ياخد قال,, طراااااااااااااااااخ

  4. البروف والسمار .
    صباحاتكم ندية .
    البلد دى لو ما إستغليت الثغرات بتاعه القانون دى وإستهبلت وإتحرمت فيها ما بتعيش عشان كدة المغتربين بكونوا أكتر ناس داقسين لأنهم عايشين على سماحة وطيبة السودانيين القديمة وهذة الخصال البائدة بقت ما بتوكل عيش حاف …
    الله فى …

  5. المشكله الكبيره انو الناس فقدت الاحساس بقدسية القانون كمرجع نهائي لحل الالفات واحقاق الحق … وبذلك يكون السناريو كالتاي : يجي مستثمر شايل راس مالو وافكارو واحلامو ببناء مستقبل جيد واستثمار مالو وخبراتو في مشروع عمل ليهو دراسات جدوي ما تخرش الميه … يمشي لي ناس الاستثمار ياكلو نص قروشو ويدوهو ليك واطه في ام صفقا طوال … يقوم يسوق معاهو نفر نفرين من ناسو ويغشو تيم المساحين ويسوقوهم يفطروهم اولا بالتبادي يقولو كدي علي ام صفقا طوال … اها من طرف الحلة يشوفهم شافع شليق ويجري قدام الدبل كبين ويدقش ديوان اب شنبا جناح صقر ويقول ليهم بوكس الحكومه جاكم ولحس واطاتكم وعينك ما تشوف الا الدم … حصل هذا السياريو مرتين على حسب علمي المتواضع ىجدا …. اول مره مات المستثمر وقبل يومين تلاته مات رجل شرطه واصيب العشرات … وما تنسو انو الكتل المستثمر علي الكتل رجل الشرطة كذلك في عداد الاموات ولو بعد حين .

    1. قمت ببحث سريع عن ما نشر في الصحف حول حادث الاراضي المذكور اعلاه فل فلقيت الخبر ده … سنة سجن ومية جلده لجريمة زي دي ولو قبضوك متلبس بشراب الشيشة في سوق الله اكبر 80 جلده ةغرامه 100 جنيه … طيب بدل اشيش واخسر قروش ما امشي اغتصب ؟؟؟ اوعك تجي السودان ده يا شمباتي .
      الخبر : اصدرت محكمة جنايات دار السلام العامة برئاسة مولانا سليمان أمس عقوبة السجن لمدة عام والجلد 35 جلدة ودفع تعويض للشاكية يقدر بملبغ 200 جنيه في مواجهة متهمين بنهب بائعة شاي بسوق قندهار، وقضت عليهما بالسجن عاماً والجلد 100 جلدة حداً بتهمة الاغتصاب ومخالفتهما نص المواد 115 / 149 من القانون الجنائي النهب والاغتصاب، وتعود الواقعة إلى إبلاغ الشاكية الشرطة باعتراض (8) أشخاص طريق عودتها لمنزلها بعد انتهاء فترة عملها بسوق قندهار ليلاً مع شقيقتها فبعد تهديدهما بالسواطير وأخذ موبايل صيني منها يقدر بمبلغ 200 جنيه، تم الإمساك والذهاب بها إلى خرابة ثم قيام (6) من المتهمين باغتصابها، حيث تم القبض على اثنين وفر باقي المتهمين الذين فصل الاتهام في مواجهتهم، وخلال المحاكمة أقر المتهمان بذنبهما وأكد المتهم الأول خلال استجوابه بأخذ تلفون الشاكية وبيعه وعدم اغتضابها، فيما أقر المتهم الثاني بواقعة اغتصاب الشاكية مع باقي المتهمين الهاربين، فكانت الإجراءات.

  6. رئيسنا المفدى قال .:(( نحنا ركبنا لى أى زول ماسورة ))….
    مخير الله علينا ..

    1. وين ؟؟؟؟ قال الكلام ده وين ؟

      1. يعني هي محتاجه للقول !!
        يعني ما حاسي بيها !! مش طلعوا مننا الوزة ؟

      2. الحمدلله انحنا مرقنا قبل موضة المواسير دى !
        لكن انت يا خال(خالد مدنى) الله اعلم انك نجيت منها ! وى وى وى

        جنوبى…
        هييي ما تلاكز !!!

      3. غايتو انت يا جحا ..
        طوااالي بعت خالك !

  7. انتو في حداشر واحد داخلين المدونه دي في هذه اللحظه وما دايرين يقولو بغم … مخلني زي محمود المستقبل اجدع الباص واجري الحقو … من انتم ؟

    1. بقو اتناشر

      1. رجعو بقو حداشر

      2. ياخالد إنت إغتربت عشان تحرس المدونة من برة والله شنو .
        لكن والله القعاد برة ولا مدير فى البلد دة …

      3. صليت وجيت لقيتم بقو ستاشر

      4. ههههههههههههههههه,,الفاقة (بمعنييها) وقلة الشغلة بعملوا اكتر من كدى يا جدو !

      5. كلامو صحى,, اصلو ما نقصو من عشرة

    2. نحنا بتوع الماسوووورة

      1. في ياتو طرف انتو ؟؟؟

      2. نحنا بتوع الدفع الأمامي،،

      3. و ناس الدفع الخلفى منو ياربى؟؟؟ اوعا يكونو ناس هناى ديلاك !!!

  8. الاراضي البقت تتقسم حته حته وبيت بيت ودار دار وجنوب جنوب!! دي خليناها ليهم احسن لي ااجر ساي منهم لله

  9. عندما أراد الصينيون القدامى أن يعيشوا في مأمن من الجحافل البربرية ا ، بنوا سور الصين العظيم و اعتقدوا بأنه لا يوجد من يستطيع تسلقه لشدة علوه ، …

    لكن خلال المئة سنة الأولى من بعد بناء السور ، تعرضت الصين للغزو ثلاث مرات وفي كل مرة لم تكن …الجحافل البربرية في حاجة إلى اختراق السور أو تسلقه ،

    بل كانوا في كل مرة يدفعون للحارس رشوة ثم يزحفون عبر الباب !! ..

    لقد انشغل الصينيون ببناء السور و نسوا
    بناء البشر في تلك الفتره ….
    والاشتري الاراضي ما ينسي الارضه!!

  10. فى واحد فى دنقلا كان مدير التسجيلات اسمو ازهرى باع نص بيوت دنقلا المدينه ومنها بيت الوالد بتوكيل مزور هو يطلع نمر الواطات الطولو اصحابا ما جو والسمسار يبيع والمحامى يطلع التوكيل والله معاك لو دقست فى النهاية عملنا تسوية رجعو لينا واطاتنا وبقينا نطلع شهادة بحث كل خمسه دقائق !!!!

    1. الأخ أفليقا … نورّت القمردينة بعد طول غياب … ولكن ياريت تقدم شهادة بحث من أول وجديد عشان شهادتك الأولى ديك إتلحست

    2. أفليقا .. إر أنداندي ري ؟ أمانه يا افليقا ان
      بلدكي جِلّري دنقلا قون دسن مشكري ..

    3. AFLAIGA الف حمد لله بسلامة العودة,, كنتا حردان و الا شنو؟؟ و الا كنت ساكى ليك شهادة بحث واطاتن اتباعت من وراك !!!

    4. أفليقا .. حال مِندى ؟؟؟؟
      السلاوى

  11. الاخ الفاتح سلاماتهل بالامكان الكتابة عن هذا الموضوع المرفق، لانو بصراحة الجماعة ديل حيرونا فى صلاة الجمعة ،بقيت اهاجر عشان اصلى الجمعه .يمكن اضافته زي كسرة هيثرو الثابتة بس بدل الواو اعملها ن ن نبالمناسبة انا مابابدا يومي لو ماقريت تدوينتك . :كسرةعلى حسب علمى انو بيت السودان بلندن تم انشاؤه منذ بداية الستينات ( وفي رواية اخري منذ الخسينات ) من القرن الماضىعمر عبد العزيز

    Date: Wed, 12 Sep 2012 07:15:50 +0000
    To: omarbinazizoo@hotmail.com

  12. يعني هسع نحنا نعمل شنو ؟ نقدم بلاغ استباقي باعتبار
    ما سيكون ونخلي اسم المتهم فاضي ولآ نمشي لي وداعية
    عشان نعرف اسمو ؟ ولآ نسوي شنو نحنا ؟
    يعني كل يوم في المحاكم في عُشرمية قضية تزوير توكيل
    لبيع ارض طيب ما يلغوا حتة البيع بي توكيل دي
    ويشترطو علي سيد اللحم والجلد يجي بي نفسو ويبيع ولو
    ما بقدر يجي يمشي السفارة في البلد الهو فيها ويوقع
    وناس السفارة يرسلو العقد للخرطوم هي السفارات دي
    مش فيها ملحق ثقافي وملحق عسكري وملحق ضريبي ما فيها
    ملحق قانوني ؟
    هو زاتو نحنا محكومين بي قانون الله ولآ قانون عبد الله ؟
    مش قانون الله بقول جاء الحق وزهق الباطل ! مش بقول
    ردوا الامانات لأهلها ! مش بقول ولا تأكلوا اموالك
    بينكم بالباطل ! يوم واحد سمعتوا آية قالت وإن مرت
    خمسة سنة فلا جناح عليكم ؟
    اولاد كلب مُفشقين بين الله والشيطان ويبولوا فوقنا .

    1. أعصابك يا حبيبنا … كده ما كويس عشان الصحة .. قال مُفشقين قال …
      عندي واحد قريبي إشترى قطعة أرض من واحدة ولما أراد أن يسجل القطعة بإسمو بعد سنة من الشراء إتضح أن القطعة وزعت في العام 1972م (يعني قبل 40 سنة) في خطة إسكانية مجانا وكانت هي من المحظوظات بالحصول عليها…. ولكن عمر السيدة الان 33 سنة !!! شفتو كيف… ورفض ناس الأراضي تسجيلها له لأنها سوف تُولد هذه السيدة بعد سبع سنين من توزيع الأراضي !!!

      1. اتاريك مامندهش من شويه؟؟؟؟؟

      2. سلام ياقبيلة،،،،
        هسي نقول المندهش ولا نقول جنوبي، عاد ما بالغتو عديييييل كده دي!!!!
        دي يشربوها كيفن ويأكلوها من وين؟؟
        يطرشنا ويعمينا جنس ده لا شفناهو في التاريخ و ولا سمعنا بيهو في المستقبل!!
        جنس بووووليغ لاكيييين!!!

      3. المندهش .. تكون شربت قزازة الدواء داك ؟ ههههه
        تعرف البت دي اظنها دي اول عملية ليها والمرة الجاية
        ح تلم بالموضوع من جميع الجوانب !!
        ودالخلا .. تاريخ شنو ومستقبل منو ؟ خليكا في الواااقع
        اصلو الضرر واقع كان ترضي كان تقبل ..

      4. لاكن دهشتك مااا عينة يا المندهش !!!

      5. والله يالمندهش ذكرتني ايام الانتخابات فى فترة الديمقراطيه الاخيره بجو يسجلوا اسم الزول وعمره جوا لجارتنا لقوا بتها سالوها عن اسمه وعمره قالت عمره 40 سنه تاني يوم لقوا امها قالت عمره 45 سنه قالوا ليها ياحجه بتك قالت 40 وانتي 45 قالت ليهم ياادلاد هوووي كل زول عمره براهو

    2. انت ياجنوبي ما تعمل اي حاجه فى زمتك التوكيل الفاوضوا بيهو في نيفاشا دا موش مزور الشعب قال ليهم اصلو وفرطوا في ارضي يعني لو انفصال الجنوب مره عليهو خمسه سنه ودايرين نتوحد تاني بالقانون 38 مافى لينا طريقه ولا شنو

      1. افصلو وفرطوا
        معليش الطشاش

      2. مش كده بالله .. هسع استقبالنا لي قرنق داك استقبال
        زول دايرين نفصلو !!
        الجنوب زاتو سو فينا سوات خطيبة (ود علي) ده خمسة
        سنة ( خطوبة كاذبة)..

  13. البروف والاحباب….
    سلام…
    حقك تحرسو ولا بجيك,,
    حقك تقاوى وتقلعو ,,,
    بس خلاس…

    1. انت ذاتك حق منو
      ههههههههههههههههههههههههههههههههههههههه

      1. هههههههههههههههههههههه,,انا حق فلانة !! وى

  14. من هنا يتضح انه الفساد ما فساد الحكومة براها ، ده فساد الأفراد صار اعتى من فساد المسئولين وكيفما تكونوا يولى عليكم ، هذا من ناحية ، ومن ناحية أخرى حتى مع تطبيق هذا النص الشاذ نتمنى ونرجو ان يكون لنقابة المحامين آلية حاسمة لمعاقبة مثل هذا المحامى عديم الذمة بعيداً عن قانون الإجراءات الجنائية، والا تسقط جريمته الشنعاء هذه بالتقادم، فهى جريمة خيانة شرف مهنة من المفروض أنها أشرف المهن.

    1. أؤيد كلام الأخت ساندى وأضيف أن معايير القبول لمهنة المحاماة بحاجة لمراجعة وأن المحامون الموثقون بحاجة لمراقبة دقيقة تتبعها محاسبة جادة وحاسمة فى حالة ارتكاب مثل هذه التجاوزات التى تعين ضعاف النفوس على الجريمة واكل اموال الناس بالباطل ، وقبل كل هذا وذاك نتمنى بجد مراجعة مثل هذه المواد الموجودة فى قانون الإجراءات الجنائية لسنة 1991

  15. سلام للسمار يا اخوانا انا مغترب كنت خاطب لي واحده وبعد خمس سنين
    اتزوجت واحد تاني يا ربي اكون اهلها استخدمو الماده 38 والحل شنو في دقيسنا انحنا المغتربين

    1. ود علي مرحب حبابك ويا ريت تواصل معانا والدار دارك نيابة عن صاحب الدار … وبعدين بجي السلاوي – ربنل يفك اسره – يسألك عن موقعك وقروبك .
      تعرف المغتربين ديل مفروض يسموهم المستغربين … اي والله واطالب من هنا بحقوق الملكية الفكرية … مستغربين بكل المعاني الفكرية والوجدانية والمكانية … وما ننسى اخوانا المستغربين بالداخل … وديل اخير منهم مستغربي دول المهجر … لانو ديك قاعدين في الحر والعجاجة وبرضو مستغربين من كل شى … كل حاجة وكل زول … انهم ناس الغربة داخل الوطن … مرضي النوستالجيا حفظهم الله وايانا … انهم السودانيين العرفناهم زمان … ملح الارض .
      كسره : زولتك دي عرسوها متين ؟؟؟ خايف اكون انا العوقتك .

      1. حاج سلاوي مالو اوعك يكون هو السمسار

      2. بت وراق .. وبقية صفوة الأخيار كووووولهم … كلو عام وأنتوم بألف خير .. وينعاد عليكم وعلينا وكل
        واطمنك أنا لاسمسار ولا شمشار .. ومن حسن ظنى مشيت أمس اراضى بحرى وطلعت شهادة بحث ( زى التقول كنت حاسس إنو أخونا الفاتح حيكتب فى الموضوع زاتو ) وبعد كدا مشيت على الموقع ولقيت فاضااااااااية وصاغ سليم بس الجيران عملوها مرمى للقمامة .. معليش .. أكان بقت على القمامة بسيطة ..
        عمكم وأخوكم السلاوى ..

      3. انت يا ود علي خطوبتكم دي كانت في نيفاشا ؟
        رجتك كفاااااية يا خوي ما تشيل حس المادة 38 ساي .
        خالد مدني .. يسموهو جهاز شجون المستغربين الهائمين
        بالخارج !!!

      4. يا خالد مدنى .. انا ما مأسور ولا شيتين.. بس كل ما اكتب تعليف يحلف براس ابوهو وبالمادة 38 ما يترسل .. فى النهاية حردت الشغلانة كلها وبطلت اكتب أواعلق ..
        وعشان ما اخيب ظنك عوزين نعرف من اخونا ودعلى موقعه الجغرافى وقروبه عشان نعرف نتواصل معاه اكتر واكتر ..
        ودالمدنى .. اها لقيتنى كيف ؟؟؟؟؟
        وخلونا النشوف آخرتا نو مع اخواننا القانونيين فى المادة دى ( 38 ) .
        حاج احمد السلاوى

      5. كدى يا الارقام !!!!!

  16. قولنا النائب النااااااااااااااااااااااام كرهتونا لعب البلى زاتو

  17. 🙂 ..
    يا بروف و الأحباب القانون العندنا في النهاية قانون من (وضع البشر) ؛
    تشريع ما كان مهما نـُظر فيه و أعيد صياغته أن يشمل جميع الأحوال و الظروف !!
    لأن عقل و فكر البشر قاصر عن إدراك الحقيقة الكاملة في و من و مع كل شأن و أمر .
    و سبحان الله نحن البشر فينا من الغرور و (الحمق) ما يدفعنا لنكابر زاعمين أننا نقدر على سنِّ قوانين تحفظ الحقوق لنا و بيننا من العدم !!!
    و (يُخترقُ) القانون من أهل القانون و العارفين به و بخفاياه و (عُيوبه) ؛
    فيعجزُ (أهل القانون) عن نُصرة الحق به أمام القانون ذاته !!!!
    سبحان الله …
    و يتحدثُون عن (التشريع الربَّانيِّ) و هم منه براء!!
    نعم هذا ليس من دين الله في شيء
    و شرع الله أسمى و أحكم و أعدل و أشمل مما نزعُم و يُزعمُ ـ باطلا ـ أنه من شرعة الإسلام!

    1. و سؤالٌ ظلَّ يُطرحُ من البعض على البعض و في البعض أن : ما شرعُ الله ؟!!
      و يا سُبحان الله ..

      1. و الجهلةُ من عجزهم (يسُبُّون) شرع الله ـ و العياذ بالله ـ
        من كُرههم لمن زعم بجهلهِ أنـَّهُ يُقيمُ الشرعَ و في الله!!!
        و يتطاولُ المخلوقُ ـ أحمقٌ ظالمُ نفسه ـ على الخالق تعالى سُبحانهُ
        من جهله بالشرع و حكمة سماحة الإسلام دين الله !!
        فلا الجلدُ جلدٌ و لا التعزيرُ و الحدُّ ما جاء في الشرع أفسدهُ العقلُ
        قاصرُ من غرور الجهل
        لم يُدرك الحياة معنى
        طريقا خاتمة و بداية لحياة !!

  18. غياب القانون وغلا الاراضي ورطه كبيره وكمان قصه النواطير المخفيه برضو ورطه والعمارات اللي بتقع كانت اكبر دليل لغياب سطوه القانون،، وخط هيثرو ده ود ناس منو وما برضو ضااااع عندما ضااااع القانون

  19. ياجماعة الخير سلامات
    انتو قطعة شنو البتتكلموا عليها نحن عندنا وطن بي حالو ضاع

    1. عفارم عليك يا بت وراق ، و ضار فور فى الطريق ، و الما عاجبه يركب نص الماسوره ……………. عجبى

  20. الليلة ما شاء الله المعلقين فى المدونة وصلوا لاعداد قياسية,, اللهم زد و بارك,, و الظاهر الناس دى كلها يا مقروصة من حتة الاراضى و التواكيل دى ,, و بصراحة كدة خوفتونا انجى نعمل شهادة بحث اللى اخر مرة عملت ليو شهادة بحث كانت قبل 4 سنوات,, يعنى لسة باقى سنة قبل ما يقولوا لى اقلب وشك و ورينا عرض اكتافك..

  21. برنجية الجمعة ولا نامت اعين ناس جنوبي
    ويا بت وراق ما قلتي الشغلانة قربت — ربنا يحلك بالسلامة

    1. كتلوك و لا جوك جوك ، برنجية الجمعه حردانه ، البرف ما قادر يظبط راسو ……………… عجبى

  22. الظاهر المشرعيين لقانون التقادم هم من كبار المزوريين يجب اعادة النظر في هذا القانون من قبل الجهات التشريعية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: