بعض النصائح وكده

عزيزي القارئ هذه بعض النصائح التى أخترتها لك من كتاب بعنوان 100 نصيحة من أجل أن تعيش حياة أفضل
• تقبل أخطاءك :
كلنا بشر اكيد قاعدين نغلط .. تقبل خطأك بإدخال إبنك كلية طب بأحدي الجامعات الخاصة (السنة بالشئ الفلاني) وأهو هسه أتخرج وقاعد ليك عاطل في البيت .. كان أحسن توديهو (المنطقة) كان وفرتا قروشك والواد إتعلم ليهو صنعة .. تقبل خطأك يا عم .
• اكتسب عادة جديدة :
كالإبتسام في وجه متحصل رسوم النفايات !
• تعرف على اصدقاء جدد :
• طبعن يحبذ أن يكون من ضمنهم (ست الشاي) وبتاع البقالة وسيد اللبن والخدرجي !
• إبتدي حمية غذائية جديدة :
غير نظام اكلك … قلل من اللحوم الحمراء والبيضاء والطماطم والفواكه (يا مفتري) وكمان الفول الصحنو بقى بخمسة جنيه .. أكل (في خاطرك وبس) .
• استيقظ كل يوم وقول لى روحك بانو اليوم ده ح يكون يوم جميل :
ده طبعاً قبل ما تفتح محفظتك علشان تشوف فيها كم جنيه ح تستقبل بيهو اليوم ؟
• أتعلم انك تخاطر :
غلشان تطلع من حالة الفلس المزمن دي أمشي خد ليك مرابحة من بنك و ح تتأكد بعدين (في السجن طبعن) إنو دي أكبر مخاطرة عملتها في حياتك .
• إتعلم لغة جديدة :
تجربة رائعة انك تتعلم لغة جديدة .. ألعبدلله ينصحك بتعلم اللغة (الحبشية) علشان مش ممكن تكون قاعد في بلد ومش عارف لغة غالبية سكانها .
• اصحي بدري بطل سهر :
نوم من بدري وبطل تساهر وإنتا بتفكر تتخارج من مصاريف يوم بكرة كيف .. السهر مضر بالصحة ولا تنسى أن الصحة على مسئولية صاحبها في البلد دى
• خليك دايماً مركز :
ركز .. ركز .. ركز لأنو لو تركيزك ضعيف الكمساري ح ينوم بالباقي .. وبتاع طلمبة البنزين ح يأكلك في كم لتر .. وح تنسى إنو الليلة عازم ليك ضيوف والبيت ما فيهو نفاخ
النار !
• بطل تأذي نفسك :
مفيش لزوم تتفرج على (محطاتنا التلفزيونية) علشان ح تصاب بالبلاهة أو ممثلينا (القاعدين يمثلو) .. أو لعيبتا القاعدين (يبرطعو) أو مذيعاتنا القاعدات (يتحننو) أو مسئولينا القاعدين (يصرحو) والأخيرة دى مفروض يعملوا ليها (أورنيك ) !
• جرب حاجة جديدة :
مش معقول من يوم خمسة في الشهر وإنتا تطلب (سلفة) من أصحابك ومعارفك عشان تمشي الأمور .. جرب حاجه جديده .. شيل ليك روشته و أقيف ليك في إشارة (مثلاً) !
• بطل تبدد طاقتك :
الموت بقى كتير وكذلك المرض .. وأساساً (الفول ما خلى ليك طاقة) فأنصحك إنك توفر شويتين الطاقة العندك وتحتفظ برسالتين في موبايلك .. رسالة عزاء .. ورسالة كفارة ولا تنسي أن ترسلهما رسالة (جماعية) علشان (توفير طاقة الجيب وكده) !!
• اتعلم انك تتجاهل :
حتي لا يرنفع ضغطك وتضيع في شربه مويه ويفقد أبناءك (الحاوي الوحيد) لديهم تجاهل كل ما يعكنن مزاجك كعدم إقتصاد الإقتصاديين في تصريحاتهم عن الإقتصاد !
• أتعلم انك تشكر الاخر :
العرفان والشكر … مهم جدا في حياتنا .. لابد أن تشكر مثلاً (شركة الكهرباء) على إنقطاع التيار لأنها وفرت ليك شوية قروش وكده !
• نمي مهارات مختلفة لديك :
لا تتوقف عن التعلم .. اتعلم ..كل يوم شيئاً جديداً .. كالدخول عبر نافذة الحافلة عند الزحام !!
• اقطع علاقتك بشخص ما :
في بعض الاحيان تشعر ان انسب حل انك تقطع علاقتك بشخص ما لأنه يسبب لك إزعاجاً في حياتك .. .. أقطع علاقتك (بالجزار) وقارن بين (صحتك والأولاد) قبل قرار المقاطعة وبعده .
• تعلم لعب رياضية :
أقترح عليك تعلم (رفع الأثقال) فبعد أن قررت السلطات عدم دخول الأمجاد إلى داخل مطار الخرطوم وترك المسافرين وأمتعتهم بعيداً فى الشارع العام سوف تفيدك هذه الرياضة فيما إذا قررت السفر أو كنت مرافقاً لمسافر .
• توقف عن التذمر والشكوى :
تتذمر ليه من أساسو؟ ما المواصلات فاضية والرغيف كبير وكل شوية يقولو لينا فكوا الحزام ..فكوا الحزام – على قول (عادل إمام)
• إبتدي هواية مختلفة :
إبتكر ليك هواية مختلفة في حياتك .. تخرج بيها من تفكيرك في مشاكلك .. (مثلاً) قم بعد العربات التى تمر أمام منزلك وللا أقول ليك .. قم بعد الملفات التى تدخل إلى مكتب النائب العام !
• تأمل يوميا :
ما تقول ليا ما عندي وكت عشان أتأمل فيهو .. التأمل بيقوي يبعث على الأمان ويقوي السكينة بداخلك .. تأمل كيف أن الله لطيف بعباده .. ماهيتك جنيه والإيجار جنيه وأهو إنتا وأولادك عايشين !
• ابتسم عشر مرات (قبل الاكل) :
لا أنصحك بتنفيذ هذه النصيحة عند تناول الغداء في بيوت (البكيات) لأنك بعد الإبتسامة العاشرة سوف تجد (صحن اللحمة) فاضي !

كسرة :
النصيحة الأخيرة : توقع الغير متوقع :
محاكمة لصوص (خط هيثرو) مثلاً!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟

15 تعليق

  1. برنجية وكده …………………….اللللللللللللللللللللللللللللللله حلوة حلاة

    1. شوف عينيّ السكر نقع …. مبروكة ومفروكة

    2. كتلوك ولا جوك جوك سلام ، مبارك ، حلاته شنو ؟ الناس تسأل من شدته و ناس تسأل من حلاته ؟؟؟؟؟؟؟؟؟؟؟؟؟؟ عجبى

      1. انت ما ضقتها ولا شنو يا كوكو

      2. قال ليك الما ضاقو ان شاء الله يضوقو ، اصلو الضواقه دى شحتفة روح ساكت ، يا تغتس فيها لى اضنينك يا تجى منسل …………….. عجبى

      3. رانجووو … جربتو ؟؟؟

    3. الشبح … مبروك عودة الحبيب المنتظر .. مالو ياخوي اهي برضو تبقي ليك لحدي ما تلقي حاجة احلي !

  2. برنجيييية هل من مُنازل ؟؟؟؟

    1. هييي ها !!

    2. هييع – انا ولدك يا ابو فيلاديمير !!!

  3. 🙂 تشكرات يا بروف

    1. و ما دوامه .. 🙂

  4. يا بروف لاكين النصيحة دي ما حاااااااااااااارة !
    بي طاري اللغة الحبشية في حي في الرياض اسمو ( غبيرة ) 99 % من سكانه سودانيين وقليل من الصوماليين وما فيه من سعوديين برضو ( مندكرو شكل نوبة ) قالوا جو سعوديين سألو سوداني : ياخوي فين بيت سعيد الحربي ؟ السوداني قال ليهم : سعيد الحربي !؟ لا والله حينا ده ما فيهو اجانب !!!!
    انا بقيت كل يوم احضر برنامج حياة الغاب واقول الحمد لله اهو برضو اننا بشر وفي مخلوقات اقل مننا ..

  5. تعرفو يا شباب و شابات ان النصايح دى فعلا فعالة,, و بصورة او باخرى انا و نفر كريم من اصحابى متبعينها قبل ما البروف يقول لينا عليها (بالفطرة بس و ايمان ساااى كدة) و لقينا ليكم انو مثلا فعلا تقليل اللحوم بيزيد شوية القريشات فى الجيب,, و حنك حنكين مع ست الشاى ممكن تطلع ليك بكباية (فوق البيعة),, و كان على ركوب الحافلة بالشباك دى من زماااان شغالين بيها و حتى مرات فى التصادم الورانى لبصات الاهالى كمان,, الف شكر يا بروف على النصائح الغالية و ارجو ان يستفيد منها بعض السمار ,,,,

  6. جابو لي مولود صراحة وبفكر في كلام البروف المكنيكي ازاني الكهرباي جنني البناء شال شقى عمري الحداد انسى ساكت بس تفكيركم معاي اختار ليهو المهنة المناسبة من هسع راح ابدا شراء في المعدات اعانكم الله وحا اعمل بعدها استخارة وجزاكم الله خيرا لانه حتى لو راحت الاقاذ الرضاعة الحصلت ما راح تخلي البلد تستقر قبل عام الفيل اقصد عام 20000

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: