أموت وأعرف

• أعرف كثيراً من الأسر بناتهن تجاوزن الأربعين ولم يتزوجوا؟ أموت وأعرف النسبة الحقيقية التى بلغتها العنوسة؟ (عشان نعرف مدى إستطاعتنا لمباهاة الأمم وكده) ؟
• كل ما تسأل عن مسئول يقولو ليك مشي (ألمانيا يتعالج) أموت وأعرف المسئولين ديل بيمشوا يتعالجوا في ألمانيا بالذات ليه؟ (سويسرا مالها؟)
• أموت وأعرف اللعيبة بتاعين الكورة بيحتجوا على قرار الحكم عندما يقرر ضربه جزاء؟ (شفتوا ليكم حكم غير رأيو )؟
• كلف خزينة الدولة حوالى ستة ملايين (دولار) .. أموت وأعرف هل تحرك (اليخت الرئاسى) وللا قاعد في بكانو؟
• العلماء بيتكلموا طوالي عن حشمة وزي المرأة أموت وأعرف ليه ما بيتكلموا عن حشمة زي الرجل؟ (يلبس على كيفو يعني؟)
• الختان الفرعوني ، ايقاف بث برنامج اغاني واغاني ، سحب صور النساء من الشوارع الرئيسة ، نصح الشباب بالتعدد في الزيجات، منع دخول المغنية المصرية شيرين للبلاد ، شورت لعيبة الكورة ، شفط الأجنة وأخيراً الكوندوم … هذه بعض القضايا التي أثارها النائب البرلماني دفع الله حسب الرسول والذي علمت أنه (أستاذ جامعي) .. أموت وأعرف (تخصصو) شنو؟
• أولادنا الفنانين بيهتموا بالشكل بتاعهم .. يوم مشاط .. يوم سلاسل .. يوم شنو ما بعرف أموت وأعرف دخل الحاجات دي في الغناء شنو؟
• لا توجد كراسي للإنتظار في مكاتب بلاغات كل أقسام الشرطة السودانية ؟ أموت وأعرف الحكمة من القصة دي شنو؟ (أفرضوا جات عشرة بلاغات في وكت واحد مثلاً)
• الكهرباء بتاعتنا ما عاوزة تستقر ليها أربعين سنة؟ أموت وأعرف الخلل وين؟
• مويتنا تقطع وكان جات تجي مغبشة وعكرانة؟ أموت وأعرف الدول الما عندها أنهار دي بتعمل شنو؟
• المواطن بيتعالج بقروشو .. يعلم أولادو بقروشو .. يسكن بقروشو .. ياكل بقروشو .. يلبس بقروشو .. يشيل نفاياتو بقروشو .. يشرب بقروشو .. يتنقل بقروشو .. يتقاضى بقروشو .. أموت وأعرف الحكومة دي بتعمل في شنو؟ تنظم في الحركة؟
• أصغر (حلة ملاح) بقت عاوزه ليها 50 ألف .. أموت وأعرف مع الغلاء ده الناس المعرسين ليهم أربعة نسوان وفاتحين ليهم أربعة بيوت ديل قاعدين يصرفو عليهم كيف؟
• تفتح أي صحيفة تلاقي صفحة لأخبار الحوادث والجرائم .. وهنالك صحف متخصصة (في الحاجة دى) أموت وأعرف ما فوائد ومغزى نشر الصحف للجرائم .. يعني شنو (القبض على لص تسور حائط منزل؟)
• ذهبت لتجديد (لاحظ تجديد) رخصة قيادتي منتهية الصلاحية فوجدت أن الرسوم 150 ألف أموت وأعرف إرتفاع قيمة الرسوم دي سببها شنو؟ (المواد غالية مثلاً) !!
• مذيعاتنا الفضائيات بالذات غير مقنعات على الإطلاق (شاهد الجزيرة وإنتا تعرف) .. أموت وأعرف على أى أساس يتم إختيارهن (طبعن لو في أساس من أساسو)
• سائقو (الحافلات بالذات) لمن يشوفوك عاوز تدخل الشارع بيزيدو من سرعتهم .. أموت وأعرف القصة دي بتحصل ليه؟ وهل كووولهم متفقين مثلاً السلوك (الردئ ده؟)
• شوارعنا تعاني كثيراً من الحفر ورداءة الأسفلت .. أموت وأعرف بترولنا ده (الزفت بتاعو) بيروح فين؟
• الـ 50 ألف دولار الذي منحها ديوان الزكاة (تبرعاً) قبل أكثر من ست سنوات (لقناة الضحي) الفضائية (الما قامت) .. أموت وأعرف الحصل فيها شنو؟ هل تمت إستعادتها وللا خلاس (نحتسبها) وكده ؟ !!
• ما أن تظهر فضيحة فساد (بالصدفة طبعن) حتى يبادر المسئولون بحظر النشر عن ملابساتها .. أموت وأعرف شنو الحصل في كل (الفضائح) التي تم حظر النشر فيها؟ لا أعتقد أنه لا توجد في كل (الأقطان) أقصد الأقطارحاجة زى دي !
• الخريف تقريباً إنتهى .. أموت أعرف هل الخريف الجاي ح يجي برضو (فجأتن) !
• الحد الأدني للأجور الآن حوالي (ستة كيلو لحمة) .. أموت وأعرف ح يحصل (نص كيلو) متين؟
• لا يوجد إبن مسئول واحد غير ناجح أو عاطل .. أموت وأعرف الذكاء (الجماعي) و(التوفيق) ده بيحصل كيف؟
• جاء في قانون مكافحة التبغ الذي نشر مؤخراً أنه قد تم رصد حافز مالي لكل من يبلغ عن المخالفين .. أموت وأعرف الحافز ده (كم) عشان دي (شغلانه) مش بطالة !

كسرة :
• أموت وأعرف ما هو شعور النائب العام وهو يطالع كسرتنا الثابتة و (واواتها) تقترب من الرقم (عشرة) !!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟

Advertisements

45 تعليق

  1. شوفوا من جبينا صباح والصباح إن لاح لا فائدة في المصباح!!

    1. جداد الخلا …. جداد المدينه ..اموت واعرف الفرق بينهم شنو
      مبروكه عليك ياود الخلا

    2. الشالو ما يتني وما يشيل خِلافو

      1. الشتيلا الفوق تقنتا… ما في السوق عينتا
        يا (جنوبي) قولي متا تسمحو لي بشوفتا الحرقت قلبي محبتا

      2. وين تشوفو تاني ده ركب قطراً طريقو برا هيا وسنكات
        طرق وعره وجروح قلبك مااااا بتبرا ..

      3. لكن ياجنوبي يا صديقي هي مي لشيمة، وأصلها ما سافرت ولا ركبت قطر!!
        وأنت عارف الدوا إلا تكون مع أم منو كدا ماعارف سوا…
        ونظرة نظرة يا يا سديقي يا خالد يا ود مدني!!

      4. هههههههههههههههههههه,,انت يا ود الخلا الليلة ما ماجز ولا شنو !!؟
        مبروكة عليك…

      5. يباركو ليك السمح والجديد يادوك شمباتي
        وأهي فرصة قلما تتكرر مع ناس قوية والمندهش…
        وياسديقي قد راح الجميل
        ولم يقل حتي وداعا” في الرحيل
        فبالله خبرني وعرفني أين سارا يا شمباتي!!!

      6. اجى يااااا الكدة !!؟ سارا شن خبرنى بيها !!؟

      7. يا سديقي حزنت روحي وحنت للتلاقي
        ورنا قلبي الي الماضي وناداني اشيتياقي … او كما قال
        مبروك البرنجية يا ود الخلا
        ظاهر عليها قويه …
        استحملا …
        او قول جلا
        جلا وجلا …
        استحملا …
        او قول جلا
        جلا وجلا …
        للصباح .

    3. طرتونا وتحكرتو يقسي عليك ياودالخلاء

      1. العنبة الرامية فوق بيتنا !!!

      2. ود الخلا & شمباتي انتو البت دي لا تكون سارا ألتكم
        مالا اتخلبطت في الكلام كدي ..

      3. آآفو آبت وراق!! نطرتك إنتي فيشان يتحكر فيها جنوبي!! ده كلام شنو ده عاد؟؟
        أخوك يا بت وراق وكت الخيول يدبكن
        أخوك يابت الرجال وكت الرماح يتشبكن
        أخوك جبل الثبات وكت القواسي يحبكن
        كم بكيت وكم قشيت دموع الببكن
        هييييييييع!!!
        يقسي علي جنوبي وعلي سوات حكومتو..

      4. عاد بعد كلامك وشعرك دا مافي قول

      5. بررررررررررررررردلب أبشري

      6. ايوااا يعني انا ود دكين مش !؟

    4. كفو عليك و الله يا ود الخلا,, جيت من اخر الصف و تووووش فى الاول ,, بالهنا ان شاء الله

  2. انتو الاستاز الفاتح جبره اخو الكابتن فاروق جبره
    اموت واعرف العكسيات الحلوه دي عندهم الاتنين بلعبوها كيف

  3. اموت واعرف النائب النااااااام حايصحى بتين

  4. هناي كيفن ما بتعرف تخصصو ! ما تقنية نظم جنسية !!
    اموت واعرف وزير المالية ح يعوّض العجز بتاع ضرائب
    السجاير ومحلات التمباك من وين ؟
    اموت واخش النار بس اعرف الدفاع الشعبي ده جاب
    القروش دي من وين وليه ما اتبرع بيها للكم وعشرين
    مليون سوداني واتبرع بيها للعشرين نفر بس !!

    1. يعني خلاص بقت على ضريية ولا ضريبتين ،، ما البترول عمل عجز فى الميزانية لمن خلى الناس تكوريك .. الحصل شنو .. الحِميِّر فى طينو
      ما أصلوا العشرين ديل من العشرة المبشرين

      1. مع الزيادات الحاصله دي ممكن نتوقع انو العشره المبشرين بقو العشرين المحفزين بي قروش النفاق الشعبي

  5. نمووووت و نعرف 🙂 .. التحية أستاذنا الفاتح و الأحباب

  6. يابروف جبرا إت قاع تبالغ عدييل كدا!!
    أت لي هسي ما عرفت الحكومة دي قاع تسوي في شنو؟؟

    1. وحات الله الحكومة زاتا مي عارفة هي قع تسوي شنو خلي
      جبرا !! هي سوات نصاح ولا عمايل بني ادمين !!

  7. لن تعرف ، أشبع موت يا محمد أحمد
    الله يطول لينا عمرك وياخدهم كلهم

  8. البروف الحبيب..
    تسلم انت من الموت,,واعرف قدر ما يفيدك !! دى نصيحة مخابراتية طيعا , وى
    اما عن النائب اياه فتخصصو (ما كويس) !! بس

    1. تعرف يا اخ شمباتي .. الراجل ده متخصص دايه .. لانو ما فى زول عندو مصلحه من الزيجات الكثيره دي غير الدايات لانو طالما فى حمل معناها فى ولادة أو تسقيط وفى كل الأحوال الدائه مستفيده

      1. ههههههههههههههههههههه,,داية السمحة دى !!؟
        دا شيتا كتر ما بقدر اجيب اسمو ! اممممممم

  9. اموت واعرف التباديل والتوافيق المدوره للحكومه دي ح يفهموها بتين

    1. التباديل السودانين يمشو ليبيا ولا السعوديه ولا الامارات ولا اي حرب ف البلد دي والحبش والمصرين والهنود والبنغلاديش يجونا هنا معززين …..والتوافيق المسئول يمشي ماليزيا المانيا يتعالجو ويجو الحج السياحي (يسافر وزير يجي القي نفسو والي )

  10. اموت واعرف هي الكوره وينه البكسروا ليها الاستاد
    بالمناسبه ناس الهلال والمريخ ديل وصلوا درجه من السفه يجعل السودان في الوحل والطين اكتر من ما هو فيهو

    1. زمان يا بت وراق كنا بنمشي الكورة اول حاجة نمشي
      نقيف جمب صف اللوج عشان نشوف ناس الطيب عبد الله
      وشاخور وحاج حسن وناس ابو العائلة اما البخشو
      الكورة هسع ديل زمان كان بيغسلوا عربات الناس دي !!
      ربنا يخلي لينا دار الرياضة ام درمان وجمهورا!!
      هسع هلال مريخ بقت لعيبة نازحين وجمهور نازح حتي بتاعين
      التسالي ما ياهم بتاعين التسالي الزمان ..
      من اين اتي هؤلاء آآ من انتم ..

    2. هى الكورة براها .. أنا أموت واعرف واموت تاني واعرف الرياضة زاتها وينها البيعملوا ليها مدينة رياضية وكيلو اللحمة بخمسين جنية واللياقة زاتو وينها مع الملاريا والحميات وحاجات تانية حامياني

  11. اموووت واعرف المسئولين ديل بيناموا شبعانين كيف وحقوق الجوعى ودعواتهم كلها معلقة في رقابهم (السيف ما بدليها دي)

    1. لانو كل سنة بيمشوا الحج ( الماسي ) ويرجعوا يفتحوا صفحة جديدة

  12. ياجماعة الخير اخير موتو موتتكم ساكت لكن مااظن تعرفو شئ
    وكان عرفتو حاتعملوها كلها واوات

    1. الشمار كاتلنا وعاوزين نعرف وبعدها حا نعمل واو ضكر

  13. البروف جبرا والسمار الكرام .
    سلامات ناس الحكومة ديل مفروض يعملوا سقف للعلاج بالخارج ويعملو لجنة لوضع حد أقصى للعلاج وبعدها يلجنو المسؤول العيان . هم دايرين يمسكو نامن يموتو . أسى عليكم الله على عثمان دة موش لوعايز ينزل إنتخابات حقو فى الاول يعملوا ليهو كشف طبى بدل ما يفوز فى الانتخابات وأول حاجة يعملا للبلد يقوم يمشى ألمانيا يتعالج بخمة يوروهات .
    الله فى …..

  14. الأستاذ جبرا والأخوة الأعزاء .. طبعاً الليلة جبرا عملها فينا .. السمار كلهم نسوا البرنجيه الليله كروت مافي ولا شنو.. أنا حاولت ابحث يمين شمال فى الكتب والمجلات والشبكة العنكبوتية علشان أعرف ولو إجابه واحدة لحدى ما الشبكة نفسها سألتني أنها حا تموت وتعرف الإجابات الصحيحة علي الأسئلة وحاولت استعين بصديق وما لقيت واحد نافع ( مش نافع بتاعنا ) .. لان الأسئلة حيرت الكمبيوتر زاتو .. بس انا عندي ليك إجابات على بعض من أسئلتك وتسلم من الموت ياجبره :
    أصغر (حلة ملاح) بقت عاوزه ليها 50 ألف .. أموت وأعرف مع الغلاء ده الناس المعرسين ليهم أربعة نسوان وفاتحين ليهم أربعة بيوت ديل قاعدين يصرفو عليهم كيف؟ أسال دفع الله حسب الرسول مش عامل فيها فحل وكده .. أكان راجل يورينا الإجابة بالقلم والورقة..
    (( أولادنا الفنانين بيهتموا بالشكل بتاعهم .. يوم مشاط .. يوم سلاسل .. يوم شنو ما بعرف ( بناطلين ناصله وقمصان أكمامها قصيرة )أموت وأعرف دخل الحاجات دي في الغناء شنو؟ )) لأنو البسمعوهم هم زاتهم ما عارفين الغنا ده كان بيغنيوه منو.. ترلم ترلم ترلم
    لا توجد كراسي للإنتظار في مكاتب بلاغات كل أقسام الشرطة السودانية ؟ أموت وأعرف الحكمة من القصة دي شنو؟ (أفرضوا جات عشرة بلاغات في وكت واحد مثلاً) علشان تتعب وتزهج وبعدين تقوم تمشي ..
    ذهبت لتجديد (لاحظ تجديد) رخصة قيادتي منتهية الصلاحية فوجدت أن الرسوم 150 ألف أموت وأعرف إرتفاع قيمة الرسوم دي سببها شنو؟ (المواد غالية مثلاً) !! لالالا … علشان رصيدك ما يكمل بسرعة ..
    المواطن بيتعالج بقروشو .. يعلم أولادو بقروشو .. يسكن بقروشو .. ياكل بقروشو .. يلبس بقروشو .. يشيل نفاياتو بقروشو .. يشرب بقروشو .. يتنقل بقروشو .. يتقاضى بقروشو .. أموت وأعرف الحكومة دي بتعمل في شنو؟ تنظم في الحركة؟ بتعمل نايمه
    العلماء بيتكلموا طوالي عن حشمة وزي المرأة أموت وأعرف ليه ما بيتكلموا عن حشمة زي الرجل؟ (يلبس على كيفو يعني؟)لالا الرجالة بقت طايره
    لا يوجد إبن مسئول واحد غير ناجح أو عاطل .. أموت وأعرف الذكاء (الجماعي) و(التوفيق) ده بيحصل كيف؟ سجل نفسك مؤتمر وطني وحا تبقى عبقري فى كل حاجة . كيف تعمل ملايين .. وممكن تفرطق الذره كمان
    كلف خزينة الدولة حوالى ستة ملايين (دولار) .. أموت وأعرف هل تحرك (اليخت الرئاسى) وللا قاعد في بكانو؟ يعني هي بقت على اليخت الرئاسي براه ما حاجات كتيرة كلفت وكلفت وما فى زول جايب خبرها
    أموت وأعرف ما هو شعور النائب العام وهو يطالع كسرتنا الثابتة و (واواتها) تقترب من الرقم (عشرة) !! حا ينتظر الواو الحادية عشر دي دايره سؤال ياجبره

    1. كان علي حلة الملاح انا ذاتي بقدر علي التلاتة والاربعة
      الا الخوف من نقعد نغني يا ناس شوفو لي ( حلل) !! الله
      يرحمك يا عبد الله الطيب يا المرقت الغنية من نفس الرجال .
      هسع كان الواحد لبس سروال وشنّقه فوق للصرة ومغطي
      تحت الركبة يعني ممكن يمشي عاااادي كده في الشارع ويكون
      محتشم ؟ ولا لازم نلبس معاهو طاقية ؟

      1. كدى انت تجرب بدون طاقية أو بدون …………. والتجربة خير برهان وورينا بقى الفتوى حا تقول شنو ..

  15. ناس الحكومة ديل ما يغرك لباسهم والعروض عريانة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: