مش كده وبس !

• إثناء مروري بالقرب من أحد أقسام الشرطة لاحظت أن هنالك جندياً (مفلفل شعرو) ومش كده وبس كمان لابس ليهو بنطلون سيستم (لغير العارفين به ده إسم البنطلون الناصل)
• إذا أردت توصيل الكهرباء لمنزلك فلابد أن تقوم بدفع قيمة أعمدة الكهرباء والأسلاك والعداد ومش كده وبس الحاجات دي كووولها تصبح ملك لشركة الكهرباء
• كثير من الفنانين يتغنون بأغاني الغير بأصواتهم الضعيفة ويغيرون في لحنها وموسيقاها ومش كده وبس كمان يخطئون في نطق مفرداتها .
• كثير من أفراد القوات النظامية يتحدثون بالموبايل وهم يقودون عرباتهم ومش كده وبس مرات كتيرة العربات بتكون بدون لوحات (المواتر ما تديك الدرب) !
• إذا ذهبت مستشفياً إلى أى مستشفى حكومى طالبوك بالقطن والحقن والشاش مش كده وبس ممكن بعد إنقطاع الكهرباء الأخير في مستشفى الخرطوم بسبب نفاذ الجمرة يطالبوك تجيب معاك كهرباء .
• المتسولون في الشوارع أصبحوا يلحو في السؤال حتى بعد أن تقول لهم (الله كريم) مش كده وبس القصة بقت فيها (جرجير هدوم) ولياقه شديدة
• جارنا (صلاح) سطا على منزله لص أخذ كل الموبايلات بالمنزل والرسيفر والتحويشة مش كده وبس وكمان قام بضرب (صينية الفراخ) التى كانت بالثلاجة !
• معظم لاعبينا المعتزلين ليسو خبراء تدريب ويفقعون مرارتنا (المفقوعة أصلاً ) بتحليلاتهم الكروية مش كده وبس ممكن يقولوا ليك مفروض (ريكاردو) يقوم بتغيير اللاعب الفلاني !!
• معظم كليات الطب لدينا ذات أمكانات متواضعه .. لا معامل لا مكتبات لا شنو ما بعرف .. مش كده وبس بعضها لا يوجد بها مشرحة .. (طب نظري وكده) !
• أعطاه جده خمسة جنيهات وطلب منو يجيب ليهو رطل لبن ونص كيلو باسطة وكيس تمباك مش كده وبس وقال ليهو جيب معاك الباقي !
• وأنت في الحافلة تقرأ في جريدة يطل جارك في الكرسي برقبته ليقرأ معك في رزالة غريبة ومش كده وبس ممكن تجي تقلب الصفحة يقول ليك (دقيقة بالله) !
• إنعدم الضبط والربط .. ممكن البت تطلع من الصباح وتجي المساء مش كده وبس وكمان تجيب معاها العشاء لى ناس البيت !
• تحت قبة البرلمان تلاسن العضو المثير للجدل مع وزير الصحة ورفع صوته ومش كده وبس هجم عليه ولو ما حجزوهو كان عاوز يضاربو
• الأفكار الإعلانية لدينا قمة في الركاكة والسذاجة مش كده وبس كمان القصة جابت ليها (صعايدة)
كسرة :
بعض شباب الزمن ده يمحن عديل .. دخلت إلى صالون الحلاقة لأحلق فوجدت شاباُ أمامي يضع على وجهه ماسك من الكريمات .. مش كده وبس وكمان (بيواسوا) ليهو في حواجبينو بالموس !!
كسرة ثابتة :
أخبار ملف خط هيثرو العند النائب العام شنو(ووو ووو ووو)؟

Advertisements

97 تعليق

  1. إدماااان !!!

  2. صباحك جميل يابروف
    البرنجية تحرم على الجميع ادناه

    1. وووب علييييااااااااااااااااااااااااا من حموضيتك !
      شحدت ربى الطبنجة ترجع فيك !
      تاح تراااااح

      1. مُش كدا وبس …. اها تحرم عليك كل يوم تانى بى طريقتك دى 🙂

        شاحد ربى البروف يعلقك زى المندهش دا لامن تستغيث

    2. الليلة يا طبنجة سويتا أبيي عديييل !!

      1. ههههههههه
        التسوى كريت تلقا فى جلدا 🙂

      2. حاج أحمد السلاوى

        طبنجة .. إرهاب عديييييييييل كدا .. شاحد ربى تزور غوانتانامو قبال يقفلوها ..

    3. حاج أحمد السلاوى | رد

      والله يا طبنجة – وما طالبنى حليفة – اليوم قعدت حرست البوست دا من صباح الرحمن كل مرة أدخل اتاوق بدون فايدة .. بس مرقت مشوار سغيروووونى كدا ارجع ألقا العجاجة واصلة السما والطبنجات شغالة يمين وشمال .. الحاصل شنو ؟
      بس شمباتى دا ولدنا راعيهو شوية لأنو لسه سغيرونى وما بقدر على الطبنجات دى ..وهو زاااتو تحت حمايتنا والبهبشو ما بنخليهو .. وقع ليك كلامى ؟؟؟

      1. سلولو..
        تسلم يا حبيب انت,,عليك الله وريهو الطبنجة المصيدة دا ! ترااااااااح…

        طبنجة…
        وووب علييااااااا ! لقيتك صعب بدون تكلة شعب ! اها ما البرنجية دى خليناها ليك تب ,, ان شاءالله تجيب ليك شوال سكر !
        ههههههههههههههههههههه

    4. طمبنجه طمبج القصه طمبجه ، يقدر واحد يطمج القصه زى ما طمبنجه طمبجه و هكذا دواليك …………. عجبى

    5. مفيش مشكلة انت شيل البرنجية وانا بحبس في النهاية

  3. نشوف المندهش عمل شنو

    1. والله يا طارق ارسلتها من قبيييل ولكن جاتني ( تعليقك بإنتظار الموافقة بالنشر ) وأهو منتظرين !!!!!!!!

  4. البروف الحبيب
    أرسلت برنجييييية قوووية ثلاثة مرات مش كده وبس جاتني رسالة (تعليقك بأنتظار الموافقة بالنشر.)

      1. والله العظيم زي ما بقول ليك كده مش كده وبس ……. خليها مستورة ( تمشياً مع فقه السترة)

    1. يعني شنو لو شالوها منك انت ما تخلي روحك رياضية !
      لازم ترمي اللوم علي الحكم يعني ؟
      اكتلني بي طبنجتك واملاني انا رصاص ..

      1. تبرى إنت من الرصاص مش كده وبس إن شاء الله في عدوينك

      2. واااااي انا من حنيتك دي ! ان شاء الله تاني برنجيه
        ما تفوتك ..

      3. مش كدة و بس,, و مشتركة كمان !!!

      4. دا شنو ياااااا مندهش !؟
        انت طلعت كدة ؟؟ وى وى وى
        ههههههههههههههههههههههه,,جنوبى يبرا من لك شر…

  5. والله كلامك كلوا صاح ياأستاذ ود العامل لينا الطمام

  6. لكن يا بروف انت (دفع الله) دا مالو قام يشاكل ويضارب من الصباح ؟؟
    يكون بايت القوا وما جابوا ليهو (عشا) بالليل ولا شنو !!؟
    لووووووووووووووووووووووول

    1. تعرف يا شمباتي الواحد من يحاول يرفع يدو تعرفو فقد المنطق .. والراجل ده زي ما قلت ليك يظهر أنو عاملين فيها فحل على الفاضي .ز بالله عليك الله تصويت وانتخابات ودوشة وبرلمان .. لو راجل صحيح .. كان يتكلم فى البرلمان عن الخريف والشوارع السريعة الضيقة البتكتل الناس يومياً .. لكن الواحد لمن تلقى بتكلم كتير فى حاجة معينة وبالذات الحاجات دي ( الواقي الذكري ) وغيرها تعرفو جعجاع ساكت وشايل شراب مليان تراب

      1. ههههههههههههههههههه,,لا فض فوك يا حبيب,,,
        يكون عاضاهو نعجة !!؟ وى وى وى

    2. تكون بايته معاهو بس ما زي اب اربعة هع

  7. الاخ جبرا سلامات
    بقينا نخش برانا ونعلق ونمرق لا كباية ليمون ولا هزة كانون موش كده وبس اظنك اكتفيت بى ناس الفيس بوك

    1. بت وراق …. سلامات
      مش كده وبس .. برضو ما حا يرد عليك

      1. موش بالله يالمندهش
        جبرا دا لو ما قادر على البيتين يطلقنا وبيت الفيس بوك حلال علبهو

      2. ما قااادر على البيتين ؟؟؟؟؟؟ !!!!
        الناس عامله أربعة بيوت وأربعة تااااني فوق البيعة وما قالو أح … تقولي بيتين !! إتلومتي لكن

      3. هههههههههههههههههه,,اريتكم ما اصحابا لى !
        دا يشد والتانى يزيدو مروة !
        جبرا دا اخير تنسوا جيتو وتركزوا مع البوستات والبرنجيات ! آييييي
        هههههههه

    2. مش كدا وبس.. تانى تجى محل التعليق دا بى طبنجتك
      البلد دى غير القلع فيها شنو؟؟
      (غايتو البروف لو جا فوق التعليق الشافنى بكابس زييك بكرة ماكضب)

  8. غايتو شباب الزمن ده حقو براااو ! زمان كنا نخاف
    علي بناتنا قبل العرس ونطمن عليهن بعده هسع نطمن
    عليهن قبلو ونخاف عليهن بعده !!
    وحات الله شباب الزمن ده كان الله ما ستر وجابو ليهم
    غرف الساونا دي كان إدخنوا عديييييل !!
    الحمد لله موضة السستم دي ما جات زمن البصات ديك
    وحات الله زمان تكون رافع البنطلون للصرة برضو ناس
    حجازي ديك يكون عندهم عشم !!
    المشارح والبزار لزومو شنو ما قاعدين يطبقوا العملي
    فينا بعد التخرج ونحنا شعب يعجب مؤمنين بالقضاء والقدر
    لدرجة قف تأمل !!وكان الطبيب غلط عاااادي ما حاجة
    مكتوبة والمكتوب في الجبين لابد تشوفو العين !!
    إلا كمان عسكري يدق سستم وبي رواية اخري (اديني حقنة )
    دي دايرة الزول يعمل شخيط ولا يا ربي يكون بدل الشريط !

    1. حاج أحمد السلاوى | رد

      الجنوبى .. الله يجازيك ويجازى محنك .. ضحكت لامن الناس الجنبى قالوا الزول السودانى دا جنّ ولا شنو ..وخصوصاً عشم ناس حجازى دى قلبت فيها هوبة عديييييييل كدا ..
      البنطلون السيستم طبعن فى السعودية بيسموهو طيّحنى .. انا ما قدرت أفهم بعد ما يطيحهو يسووا ليهو شنو تانى ..غايتو يا جنوبى ناس حجازى كانوا حيتفسحوا لو لو حضروا طيحنى فى الحليج ..
      وخلونا النشوف آخرتا شنو ..مش كدا وبس ويدينا خيرها ..

      1. حاج أحمد …
        الأولاد نزّلوا البنطلون …. طيحنيّ
        والبنات رفعوا الإسكيرت …. شطفنيّ … ودي ناس حجازي ما عندهم بيها شغلة ولا شنو يا جنوبي ؟؟؟

    2. و اللاهى دى بااااالغتا فيها عدييييل كدة يا جنوبى,, و صدقنى انتا المفروض تكون صاحب البرنجية مشترك مع البروف,, و ذكرتنى زمن جميل لامن كنا بنركب خط الصحافة زلط من جنب حديقة القرشى ماشى و جاى عشان الونسة و جرجرة الزمن ,,, ربنا يسعد ايامك دايما

      1. من انت يا فلاديمير ؟؟؟

      2. بتسأل لييييه؟؟ انت قايلنى منو !! و الا ياربى كنت من الشلة المعانا فى الخط دة ؟؟؟

      3. قايلك نص مدنى

      4. يمكن قايلك من انصار الشيخ سيرو هع

    3. Like 🙂

    4. الله يجازي محنك … ضحكتنا اضحك الله سنك … لكن ذكرتني زرة اتزريتا في دفار الجرافه البودي تربية الخرطوم … غايتو الله يسامح الجميع !!!!

      1. هههههههههههههههههههههااى,,جنوبى اسمح لى اشد على يدك مهنئا ,
        مرقت حاجات وكشفت ناسات ! اممممممممم
        غادى غادى

      2. مالو يا شمباتي ياخوي ياخ . ما تخلي الناس تتذكر شين
        الماضي البقي سمح الحاضر ده شوية ياخ !
        حاج السلاوي اخوي ان شاء الله ما تلقي الا اليضحكك
        هي الدنيا دي شن فيها غير لمة ناس في فرح .

      3. هههههههههههههههه,,,اليتذكروا لكن خالد مدنى دا بالذات قبيل اتحنفشلو فوق شئ كدة التقول على اللحو ! وى

  9. كسرة :
    بعض شباب الزمن ده يمحن عديل .. دخلت إلى صالون الحلاقة لأحلق فوجدت شاباُ أمامي يضع على وجهه ماسك من الكريمات .. مش كده وبس وكمان (بيواسوا) ليهو في حواجبينو بالموس !!
    .. 🙂 و بس

    1. بشيلوا ليه شعر رجليه بالحلاوة ومش كده وبس وحاجات تانية .. هاك يازمن

      1. حاجات ثانية حامياك ههههههه

    2. هههههههههههه وده لو خلعتو احتمال كبير يقول ليك سجميييييييييي

  10. تقول منظمة الصحة العالمية إن القاعدة الأساسية لتوزيع الأطباء في أي بلد، أن يكون (160) طبيباً (مئة وستون) مقابل (100) ألف مواطن (مئة ألف).
    في ولاية الخرطوم – مثلاً – وهي التي تعاني من (تخمة الأطباء)، فإن (45) طبيباً فقط يقابلون (100) ألف مواطن..!! أي حوالي (ربع) العدد المطلوب وفق مواصفات الصحة العالمية مش كده وبس البروفيسور “مأمون حميدة” يزعم أن لدينا (فائضاً) من الدكاترة ونشجع هجرتهم للخارج

    1. حاج أحمد السلاوى | رد

      المندهش المستغرش الأممى ..وزير المالية قال نحنا بنصدر الدهب والماشية والنبق .. مش كدا وبس ناس يسن شمباتى كمان ( الدكاترة ) .. تقول لى قال ليك ؟

      1. طااااااااااااااااااخ

    2. يا زول هنا بيقولوا ليك في الهينة والقاسية قال الله وقال الرسول سااااااااااااااااااااااااااااااكت منظمة صحة شنو

    3. مامون خم ايده مين يا جدع

  11. احسن حاجه عمله اللص انو ضرب صينية الجداد بتاعت صلاح هو داتو بتاع بوبار الايام دي في جداد بدخله التلاجه

    1. و الله ختفتيها من طرف كيبوردى,, اولا هو وين الجداد اللى بيفضل لامن يدخلوهو التلاجة,, بالله عليك امان الله اليومين دى الكسرة بالموية و البصل و الطماطم صحنا زاتو ما يصل الماسورة للغسيل !!!

  12. كسره غير ثابته : اخبار كبرى الدباسبن

  13. اول مشاركة حقيقة شى يفرح بالجد النقاش الدير نقاش حضارى ونقد بنا و روح مرحة كنت اعتقد انا انعدمت فى السودنيين

  14. اذا اردت ان تبنى بيتك يطالبونك بدفع رسوم (الصرف الصحى) مع العلم انك انت اللى حتحفر البير و السبتن-تنك و تعمل التوصيلات و لما تتملى انت المسئول عن تفريغها,,و مش كدة وبس لو ما دفعت يجيك مهندس الاراضى و يدفعك غرامة على عدم الدفع !!! و عجبى يا كوكو

  15. سنة 2009 بعض الشباب بقو يلبسو وردى – سنة 2010 بعض الشباب بقو يلبسو طوق فى الشعر – سنة 2011 بعض الشباب بقو يلبسو اسوارات – سنة 2012 بعض الشباب بقو يصبغو شعورهم اشقر – السنة ان شاء الله لو شدو حيلهم شوية اكييد بتجيهم الدورة !!!!!!

    1. كدة لا !! ما معانا

    2. ههههههههههه هسع الزول ده نصيح ؟

    3. وديل انشاء الله لو ربنا هداهم وسمعو اشرطه دينيه ممكن عادي يلبسو النقاب!!

      1. كده لا !! نقاب ما معانا

  16. فلاد … سلام تقصد الدوره الاولمبيه ما هى كل اربعه ، اكيد تلقاها جات ، بعد ده حينتقل الانجاب من ناس بت وراق لى ناس ولد وراق ، والعهده على الراوى …………… عجبى

    1. كده لا !! انجاب ما معانا

      1. المندهش !
        كدة لا ! ما معانا ! طاااااااااااااخ

  17. سلام ياقبيلة،،
    غايتو حكايتكم بقت حكاية، شغالين لي بالفارغة والمقدودة، ومش كدة وبس تعليقاتكم زاتها بقت مي ياها!!
    وأقول ليكم حاجة تانية مش كدا وبس، وزي ما قالت بت وراق جبرا زاتو قنع من خير فيكم، ويمم شطر الفيّاسة أو كما قالت بت وراق!!
    أين ذلك السوداني الذي لم يعجبه العجب ولا الصيام في رجب،،،،
    غايتو جنس غايتو!!!

    1. خليهو يجى عشان اديهو ليك فرار فى نص راسو لمن يفتخر جد جد !
      انا اخوك آ تمودة …

    2. ود الخلا ياخوي غصبن عننا والله والعلينا كتر بالحييييل
      وبقينا لا قادرين نعيش بره ولا عارفين نرجع جوه , حتي
      اولادنا خفنا عليهم من مياعة الخليج قابلتنا مياعة
      العبيد , كدي قارن بين الاجيال وورينا مكان الفخر
      شنو من الاعراب عشان نفخر !!

      1. هي لا كين يا جنوبي ياخوي تقوموا تفكوا الدرب عدييل ،ولا أقول ليك حاجة كمان أنتو مش فكيتو الدرب ده إنتو مشيتو أم فكو!!!!

      2. ههههههههه الله يفكفك راسك الناشف ده ! نفسي اعرف
        انت مركب ياتو برنامج بتاع حماية المحصنك من كل
        فايروسات الحكومة وبعض الشعب الفضل ده !!!!
        إهههي وانا اقول الهواء البااارد الضاربني ده شنو ؟

    3. ود الخلا … سلامات
      لدى الناس ما ثقل حمله وصعب فهمه وبالطبع فإن المحنة لا تخلو من فكاهة، وقديماً قيل شر البلية ما يضحك وخير البلية ما يدعو الناس للتأمل والتدبر والتفكير …. فبررراحه على الجماعة خليهم يضحكوا على حالهم شوية حتى لو كانو ماشين أم فكو وووو

    4. والله ياود الخلاء دا الاحساس البقيت حاسهوا وسالت عن اخونا جبرا ما يكون مستاء مننا كلنا الزول كان بفرق شويه او بتنفس لكن النفس ريحته اتقيرت والقطر فكه دربو عشان كده بنقول للجميع مع السلامه والعفو والعافيه

      1. هيييييي ده شنو كمان يا بت وراق ؟؟؟؟؟؟ !!!!!!

  18. ذمااااااااااااااااااان بدري اهلنا قالو تعيش كتير تشوف اكتر نسال الله الستر لنا وللجيع

    1. سلام ابو خليل زماااااااااااااااان ماقالو كده ، قالو تعيش كتير تشوف كتتير تلف ( برنجيه ) تشوف اكتر ، والعهده على الراوى ……………… عجبى

  19. إنعدم الضبط والربط .. ممكن البت تطلع من الصباح وتجي المساء مش كده وبس وكمان تجيب معاها العشاء لى ناس البيت …..ده لو اصلا جات ف نفس اليوم

  20. لاحولتن …
    آآآآآنآآآآآس .
    الحكاية ؟؟؟

    1. الاخوه / صاحب القمردينه وسمارها
      الاعتراف بالذنب فضيلة وانا اعترف اني اكتر واحد فيكم
      لسانه زِفر واعتذر للجميع وما يرضيني انسحاب أي فرد
      وجدته امامي في القمردينه , وبرضو لأني متأكد اني
      ما ممكن اغيّر اسلوبي لذلك اعتذر عن ما مضي وانسحب
      حفاظا علي جمعكم .
      استفدت من سمركم الكثير ولكم العتبي بقدر ما استفدت .
      بعضكم تمنيت لقياه وسألقاه باذن الله .بس انتو خلوا باب
      الريد متاكا …

      1. الاخ حنين مداخلتي دي ما عندها ايي دخل بي مشاركتك
        والله العظيم بس المشكلة مربع الرد التحت ابا يفتح
        معاي وكان لازم اعمل رد لمشاركة ..

      2. يا ساير يا ماشي النظرة ماشة وراك وقف وقف وسوقني معاك!!!
        سادتي الأكارم ها هي بنت الشيخ وراق والصديق جنوبي يفارقون الساحة آسفون ومتأسفين، وبخروجهم تسقط آخر الأزهار والرياحين بالقمردينة، كما تساقطت قبلهم أزاهير آثروا في صمت مغادرة المكان برغم ألم الفراق ولكنها الأقدار!!!
        فماذا أنتم قائلون لهم؟؟؟

      3. لقد شاركتوا القلوب فى موضعن وعلى كل حال
        نفداكم بالنفوس وفداء النفوس كان المحال!!

      4. كلو منك يا ود الخلا !!
        لينا شهور بالحالة دى ولا فى زول نقنق ولا زول قال الكلام دا عوج ,,
        جيت ناقز ومعاك السودانى المطرطش داك وشلتو راية الدين المقدودة دى وفرتقتوا الحلة !

        الحبيب جنوبى…
        بالله عليك سيبك من الحماقة والنفيخ دا وابقى راكز !
        الزفارة جاية من تجار الدين والكضابين البلحسوا كلامهم والشمس حية !
        الله لا يفرق جمعنا بى هينة…

      5. آ يس تجار الدين الشوية دي

      6. جنوبى .. كدى قول بسم الله وورينا الحاصل شنو ..والإنسحاب دا إستراحة محارب ولا شيتن كُتر ..؟
        دايرين نعرف السبب … مجرد شمارات … ناااااااااااااااااااااااشفة ..
        وخلونا النشوف آخرتا شنو …!!!

      7. الأخ حنوبي
        كَـــم هــو جميل عندما تكتب مداخة …قد يراهـــا البعـــض جميلــــه…و يراهــــا البعــــض معبـــّره…و يراهــــا آخرون بلا معنــــى !!!! لكــــنك أنت الوحيــــد الذي تعلـــــم عندمـــــا تكتبهــا ماذا يوجــد وراء كواليـــــسها.. فأرجوك إنتظر قليلاً لنرى ما سيكون …

      8. الغلبان..
        تجار لكن تجارتهم بايرة !

        المندهش….
        باذن الله لن يذهبوا,,,فنحن نفهمهم ونستلذ كتاباتهم ,,
        ومن لا يعجبه الامر فليطلب التغيير باسلوب طيب..

  21. صراحة انا ما عندي شي غير بكاء الرجال ولقد بلغ السيل الذبى ونقول لامنا الحكومة يا اسلمينا يا روحي خلينا الله ؟

  22. السلام عليكم

  23. السمار الكرام ..
    بت وراق . جنوبي . ود الخلا ………..
    أتودون قفل الشباك الذي نتنفس منه .. إذاً فليكن الإنتحار جماعياً .. ومن هنا أتوجه للبروف العزيز بإغلاق المدونة نهائياً وزي ما إلتقينا بالمعروف فلنفترق بالمعروف ونموت إختناقاً

    1. المندهش وصاحب الإندهاشة الكبرى .. اضم صوتى إلى صوتك ..بس موضوع الإلغاء دا يتم تأجيله لحين إنعقاد الدورة القادمة للأمم المتحدة فى بيت المال ..
      وعاوزين نعرف الحاصل شنو .. فى الإنتحارات الجماعية دى .. اقصد الإنسحابات ..
      ممكن ؟؟؟؟
      البروف الفاتح .. مطلوب تدخل سريع حتى لو كان أممى أو إقليمى ..

      1. هههههههههههههههههههه,,بتعرف التمييع كويس انت يا سلولو !!

        المندهش الحبيب…
        يغلق شنو انت كمان !!؟ امانة ما اتلومت,,
        كل فرد حر فى البقاء او الذهاب ,, لكن يوجد من هم على العهد والوداد ,,
        وهنالك عالم تطالع وتتطلع لكن لا تكتب , فما ذنبهم ؟؟
        بعدين يا حبيب دا مخطط قدييييم احنا ناقشنو كويس !
        خلينى ليهم بس..

  24. لكن ما تعاقبونا بجريرة غيرنا يا قمرداينة .. خليكم حلوين .. وخلو الروح رياضية .. لو الحرد بجيب فايدة أهو حردنا ليهم البلد مما كانت مليون ميل .. ما لم ما مشوا .. ؟؟ أستغفروا ربكم .. والجاتك في مالك سامحتك (دا لو أساساً ‘نت عندك مال) .. فيا شباب أدونا فرصة تانية .. وما تلقوا إلا ما يسركم … !!!

    كسرة بملاح:
    لكن يا بروف … لحقت النائب العام في الفتح … بت وراق دي لمن حسها إنقرش .. ما تهببوا ليها !!

  25. يااااااااااا أب أحمد … ياااا أسطورة الماضي ما الذي أحياك؟؟؟؟
    أين انت يا صديقي ، أقرب الأقربين وأبعدهم عنا ياااخ حرام عليك!!
    تصدق طناش أخونا جبرا ده حيرني أنا ذاتي، وقلت تعرف ياود إلا يكون جبرا ده ماخد موقف ما …
    يعني .. مثلا”… تكونش بت وراق دي ما بت وراق..
    ولد وراق مثلا”!!
    ربما….
    حيرتوووووونا!!!!!!!

  26. تسلم يا ود الخلا .. الرفيق الماك فسل
    ربنا يديم الإلفة بين الناس .. والدنيا دي فيها شنو غير لمة ناس في خير وقرقراب يجيب الطاشي ؟
    البروف بالغ بوليغ السواد … !! مش فتح لبت وراق .. دا حتى كمان جا نزل المواضيع الجديدة وما عبرنا كلنا !!
    الحل نعمل ليهو كسرة دايمة تكون:
    عملت لينا شنو في طلب بت وراق الفي موضوع (مش كدة وبس) ..
    وكل شهر نزيد كلمة (بس) سين .. لحدي ما نشوف الحدوت .. ولا الراي شنو ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: