ياها ذااااتا

بينما كنت جالساً ممداً رجلي تحت المكتب الخشبي أحسست بلمسات خفيفة على قدمي فضربتها لا شعوريا على الأرض فإذا به (صرصور) عسلي اللون ذو شوارب طويلة يحركهما يمنة ويساراً كما (منشات العربة) .. حملت المسطرة الحديدية التي على المكتب لأقضي عليه .. لدهشتى صاح في قائلاً :
– مالك عاوز تكتلني ؟ أنا هسه عملتا ليكا شنو؟
ألجمتني الدهشة فواصل قائلاً :
– يا أستاذ إنتو الظلم ده ما بتقولو كعب !
قبل أن أرد عليه قلت في نفسي (الصرصور) ده الظاهر عليهو ناشط حقوقي من شنباتو دي !
– (وأنا أهرشه رغم المفاجأة) : طالع ليا فى كراعي وكمان ما عملتا حاجة؟ ده هسه مش أعتداء على حرياتي؟
هنا ضحك الصرصور ضحكة مجلجلة (بالنسبة ليهو طبعن) وقال لي :
– بالله هو حرياتكم دي بتدافعوا عنها للدرجة دي؟ يعني هسه عشان إتسلقت في كراعك دي عاوز تنهيني من الوجود؟
– (في صرامة) : شوف هنا للدرجة دي للدرجة ديكا ده شئ ما بخصك إنتا غلطتا ولازم تتحاسب
– يعني هسه إنتو البغلط عندكم طوااالي بتحاسبوهو؟
– والله مش بالضبط كده .. يعني بنعمل ليهو لجنة تقصي حقائق تنبثق عنها كم لجنة كده وبنحقق معاهو والموضوع بعد داك بيمشي النيابة يقعد ليهو مسافة لمن يفحصوهو ويمحصوهو وبعد النيابة بيمشي القضاء كمان يقعد ليهو شوية كده و..
– شوف العدل يا أستاذ عندكم نفسو طويل كيف؟ سنين حتين الزول يتحاسب وإنتا يا أستاذ بعد ثانية واحده عاوز تزهق ليك روح بريئة !
– والله كلامك برضو فيهو منطق !
– أيوة بدل ما تضربني تودينى الآخرة ساااكت كده كان تسألنى ليه أنا كنتا بجري وإنعكلتا في كراعك ؟ (يشيل نفسو) إنتا هسه يا أستاذ ما شامي ليك بمبان ؟
– بمبان شنو إنتو كمان عندكم بنمبان ؟
– ومظاهرات كمان !!
– (في تعجب): شنووو؟ مظاهرات؟ يعني زادو ليكم البنزين وللا رفعوا ليكم الكهرباء؟
– الأكل يا استاذ .. الأكل يا أستاذ.. ما قادرين ناكل .. زماااانك أي مواطن منكم حتى لو كان موظف صغير ممكن ياكل لحمة منقة تفاح برتكان ويمشي (الحفرة) ونمشي وراهو .. هسه البياكلو تفاح ولحمة ومنقة وبرتكان هم ناس (السيراميك) و (السايفونات) ويضغطوا الزر و(أكلنا) كووولو يروح شمار في مرقة ..هسه يا أستاذ ناس (الحفرة) ديل خلاس (نشفوا) وأكلنا كووولو منهم بقى بواقي (بوش) وطعمية لمن الصراصير دى جاتا أنيميا ..
– وهسه إنتو بتشتكو لي منو يعني؟ أكيد عندكم حكومة ومسئولين؟
– والله من ناحية عندنا حكومة عندنا ما شايف البمبان ده ! لكن مسئولين لا
– كيفن يعني ما عندكم مسئولين ؟
– طيب يا أستاذ ممكن تمشي معاي وتشيل ليا الغطاء بتاع البلاعة بتاعتكم دى
عشان أوريك المسئولين ؟
بالفعل قمت من مقعدي متجهاً إلى البلاعة (في الحوش) وهو يسير خلفي بسرعة (صفر/ الثانية) ..
– أفتح يا أستاذ غطاء البلاعة ده
قمت بفتح غطاء البلاعة فإذا بي أفاجأ بمجموعات من الصراصير .. كل مجموعة تتكون من خمسة صراصير ..

– ديل أكيد المسئولين بتاعنكم وكل خمسة مسئولين قاعدين في إجتماع يخططوا ليكم في المستقبل
– مستقبل شنو يا استاذ؟
– طيب يكون ده الميز بتاع المسئولين العزابه .. كل خمسة في شقة؟
– عزابة شنو يا أستاذ .. الشايفو ده كل مسئول ومعاهو حريمو !!
ثم إلتفت نحوي قائلاً :
– يا أستاذ عليك الله هسه تفتكر الصراصير دي متطلباتا كتيرة ! لا عاوزين تعليم ولا عاوزين علاج ولا كهرباء .. عاوزين ناكل بس أكل ما نلقاهو؟
– والله أخير نحنا الأكل رااااقد لكن قروش مافي .. بي مناسبة القروش دي مش إحتمال الدولة بتاعتكم تكون عاملة تقشف وكده؟
– (يضحك) .. يا أستاذ نتقشف أكتر من كده … إنتا قايلنا بناكل تفاح !!
– بالمناسبة دي عندك أولاد؟
– هسه ولا قبل شوية ؟
– ما فاهم ..
– كان عندى أربعة أولاد قبل شوية ماتو في المظاهرة دي !!
– وإنتو غير المظاهرات دي ما عندكم وسيلة تعبير ورفض تاني؟
– والله يا أستاذ قاعدين نتكلم لكن مافيش حد سامعنا وللا مهببوا لينا
– والقصة دي طولت؟
– والله بيقولوا من جدي الـ 1286 كان عايش !!
– والحكومة ياها الحكومة ..؟
– تتصور يا أستاذ .. الحكومة ياها الحكومة ……….. ذاااتا !!

كسرة :
نطالب حكومتنا بتخفيض أسعار المواد الغذائية لتكون في متناول عامة الناس .. حتي لا تستمر مظاهرات الصراصير الإحتجاجية !!
كسرة :
أخبار ملف خط هيثرو العند النائب العام شنو(ووو ووو ووو)؟

Advertisements

19 تعليق

  1. برنجيييييييييية

    1. ولا سمحة !!

      1. زمت السماحة راح خلاص هئ هئ هئ

      2. ههههههههههههههه,,لا والله,,
        دا احنا اهل الفرحة جييينا,,

      1. تشيلك عافيتك انت !
        لكن عجبنى ليك آييييييي

  2. تخيل الصراصير دي اجمل بلاغة تصويرية تحكي بيها مأساتنا.

  3. قبل أن أرد عليه قلت في نفسي (الصرصور) ده الظاهر عليهو ناشط حقوقي من شنباتو دي !
    .. 🙂 إبداع أستاذنا الفاتح

    1. 🙂 حسع يا بروف و الأحباب (ممالك) الحشرات فيها أنظمة و قوانين و جيوش و برلمانات كمان 🙂

      1. و رغم دا و كونها حشرات بس (تندر) فيها و بيناتها (حركات التمرد) و (الإنقلابات) .. 🙂

      2. يكون السبب شنو؟!!
        ؛)

      3. يمكن دي (الخيارات) :
        1ـ حكم القوي .. 2ـ الرضى .. 3ـ سقف الحريات .. 4 ـ خليها مستورة
        🙂

  4. لكن باقي لى بعد الاتفاقيه دي الذادت البصل من ٩ لى ١٦ فى لمح البصل عفو البصر الله يستر وتكون اتفاقيه كارثيه جديده والله يستر

    النائب العام قام ولا لسه

  5. يا محمد الحسن يا أـخوي الليلة تقدل براك ياحليل ناس جنوبي وفلاديمير وبت وراق

  6. البروف والسمار .
    سلامات .
    ياحليل زمن الحفر بتتملى فى تلاتة سنة.
    أسى لوداير الحفرة تتملى إلا تأجر بيتك لى حبش…

  7. (نطالب حكومتنا بتخفيض أسعار المواد الغذائية لتكون فى متناول عامة الناس … حتى لا تستمر مظاهرات الصراصير الإحتجاجية) قمة فى الإبداع يا أستاذ ، تصوير وتبرير بديع لا يصدر إلا من مبدع، حياك الله وأبقاك ، ونحن معاك نتمنى إيقاف مظاهرات الصراصير الإحتجاجية ، بس باقى ليك بعد اتفاقية الخوازيق الأربعة دى فى أمل ؟؟

  8. أهااااااااا وبعدين !!!!!!!!!!!!!

  9. تعيش الصراصير رغم انف الجوع والحكومة الما سائلة فيها

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: